رواية بين النفوذ والقلب الفصل السابع والعشرون 27 بقلم نسرين نادر


رواية بين النفوذ والقلب الفصل السابع والعشرون 27 بقلم نسرين نادر

صلي على النبي ♥

بعد الفرملة الناشفة المرعبة، صرخات البنات كانت مالية العربية، ودخان الكاوتشات طالع يغطي الإسفلت. طارق مسك الدريكسيون بإيديه الاثنين وعينيه برقت بالخوف، وحط إيده التانية بسرعة على حزامه يستعد لأي هجوم طارئ.


هنا كانت غمضت عينيها وحاضنة جيجي، ونسمة ماسكة في ظهر الكرسي وهي بتتشهد بصوت عالي:


"أشهد أن لا إله إلا الله.. يا لهوي يااني! وصلنا للمرحلة دي؟! أهو اتبهدلنا على الصحراوي!"


وفجأة... وسط السكون التام وصوت هواء الطريق، فتح باب العربية اللي كانت وافقة قصادهم!


نزل منها آسر الحديدي بطوله المتردد، هيبته الحارقة بتملا المكان، لابس جاكيت أسود، ومشى بخطوات ثقيلة ومنتظمة باتجاه عربية البنات، والضوء العالي ينعكس على ملامحه الرجولية الحادة.


طارق أول ما شاف ملامحه وسط النور، اتنفس براحة ونزل فوراً من العربية وانعدل في وقفته وقال باحترام: "آسر بيه?!"


آسر ما ردش على طارق، كمل مشيه ببرود مرعب لحد ما وصل لشباك البنات، وفتح الباب الخلفي فجأة!


البنات صرخوا من الخضة، لكن الصرخة اتجمدت في حلقهم أول ما شافوا آسر واقف قصادهم، حاطط إيد في جيبه، وبصوت رخامي وبارد وبنبرة خفيفة، بص لهنا اللي كانت بتتنفض ودموعها معلقة في عينيها وقال:


"إيه؟ الخضة كانت جامدة ولا إيه؟"


نسمة لطمت على خدها بخفة، ونزلت رأسها من شباك العربية وهي بتنهج وتزعق بعفوية:


"جرى إيه يا عم آسر؟! هو إحنا ناقصين خضات وتوقف قلب يا جدعان؟! إيه الأكشن بتاع أحمد السقا ده اللي على السريع في نص الليل؟! إحنا كنا بنتشهد جوة!"


جيجي حطت إيدها على قلبها وقالت بقلة حيلة: "آسر! حرام عليك.. إحنا أعصابنا اتدمرت!"


آسر ما شالش عينيه من على عينين هنا، اللي كانت باصة له بصدمة وعتاب ورعب. قرب منها خطوة، ومال عليها شوية وقال بنبرة هادية بس فيها تحذير وتأديب رقيق:


"عشان تعرفي بعد كدة تسمعي الكلام وتنفذي اللي أقوله بالملي يا هانم.. الخضة دي مجرد درس صغير عشان المرة الجاية لما أنبه عليكي حاجة تسمعيها."


التفت آسر لطارق وقال له بحسم:


"طارق.. خد أنت جيجي ونسمة معاك في العربية وكملوا ورا العربية التانية.. وهنا هتركب معايا."


طارق: "تمام يا آسر بيه."


نزلوا البنات، وجيجي ونسمة اتجهوا لعربية طارق وهم بيتنفسوا براحة، بينما آسر مسك إيد هنا الراجفة بهدوء وفتح لها باب عربيته. ركبت هنا في الكرسي اللي جنبه وهي مكتومة ومش ناطقة بحرف، وآسر لف وركب في كرسي السواق ودور الموتور واتحرك على الطريق.


الهدوء التام كان سيد الموقف جوة العربية لعدة دقائق.. هنا كانت لافة وشها ناحية الشباك، باصة للطريق الضلمة وساكتة خالص، بتمسح طرف دموعها بكسرة ونفسها سريع من التوتر.


