شيكا بحزن: خلاص انا هفرحها
شوقيه: كلمي جوزك يا شوقيه وخليه يجيب العريس اهم حاجه عندي صحه امي
شوقيه بفرحه: بجد الف مبروك لولولي تعالي ندخل نفرحها ربنا يسعدك يا شيكا
لتدخل شوقيه علي والدتها
شوقيه: الخطه نجحت يا امي
نعمات: ده انتي طلعتي ايه نعمات الف حمد وشكر ليك يارب كلمي بقي الدكتورة خليها تكتبلي علي خروخ وتقولها هتتعالج ف البيت
شوقيه: طيب بس اتصل علي محمد الاول
لتتصل شوقيه علي زوجها لتبلغه بقرار شيكا
شوقيه: الو يا محمد
محمد: بجد طاب الف مبروك انا هكلم فيصل وأبلغه
شوقيه: ماشي وخليه ييجي بسرعه عايزين نفرح
محمد: طاب اقفلي وانا كده كده جاي ف السكه
ليغلق محمد الهاتف مع شوقيه ثم يتصل علي فيصل ليبلغه بقرار العروسه
محمد: الو يا فيصل
فيصل: بجد طاب اجي أمته
محمد: بكره انشاء الله تفطر المغرب معانا ونتكلم ونقرا الفاتحه وحتي نجوزكم علي العيد
فيصل: تمام بس هجيب صفيه اختي معايا
محمد: يا سلام تاءنسو وتنورو ياله بقي استعد يا عريس عروستك ف انتظارك
وبعد أن أغلق محمد الهاتف مع فيصل فها هو يتصل علي شوقيه ليبلغها بما حدث
محمد: خلاص بلغت فيصل
شوقيه: تمام هحضرلهم احلي فطار يارب يتمها علي خير
لتغلق شوقيه الهاتف مع زوجها وهيا في غايه الفرح
شوقيه: شيكا عريسك جاي علي الفطار ياله بقي ناخد امك ونروح عشان نجهزله احلي فطار ولا اقولك انتي تقعدي هنومه وانا هجهز كل حاجه
شيكا بحزن: ماشي
شوقيه: عايزاكي بقي تروحي للبت اسماء الكوافيره عشان تطلعلك قمر اكتر ما انتي قمر
شيكا: مافيش داعي
شوقيه: افرحي بقي يا عروسه يا ست البنات
شيكا: طاب ياله نخرج امك ربنا يخليها لنا
وبعد أن انتهو إجراءات خروج نعمات من المستشفى هاهم يذهبون الي الحاره
شوقيه: افرحو يا اهل الحاره بكره قرايه فاتحه شيكا
جميع أهل الحاره: الف مبروك ربنا يفرحك دائما يا معلمه
الا سقط كان يجلس حزينا
سالم: مالك يا ابني
سقط: هاه لاء مافيش
سالم: طاب قول بس وحياه الأبله
سقط: بقولك ايه احنا شويه وهنشطب وابقي اقولك عشان لازم نتصرف
سالم: يا عم في ايه قلقتني
سقط: قولنا لما نشطب متاكلش راسي تعالي نعمل نفسنا فرحانين ونبارك
سالم: تكنش بتحب المعلمه
سقط: اه بحبها بس زي اختي الكبيره يا غشيم
سالم: امال مالك مضروب علي قلبك
سقط: ده انته زنان اوي هقولك يا سيدي اصل المعلمه شيكا بتحب الاستاذ منجي
سالم: منجي مين
سقط: ده استاذ كان ساكن ف البيت عندها بس محترم اوي وطيب بس هو يعني كان قفل حبتين وتحس أنه بيلبس من ايام الفراعنه اصله كان بيصرف علي أهله والمعلمه لما انا بلغتها بظروفه شغلته معانا وبعدين سافر البلد ف الاجازه وبعدين لما الأبله سنيه رجعت المدرسه عرفت أنه استقال وبلغت المعلمه ومن وقتها وهيا زعلانه اوي
سالم: يا عيني علي الحب اللي مبهدل الناس امال هيا هتتجوز مين
سقط: جوز اختها كان جايبلها عريس اكيد وافقت عليه
