رواية بين النفوذ والقلب الفصل الواحد والثلاثون 31 بقلم نسرين نادر


رواية بين النفوذ والقلب الفصل الواحد والثلاثون 31 بقلم نسرين نادر


صلي على النبي ♥

كان "شريف" سايق عربيته وقادم من بعيد على طريق الساحل رايح ناحية الفيلا، وفي لحظة... لمحت عينيه حركة مريبة وقريبة جداً من الشارع الفاصل بين الفيلا والبحر.


ركّز شريف بذهول، شاف شخص غريب بيسحب بنت بقوة وبيحط على وشها منديل، والبنت جسمها ارخى وفقدت الوعي في ثواني! بَصّ أكتر وبدأت ملامحها تبان... كانت "هنا"!


عيني شريف اتوسعت بصدمة ورعب، وقلبه هيقف وهو بيشوفهم بيحدفوها جوة عربية سودا متفيمة، والعربية طارت أقصى سرعة!


شريف اتصرف في ثانية؛ داس بنزين على الآخر وكسر دركسيون عربيته ومشي ورا عربية الخاطفين على طول، وهو باصص عليهم عشان ما يضيعوش منه، وفي نفس الوقت طلع تليفونه بإيد بتترعش وطلب رقم ابنه "آسر".


التليفون كان بيرن... وآسر ما بيلحقش يرد أول مرة لأنه جوة المكتب.


شريف زعق في العربية بعصبية ورعب وهو باصص على الطريق:


"رد يا آسر!! رد يا ابني الله يهديك!!"


طلب الرقم تاني... وفوق في المكتب، آسر لمح اسم أبوه بيكرر الاتصال، فرد بهدوء:


"أيوه يا بابا... في حاجة؟"


صوت شريف خرج مرعوب وبيصرخ في التليفون:


"الحق يا آسر!! الحق يا ابني هنا اتخطفت قدام عيني حالاً!! في عربية سحبتها وأنا ماشي وراهم على طريق الساحل دلوقتي!"✍🏻📖بقلمي نسرين نادر 


آسر اتصلب في مكانه زي الصخرة، وعينيه اسودت وبرقت بصدمة وعدم تصديق، ونطق بذهول ورعب:


"إيه الكلام اللي أنت بتقوله ده يا بابا?!"


شريف صرخ فيه: "زي ما بقولك! أنا بعت لك اللوكيشن أهوت وتعال ورايا بسرعة!"


عمر وأحمد واقفين مستغربين رد فعله وملامحه اللي اتحولت، فقربوا منه بسرعة وسألوه بقلق:


"في إيه يا آسر؟! إيه اللي حصل?!"


آسر ما ردش عليهم، وفتح الباب ونزل يجري بجنون على السلم ووراه عمر وأحمد بيجروا وبينادوا عليه، وآسر نازل يصرخ بصوت هز الفيلا وبيغلي من القلق:


"طنط أمينة!! عم عبد العظيم!! يا أمي!!"


قعد ينادي عليهم في بهو الفيلا والجاردن ومحدش بيرد، المكان فاضي تماماً!


عمر مسكه من كتفه وقاله بلهفة وصدمة:


"في إيه يا آسر اتكلم! إيه اللي حصل?!"


آسر بص لهم وعينيه بتطق شرار وجنون، ونطق بصوت مهزوز ومشرخ:


"هنا اتخطفت!! أبويا شافهم بياخدوها في عربية وماشي وراهم دلوقتي!"


أحمد وعمر اتصدموا ووقفوا مش عارفين يستوعبوا، وآسر بص حواليه في البهو الفاضي وقال بغضب وسرعة:


"الظاهر مفيش حد هنا أساساً!"


وطلع يجري بأقصى سرعة على برة الفيلا باتجاه الشاطئ، ووراه عمر وأحمد بيجروا زي المجانين.


أول ما وصلوا الشط، لقى طنط أمينة، وسناء، وعم عبد العظيم والجميع واقفين مع جيجي ونسمة وطارق الحارس، والكل عيونه على البحر ومذعورين!


