رواية شتات الفصل الحادي عشر 11 بقلم مها حولي
قلت ليهو اهلين أحمد اتفضل.... ما رد علي ف سكت لأني خفت منو، قال لي جاي اقول ليك حاجه واحده بس :
انتي وحده انانيه وما بهمكم شي غير مصلحتك وانا اليوم لأول مره أصدق الكلام الإنقال عنك، انتِ وحده عديمة إحساس وضمير.... من اليوم خلقتك دي ما عايز اشوفها وان شاء الله القروش دي تخليك سعيده..... قال كدا ومشى طوالي وقلبي بقى يدق بسرعه، قربت أبكي بس مسكت نفسي لكن كلامو علق في نفسي، لمن رجعت لناس امي قالوا لي منو الكان في الباب، قلت ليهم واحد كان بسأل عن بيت ناس منو كدا ما متذكره قلت ليهو دا ما بيتهم..... طبعاً الجبنه مسخت لي زياده، دخلت جوه ونمت طوالي.
تاني يوم على الجامعه، اول ما خلصت وطلعت إتلاقيت مع جمانه، قالت لي ما تمشي قالوا ح يعلقوا النتيجه بعد شويه.... طبعاً اتخلعت، ناس الجامعه دائماً بفاجئونا بالنتيجه، بدون أي سابق إنذار بنلقى النتيجه معلقه!
من دون ما أحس قلت ليها وااااي انا خايفه منها، ياداب اتذكرت السواطه السوطها في الإمتحان! قالت لي يا بت ما براك انا كمان ما اشتغلت كويس، لكن ان شاء الله بنباصي!
مشينا قعدنا في البينشات وبقينا منتظرين الناس تقول النتيجه طلعت، حالنا حال المنتظر ليهو مراه في غرفة العمليات!
بعد شويه الجامعه دي كلها هااااجت و جاطت و بقى في أصوات كواريك و زغاريد..... جمانه قالت لي النتيجه طلعت شكلها 😭
ختيت يدي على قلبي وقلت ليها المشي غالبني، قالت لي انا كمان لكن ارح نتوكل ونمشي، وقفت على حيلي واتحركت وهي كانت ماشه معاي، متوترين وخايفين، من دون ما نحس كنا ماسكين يدين بعض وكل وحده تشكي خوفها للتانيه، لمن وصلنا البورد المعلقه فيهو النتيجه لقينا غفران ومنار وكانوا ببكوا وفي بنات وشباب من الدفع التانيه شغالين ليهم دا حال الجامعه، ما تشيلوا هم واجتهدوا للملاحق!
اللحظه ديك انا جد جد خفت من نتيجتي، جمانه ضغطت على يدي شديد وقالت لي وااااي قلبي ح يقيف!
بعد الناس زحوا من البورد، جيت لمكان النتيجه حقتنا، بقيت افتش على اسمي وانا مره اغمض عيوني ومره افتحها لحد ما لقيت اسمي و...... Pass!!
ياخ اللحظه ديك قربت أطير من الفرح، عيوني إتملت دموع، بدون ما احس ضميت جمانه وقلت ليها الحمدلله Pass all through، قالت لي الحمدلله، ألف مبرووووك يا قلبي.... باقي انا.... جات وقفت قدام وبقت تفتش على اسمها وانا والله في سري كنت بدعي ليها و اتمنيت نتيجتها تطلع Pass بس لمن إتلفتت علي وشها ما كان ببشر بالخير، فجأه مشت طوالي وهي بتبكي، عاينت للبورد لقيتها راسبه في ماده، لمحتها من بعيد مشت قعدت في البينشات وبقت تبكي! ما عرفت اعمل شنو..... كانت قاعده براها، في الآخر مشيت ليها، قعدت جنبها وقلت ليها جمانه ما تبكي!..... طبعاً انا فاشله في المواساة وتحنيس الناس، دي اكتر حاجه بكرها لكن عااااد اسوي شنو!!