سالم: طاب مايمكن منجي ده هو هيخطبها
سقط: ده انته غبي اوي بقولك منعرفش عنه حاجه وساب البلد وسافر زمايله ف المدرسه راحو يساؤلو عليه لقوه عزل هو أهله وسابو البلد ومحدش يعرف عنه حاجه
سالم: اه فهمت طيب بعد السحور نقعد واحنا والواد اللقط والابله سنيه وانا هتصرف
سقط: وعايز الأبله ليه
سالم: ده شغلي خليك ف حالك
سقط: والله شكلك مياس وما تعرف تعمل حاجه
سالم: انا راجل اقوال لا افعال
ثم يذهبون إلى شيكا للمباركه
سقط: احنا كده هناخد بكره اجازه
شيكا: اجازه ليه بكره شغل عادي زي اي يوم
سقط: قصدي يعني عشان نعلق التعاليق ونفرش الحاره رمله ونشاره
شيكا: ليه إنشاءالله في وزير جاي ولا حاجه اياكم تعملو حاجه
ليهمس له سالم في أذنه
سالم: عندك حق ديه شكلها زعلان علي الاخر ومش فرحانه بالعريس
شيكا: ياله يا اما نطلع عشان ترتاحي
شوقيه لاهل الحاره: الله يبارك فيكو ياجماعه وعقبال أولادكم
ثم تصعد شيكا الي شقتها
شيكا: حمدالله على السلامه يا اما نورتي بيتك
نعمات: منور بيكي يا عروسه
شيكا: طاب انا هخش انام
شوقيه: مش هتتسحري
شيكا: لاء معدتي وجعاني بس امانه عليكي خلي سقط يوصي عبدالقادر الفرارجي يبعت ١٠٠فرخه ينضفهم ويظبطهم ويشتري شوالين كوسه وطماطم وبصل ورز عشان الجماعه يطبخوهم ولا اقولك خليه ياخد سنيه معاه وام كرم وهما هيعرفو يظبطو كل حاجه
شوقيه: مالك يا شيكا
شيكا: مافيش بس معدتي وجعتني يمكن عشان ريحه المستشفى هخش انام
لتدخل شيكا غرفتها ويمر الليل عليها وهيا تتقلب علي فراشها وقد جافاها النوم
شيكا: انا اقوم اصلي احسن
لتخرج من غرفتها لتتوضيء ثم تبدء ف الصلاه
لتصلي كثيرا وهيا تبكي وتتضرع الي الله أن يجعل منجي من نصيبها
إلي أن سمعت اءذان الفجر
وبعد أن صلت الفجر ذهبت ف النوم وهيا جالسه علي سجاده الصلاه
ويمر الوقت والعمل في منزل شيكا علي قدما وساق
فشوقيه قد استعانت بام صلاح وشفاعه ليساعدوها في إعداد ماءده الإفطار لعريس شيكا
لتستيقظ شيكا وتخرج من غرفتها
شيكا: ايه ده ايه الزحمه ديه والدنيا مكركبه كده ليه
شوقيه: بنوضب عشان عريسك يا عروسه
شيكا: انا نازله المحل اشوف حالي
نعمات: تعالي هنا تنزلي تروحي فين اقعدي وخشي استحمي واذوقي كده عشان عريسك
شيكا: هبقي اطلع بعد العصر حاضر
نعمات: طول عمرك راسك ناشفه
لتغمز شوقيه لوالدتها
شوقيه: خليها براحتها يا اما
شيكا: اخبار الجماعه تحت ايه
ام كرم: زي الفل وكمان في كام واحده من ستات الحاره بيساعدوهم حبا فيكي
شيكا: طيب ربنا يساعدنا كلنا
ثم تتركهم شيكا وتنزل الي دكانها
لتجد سقط ينظر لها بحزن
شيكا: مالك يا سقط
سقط: هاه مافيش
سالم: تلاقي الأبله مزعلاه
سقط: لا والله راسي بس مصدعه حبتين
شيكا: الف سلامه عليك خلاص روح ريح
سقط: لاء إنشاءالله هفطر وابقي كويس
سالم: شكله جعان
سقط: متسكت بقي يا عم الرخم هو انا جوز امك
