رواية بين النفوذ والقلب الفصل الواحد والعشرون 21 بقلم نسرين نادر


رواية بين النفوذ والقلب الفصل الواحد والعشرون 21 بقلم نسرين نادر


 عهد الـ 24 ساعة وأحلام من ورق

صلي على النبي 💕

ساد صمت خانق داخل قاعة الاجتماعات عقب جملة آسر الأخيرة التي ألقاها كقذيفة مدوية في وجه سامي. كانت نظرات آسر كفيلة بإحراق المكان، بينما تجمدت هنا في مكانها والدموع تكاد تطفر من عينيها من فرط الإحراج والتوتر.


التفتت هنا نحو سامي، وقالت بصوت متهدج يرتجف رجاءً: 

"لو سمحت يا سامي.. امشي دلوقتي، أرجوك."


برقت عينا سامي بغضب واشتعال، ورفض أن يظهر بمظهر ضعيف أو منسحب أمام آسر، فقال بحدة وعناد: "أنا مش ماشي يا هنا! أنا لازم أفهم إيه اللي بيحصل هنا بالظبط؟! ومستر آسر بيتدخل في حياتنا وصفتنا بأمارة إيه؟!"


هنا بقلة حيلة وخوف من تصاعد الأمور: "لو سمحت.. بعد إذنك يا سامي، امشي دلوقتي عشان الشغل!"


قاطعها آسر بنبرة صوت منخفضة للغاية، لكنها كانت تقطر هيبة ووعيداً مرعباً وهو ينظر لسامي ببرود حاد: "أنتِ بتتحايلي عليه يا هنا؟.. أنا قولتلك تطلع برة، ده لو ما كنتش عايز أصلاً العقد اللي لسه بنعمله مع شركتكم، واللي لسه ما اتوقعش، ينتهي ويترمي في الزبالة فوراً!"


شعر سامي بالإهانة البالغة وتراجع خطوة، ثم نظر لهنا بغضب عارم وعجز عن الرد على جبروت آسر الحديدي، فقالت هنا بلهفة وأسى مستجدية هدوء الموقف: "سامي.. لو سمحت اخرج دلوقتي، لو سمحت."


أطلق سامي زفيراً غاضباً، ورمق آسر بنظرة حقد وتحدٍ أخيرة، ثم التفت وخرج من قاعة الاجتماعات بخطوات سريعة وصوت دقات حذائه تعكس مدى اشتعاله وغضبه.


عند الباب، كانت "نسمة" واقفة تتابع ما يحدث برعب حقيقي على صديقتها. تقدمت سريعاً ونظرت إلى هنا التي بدا وشها مخطوفاً تماماً وعينيها زائغتين، وحاولت نسمة إنقاذها قائلة بتلعثم ومحاولة لكسر حدة الموقف: "هنا.. تعالي يا هنا، مها كانت عايزة تسأل على شوية حاجات.. شوية بنود يعني في الملفات برة."✏️📖بقلمي نسرين نادر 


لكن آسر التفت نحو نسمة بحدة وعينين مشتعلتين وقال بنبرة قاطعة لم تترك مجالاً للنقاش: "روحي أنتِ لمها.. واقفلوا الباب وراكم!"


ابتلعت نسمة ريقها ونظرت لهنا نظرة اعتذار وقلق، ثم انسحبت وأغلقت الباب خلفها بهدوء، ليصبح الثنائي وجهاً لوجه في القاعة المغلقة.


التفت آسر نحو هنا، ورمقها بنظرة باردة غريبة، ثم قال برسمية شديدة وجافة لم تعهدها منه: "هاتي الملفات.. وحضريها على مكتبي حالاً."


ولم ينتظر ردها، بل استدار وخرج بخطوات واسعة ومتوترة نحو مكتبه الخاص.


لم تملك هنا خياراً سوى الانصياع. جمعت الملفات بأصابع ترتجف بشدة، وذهبت وراءه وقلبها يدق طبول الحرب. دلفت إلى مكتبه الفخم وأغلقت الباب خلفها ببطء، لتجده واقفاً أمام الشباك الكبير يوليها ظهره، وجسده متصلب بالكامل من الغضب.


التمست هنا شجاعتها وقالت بصوت خافت: "مستر آسر.. الملفات جاهزة."


