رواية ريله الفصل التاسع 9 بقلم مها حولي الزاكي
كنت في المطبخ بغسل في عدة الشاي و الجبنه العملتها للجيران الجو يشوفو يوسف و يكفرو ليهو، لما سمعت صوت الباب، جيت طالعه من المطبخ عشان أمشي افتحو بس يوسف منعني و قال لي بفتحو أنا، قلت ليهو لا شوف حالتك! خليهو بفتحو أنا.... ما رد علي و طوالي مشى فتح الباب بعدها سمعت صوت حبوبه الزينه و صوت هنادي و بدور كمان!
جو داخلين مع يوسف و حبوبه الزينه تتحسبن ساي في أسعد، سلموا علي بخشمهم و قعدوا إلا بدور سلمت علي في يدي، جبت ليهم مويه و قعدت، حبوبتو قالت ليهو اها المُغضب داك عملت ليهو شنو؟؟ شفت أوووعك تخليهو و كلنا ما بنخليهو، هنادي قالت ليهو صحي ودوهو القسم؟ قال ليها ايوه و لهسي قاعد هناك، حبوبتو قالت ليهو داير منك شنو هو؟؟ مالو معاك؟
هنا يوسف عاين لي و ما رد عليها، طبعاً هو من أمبارح بعد ما رجعنا من المستشفى اتغير علي! و لمن كنت بحاول أحكي ليهو الحصل بالتفصيل كان بتهرب مني و بقول لي تعبان أو نعسان!
بعد مسافه رد على حبوبتو و قال ليها اتطاول علي و ما قدرت استحمل سخافتو، هنادي قالت ليهو هو مش جاك هنا في البيت؟ جا لشنو يعني و اتساخف معاك كيف يعني؟؟..... هنا بدور اتدخلت و قالت ليهم يا جماعه ما تكترو عليهو الأسئله، يوسف لسه تعبان! حبوبتو قالت ليها كلامك صح، المهم خليتهم بتونسوا و مشيت عملت ليهم شاي، لمن جبتو ليهم يوسف كان بسألهم عن أمو، عاينوا لبعض و سكتوا، هنا هو استغرب و قال ليهم في شنو؟؟ مالا أمي؟ ليه ما جات؟
هنادي قالت ليهو والله يا يوسف عمتي دي زعلانه، قال ليها من شنو؟ قالت ليهو هوووي يا يوسف والله نحنا ما جاين نفتن و نسوط، أمك زعلانه و خلاص و سبب زعلها دا إلا تمشي ليها انت بعد تبقى كويس و تسألها منو!
يوسف عاين لحبوبتو و قال ليها في شنو يا حبوبه الزينه! قولي لي انتي أمي مالا؟ زعلانه من شنو؟ قالت ليهو أمشي ليها خليها تحكي ليك..... لمن وقف عشان يمشي أنا وقفتو و قلت ليهو أنا بحكي ليك مالا أمك ☺️
طبعاً أنا ما كنت عايزا أحكي ليوسف بالحصل بيني و بين أهلو أمبارح و ما عايزا أزيدها عليهو و كنت حأخلي الحصل يكون بيني و بينهم فقط، بس بما انهم عايزين يوسف يعرف فالأفضل يعرف مني أنا عشان ما تحصل أي زيادات أو إضافات تغير حقيقة الحصل، أصلا كلامهم القبل شويه دا و سؤالهم عن أسعد و إصرارهم لمعرفة أدق تفاصيل الحصل أكبر دليل على انهم عايزين فتن و مشاكل، حبوبه الزينه و بدور أنا ما عارفه نظرتهم لي شنو و صفاتهم و نواياهم شنو ، بس هنادي أنا بعرفها كويس و عارفاها بتاعة حركات و بتحب الفتن زي عيونها...
المهم يوسف إتلفت علي بإستغراب و قال لي سامعك يا ريله الحصل شنو؟
حبوبتو طوااالي اتدخلت و قالت ليهو امبارح البنيات ديل اتشاكلن و ضربن بعض و حصلت جوطه كبيره و أمك زعلت! قال ليها متين الكلام دا و ديل منو الإتشاكلو و أساساً سبب الشكله شنو؟
طوالي أنا سبقتها و حكيت ليهو بالكلام القالتو أختو يمنى عني امبارح قدام النسوان، و قلت ليهو أنا ضربتها كف لأنها اتجاوزت حدودها معاي و عمتي ما قدرت تستحمل و كانت ح تضربني بس منعتها ف حصلت جوطه و هي زعلت و مشت!
