
رواية بين النفوذ والقلب الفصل الخامس والعشرون 25 بقلم نسرين نادر
صلي على النبي 💕
داخل المخزن القديم، تحول المكان لغرفة عمليات مصغرة. كان جهاز اللابتوب مفتوحاً على الطاولة الخشبية، ووهجه ينعكس على الوجوه المشدودة. طارق رئيس الحرس كان بيحرك أصابعه بسرعة على لوحة المفاتيح وهو بيفرغ فلاشة الكاميرات اللي جابوها من محيط المول، بينما كان آسر واقف وراه زي الصقر، وعينيه مثبتة على الشاشة، وجنبه عمر وزياد اللي بيتابعوا بأنفاس مكتومة.
"وقف الكادر هنا يا طارق!"
صدر أمر آسر حاد وقاطع.
ضغط طارق على الزرار، لتظهر صورة واضحة لعربية فارهة سوداء واقفة ورا المول، ونزلت منها الست بنفس المواصفات اللي قالها الدليفري؛ النظارة الكبيرة، الخصل الصفراء، والمكياج المبالغ فيه.
طارق عمل زووم على نمر العربية وقال بتأكيد:
"النمر ظهرت يا آسر بيه.. العربية دي متسجلة باسم آيتن الراوي."
زياد ضرب كف على كف وعروق وشه برزت من الغل: "يبقى هي! المجنونة دي هي اللي رعبت أختي وبعتت لها التهديد ده! إحنا مستنيين إيه يا آسر؟ يلا نروح نجيبها من بيتها!"
آسر مكانش بيرد، عينيه كانت ضيقة جداً ومركّزة على الشاشة بنظرة غريبة، مش نظرة واحد لقى غريمه، لأ.. نظرة واحد بيفكر في لغز أكبر.
التفت آسر وخرج من المخزن بخطوات واسعة، ووراه عمر وزياد. ركبوا العربية، وقبل ما آسر يدور الموتور ويتحرك، سكت تماماً وحط إيديه على الدريكسيون وهو باصص قدامه بغموض.
التفت آسر لعمر وقال بنبرة صوت واطية وذكية جداً:
"آيتن مجنونة آه يا عمر... بس مش بالذكاء ده عشان تخطط للتوقيت ده بالظبط.. في حد وراها."
عمر سكت وبص لآسر بصدمة، ودارت بين الاثنين نظرة صامتة طويلة ومرعبة، كأنهم بيتكلموا بعينيهم عن عدو خفي هما مش شايفينه.
كسر آسر الصمت ده وهو بيضيق عينيه وبيقول بصوت حاسم:
"أنا لازم أهدى.. لازم نهدى خالص يا عمر عشان أعرف مين اللي بيحرك العرائس دي من ورا الستار، وكل اللي بيعمل كدة قصده إيه بالظبط؟ هل قصده يهددني فعلاً ولا مجرد عايز يخوفني ويلوي دراعي؟"
عمر هز دماغه بتفهم وقال: "صح يا آسر، المظهر بيقول آيتن، بس العقل بيقول إن في راس كبيرة بتخطط في الضلمة.. إحنا نأمن هنا وأهلها الأول، والخطوة الجاية هتجيب لنا راس الأفعى الحقيقية."
بعد أقل من ساعة، كانوا قاعدين في مكتب الضابط علاء (صاحب عمر وآسر المقرب). كانت شاشات العرض قدامهم وطارق واقف بيشرح التفاصيل.
هز الضابط علاء رأسه بثقة وبص لآسر وقال بنبرة جادة:
"اطمن يا آسر.. إحنا فرغنا الكاميرات وشفنا كل حاجة بالملي، وعرفنا خط سير العربية. ما تقلقش إحنا هنتابع الموضوع ده خطوة بخطوة، وكمان هنستخدم الواد بتاع الدليفري دوت عشان نجرهم.. والرقم الغريب اللي كلموه هنراقبه وهنتبعه كويس قوي لحد ما نعرف صاحبه الحقيقي ومكانه فين بالظبط."
