رواية هنا يسكن شيخي ج2 الفصل السادس 6 بقلم هدير أسامة
ها يا زوچة ابني المصون كنتي عاوزاني في ايه؟
أترددت كتير قبل ما أقعد معاه لكن حسيت إني لازم اتكلم وأحكيله اللي جوايا كله وأخرج عن صمتي ..
أولا أنا بحب حضرتك جدا وبحترمك من زمان ، من قبل حتى ما يبقى ليا اختلاط بعائشة أو دكتورة يقين ،
بلعت ريقي واتوترت كده وخدت الشجاعه وقولتله : وروحت لدكتورة يقين أبلغها رفضي لمحمود لما سمعت كلام مش لطيف
بدر باهتمام: كلام مش لطيف من مين ؟
من .. من والدتي
قالتلك ايه والدتك ؟
قالتلي إن حضرتك كنت خطيبها وإن أنت سيبتها علشان دكتوره يقين وهي لسه متأثرة وكلام زي كده وأنا حابه أعرف من حضرتك الحقيقة كلها علشان أرتاح
بدر خد نفسه وكإنه كان عامل حسابه على اليوم دا
بصي يا بنتي مهما كان الكلام اللي سمعتيه حابب أعرف
حاجه صغيرة ، الأم هتفضل أم والجنة تحت أقدامها حتى لو كانت كفرت بالله والعياذ بالله يعني ، وكل ما كانت الأم سيئة ومحاولتك لإرضائها لوجه الله كانت شاقة كل ما كان أجرك أكبر ..
أما أي حاجه سمعتيها من والدتك فأنا مش هقولك إن دا كذب أو صدق ، أنا هقولك نصيحة واحدة ، اللي ليكي في كل الحوار دا هو محمود ، هو اللي محتاجه تعرفيه وتعيشي حياتك الحلوة معاه ،
بعد فترة من الزمن الله أعلم هتكون قد ايه ، محدش فينا هيكون موجود ، لكن هو شريك الحياة والعمر كله ، متبحثيش ورا حد هو بيكدب ولا صريح ، ابحثي في نفسك انتي بس..
عندك حق يا شيخ بدر ، لكن أنا جوايا زعلان وحاسه إني محتاجه أرتاح ، دي أمي ودي معلمتي وأمي التانيه
دا فضل من الله إن ربنا كرمك باتنين يا حفصة ، الاتنين كويسين يا بنتي الحمد لله ، انتي قربي لربنا أكتر وساعتها مافيش كلام حد خالص هيشغلك أو يقلقك ، انتي معدنك حلو أوي يا حفصة اللهم بارك ، اشتغلي على نفسك علشان ربنا يكرمنا ونجتمع عيلة واحده مع بعض في الفردوس اللهم آمين .
كلامه مريح جدا وحسيت إني محتاجه أتكلم معاه كتير ، لكن غصب عني حسيت إني محتاجه أفهم أمي بتعمل كده ليه !!
آخر حاجه قلهالي وأنا ماشية : حفصة انتي كويسة يا بنتي ، أوعي تتغيري ودايما رددي " اللهم غيرني حتى تحبني "
ــــــــــــ
طول الطريق وأنا سرحانه في كلامه وحسيت إني محتاجه افضل كويسة وأحافظ على دا ووالدتي ربنا يهديها من عنده
وصلت البيت وجيت بفتح الباب لقيته معصلج جامد كده مش راضي يفتح ،لحد ما أخيرا الباب فتح ، وأول ما فتحت لقيت فريد أخويا واقف قدامي وبيضحك وبيقولي
لسه مافيكيش صحة تفتحي الباب بردو زي ما سيبتك .
ايه دا فريييد !! انت بجد فعلا ، أخيرا جيت
وخدني بالحضن ونسيت كل حاجه مضيقاني ، أخيرا عيلتي الحقيقية وصلت بجد .
عامله ايه يا حبيبتي وحشاني اوي ، لسه شكلك متغيرش ولا بتكبري أصلا ،أومال هتتجوزي ازاي !! دا انا نزلت بسرعة أما عرفت إن فرحك الجمعة الجاية وإن الكتاب انكتب وحوارات كتير كده جيت على طول
ايه يا بنتي السرعة دي .