آسر هجم عليهم وسأل البنات بجنون وصوت مرعب:


"فين هنا?!"


جيجي بلعت ريقها وخافت وقالت بسرعة:


"هنا راحت الفيلا من شوية عشان تجيب التليفون والنظارة الشمسية بتوعها!"


طنط أمينة قربت منه وبكت وقالت بلهفة وخوف:


"يا ابني إحنا كنا قاعدين عادي، ولقينا تليفون هنا بيرن وهو على السفرة، فردت ولقينا واحدة بتكلمها وبتقولها إن فيه حد من البنات بيغرق هنا على الشط! فقالت لنا انزلوا أنتم بسرعة وهي طالعة تخبط عليك في المكتب عشان تنزلوا مع بعض... وإحنا طلعنا نجري كلنا عشان نيجي هنا نلحق البنات!"


جيجي ونسمة بصوا لبعض بصدمة وقالوا:


"بس إحنا محدش فينا نزل المية ولا كنا بنغرق أصلاً! إحنا قاعدين مكاننا!"


آسر غمض عينيه واستوعب اللعبة الشيطانية والفخ الملعوب عشان يخلوا الفيلا ويجروهم كلهم على الشط برة! والتفت على طارق الحارس ونزل فيه توبيخ وزعيق بصوت هز الشاطئ كله:


"أنت كنت فين يا طارق؟! وإزاي تسيبها ترجع الفيلا لوحدها من غير ما تكون معاها؟! إزاي تتصرف بالغباء ده?!"


طارق اتفاجأ وبلع ريقه برعب وذهول، وقال بصوت مهزوز:


"يا باشا والله هي قالت لي دي خطوتين على الشط ورجعة في ثانية وما تقلقش وما رضيتش تخليني أجي معاها..."


آسر صرخ فيه بحدة وعيون متوحشة:


"ما تقلقش إيه وزفت إيه؟! أنت حراسة يعني خطوتك بخطوتها! إزاي تسيبها تتحرك لوحدها في مكان زي ده?!"


وفي اللحظة اللي آسر رايح يجري عشان يلحق لوكيشن أبوه، مسكه عم عبد العظيم من إيده بقوة ودموعه في عينيه وقال له بلهفة وصوت بيترعش:


"استنى يا ابني! أنا عايز أقولك على حاجة مهمة!"


آسر بص له بعصبية واستعجال:


"مش وقته يا عم عبد العظيم! بعدين بعدين!"


عم عبد العظيم صرخ بدموع وحرقة:


"لا مهمة يا آسر!! هنا سابت البنات وجات لي بتجري ومخدوضة، وقالت لي إن سامي وقفها برة وقال لها إنه بيحبها وعايزها، وإنها مشيت ورا الفلوس وراحت لك، وأنت طلعت له في اللقمة زي الزور! وقال لها قدامك ساعتين ثلاثة وآسر مش هيكون موجود وهترجعي تتذللي لي! وهنا كانت طالعة لك المكتب مخصوص عشان تحذرك وتقولك الكلام ده! الحق بنتي يا آسر بالله عليك ما تسيبهاش.. أنا ماليش غيرها في الدنيا!"


آسر عيونه اسودت وعروق رقبته برزت بغضب أعمى لما سمع اسم "سامي"، وبص لعم عبد العظيم ونطق بثبات ووعيد مرعب:✍🏻📖بقلمي نسرين نادر 


"ما تقلقش يا عم عبد العظيم.. وربنا لأجيب لك خبرها النهاردة ونرجعها بالسلامة!"


التفت آسر فوراً لـ أحمد وعمر ونطق بأوامر صارمة وسريعة:


"أحمد.. عمر.. اعملوا اللي اتفقنا عليه فوراً!"


وبص لـ طارق وقال بصوت قاطع:


"وحط الحراسة كلها هنا، وخلي أشرف وسعد حسن يبقوا موجودين هنا مع الجماعة لحمايتهم، والباقي كله يطوّق المكان ويكون جاهز!"


