رواية إبنة القاضي الفصل الثامن 8 بقلم مشاعر مبعثره


رواية إبنة القاضي الفصل الثامن 8 بقلم مشاعر مبعثره


: إمام، ممكن اشوفك؟ 
: والله يا سمر انا عندي النيه اسافر، خلاص سمعتي بقت في الأرض بعد اتسجنت، وانا زاتي محتاج اكون من محيطي الحالي 
: عليك الله ما تمشي 
سكت مسافه وقال لي : ليه؟ 
: خلينا نتلاقى، وانا بحكي لك
: ما مشكله، بس مره واحده 
: إمام انت البتقول كدا؟ زمان كنت بتحاول تقنعني ألاقيك 
: انتي ما عاوزاني، ولا اتقبلتي مشاعري، اغصبك يعني؟ 
: كنت مغيبه بس........... الموضوع دا اجلو لمن نتلاقى 
: بكرا؟ 
: ايوا ممكن، تجي الجامعه؟ 
: لالا، اي مكان تاني 

_________
سامر بعد طلع من البيت وقف في الظلط عشان يركب وبقى يأشر، واستغرب لمن وقف له اتس، بعد فتح الباب وركب، لقى السايقه مرا، لمن انخلع 
بعد أقل من دقيقتين قال لها : لو سمحتي نزليني 
طبعاً افتكرا مقدماه ساي 
وقفت واول ما نزل قالت له : ألف ونص
لمن انخلع وقلع عيونو، خجل خجله شديده 
قالت له : خلاص ما مشكله الف، انا افتكرتك ماشي مسافه ابعد ولا اجار 
: دي مش عربيتك؟ 
: والله غايتو بس بترزق بها، محتاجه شديد 
: لالا مدام كدا احسن اوصل عديل 
ورجع ركب، عاينت له بالمرايه، قالت له : انت فاكر شنو كنت؟ ملحه يعني؟
: لالا انا........ 
: عادي ولا يهمك 
بقت سايقه وطبعا بتمشي براحه 
قال لها : ما تدوسي بنزين يا بتنا، الركشات اتجاوزتك ياخ معقوله؟ 
: في التأني السلامه
: لالا ما قدر دا لكن، بالطريقه دي مافي زول بركب معاك، شوفي لك زول يسوقا لك ساي دي ما سواقه دي
: انا اسفه، بزيد السرعه شويه 
ذادتا والحال في حالو خايفه من الشارع عديل 
قال لها : اسوقا لك؟ 
: لالا ما تتعب نفسك
: والله انتي بتضيعي زمنك ساي، شوفي لك سواق اتفقي معاه ويديك حقك
: والله ما لقيت لي ولد حلال جربت كم واحد وطلعت خسرانه بس، ما حصل واحد جاب لي الإيراد المتفقين عليه، وصلحت داك وجبت داك، تصدق لقيت نفسي خسرانه؟ 
: غريبه 
: انت ما عارف لك واحد كويس كدا، يكون محتاج شغل، لأنو ما ح يفكر يغشني 
هو طوالي فكر في الموضوع، قال لها : سجلي لي رقمك هنا بلقى لك. مد لها التلفون 
قالت لي : أسى سايقه، اصبر
قال لها : مليني له
ملتو له كتبو، قال لها : باسم منو؟
: أيه، اسمي ايه 
رن لها وتلفونا جنبا 
قال لها : دا رقمي سجلي، سامر الفاتح عبدالله 
سكتت
قال لها : سمعتيني؟ 
: ايوا
: ما تخافي انا اكيد ما ح اتصل اعاكسك يا ايه
: تمام 
: بتصل بك بكرا لو ربنا احيانا تمام؟ 
: تمام 
__________________
_الإمارات
_ أبو ظبي

