رواية كيان محطم الفصل السابع 7 بقلم رحاب محمد رحمه
تاني يوم ابوي فتح الباب انا كنت قاعدة في الأرض قمتا على حيلي
قال لي تاني مافي ليك مدرسة ولا قراية ولا طلعة من البيت دا فاهمه...
كنت ح افتح خشمي قال لي ولا كلمة شايفة المدرسة و مرقتك من البيت دا جابت الا الوسخ الانتي فيهو حتى مستواك نزل من زمان ولا ح تشوفي صحباتك تاني من أمس مقفولة هنا صلاة ساي ما صليتيها تمسح ذنوبك دي استغفري ربك انا لو على اتبرا منك و ادفنك في أرضك دي زول يجيب خبرك ماف بس ربنا يحاسبني انا النزلتك المدرسة عشان تقرى و تنجحي و ترفع راسي هسي نزلتي راسي تحت التراب انا اودي وشي وين لو صورك دي شافوها الناس
و طلع
انا وقعت في الأرض لا عرفتا ابكي ولا اصرخ من كلام ابوي نزل على قلبي زي السم و اسمم منو انا قلبي ما اتحطم من خالد انا قلبي اتحطم من كلام ابوي
جا راجع قال لي قومي اتوضي وصلى و استغفري
انا ابوي اسمعني ان
مشي من دون ما يلتفت لي
ابوي انا كيف اخليك تسمعني
طلعتا عشان اتوضا لقيت البيت فاضي اظن طلعو لمدرستهم و جامعتهم
مشيت المتطبخ لقيت امي قاعدة
أنا : امي اسمعي
امي : ابوك قال ليك اتوضي و قال لي اجهز ليك الاكل دا شيليهو معاك
انا : امي اسمعيني والله الصور
امي : خليني انا واثقة فيك و في تربيتنا بس شوفي ابوك حاولي اقنعيهو انا و عناب حاولنا معاهو بس كرامتو أهم شي وهسي ما ح يتراجع الا بالحقيقة
انا : بس ابا يسمع مني عشان اقول ليهو الحقيقة
.. ح يسمع بس اول احكي لينا عشان نقيف معاك
اتلفتنا للصوت لقيتو عمار
عمار : احكي
انا بديت احكي ليهم ا انا و صحباتي يوم جينا راجعين من المدرسة شفنا محل الكافي دا ف فكرنا يوم نلم قروش و نمشي ناكل فيهو اسكريم
....... و و ضربتو كف و جريت طلعت من الكافي انا عارفة اني غلطانة ي امي بس والله ما اديتو فرصة بس هو كان مركب الكاميرا و لمن كان ق قريب مني ثبت الصور دي و بقى يستغلني بيها
حاولت احكي لي عناب بس خفتا و خفتا احكي ليك ي امي تزعلي مني و هسي الخايفة منو حصل و ابوي زعلان مني و بقيت ابكي
عمار : انتي غلطانة وهسي ما ح احاسبك بس المهم نوضح لي ابوي الموضوع دا
ما تطلعي من البيت انا ح امشي لي الولد الاتصورتي معاهو و اخليهو يوضح الصورة
بعد مشي عمار امي حضنتني و اكلتني وقالت لي امشي اتوضي صلى وتاني ما تقطعي صلواتك تمام
مشيت صليت و قريت قرآن و بقيت منتظرة عمار يجي
عناب جات بقت تتونس معاي قالت لي مشيت غرفة على و علياء ابوي قال لي على يمشي غرفة عمار وانا و علياء سوا وانتي براك
مسكتهاا بكيت و بكت معاي وقالت لي ليه ما حكيتي لي كان عرفتا رديت ليهو و نبزتو ليك اتونسنا و جات علياء و نستنا و مشو عشان بعد دا جية ابوي
عمار جا و قال لي الولد قال ما بعرفك و لمن وريتو صوركم نكر قال ما رسلها
مسكت تلفون امي و فتحت الفيس لقيتو كاتب لي شكلو صورنا ما عجبو اهلك ما مشكلة تعالي لي و انا ح أوضح ليهم
عمار قال لي اوعا اشوفك طلعتي
ومشي
ابوي جا ختو الغداء وانا ما معاهم امي رسلت لي غدائي مع علياء بكيت و غلبني اكل شي
قلبي واجعني كيف اخلي ابوي يرضى مني تاني انا خجلانة منو ح يسامحني كيف
اتذكرت رسالة خالد قلتا ح يحلها ح يفهم ابوي الصور ح امشي ليهو بكرة
بقيت منتظرة بكرة يجي بفارق الصبر
تاني يوم كلهم مشو للمدرسة و الجامعة و ابوي مشي الشغل
