رواية إبنة القاضي الفصل الاول 1 بقلم مشاعر مبعثره

رواية إبنة القاضي الفصل الاول 1 بقلم مشاعر مبعثره

*۞﷽۞*

﴿ ﺇِﻥَّ ﺍﻟﻠَّﻪَ ﻳَﺄْﻣُﺮُﻛُﻢْ ﺃَﻥْ ﺗُﺆَﺩُّﻭﺍ ﺍﻟْﺄَﻣَﺎﻧَﺎﺕِ ﺇِﻟَﻰ ﺃَﻫْﻠِﻬَﺎ ﻭَﺇِﺫَﺍ ﺣَﻜَﻤْﺘُﻢْ ﺑَﻴْﻦَ ﺍﻟﻨَّﺎﺱِ ﺃَﻥْ ﺗَﺤْﻜُﻤُﻮﺍ ﺑِﺎﻟْﻌَﺪْﻝِ ﺇِﻥَّ ﺍﻟﻠَّﻪَ ﻧِﻌِﻤَّﺎ ﻳَﻌِﻈُﻜُﻢْ ﺑِﻪِ ﺇِﻥَّ ﺍﻟﻠَّﻪَ ﻛَﺎﻥَ ﺳَﻤِﻴﻌًﺎ ﺑَﺼِﻴﺮًﺍ ﴾ ‏

حكمت المحكمه حضوريا على المتهم : ابراهيم الصادق ادريس بالإعدام شنقا حتى الموت !!! 

رفعت الجلسه !! 

في لحظة ضجت ارجاء المحكمة بالصرخات والنواح واتكررت الفاظ متشابهة : 

انا بريئ والله انا ما قتلت زول والله ما قتلتو

اخوي بريئ حرام عليكم 😭😭😭 تمشو من ربنا وين؟ حسبي الله ونعم الوكيل حسبي الله ونعم الوكيل ، ربنا ينتقم منكم من وكيل النيابه والمتحري ولحدي القاضي !!!! 

الحكم دا هز كل الموجودين وعمت الفوضى ، طلع القاضي وهو لابس عبائة العدل باسم القانون وعلى اكتافو ميزان مالت واحده من اطرافو بطريقه ملحوظه ، كان متوسط اتنين من الحرس 

خلع العبائه وكان طالع في استعجال وهو بتكلم بالتلفون بعدم اهتمام ، لحدي ما سلمو لواحد من الحرس والخط لسه مفتوح لمن استوقفه وكيل النيابه وادى التحيه ، كان واضح انو في ود بينهم . 

: ممكن اخد من وقتك خمسة دقائق يا مولانا؟ 

: اتفضل خلينا نتكلم في العربيه . 

اول ما ركبو العربيه زالت الالقاب وبقى الحديث كأنو بين الاب وابنه . 

: اها يا أشرف كنت عاوز تقول شنو؟

: والله اترددت كتير قبل اقيف قدامك الوقفه دي ، بس سلطان القلب... 

: ههههههه فهمنا يبقى اكيد عاوز تتزوج .

: ايوا يا عمو انا بصراحه.... بشرفني اطلب يد بنتكم سمر!!! 

سكت القاضي لدقائق وراحت الابتسامه الكانت مرتسمه على وجهه نوعا ما 

: عاوز تتزوج بنتي ؟

: بعد موافقتك طبعا. 

غير من ملامحو شويه وقال له بهدؤ

: انت اتكلمت معاها؟ 

: لا انا.... انا حبيت اسمع رأيك انت اول.

: امممم طيب انا بسألا وبديك الجواب

: يعني انتظر منك جواب اخر اليوم دا؟ 

: لا اليوم هي بايته عند زميلتا وحايمشو من هناك الجامعه بكرا لو ربنا احيانا، يعني امهلنا لبكرا المساء

: شكرا يا عمو

: العفو ما عملنا شي

: طيب معناها انا استأذنك عشان اكمل باقي الاجراءات انا طلعت من القاعه مستعجل عشان الحقك قبل تطلع 

: اتفضل ي ابني 

نزل الضابط اشرف وهو في غاية الانبساط وكلو ثقه انو القاضي ح يوافق لانو بعتبرو ولد اكتر من زميل مهنه وبهتم به بشكل خاص 

بعد شويه انتبه لتلفونو والمكالمه الطلع منها قبل تخلص ، شال تلفونو من العسكري وطلب من الشوفير يتحرك على البيت 

: مشيت وين ي ابوي انا من قبيل بتكلم معاك 

: وقفني اشرف وكنت فاكرك قفلت ، اها خلصنا ما فاضي لك انا

: لكن لأشرف بتفضى وترمي اي حاجه بالجنبه كأنو ولدك هو ما انا .