: ما صدقتي، انا اتسجنت وخلي لك الجو
: انت بتقول في شنو؟ 
بقى يتلفت حوليه لمن رفع فنيله من الأرض وقال لها : دي حقتك انتي؟
: مروان ما من حقك تتهمني بالطريقه دي، ومافي زول زعل عليك قدري أصلا ، انا قعدت الفتره دي كلها براي، وميرنا سؤال ما بتسأل علي، عشت وحده ما عاديه والله يا مروان، انا استحق كدا؟ 
: كل البعرفو انو انا تاني ما بقعد معاك في البيت دا، فتشي أولادك ولميهم حوليك

خت يدو في جيبو وبقى يتلفت 
: انا تلفوني وين؟ 
مشى على الأرضي يتصل، بس بسرعه خلاه،
قام اتصل في تلفون المحامي 
: تلفوني عندك؟ 
: ما عندي انت استلمت أماناتك براك
: ما بتزكر اني شلت حاجه منهم، القروش ما مشكله، لكن التلفون انا محتاجو ضروري شديد
عاين لسميه وقال : مضطر استخدم تلفونك شويه 
: ما... ما دفعت الفاتوره بتاعتي 
: من متين دا؟ انا عاوز ادخل صفحتي بس 
: صفحة شنو اسي، انت ياداب طالع من السجن، امشي استحمى وارتاح شويه مسافة أحضر لك حاجه تاكلا 
: ما عاوز حاجه منك، والتلفون حاجه ساهله 
____________
_السودان
اليوم التالي

تاني يوم كنت مترقبه اتصال إمام وما حاولت اني ابادر بالإتصال عشان ما أظهر خفيفه قدامو ، خليتو لحدي ما اتصل العصر، وكان المفروض نتلاقى في كافيه، لبست وطلعت مستعجله، لمن وصلت اتصلت به
: وين انت؟ 
: منتظرك جوا ادخلي، ايواااا، خلاص شفتك 
جاء طالع لي، وانا دخلت التلفون لمن شفتو
يلا اوصف لكم دكتور إمام، هو ما طويل شديد، طولو مناسب مع صحتو يعني، عيونو عسليه وأهم حاجه في شكلو انو مربي دقن وحالق صلعه، استايلو من بعيد بشبه الفنان المغربي ( الدوزي) اي زول يشوفو بقول أنصار سنه وملتزم وبعيد عن الهزل، في حين انو بصافح عادي، بس استايلو كدا 
سلمت عليه من بعيد ومشينا قعدنا، طلب لي لاتيه ☕ 
وبقينا نتكلم كلام عادي بسأل عن احوالي وكدا، ولاحظت انو شايل من أشرف شديد، والظاهر انو عذ*بو شديد في النيابه 
: عاوز يلبسني الجريمه، بس انا من دون الناس تقول عندو معاي تار
: بكون عرف انك بتحب....... 
انتبهت لنفسي قبل اكمل الكلمه وسكت، لأنو ما حصل صرح لي بمشاعرو صراحة 
ابتسم بالجنبه وقال لي : عرفني بحبك؟ جايز والله وبعمل كدا عشان يبعدني من طريقو 
: بس انت ما حصل قلت كدا
: واضحه، أصلا مشاعري مفضوحه شديد واي زول عارفا 
: ياريتك لو من زمان قلت، وكشفت لي حقيقة جنى وشلتا 
: انا حزرتك 
: بس ما قلت يا إمام 
: يا سلااااام، انتي ما عارفه لمن تنطقي اسمي كدا بتعملي فيني شنو
حسيت بنغزه في قلبي، بسبب اني ضيعة لحظات ومشاعر بتحتاجا كل بنت بسبب جنى، قلت له بصوت مبحوح 
: ليه كل حاجه جات متأخره كدا؟ 
:  متأخره؟ عشان انا دخلت السجن يعني؟ ولا خايفه أشرف يحاول يبعدني أكتر؟ 
: هو خلاص ما محتاج يبعدك 
: كيف الكلام دا؟ 
: في حاجات حصلت، انت ما عارفا
: حاجات شنو؟ 
: أشرف جاي يعقد لي يوم الجمعه
قام على حيلو بسرعه وهرج : يعقد لك؟ 
قعدت اتلفت وقلت له بصوت واطي : اقعد يا إمام وما تنفعل كدا قدام الناس
صادف انو الويتر جاء، شال منو الطلب ختاه قدامي، وبقى يحاول يتكلم بهدؤ
: سمر الله يخليك قولي انك بتهظري، ما ممكن
: فرض نفسو علي يا إمام، وابوي وافق، ما اشتغل برأيي
: لا، ابوك مافي زول بقدر يفرض عليه حاجه، انا متأكد انو لو رفضتي هو ح يرفضو. 
: بس دا الحاصل 
: ما منطقي كلامك دا، انا ما زول غريب عشان تقنعيه بكدا، أشرف دا بهددك بحاجه؟ اتكلمي وانا بساعدك لو بقدر
: لا..... لا طبعا، يهددني بشنو يعني؟ 
: ما بعرف، لكن سمر البعرفا ما بتزوج بالطريقه دي، طيب حبيتيه مثلا؟ 
: هو دا انسان بتحب؟ دمو ذي السم
: وح تعملي شنو اسي؟ خلاص قبلتي بالأمر الواقع؟
: مافي يدي حاجه اعملا غير، افضفض بس
بلع ريقو وقال لي بصوت مكسور : وانا؟ 
ما قدرت ارد له، نادى الويتر، عشان يحاسب، وانا طوالي وقفت على حيلي
عاوزه اتكلم، قال لي : الحزن الفي عيونك دا بقول اي شي، مافي داعي تتكلمي، عموما يا سمر أنا لو عندي نصيب فيك، أشرف ما بقدر يصل لك، ربنا عادل، انا فوضت أمري ل الله
اتنهد وقال بحرقه : حسبي الله ونعم الوكيل، انا زول لا حصل سرقت ولا ظلمت ولا زنيت ولا أذيت لي بني آدم، بالعكس كنت بدي بس، حتى جنى المابتستحق، اخ..... استغفرالله العظيم، انا لو عندي نصيب في الدنيا دي، ربنا بنصفني فيها قبل اموت، ودعتك الله يا سمر، ربنا يجمعنا على خير