قالت لي كيف ما ابكي، انا متملحقه! وااااي يا ربي 😭😭😭
قلت ليها عارفاها حاجه بتزعل بس دي ما النهايه، انتي عندك فرصه تنجحي في الماده دي وتمشي السنه البعدها، عايني للبنات ديلك.... ديل كانو جنبنا قبل شويه وشافوا نتيحتهم فيهم الشايله ملحقين والشايله 3 ملاحق، عايني ليهم مبسوطين وبتصوروا كيف!.... ليه؟ لأنو الحصل دا خلاص حصل ما بتقدر تغيروا لكن بتقدر تعالجو وتمنع نفسك من انك تقع فيهو مره تانيه، البكى ما بحل مشكله ولا برجع الزمن، الفات دا خلاص خليهو، ومن هسي أبدي اقري للملحق لو عايزه، انا معاك لو احتجتي مساعده بقدر اشرح ليك وان شاء الله ح تنجحي فيهو انا متأكده، هو ماده وااحده بس، متأكده ح تنجحي فيها والسنه الجايه ح نكون مع بعض..... ضمتني عليها وبكت كويس بعدها مسحت دموعها وقالت لي طيب، كلامك خفف عني والله، بعد شويه جات ماريا وقالت لجمانه غير البكى عشان شنو، جمانه قالت ليها ما عارفه يعني، شلت ملحق يا ماريا 😭😭 ماريا قالت ليها انا شايله اتنين ويااااهو عاديه لا ح ابكي ولا شي وهسي ماشه أفطر، تمشوا معاي؟؟
_ وائل انا أمك ولا ما أمك؟
= دا سؤال شنو يا أمي؟
_ انت من متين بتدس مني، مالك يا ولدي احكي لي الله يرضى عنك ما تشيلني همك، زمنك كلو راقد و حيلك منهد
= يا أمي احكي ليك شنو وهو ماف شي احكيهو!
_ متناقش مع الاء ولا شنو؟
_ لا ما حصل
= اها مالك؟؟
_قلت ليك ماف شي!
_ امك وين تعالي ما تعملي لي أي شي
_دقيقه يا خالتو سميه
"مشت جابت ليها عصير و جات قعدت قصادها"
_كدي تعالي يا الاء اقعدي جنبي هنا عايزه اتكلم معاك
= اي يا خالتو سميه
_...... انتي و وائل علاقتكم كيف؟
= كويسين!
_ متأكده
= ايوه يا خالتو سميه.... وائل قال ليك حاجه؟
_ اريتو كان بقول، ما عارفاهو مالو يا الاء ليهو فتره حالتو ما عاجباني، لا بتكلم لا بياكل زي الناس، زمنو كل سرحان، اسألو يقول لي ماف حاجه! حيرني معاهو الولد دا!
_ ما حصل بيناتكم اي نقاشات أو خلافات!
= لا والله ما حصل وهو متواصل معاي عادي! هم شايل هم الشغل العايز يبداهو جديد دا!
_ لا والله دا ما السبب، حالتو دي ما حالة زول شايل هم شغل، قلبي قابضني عليهو، حاساهو زي المكسور الخاطر!..... خليك معاهو يا الاء وحاولي تسأليهو بطريقه مباشره أو غير مباشره..... وعليك الله لما يقول ليك قولي لي عشان قلبي يبرد
= تمام!
بعد شويه رقيه جات داخله، لقت سميه سلمت عليها وسألتها عن أحوالها و بقوا ياخدوا و يدوا في الكلام، لحد ما سميه قالت ليها زي السمعت انك كنتِ ماشه تخطبي أسيل لولدك أحمد وتاني ما سمعنا شي !!
