رواية شتات الفصل الثالث عشر 13 بقلم مها حولي
أنا كنت مصدومه فيها، وما مصدقه انو دي خالتو سميه نفسها! انا كنت بحكي ليها حاجات ما بحكيها لأمي، كانت رفيقتي وصديقتي ومستشارتي وفي مقام أمي وفي مقام خالتي!....ماسكاني من يدي وانا بحاول اتفكى منها باليد التانيه لحد ما وصلنا الباب، اول ما فتحتو شفنا وائل في وشنا وكان رافع يدو عايز يضغط الجرس، اتفاجأ من الحاصل قدامو، قال لأمو في شنو، قالت ليهو كيف يعني في شنو، ماشه أكلم ليها أهلها عشان تاني ما تتصرف ساي وتضر الناس!
طبعاً لسه كنت ببكي وشكلي بقى مبهدل شديد، وائل طوالي دخل وقفل الباب وفك أمو مني وقال ليها انا مش قلت ليك ما عايز أي مشاكل و جوطه وكلمتك تنسي الموضوع دا!
قالت ليهو الحصل ما شي بنسكت عنو، لو انت سكت انا ماااا بسكت يا وائل، خليهم كلهم يعرفو الحقيقه وانك ما عايز الاء.... قال ليها انا ماف زول جبرني عليها، براااي مشيت وعقدت عليها حتى بعد معرفتي للحقيقه وانا ما عندي أي مشكله اتزوجها وأكمل معاها 😊
في اللحظه ديك انا كنت بعاين ليهو وعيوني لسه لينه، خالتو سميه قالت ليهو كضاب والله، قال ليها يا أمي فكري فيها، شنو البخليني أعقد عليها لو كنت ما عايزها؟ انا لمن عرفت الحقيقه الخطوبه لسه ما كانت حصلت! يعني كنت قادر امنع الموضوع من بدايتو بس قلبتو عقد عديل، ليه؟ لأني عايزها!
وائل قال الكلام دا بكل ثقه، خالتو سميه سكتت مسافه بعدها قالت ليهو برضو خليهم كلهم يعرفوا، قال ليها ماف داعي يا أمي ليه انتِ مُصره ح تستفيدي شنو!.... مالك انتِ ياخ يا أمي الصابك شنو!
طوالي دخلت جوه وخلتنا واقفين الإتنين جنب الباب، حسيت نفسي ممنونه ليهو لأنو منع أمو، وائل دا كلو مره بفاجئني بيهو أكتر، كل مره بثيت لي انو راجل، بخت الاء بيهو 💔
قلت ليهو وائل انا..... طوالي فتح لي الباب وقال لي مع السلامه، طلعت من بيتهم وانا الشارع كلو أبكي، كل ما اتذكر الحصل من بداية دخولي بيت خالتو سميه بنقهر وببكي أكتر، حسيت نفسي زي الزول المغدور، تقول ليهو تعالني ولما يجيك في مكانك تطعنو، بس انا مشيت ليها براي، مشيت اقعد واتونس معاها ف استقبلتني ب كف وهجوم عنيف، انا غلطانه، انا غلطانه بس تصرف خالتو سميه كسرني و وجعني 😭💔
وصلت البيت، الباب كان فاتح أول ما دخلت لقيت أمي شايله الصوت بتجلد في محمد و مصطفى، ماسكه مصطفى ب يد و بتمحط باليد التانيه، محمد كان واقف ليها وما اتحرك و مآب ومرام واقفين بعاينو.... أمي كانت بتجلد وتقول ليهم ليه كل مره يجوا يشكو لي منكم، كل يوم متشاكلين مع زول و و و.... الخ
انا طوالي دخلت جوه، قفلت باب الغرفه علي وقعدت أبكي، بكيت كدا لمن حلقي قرب يطرشق، كرهت الحياه والدنيا دي كلها
المساء لمن ابوي جا، جا معاهو عمو مبارك راجل خالتي رقيه، وبعدو بشويه جات خالتي مع بناتها كلهم، ابوي وعمو مبارك نادونا كلنا، اتلمينا وقعدنا قصاد بعض، ابوي قال لينا الحاصل دا عيب كبير والله! الناس أهل ليه تقاطع بعض!!.... عمو مبارك قال لينا سؤالي دا ليكم كلكم.... هسي كدا انتوا مرتاحين؟؟ مرتاحين بعد كل واحد مسك كراعو من بيت التاني!.... ياخ حتى البنيات ديل بقوا ما بجوا لبعض وكلو بسبب الأمهات!..... أمي هنا قالت ليهو معليييش يا مبارك هنا انا ما معاك، انا ما حصل منعت أولادي من زول، خلي لمن امنعهم من بيت خالتهم، بناتك براهن وقفن من بناتي والبدايه من أمهن، خالتو رقيه قالت ليها والله البدايه منكم انتوا ديل!