آسر لمح توترها ودموعها المكتومة، فهدا السرعة شوية، والتفت لها بنظرة دافية وقال بنبرة هادية يحاول يفك بيها الجو:✏️📖بقلمي نسرين نادر 


"شكل الخضة دي كانت جامدة عليكي قوي يا هنا؟"


هنا لفتت وشها له فوراً، وعينيها المليانة دموع لمعت بغضب وعتاب شديد، ونطقت بصوت مخنوق وانفعال متراكم:


"هو ده منظر أصلاً يا آسر؟! أنت لا كلمتني ولا عبرتني طول اليوم، ومشيت وتعصبت علينا.. لا وفوق كل ده خضتنا خضة كان قلبنا هيقف فيها! فكرنا إن في حاجة وحشة حصلت أو حد هجم علينا وأنت مش موجود أصلاً.. ومخلينا نمشي ونلم هدومنا في نص الليل كدة وأنا مش فاهمة في إيه ولا رايحين فين!"


آسر اتنهد تنهيدة طويلة وبص لدموعها وقال بنبرة دافية ومهدية:


"شفتِ اللي أنتِ حسيتِ بيه ده كله؟ أنا كمان حسيت بيه وأكتر لما جيت ولقيت سامي قاعد معكم، وأنا حتى ما أعرفش وأنتم قاعدين في الكافيه وبتتكلموا مع بعض!"


هنا مسحت دموعها بسرعة وبصت له بذهول ودافعت عن نفسها بنبرة منفعلة:


"أنا ما كنتش أعرف إنه موجود أصلاً يا آسر! أنا والبنات قاعدين وفجأة لقيناه داخل علينا وبيسلم! وكان المفروض يعني أعمل إيه أول ما أشوفه؟!"


آسر ضيق عينيه ومال عليها شوية، وقال بنبرة حادة بس فيها خوف حقيقي عليها:


"كان المفروض تكلميني فوراً يا هنا! لأن قبلها بيوم بالظبط أنا كنت معكم، وقايل لك بالنص: أنا مش عايزك تكلمي سامي ولا ألمحه قريب منكم تاني!.. أقوم ثاني يوم على طول ألاقيكي قاعدة معاه في الكافيه وأنا آخر من يعلم؟!"


هنا بصت له بعتاب وعينيها اغرورقت بالدموع تاني وقالت:


"بس ده مش ذنبي يا آسر! أنا ما أعرفش إنه هيبقى موجود في المول خالص.. إحنا كنا متضايقين ومخنوقين في البيت وعايزين نغير جو عشان كدة خرجنا، ومكنتش متوقعة أبداً إنه يظهر في وشنا!"


آسر اتنهد ومسح على وشه، وبص لدموعها وقرر ينهي النقاش عشان ميزودش توترها وقال:


"خلاص يا هنا.. نبقى نتكلم في الموضوع ده بعدين."


وقف العربية على جانب الطريق فوراً، ومردش بصورة تكمل الخناق. هنا بصت له بعتاب لأنها حسّت إنه ما فهمهاش، فلفتت وشها الجهة الثانية ناحية الشباك، ومسحت دموعها بطرف إيدها وهي كاتمة زعلها.


آسر دور الموتور وكمل الطريق في صمت.


مرت فترة طويلة وهم ماشيين، وهنا بدأت تحس إن الطريق طال، التفتت لآسر وسألته بجفاء:


"إحنا رايحين فين؟"


آسر: "دلوقتي هتعرفي."


هنا سكتت، وحبت تطلع تليفونها، دورت على الشنطة فاكتشفت إنها نسيتها في العربية التانية مع البنات! اتنهدت بضيق، ورجعت راسها لورا وسندتها على الشباك.


مع طول الطريق والظلمة والهدوء، غلبها التعب والتوتر اللي عاشته، وعينيها تقلت تدريجياً لحد ما راحت في النوم تماماً.


مرت ساعات الليل، وبدأت خيوط النهار الأولى تطلع.


آسر هدى سرعة العربية لما بدأ يوصل للفيلا. التفت جنبه وبص على هنا.. كانت نايمة زي الأطفال. ملامح الجمود اختفت من وش آسر، واتبدلت بنظرة حنان وعشق. قرب منها بهدوء، ومسك إيدها وباسها بحنية، وبعدين مال على راسها وباس جبهتها وقال بصوت همس دافي:


"لو تعرفي بس أنا بحبك قد إيه ومستعد أعمل إيه عشانك.. وخايف عليكِ قد إيه يا هنا.. كنتِ قدرتِ كل اللي أنا بعمله ده."