وقف آسر وعمر وصافحوا علاء بقوة، وقال آسر بامتنان: "متشكر جداً يا علاء، تعبناك معانا."
رد علاء: "عيب يا آسر، إحنا إخوات ودي شغلتي."
خرجوا من مكتب الضابط، وفي الممر التفت زياد لآسر وعمر وقال بقلق:✏️📖بقلمي نسرين نادر
"المفروض بقى تعالوا أما نروح.. زمان هنا وأمي وأبويا قلقانين علينا جداً في البيت، وأنا نزلت امبارح من البيت ونسيت تليفوني وسايبهم على نار."
حط آسر إيده في جيبه يدور على تليفونه، وضيق عينيه وقال: "وأنا كمان شكلي نسيت تليفوني في العربية امبارح ومأخدتش بالي من كتر الشحن اللي ورايا."
عمر بص لهم وقال: "طيب يلا بينا نروح حالاً عشان نطمنهم."
وقبل ما يتحركوا، حط آسر إيده على كتف زياد، ونظر له بنظرة حاسمة وذكية وقال:
"يلا.. بس مش عايز أي سيرة تطلع لأي حاجة من اللي حصلت دي قدامهم لحد ما نشوف إحنا هنعمل إيه بالظبط. وأنت يا زياد، لو هنا سألتك على أي حاجة من ورايا، قول لها إن إحنا لسة بندور.. وإن إحنا يعني عرفنا وجبنا اللي عمل كدة وميقلقوش، مفيش أي حاجة تخوف، فاهم؟"
هز زياد رأسه وقال بركوز: "فاهم يا آسر، مش هقول حاجة تقلقهم."
تاني يوم الصبح، خيوط الشمس بدأت تدخل بهدوء من شباك أوضة هنا. الشقة من برة كانت متأمنة تماماً برجال آسر، وجوة الأوضة كانت الأجواء هادية بس مليانة قلق.
فتحت نسمة عينيها بكسل وتمطعت في سريرها، وبصت الناحية التانية لقت جيجي هي كمان بدأت تصحى. لكن المفاجأة إنهم لقوا هنا قاعدة على طرف السرير، وشها باين عليه الإرهاق التام، وماسكة التليفون في إيدها وبتدوس عليه بلهفة ووشها مقلوب.
نسمة قعدت بسرعة ولطمت على خدها بخفة دمها المعتادة وقالت:
"جرى إيه يا ست جولييت؟ هو روميو لسة التليفون بتاعه مقفول؟ يا بنتي حرام عليكي نفسك، أنتِ منمتيش طول الليل وقاعدة بتتصل عليه كدة؟ زمانه مشغول في داهية من دواهي الشغل، ولا التليفون بتاعه فصل شحن ونام من التعب.. ارحمي عينيكي دي شوية!"
جيجي قامت وقعدت جنبه هنا، وطبطبت على كتفها بحنان وقالت بصوت ناعم عشان تطمنها:
"متقلقيش يا هنا يا حبيبتي.. أنا أخت آسر وعارفاه، ساعات لما بيكون مشغول جداً أو وراه كذا حاجة في نفس الوقت مبيكونش واخد باله من التليفون خالص، أو بيقفله عشان يركز.. هو كويس والله واطمني، آسر مفيش حاجة بتهزه."
هنا بصت لهم وعينيها كانت مدمعة ومليانة خوف حقيقي، وقالت بصوت مخنوق:
"أنا خايفة قوي عليه يا جيجي.. خايفة يكون حصله حاجة بسببي. هو من ساعة ما مشي وسابنا وهو متصلش، ولا حتى طمننا برسالة واحدة... التهديد ده كان مرعب وأنا مش هطمن غير لما أسمع صوته."
