
رواية بين النفوذ والقلب الفصل التاسع والعشرون 29 بقلم نسرين نادر
صلي على النبي ❤️
دخلت هنا الفيلا بخطوات سريعة وقلبها بيموت من الخوف، عينيها بتلتفت وراها وحاسة بتوتر شديد من وجود سامي ونظراته.
ثواني وباب الفيلا اتفتح بهدوء، ودخل آسر بهيبته ورزانته. أول ما لمح هنا واقفة ومشدودة، قرب منها بخطوات هادية، وقعد قصادها ومسك إيدها بين إيديه بتملك وحنية وقال بنبرة هادية تطمّن:
"في إيه يا قلبي؟ مالك متوترة كدة ليه ومشتي من برة بسرعة؟"
هنا بلعت ريقها وبصت له بتوتر وخوف:
"آسر.. سامي برة! أنا والله ما أعرف هو جه هنا إزاي ولا أعرف طريقنا منين! أنا خفت لما تعرف تتضايق أو تعمل مشكلة معاه..."
آسر ابتسم ابتسامة دافية ومسد على إيدها بحنان وقال:
"اهدّي يا حبيبتي.. أنا عارف إنه برة، وعارف إنك ملعكيش أي ذنب، أنتِ خايفة ومتوترة ليه بس؟"
هنا بصت له باستغرب:
"يعني.. أنت مش متضايق إنه موجود؟"
آسر ضيق عينيه بس حاول يطمنها بنبرة هادية:
"أكيد متضايق، بس يمكن جاي في شغل بالصدفة، أو يمكن جاي ورانا مخصوص.. ما تشغليش بالك بيه."
هنا حطت إيدها على وشها بقلة حيلة وقالت بعفوية وخوف:
"أنا مستغربة بجد! هو إزاي بيطلع لي في كل مكان بنروحه كده؟! وكلامه معايا بقى غريب قوي، حتى نظراته..."
أول ما نطقت كلمة "نظراته"، أعصاب آسر كلها اتشدت في ثانية! عيونه اسودت وغيرته الرجولية ثارت، وضغط على إيدها بتملك حاد بس محتفظ بهدوئه عشان ما يخوفهاش، وقال بنبرة صارمة وحنونة في نفس الوقت:
"هنا.. الكلب ده ما تشغليش بالك بيه خالص. بس أهم حاجة دلوقتي، ما تطلعيش ولا تروحي في أي حتة برة الفيلا من غير ما تقولي لي وأكون معاكي، حتى لو طالعة مع البنات.. فاهمة؟"
هنا هزت راسها بسرعة وقالت برقة: "حاضر.."
ملامح آسر بدأت تفك بالتدريج، ورجعت لها الابتسامة الدافية، وقام وقف ومسك إيدها وقال بشقاوة ورقة:
"شاطرة يا قلب آسر.. يلا بقى اطلعي أوضتك فوق."
طلعت هنا أوضتها وهي حاسة إن روحها ردت لها، وآسر استأذن وخرج للحديقة والهدوء بيسبق خططه للسهرة السرية اللي بيجهزها عشان يمسح أي أثر لخوفها.
بعد ما الليل يسود والفيلا كلها تهدى والكل يدخل ينام من تعب اليوم، كانت هنا واقفة في أوضتها جنب الشباك هادية، بتفكر في نظرات آسر وحنيته وإزاي طمنها لما خافت من وجود سامي.
وفجأة!.. اتسمع طرقات خفيفة منتظمة على زجاج باب البلكونة.✍🏻بقلمي نسرين نادر
هنا اتخضت خضة صغيرة، وقربت بحذر من البلكونة وفتحت الستارة بالراحة... فتفاجأت بـ آسر واقف تحت في الجاردن، حاطط إيده في جيبه، ولابس كاجوال أنيق، ورافع راسه بيبص لها بابتسامة ساحرة وشقية جداً!
آسر شاور لها بإيده بـ "هش" على بقه، ومسك الشنطة الأنيقة اللي كانت في إيده التانية وشاور لها عليها، وبعت لها رسالة سريعة على التليفون:
"البسي الفستان ده وتتسحبي لي تحت من غير ما حد يحس بينا.. مستنيكي يا قلبي."