ابوي قال اساس المشكله دي كانت شنو؟؟....بس عشان الموضوع البسيط داك!
خالتي قالت ليهو ماااا بسيط والله، طوالي عمو مبارك رد عليها وقال ليها، الولد اتقدم للبت وقالت ما جاهزه للعرس المشكله وين!
خالتي قالت ليهو هي مشكلتها ما عدم جاهزيتها للعرس، هي رفضت أحمد عشان مسكين ما عندو شي، عاد هي عايزه الرايش كباب الدرايش! والدليل وااافقت طوالي على ولد جارة سميه وما قالت ما جاهزه للعرس! 😊
أمي قالت ليها أولاً هي ما رفضت ولدك، قالت ليك ما جاهزه، قمت انتي زعلتي وقاطعتي الناس ومشيتي خطبتي ل ولدك، تاني شي الجماعه ديل ماف زول أداهم الموافقه،قالت ليهم نفس الكلام ما جاهزه وهم ما عندهم مشكله ينتظروها وقت ما تجهز!.... المشكله دي كلها بديتيها انتي يا رقيه، انا اكتر من مره جيت اعتذرت منك وخليت مها تعتذر منك وكلو حفاظاً على العلاقات لكن انتي مع ذلك لسه كنتِ مااااسكه في قلبك عشان كدا ما كلمتي زول لما مشيتي تخطبي ل ولدك، كأنك بتكاوينا! مع انو والله ما محتاجه أي مكاواة وأحمد زي ولدي لو عرس أي بت بفرح ليهو وما عندي أي مشكله، خالتي قالت ليها خُتي نفسك مكاني! أولادنا ديل اتولدوا وكبروا و اتربوا سوا، بيتنا بيتهم وبيتكم بيت أولادي، تقوم بتك بدون ما تراعي لأي شي ترفض أحمد عشان الغريب!.... عمو مبارك قال ليها المشكله وين؟ حقها ترفض أو توافق!..... والنصيحه يا رقيه انتِ الغلطانه وانا قلت ليك الكلام دا قبلها، ما كان في داعي للحصل دا كلو!
أمي قالت ليهو والله ما كان في داعي!
ابوي قال خلاص، حصل الحصل، الناس تتصافى و ترجع زي ما كانت ويا دار ما دخلك شر!!
خالتي قالت ليهو زعله و راحت وأحمد زاتو ساااافر!
أمي قالت ليهم انا ما عندي أي مشكله والموضوع دا زاتو نسيتو و ركنتو بالجنبه!
المهم ابوي والراجل خالتي عملوا لينا جلسة صلح، اصلا لمى و ولاء ما عندهم مشكله، ومرام اختي و لمى في المدرسه بتعاملوا عادي، لأن أمي منبها مرام ما تقاطع لمى لأي سبب من الأسباب وما يشتغلوا بمشاكل الناس الكبار..... طبعاً انا صاح كنت قاعده معاهم بس عايشه في عالم موازي، ما ناسيه الحصل معاي قبيل، كل ما اتذكرو عيوني بتتملي دموع!
اها هم اتصالحوا واتصافوا وبقوا يتكلموا عادي ومرام عملت ليهم الشاي وهي ومآب وبنات خالتي قعدوا على جنب براهم وبقوا يتونسوا، انا دخلت جوه، وكنت عايزه ارقد أنوم بس فجأه الاء جاتني داخله!