وبص لأهله وعائلته ونطق بحسم وهو بيتحرك بلهب:


"أنتم ادخلوا دلوقتي جوة الفيلا ومحدش يطلع برة خالص!"


في العربية، ركب أحمد وعمر بسرعة البرق، وداس عمر بنزين على آخرها وطلعوا طايرين على أقرب مركز شرطة، وفي الطريق مسك عمر تليفونه وطلب "علاء".


أول ما علاء رد، قالوا له بلهفة وتوتر:


"علاء! إحنا رايحين على مركز الشرطة القريب مننا حالاً، هنا اتخطفت!"


علاء رد بصوت صارم وثابت طمنهم:


"عارف.. ما تقلقوش، مازن مستنيكم هناك وأنا قايل له على كل حاجة ومظبط كل التفاصيل، وأنا كمان ثواني وهكون طالع بقوة من عندي!"


"تمام، إحنا ثواني وهنكون هناك!".. وقفلوا السكة وداست العربية في طريقها كأنها طلقة.


وصل عمر وأحمد قسم الشرطة ودخلوا بلهفة لمكتب "مازن"، اللي كان مجهز نفسه وعارف تفاصيل كل الخيوط اللي آسر كان شغال عليها. أول ما دخلوا، حكوا له بسرعة وجنون على اللي حصل مع هنا واختطافها.


مازن قام واقف بثبات وعينيه كلها جدية، وقال بحسم:


"تمام.. حضّروا القوة بسرعة!"


وفي نفس اللحظة، مسك تليفونه واتصل بـ آسر اللي كان طاير بعربيته هو وطارق ورا اللوكيشن اللي بعته أبوه "شريف":


"آسر! ابعت لي اللوكيشن اللي ماشي وراه أبوك حالاً.. أنا والقوة في ضهركم!"


وفي جهة تانية خالص... مظلمة وهادية.


كانت "هنا" نايمة على كنبة في أوضة غريبة ومقفولة، وجنبيها "سامي" قاعد باصص لها بترقب وعصبية، وبص للبنت اللي كانت مسؤولة عن مكالمة التليفون وقال لها بحدة:


"هي لسه ما فاقتش ليه لحد دلوقتي؟!"


البنت قربت بتوتر وقالت:


"حالاً هتفوق يا باشا.. استنى بس، هات شوية برفان أو منبه نحطهولها."


قربت البنت وحطت البرفان قدام مناخيرها، وبدأت هنا تتحرك ببطء وهي بتأن بتعب:


"آه... دماغي..."


فتحت عينيها ببطء، وكانت الرؤية قدامها مشوشة ومغلوشة، حاولت تستوعب هي فين، وقالت بصوت مهزوز وتعبان:


"أنا... أنا فين؟"


رفعت راسها وبصت حواليها بصدمة، وفجأة لمعت عينها على "سامي" وهو قاعد قدامها بابتسامة صفرا!


اتخضت رعباً، ونطت بوعيها كله، وجريت بضهرها لحد ما لزقت في آخر الكنبة وهي بتترعش من الصدمة:


"أنت... أنت بتعمل إيه هنا يا سامي؟! وأنا جيت هنا إزاي؟!"


سامي وقف بهدوء مقزز وقال ببرود:


"اهدي يا هنا.. اهدي خالص وأنا هفهمك كل حاجة، أنتِ هنا ضيفتي..."


قاطعت بصراخ وغضب أعمى وهي بتقوم تقف وتزعق في وشّه:


"ضيفة مين وزفت إيه؟! أنا بعمل هنا إيه أصلاً؟! وجيت هنا إزاي؟!"


وفجأة... شريط الثواني اللي قبل ما تفقد الوعي عدى قدام عينيها، لما شخص جه من وراها وكممها بالمنديل!


بصت له بجنون وقالت بصوت عالي كاد يكسر المكان:


"أنت خطفتني يا سامي؟! أنت اتجننت بجد؟! إيه المهزلة والجنون اللي أنت بتعمله ده؟! أنت إزاي تجرؤ تعمل كده؟!"