جوة الأوضة، كانت نسمة واقفة مواربة الباب وسامعة صوت حركة غريبة في الصالة برة. اتلفتت بسرعة وبصت لهنا وقالت بنبرة حماسية وخفة دمها المعتادة:
"عارفة مين اللي برة يا هنا؟"
هنا اتنفست بسرعة ولمعت عينيها بلهفة وقالت: "مين؟! آسر جه؟!"
لوت نسمة بؤها بقلة حيلة وقالت: "لا يا أختي مش آسر.. ده سامي!"
جيجي عقدت حواجبها باستغراب وبصت لنسمة وقالت: "سامي؟ سامي مين ده يا هنا؟"
ضحكت نسمة ومالت على جيجي وقالت بتريقة: "دوت يا ست أنوج اللي كان عايز يخطب هنا.. هو كان جارهم من زمان قوي يعني، وإحنا كنا عارفينه من وإحنا صغيرين. بس بقى بعد لما هنا نقلت وجت عندنا هنا في المنطقة، إحنا ما عدناش عرفنا عنه حاجة.. وبالصدفة هنا لقيته عندهم يعني، كانوا رايحين عشاء عمل ولقيته! إحنا استغربنا أصلًا اللي هو بقى مهندس كبير وبقى معاه فلوس ما شاء الله.. ما علينا ما علينا، ربنا لما بيفتحها على حد! المهم كان معجب بقى بهنا من زمان وبعدين طلب إيديها، بس اللي حصل بقى يوم الحفلة وجاء الفارس آسر وأخد هنا على حصانه الأبيض وطار بيها! هو دلوقتي برة، مع إن أنا مش عارفة هو جاي برة ليه وعايز إيه بالظبط؟!"
هنا نفخت بضيق واضح وحطت إيدها على راسها وقالت بعصبية: "أوف.. مش وقته خالص! أنا مش هطلع وموش طايقة أسمع صوته."
نسمة قربت منها وضيقت عينيها وقالت بنبرة تحذير: "لا يا أختي لازم تطلعي.. أنا سمعت ودني دي قاعد برة وبيني وبينك كدة بيخوف أمك وأبوكي من اللي حصل امبارح، وشغال بخ في سموم!"
برقت هنا عينيها بصدمة وقالت: "هو عارف باللي حصل امبارح إزاي؟!"
لوحت نسمة بإيدها وقالت: "أبوكي يا أختي.. أبوكي هو اللي قال له لما سأله على الحرس!"
اتبدلت ملامح هنا للجدية، وقامت وقفت بسرعة وقالت بنبرة حاسمة: "طب وسعي كدة.. هاتي الإيشارب اللي وراكي دوت عشان ألبسه وأطلع له!"
في الصالة برة، كان الأستاذ عبد العظيم قاعد، وسامي واقف وعلى وشه علامات الذهول والاستغراب المبالغ فيها. بص سامي وراء النافذة اللي بتطل على الشارع وهو بيقول بدهشة مصطنعة:
"إيه ده يا عمي؟ إيه كل الحرس اللي واقفيين تحت البيت وعلى السلم دول؟! المنطقة مقلوبة تحت.. هو في إيه بالظبط؟"
تنهد عبد العظيم بتعب وحط إيده على جبهته وقال: "معلش يا بني.. كل ده بسبب اللي حصل امبارح."
برق سامي عينيه وعمل نفسه مصدوم ومش فاهم حاجة: "حصل إيه امبارح؟! خير يا عمي قلقعتني.. هنا جرالها حاجة؟!"
رد عبد العظيم بصوت مهموم: "جالنا صندوق لحد البيت فيه تهديد صريح بالدم لهنا يا سامي.. وآسر بيه قلب الدنيا وممشيش غير لما أمن البيت كله برجالته زي ما أنت شايف كدة."
حط سامي إيده على بقه كأنه مش مصدق، وهز دماغه بأسف وخبث شديد وهو بيبدأ يبخ سمه بالتدريج:
"لا حول ولا قوة إلا بالله! تهديد بالدم مرة واحدة؟! بس يا عمي.. هنا طول عمرها هادية وحياتها ماشية بين الحيطة والباب، عمرها ما شافت الجو ده ولا ليها في جو الأكشن والرعب دوت خالص!"