هنادي قالت لي انتي غلطانه يا ريله! عمتي دي أكبر منك فما كان تحرجيها و تصغريها قدام النسوان، قلت ليها ما كان أحرجها و أصغرها قدام النسوان؟ قصدك كان أخليها تضربني كف عشان ما تحس بالإحراج قدام النسوان؟!!
طبعاً هنا يوسف عاين لي بإستغراب و كان زي الزول المصدوم، حبوبتو قالت لي ما قلنا ليك خليها تضربك كف و الما بنرضاهو لـ يمنى ما بنرضاهو ليك، لكن انتي النصيحه أسلوبك كان كعب! على الأقل كان تخلي النسوان يمشوا بعد داك لو مسكتي يمنى دي و دفستيها في الأرض و كفتيها ماف زول بسألك لكن تضربيها قدام النسوان و تتجادلي من نسيبتك يلي هي في مقام أمك!... قولي هي غلطت تقومي انتي تعالجي الغلط بغلط أكبر منو؟؟
هنادي قالت ليها لكن يا حبوبه لو جينا للحق يمنى ما غلطت، يمنى استفزاها سكوت ريله، يوسف دا من رفعوهو و ودوهو المستشفى نحنا بنسأل فيها الحصل شنو و هي ساكته، اها الجارات قالو أسعد كان في بيتها و يوسف اتضارب معاهو، صدقني يا يوسف حتى بعد كلام النسوان عنها ما اسأنا الظن فيها و بكل أدب و إحترام قلنا ليها يا ريله أسعد جا بيتكم ليه و الحصل شنو بينو و بين يوسف و برضو كانت سااااكته مع انها سامعه كلام النسوان القالنو بخصوص الموضوع دا! و سبحان الله ما استفزاها الكلام دا إلا لمن قالتو ليها يمنى، طوالي قامت و ضربتها لمن جات واقعه!
طبعاً أنا انحرقت و اتغظت غيظ ما عادي و فجأه كدا لقيت نفسي هايجه في هنادي و لمن حبوبه الزينه فتحت خشمها معاي طوااالي أديتها حقها و قلت ليها احترمي عمرك، انتي مراه كبيره ، ام و حبوبه فمفروض تكوني واااعيه شويه و تتصرفي بحكمه مش تصغري عقلك و تتصرفي تصرفات مراهقين! يعني إذا الحبوبه بتتصرف كدا نتوقع شنو من الأحفاد؟
طبعاً في اللحظه ديك يوسف عصب و هرشني و قال لي ريله احترمي نفسك!.... حبوبتو طوااالي وقفت على حيلها و قالت لي: لو قايله إنو بإسلوبك دا بتنفريني من ولد بتي و بيتو كضابه والله، لو زعلتي أمو منو أنا ما بتزعليني منو، هسي حأمشي لكن دا ما معناهو إني بقيف من بيت ولدي و نصيحه مني ليك: حسني أخلاقك و أسلوبك عشان ما تنفري الناس منك و يجيك يوم تلقي نفسك براك! الكعوبيه و شناة القلب بتضر سيدا...
قالت كدا و اتحركت و يوسف يشيل و يعتذر منها و يقول ليها دقيقه يا حبوبه ما تمشي.... يا حبوبه الزينه الله يرضى عليك ما تزعلي و تمشي... و طبعاً هي ما شغاله بيهو ، طلعت و مشت و هو كذلك!
هنادي قالت لي كويس إنك ظهرتي على حقيقتك، ساي كنتِ كاتله حيلك، قلت ليها اتخارجي من هنا.... طبعاً اتخلعت! قلت ليها بنهره طرشه؟؟ اطلعي من هنا!.... طوالي طلعت و هي مستغربه و بدور وقفت عاينت فيني مسافه و مشت! كنت متضايقه شديد و معصبه و أعصابي تلفانه! مع إنو دي ما صفاتي! أنا اكتر وحده كنت معروفه بهدوئي و كظم الغيظ، و ما كنت بحب أجرح زول بكلمه، بس في الموقف دا بالذات فقدت أعصابي! قدر ما حاولت أسكت نفسي ما قدرت، أنا كتمت جواي و اتجاهلتهم كتير و غضيت نظر عن حاجات كتيره و في الآخر ما قدرت انفجرت!
قعدت و بقيت أبكي! مره أحس بتأنيب الضمير على الأسلوب الإتكلمت بيهو مع حبوبه الزينه و هنادي و مره أحس بحرقة قلب على الإفترى و الكلام العايزين يلصقوهو فيني و ينقال عني!!