وقفت جنب الباب وقالت لي أدخل!
هزيت ليها راسي، جات داخله وقالت لي اشتقت للغرفه دي والله، ما رديت عليها، قالت لي لسه زعلانه مني؟
قلت ليها انا الموضوع دا نسيتو وبقيت ما شغاله بيهو 😊
قالت لي طيب انا آسفه، دا كلو ما كان مفروض يحصل، بس العملتيهو انتِ كمان ما هين، يعني انا عارفه وانتي عارفه وحتى أحمد عارف انو انتي عندك مشاعر ليهو ف كييييف لما يجي يتقدم ليك تقولي ما جاهزه والجمله دي معروفه انها رفض مُحترم!
يعني انتي لو جد في زول في حياتك وحاباهو وحابيك ليه ما جا اتقدم ليك؟ ليه أساساً حبيتي أحمد؟
معقوله تكوني حبيتهم الإتنين في نفس الوقت!... هه بتحصل كيف دي!؟
انتي من البدايه شايفه وعارفه انو أحمد اخوي ياداب بحاول يبني نفسو ف ليه حسستيهو انك حاباهو وكنتِ بتغاري عليهو من اسيل و..... قاطعتها وقلت ليها عادي... انتِ كنتِ بتغاري على ود الأستاذه وهسي متزوجه وائل!.... مع انك حسب الكلام الكنتِ بتقوليهو لي حابه وائل من زمان ف ليييه وكيييف كنتِ بتغاري على ولد الأستاذه؟
معقوله كنتِ بتحبيهم الإتنين في نفس الوقت؟!
هنا هي سكتت!
اتنهدت وقالت لي على العموم أحمد سافر، مشى ل عمي مسعود يشتغل معاهو في بورتسودان لو ما ظبطت معاهو قال ح يمشي الدهب، قلت ليها ربنا يوفقو و يرزقو 😊
بعدها الإتنين سكتنا، بعد مساااافه قالت لي اخبارك شنو وكيف عامله مع الجامعه، قلت ليها كويسه الحمدلله، قالت لي بس انا ما كويسه وطوالي دموعها جات نازله!
ما قدرت امنع نفسي من اني ما اسألها عن الحاصل عليها، مع اني عارفه سبب بكاها حيكون شنو، ختيت يدي على كتفها وقلت ليها مالك يا الاء ما تبكي!
قالت لي وائل دا حيرني معاهو، كل مره بقول يمكن يتحسن لقدام بس ماف شي جديد! بقيت احسو مجبور علي بس ماف شي جابرو! لمن قعدت من نفسي وفكرت اتوصلت لأنو في بت في حياتو!
هنا رفعت راسي وعاينت ليها، قالت لي دا التفسير الوحيد! يمكن حابي بت غيري! بس لو حابي غيري ليه اتقدم لي وليه عقد علي؟
يعني قبلها ماف شي بينا لا بنعرف بعض كويس لا بيناتنا تواصل براهو جا واتقدم لي و دا معناها انو خاتيني في بالو من زمان، يبقى السؤال متين حب البت دي؟ قبل ولا بعد ما اتقدم لي؟ لو قبلها ليه اتقدم لي طيب و لو بعدها متين حباها بالسرعه دي!!
قلت ليها يمكن دا كلو ما حاصل، قالت لي لا انا حاسه إحساس قوي انو في بت في حياتو!
سكت مساااافه بعدها قلت ليها طيب اسأليهو، قالت لي ماااا المشكله انو هو ما ح يقول لي! كل ما اسألو إذا في شي بقول لي لا ماف شي انا بس مشغول و و و.... وكلها أعذار واهيه! انا تايها والله، حاسه عقلي ح يطق من شدة التفكير، شوفي حتى شكلي إتبهدل كيف! والحاله لسه ما سكنا في بيت واحد!