هنا ابتسمت ابتسامة ساحرة وخدودها احمرت، فتحت الشنطة اللي آسر جابها لها، فلقيت فستان صيفي رقيق جداً باللون اللافندر مع حجاب أوف وايت أنيق.. لون ناعم ومختلف تماماً عن دريس الصبح، تحفة وبيبرز رقة بشرتها!
لبست الفستان وظبطت حجابها برقة، ونزلت على أطراف صوابعها السلم وهي بتتسحب وخايفة حد يصحى أو يلمحها...
أول ما فتحت باب الفيلا وخرجت للجاردن، لقيت آسر واقف مستنيها، أول ما شافها طلت عليه بالفستان اللافندر، عيونه لمعت بحب وانبهر بجمالها.
قرب منها ببطء، ومسك إيدها بحنية وهمس لها بابتسامة دافية:
"إيه البدر المنور ده؟ يلا بينا قبل ما حد يقفشنا!"
هنا ضحكت بصوت مكتوم وهي ماسكة إيده:
"رايحين فين يا آسر بالليل كده؟"
آسر ابتسم بغمزة شقية ومشى بيها بخطوات هادية باتجاه الشاطئ وهو ماسك إيدها بتملك. أول ما قربوا من المية، عيون هنا اتسعت بذهول وابتسامة الفرحة اترسمت على وشها!
كان آسر مجهز جلسة ساحرة على الرملة القريبة من المية، متحوطة بإضاءات خافتة ودافية، وطاولة صغيرة مرصوص عليها الأكل المفضل لـ هنا، وعلى مسافة هادية منهم كان واقف عزاف بيعزف نغمات دافية وشجية بالكمان بصوت خفيض يلمس الروح ويطرد أي خوف.
هنا بصت لـ آسر بذهول ورقة وعيون بتلمع:
"آسر.. كل ده عشاني؟! أنت عملت كل ده إمتى وفين?!"
آسر مسك إيدها وقعدها بحنية وقعد قصادها، وبص في عينيها بنظرة صقر يملؤها الحب والاحتواء وقال بنبرة رخامية دافية:
"عشانك أعمل أي حاجة في الدنيا يا هنا.. كان لازم أعوضك عن التوتر والخوف اللي عشتيه النهاردة، وأفكرك إنك مع آسر، وما فيش حاجة في الدنيا تقدر تعكر صفوك طول ما أنا جمبك."
هنا خدودها احمرت وشعرت بدفا مالا قلبها، وابتسمت ابتسامة ساحرة وقالت بصوت هادي:
"أنا نسيت كل حاجة وحشة أول ما وقفت معاك يا آسر.. شكراً إنك دايماً أماني."
على مسافة بعيدة وفي نقطة مدارية على الشاطئ، كان سامي واقف في الضلمة، ماسك التليفون على أذنه وعيونه متثبتة بغل على آسر وهنا وهما قاعدين في القعدة الرومانسية وسط النور الدافي.
شعر بدمه بيغلي ونفسه بيضيق وهو شايف هدوء آسر وقربه من هنا، فرفع التليفون وكلم آيتن بنبرة مشدودة ومكتومة:
"إيه الأخبار عندك يا آيتن؟ الورق والترتيبات مشيت زي ما اتفقنا؟"✍🏻بقلمي نسرين نادر
جاءه صوت آيتن واثق وهادي على الناحية التانية:
"ما تقلقش يا سامي، كل حاجة ماشية بالظبط زي ما خططنا لها.. آسر مش هيبقى حيلته أي حاجة خالص، غير الشركات المشبوهة اللي قدرنا نسربها وندخلها باسم شركته في القاهرة.. المسألة مسألة وقت بس."
سامي اتنفس بغضب وهو بيبص لـ آسر بغل ويجز على سنانه:
"طب بقولك إيه.. قولي لأبوكي يخلص بسرعة وما يطولش! أنا مش هفضل قاعد هنا في الساحل كتير أحاول ألهيهم وأتوه عينيهم عنكم وأنا شايفه قدام عيني كده.. خليه ينهي الصفقة والضربة دي فوراً!"