___________________________
_ ولا تعتذر مني و أنا أصلا ما محتاجه اعتذار لكن النصيحه مرتك صدمتني! ما حصل لاقتني بت بتتكلم بالأسلوب دا ! والله ما كنت قايلاها كدا ، ساي كانت كاتله حيلها! أمك أصلو ما غلطت لمن شكت لي منها لكن أنا ما صدقتها و غلطت امك و وقفت في صف مرتك و في الآخر تقول لي كلام زي دا و في نص بيتك يا يوسف و قدامك!
= حقك علي يا حبوبه الزينه، أديني خاطرك.... ريله أكيد ما قصدت القالتو و متأكد انها حتجي تعتذر منك
_ ريله دي تعتذر على شنو و تخلي شنو؟.... خليني أقولها ليك في وشك و اسمعها مني، مرتك الشايفها قدامك دي يا يوسف والله ما زي ما انت شايفها، كل الناس شايفه حقيقتها إلا انت، مرتك خاربه وش مع كل الناس و انت ما جايب خبر و شايفها ملاك، ما سألت نفسك ليه أخواتك ما بمشوا ليها مع انها في نفس عمرهم؟ طيب ما سألت نفسك ليه أمك ما قادره تتعامل معاها كأنها بتها؟ ما سألت نفسك ليه أخوانك ما محتكين بيها؟ حتى هنادي مرت أخوك دي وقفت منها، و مرتك عاد بتطلع تحوم البيوت كلها إلا بيت نسابتها ما بتجيهو إلا نادراً، و اسألها عليك الله آخر مره ختت رجلها في بيت أخوك متين؟
الكلام دا كلو انقال لي من بدري بس ما صدقت منو حرف لكن لمن جيت و شفتها و شفت تصرفاتها اتأكدت إنو الإنقال عنها ما كضب
=.......
_ ما تسكت لي اتكلم، شوف أمك مع انها ما كانت راضيه بالعرسه دي لكن في الآخر اتقبلت البت دي عشانك، رضت بيها و مرتك ما راضيه بزول، قدامك بتعمل نفسها الزوجه المثاليه و من وراك يا يوسف البت دي ما تمام
= دا كلام شنو!.... حبوبه عليك الله ما تقولي كلام زي دا☺️
_ دي الحقيقه و أنا بعد دا خلاص قررت أرجع البلد و علاجي ذاتو ما دايره أواصل فيهو و ما دايره أقابل أي دكتور
= يا حبوبه أنا بعتذر ليك نيابة عن ريله، ليك حق تزعلي لكن ما من حقك تاخدي قرار زي دا! ليه تقطعي علاجك و ليه تخلي مقابلاتك و تسافري! ليه فجأه كدا كلام ريله فرق معاك!
_ لأنو كلامها شين و بزعل! و المصيبه انها أساءت لي قدامك! يعني لا محترماني لا محترماك! يمكن عشان عارفاك ما بتسألها و عشان واثقه من انها بتقدر تغشك و تكضب عليك!
= حبوبه الله يرضى عليك روقي شويه و هدي نفسك.... شوفي هسي اطرافك بترجف كيف، أخدي نفس عميق و حاولي تتخلصي من الضيق الجواك، و حقك علي يا حبوبه و وعد مني تصرف زي دا ما يحصل تاني و ريله أنا بعرف كيف اتصرف معاها ☺️
_ شيلتني همك يا ولدي! البت دي معقوله ممشياك على كيفها و غاشاك الزمن كلو؟ و حتى العرس دا مانعاك منو!؟ من متين يا ولدي رجالنا بخافو من نسوانهم؟من متين نسوانا جريئات و ما بحترمو أزواجهم و الناس الأكبر منهم!
= ماف كلام زي دا و أنا ماف مراه بتمشيني على كيفها، شيلي فكرة إنو ريله مسيطره علي دي من بالك، أنا ماف زول بتحكم في قراراتي و رغباتي☺️
_ لكن ريله بتتحكم في قراراتك!! تحلف قسم إنو ما هي المانعاك العرس؟ تحلف انك ما رافض الزواج بسببها؟
= لا ما رافضو بسببها ☺️
_اها سمح المانعك شنو؟ أوعك تقول لي انك ما جاهز أو ما عندك رغبه في الزواج! أنا عارفاك بتدور العرس و دا حقك يا ولدي و ماف أي زول مفروض يحرمك منو، ربنا حلل للراجل أربع زوجات و حبيبي الرسول ذاتو كان معرس أكتر من زوجه يعني الشي دا لا عيب ولا حرام!
= ........