فجأه بقت تبكي، بكى زول موجوع ومكسور و مقهور، قلبي وجعني، قربت أحكي ليها بس سكت، كنت ماشه أجيب ليها مويه واقفل معاي الباب عشان ماف زول يشوفها أو يسمعنا، أو ما وقفت على حيلي كدا جرتني بقوه و قعدتني!.... طبعاً اتخلعت!.... و الخلعني زياده ملامح وشها الإتغيرت فجأه من انكسار ل قوه وغضب!.... حاولت افك يدي منها وبقيت اقول ليها الاء مالك في شنو؟
_ في شنو بينك وبين وائل!
هنا إتخلعت واتفاجأت أكتر! سؤالها دا ما جاي من فراغ!.... وائل مستحيل يكون حكى ليها!.... معناها دي خالتو سميه!.... يمكن خالتو سميه واجهتها وكلمتها انو وائل ما عايزها وقالت ليها السبب!!
في ثواني بس مليون احتمال خطر على بالي بعد سؤالها دا!... عقلي عمل Eror وكل أفكاري اتشتت و اتجهجهت!
قلت ليها دا سؤال شنو!
قالت لي ما تلفي و تدوري! ما تحاولي تنكري لأني سمعتك!.... انا والله مصدومه فيك 💔 ما قادره اصدق انك نفسها مها! ما قادره اصدق انك ممكن تتخاسسي كدا! ما اتوقعتك وااااطيه و تاااافهه للدرجه دي و..... هنا فكيت يدي منها بقوه وقلت ليها احترمي نفسك، ماف أي شي بيني وبينو!.... قلت كدا وانا واقفه على حيلي، وقفت وقالت لي شوووفو منو البتكلم عن الإحترام!.... يااااخ انا حتى لما عرفت مسكت نفسي، فكرت كتير بيني وبين نفسي وهسي لمن جيتك وشكيت ليك ما كنت بمثل، بالجد دي حالتك وكنت متوقعه منك تقولي لي الحقيقه، حقيقة انو في شي بينك و بين رااااجلي لكنك مُصره على الكذب والإنكار، ياااااخ انتي مصنوعه من شنو! معقوله بشر زينا! طلعتي وحده عديمة ضمير وإحساس وخسيسه و وااااطيه لكن ما مفروض اتفاجأ فيك ما انتي بنت خااالتي في النهايه وانا بعرف طبعاك، انانيه وما بتشوفي غير مصلحتك، ما مفروض استغرب فيك، من زمااان انتي كنت بتحكي لي عن انانيتك و وضاعتك في شكل أحلام بس انا الما كنت فاهماك، اختزلتي الأنانيه والمظاهر في جملة :
أنا عايزه راجل ثري!.... ثري عديل كمان ما مقرش، وما بعرس أي زول.... كلامك كان ليهو دلالات كتيره بس انا الغبيه الما كنت عارفه انو أحلامك البتقوليها دي انانيه، انانيه بتخليك تعملي أي شي قصاد انك تصلي لهدفك حتى ولو كان انك تختي عينك على راااجل بت خالتك الفي مقامك اختك و..... هنا نهرتها وقلت ليها كفاااايه استفزاز! قلتها وح اقولها تاااااني مااااف شي بيني وبين الإسمو راااجلك دا..... مسكتني بقوه من يدي وقالت لي مُصره تكذبي كمان؟ نفسي أضربك كف واقعد اضرب فيك كدا لحد ما ينشفي غليلي بس غليلي ما ح ينشفي وخساره اوسخ كف يدي على وحده زيك.....ياخ انا سمعتك، سمعتك ياااا بت خالتي، عارفه إحساسي كان شنو؟.... ما حصل أنبك ضميرك؟ ما فكرتي إحساسي حيكون شنو لو عرفت؟ أهلنا طيب والناس، ما فكرتي في زول؟ كيف قلبك طاوعك تخذليني؟ كيف نفسك سمحت ليك تطعنيني في ضهري؟ من عدم الرجال يعني؟ ما لقيتي راجل غيرو!