قال كدا ومشى خلاني متألمه لمن قربت ابكي، بس اتزكرت كلامو الأخير دا، ربنا عادل، اطمنت شويه بس رجعت تاني خفت وقلبي اتهز، انا ما بريئه زي إمام، انا.......... انا ق*تلت، يعني ما بختلف عن أشرف، ياربي ما تخلي عقابي يكون أشرف والحياة معاه
رجعت البيت، وقلبي وجعني لمن لقيت ابوي جايب حاجات ضيافه للعقد، كأنو مناسبه حلوه، دخلت غرفتي وبقيت بس استغفر وادعي واقرأ قران، لحدي ما وقفت في سورة النساء الايه 92

قال تعالى:
﴿ وَمَا كَانَ لِمُؤْمِنٍ أَن يَقْتُلَ مُؤْمِنًا إِلَّا خَطَأً ۚ وَمَن قَتَلَ مُؤْمِنًا خَطَأً فَتَحْرِيرُ رَقَبَةٍ مُّؤْمِنَةٍ وَدِيَةٌ مُّسَلَّمَةٌ إِلَىٰ أَهْلِهِ إِلَّا أَن يَصَّدَّقُوا ۚ فَإِن كَانَ مِن قَوْمٍ عَدُوٍّ لَّكُمْ وَهُوَ مُؤْمِنٌ فَتَحْرِيرُ رَقَبَةٍ مُّؤْمِنَةٍ ۖ وَإِن كَانَ مِن قَوْمٍ بَيْنَكُمْ وَبَيْنَهُم مِّيثَاقٌ فَدِيَةٌ مُّسَلَّمَةٌ إِلَىٰ أَهْلِهِ وَتَحْرِيرُ رَقَبَةٍ مُّؤْمِنَةٍ ۖ فَمَن لَّمْ يَجِدْ فَصِيَامُ شَهْرَيْنِ مُتَتَابِعَيْنِ تَوْبَةً مِّنَ اللَّهِ ۗ وَكَانَ اللَّهُ عَلِيمًا حَكِيمًا ﴾