سكت سامي للحظة، وبص لعبد العظيم وأمينة اللي كانت واقفة وسامعة، وكمل بنبرة صوت ناعمة ومليانة قلق مصطنع:✏️📖بقلمي نسرين نادر
"وبعدين يا عمي.. آسر بيه ما شاء الله راجل أعمال كبير قوي وله اسمه، وأكيد حد في مقامه دوت بيبقى له أعداء وحيتان كتير قوي في السوق عايزين يكسروه.. كفاية يعني اللي حصل يوم الخطوبة واللي آيتن هانم عملته وقتها! واضح إن المشاكل بتجري وراه."
في اللحظة دي، تبادل عبد العظيم وأمينة نظرة صامتة وموجوعة، والكلام لمس حتة حساسة جوة قلبهم وخلاهم يتوخوشوا ويقلقوا بجد على مستقبل بنتها.
أمينة حبت تطمن نفسها وتدافع عن آسر, فبصت لسامي وقالت بنبرة فيها رجاء:
"بس يا سامي يا بني.. آسر امبارح قال لنا واطمنّا إنه هيحمي هنا، ووعدنا إنه هيخلي باله منها ومش هيسمح لمخلوق يمسها بأذى."
ابتسم سامي ابتسامة صفراء ملوية، وقال بنعومة عشان يهدّ ثقتهم:
"يا طنط أنا مقلتش حاجة, آسر بيه راجل وكلام رجالة ومفيش كلام.. بس هو هيحميها من مين ولا مين؟ هو هيقعد جنبها طول العمر؟ أعداء الحيتان م بيرحموش، والضربة لما بتيجي بتيجي في الغلبان اللي زي هنا.. أنا بس خايف بنتنا تروح في الرجلين بسبب صراعات ملهاش ذنب فيها."
في اللحظة دي، خرجت هنا من أوضتها وهي لابسة العباية والإيشارب بخطوات ثابتة، ورغم أن قلبها كان يدق بعنف، إلا أنها حافظت على وجهها هادئاً. بمجرد دخولها، شافت ملامح القلق على وش أبوها وأمها.
بمجرد أن وقعت عينا سامي عليها، تغيرت ملامحه فوراً؛ اتسعت عيناه، ولمعت بنظرة مزيج من الإعجاب القديم والغل الدفين، وقف بتهذيب مبالغ فيه وقال بصوت فيه نبرة قلق متكلف:
"أهلاً يا هنا.. عاملة إيه؟ طمنيني عليكي.. أنا لقيت المنطقة كلها مقلوبة، وحرس كتير جداً واقفين على باب البيت، قلقتوني جداً."
ابتسمت هنا ابتسامة باهتة وحاولت أن تبدو طبيعية وقالت:
"أهلاً يا سامي.. تسلم يا رب، مفيش أي حاجة، إحنا بخير والحمد لله."
لم ينتظر سامي، وبسرعة حاول جر الحديث للمنطقة التي يخطط لها، فقال بنبرة صوت منخفضة:
"بخير إزاي يا هنا؟ ده عمو عبد العظيم لسه كان بيحكي لي عن اللي حصل إمبـ..."
قاطعته هنا بحدة هادئة ووقار، وهي تجلس في المقعد المواجه له مباشرة:
"ما حصلش حاجة يا سامي.. حادث بسيط وعدى، متشكرة جداً لقلقك، بس صدقني مافيش داعي للخوف ده كله. آسر مأمننا كويس جداً، وهو متابع كل حاجة لحظة بتوقيتها، ومفيش أي حاجة تدعو للقلق."