آيتن بثبات: "طالما ماشيين صح يبقى اصبر، بكرة الصبح كل حاجة هتكون كملت وبابا هيتحرك."
قفل سامي الخط وهو بيبص لآسر بنظرة حقد أخيرة، ومشي في الضلمة وهو فاكر إن خطتهم محبوكة ومحدش كاشفها...
بعد ما خلصوا العشاء اللطيف على النغمات الهادية الساحرة للكمان، قام آسر ومد إيده بطلب هادي ولطيف:
"تعالي نتمشى شوية على الشط تحت النور ده يا هنا."
مشيت هنا جنبه بخطوات هادية، الهواء الصيفي الخفيف بيلعب بأطراف فستانها اللافندر، وعيونها بتتأمل حبال النور الممتدة على الرملة وصوت الموج الهادي.
وفجأة.. لمحت مرجيحة خشبية أنيقة متزينة بورود بيضاء وإضاءة خافتة قدام البحر مباشرة. ابتسمت بعيون بتلمع وطفولة رقيقة، وقعدت عليها وهي بتهز رجلها بالراحة، وققف آسر قصادها وساند على الخشب، وبيص لها بنظرة صقر مليانة حب واحتواء.
هنا رفعت عيونها لـ آسر وقالت بصوت ناعم ومشاعر صادقة طالعة من قلبها:
"عارف يا آسر.. أنا عمري في حياتي ما تخيلت إني ممكن أعيش قصة حب بالجمال ده.. ولا كان يخطر ببالي إن في حد ممكن يعاملني زي الأميرة كده، ويشيل عني أي خوف أو توتر في ثانية.. أنا عمري ما حسيت بإني مبسوطة ومطمنة من قلبي إلا معاك."
آسر ابتسم ابتسامة دافية جداً، ونظرة عيونه تحولت لدفء مشهود، وقال بنبرة رخامية هادية:
"ولا أنا يا هنا.. حياتي طول عمرها كانت عبارة عن شغل، صراعات، وركض ما ينتهيش.. عمري ما فكرت في حياتي الشخصية، ولا تخيلت إن في يوم ممكن أقف الوقفة دي أو أفرح من قلبي كدة."
هنا بصت له باهتمام ورقة، فكمل آسر وهو بيبص في عينيها بثبات وحب:
"الستات كانت كتير حواليا بحكم الشغل والمجتمع، بس ولا واحدة فيهم قدرت تحرك فيا ساكن ولا تلفت نظري.. أنتِ الوحيدة من أول لحظة شفتك فيها، حسيت إن في حاجة اتغيرت.. عرفت إنك البني آدمة الوحيدة اللي أنا عايزها تكمّل معايا عمري، وإنك سر فرحتي."
ابتسامة ساحرة اترسمت على وش هنا، وخدودها احمرت من الخجل والدفا، وقالت بنبرة مليانة امتنان وحب:
"أنا فرحانة قوي يا آسر.. فرحانة إني قدرت أكون فارقة في حياتك بالشكل ده، ومبسوطة إن ربنا كتب لي أكون معاك أنت بالذات."
آسر هز راسه ببطء وابتسم برقة وهو بيبص للبحر جنبها:
"وأنا أوعدك إن الفرحة دي مش هتفارق وشك أبداً يا قلب آسر."✍🏻بقلمي نسرين نادر
فظلوا يتهامسون ويتسامرون في سكون الليل وجمال البحر، حتى بدأت خيوط النهار الفجرية الأولى تلوّن السماء بألوان هادية ودافية.
آسر وهنا قاموا وراجعوا الفيلا في هدوء التوقيت ده، ودخل كل واحد فيهم على أوضته عشان يرتاح.
هنا دخلت الأوضة وكانت لسه بالفستان وما لحقتش تغير، وفجأة اتسمع تخبيط خفيف ولطيف على سور البلكونة الملاصقة لأوضتها!