وفجأة.. التفت آسر إليها كالإعصار، وتقدم نحوها بخطوات سريعة حتى وقف أمامها مباشرة، لدرجة أنها تراجعت خطوة للخلف من فرط هيبته وغضبه. صاح بها بصوت هادر وجسد ينتفض غيظاً:


"أنتِ إزاي ده يحصل وما تقوليليش؟! إزاي واحد يتقدم لكِ ويخطبكِ في بيتك وأنا كنت لسه موصلكِ إمبارح؟! ما كلمتنيش ليه؟! ما قولتليش ليه أول ما دخلتِ الشركة النهارده؟!"


ارتعبت هنا من زئيره العنيف، لكن كبرياءها جُرح، وصرخت هي الأخرى للدفاع عن نفسها والدموع تنساب على وجنتيها: "كنت هقولك إزاي؟! أنا أول ما دخلت البيت إمبارح بالليل لقيته قاعد مع أهلي! وقبل ما يمشي فاجأني وفاجأ الكل وقال على الطلب ده رسمي لبابا! ما كنتش قادرة أفكر ولا أعمل أي حاجة.. كنت مشلولة ومصدومة!"


ضيق آسر عينيه بغضب أعمى وقال وعروق جبينه بارزة: "وما رفضتيهوش ليه في ساعتها؟! كنتِ مستنية إيه عشان تقولي له لأ؟!"


ردت هنا بوجع وقهر: "ما كانش ينفع أرفض في ساعتها يا آسر! ما ينفعش!"


صاح آسر بسخرية وغضب مكتوم: "يعني إيه ما ينفعش؟! ده اللي هو إزاي مش فاهم يعني؟! أنتم بتفكروا توافقوا عليه طبعاً؟! مستنية أهلك يضغطوا عليكِ عشان تروحي له؟! أنتم بتفكروا في الموافقة فعلاً؟!"


انفجرت هنا بالبكاء وهي تشعر بالظلم والإهانة من اتهاماته، لكنها وقفت بقوة أمام غضبه وقالت وصوتها يتهدج باكياً وموجوعاً:


"أنا ما قلتش إن أنا هوافق عليه! بس في نفس الوقت ما ينفعش أول ما يقولي كدة أرفضه عل طول قدام أهلي! سامي إنسان محترم جداً وعيلته جيراننا من سنين، وحتى لو هرفض.. الرفض الأصول بتقول إنه يجي بعد يوم أو اتنين على الأقل عشان ما نحرجوش ولا نهين كرامته، خصوصاً إن أهلي كمان مرحبين بيه وموافقين عليه!"


اشتعل الغضب في صدر آسر بشكل غير مسبوق، وشعر بغيرة عمياء تأكل قلبه، واقترب منها أكثر حتى شعرت بأنفاسه الساخنة وهو يزمجر بجنون:


"يعني إيه موافقين عليه؟! أنتِ مش هتتجوزي حد في الدنيا دي غيري أنا! فاهمة ولا لأ يا هنا؟! مش هتكوني لغيري!"


هنا بكت بقهر وصرخت في وجهه بحقيقة كانت تؤلم قلبها منذ الأمس:


"وده اللي هو إزاي بقى؟! المفروض إن أنت بكرة خطوبتك على آيتن! حتى لو كانت لعبة زي ما بتقول.. المفروض أنا أتكلم وأعمل إيه؟! منتظر مني أعمل إيه أصلاً؟! أنا المفروض مفيش بيني وبينك أي حاجة رسمي! أنت ما أخدتش أي خطوة رسمية تخليني أقف قدام أهلي وأقولهم لأ عشان في حد في حياتي! بالتالي لما سامي جه وتقدم.. بابا رحب بيه جداً لأن بابا عارفه ومربيه على إيديه من صغره.. على الأقل هو أخذ خطوة حقيقية ورسمية ودخل البيت من بابه!"


تصلبت ملامح آسر تماماً، وخيم صمت رهيب على المكتب بعد كلمات هنا القاطعة، والتي نزلت على كبريائه كالصفعة الصادمة التي جعلته يواجه الحقيقة العارية لأول مرة.


تلاقت عيناهما؛ عيناها المغرورقتان بالدموع وعيناه المشتعلتان بغضب بدأ يهدأ تدريجياً ليحل محله لمعان غامض وفهم عميق للموقف. أدرك آسر لأول مرة أن صمته ومحاولته لحمايتها بعيداً عن الشبهات قد كلفاها الكثير، وأنها الآن تدفع ثمن معركة لم تخترها.