: بطل نقتك دي انا ما فاضي لك اسي . 

: دقيقه كان عاوز شنو اشرف

: طلب يد اختك مني. 

: ههههههه احسن حاجه والله نتخلص من الاتنين دفعه واحده

: تتخلص من منو انت عجل؟ ( لفظ ما بقدر يستغنى عنو في الاستهتار بالناس ) سمر بنتي انا اديها لأشرف؟

: ما شغال تشكر فيه وماعطنا به في البيت؟ وقلت هو مثال للشباب وعاوزني ابقى زيو! 

: انا ما عندي اعتراض على اخلاقو وشخصيتو وكنت ح أرحب بالفكره بس ما من قبيلتنا ، وقبيلتو دي انا ما بناسبا عارفني كويس، الناس ماشه تنضف (قبلي ومتعصب لاقصى الحدود ) ، خليك منو اصلا سمر ح ترفضو في كل الحالات ولا محتاج اخد قرارات نيابه عنها

: طيب ي ابوي انا كنت عاوز اقو........ 

: يا ولدي الله يهديك خليني بعد اجي البيت ونتفاهم

: بس انا بايت برا عشان كدا اتصلت بك

: تبيت وين كمان؟ ما عاوز اي مسخره معاك اجي القاك قاعد

: ي ابوي هي سمر البنت بايته برا بقت علي انا؟ 

: سمر عارفنها مع منو وبتعمل في شنو ، لكن انت!! عاوزني اسمح لك تباري الشلل الفاشله تضيع مستقبلك وتفضحني؟ لا دي انساها 

: ما ممكن اسلوب القمع دا معاكم انا بس نفسي اعرف البنت انا ولا هي مدنها مطلق الحريه وانا كابتني ، والله انا ما لاقتني اسره مستبدة زيكم

: احترم نفسك يا ولد احسن لك وما تخليني استخدم معاك اسلوب ما يعجبك

طق قفل فيه واسترخى في مقعد العربيه . 

: سمر سمر يا بنت اقيفي ياخ خلينا نتكلم على الاقل

: نتكلم في شنو؟ انا اكيد م حأخسر صاحبتي عشانك 

: بس انا وجنى مافي شي بيننا والله العظيم. 

: يا سلام! كأني ما شفتك مقضي الليل في بيتا ، عليك الله اطلع من راسي ما فاضيه لك اسي .

بعد اتحركت من جنبو مسك يدي ، نفضتا بعنف شديد وصريت له😡 

: احترم نفسك فاهم ولالا؟ انا ما جنى! والبمد يدو علي انا بكسرا.

: انا اسف يا سمر ما قصدت، عارف انك انضف واحده فيهم ، اسمعيني .

: ما عاوزه اسمعك ياخ.

: ما تبيتي معاهم الليله! البنات ديل كعبات... كعبات اكتر مما بتتخيلي ، انا خايف عليك منهم وما عاوزك تضيعي او تنجرفي معاهم في طريق الحرام والش..

: انتبه لكلامك يا دكتور لمن تتكلم معاي ، انا الشرف!

: والله الظاهر من كترة م ابوك محفظك الجملة دي بقت عادي عندك وحاتفقد معناها ، الانسان الشريف ببعد عن الشبهات والشله بتاعة جنى دي بتستاهل إباده جماعيه ابعدي عنهم دا لمصلحتك اولا . 

مشيت بسرعه بعد احساس الاستفزاز دا ، انا فعلا عندي تحفظات على البنات ديل وما شايفه فيهم غير الضياع ، بس الرابط الوحيد بيننا جنى صاحبتي ! 