_ انت و مرتك ربنا ما قسم ليكم الجنى لكن يمكن يقسمو ليك ما زوجتك التانيه، انت مالك ما بتدور تكون أب؟ ما داير تشيل أولادك و تفرح أمك و أبوك بأحفادهم؟
=.......
_ اتكلم يا ولد انت المانعك شنو؟ خايف ما تعدل بيناتهم ولا فيك عيب؟!
هنا يوسف اتخلع و اتهجم بسبب كلامها! قال ليها بزهج دا كلام شنو؟!! قالت ليهو ماف تفسير غير كدا، ياهم احتمالين، انت ياتو واحد فيهم و أوعك تتهرب مني، خليك رااااجل زي ما عرفتك و أقعد اتناقش معاي!
طبعاً الكلام استفز يوسف و حس إنو الناس بدت تشك فيهو و تقول إنو فيهو عيب!.... يوسف من النوع الممكن يتجاوز و يطنش حاجات كتيره و ما يسمح ليها تستفزو إلا الحاجات الممكن تمس رجولتو و تخلي الناس تدخل في خصوصياتو و تتكلم عنو بالخصوص دا!!
كان معصب بس اتكلم معاها بنبره حاده بس هاديه و قال ليها:
للمره المليون العيب لا فيني لا في ريله، دي قسمتنا، و أنا ماف مرا بتتحكم فيني و المانعني من الزواج إني ما لاقي البت المناسبه و من وين ح أضمن إنو الزوجه التانيه تجيب لي الجنى؟!!
_ دي مشكلتك يعني؟؟ العروس جاهزه و بالنسبه لخوفك من انها ما تجيب ليك الجنى دا ما سبب يمنعك الزواج، خسران شنو انت! عرس و جرب! و عشان أنا عندي نظره بعيده و عارفه انك كمان متخوف من الزوجه التانيه و أخلاقها و كيف حتكون طريقة تعاملها مع أهلك و تقبلها لمرتك الأولى عندي ليك عروس، بت خلقه و أخلاق و سمعتها سابقاها، لا بتهش لا بتنهش و ما بتسمع منها إلا كلمة حاضر، البت دي مستحيل تعمل ليك مشاكل مع أهلك أو مرتك و قصص الضرات ديك لأنها مربيه أحسن تربيه
=.... دي منو؟
_ بدور بت خالك المرحوم!
= بدور شنو ياخ يا حبوبه!!
_ مالا بت خالك عيبها لي؟ ... أوعك تقعد تقول لي شايفها زي أختي و بتاع، أنا عارفه البير و غطاها و البت دي انت خاتي عينك عليها، و أنا أكتر من مره شفتكم قاعدين براكم! و انت عارفني ما بدور الحركات دي و نبهتك قبل كدا و شاكلت بدور اللغاية اللحظه دي خجلانه تخت عينها في عيني مع إنو ما ليها ذنب لكن انتوا الإتنين زعلتوني!
= شفتينا في شقه ولا في غرفه و قافلين الباب علينا؟ انتي يا حبوبه ليه مصره تشككي فينا؟ أنا ما مشكله لكن بت ولدك المسكينه دي ذنبها شنو تشاكليها و تتهميها اتهام باطل زي دا؟ ... مش مدحتيها و قلتي عنها مربيه أحسن تربيه؟ ليه بتناقضي نفسك يا حبوبه!!
_ ما بناقض نفسي البت صحي مربيه نعم التربيه لكن الشيطان شاطر و بأمانه انا خايفه عليها منك انت دا!.... البنات يا يوسف ولدي قلوبهم خفيفه و رقيقه، الواحده لو ساي ابتسمت عليها بتعشم فيك و النصيحه بدور بتي دي من زمان عشمانه فيك لكن ما حصل اتكلمت أو لمحت لزول، انت و أمك ذاتكم بالغتو بنات أهلكم راقدات تمشوا تفتشوا الغريبات! لو كان عرست بت خالك اليتيمه دي مالك؟
=الزواج قسمه و نصيب يا حبوبه و بعدين انتي جبتي الكلام دا من وين؟ القال ليك منو انها عشمانه فيني؟
_ الريده ما بتدس و دي بتي أنا ربيتها و كبرت معاي في البيت بعرفا وكتين تزعل و وكتين تفرح و وكتين تريد! لمن كنا نتونس بيكم و نجيب سيرتك كانت بتدوب من خجلها، يوم قلت ليها يوسف ولد عمتك سنيه دا كان اتقدم ليك ما بتدوريهو؟ سكتت لكن الرضى كان ظاهر عليها..... يوسف انت ولدي و أعز احفادي، بدور ليك السمح، عايزاك تصارحني و تشاركني الجواك و حلفتك بالذي خلقك و خلقني ما تكضب علي و تدس مني، انت صِح بتدور العرس مش كدا ؟؟
= والله يا حبوبه الزينه ما عارف أقول ليك شنو!.... الموضوع دا ما بالسهوله دي!
