
شركة عمر مخترقه من قبل كارمن دى اول فكره طرأت فى عقلى من اول لحظه عمر قالى فيها ان شركته بتخسر كل الصفقات المهمه.
لما دخلت الشركه كان أول حاجه عملتها توزيع معلومات
معلومات دقيقه عن صفقات
فى كل مكتب كنت بدخله اسلم على الموظفين كنت بحاول اطمنهم وأعلن عن صفقات مهمه قادمه هتصلح حال الشركه وتخرجها من الورطه الماليه الواقعه فيها.
ورغم دقة المعلومات الا انها كانت مزيفه او مختلطه ينقصها تفاصيل ،وبعد اسبوع المعلومات وصلت شركة كارمن
طبعا مش كلها، لكن انا كنت بوزع معلومات مختلفه على كل قسم فى الشركه وبسجل فى دفتر عندى اسم الصفقه والقسم إلى اخد المعلومه
ولما عميلى فى شركة كارمن بلغنى عن المعلومات إلى وصلت كارمن عرفت القسم المعنى بالتجسس ودا سهل مهمتى فى التركيز على إلى شغالين فيه وكلهم كانو محل شبهه
سبت كل حاجه ماشيه ذى ما هى وفى الخفاء بعيد عن عيون كل الموظفين كنت بحضر لأول صفقه
عميل منفرد ممتعض من تحكمات كارمن وشروطها الماليه لانه كان متعثر لكنه عميل دائم
ولما راجعت صفقاته مع شركة كارمن بمساعدة عمر عرفت ان شخص بيسدد ديونه وصادق وهنا قابلته فى مقهى عام
اتفقنا على شروط الصفقه ووافقت ان ياخدها بالدين على ان يسدد لاحقا قيمة الصفقه مع جزء من الأرباح، كان معصلج شويه لكن فى الاخر وافق لما اقنعته ان نصيبنا من الأرباح ضريبة تأخر السداد شرط عادل.
الشركه كلها صحيت على حركة العمال فى المخازن والبضاعة إلى خارجه فى سيارات الشحن، حتى عمر نفسه مكنش يعرف حاجه ولا هبه، لا قيمة الصفقه ولا العميل المتعاقد
وكانت دهشتهم أكبر لما رصيد الشركه متحركش فضل ثابت يعنى مفيش عوائد دخلت الشركه
ورغم ان الاخبار وصلت هبه الا انى عرفت ان عمر دافع عنى بأستماته قصاد كل حملات التشكيك من المدير العام والمدير المالى، عمر قال فى الاجتماع انه بيدعم كل قراراتى ودى كانت أول مره أشعر بالامتنان تجاه عدوى الأول
كان دعم عمر ومراهنتة علي شغلى حاجه مش مفهومه بالنسبه ليا ،شخص اعتاد السخريه من شكلى ومظهرى وخدعنى يدعمنى بلا مقدمات.
كنت بتابع أخبار الصفقه لحظه بلحظه لدرجة حتى وانا باكل تليفونى كان مفتوح قدامى، راهنت بكل حاجه مقابل ثقتى بشخص معرفوش تمام المعرفه
حتى دون شيك يضمن حقوق الشركه ،لكن علاء الدرملى كان شخص صادق وبعد نص شهر وصلت اول دفعه من تمن الصفقه مع الأرباح.دفعه كانت قطرة المطر إلى احييت الشركه من جديد ومنحتنا متنفس لدفع المرتبات وتسير الأعمال وصيانة المعدات.
صبآح الخير يا قلبى
استقبلنى عمر بابتسامة عريضه
قلتله صباح النور خلى قلبك لاحبابك يا عمر
انا مش مصدق إلى عمليته يا احسان انتى راهنتى على حصان خاسر ورغم غده كسبتى
عرفتى ليه رغم خلقتك الملخبطه انا راهنت عليكى ؟
عمر ؟
اعتقد ان الوقت حان تحترم نفسك ،انا كمان عندى لسان وطويل جدا
رفع عمر ايده معنديش حاجه ممكن تسخرى منها انتى مضطره تتحملى سخريتى إلى آخر عمرك
يا راجل بجد؟
عمر حبيبى انت شبه الستات بالضبط ونفس طريقة كلامهم
يمكن لو حاولت تسترجل شويه تثير اعجابى
منحنى عمر ابتسامه لئيمه، سبحان مغير الاحوال
من كام شهر كنت سيدك المفضل، ولى نعمتك والحاكم بأمره
دلوقتى مبقتش بعجب ؟
لو طريقة كلامك متغيرتش معايا عمرك ما هتعجب، لازم تعرف انى انسانه وعندى مشاعر وكلامك بيأذينى حتى لو كان على سبيل المزاح
وبعدين أن خلصت على هبه وكل الموظفات عشان تدقق معايا ؟
ياراجل الشركه مليانه بنات حلوين فكك منى وسبنى اركز فى شغلى
حاضر يا احسان، اوعدك طريقتى معاكى تتغير، انى مش هقلل منك مره تانيه
رفعت عنيه، انا مش مطمنه لتغيرك المفاجيء ناحيتى مش قادره أفهمه، اصل مش معقول شخص قذر زيك هيتغير كده مره واحده ؟
ربنا يسامحك يا احسان انتى متعرفيش عمر الحقيقى
عمر الحقيقى هو الى راهن عليكى وهو إلى بيدعمك فى كل قراراتك
قلتله على فكره بانسبه لقراراتى يا ريت تطلب من هبه تنزل إعلان وظيفه احنا عايزين مدير مالى جديد
رد عمر والى عندنا هنعمل فيه ايه سيادتك ؟
قلتله هتفصله من الشركه لانه مش مناسب
احسان؟ مش عايز يكون قرارك رد فعل لتشكيكه فى شغللك الراجل بيشوف شغله
قلتله ابدا، قرارى هتعرف دوافعة بعد كام يوم بالضبط وهتشكرنى عليه
تمام انا موافق ،قابلى هبه واطلبى منها ترفد شاكر
وقوليلها عمر هيصدق على القرار.