جنى دي شهادة عربيه واهلها في ابو ظبي ، جات للجامعه ورافضه انو تشارك اي زول في السكن اهلها مؤجرين لها شقه في مجمع سكني وانا ببيت عندها كتير بحكم اني اقرب واحده لها وبتحبني شديد ، حب مجنون كدا وتتصل بي لمن اكون في البيت، تمعطني بمكالمه للصباح وتزعل لو ما رديت لها او نمت في اثناء المكالمه يعني علاقتنا اكبر من اخويه عديل ولو اني مرات بزهج من دلعا الكتير وبكاها وعلاقتا اللصيقه دي ، يلا نحن في سنة التخرج وفي البحث معانا مجموعه من ضمنهم الشله دي عشان كدا مرات بجو يبيتو معانا وانا ما بحب وجودهم لمن يكونو جاييين انا بعتزر لها بأي حاجه وما ببيت وكلام دكتور إمام دا ذاد الشكوك جواي وهم اليوم جايين كلهم يسهرو وانا عارفه سهراتهم دي ما بتخلو من الفسق!

البنات ديل عادي بشربن شيشه! يضربن سجائر وبن*قو ولو جابو اولاد زاتو انا ما بستغرب ، عشان كدا اعتزرت عن الجيه بعد فهمت اهلي اني بايته، وهم استغربو شديد لمن شافوني جيت خاصة ابوي 

: الليله ما ماشه لجنى يعني؟ 

: لا بايتين معاها بنات الشله.

: احسن زاتو يا بنتي انا الشلل الفارغه دي ما بحب مباراتا عارفك واعيه وعاقله شديد ، جنى ما عندي اعتراض عليها لانها بنت ناس اما الباقي ديل احسن حاجه عملتيها انك بعدتي عنهم

جيت قعدت في راس الكرسي الهو فيه 

وقلت له : تربيتك يا حضرة القاضي

ابتسم وحضن يدي 

سامر اخوي كان قاعد بعيد مننا وصاري وشي بعاين لي بقعر عينو، لمن قبضتو غمزت له قام مشى 

قلت لهم دا : مالو؟ 

ابوي قال لي : دا ولد مدلع ساي خليك منو وتعالي اعملي مساج لاكتافي ديل بيديك الحنونات 

: هههه لالا يدين امي احن انا نعست تصبحو على خير 

مشيت لحقت سامر في السلم وشاغلتو

: الجميل مالو؟

: ما تتعابطي لي انا م ابوي!

: بالجد زعلان ليه؟ انا عملت لك حاجه.....

قاطعني : ما انتي سبب البلاوي كلها ، لانك العاقله والراشده في البيت دا.

: زعلان لاني اختك صح؟ اكيد قاعد تتمنى لو انك اتولدت وحيد وانا ما جيت معاك😥 

جاء وقف جمبي وخت يدو على كتفي

: لا طبعا انتي ما بس اختي الصغيره انتي تومتي 

: صغيره؟لالا يا شاطر انا اكبر منك ب ٣ دقايق ما تنسى

: اها الثلاثه دقايق ديك عملوك كبيره علي حتى في التعامل

: ما تزعل من ابوي بتكلم معاك برا قلبو

: صحي ما وروك بالعريس؟

: عريس شنو؟

: اشرف اتقدم لك الليله وطلبك من ابوي

: اشرف ما فيه كلمه والله، بس انا ما عاوزه اتزوج اسي غير كدا ما بحس بأي مشاعر تجاهو غير انو في مقام اخوي الكبير ما يكون ابوي وافق بس؟

: اطمني ابوك رافض ، قال ما من قبيلتنا.

: ياخ قبيلة شنو؟ حالتو قاضي

: ههههه في مفاهيم ما بتتغير ابدا 

: طيب تصبح على خير

: وانتي من اهلو

اتوجهنا اي واحد على غرفتو ، لقيت في تلفوني ١٠٠ مكالمه ورساله من جنى اتنهدت ورجعت لها 

: الو.

: سمر حرام عليك ما جايه كيف؟ مش دي سهرة نهاية الاسبوع المخططين لها من شهر؟ 

: داك كان على اساس نحن الاتنين برانا ، ونكتب البحث بس مع البنات ديل اسفه ما بقدر اجي

: هم عملو او قالو لك حاجه ضايقتك؟ 

: لا بس ما عاوزه يا جنى ما بنهضمو لي. 