طبعاً كانت بتتكلم وهي بتبكي، قلت ليها انا.... قاطعتني بنهره وقالت لي سمعتك لما قلتي ليهو :
انت على الأقل لو كنت ما عايز تحرجها وتحرج نفسك لانك أديت الناس كلمه كان ممكن تخطبها وبعدين تخرج بالتي هي أحسن، معروف الخطوبه الناس يا بتتفق يا بتختلف وماف لوم على أي طرف! لكن انت عملت شنو؟ عقدت طوالي وجاي تلومني!!
هنا انا اتفاجأت!.... دا اليوم اللاقيت فيهو وائل في الدكان و لمن مشيت منو شفتها هي من بعيد! معناها سمعتنا من اليوم داك، أو سمعت جزء من الكلام .... وما قالت أي شي من اليوم داك!!....يمكن كلمت خالتي عشان كدا اتغيروا علينا!.... بس لو خالتي كانت عارفه ما كانت ح تسكت!
قلبي بقى يدق بسرعه وافكاري كلها بقت تقول لي اتفضحتي، الاء ح تمشي تكلمهم هسي، اليوم كلهم ح يعرفوا الحقيقه!
بقيت ساكته وهي بتعاين لي و دموعها عشره عشره، فكيت يدي منها مشيت قفلت الباااب و جيت قلت ليها اسمعي من الأول، قالت لي ما عايزه اسمع شي، جاوبي في شي شنو بينك و بينو ولييييه تقولي ليهو كدا للدرجه دي بتكرهيني و بتحقدي علي و..... قاطعتها وقلت ليها لو ما سمعتيني اليوم تاني ما ح تسمعي مني شي للأبد، حتى إجابة سؤالك دا ما ح تلقيها عندي و اعملي العايزاهو وكلمي كل الناس...... طبعاً انا خلاص يئست، و مليت وتعبت من اني كل مره خايفه انو اهلي يعرفوا الحقيقه، في البدايه عرف وائل، بعدو خالتو سميه و بعدها الاء و هسي كلهم ح يعرفو......
سكتت وبقت واقفه بتعاين لي ودموعها عشره عشره، قلت ليها الحصل ما بدا من هسي، بدأ من لمن كان وائل مغترب و....... الخ
حكيت ليها الحصل كلو، بعد سكت هي ما قالت حاجه، فجأه رفعت يدها تضربني بس انا مسكت يدها و نزلتها!
بقت تبكي و تقول لي ليه خليتيني اعشم فيهو، ليه كذبت عليهو من البدايه، ليه ما وضحتي ليهو لمن جا يتقدم لي واصلا انتي بأي حقق تتواصلي معاهو بإسمي و و و..... الخ بقت تبكي وتلومني ومعاها حق، بقت تبكي وتتكلم و انا ابكي، قالت لي ما قلتي ليهو انو اسمك مها ما الاء عشان غرورك ما سمح ليك، كييييف مها بحالها تتواصل مع ولد وتحبو، شفتيها تقيله تقولي ليهو اسمك مع انو هو ما عارف منو مها ومنو الاء بس مع ذلك غرورك ما سمح عليك حتى تقولي اسمك يا انانيه يا استغلاليه، انتي لو بالجد حبيتيهو ما كنتِ ح تخليهو يجي يتقدم لي، انتي ما بتحبي زول انتي بس بتحبي نفسك والقروش، نفس العملتيهو في وائل عملتيهو في أحمد اخوي، اتسليتي بمشاعرهم، خليتي أحمد عشان وائل واكيد خليتي وائل عشان زول تاني وضعو المااادي احسن منو و بكرا لو لقيتي زول مُقرش اكتر من الزول دا ح تخلي دا عشانو، قصدي عشان القروش و ح تستمري كدا، عمرك ما ح تحبي زول و في الآخر ح تلقي نفسك براك والقروش البتكسري قلوب الناس بسببها ما ح تفيدك بشي، انا لحد هنا و دي نهاية علاقتك بيك، تاني لا بعرفك لا بتعرفيني والمره دي صدقيني جد جد انا ح اقطع علاقتي بيك ومهما حصل عمري ما ح اسامحك..... قالت كدا و طلعت مشت طوالي.... مع طلعتها دي حسيت كل شي انتهى، بقيت قاعده ومنتظراهم كلهم يجوا يشنوا هجوم علي أو ينادوني برا، بس ما سمعت صوت زول.... لمن طلعت برا الحوش لقيتهم قاعدين بتونسوا زي ما كانوا بس الاء ما موجوده!.... عرفتها مشت بس ليه ما كلمتهم!.... بس دا ما معناهو انها ما ح تكلمهم، انا خلاص اقتنعت انو الموضوع دا ح ينكشف ح ينكشف!