الايه دي استوقفتني، انا قتلت جنى بالخطأ، و.. واجب علي ديه حق اهلا وصيام شهرين متتابعين حق الله.
دخلت في حالة أوفر ثينكينح عميقه شديد، لمن خشيت في حيره وبقيت أشك في نفسي، انا قت*لتا كيف؟ خطأ بالجد؟ ولا في شي حصل انا ناسياه؟
يالله، دا شنو الحاصل معاي دا، انا حاسه نفسي ذي البقيت مريضه نفسيه، كأني ما عارفه الحصل دا حصل كيف، وصلت مرحلة إني بألف سيناريوهات من راسي، نمت في الحاله دي وجاني حلم مزعج وامكن كابوس 
عديل لمن صحيت بصرخ، ومنها ما فارقني تاني، مرات لو نمت بالنهار بحلم به، وبفكر فيه كتير. 
لمن أقرر أصوم عشان همي ينزاح، بتجيني أفكار ما بعرف من وين؟ مرات اقول لنفسي انتي متأكده انك قتلتيها خطأ عشان تصومي؟ ومرات اقول انا دفعت الديه عشان أبدأ صوم؟ راسي جاط، وبقيت عايشه في الم نفسي حاد لحدي ما جاء يوم العقد
 ابوي طبعاً ما عمل اي حاجه ولا عزم اي زول، حتى أعمامي والجيران، يعني غيرو هو وأمي مافي زول، لمن أشرف زعل وقال له : انا جايب أهلي كلهم، وانت تقول حتى أعماما ما جايين؟ دا تقليل من مقامي
: والله دا العندي، عاوز تجي تعقد تمام، ما عاوز، بنقفل بابنا ونرقد ننوم
هو طبعاً خلاص فهم انو حتى تحضيرات مافي، وما بنتأثر بشئ، وبهناك خايف من شماتة امو واخوانو ، خاصة بعد اتحداها انو ح يعرسني، ولمن جاء يوريهم بالعقد طلع عليهم بالعالي، بس برضو سكت وما قال شي، وما وراهم أصلا انو مافي غير ثلاثه أشخاص في بيتنا، جهز نفسو تمااام، ولبس بدله وحلاقه جديده وعطر فاخر وساعه غاليه وغيرو.
في المقابل انا بس غسلت وشي ولبست عبايه عاديه، وامي توب عادي، وابوي قاعد بملابسو حقات البيت، وماسك الريمود في يدو بحضر
كنت متخبطه شديد، من إمام ظهر واختفى بسرعه كدا، كلامو معاي غير موازين حياتي كلها وبقيت منعزله وخاشه في حاله من التفكير العميق، والشكوك.
فجأة تلفون ابوي دق، وهو اتأفاف وفتح بدون نفس، عرفتو بكون الزفت جاي، بس ابوي فجأه ملامحو اتغيرت وقام على حيلو، كلامو ما كان مرتب وانا ما قدرت اجمع منو حاجه، عشان اخت تصور
لحدي ما خت التلفون، وحسيتو محتار عديل
امي قالت له : في شنو يا راجل؟ 
قال لها : اشرف
: مالو المغضوب؟ اوعا يكون نشر لينا الخبر وعمل لينا فضيحه ونحن ما مكلمين زول؟ 
: أشرف في المستشفى يا كوثر 
انا وامي شهقنا الاتنين مع بعض، ومع اننا ما بنحبو، بس انصدمنا، شال تلفونو وبقى يتصل، عمل كم مكالمه 
امي قالت له : ماشي المستشفى تشوفه؟
قعد في الكرسي وقال لها : لالا، انا عرفت الحصل كلو خلاص من المعارف 
قلت له : الحصل شنو يا أبوي؟
: قالو جاتو سكة دماغيه! جلطه يعني، وحاليا لا قادر يتحرك ولا حتى يتكلم

يتبع....



تعليقات
×

للمزيد من الروايات زوروا قناتنا على تليجرام من هنا

زيارة القناة