: انا زاتي مسخو لي والله بعد عرفتك . 

: لا ما تفهمي غلط ولا تخسري صحباتك عشان انا ما بحبهم

: بس هم ما بهموني زيك يا سمر

: عايني يا جنى البنات ديل ما قاعده ارتاح لهم وتصرفاتهم مريبه لو سمحتي ما تجمعيني بهم في جملة كلام واحده حتى 

: خلاص يا سمر مدام ما عاوزاهم انا زاتي بتخلى عنهم ، اي حاجه بتضايقك بتضايقني انا برضو يا سمر

: اسمعيني........ 

: اسمعي انتي ، البنات اسي بمشيهم انتي تعالي

: جنى بالجد مافي داعي

: لا في هديل ح امشيهم على مسمعك 

بدت تتكلم معاهم بجراءة وطردتهم عديل ، انا طوالي قفلت الخط ، بالجد ما عندي رغبة امشي ولا حتى اكسب عداوة مع اي زول عايشه حياتي مسالمه شديد وما بحب اكون مختلفه او صفة ابوي ومكانتو تلغي شخصيتي . 

المهم تاني عاودت الاتصال وما ريحتني الا لمن رديت كنت حازمه معاها شويه بس قعدت تترجى فيني و تبكي لي والله حيرتني عديل 

: والله يا سمر ما تجي الليله تاني ما تشوفي وشي نهائي .

: ليه بتقولي كدا

: والله العظيم جادة معاك انا هدي منتظراك ومجهزة الفشار والجو كلو تمام 

قعدت تزن على راسي لمن اقنعتني بدموعا طوالي لبست وطلعت ما لقيت ابوي برا وشكلو نام قلت مافي داعي اصحيه .

بعد اوصل اتصل بهم بس ، كنت عاوزه اخد عربية ابوي بس تاني خليتا ما حبيت يصحو بي طلبت ترحال ومشيت

العماره كانت هاديه مافيها صوت وماشايفه البواب اصلا جنى شقتا تحت اتوجهت عليها مباشرة وهي كانها ورا الباب من اول جرس 🔔 جات فتحت وحضنتني بشوق 

: مشتاقين يا حب .

: كأنو ما كنا مع بعض الصباح .

: اعمل شنو بشتاق لك في الدقيقه ١٠ مرات 

: ظريفه . 

سحبتني من يدي لجوا وقالت لي غمضي عيونك 

: في شنو يا بنت؟

: هسسس امشي قدامي وانت ساكته

دخلنا الغرفه بتاعتا فتحت لي عيوني

لمن انخلعت من المنظر الشفتو 

ورود حمر وبوالين وشموع وكأسين عصير يعني جو بتاع عشاق ، انا شكيت تكون عاوزه تجيب ولد ولمن لقتني مصدومه بطريقه غير مفرحه قعدت تضحك فيني 

قلت لها : دا شنو يا جنى؟

: مفاجأة !❤❤😊😊

: بس ليه ما فاهمه كنتي منتظره زول يعني؟

: طبعا منتظراك انتي 

طوالي طلعت برا منزعجه جات لاحقاني

:مالك يا سمر زعلتي كدا؟ انا عملت شنو اسي؟ 

قلت لها : انتي م حاتبطلي تصرفاتك الغلط صاح؟ وكل مره بتغوصي للقاع ولا عاوزه تمسكي في اليد البتتمد لك! عشان تنتشلك من القزاره، انا لاقيت دكتور إمام الليله

هي انخلعت شديد وقلعت عيونا 

قلت لها : انا ما حزرتك من البنات ديل؟ براك شايفه سكة الضياع الماشين فيها والشايفاه اسي دا بثبت لي ، كنتو جايبين اولاد صح؟ ولا يكون امام نفسو جاييك اليوم وانتي مجهزه له 

قعدت تضحك لمن دمعت 

امام شنو؟ صدقيني يا سمر يا حبيبتي بيني وبين إمام مافي اي شي هو ولا حبيببي ولا شي بحلف لك 

: طيب ليه بجيك طوالي ويوما شفتو بايت عندك وطالع الصباح تتزكري؟

: م أكذب عليك هو فعلا قاعد يجيني ، بس مافي علاقه بيننا

: كيف 

: طيب يا سمر انتي عارفه هو دكتور شنو؟

: اوف

: دكتور نفسي!