بس انا و امي
امي جوها جارتنا اتونسو معاها و مشو انا ما طلعت من الغرفة
بعدين مشت نامت الساعه كانت 11صباحا قلتا خلاص امشي و اجي سريع
لبستا عباية سودا مع طرحة سودا
و طلعتا من البيت بدون حس
مشيت الكافي لقيتو بي ناسو
طلعتا الطابق التاني انخلعتا بالشفتو جيت نازلة برجف
البيت : هي ممنوع الطلوع فوق انتي منو
قلت ليها اسفة وجيت نازلة
طلعت من الكافي و بقيت واقفة برا و بستغفر ربي
ما عارفة حصل شنو بس مسكت حجرة كبيرة و وقفت قدام المراية الغزاز و رميتها فيها
انكسرت حتة حتة
و الناس دي كلها اتخلعت
و الخلعهم منظر خالد و البت الجو مبهدلين من فوق اظن افتكرو انو في هجوم في الكافي
ما عارفة من وين الناس اتلمت و الشرطة جا و متين وصلت القسم
و الظابط بسأل فيني
وانا ما فاهمه ولا ما قادرة استوعب في شنو
انا في زات نفسي مصدومة و ما فاهمه شي
كنتا قاعدة طرف
فجأة اشوف ابوي و عمار جايين جاريين
و طااخ الكف التاني من ابوي في وشي
الا مسكوهو عمار و الظابط
ابوي : اها وصلت بيك تمسحي كرامتي و تسودي وشي قدام الناس و تخليني اجي وراك في السجن
فجأة ابوي تعب و قعد و ختا يدينو في راسو و سكت
انا : ابو
رفع لي اصبعو نظام اسكتي
دموعي بقت تنزل و ما عرفتا اقول شنو
الظابط : طيب ي جماعة بعد هديتو ندخل في الموضوع
الظابط رجع محلو و ابوي كان قاعد و عمار قعد جنبو و انا رجعت محلي الاول
بتك ي استاذ رمت حجر في كافي دريم للايسكريم و كسرت الغزاز ودي ما اول مرة توصلنا شكوة
ابوي رفع راسو و بقى مركز مع الظابط
وقال يعني قبل كدا قبضتو بتي
الظابط : لالا ي استاذ قصدي ما اول مرة توصلنا شكوة كذا نفر جو اشتكو انو المحل كان كعب و بستهدفو البنات و كم مرة جونا بنات مع أهاليهم عشان يرفعو دعوة لي صاحب المحل بس ما كان في دليل وبطلع منها زي الشعرة من العجين
وبعد بتك كسرت الغزاز كل الناس شافت البحصل في الطابق العلوي
وهسي نحن قبضنا على خالد صاحب المحل وما اظن ح يطلع بالساهل انت مفروض تكون فخور بي بتك لانو فضحت أعمالو و انا جبتها هنا عشان هي اول شاهدة و غير كدا كسرت الغزاز بس اهم شي انو كشفت البحصل
و اغلب البنات بكونو مجبورات انو استغلهم بي صورة أو فيديو
بعد كلام الظابط طلعنا و ابوي و عمار ما قالو لي شي
وصلنا البيت
حاولت اتكلم مع ابوي
انا : ابوي اسمعني انا عملت كل دا عشان تصدقني و تسامحني انا ما غلطت أو جرحت كرامتك ابوي
ابوي : اسمعيني ي عايدة الجمعة الجاية عرس عنود و عشان ما يتكلمو فينا الناس ح نعمل عرس عناب برضو جهزي البنات
انا و عمار و عناب كلنا قلنا ابووي
ابوي قال لينا ولا حرف
امي قالت ليهو ي محمد الكلام دا كيف
ابوي ردا ليها نفذي البقولو ليك ودي واشر لي ما تطلع تاني من البيت دا الا في يوم عرسا
انا من صدمتي قعدتا في الارض
يعني بعد دا ابوي ما اقتنع ولسة غلطانة في نظرو و عمرو ما ح يصدقني
ليه ي رب يحصل دا كلو
ياريتني ما اتعرفت على خالد ولا دخلت الكافي دا نهائي
بقيت شايفة طشاش طشاش و ما سامعة شي
امي جات وقفتني
و عناب بتتكلم مع ابوي و عمار جايط معاهو
بس ابوي مشي خلاهم
دخلنا غرفتنا انا و امي و عناب بتبكي ابوي كيف يعرسا و فجأة كدا و يداب داخلة الجامعة
و امي بتبكي و بتحاول تهديها
اما انا بقيت ما فاهمه شي
عمار جا داخل
يتبع...
الفصل الثامن من هنا