رواية شتات الفصل التاسع عشر 19 بقلم مها حولي
قريت الرساله وما رديت علي بس عرفت قيمتي عندو و عرفت اني بالنسبه ليهو ولااا أي شي، ردو دا فتح لي عيوني وخلاني اعرف اني اندفعت شديد في مشاعري 💔
أفكار كتيره ومشاعر مبعثره حاوطتني، الليل كلو شلتو تفكير، نفسي افهم هل انا الغلط ولا الناس البدخلوا حياتي هم الغلط؟ نفسي اعرف المشكله وين؟ الغلط في مشاعري انا ولا هو الما بقدر المشاعر ولا انا مديه مشاعري للزول الغلط؟ يمكن دا عقابي؟ يعني زي ما وائل وأحمد كان عندهم مشاعر لي واتجاهلتها خليل كمان اتجاهل مشاعري!..... بس انا ما ح ألومو، انا بستاهل، كيف سمحت لنفسي اتمادى و أدي بدون مقابل، براي فرطت في مشاعري وحلمت احلام ورديه، انا الماف زول بفرق معاي يجي واحد زي خليل يهزني؟.... مش على أساس هو يحبني؟ ليه بادرت انا؟ ليه اتولدت جواي مشاعر ليهو؟ دا حب ذاتو ولا إعجاب؟ بس أياً كان دي نهايتو وانا استاهل 💔
ما عارفه كيف ح اكلم اهلي وكيف حتكون ردة فعل ونظرة باقي الناس لي لمن يعرفو انو الخطوبه اتفسخت، بالذات وائل و احمد و الاء و خالتو سميه و خالتي!.... ح يقولوا تستاهل، و خالتو سميه ح تنبسط، انا ما بحب الشماته والله، ما عارفه كيف اكلم ناس البيت، امي ما بقدر اقول ليها 💔
تاني يوم الصباح طلعت و مشيت الجامعه، نزلت من المواصلات، كنت شايفه عربية جيتور واقفه جنب بوابة الجامعه وشكلها ما غريب علي، اول ما وصلت البوابه وجيت جنب العربيه الباب فتح وخليل طلع في وشي!
قال لي صباح الخير، ما رديت عليهو، عاين لساعة يدو وقال لي ممكن نتكلم؟
قلت ليهو ما عندي ليك زمن، اول ما اتحركت من جنبو قال لي خلي كل شي على جنب وركزي على امتحانك..... بالتوفيق!
نهاااي ما إتلفت عليهو، دخلت الجامعه وانا مستغربه في الإنسان دا! اكيد عندو انفصام في الشخصيه!
دخلنا قاعة الإمتحان لمن جا زمن الجلسه و الحمدلله الإمتحان كان كويس شديد و عدينا آخر امتحان على خير، طلعت مبسوطه من الإمتحان، غفران قالت هسي خلونا نطلع نمشي مطعم أو أي مكان نحتفل ونتفسح فيهو شويه وبكرا عازماكم في بيتنا 🩷
اول ما طلعنا من الجامعه لقيت عربية خليل لسه واقفه!....نزل سلم على البنات وقال لينا كيف اشتغلتو؟ انا ما رديت عليهو، البنات قالوا ليهو اشتغلنا كويس الحمدلله، عاين لي وقال لي ممكن نتكلم؟
قلت ليهو لا، ما عندي شي اقولو ليك وما عايزه اسمع منك شي، وقلت للبنات ارح، اول ما اتحركت وقف قدامي!.... قال لي نحنا في الشارع، ماف داعي نلفت الأنظار، انا بس عايز اتكلم معاك! قلت ليهو وانا ما عايزه اتكلم معاك!!
طوالي جمانه قالت لي نحنا ح نسبقك ومشوا قدامي الإتنين ل وين ما عارفه!
خليل فتح باب عربيتو وقال لي ما ح أاخرك!