في تلك اللحظة، شعر سامي بغصة في حلقه، وجزّ على أسنانه داخلياً من ثقتها الزائدة في آسر. ابتلع غضبه وقال بابتسامة صفراء:
"آه طبعاً.. أكيد آسر بيه.. طبعاً عارفه آسر بيه وقدرته.. أنا بس حبيت أتطمن عليكم، وخصوصاً إني عارف إنك مش متعودة على جو المشاكل ده."
نظرت له هنا بعينين ثابتتين وقالت بطمأنينة:
"متشكرة جداً يا سامي، متشكرة قوي لذوقك وقلقك.. ما اتحرمش منك. بس صدقني، آسر معانا، ومش هيسيبنا ولا هيسيب أي حاجة تحصل لنا.. يعني إحنا في أمان تام."
شعر سامي أن كلماتها كانت بمثابة صفعة باردة على وجهه، فقرر يلملم نفسه وينزل بسرعة قبل ما الأجواء تتوتر أكتر.
نزل سامي السلم وهو يخفي ابتسامة صغيرة خبيثة ظهرت أخيراً على شفتيه.. تمتم لنفسه بغل: "أول مرحلة نجحت.. الخوف بدأ يدخل قلوبهم."
وصلت عربية آسر الحديدي قدام بيت الأستاذ عبد العظيم في نفس اللحظة. نزل آسر وعمر وزياد، ومعاهم طارق رئيس الحرس، وبمجرد ما حطوا رجلهم جوة مدخل العمارة عشان يطلعوا.. لمحوا سامي نازل.
سامي أول ما شاف آسر بهيبته وطاقته الحارقة وجنبه عمر وزياد، الابتسامة ثبتت على وشه وحاول تصنع المفاجأة. وزياد استغرب وقال: "سامي؟ أنت هنا من بدري؟"
سامي تنحنح وبص لآسر ونزل السلم وقف قصادهم وقال بنعومة:
"أهلاً يا شباب.. حمد الله على السلامة. أنا جيت الصبح بدري لما لقيت الحرس قالبين المنطقة، ودخلت اتطمن على عمو عبد العظيم وطنط أمينة وهنا.. لسة نازل من عندهم حالا."
آسر مكانش بيرد.. عينيه الصقرية كانت مثبتة على وش سامي لثوانٍ، تفكيره الذكي لمح حاجة مش مريحة في توقيت ظهوره، وبدخل في قلبه شك خفيف جداً تجاهه، بس مأظهرش ده تماماً وحافظ على بروده.
آسر ضيق عينيه وقال بنبرة باردة رخامية:
"كتر خيرك يا بشمهندس.. فيك الخير.. بس الحراسة دي معمولة عشان مفيش أي حد 'غريب' يدخل أو يخرج من هنا من غير إدني.. طارق!"
طارق خطى خطوة لقدام بهيبة: "أؤمرك يا آسر بيه."
آسر وعينيه لسة في عين سامي: "من هنا ورايح.. مفيش مخلوق يعتب باب الشقة فوق من غير ما تبلغوني.. حتى لو كان ابن الجيران."
سامي ملامحه اتخطفت واتحرج جداً، وحس بالإهانة، فلم عازته ونزل بسرعة وهو بيغلي.
طلعوا السلم، وأول ما وصلوا الشقة، كانت هنا هي اللي واقفة ورا الباب وفتحته بسرعة. أول ما شافت آسر قدامها، بريق عينيها لمع فجأة ووشها نور، وقالت بلهفة وقلق:
"آسر! أنتم فين من امبارح؟ احنا قلقانين عليكم جداً!"
ابتسم آسر بهدوء يطمنها وقال: "ما تقلقيش.. أنا بخير."
توسعت لهم هنا عشان يدخلوا وهي بتبص لزياد بلهفة: "زياد أنت كويس؟"
زياد ابتسم وقال: "الحمد لله يا حبيبتي أنا تمام."