أخذ آسر نفساً عميقاً، وزال ذلك الجبروت الغاضب من ملامحه فجأة، ليحل محله هدوء دافئ لم تعهده منه من قبل. خطى نحوها خطوات هادئة، وببطء شديد تلاشت المسافة بينهما. رفع يده المرتعشة قليلاً، وبأطراف أصابعه مسح دمعة متمردة فرت على وجنتها، وهو يهمس لها بنبرة صوت منخفضة للغاية، غلفتها بحة رجولية حانية تذيب القلوب:


"أنتِ عندكِ حق يا هنا.. أنا ما أخدتش خطوة رسمي ترفع راسكِ قدام أهلكِ، وبسبب ده حطيتكِ في الموقف ده.. بس صدقيني، كل ده عشان كنت بحميكي وبحمي نفسي، وبخلص لعبة تانية خالص هتدمر اللي فاكرين نفسهم أسياد اللعبة."


نظرت إليه هنا بعينين متسعتين، وقلبها يخفق بعنف وهي تحاول استيعاب ما تسمعه، فتابع آسر وهو يقبض على كف يدها بلطف وتملك شديد:


"خطوبة بكرة دي يا هنا هي نهايتهم مش بدايتي مع آيتن.. أنا بطلب منكِ تديني ٢٤ ساعة بس.. بكرة في الحفلة كل حاجة هتتغير، والكل هيعرف بجد مين هي حرم آسر الحديدي.. بس توعديني يا هنا، كلمة سامي دي ما تتردش عليها بموافقة لحد ما بكرة ده يعدي على خير."


ابتلعت هنا ريقها بصعوبة، وشعرت برعشة تسري في جسدها من أثر لمسته وعهده السري، فأومأت برأسها ببطء شديد دون أن تنطق بكلمة، كأنها تسلّم له قيادة قلبها ومصيرها في هذه الـ ٢٤ ساعة القادمة.✏️📖بقلمي نسرين نادر 


مر بقية اليوم على هنا كأنه دهر كامل، لم تستطع التركيز في أي ملف، وعيناها تلمحان آسر وعمر يتحركان بسرعة مريبة خارج الشركة لإنهاء الترتيبات الأخيرة.


عندما حلت ساعات المساء، عادت هنا إلى منزلها وجسدها يئن من فرط التعب والتوتر. ما إن دلفت من باب الشقة حتى وجدت والدها "عبد العظيم" يجلس في الصالة، فنظر إليها بابتسامة حنونة وقال:


"حمد لله على السلامة يا هنا يا بنتي.. تعالي، عايزك في موضوع كده."


حاولت هنا أن ترسم ابتسامة هادئة على وجهها المتعب وقالت بنبرة خفيضة: "الله يسلمك يا بابا.. حاضر، هغير بس هدومي السريعة دي وأجيلك علطول."


أومأ والدها برأسه بارتياح. دخلت هنا غرفتها، غيرت ملابسها وتوضأت لتشعر ببعض السلام، ثم خرجت تبحث عنهما، لتجدهما يجلسان في البلكونة حيث الهواء العليل؛ والدها يتناول الشاي ووالدتها "أمينة" تجلس بجانبه بملامح يملؤها الرضا والترقب.


اتجهت هنا نحوهما وجلست على المقعد الخشبي الصغير، فترحم والدها ووضع كوب الشاي، ثم نظر إليها بحنان وقال بصوت دافئ:


"قوليلي بقى يا هنا.. إيه رأيك يا بنتي في سامي والطلب اللي طلبه إمبارح؟ إنتِ فكرتي في الموضوع؟"


فركت هنا يديها بتوتر، وحاولت استجماع شجاعتها مستعينة بعهد آسر السري، فقالت بهدوء:


"والله يا بابا.. أنا ما لحقتش أفكر خالص، واليوم كان زحمة جداً، وحتى سامي النهارده لقيته عندنا في الشركة عشان يراجع بنود صفقة لشركتهم.. وأنا قولتله في الكلام إن أنا محتاجة يومين على الأقل أفكر، لإن عندنا ملفات وحاجات كتير قوي ومشاريع في الشركة بشرف عليها أنا شخصياً الفترة دي، فـيعني دماغي مشوشة وتعبانة شوية مش قادرة أركز في قرار مصيري زي ده."