عادي بقا يا فريد، المهم إن أنا مبسوطه ومرتاحه والحمد لله
يلا احكيلي عن العريس اللي خطفك مننا دا
وأنا قاعده مع فريد لقيت ماما خارجه من المطبخ، حسيتني اتلجلجت و معرفتش أبص في عينها ، ومقدرتش الصراحة ، مش مستوعبه هي ازاي كده .
قولت لفريد هقوم أنا أغير هدومي علشان أجهز الغدا مع ماما .
وانا داخله سمعت ماما بتقول لفريد : بص هي دي صورتها يا فريد .
رجعت خطوتين لورا ، وقولتلها صورة مين ؟
الله دي زي القمر بجد ، ايه بقا يا ماما مش تقولي إنها حلوة كده .
خدت التليفون من فريد وبصيت لماما بصدمة وقولتلها : الصورة دي جت على تليفونك منين !!
خدتها من تليفونك علشان فريد يشوفها .
حراااام ، دي أمانة ، يعني ايه صورة بنت تاخديها من غير ما نستأذنها حتى علشان راجل يشوفها !! لا حول ولا قوة إلا بالله
وسيبتهم ودخلت الأوضة .
فريد: مالها يا ماما في ايه ؟
إسراء بمزاج: مرات ابن الشيخ بدر عاوزها تبقى ازاي
اوعي تكون عائشة مقفلة كده يا ماما أنا والله ما ناقص
انت تفرفشها يا حبيبي بقا ..
ــــــــــــــــــــــــــــــــــ
دخلت أوضتي وفكرت تاني في كلام الشيخ بدر ، هو عنده حق ، هي أمي بردو ، لكن أنا مش قادره أتعايش معاها كده ، أنا هحاول أتمالك أعصابي لحد ما الأسبوع دا يعدي وأروح أعيش عندهم وأرتاح ...
وأنا قاعده سرحانه ومهمومة ،لقيت دكتورة يقين بترن عليا
السلام عليكم عامله ايه يا حبيبة قلبي
الحمد لله يا دكتورة أخبارك ايه
رجعنا لدكتورة تاني ، أنا هسيبك براحتك لحد ما أمي تطلع منك لوحدها زي المره اللي فاتت ، المهم ممكن تستأذني والدك ووالدتك تنزلي معانا أنا وعائشة علشان نشتري حبة حاجات بعد العصر؟
اه طبعا حاضر
حسيت إني ما صدقت جاتلي خروجه مع إني عاوزه أقعد مع فريد كتير أوي
لبست ووقفت قدام ماما وأنا باصه في الأرض : أنا خارجه مع دكتوره يقين وعائشة نشتري حاجات .
إسراء بصت لفريد بحماس : يلا يا فريد دي فرصة حلوة انزل معاهم .
اتصدمت من كلامها : يعني ايه ينزل معانا ، انتي فاكره الناس دول ايه ؟ دي خروجة ستات مينفعش فيها راجل ومافيش راجل من عندهم يقعد معاه .
فريد : أنا اصلا مش قادر يا حفصة وبعدين هو أنا هاكلهم
نزلت بسرعه من غير ما ارد وأنا قلبي بيدب لقيتهم تحت ومعاهم الشيخ بدر هو اللي سايق وأول ما شافني ضحك وقالي عامله ايه يا زوجة ابني المصون .
حسيتني متطمنه أول ما شوفته ، وسلمت عليهم وقعدت جنب عائشة وأنا مرتاحة .