_ الصعب شنو؟ انت جاهز و العروس موجوده و أنا أديتك ليها و ماف زول ح يرفضك.... والله تاني إلا تمنعك مرتك!
= ريله ما بتمنعني لكن.....
_ الإتوصلت ليهو انك ما عندك مشكله تعرس، و الحاجه الواقفه ليك أنا عارفاها شنو وأنا بحلها ليك و ربنا يسعدك انت و بدور و يرزقكم الذريه الصالحه..... من هسي لو جبتو بت تسميتها علي ههههه و ما تخاف ما حأسميها ليكم اسم قديم.... رأيك شنو في اسم نسيم؟ نسيم يوسف يا سلااااام و لو ولد محمد يوسف أو مبارك يوسف........ هههه شايفاك صرحت بعيد و عشت اللحظه!....ربنا يعدلها عليك يا ولدي و بإذن الله حتشوف جناك أنا حاسه كدا و إحساسي ما قاعد يخيب.... اها نقول خير و نبدا تجهيزات الزواج؟؟
________________________________
طبعاً يوسف لمن جا راجع نهاي ما اتكلم معاي بس كان سرحان، مشيت قعدت جنبو و قلت ليهو أنا ما قصدت أتكلم مع حبوبه الزينه بالطريقه ديك بس كلامهم ضايقني، أمك ذاتا أنا ما غلطت عليها و اختك غلطانه و أنا ما شايفه نفسي غلطت أو اتطاولت عليها لمن ضربتها كف!
إتلفت علي و قال لي أنا حاسي انك وحده تانيه! انتي ما ريله البعرفا!
قلت ليهو ليه؟؟ عشان رديت؟ عشان فتحت خشمي و أخدت حقي؟؟
ليه ما شايف غلط أختك؟ ليه ما واجعك الكلام الإنقال عني؟ انت أكتر واحد بعرفني و انت عارف إني مستحيل أدخل أسعد البيت في غيابك، انت طلعت و خليت الباب فاتح و أنا دخلت جوه و لمن جيت طالعه لقيتو قاعد و........ الخ ببساطه دا الحصل كلو، دا الإنت من أمبارح ما عايز تسمعو مني، شكلك انت كمان عايز ليك فرصه فيني و عايز بأي طريقه تشوفني غلطانه و تقنع نفسك إني جبت أسعد و..... هنا هو نهرني و قال لي مجنونه انتي؟؟
جاني قريب و قال لي لو جنيتي قولي لي و أسعد الزفت دا ما تجيبي لي سيرتو تاني فاهمه ولا لا!!؟ .... قال كدا و طلع طوالي!
طبعاً الموقف دا وترني و زعلني زياده، تاني يوم جاتني نفحات و حكيت ليها الحاصل معاي كلو، قالت لي أصلا نحنا عارفين انك ما غلطانه و أهل يوسف واضح انهم عايزين مشكله معاك، قلت ليها عملت ليهم شنو أنا؟!ليه الحقد دا كلو؟! قالت لي يا بت أصلا في ناس كدا بحبو يكرهو و يعادو من دون سبب، قلت ليها عدم الولاده هو السبب! كلهم عتبانين علي و زعلانين مني كأن الحمل دا حاجه بيدي أنا!.... قالت لي و الغايظني انهم زعلانين منك انتي و متعاطفين مع يوسف كأنك ظالماهو و كأنو العيب فيك!
أخدت نفس و قلت ليها المهم زي ما قلت ليك عايزاك تمشي معاي نكشف، يوسف دا أنا ما بنتظرو تاني و لو كلمتو يا حصلت حاجه منعتنا يا ساق حبوبتو معانا!
قالت لي ما تكلميهو و أرح طوالي نكشف و نجي، قلت ليها طيب و طوالي جهزت نفسي و طلعنا سو و هي حتى أهلها ما كلمتهم، قالت لي ما نكلم أي زول عشان ما ينقوا كتير و يكترو اسئله، المهم مشينا مستشفى عديل و قابلنا الدكتور و عملت الفحص و بقينا بس قاعدين و منتظرين النتيجه.....