ليضحك سالم
سالم: امي عارف امي ديه بقي كانت ممشيه ابويا علي العجين كانت بتاءكلنا رجول الفراخ وكاءنها كوارع
لتضحك عليه شيكا
شيكا: والله ضحكتني وانا مخنوقه
سالم: اي خدمه
ثم يهمس في أذن سقط
سالم: انته مجيتش بليل ليه
سقط: حقك عليا والله من الزعل نمت من غير سحور حتي
سالم: خلاص نتجمع النهارده بعد التراويح
شيكا: اعملو حسابكم يارجاله هتفطرو معانا النهارده عشان اللي جاي ده ما انتو أهلي واخواتي
سقط: حاضر يا معلمه
سالم: وانا كمان اجي
شيكا: طبعا امال ايه انته اخويا زيهم
ويمر الوقت وتصعد شيكا الي شقتها لتستبدل ملابسها
ويتبقي علي اءذان المغرب نصف ساعة
وها هو العريس قد وصل ومعه أخته صفيه
محمد: أهلا وسهلا نورتو اتفضلو
صفيه: ميرسي منور بيك يا استاذ محمد
فيصل: شكرا يا محمد امال فين عروستي
محمد: ثواني هجيبها تسلم عليكم
ليخرج محمد
محمد: شوقيه هاتي اختك عشان تسلم علي العريس وفين خالتي
شوقيه: جايه ادخل لهم انته بس
لتدخل شوقيه غرفه شيكا
شوقيه: ياله عريسك جيه تعالي عشان تسلمي عليه
شيكا: طيب
لتخرج شيكا وتسلم عليهم
فيصل: ازيك يا انسه شيكا
شيكا: الحمدلله
صفيه: مش كبيره شويه علي انسه
شيكا: هنعمل ايه بقي
صفيه: شكلك مكانش حد بيتقدملك
شيكا: حاجه زي كده
شوقيه: ديه شيكا ست البنات والعرسان عليها طوابير
صفيه: اسمها شيكا ايه الاسم النكته ده
وهنا يدخل عليهم سقط ولقط وسالم
شيكا: تعالو يا رجاله اقعدو
فيصل: قرايبكم دول يا محمد
شيكا: لمؤاخذه دول رجالتي واخواتي
صفيه: اللي هو ازاي
سقط: لمؤاخذه المعلمه شيكا ست الحته كلها واختنا
فيصل: معلمه ازاي معلمه يعني قصدك مدرسه
لقط: مدرسه ايه المعلمه شيكا اكبر جزاره ف بر مصر كله
صفيه: ايه ده
ليضحك فيصل ضحكه سمجه
فيصل: يعني هناكل لحمه ببلاش
سالم: يخربيت تقل دمك
نعمات: اتفضلو يا جماعه الاءذان قرب والأكل علي السفره
صفيه: بلويه بوذ طيب
فيصل: جاي اهو يا حماتي
ليجلسو جميعهم علي السفره
فيصل: الله شكل الاكل حلو اوي
نعمات: الف هنا
صفيه: وانتي بقي يا شوقيه اخبارك ايه
شوقيه: الحمدلله بخير
وهنا يصدح اذان المغرب
ليبدؤا جميعهم في شرب العصير فيما عدا فيصل
فها هو يلتهم الطعام بيديه الاثنين
سقط: اعوذ بالله ايه ده
محمد: في شوكه قدامك عشان المحشي
فيصل: شوكه ايه ياعم
وكان يتكلم وفمه مملوء بالطعام وكان شكله مقزز
ثم أخذ يمد يده وياءخذ اللحم قطعه تلو الاخرى حتي قضي علي اللحم الموجود تماما
صفيه: ايه ده امال لو مكنتيش جزاره اللحمه قليله اوي كنتو قولتو كنا جيبنا فطارنا معانا
سالم بغيظ: بقولك ايه يا خالتي انا شايف ماشاءالله انتي واخوكي مش معتمدين حد وخلصتو علي الاكل هو انتو اول مره تشوفو لحمه
وهيا يتجشاء فيصل بطريقه مقرفه
ثم يسمح يده في مفرش السفره
فيصل: ايه يا حماتي فين الكنافه والقطايف
نادين: ايه القرف ده أنته صغير محدش علمك النظام والنضافه