رقيه قالت ليها ح نخطبها ليهو وما زادت حرف، الاء غيرت الموضوع وجابو سيرة العرس، سميه قالت ليهم :. ما معروف يمكن عرس مها و الاء يكونوا سوا!.... طواااالي رقيه قالت ليها بري أي زول براهو!😊
سميه قالت ليها مالو وشك اتغير!.... قالت ليها بري ما اتغير ولا شي..... قالت ليها انتي يا رقيه متناقشه مع اختك رويدا ولا شنو! شايفاك وقفتي منها، وحتى لمن جوا الخطاب ل بتها انتي قلتي ما عارفه!
لأني جد جد ما عارفه اكذب عليك عادي!.... سميه قالت ليها بسم الله مالكم قال!
هنا اتدخلت الاء و قالت ليها كل القصه يا خالتو سميه، انو أحمد اتقدم لمها وهي رفضت وقالت لأمي لو ولدك دا كان بقى آخر راجل ما عايزاهو، أمي زعلت والله وقالت إلا تخطب ليهو اسيل، اصلا هي من زمان عاجباها، اها بعد امي مشت وفاتحت أهل البت وحددوا يوم نمشي ليهم فيهو أحمد رفض، وهو من الاول ما وافق ولهسي زعلان!
وناس خالتي أظن زعلانين لا كلمونا لا كلمناهم!
الاء وهي بتتكلم امها كانت بتحمر ليها بس هي ما عاينت لأمها!
سميه قالت ليهم دا كلو من عمل الشيطان، انتوا ما جارات، انتوا أخوات، والله عيب الحاصل بيناتكم دا، انا والله حسيت في شي، وجيت أسألك انتي يا رقيه، والله الكلام دا غلط!
رقيه قالت ليها كان صح كان غلط حصل الحصل وبعد دا أي زول ياكل نارو براهو!
بعد سميه مشت رقيه قرصت بتها الاء وقالت ليها ما تعملي لي فيها عشان بقت نسيبتك تحكي ليها أي حاجه، هسي في داعي تقولي ليها امي خطبت لأحمد وهو رفض! عويره انتي ولا ولدوك ياداب!!
الاء قالت ليها ما فيها حاجه يا أمي، دي خالتو سميه!
قالت ليها سم القدر الغدا ان شاء الله، اسمعي هنا يا الاء، اوعك شي يحصل في البيت دا تمشي تكلمي بيهو الناس، ما تقولي لي نسيبتك أو زفت فاهمه ولا لا!!
لمن كنت ح اطلع وامشي من الجامعه، جمانه قالت لي ماشين نفطر في مطعم رهيييييب حق برجوازين جد جد، قلت ليها هسي مش فطرنا! قالت لي لا لا دا ما اسمو فطور، دي تصبيره ساي، ارح و ما تخافوا انا عازماكم على حسابي! 😂.... ماريا قالت ليها لا لا انتي اليوم ما براك! جمانه قالت ليها ما تتعودوا سمحه!
اترددت وقلت ليهم انا.... جمانه قاطعتني وقالت ما عايزه اسمع اعتراض من زول!.... ماريا قالت لي عيب الواحد يرفض العزومه!😂
في الآخر اضطريت امشي معاهم، طلبت لينا جمانه على ذوقها، أثناء ما نحنا قاعدين ماريا قالت ل جمانه قبيل شفت صحباتنا يبكوا ساي، لما جيت ماره بجنبهم عملوا نفسهم طبيعيات، غيتو عليهم جنس حركات، بالذات غفران!
طبعاً انا من البدايه فهمت انو قصدها غفران ومنار و دي العلاقات الأنا ما بحبها ولا بطيقها، يوم صديقك و يوم عدوك دي احسن منها الواحد يمشي براهو.... جمانه عاينت لي لقتني بعاين في تلفوني وما ابديت أي ردة فعل وما سألتهم عن غفران ومنار ف قالت ل ماريا خلينا منهم.... طبعاً كنت شايفاها بطرف عيني!