_____________________________
كانت سرحانه بعيد في عالمها الوردي و شايفه الأحلام النسجتها ليها حبوبتها الزينه قدامها، بقت تتظهر ابسط المواقف الجمعتها مع يوسف و أكتر موقف أثرها و حرك مشاعرها يوم حادثة يوسف، قبل قصتو مع أسعد بنص ساعه، كانت قاعده مع هنادي و ديك شغاله ترسم ليها أحلام ورديه مع يوسف و تعشمها فيهو، غمزت ليها و قالت ليها:
_ شايفه يوسف بدا يميل ليك! أظنو بفكر فيك.....لا لا أنا متأكده عديل
= عليك الله بطلي يا هنادي! تقوم حبوبه تجي انتي؟
_ يا بت بيني و بينك كدا ما حاسه بيهو؟ خليك من دا انتي معقوله ما حاسه بشي ناحية يوسف؟ قالو من زماااان حاباهو
= ..... هنادي عليك الله كفايه
_ لا ما كفايه! انتي لمتين ح تدسي مشاعرك؟ أنا لا عمتي سنيه لا حبوبه الزينه عشان تخجلي مني! دا كلام بنات بيني و بينك كدا، يوسف دا بتحبيهو ولا لا يا بت اتكلمي؟
= ما فرقت .... يوسف معرس
_ يعني شنو لو معرس؟ خليني أطمنك ريله دي لا بتهش لا بتنش، بتعمل البقولو ليها يوسف و هسي لو قال ليها عايز اعرس فيك بتقول ليهو قدام و بنفسها ح تخت ليهو الحنه
= معناها يوسف الما عايز يعرس فيها..... واضح إنو بريدها شديد
_حييييا أنا منك و من سخافتك، ياخ هي مرتو عايزاهو يعاملها كيف؟ يا بت الراجل الجد جد حتى طليقتو بعاملها معامله كويس و بحسن ليها!..... عايني ثواني خليني أثبت ليك إذا انتي مهمه عند يوسف ولا لا ...
هنادي طلعت تلفونها و إتصلت على يوسف و لمن فتح الخط قالت ليهو يوسف بدور دي من قبيل بتبكي، ما عارفاها مالا، يوسف قفل منها و جاهم طوالي لقى امو و حبوبتو قاعدين في الحوش و أخواتو بحضرو جوه، سلم على امو و حبوبتو و قعد و لمن لقاهم عاديين فهم انهم ما عارفين إنو بدور بتبكي، قال ليهم وين البنات ديل؟
حبوبتو قالت ليهو أخواتك بحضرو جوه و بدور و هنادي في الحوش التاني.... قعد شويه و بعدها مشى ليهم بهناك، الوقت داك هنادي خلتها تعمل مويه في عيونها عشان تدي إحساس انها كانت بتبكي، يوسف سلم عليهم و هو واقف، عاين لـ بدور و قال ليها مالك في شنو؟
طوالي هنادي قامت و قالت ليهم بتي بتكون صحت ماشه أشوفها و مشت خلتهم مع بعض!
يوسف قال ليها بدور للمره الألف في شنو يا بدور؟..... كانت خاته يدينها على وشها، قالت ليهو ما بقدر ما بقدر يا يوسف، قال ليها طيب أنادي ليك وحده من البنات تحكي ليها؟
زحت يدينها من وشها و قالت ليهو لا لا يا يوسف، ما بقدر أحكي ليهم، مع إنو هم بنات زي و مفروض البت تحكي لبت زيها بس أنا ما بقدر !
هنا هو سكت و هي بعد مسافه قالت ليهو حأحكي ليك انت بس يا يوسف، حأحكي لأنو الموضوع دا مأزمني، يوسف قعد في طرف السرير و قال ليها سامعك..... فتحت تلفونها و ورتو رسائل واتس و مكالمات بتجيها من رقم غريب، قرا الرسائل الكلها غزل و تهديد و كلام فاحش، قرن حواجبو و قال ليها دا شنو؟
قالت ليهو دا معاذ..... معاذ ولد جبريل، كان طلبني للزواج و أنا رفضتو ف بقى يعترض طريقي، و في كل مره يتافهه و يحاول.... يحاول يقرب مني و أنا ما كنت بقدر أكلم زول، جدي صعب و أمي أصلا ما شغاله بي مركزه مع راجلها و أولادها و لو كان كلمت حبوبه الزينه كانت ح تمشي تشاكلو و تعمل لي فضيحه و جدي لو عرف كان ح يعقد لي عليهو، أصلا جدي ما عندو مشكله مع معاذ و شايفو ملاك و زعل مني شديد لمن رفضتو، المهم معاذ بقى يعترضني و يهددني بإنو لو كلمت زول ح يعمل الاسوأ، و أنا خفت منو، قول علي جبانه، قول خوافه بس أنا ما بقدر على معاذ دا، مرات كنت بحسو بهدد ساي و مستحيل ينفذ البقولو لغاية ما يوم ناس حبوبه طلعو و خلوني براي في البيت، و اتأخرو لليل و أنا كان مفروض أمشي و ابيت في بيت عمي وضاح بس سبحان الله اليوم داك بالذات قلت ما مشكله أنوم هنا يمكن ناس حبوبه يجوا راجعين.... فعلاً طفيت النور و رقدت و في نص الليل...... هنا سكتت و بقت تبكي و يوسف بقى يعاين لي بخلعه كدا و ملامح وشو بتقول ليها الحصل شنو كملي!! و كان بتمنى ما يسمع منها الحاجه الجات في بالو!