في اللحظة دي، خرج عبد العظيم وأمينة ونسمة وجيجي من الصالة. نسمة أول ما شافت آسر، قربت بخفة دمها المعتادة وقالت:
"أنت فين يا آسربيه من امبارح؟ طمنا عليك أنت كويس؟ الإثنين دولت قاعدين لي كدة من امبارح(هنا و جيجي)! وبالذات هنا.. كل شوية تتصل بحضرتك وتليفونك مقفول، وحتى منمتش طول الليل عشان عايزة تطمن عليك وقلقانة جداً! وحتى كمان زياد.. البيه نازل امبارح من البيت وناسي تليفونه هنا ومقدرناش نوصل لحد فيكم!"
آسر بص لهنا بنظرة مليانة حنان، وخطى خطوات ووقف جنبها بالظبط وقال بصوت دافي:
"ما تقلقيش يا هنا.. أنا كويس. أنا بس التليفون بتاعي كان فصل شحن ونسيته امبارح في العربية من كتر اللخبطة."
هنا رفعت عينيها وبصت له بعتاب رقيق: "أنت خوفتني عليك قوي، وكنت عايزة أطمن إنك بخير."
نسمة غمزت لجيجي وقالت بصوت عالي وهي بتضحك: "طب يا جماعة.. نسيب روميو وجوليت لوحدهم شوية ونيجي نقعد إحنا جوة!"
هنا وشها احمر جداً واتكسفت واتحرجت، فـ آسر ابتسم وبص لنسمة وقال لأول مرة: "لأول مرة أحس إن أنتِ معاكي حق يا نسمة!"
كلهم ضحكوا على كيرة آسر، والأجواء المشدودة بدأت تفك شوية.
تقدم الأستاذ عبد العظيم وقال بجدية: "ها يا ابني.. عملت إيه؟ طمني؟"
آسر التفت له وقال بركوز: "ما تقلقش يا عمي كله تمام.. كل اللي أنا عايز أقوله لكم إنكم ما تقلقوش من أي حاجة، ومفيش أي حاجة تستدعي إنكم تخافوا من النهاردة."
عبد العظيم سأله: "طب يعني.. الحراسة دي كلها تتشال؟"
رد آسر: "لأ.. إحنا هنسيب الحراسة دي كتأمين بس كدة."
أمينة سألته باستغراب: "ليه يا ابني؟ مش لسة بتقول إن مفيش أي حاجة تخوف؟"
آسر ابتسم وطمنها: "أيوة طبعاً يا أمي.. بس برضه ده زيادة اطمئنان عشان أبقى مطمن عليكم وبالي مرتاح وأنا في شغلي."✏️📖بقلمي نسرين نادر
ثم التفت لعبد العظيم وقال بأدب: "بعد إذنكم.. عايز أقعد مع هنا شوية لوحدنا."
عبد العظيم ابتسم وقال: "طبعاً يا بني.. اتفضلوا."
نسمة وهي داخلة الأوضة مع جيجي وأمينة بصت لهم وقالت بتريقة: "أنا قلت لكم يا جماعة نسيب روميو وجوليت من الأول لوحدهم محدش صدقني!".. الكل ضحك ودخلوا.
في الممر، جيجي بصت لعمر وسألته بصوت واطي وقلقان: "طمني يا عمر.. أنت عامل إيه؟"
عمر ابتسم وبصلها بحنان: "بخير ما تقلقيش."
جيجي: "بجد أنتم عرفتم مين اللي عمل كدة؟"
عمر ضحك وقال: "أنتِ لسة سامعة أخوكي بيقول إيه؟ ما تقلقيش يا جيجي.. المهم طمنينا عليكي أنتِ؟"
جيجي بلقائية وهي بتبص في عينيه: "أنا كويسة والله.".. وابتسمت له ونظراتهم كان فيها كلام كتير.
وفي ركن الصالة، قعد آسر وجنبه هنا. ملامح آسر اتقيدت بالجدية، "أنا لسة شايف سامي وهو نازل من عندكم يا هنا."