كل شي مسخ لي وكل ما اتذكر الاء وبكاها وكلامها قلبي بيوجعني، دخلت بكيت بكى عمري ما بكيت زيو، كرهت نفسي شديد وكرهت حياتي، قررت اني خلاص ما عايزه أي شي من الحياه دي، ما عايزه احلام ولا عايزه زواج لا غيرو 💔
تاني يوم ما كان لي نفس امشي الجامعه بس لو ما مشيت ح اكتب واجن أكتر، في الجامعه بقدر اتصرف ازعل وابكي على راحتي بس هنا ما بقدر امثل اليوم كلو اني كويسه.... ركبت اول مواصلات، طبعاً بركب مواصلتين، تكلت راسي مع الشباك دموعي طوالي جات نازله، كف خالتو سميه و كلامها وكلام الاء معشعشين في بالي، كل ما دموعي تنزل بمسحها وهي بتضاعف كل ما اتذكر وائل و احمد، اتمنيت انط بالشباك، أجري حفيانه في الشارع وماف زول يمسكني، اصرخ بأعلى حس وماف زول يمنعني، ابكي وماف زول يسكتني، عايزه اصرخ، عايزه أطلع الوجع والقهر الجواي 😭💔
فجأه العربيه وقفت، السواق والكمساري نزلو يشوفوها وفي رجال نزلوا معاهم، في الآخر قالوا لينا انزلوا اركبوا عربيه تانيه، الناس دفعوا ليهو نص القيمه وركبوا في العربيه الجات و وقفت لمن شافوا العربيه حقتنا متعطله، انا اديتو القروش وما ركبت في العربيه التانيه، بقيت ماشه مع الظلط وما عندي وجهة معينه، ماشه و ببكي، وكل ما ابكي وجع قلبي بزيد، حسيت روحي ح تطلع ما باقي لي إلا اصرخ بصوت عالي، وقفت وختيت يديني على وشي، ياااارب دا شنو العملتو.... . يااااربي 😭😭💔💔
فجأه سمعت صوت عربيه قريبه مني، لمن نزلت يديني عن وشي لقيت العربيه واقفه جنبي عديل حتى انها نازله من الظلط!
لمن نزل قزاز العربيه لقيتو خليل!!
أشر لي عشان اركب، كنت عايزه اقول ليهو ح اركب مواصلات بس لساني اتربط، لمن ابكي شديد ما بقدر، قلت ليهو انا.... تاااااني دموعي جات نازله، غطيت وشي بيديني واديتو ضهري، شفتو بكى الزول المقهوووور داك الكل ما يحاول يسكت نفسو و يوقف دموعو يلقى البكى غالب عليهو؟! بس دي كانت حالتي، نزل وجا وقف قدامي، قال لي الحاصل شنو، كان لابس نظاره شمسيه، ما قدرت اتكلم وفي نفس الوقت نفسي كان اسكت نفسي خلاص!!
بقيت امسح في دموعي وهي تزيد وهو يعاين لي ساي، اتحرك على عربيتو، شال المناديل وجا مداهم لي، شلت العلبه كلها، امسح في دموعي وهي العبيطه ما عايزه تقيف وهو لسه واقف، قلت ليهو بصوت باكي :
حتى المنادل ما قدرت توقفها!
قال لي تعالي، فتح لي باب العربيه، ما ركبت، قال لي الشمس حاره، ممكن اوصلك للمكان الماشه ليهو..... لمن ركبت و ركب و دور العربيه، كان في هدوء حاصل، الوقت داك انا خلاص جففت دموعي وبقيت أهدي في نفسي، بعد مسافه قال لي ماشه وين انتي؟
وريتو الجامعه، قال لي بتقري شنو.... رديت عليهو ، قال لي كنتِ بتبكي ليه؟
ما رديت، ما بقدر اقول جوابي المعتاد : ماف شي، لأنو ماف زول ببكي ساي وبكاي الهسي دا جملة ماف شي ما مناسبه ليهو!