دخلت مكتب هبه إلى كانت مشغوله بتليفونها
قعدت قدامها، بكره هتنزلى إعلان عن حاجتنا لمدير مالى جديد واشكرى شاكر واطرديه من الشركه
والله عال رفعت هبه وشها ناحيتى وقالت بقيت باخد الأوامر منك
قلتلها عمر وافق وهيوقع القرار
قالت مش مهم، انتى وعمر هتغرقو وتاخدونى معاكم
خايفه تفقدى المكانه إلى وصلتى ليها يا هبه ؟
متنسيش انتى وصلتى كرسيكى إلى قاعده عليه بسببى
او بمعنى أدق بسبب خيانتى
مش بمجهودك يا هبه انتى شبه دميه فى فاترينه عرض مش اكتر.
انا فاكره كويس لما كلمتى عمر عشان يوظف وسام
وقتها قلتى لعمر احسان اديتنى الرقم لأنها مكسوفه تطلب منك حاجه
كل إلى انت فيه مبنى على كدبه يا اختى انتى مش أفضل منى ونظرة الاحتقار فى عيونك كل ما تبصى عليه مش هستحملها اكتر من كده.
عمر بيلعب بيكى يا احسان ولما يخلص منك هتلاقى نفسك وحيده ذى الأول فبلاش تكسبى عداوتى
أبتسمت ،هبه اختى عداوتك وقريك بالنسبه ليه مش هتفرق
انا خلاص مبقتش احسان بتاعت زمان
عمر مضطر يحترمنى غصب عنه وكارمن كمان انا هجبرهها تحترمنى وكل دين سلف والايام دول.
غمغمت هبه دا ايه القفلة إلى تسد النفس دى؟
وصبت كأس وهى تطالعنى بوجه غاضب، قلتى إلى عندك يا احسان؟ اتفضلى عشان انا عايزه اضبط دماغى فى مكتبى لوحدى.
رحل شاكر من الشركه محدش كان يعرف ان هو الجاسوس
رحل فى هدوء بعد ما صارحته بالحقيقه ورفضت افضحه
رحل وكأنه منتصر وبعد اسبوع اتعين فى شركة كارمن
وعمر وصل يجرى ناحيتى يقولى شفتى إلى حصل ؟
شاكر اتعين فى شركه كارمن
قلتله كنت عارفه ولما سألتنى عن سبب طرده قلتلك اصبر
متستغربش فى الايام إلى جايه موظفين كتير هينطردو
فى نهاية الشهر وصلت الدفعه الاخيره من الصفقه ولأول مره حققنا ميزان ربح
لكن انا كنت اكتر شخص قلقان لان كل ده حل مؤقت
إلى جاى محتاج تخطيط وشغل دقيق فى السر
من غير اى شخص ما يعرف أجريت مقابلات مع اكتر من عميل وكلهم رفضو ترك شركة كارمن لعدم ثقتهم فى عمر
ولانهم ببساطه بيحققو هامش ربح كويس ومضمون
وكان لازم أكرر الفكره إلى تجر رجلهم لكن المره دى كانت بشروطى
فتحت بعض الصفقات بالدين القريب، حتى لو مش معاك فلوس تعالى الشركه وخد بضاعتك وبعد ما تبيع سدد
كانت فكره محفوفه بالمخاطر لكن انا قبلت شخصين فقط
شخصين رشحهم لى علاء الدرملى وقال انه يضمنهم بحياته
وكان لازم اكفاء علاء الدرملى عشان كده اديته صفقه بتمن المصنع من غير أرباح على ان يتولى بنفسه تحصيل الأقساط من العملاء أصدقائه
الفكره نجحت والصفقتين تمو ولما استلمت الفلوس أعلنت عنهم.
كارمن خربت الدنيا ،وقفت الشركة كلها على رجل
كانت بتصرخ ازاى شركة عمر لسه قادره تنفذ صفقات رغم وضعها المزرى ؟
والاجابه وصلتها فى الحال، احسان بتبرم صفقات بالدين الاجل
ودى نوعية صفقات مش موجوده فى شركتها
فى شركة كارمن إلى عايز بضاعه لازم يدفع وهنا كارمن قررت تحطم احسان وتقطع اخر خيط بيخلى شركة عمر تتنفس
كارمن دفعت بعض العملاء المدسوسين عندها يبرمو صفقات مع احسان بالدين الاجل
لكن مش هيسسددو والمحاكم موجوده وابقا قابلنى لما تاخد حقك..