سامي قرب منها خطوة وقال بنبرة باردة ومستفزة:


"واطي صوتك يا هنا.. وبعدين إيه الليلة دي كلها؟! أنا ما خطفتكيش ولا حاجة، كل الحكاية إن لو كنت طلبت أقابلك بطريقة ودية، أنتِ ما كنتيش هتوافقي أبداً، فاضطريت أجيبك هنا بطريقتي عشان نتكلم!"


هنا انفجرت من القهر والغضب، وعينيها دمعت من قمة الاستفزاز وقالت بصوت حاد يقطر كراهية:


"أتكلم معاك ليه؟! وتتقابلني ليه من أساسه؟! أنا ما عدتش عايزة أشوفك ولا أعرفك في حياتي أصلاً!"


سامي ضيق عينيه بحدة وقال:


"ليه يا هنا؟! هو إيه اللي حصل عشان ما عدتيش عايزة تشوفيني ولا تعرفيني؟ أنا ما أذيتكيش في حاجة!"


هنا ضحكت ضحكة قهر وقالت بتهكم:


"ما أذتنيش؟! لا ده أنت أذيتني ونص! لما توقفني وتقول لي إنك بتحبني وإن أنا جريت ورا الفلوس، وكل شوية تطلع لي بمشكلة وتعمل مشاكل بيني وبين خطيبي.. تبق أذيتني! أنا عمري ما أذيتك وعمري ما عملت فيك حاجة.. أنت إيه اللي غيرك بالشكل ده؟!"✍🏻📖بقلمي نسرين نادر 


قرب منها سامي بجمود وقسوة، ومسك دراعها بقوة ونطق بنبرة فحيح وجنون:


"اللي غيرني؟! اللي غيرني إنك كنتِ ملكي.. كان ممكن تكوني ملكي دلوقتي وتبقي مراتي! وفجأة لقيتك رحتي لواحد تاني غيري! أنتِ تعرفي أنا عملت إيه عشان أعرف أرجع أظهر في حياتك تاني؟! تعرفي أنا اشتغلت قد إيه وعملت بلاوي إيه عشان أطلع لك تاني ويكون معايا فلوس وأعيشك في عيشة كويسة?!"


هنا بصت له بذهول واستحالة وقالت بصوت مشدود:


"أنت اتجننت يا سامي! إيه الكلام اللي أنت بتقوله ده؟! وليه كل اللي عملته ده أصلاً؟! إحنا آه كنا عارفين من وأنت صغير إن عينك عليّ، بس أنت عمرك ما جيت ولا صرحتني ولا قلت لي إنك بتحبني ولا أي حاجة! عشان تغيب كل الغيبة دي والسنين دي وتطلع لي فجأة، ومتخيل إن أنا ممكن أحبك ولا أوافق عليك؟! أنا عمر ما حبيتك! طول عمري مش بشوفك غير إنك أخويا وصديقي وبس! إحنا اتربينا سوا يا سامي.. أنت خيالك مريض قوي وعملت في نفسك حاجات بشعة غيرتك! كنت ممكن دلوقتي تكون لسه صديقي وأخويا اللي بنقعد ونبتلم مع بعض على طول.. إنما إنت غيرت كل حاجة!"


ضحك سامي بصوت عالي ومرتفع مليان استهزاء، وقال لها:


"لا والله؟! على أساس إن الحب ما كانش باين لك في كل تعامل وكل حاجة كنت بعملها؟! عموماً سيبك من كل الكلام ده.. أنتِ كلها نص ساعة بالكتير أو ساعة، وتبقي مراتي!"


هنا بصت له بذهول أعمى... وفي ثانية، رفعت إيدها وضربته بـ **قلم شديد** ألمع في المكان، وصرخت بحدة وشموخ:


"أنت اتجننت بجد! ده بعدك يا سامي.. ده بعدك!"