ابتسمت ورقت ملامحها، وقربت فتحت باب البلكونة وخرجت، فلقيت آسر واقف وساند على السور الفاصل بين البلكونتين، بيبص لها بابتسامة ساحرة.
هنا ضحكت برقة وقالت له:
"إيه تاني يا آسر؟ في مفاجأة تانية ولا إيه؟"
آسر ضحك بابتسامة دافية وقالب نبرته لشوق وقال:
"ما تقلقيش، لو على المفاجآت فاللي جاي كله مفاجآت.. بس بيني وبينك، مش عايز أدخل أنام وأسيبك، عايز أفضل أبص في ملامحك كده وفي عينيكي.. بتمنى الأيام دي كلها ما تخلصش أبداً."
هنا بصت له بحب وشغف وقالت بنبرة صادقة:
"أنا كمان مش عايزة الأيام دي تخلص يا آسر.. دي أجمل أيام أنا بعيشها في حياتي."
سكتت ثواني وضحتك بعفوية وقالت:
"بس إحنا مضطرين دلوقتي ندخل ننام.. لأن الكل هيصحى كمان ساعتين، وساعتها محدش هيسيبنا ننام خالص!"
آسر ضحك بصوت واطي وغمز لها بحب:
"ماشي يا ستي.. تصبحي على خير يا هنايا."
هنا خدودها احمرت وابتسمت بدفا وقالت له:
"وانت من أهله يا حبيبي."
بعد ساعتين من نوم آسر وهنا، كانت الفيلا صحيت كلها، وأصوات الضحك والحركة بدأت تملى المكان.
طلعت نسمة وجيجي فوق قدام أوضة هنا، وفي نفس الوقت كان عمر وأحمد واقفين قدام أوضة آسر.
نسمة بدأت تخبط على باب هنا بخفة دم واستعجال:
"هنااا! يا هنا! قومي يا بنتي كل ده نوم؟! ده إحنا داخلين ننام بدري جداً إمبارح، لحقتي تنامي كل ده إمتى?!"
من الناحية التانية كان عمر بيخبط بضحك على باب آسر:
"يا صقر! يا آسر بيه! صح النوم، الساحل هيفوتنا وأنت لسه نايم؟! دي مش عادتك خالص!"
جوة أوضة هنا.. قامت بصعوبة وشدت الغطا عليها، وصوتها طالع نايم ومبحوح بالعافية:
"سيبوني والنبي كمان شويه.. مش قادرة أفتح عيني ولا أقوم خالص.. أنا ما نمتش أصلاً!"
نسمة فتحت الباب حتة صغيرة وبصت لها بذهول وضحك:
"ما نمتيش إزاي يعني؟! أمال كنتِ بتعملي إيه طول الليل يا هانم؟!"
هنا اتململت في السرير وارتبكت شوية بس غطت وشها بالخدادية وقالت بعفوية:
"معرفش.. سيبوني أنام شوية كمان وحياة أغلى حاجة عندكم!"
وعلى الباب التاني، آسر فتح الباب نص فتحة وهو لابس تيشيرت كاجوال وشعره نكش شوية، وشه باين عليه التعب والنوم، وبص لـ عمر وأحمد بجمود وغمز بعينه وقال بنبرة رخامية حاسمة:
"في إيه يا عمر أنت وهو؟ الخبط ده كله ليه على الصبح؟ مش طالعين دلوقت.. روحوا افطروا وسيبوني أنام ساعتين كمان."✍🏻بقلمي نسرين نادر
عمر بص لـ أحمد وضحك بصوت عالي:
"إيه ده! الصقر مش قادر يقوم؟! لا ده في إنّ في الموضوع إنتوا الاتنين!"
آسر قفل الباب في وشهم بابتسامة خفية ورجع لسريره، ونسمة وجيجي نزلوا يضحكوا وهم شاكين إن في "جريمة سهر سرية" حصلت إمبارح بالليل!
نزلت نسمة وجيجي ومعاهم عمر وأحمد للصالون تحت، وكانت أمينة وسنى قاعدين بيجهزوا الفطار وأجواء الصبح هادية ولطيفة.