دخل آسر بالعربية الجاردن بتاعة الفيلا، وكانت عربية طارق وعربية عبد العظيم وصلوا وسبقوهم.


آسر بطل الموتور ورتب على كتف هنا بالراحة:


"هنا.. هنا، اصحي يلا."


هنا فتحت عينيها وهي بتفركهم بتعب، وبصت حواليها وقالت بصوت كله نوم:


"إحنا فين؟"


آسر ابتسم: "إحنا وصلنا.. يلا انزلي."


نزل آسر فتح لها الباب ومسك إيدها عشان تنزل، ودخلوا سوا الفيلا.


كانت نسمة واقفة في نص الجاردن بهدوم السفر اللي كانت لابساها، بتبص حواليها يمين وشمال بذهول. أول ما شافت هنا وآسر داخلين، جرت عليهم وقالت بصوت واطي وعفوية:


"إيه ده يا جدعان؟! هو إحنا اتخطفنا وجينا الجنة ولا إيه؟! أنا أول ما نزلت من العربية ولقيت النخل والفيلا دي افتكرت نفسي بحلم! يا ناس حد يقرصني.. أنا كنت مفكرة طارق وادينا المقطم يخلص علينا!"


هنا ضحكت بصوت واطي، وجيجي خرجت من باب الفيلا الرئيسي وهي بتضحك وقالت:


"شفتِ يا هنا؟ من ساعة ما وصلنا ونسمة مذهولة!"


الأستاذ عبد العظيم خرج ومعاه أمينة، وبص لآسر بابتسامة طيبة وقال:


"والله يا آسر يا ابني المكان جميل ما شاء الله ويشرح القلب.. ربنا يزيدك من نعيمه يا رب."


نسمة مالت على هنا وهمست في ودنها:


"بقول لك إيه يا هنوشة.. لو الخناق مع آسر بيه بيجيب فيلا وحلاوة بالمنظر ده في الآخر، يا ريت تتخانقوا كل يوم!"


آسر ابتسم ابتسامة خفيفة وقال للكل:


"يارب المكان يكون عجبكم.. ادخلوا ارتاحوا من تعب الطريق، والرجالة دخلت الشنط جوة."


أول ما فتحوا باب الفيلا الرئيسي ودخلوا للريسبشن، كانت المفاجأة مستنياهم! سناء وشريف كانوا واقفين جوة، وقربت سناء بفرحة:


"حمد الله على سلامتكم يا جماعة! أهلاً أهلاً.. نورتوا المكان!"


أمينة برقت عينيها بصدمة وبصت لعبد العظيم وقالت:


"إيه ده؟! الست سناء وأستاذ شريف هنا أهو?!"


سناء ضحكت وقالت:


"آسر كلمنا امبارح وخلانا نمشي ونسبقكم على هنا فوراً! يا دوبك وصلنا قبلكم بثلاث أربع ساعات بس.. ريحنا واستنيناكم."✏️📖بقلمي نسرين نادر 


شريف سلم على عبد العظيم وهو بيضحك:


"آسر ما بيدهيش فرصة للتفكير، خطط وجابنا في ثواني!"


سناء التفتت للبنات:


"تعالوا بقى.. الفطور جاهز وكل حاجة متظبطة، نفطر سوا وبعد كدة آخدكم أوريكم الأوض!"


اتحركوا كلهم باتجاه سفرة الفطور، وآسر وهنا كانوا ماشيين في الآخر خالص.


آسر قرب منها وبص لها بابتسامة دافية وقال:


"أنتِ إيه؟ محتاجة لسة تنامي ولا إيه؟ ما شبعتيش نوم؟"


هنا بصت له بكسوف وقال له:


"هو أنا نمت كتير ولا إيه؟"


آسر ضحك بخفة: "كتير جداً.."


ثم كمل بحنية: "تعالي يلا عشان تفطري." وأخدها من إيدها وقعدها جنبه على السفرة.


الكل قعد وبدأوا ياكلوا، ونسمة اتلفتت حواليها وبصت لآسر وقالت بخفة دم:


"معلش يعني يا مستر آسر.. أمال أحمد خطيبي فين؟ أنا طنط أمينة قالت لي إن حضرتك قلت إنه جاي معانا!"