هنا اتأوهت بتعب وقالت بسرعة: "آه فعلاً.. هو كان هنا، وجاي بس عشان يطمن يعني لما لقى إن المنطقة كلها مقلوبة عشان الحرس اللي موجود، اتطمن ونزل على طول."
آسر ضيق عينيه، والشك الخفيف اللي جواه خلاه يتكلم بغيرة وحسم:
"هنا.. أنا مش عايز الأستاذ سامي ده يدخل عندكم هنا تاني.. أنا مش برتاح له."
هنا بصت لملامحه اللي بدأت تتنرفز وتتقلب، فحبّت تهديه وقالت بنعومة:
"أنا فاهماك وعذراك والله يا آسر.. وعارفة إنك بتخاف عليا، لكن أنت عارف هو كان جارنا من زمان وعرفنا وعشرة عمر.. عموماً (ولمت ملامحه المتكدرة وكملت بطمأنينة) ما تقلقش.. هو إن شاء الله ما عادش هييجي تاني، أصلاً مفيش حاجة تستدعي إنه ييجي تاني."
وبص لهنا وقال بنبرة هادية بس حاسمة وتحمل وعيدا
"فُكِك أنتِ من كل دوت.. أنا هعرف إزاي أخليه ما عادش ييجي هنا تاني."
نظرت له هنا بتوتر واضح وقالت بلهفة: "قصدك إيه يا آسر؟"
امتدت يده لتربت على كفها برفق، وقال بابتسامة تذيب الجليد: "أنا قلت لكِ بقى خلاص.. ما ناش عايزين نتكلم ونجيب سيرة البني آدم ده تاني.. المهم إنك وحشتيني جداً من امبارح، وماتخيلتش إني ماعرفش أبطل تفكير فيكي طول الليل بالشكل ده."
احمرّت وجنتا هنا بخجل شديد، وخفضت عينيها الأرض لثوانٍ قبل أن ترفعها إليه وتقول بصوت خافت: "أنت كمان وحشتني جداً.."
لمعت عيون هنا بنبرة شقاوة ودلال وقالت بسرعة: "أنا كمان عمرى ما تخيلت إني أحبك! كنت مخوفني دايماً بانتظامك وجديتك، بس ماكنتش أعرف إني هحبك كدة يا آسر!"
نظر آسر إلى عمق عينيها، وتلاشت كل ملامح القسوة من على وجهه، وحلّ محلها عشق حقيقي نطق به صوته الدافئ:
"أنتِ الوحيدة اللي دخلتِ قلبي من أول ما شوفتك يا هنايا."
فجأة... واختفى كل شيء!
في مكانٍ مجهول...
كان سامي قاعد في مكتبه، وعينيه حمرا من كتر الغل وعروق إيده بارزة وهو بيفتكر نظرة آسر الباردة وجملته اللي كسرت برستيجه: *"مفيش مخلوق يعتب باب الشقة فوق.. حتى لو كان ابن الجيران"*.
رمى سامي الكوباية اللي في إيده على الأرض اتدشدت ميت حتة، وطلع تليفونه وضغط على الرقم بسرعة، وأول ما الخط فتح، قال بصوت فحيح الأفاعي المليان شر وتحدي:
"مبقاش سامي لو مكسرتش مناخيرك يا آسر يا حديدي.. بقى أنا تمنعني أدخل البيت؟ ماشي.. هنشوف مين فينا اللي هيدخل ومين اللي مش هيعتبها تاني خالص.. اللعبة الجاية هتحرق قلبك عليها!"✏️📖بقلمي نسرين نادر
انتهي الفصل هااا اي رأيكم بقي عايزه رأيكم ف ال حصل كله ورد هنا علي سامي💕💕
سؤال الفصل:
بعد تحدي سامي الصريح ده، وتوعده لآسر.. يا ترى إيه الخطوة المرعبة اللي ناوي يعملها عشان يحرق قلب آسر على هنا؟ وهل عادل الراوي هو اللي على الخط معاه؟ شاركوني توقعاتكم!..