أمينة بصت لهم باستغراب وهي بتقلب الشاي وقالت:
"إيه يا ولايد؟ أمال آسر وهنا فين؟ كل ده نوم؟!"
سنى هزت رأسها وبصت للبنات بابتسامة:
"غريبة والله، ده آسر بالذات عادته بيصحى مع الفجر وما بيفوتش صحيان الصبح أبداً!"
نسمة ضحكت بقلة حيلة وقالت:
"يا طنط دول مش راضيين يقوموا خالص! خبطنا عليهم، هنا بتقول لنا سيبوني كمان شوية مش قادرة أفتح عيني، وآسر طالع لنا مش شايف قدامه وقفل الباب في وش عمر وأحمد وقالنا انزلوا افطروا وسيبوني أنام ساعتين كمان!"
عمر ضحك بصوت عالي وقال:
"شكل الساحل وهواه ضرب معاهم تقيل، الاتنين مقضينها نوم ومش راضيين يتحركوا من السراير!"
أمينة ابتسمت بحنية وقالت:
"خلاص سيبوهم يرتاحوا براحتهم، أكيد الطريق وتعب اليومين اللي فاتوا أثر عليهم.. لما يصحوا نبقى نعملهم فطار طازة."
وفي نفس الوقت في مكان تاني بعيد عن الساحل... كان عادل الراوي قاعد في مكتبه الفخم، ماسك السيجار في إيده وبيبتسم بانتصار وغرور وهو بيتكلم في التليفون مع سامي.
جاءه صوت سامي المشتعل والمتوتر من الناحية التانية:
"ها يا عادل بيه؟ الترتيبات كملت خلاص؟ أنت متأكد من الكلام ده ولا بتشتغلني؟! أنا مش عايز أي غلطة!"
عادل الراوي أخد نفس من السيجار وطلّع الدخان ببطء، ورد بنبرة مليانة كبرياء وثقة ثعبانية:
"ما تقلقش يا سامي.. كل حاجة متترتبة بالملي، وعلى النهاردة بالليل أو بكرة الصبح بالكتير هتلاقي الشرطة داخلة تقبض على آسر في قضايا الشركات المشبوهة والتزوير اللي دخلناها باسمه! خليه بقى يورينا هيطلع منها إزاي هو ولا أبوه.. ولا ست 'هنا' دي هتعمل له إيه وقتها!"
سامي حط إيده في جيبه وعيونه بتلمع بشر وغيرة:
"يعني خلاص، آسر كده اتبهدل وانتهى رسمياً؟"
عادل ضحك بصوت عالي وواثق وقال:
"أنت بتسأل إزاي يا سامي؟! أنت نسيت أنت بتكلم مين ولا إيه؟! أنت بتكلم عادل الراوي! والضربة لما تطلع من عندي، ما بتخيبش أبداً.. المسألة كلها ساعات، والصقر بتاعكم ده جناحه هيتكسر وينزل للأرض!"
قفل عادل الراوي المكالمة، وحط السيجار في الطفاية وهو بيبتسم ابتسامة انتصار باردة.
فتح درج مكتبه، وسحب ملف أسود مكتوب عليه بخط أحمر:
"آسر الحديدي."
قلب أول ورقة فيه، وضغط على زر في هاتفه وقال بهدوء:
"ابدؤوا."
وفي نفس اللحظة... كان في عربية شرطة بتتحرك بالفعل في اتجاهٍ لم يكن آسر يتوقعه أبدًا...
💥 سؤال الفصل:
بين سحر ليلة "اللافندر" وهدوء القلوب... وبين عاصفة غدر عادل الراوي وسامي اللي بتتجمع في الضلمة؛ تفتكروا هدوء آسر الحديدي ده كان استكانة لراحة الحب؟ ولا هدوء الصقر اللي بيسبق العاصفة قبل ما يقلب الطاولة على الكل؟
يلا بقي مستنيه احلي كومنتات و تفاعل ي سكاكر 💕
و عايزه اعرف رأيكم اي ف الفصل و مفجاه اسر ل هنا💕💕..