قال لي الواحد مهما واجه مشاكل في الحياه دي لازم يقوي نفسو وما يستسلم بسهوله! قلت ليهو انا ما استسلمت لأن موضوعي ما ليهو علاقه بالإستسلام...... بعد مسافه قال لي ياها حركات البنات، تعلقوا روحكم في اولاد الناس و تعشموا فيهم وبعدين تقعدوا تتباكوا..... انفعلت وقلت ليهو انت بتتكلم ساي ليه! انا ما متعلقه في أي زول وما ح أتعلق في أي زول لأني ما ممكن احب زول، انا ما بحب غير نفسي، ما بهمني غير مصلحتي، ما بتهمني مشاعر الناس، انا ما بشر عشان اتعلق في الناس و اعشم فيهم، انا ما عندي إحساس ولا ضمير ولا قلب عشان اتعلق بيهو في زول !!
لمن عاين لي وهو سايق ياداب انتبهت على نفسي وعرفت اني انفعلت شديد!..... قلت ليهو نزلني هنا، قال لي لسه ما وصلنا، قلت ليهو عارفه، ما ماشه الجامعه، قال لي اوصلك وين، قلت ليهو يااااخ نزلني هنا، قال لي وين لكن..... قلت ليهو يااااخ ما تقعد تحسسني انك خايف علي وهاميك انزل وين أو امشي وين، قال لي بكل برود هسي انتي منفعله كدا ليه؟؟
سؤالو دا زهجني زياده لأني كنت حاسه انو في نار جواي، نار أكاد أجزم اني شايفاها قدامي، بتحرق يديني و رجليني و وشي، حتى جسمي حسيتو مسخن شديد، وحسيت نفسي ح أرعف، انفلعت اكتر من الاول وقلت ليهو ما تسالني نزلني بس، نزلني ياخ 😭💔 تاااااني البكى دور، وقف العربيه وقال لي يا بت الناس في شنو مالك؟
ماااااا اتكلمت، تاااااني أخدت لي بكيه وهو ساكت ساي في الآخر قلت ليهو انا اسوأ انسانه ممكن الواحد يعرفها، اتخيل اني ما بحس بوجع أي زول وما بفرق معاي هو حاسي بشنو! ما بتهمني مشاعرو ما بهمني الضرر الح يقع عليهو بسببي، أهم شي مصلحتي، انا عديمة إحساس وضمير!
قال لي لو بالجد كنتِ كدا ما كان بكيتي البكى دا كلو، قلت ليهو بكيت لأني انكشفت، في حاجات ما حسيت بيها وما اهتميت بيها إلا لما واجهوني بيها، لو كنت جد بحس كان حسيت بيها من الأول بدون ما سيد الحق يجي يطالبني و يواجهني بيها!.... انا سيئه اكتر ممكن انت متخيل، صدقني لو انت او امك كنتوا عارفين كمية السوء الفيني ما كانت امك ح تقول عايزاني ليك، ما تغرك البراءه الظاهره علي دي لأني ابعد ما يكون عنها، وهسي بقولها ليك انا اسوأ، عارفه نفسي اختيار امك، بس ضروري برضو انت تعرف!
بتكلم معاهو وهو اصلا ما كان بعاين لي في حسيت نفسي هبلت بنفسي وبقيت اخبط في الكلام واقول كلام ما لازم اقولو، اتضايقت من نفسي اكتر، لمن جيت انزل من العربيه، فجأه قال لي انتي موقفك شنو من الزواج دا؟ قصدي رأيك شنو في كلام الوالده القالتو ليكم؟
إتلفت عليهو وقلت ليهو :
ما موافقه
وكنت ح انزل بس فجأه قال لي انتظري!
«أقسى أنواع العقاب أن تصبح أنت القاضي والمتهم والسجّان في القضية نفسها.»
يتبع.....