وصلنا المول ، وأول مره أروح المكان دا ، مكان مبهج كله
زي شرعي وسيدات بس
لقيت دكتوره يقين وعائشة بيختاروا لبس كتير جدا وحاجات كتير أوي وفجأه لقيت دكتوره يقين بتقولي : شوفي حاجه تاني هتعجبك كده غير دول ؟
ايه! دي هدوم مين؟
اه يا عروسه دا لسه هنجيب حاجات كتير بقا مش هنخلي ناقصك حاجه
ايوه بس بابا هيجبلي بإذن الله
ويجعلك ليه هو انتي مش على ذمة راجل ولا ايه ، يلا شوفي كل اللي محتاجاه متخليش نفسك في حاجه
انا أول مره أشوف ناس كده ، أنا كل مره بيبهروني أكتر وفي عز ما أنا واقفه سرحانه لقيت محمود بيرن عليا
ألو ازيك يا محمود
يا قرة عين محمود ، عامله ايه ؟ عجبتك الحاجات ، هاتي اللي نفسك فيه ، محدش دافع فيهم حاجه ، جوزك اللي دافع أنا بقولك أهه.
ربنا يخليك ليا يارب يا محمود ، كتير كده والله
مافيش حاجه تكتر عليكي ، بعد ما تخلصوا هرن على والدك وأخدك مشوار .
مشوار فين تاني؟
هوريكي العياده بتاعتي
انت الدكتور الوحيد اللي مش هينفع أغير عليه من العيانين الحمد لله .
لااااا دا انا عندي حتة قطة بعالجها مقولكيش منفوشه كده وبيضه وعينيها عسلي وحوار
ايه يا محمود أنا كده هغير من القطه .
انتي بس شوفيها وهتعرفي إني عندي حق.
ماشي يا سيدي
ــــــــــــــــــــ
بعد ٣ ساعات لقيت محمود جه ياخدني وهما هيروحوا مع الشيخ بدر ، المفروض ألاقي محمود جايبلي بوكيه ورد وحاجات بقا وجو رومانسي
لكن الصدمه لقيته جايبلي دراي فود .
ايه دا يا محمود ، دراي فود!!
ينفع تدخلي عليهم العيادة وايدك فاضيه ؟ أيعقل؟!
لأ يا محمود ميعقلش
طول الطريق وهو بيكلمني عن الحيوانات لدرجة قربت أفصل منه ، دا انت دكتور بيطري فعلا .
أول ما وصلنا العيادة اتصدمت ، لقيته معلق فوق كل قفص بالونه مكتوب عليها بحبك يا زوجي المصون وعلى مكتبه بوكيه ورد كبيييير اوي ، انا عيوني دمعت ولقيته بيطلع خاتم حلو أوي وبيلبسهولي في أيدي وقالي
مش هينفع أقولك تتجوزيني لسببين ، الأول لأننا متجوزين أصلا ، والتاني لإن انتي اللي عرضتي عليا الجواز من يومين
فضلت أضحك بصوت وهو يقولي اهدي يا بنت الحلال الحيوانات عارفه هنا اني محترم هيقولوا ايه عليا ..
معلش يا محمود غصب عني الضحكه دي بتطلع لوحدها أنا آسفة
يا قرة عين محمود طول ما محدش موجود اضحكي زي ما انتي عاوزه ، لكن أول ما يجي حد أنا عاوزهم يعرفوا اني متجوز راجل وبشنب كمان
حاضر يا سي محمود بشنب من عنيا
ـــــــــــــــــــــــــــــــــ
اكتشفت إن عالم الحيوانات دا أجمل وأوفى من عالم البشر ،محمود عرفني حاجات كتير مكنتش أعرفها ، لدرجة حسيت إنه فاهم لغتهم بجد ، من قاعده واحده معاهم علقني بيهم ، حتى القطط اللي كنت بخاف منهم ، أنا فضلت أملس على القطه وفضلت تغمض عينيها كإنها بتقولي إنها مبسوطه ومرتاحه ..
المهم بعد ما وصلني البيت قولتله تعالى أعرفك على أخويا فريد ، لسه راجع من السفر النهارده
ايه دا بجد ، طب حمد الله على سلامته ، هطلع معاكي أكيد
طلع معايا وهو متحمس ورنيت الجرس علشان هو معايا مرضتش أفتح بالمفتاح علشان لو قاعدين براحتهم جوه ولحسن الحظ فريد اللي فتحلنا
لقيتهم الاتنين بيبصوا لبعض بصدمة ووشهم قلب
فريد!
محمود !
يتبع .....