رواية فراشة المقبرة الفصل الثاني 2 بقلم إسماعيل موسى


رواية فراشة المقبرة الفصل الثاني 2 بقلم إسماعيل موسى


عدت سنه كامله وهبه اختى مقطعانى ،رافضه تتكلم معايا رغم كل محاولاتى التقرب منها


وفى كل لحظه كنت بلوم نفسى  لانى عقبه فى طريق سعادتها.


ميت مره قلتلها هقبل بأى عريس حتى لو كان مطلق ،لكن للأسف محدش طرق باب بيتنا يسأل عنى او يتقدم ليا


الكل كان بيجى عشان هبه رغم أنها مخطوبه، وكل مره اسمع فيها دقة الباب اتوقع شخص بيدور عليه انا


لكنها كانت أحلام، وصلت لمرحلة انى مش عايزة اتجوز عشان نفسى لكن عشان هبه.


اترجيت والدى كتير، بكيت، بوست ايده لكن والدى مكنش بيسمع توسلاتى ولا يسمح ليها تدخل قلبه.


بقيت بقضى فى غرفتى كل وقتى، حتى الاكل كنت باكل لوحدى بعد ما يخلصو أكل، كنت حاسه انى عبيء تقيل على الكل ومكنش فيه مكان اهرب ليه الا غرفتى.




ممكن حد يفتح الباب؟


صرخت من غرفتى بعد ما حسيت بالصداع


الوقت كان بعد الضهر والخبط مستمر ومفيش شخص قام يفتح الباب




بعد ما زهقت قمت من على سريرى فتحت باب غرفتى


وبصيت على الصاله لقيتها فاضيه


مشيت على الباب فتحته، لقيت شاب وسيم وانيق واقف على الباب وجنبه واحده ست الظاهر اخته 


عريس جديد جاى يطلب ايد هبه ،قلتلهم اتفضلو ،عدلت الصالون بسرعه وقلت لحظه واحده أدى والدى خبر.




خبطت على غرفة بابا سألني فيه ايه؟ مش عارفه انى بريح بعد الضهر ؟


قلتله الظاهر عريس جديد جاى يتقدم لهبه


والدتى قامت ووالدى قال قوليله معندناش بنات للجواز


مكنش ممكن اقول كده طبعا ،والدتى غمزتلى وعرفت انها هتتكفل بالأمر


قالت لوالدى ميصحش نطردهم كده انا هعطلع اقعد معاهم واعتذر بصنعة لطافه.




دخلت غرفتى وقفلت الباب، حطيت السماعات على ودانى عشان مسمعش حاجه وغرقت فى صمتى الذى يعرفنى واعرفه.




يابت يا احسان ؟


انتى يا نيله افتحى الباب الزفت ده، سمعت صوت والدتى




قلت وانا بفتح الباب فيه ايه يا ماما؟


امى ضحكت ووشها منور قالت عريس


قلت منا عارفه انه عريس، مالى انا ؟




قالت عريس جاى يتقدملك




قلت يتقدم ليا انا؟


وقفت لحظه مصدومه، قلتلها ماما الظاهر غلط فى العنوان


شوفيه ليكون يقصد بيت جارنا ؟


قالت لا عايزك انتى بالاسم




حسيت نفسى مخدره ،قلت ودا هيحتاج منى ايه ؟


دا لا يمكن يفكر يتجوز واحده ذى




اخلصى، صرخت امى، غيرى هدومك وحضرى الشربات


كل دا وانا فاكراه حلم


قعدت الف حوالين نفسى اوقظ حواسى لاكون نايمه




معقول يكون يقصدنى انا ؟  انا مش حمل صدمات والله


غيرت هدومى حضرت الشربات وخرجت


والدى قال اقعدى يا عروسه، يمكن اللحظه الوحيده إلى حسستنى ان إلى انا فيه حقيقه مش حلم




قعدت متكوره على نفسى واخته  بتعاينى باشمئزاز


على صوت الزغاريد هبه خرجت من غرفتها


حتى وشكلها متبهدل أجمل منى ميت مره ،قالت فيه ايه


والدتى قالت عريس


قالت قوليله مخطوبه


والدتى ابتسمت، مش ليكى، لاختك




هبه فتحت عنيها وبصت على العريس وقالت مستحيل


والدتى قالت اسكتى هتفضحينا




هبه طيب ازاى ؟


همست والدتى امر الله




هبه بصت عليه ولأول مره فى حياتى اشوف فى عنيها نظرة غيره.




كأنى فى حلم الوقت مر بسرعه واتفقو على قراية الفاتحه لان والدى مطلبش وقت للتفكير


الولد كان كويس ،شغال، وعندة شقه وعربيه ومرتاح.




ورغم انهم مشيو من الشقه مكنتش مصدقه نفسى


كنت بقول دا مقلب ،فيلم هصحى منه حالا.




دخلت غرفتى وانا تايهه وبعد دقيقه باب اوضتى اتفتح ودخلت هبه


مكنتش مبسوطه ذى ما توقعت ولا قالت الف مبروك


سألتنى عملتيها ازاى ؟


قلت مش فاهمه تقصدى ايه ؟


رفعت حاجبها بضيق انتى هتستهبلى ؟


واحد ذى ده هيتقدملك ليه ؟


قولى انك اتفقتى معاه عشانى يا اختى يا حبيبتى عشان اتجوز


قلتلها نفسى تتجوزى النهرده قبل بكره، لكن والله ما عملت حاجه ،متقدم من نفسة وكل ما اقول الحقيقه هبه تغضب اكتر.


بطلى كدب يا احسان انا وانتى عارفين لا يمكن شاب ذى ده ممكن يتقدملك الا لو كان مجنون وهو مش مجنون




كملت لو دفعتيله فلوس قوليلى عشان اساعدك


قلتلها عيب الكلام ده ،انا مش وش كده




قالت هبه بسخريه انتى وش كل حاجه الا الجواز دا لو بيدور على خدامه او مربية أطفال عمره ما بفكر يختار واحده شكلك، لكن انا هعرف الحقيقه بطريقتى.




الباب اتقفل وقعدت أبكى حتى الفرح مستكتراه عليه، كان هيجرى ايه لو قالت الف مبروك حتى لو من غير نفس؟


ليه مصره تكسر فرحتى ؟ وانا إلى بتمنالها السعاده والفرح فى كل وقت؟




طلعت اغسل وشى من كتر البكا وغصب عنى سمعت هبه بتتكلم بانفعال فى غرفتها


كانت بتكلم وسام خطيبها ، شفت المسهوكه عملت ايه يا وسام؟


جابت عريس يتقدم لها، لا ومش اى عريس، عريس شيك وانيق


لا واسمع الكبيره بيقول عنده شقه وعربيه وشغل خاص


اه والله ذى ما بقلك كده


قعدت تتمسكن لحد ما لقيت عريس بنفس مواصفاتك واكتر كمان، مكنتش اعتقد انها وسخه بالشكل ده...


                    الفصل الثالث من هنا 

       لقراءة جميع فصول الرواية من هنا

تعليقات
×

للمزيد من الروايات زوروا قناتنا على تليجرام من هنا

زيارة القناة