ابتسم والدها عبد العظيم بوقار وتفهم شديد، وهز رأسه قائلاً: "يا بنتي اللي إنتِ عايزاه براحتك خالص ومحدش هيغصبكِ على حاجة.. أنا بس قلت أشوفك وأتكلم معاكي عشان تعرفي إن سامي ده إحنا عارفينه من زمان، وهو عارفكِ من وإنتوا صغيرين.. وشبه إحنا كلنا كنا عارفين في المنطقة إنه كان بيحبكِ وبيتمناكِ من وإنتِ صغيرة، ولولا بس إننا نقلنا من الحي القديم وبقينا في مكان تاني، كانت الأمور مشيت من زمان.. وإحنا عارفين أهله كويس قوي وناس ولاد أصول وعائلات محترمة."


أطرقت هنا برأسها إلى الأرض في صمت تام، تشعر بثقل الكلمات على كاهلها. وهنا تدخلت والدتها "أمينة" بنبرة حنونة وهي تضع يدها على ركبة ابنتها لتربت عليها برفق:


"وغير كده يا هنا يا بنتي.. إحنا كل اللي عايزينه في الدنيا دي إنك تبقي مبسوطة وسعيدة في حياتك، واللي إنتِ عايزاه في الأول وفي الآخر هو اللي هيحصل والشور شوركِ.. بس إحنا كنا بنقول لكِ رأينا بس عشان إحنا عارفين سامي وعارفين قد إيه هو إنسان محترم وكويس وهيصونكِ."


نظرت هنا لوالدها ووالدتها بامتنان شديد ممزوج بغصة في حلقها، وقالت بصوت مخنوق: "ربنا يخليكم ليا يا رب.. سيبوني بس بكرة يعدي على خير في الشغل، وإن شاء الله خير."


وفي هذه الأثناء، وبعيداً عن حيرة هنا وصراعها الداخلي، كان الصمت يلف أرجاء المكتب الخاص بالعملاق "شريف الحديدي" داخل القصر. كان شريف يجلس خلف مكتبه الأثري الفخم، يحرك حبات سبحته العقيق ببطء ووقار، وعيناه تراقبان ولده "آسر" الواقف أمام النافذة الكبيرة وعيناه تلمعان ببرود غامض في عتمة الليل.


التفت شريف الحديدي لولده، وقال بصوته الرخيم القوي:


"هدوءك ده وراه عاصفة يا آسر.. عمر بلغني إن كل حاجة بقت جاهزة لبكرة. بس عادل الراوي مش سهل، وصحافة البلد كلها هتكون موجودة في الحفلة.. متأكد إنك هتقدر تنهي اللعبة دي بضربة واحدة؟"


استدار آسر ببطء، وعيناه تقطران ثقة وجبروتاً، ثم قال بنبرة هادئة حاسمة:


"عادل الراوي افتكر إنه يقدر يلوي دراعي بآيتن وبشراكتنا يا بابا.. بس هو ما يعرفش إن الحفلة اللي عاملها بكرة دي بمليون جنيه عشان يتباهى بيا، هتكون هي نفسها السقوط الأخير ليه ولامبراطوريته. الضربة جاهزة، وهتكون في مقتل وقدام عيون الكل.. اللعبة دي بكرة هتنتهي تماماً."


صمت آسر للحظات، ومرت ملامح هنا الباكية وصوتها المقهور في مخيلته وهي تقول: *"على الأقل هو أخذ خطوة حقيقية ورسمية"*.


شعر بنار الغيرة تشتعل في صدره مجدداً، فتصلبت ملامحه، وتحدث بنبرة غلفتها حدة وتملك غير طبيعي:


"وبكرة كمان.. في حساب تاني خالص لازم يتصفى. في بنت يا بابا.. حطيتها في وش المدفع بسبب سكوتي، والنهاردة لقت نفسها مجبورة تختار غيري لمجرد إني ما أخدتش خطوة رسمي تحميها وتثبتها قدام أهلها.. بس أنا مش هسمح لراجل تاني في الدنيا دي يلمس حاجة تخصني. بكرة كل واحد هياخد مقامه الطبيعي، وهثبت لها إن اللي بيني وبينها أقوى من أي لعبة."✏️📖بقلمي نسرين نادر 


نظر شريف الحديدي لولده بتمعن، ورأى في عينيه لمعة عشق جارف ممزوج بتحدٍ لم يره فيه من قبل. ابتسم الأب ابتسامة وقار وغموض، وقال وهو يضع سبحته على المكتب:


"طالما دخلت فيها قلبك وكبريائك يا آسر.. يبقى أنا مطمن. جينات الحديدي ما بتعرفش الخسارة، واللي بنعوزه بناخده وبنفرض شروطنا على الكل.. بكرة هنشوف مين اللي هيضحك في الآخر."