طبعاً كنت فاتحه الفيس ويدي مشت على الماسنجر، لمن دخلت محادثة وائل لقيتو رافع عني الحظر! ما عارفه من متين لأني ما بدخل الفيس كتير وما بحبو شديد!
بعد شويه كدا سمعنا صوت جوطه!.... كان واحد من الويترز بشاكل في بت وشغال ليها المكان دا اصلا ما شبه الناس الزيك والمفروض زاتو ما تجي المطعم دا ولا تقيفي في بابو، والبت المسكينه كانت بتقول ليهو معليش ما قاصده اضرب فيك وادفق العصير و واضح انها كانت مُحرجه للناس وهو عشان بتعتذر منو نافخ ريشو و ينهر فيها زي الشافعه قدام الناس، الموقف دا غااااظني واستفزاني شديد، شلت كباية العصير حقي و طواااالي مشيت وقفت قدام الويتر وبدون أي مقدمه رشيييييتو بكباية العصير البااااارد كلووو لكن اتخلع وكل الناس اتخلعت معاهو!!
هااااج وقال لي انتي حيوانه ولا شنو.....اتناولت عصير تاني من اقرب طاوله و دفقتو فيهو، قلت ليهو ماف حيوان غيرك هنا، انت منو عشان تقرر منو من حقو يجي هنا ومنو لا..... لو ما قروشنا دي انتوا ولا شي، وبعدين انت ويتر ما ولد رئيس عشان تنفخ ريشك وتشوف نفسك، قايل روحك منو انت يا متخلف ..... إتلفت على البت وقلت ليها انتي اغبى بت اشوفها في حياتي كلها! بتعتذري ليهو لشنو وهو شغال ينهر فيك ويذل فيك! دا زاتو شبهو ما شبه اعتذار ولا يستاهل الإعتذار، دا واحد عندو عقده نقص جايه يقلل من الناس ويذلهم عشان يتمهم، النوعيه الزي دي بكون أحقر ناس وماف زول محترمهم وشايفين نفسهم أقل عشان كدا بفتشوا لزول يكون أقل منهم عشان يحسو بقيمتهم!
طبعاً الولد هااااج ودفق و بقى يتشاكل معاي،و باقي الويترز وبتاع الكاشير جوا ادخلوا وحاولوا يمنعوهو مني و يفضوا الإشتباك و الولد خرج عن طورو وحسيتو زي المجنون أو بتعاطى، اتفك منهم لزاني و رفع يدو عشان يضربني بس فجأه في زول مسك يدو وجا وقف حاجز بيني و بينو! وفجأه نفس البت اللاقيتها في السوق، يلي هي جويريه بت خالتو سميره جات وقفت جنبي وقالت لي دا واحد مجنون ساي! حتى جمانه وماريا كانوا واقفين معاي!
الولد لز يد الويتر وقال ليهو احترم نفسك!.... طواااالي العاملين في المطعم لموا الويتر قليل الأدب عليهم و اعتذروا من الشاب..... قال ليهم ما عايز أي اعتذار، لو عايزين تعتذروا اعتذروا للبت دي أولاً (البت الشاكلها الويتر) و البت دي..... ثانياً..... طبعاً هنا إتلفت علي وعيني جات في عينو، ياهو الشفتو مع البت دي في السوق، بقيت اقول في نفسي دا خليل؟....ولا يمكن دا حبيب جويريه ولا أخوها بس ما خليل! هي لمن جاتنا مع امها ما وضحت لي الكان معاها في السوق دا خليل ولا زول تاني!!
طبعاً اعتذروا مني ومن البت بس أكتر شي اعتذارهم كان للشاب الما عرفت اسمو دا إلا لمن قالوا ليهو آسفين استاذ خليل اتفضل مكانك وغلط زي دا ما ح يتكرر تاني!
قال ليهم ما عملتوا الطلبتوا منكم؟ جيبوا الحيوان داك عشان يجي يعتذر للبنات الاساء ليهم، و إذا ح تخلوهو يواصل في شغلو مااااف زول ح يجي المكان دا تاني وانا أولهم!