سامي عينيه احمرت والدم غلى في وشّه، وجري عليها مسكها من طرحتها بقسوة وعنف وقال بغل مكتوم:


"أنتِ بتمدي إيدك عليّ يا هنا؟! ماشي.. اصبري بس، وأنتِ هتيجي تتذللي لي دلوقتي! وأحب أعرفك حاجة عشان ترتاحي.. حبيب القلب دلوقتي زمانه اتقبض عليه! لأن بيني وبينك كده، آيتن وعادل الراوي اتفقوا معايا، ودخلناه في صفقات مشبوهة وغيرنا له في الحسابات، ودخلناه مع ناس شمال وعمره ما هيطلع منها تاني!"


هنا صرخت في وشّه بكل قوتها وشموخها ودموع القهر في عينها:


"استحالة!! أنت كنت مفكر إنك هتعرف توقع آسر، أو إنك بكده ممكن تحصل عليّ؟! ده بعدك.. ده أنا أموت نفسي ولا إنك تطولني! وطلعت في الآخر مجرد أداة في إيد آيتن وعادل.. ونهايتك السجن يا سامي!"


في اللحظة دي، عربية آسر كسرت على المكان المقصود، ووراه طارق والعربية اللي فيها الحراس. أول ما وقف ونزل بسرعة البرق، لقى عربية أبوه "شريف" واقفة على جنب.


انتفض آسر ونفض إيده بقوة وجنون من مسكة أبوه اللي جرى يوقفه، وقال وعينيه بتطق شرار:


"ما أقدرش أستنى يا بابا!! مش هسيبها معاه ثانية واحدة!"


وجري آسر بسرعة باتجاه مدخل المبنى، ولحقه طارق فوراً. التفت طارق لـ شريف الحائر والمذعور وقال له بسرعة وهو طالع ورا آسر:


"خليك أنت هنا يا شريف بيه وأنا معاه ومعانا الحراس.. ويا حسن، خليك أنت هنا جنب شريف بيه وأمّنه!"


شريف وقف قلبه بيدق بجنون وهو باصص عليهم وطالعين يجرو، وطلع تليفونه بسرعة وطلب رقم "عمر".


أول ما عمر رد، قال شريف بصوت مرعوب وبيترعش:


"إنت فين يا عمر؟! الحق آسر طلع فوق ومفيش فاصل بينه وبينهم خلاص!"


عمر رد عليه بلهفة وهو سايق بأقصى سرعة:


"ما تقلقش يا عمي! إحنا في الطريق وقربنا عليكم خالص.. كلها دقائق ونكون عندك والقوة معانا!"


رد عليه شريف بصوت مشدود والرعب بياكله:


"انجزوا بسرعة!! إنت مش عارف آسر في حالته دي ممكن يعمل فيه إيه لو مسكه!!"


في نفس اللحظة... كان آسر طالع السلم بسرعة جنونية وطارق والحراس وراه. وأول ما قرب من الأوضة، اتسمع صوت **صريخ "هنا"** العالي وهي بتستغيث، وصوت سامي وهو بيحدفها على الكنبة بقسوة وعنف!


صوت صريخها كان زي الجمرة اللي ولعت في قلب آسر!


من غير ما يفكر، جمّع آسر كل قوته واندفع برجله بكل غل، و**كسر الباب** بضربة واحدة هزت المكان والحيطه!


سامي اتخض واتصدم بذهول، وعينيه اتوسعت من رعب المفاجأة لما شاف آسر واقف على الباب وهيئته كأنها شيطان خارج من النار!


"هنا" أول ما شافته، صرخت بدموع ولهفة وأمل:


"آسر!!"✍🏻📖بقلمي نسرين نادر 


وقامت تجري عليه بأقصى سرعة عشان تستخبى فيه، بس سامي بلمح البصر وبجنون أعمى جرى عليها، ومسكها بقسوة وشدها ليه، وطلع **مسدس** ورشقه في دماغ هنا مباشرة!