: لا

: والله العظيم انا قاعده استعين به او ب الاحرى اخوي اصر علي انو اقابلو

: انتي فيك شنو يا جنى؟ 

: ولا شي ، انتي عارفه بعد وفاة ماما وبابا في الحادث انا اكتئبت وما بقى لي زول غير اخوي، وهو زاتو ما فاضي لي تعبت شديد وكنت كل مره بنتكس للسبب دا انا وافقت على موضوع الطبيب النفسي هو ولا حبيببي ولا حاجه . 

انا افكاري اتلخبطت لحظتا ، يعني إمام كان جادي في كلامو معاي؟؟ بحبني بالجد!

قاطعتني بدموعا وصوت بكاها ، طوالي حضنتا

كان قلبا بدق بسرعه صوت نبضاتا شق صدري ، اتضايقت تلقائيا بعدتا عني

قلت لها انتي كويسه؟ 

:ايوا

: طيب خلينا نكتب شويه .

: نتعشا بالاول

: انا متعشيه اصلا كنت عاوزه انوم

: بس انا جعانه وبالمناسبه ممكن تاكلي فواكه بس معاي

: تمام

: طيب ان ح احضر الفيلم وانتي قطعي الفواكه

: فيلم يا جنى؟

: عليك الله احضريه معاي منتظراه قبل كم يوم وبعداك نكتب

: خلاص تمام 

مشيت المطبخ خليتا وهي دخلت الحمام

طلعت الفواكه وشلت السكين اقطع وانا واقفه على طولي مديه ضهري للباب 

فجأه بقيت حاسه بحركه وراي حاجه ما مطمئنه جسمي لمن كش، اتلفت بسرعه شديده، لقيتا هي، كانت قريبه شديد مني، وسمعت شهقتا وعيونا ديل مقلعاها لفوق، ما عارفه مالا

نزلت عيوني لتحت براحه،...... وكانت أكبر صدمه في عمري 

ما عارفه كيف بس، لقيت انو السكين الكانت في يدي غاصت بعمق لجوا بطنا والدم كابي ذي الشلال 

متين كيف ما فاهمه شي. 

انا دخلت في حالة صدمه، واتجمدت مكاني لساني تقل ما قادره اطلع ولا حرف واحد او اعلق بشي ، في لحظة حسيت انو دا ما حقيقي ، شغاله اغمض وافتح 

هي قالت لي بصوت تقيل اتحفر في جوا قلبي

:طعنتيني!

انا قعدت ارجف واصرخ 

:انا ما قاصده، انا ما كنت عارفاك وراي

عاوزه اسحب السكين من بطنا 

مسكت يدي وقالت لي : لا ما تسحبيها ، وفجاءة وقعت في قدامي ، وانا مصدومه وخايفه ما عارفه اعمل شنو 

نزلت على ركبي وانا بصحي فيها واقول انا ما عملت شي ، في اللحظة ديك مخي اتوقف عن التفكير ما قدرت حتى احاول اوقف النزيف او اطلب المساعدة خوفي كان هو المسيطر 

وقفت فتره طويله اعاين لها وهي واقعه قدامي ودمها جارى ، ذي الشلال، اتحسست قلبا!

النبضات الكانت متسارعه قبل شويه اختفت ، جسمي قعد ارجف وبقيت ازحف لورا جاره رجولي وخاته يدي الاتتين في خشمي 

_ الروايه بتطرق لموضوع حساس شديد يا جماعه، وفي ناس أمكن ما تتقبل الكلام فيه، بس لازم الناس تعرف الحاصل، لأنو شي كعب شديد ومنكر عند أي زول فطرتو سليمه 

 ‏*═℘═🥀═℘═🥀═℘═🥀═℘═🥀═℘═🥀═℘═🥀*

*★★يتبــــــــــــــــــــــــــــــــــــــــــــع★★*.

                    الفصل الثاني من هنا 

          لقراءة جميع فصول الرواية من هنا

تعديل المقال