طواااالي زي المحركنهم بجهاز كنترول، مشوا جابوا الويتر وأظن جوه كفتوهو وأدوهو حقو لأنو جا مبهدل شديد واعتذر بدون اعتراض مني ومن البت! 😂🤣
قلت في نفسي دي قوة القروش والمكاااانه، الزول العندو مكانه ومليان قروش كل الناس بتعبدو و بتسعى عشان توفر ليهو كل وسائل الراحه وتكون حريصه على انو ما يحصل أي تقصير أو اهانه أو اساءه ليهو!!
الوضع هِدى والناس رجعت مكانها، إلا نحنا واقفين في نفس المكان، البت جويريه كانت مبسوطه وضحكتها للضرس، قالت لي وااااي ياريت لو صورت الحصل لأمي كانت ح تتكيف منك شديد لأنو ماما ناشطه في حقوق المرأه، هسي لو كلمناها ما ح تقصر من الجماعه ديل! 🤣🤣
ابتسم ليها وقلت للشاب خليل : شكراً
قال لي على شنو؟ واحد اساء ل بنات.. طبيعي الناس تقيف ضدو!
ما عارفه بس حسيت كلامو دا فيهو إحراج بطريقة ما، أو هو قاصد يقول لي الموضوع ما شخصي، أي زول مكاني كان ح يعمل كدا، أو بت كانت مكانك برضو كنت ح اعمل كدا!!
قلت ليهو ماااا طبيعي ماااا أي زول بقيف مع الغريب 😊
عمل نفسو مركز مع تلفونو، قال ل جويريه نمشي؟ جويريه قالت لي بالمناسبه يا مها دا خليل اخوي... و يا خليل دي مها ال... ما تمت الكلام لكن غمزت ليهو وقالت ليهو اصلا انت عارفها عشان وصفناها ليك وقلت ليك دي البت اللقيناها في السوق و..... قال ليها انتي ليه كلامك كتير؟ اتحركي قدامي!
ودعتني ومشت لحقتو لأنو طلع طوالي، استفزاااني شديد الإنسان دا وغااااظني، عامل فيها بدافع عن الناس وفي نفس الوقت بهينهم!.... قايل نفسو من دا كمان، براها امو جات لحد البيت عشان تخطبني ليهو، أظن قايلني حأكون ميته فيهو وما مصدقه انو امو عايزاني ليهو لكن ماااااا بتعرفني والله، انا جني أكبر من جنك وشوفة نفسك دي وشوووف لو ما خليتك برااااك تجيني و تكسر نظرك لما تكون قدامي ما اكون اسمي مها والأيام بيناتنا!
_ يا وائل كدي أديني تلفونك دا اتصل على خالتك سلمى طولت منها هسي تلفوني ما فيهو رصيد
= ياهو التلفون
_لو شغال بيهو خليهو خلاص
=لا لا قايم استحمى واصلي
وائل مشى يصلي وامو اول ما اتأكددت انو ما ح يجيها راجع هسي، بعد تردد فتحت الواتس وبقت تفتش في الرسائل، اول دردشه بدت بيها دردشتو ما الاء وما لقت شي، كانت بتمرر الرسائل بسرعه، طلعت من الواتس ومشت الماسنجر، بقت تفتح الرسائل بسرعه وتشوف آخر رساله عشان الزمن، عشان وائل ما يجي يلقاها بتفتش في تلفونو، دخلت محااادثه من المحادثات، من آخر رساله حست انو ح تلقى شي، ف بقت تقرا الرسائل و اتغيرت كل ملامح وشها!
رجعت التلفون مكانو و راسها ضارب!
"لَا تَخَافي لن أنسَى مَلامِحكِ أبدًا ، في كُل مَوقِفٍ أشعُرُ فِيهِ بِالخِذلَانِ سَوفَ أرَاكِ".
يتبع.......