أخدت نفس و مسحت دموعها و قالت ليهو، صحيت لمن حسيت بيد بتلمس فيني، في البدايه قايله نفسي بحلم بس لمن..... المهم لمن استوعبت الحاصل و فتحت عيوني شفت معاذ! كنت حأصرخ بس خت يدو على خشمي و كان بتحرش فيني .... في الآخر قال لي ح ازح يدي عني خشمك و لو صرختي ح يحصل اسوأ من كدا، لمن زح مني أنا كنت برجف من الخوف، جسمي كلو كان برتعش، قال لي بالحرف : المره دي ما حصل شي بس ما معروف يحصل شنو المره الجايه، دا لو فتحتي خشمك و حكيتي لزول، من اليوم داك يا يوسف و أنا ما بنوم لا ليل لا نهار و لو نمت بكوبس بيهو و بحسو قريب مني أو راقد معاي في السرير، عشان كدا أول ما حبوبه قالت جايه الخرطوم و قالت لي أرح معاي طوالي جيت معاها و هسي خايفه من الرجوع و هو بقى يرسل لي و يتافه و لمن حظرتو تاني رسل لي من رقم تاني و قال لي لو حظرتيني المره دي كمان والله تلقيني في وشك، و أنا خفت يا يوسف بقيت أشوف رسايلو بس ما بقدر أرد عليها و ما بقدر احظرو، أنا برتعب منو شديد، دا الإنسان الوحيد القدر يزرع الخوف جواي، أنا لو سمعت اسمو ساي برجف يا يوسف 💔
يوسف قال ليها بزهج : هسي دا مبرر ليك؟؟ دا مبرر لسكوتك؟ معقوله ما قدرتي توقفيهو عند حدو و تكلمي الناس؟.... هو عشان عارفك ضعيفه و خايفه منو شديد بهددك و هو صدقيني ماااا بقدر ينفذ البقولو
_لا لا بقدر يا يوسف، الراجل دا كعب شديد و مجنون رسمي، لو قال لي هسي حأكون قدامك بصدقو والله دا ما إنسان دا شيطان
= لو عامل فيها مجنون أنا أجن منو، رسلي لي رقمو و خليهو علي بعرف كيف اتصرف معاهو
_ خايفه منو يا يوسف
= تخافي ليه؟ يا بت انتي قايله نفسك براك ولا مقطوعه من شجره؟ بطلي خوف و قوي قلبك، دا بشر زيك تخافي منو ليه؟ سرعه أحظريهو قدامي و اعمل حظر لكل الأرقام الغريبه و الما مسجله عندك لحد ما اشوف نهاية الحيوان دا ....
بعدها هو قعد يتكلم معاها و يشجعها و هي تحكي ليهو عن الحاجات العانت منها بسبب فقدانها لأبوها، فجأه جات حبوبه الزينه و لقتهم قاعدين في سرير واحد، طوالي جات وقفت قدامهم و عاينت ليهم مسافه بس ما قالت شي و بعدها يوسف رجع بيتو.....
_______________________________
طبعاً لمن النتيجه طلعت أنا من شدة الخوف بكيت عديل و اتراجعت و قلت لنفحات ما عايزا أشوفها 😭😭 بموت لو طلع ماف حمل، نفحات قالت لي ريله شدي حيلك شويه و قوي قلبك، خلينا ندخل نقابل الدكتور و ان شاء الله يحصل كل خير، المهم دخلنا للدكتور و قدامنا الظرف تبع النتيجه و أنا أطرافي بقت بارده، الدكتور ذاتو حس بتوتري! قال لي ارخي أعصابك و اتفائلي.... بعدها فتح النتيجه و بقى مره يعاين لي و مره يعاين للنتيجه و أنا خلاص حيلي مات و دموعي جات نازله، ضحك و قال لي مبروووك انتي حامل و في الشهر الأول!