تسمر آسر في مكانه وعينيه اسودت بالكامل، وسامي واقف ورا هنا وبيترعش من الخوف والغضب، وصرخ في وش آسر بتهديد مريض:


"اوعى تقرب خطوة واحدة!! لو قربت خطوة واحدة هأنهي لك حبيبة القلب في ثانية!!"


وقف آسر بثبات مرعب، ملامحه متصلبة وعينيه بترموش من شدة الغضب، وبص للمسدس المرفوع على رأس هنا بنظرة سخرية وقوة تهز الجبال، ونطق بصوت رخامي هادي بس يرعب أي حد:


"ارمي اللعبة اللي في إيدك دي يا شاطر... أنت فاكر إنك بكده بتخوفني؟! أنت لو لمست شعرة واحدة بس منها... وربنا هأنهيك من على وش الأرض!"


سامي إيده كانت بتترعش والعرَق نازل من وشه، وضغط على رأس "هنا" بالمسدس أكتر وهو بيصرخ بجنون وغل:


"ما عدتش فارقة يا آسر! ما عدتش فارقة خلاص!! أنا كده كده ضايع واللعبة اتقفلت في وشي... ولو قربت مني خطوة واحدة كمان، هضيعها معايا خالص ومش هخليك تطولها!!"


هنا كانت بتعيط ومغمضة عينيها برعب، بس أول ما بصت لعينين آسر، شافت فيهم الثقة والأمان، وحست إن روحها ردت فيها تاني.


في اللحظة دي... لمح طارق إشارة خفية جداً من عين آسر، فبدأ يتحرك بذكاء وخطوات هادية من الناحية التانية عشان يشتت انتباه سامي ويشد تركيزه بعيد عن آسر ويهديه.


رفع طارق إيديه في الهواء وقال لسامي بنبرة هادية وبترجي متصنع عشان يمتص غضبه:


"اهدى بس يا سامي... اهدى وسيب المسدس من إيدك! مش عايزك تعمل حاجة تندم عليها باقي عمرك... سيب 'هنا' وسيبها تمشي، وبعد كده اعمل اللي أنت عايزه فينا كلنا! بس أرجوك ما تأذيهاش... ما تأذيهاش يا سامي!"


سامي اتلخبط، ولفت عينيه لجهة طارق بغضب وتوتر وهو بيصرخ فيه:


"انتوا فاكرين هتضحكوا عليّ؟! محدش يقرب!!"


وفي كسرة الثانية دي... واستغلالاً لتشتت تركيز سامي، انقض آسر عليه كالصقر بسرعة جنونية وعنيفة عشان يمسك إيده ويبعد المسدس عن رأس هنا!


سامي اتفاجأ ودبت فيه الروح بتهور وجنون، واشتبكوا في كسر من اللحظة، وإيده اتفتحت على الزناد بالخطأ...


وفجأة... **انطلقت رصاصة حية هزت أركان المكان بصوت مرعب!!**


صوت صرخة حادة وممزقة خرجت من حنجرة "هنا" وشقت السكون:


"آااااااااسر!!"


✍🏻📖بقلمي نسرين نادر 


استووووب هو اي ال حصل😮


وفي أقل من اللحظة... اتجمد آسر وطارق في أماكنهم، والدم اتجمد في العروق، بينما وقف سامي يبص بذهول وصدمة ورعب أعمى... وساد صمت قاتل أثقل من الجبال، لا يُسمع فيه سوى صدى الرصاصة التي حسمت كل شيء!


رصاصة واحدة... كانت كفيلة تغيّر مصير الجميع.


لكن مين اللي وقع؟ ومين اللي لسه واقف؟


الفصل القادم هيكشف الحقيقة... فهل أنتم مستعدون؟

مستنيه رايكم و  ياتري اي ال حصل!!..


           الفصل الثاني والثلاثون من هنا 

           لقراءة جميع فصول الرواية من هنا

تعليقات
×

للمزيد من الروايات زوروا قناتنا على تليجرام من هنا

زيارة القناة