محمد: عيب كده يا بنت
نعمات: حقك عليا سالم ونادين بيهظرو معاك قومي يا شيكا خدي عريسك وروحو البلاكونه فرجيه علي الحاره
صفيه: ممكن يا محمد نتكلم انا وانته علي انفراد
لينظر محمد الي شوقيه
شوقيه: وماله يمكن عايزه تتكلم ف حاجه تخص الجوازه
شيكا بلا اهتمام: اتفضل يا استاذ فيصل ف البلاكونه
وبعد أن دخلو البلاكونه
فيصل: انا معنديش مشكله انك تشتغلي بس انا اللي همسك الفلوس انا محبش مراتي يبقي معاها فلوس لازم احس برجولتي وبعدين فين الشاي والحلويات
شيكا: اه طيب هروح اجيبلك
لتخرج شيكا لتري أن صفيه تجلس مع محمد في غرفه الصالون
لتستمع الي ما تقوله
صفيه: بقولك ايه يا محمد متتجوزني وسيبك من مراتك ديه ده حتي شكلها وحش ولبسها بلدي اوي ومتشرفش
محمد: انتي بتقولي ايه
لتدخل عليهم شيكا بعصبيه
شيكا: جري ايه يا حربايه انتي جايه ترمي شباكك علي جوز اختي
صفيه: حربايه مين يا بتاعت الفشه والكرشه انتي
شيكا: محمد بيحب مراته وعياله ياله خشي خدي اخوكي ومع السلامه من هنا احسن قسما بالله ادبحكم واشفيكم
ليستمع سالم لصوتها العالي
سالم: عن اذنك يا معلمه ياله يا وليه من هنا فوتي قدامي خش يا سقط هات الحلوف اللي جوه ده قلب معدتي الله يخربيته
ليسحبه سقط من قميصه
سقط: ياله من هنا
فيصل: أنا الاستاذ فيصل يتعمل فيا كده انا واختي علي العموم انتو الخسرانين
وبعد أن نزل فيصل واخته
نعمات بغضب : عاجبك عمايل صبيانك ديه ماله الاستاذ فيصل قيما وسيما وله انتي عايزه تموتيني
محمد ★: بعد الشر عليكي يا حماتي انا اسف يا شيكا مكنتش اعرف انهم كده حقك عليا ولو انتي بالفرض كنتي وافقتي انا كنت هرفض مش هو ده اللي ينفع تتجوزيه ده بني ادم مقرف هو واخته وقال بتقوللي سيبك من شوقيه واتجوزني
شوقيه ★: نعم يا حبيبي ومقولتليش ليه كنت نزلتها متكسحه
محمد ★: لاء ما شيكا قامت بالواجب
نادين ★: برافو عليك يابابا ده رخم اوي بقي القمر ديه تتجوز المخلوء ده
—
لتضحك نعمات
نعمات ★: عندكم حق انا نفسي قرفت من شكله وهو بياكل هو انتي ساكته ليه يا شيكا
شيكا ★: مافيش ربنا يخليكم ليا
نعمات ★: خليكي براحتك ونصيبك قاعد وربنا يسعدك ويوعدك بابن الحلال اللي يريح قلبك
—
وتمر ايام الشهر الكريم وها نحن اليوم يوم وفقه الشهر الكريم ما اسرع ايامك ايها الشهر الحبيب
—
وفي منزل شيكا كانت الشقه تعج بالنساء لتجهيز الكحك والبسكوت
شيكا ★: تسلم ايدكم ياله شهلو هو فاضل اد ايه عاي الفطار
شوقيه ★: لسه ساعتين
شيكا ★: اسمعوني يا جماعه عايزاكم كلكم بعد متخلصو تروحو الكوافير عند اسماء وانا هحاسب لكم كلكم عشان نساعدها ونفتح نفسها علي الشغل
نعمات ★: فين صبيانك يا شيكا بقاللي ساعه باعته لهم عشان ييجو ياخدو الصيجان وهما مش موجودين
شيكا ★: والله ما عارفه بيروحو فين اليومين دول كل يوم يختفو بعد منشطب ومش عارفه بيروحو فين