آسر ابتسم وقال لها:


"ما تقلقيش يا نسمة، موجود.. هو وعمر زمانهم جايين في السكة دلوقتي."


أول ما قال اسم "عمر"، جيجي وشها أنر بابتسامة وفرحة، وهنا لمحتها وضحكت بخفة.


نسمة بصت لآسر وقالت:


"والله أنا مش عارفة أشكرك إزاي يعني يا مستر آسر إنك جايبني أنا وخطيبي الرحلة العظيمة دي معاكم! ويلا أهو تعوضونا عن شوية الرعب والحزن اللي إحنا بنشوفهم معاك!"


بعد الفطور، سناء قالت: "يلا بقى يا جماعة عشان نطلع نشوف الأوض."


سناء: "الأستاذ عبد العظيم والحاجة أمينة، أوضتكم هنا في الدور الأرضي جنب أوضتي أنا وشريف."


أمينة: "ربنا يخليكِ يا ست سناء."


طلعوا على الدور الثاني، وسناء كملت:


"ونسمة وجيجي، أوضتكم هنا في الجناح ده.. أوضة واسعة وفيها سريرين وطلة تجنن على البحر."


هنا وقفت محتارة وقالت ببراءة:


"أمال أنا أوضتي فين يا طنط؟"


آسر خطى خطوة وقرب منها وشاور على الباب اللي جنب أوضته وقال بنبرة دافية:


"أنتِ أوضتك هنا يا هنا.. جنب أوضتي بالظبط، الباب جنب الباب."


هنا احمرت خدودها، ونسمة حطت إيدها في وسطها وغمزت:


"أيوة بقى يا عم! يا بختك يا هنوشة.. جايبك مخصوص وعامل لك أوضة جنبه بالملي!"


جيجي ضحكت وقالت بتتريق:


"علشان كدة حطيتني أنا ونسمة في أوضة واحدة يا آسر؟ شفتِ يا نسمة؟ أهو أخويا بيفضلها علينا ومخليها قاعدة في أوضة لوحدها وجنبه كمان!"


آسر بص لجيجي وغمز لها:


"ما هو عمر وأحمد لما يوصلوا، هيبقوا في الجناح التاني اللي جنبكم.. يعني مش حارَمكم من حاجة أهو!"


جيجي سكتت بكسوف، وآسر رجع بص لهنا وهمس بصوت دافي:


"وبعدين يا هانم.. أنتِ لازم تبقي جنبي، مش عشان أحميكي بس، لا.. عشان تبقي تحت عيني، وقريبة من قلبي، وما تبعديش عني ثانية واحدة بعد كدة."


هنا ابتسمت خجلانة، ونسمة قالت لجيجي: "لا إحنا ندخل أوضتنا بدل ما نسيح من الرومانسية دي!"


دخل الكل أوضهم عشان يرتاحوا.


في أوضة آسر، كان واقف في البلكونة المطلة على البحر، والسور القصير هو الفاصل الوحيد بين بلكونته وبلكونة هنا الملتصقة بها.


أخرج هاتفه وطلب رقم عمر، وجاءه صوته:


"أيوة يا آسر.. كل حاجة مظبوطة وزي ما طلبك بالظبط، والخطوة الأولى تمت بنجاح."


ارتسمت ابتسامة صقر حادة وواثقة على وش آسر وقال بجدية:


"تسلم يا عمر.. كدة اللعبة بدأت بجد، ونشوف بقى المفاجآت الجاية هتعمل فيهم إيه!"


💣اي رأيكم فصل رااايق اهو 💕💕💕


سؤال الفصل 

يا ترى إيه الخطة السرية والمفاجآت اللي آسر وعمر بيكتبوا خطواتها؟ وهل سامي وآيتن هيقدروا يوصلوا لمكانهم في الفيلا الساحلية ولا الصقر مأمن كل خطوة؟ شاركوني توقعاتكم النارية للفصل القادم💕💕.


             الفصل الثامن والعشرون من هنا 

           لقراءة جميع فصول الرواية من هنا

تعليقات
×

للمزيد من الروايات زوروا قناتنا على تليجرام من هنا

زيارة القناة