أومأ آسر برأسه ببطء، والتفت مرة أخرى ليتأمل الظلام وعقله يرسم خيوط الليلة القادمة.. ليلة الحسم التي ستغير كل الأقدار.


وفي قصر "عادل الراوي"، كانت الأجواء مغايرة تماماً؛ صخب، وموسيقى صاخبة، وضحكات تملأ الأرجاء. كانت "آيتن" تجلس في غرفتها الشاسعة الفخمة وسط أكوام من كتالوجات فساتين كبار المصممين، وحولها صديقتها المقربة "شاهي" وعدد من صديقاتها المقربات، وهن يرقصن ويغنين بحماس شديد كأنهن يحتفلن بالنصر الأكبر.


وقفت آيتن أمام المرآة الكبيرة بزهو وغرور، تضع لمسات من أحمر الشفاه وتتأمل تفاصيل جمالها المستورد، ثم التفتت لشاهي بابتسامة نصر واسعة وقالت بنبرة متعالية:


"أنا بجد مش قادرة أصدق إن خلاص بكرة الحفلة! أخيرًا بكرة خطوبتي أنا وآسر الحديدي رسمي قدام البلد كلها!"


ضحكت شاهي وصفقت بيديها قائلة بنبرة مليئة بالخبث: "يخرب بيتك يا آيتن! عيارك فلت تماماً.. أديكِ وصلتي في الآخر للي أنتِ عايزاه وبكرة هتبقي خطيبة آسر رسمي! بس قوليلي، ناوية على الفرح إمتى؟"


لوحت آيتن بكتفها بدلال وثقة عمياء: "فرح إيه؟ أنا مش هستنى شهور ولا الكلام الفاضي ده! أنا هخلي بابا يضغط بالأسهم والشغل عشان نخلي الفرح في نفس يوم الخطوبة بكرة، أو بالكتير أسبوعين.. آسر الحديدي دلوقتي بقى في إيدي، ومبقاش قدامه مفر!"


نظرت والدتها التي كانت تتابع الأجواء بسعادة وتدير معهن بعض تفاصيل الترتيبات، وسألت آيتن بفضول: "طيب يا آيتن يا بنتي.. آسر وضعه إيه معاكي الأيام دي؟"


قبل أن تجيب آيتن، تدخلت شاهي بنبرة هادئة حملت بعض الواقعية والتحذير، وقالت بصوت منخفض:


"بصي بصراحة كده يا آيتن.. ومن غير ما تزعلي مني، بس أنا حاسة كتير إن آسر مش في دماغه خالص الموضوع ده، وبارد معاكي بطريقة غريبة ومقلقة.. كأنه مش شايفك أصلاً!"


تلاشت ابتسامة آيتن فجأة، وتحولت ملامحها الرقيقة إلى غضب جارف وضيق شديد، ورمقت شاهي بنظرة نارية تكاد تحرقها وصاحت بها بحدة:


"إيه الكلام اللي أنتِ بتقوليه ده يا شاهي؟! آسر هيبقى خاتم في صباعي، وأنا هعرف كويس قوي إزاي هخليه يحبني ويمشي ورايا، حتى لو غصبًا عنه! مفيش راجل بيقف قدام آيتن الراوي.. وآسر الحديدي بكرة هيكون ملكي، والبلد كلها هتشهد على ده!"


عادت الموسيقى لتصخب من جديد، وتعالت ضحكات آيتن التي كانت ترقص بثقة من يظن أنه ملك العالم.. دون أن تدري أن الغد يحمل لها عاصفة ستقتلع كبرياءها وعائلتها من الجذور!


توقعاتكم النارية ✏️📖بقلمي نسرين نادر 


 1. إيه اللي هيحصل في حفلة بكرة بعد فرحه أيتن وغرورها ده؟ هل صدمتها هتكون مضاعفة؟


 2. تفتكروا آسر وعمر هيبدأوا  بـ إيه الاول؟ 


 3. رد فعل عادل الراوي إيه لما يكتشف إن لعبته اتقلبت عليه بالكامل في ليلة عمره؟


مستنية كل تعليقاتكم وتوقعاتكم المشتعلة يا فنانين يلا شجعوني شويه و عوضوني عن امبارح بقي ي سكاكر💕


ايه رأيكم ف الفصل و المواجهه بين هنا واسر 💕..


            الفصل الثاني والعشرون من هنا 

            لقراءة جميع فصول الرواية من هنا

تعليقات
×

للمزيد من الروايات زوروا قناتنا على تليجرام من هنا

زيارة القناة