قلت ليهو بخلعه شنو!! متأكد يا دكتور ولا في شي غلط!! ضحك و قال لي ماف أي شي غلط و دي نتيجتك، انتي حامل يا ريله!
بقيت اسمع صدى الجمله دي من كل الإتجاهات! أنا حامل؟ جد حامل؟ بعد سنه و نص زواج أخيراً حصل حمل!.... ختيت يديني على خشمي و بقيت أقول الحمدلله الحمدلله، واي ما قادره أصدق، نفحات صرخت من شدة الفرح و بقت ضاماني عليها و هي شغاله لي وااااي يا ريله أخيراً ح أبقى خاله! الحمدلله، أحلى خبر والله 😭😭❤️
طبعاً طوالي فتحت تلفوني و كنت ح اتصل على يوسف و اكلمو بس نفحات منعتني و قالت لي خبر سمح زي دا لازم تقوليهو ليهو فيس تو فيس! يوسف ح يغمى عليهو من شدة الفرح، قلت ليها واااي ما قادره اصبر و انتظرو لحدي ما يرجع، حاسه نفسي ح أطير من الفرح!
طبعاً الخبر خلاني أحس إني فراشه خفيفه في حقل! حقيقي الفرحه ما كانت سايعاني، لمن رجعنا البيت أنا بقيت ماشه و جايه و كل مره أخت يدي على بطني و أضحك و نفحات تصور فيني سااااي، قالت لي ما ح اكلم ناس البيت، بعد تكلمي يوسف كلميهم على راحتك،قلت ليها أنا بس عايزا افهم حاجه! إذا أنا حامل ليه النتيجه ديك ما طلع فيها حمل!.... دقيقه يمكن النتيجه الهسي دي تطلع غلط و أكون ما حامل؟ قالت لي لا لا يا بت تفي من خشمك، انتي حامل و أنا متأكده، يوم النتيجه الأولى حصل فيها لخبطه!.... مشيت طلعت النتيجه ديك و جيت قعدت جنب نفحات، عاينت في النتيجه و قالت لي ريله انتي مش اسمك ريله الزين محمد احمد؟ قلت ليها ايوه، قالت لي شوفي هنا مكتوب ريله عبيد محمد أحمد!.... دا بفسر الحصل، تشابه في الأسماء و ماف زول انتبه! قلت ليها بالجد!! ليه يغلطو غلط زي دا! معناها النتيجه اتبدلت!!
فجأه تلفوني رن و المتصل كان يوسف، قلبي عمل شحححح و بقى يدق بسرعه، قلت لنفحات سبحان الله كأنو حس بي! فتحت الخط و قلت ليهو يوسف يا يوسف! قال لي اهلين ريله كيفك؟ قلت ليهو كووويسه شدييييد، قال لي ان شاء الله دائماً كدا، المهم عايز أسألك في البيت انتي؟ أنا في الطريق راجع البيت لو برا البيت ارجعي و انتظريني لحدي ما اجيك، قلت ليهو في شنو؟ سكت مساااافه بعدها قال لي لمن أصل! قفلنا من بعض و أنا مستغربه و جاني إحساس ما مطمن! نفخات قالت لي مالك يا بت ملامح وشك اتغيرت كدا؟ حكيت ليها القالو لي، و قلت ليهو صوتو أصلو ما طمني! قالت لي ريله عليك الله ما تتشائمي و تخربي فرحتك! مفروض تمشي تجهزي نفسك عشان تفاجئي يوسف!
قلت ليها كلامك صح، المهم نضفت و رتبت البيت و بخرتو و ظبطت نفسي و قلعت التوب و فكيت شعري و كنت حاسه نفسي فراشه و كل دقيقتين أتحسس بطني لحد ما يوسف جا راجع.....
“لم يضايقني ما فعلته معي ٠٠ فحياتي مليئة بالخسائر والخيبات .. ولكن ما كسر قلبي أنني ظهرت لك بوجهي الآخر وجهي الذي لا يعرفه إلا أنت٠٠ ظهرت لك بضعفي وحزني وطفولتي التي لم أتجاوزها حتى الآن .
ظهرت لك لأنني شعرت بأنك مختلف جدًا ..
شيء ملعون بداخلي قال أنك لن تفلت يدي أبدًا وافلتها"
يتبــــــــــــــــــــــــــــــــــــــــــــع...