ربعت ليهو يديني وقلت ليهو قول العندك هنا، ما راااكبه معاك.....قلت ليهو ذكرتني، طوالي طلعت الخاتم من يدي ومديتو ليهو، قال لي رجعيهو مكانو، قلت ليهو دا الحاصل! هسي انا بحاول ارجعو لمكانو!
قال لي ليه بتعملي كدا؟.... قلت ليهو شفت دي الأسئله المستفزه الما بحبها.... سااااي كدا ما عايزه الموضوع دا يمشي لقدام، استلم خاتمك!
بقى يعاين لي في عيوني بإستغراب كأنو بفتش على هزل أو هظار أو عدم جديه! بس انا كنت جاده! جاده شديد كمان ومستعده اديهو خاتمو وامشي!
لمن ما مسك مني الخاتم ختيتو ليهو في العربيه، اول ما اتحركت مسكني من يدي، طوالي نفضتها منو، قال لي آسف لكن اسمعيني و ك نصيحه مني، لمن تقرري تنهي حاجه ياريت يكون عندك كل الأسباب الكافيه و كل سؤال تكوني ماخده اجابتو الكامله وعلى الأساس دا تتخذي قرارك، عشان ما تندمي بعدين!
قلت ليهو صدقني انا اتخطيت و اتجاوزت حاجات انت للآن ما قادر تتخطاها 😊
و صدقني الخطوبه دي بالنسبه لي مجرد إجراء شكلي أو شي عادي لا بضيف لي لا بنقص مني، وما شي مهم أو خطير عشان اندم عليهو!
قال لي الجديه البتتكلمي بيها هسي دي ما كانت موجوده أمس!
لفيت وشي منو بزهج كدا وكان واضح اني ما عايزه اسمع شي وزهجانه من السيره دي، دخل في الموضوع طوالي وقال لي انتِ عارفه انو الرد الأمس كان بناءٍ على كلامك السخيف!.... لمن إتلفت عليهو، قال لي ايوه سخيف!.... واصل كلامو وقال لي مشكلتكم انتوا البنات بتقولوا وبتطلبوا مننا الحاجه الإنتوا ما عايزنها!
يعني الما عايزه تطلق بتقول لراجلها طلقني، والما عايزه تنفصل بتقول للطرف التاني خلينا
ننفصل والما عايزه الخطوبه تتفسخ بتقول ليهو هاك خاتمك!.... بتستخدمو الأساليب دي ك ضغط أو اختبار أو تهديد بارد! يعني لو ما عملت لي كدا تطلقني أو تنفصل عني!
طبعاً حيرني للمره التانيه أو التالته!..... هو ليه دائماً بكون عارف اي شي! حسسني انو قاري علم نفس! دا شنو دا يااااخ.... بس انا هسي جاده في كلامي القلتو!
قلت ليهو خلاصة كلامك اني شايف كلامي هزل؟ شايفني بستهبل عليك؟.... طيب ياهو خاتمك قدااامك!😊
اخد نفس وقال لي انتي مشكلتك شنو؟ قلت ليهو ما عندي اي مشكله!
قال لي دي من اكتر الحاجات البتستفزني وبتزهجني! الحوار والنقاش انخلقوا عشان الناس تصل بيهم لحلول أو نقطه معينه ف ما تقولي لي ما عندي مشكله لأني جاي مخصوص عشان اتناقش معاك!
ما رديت عليهو، قال لي شنو الخلاك تقولي كلامك حق أمس!؟
قلت ليهو دي من اكتر الحاجات البتستفزني وتزهجني، ليه الواحد لما يكون عارف نفسو غلط في شنو، بعمل رايح وبجي يسأل؟
قال لي سألتك عشان احدد المزعلك شنو بالضبط!
ربعت يديني وبقيت اعاين ليهو بنظرات بتقول ليهو انت عارف!
قال لي ما قادر اقول ليك انتِ زعلانه أمس عشان ما اتكلمت معاك في العربيه، لأنك مستحيل تكوني زعلانه عشان كدا، لأنو ماف شي بفرق معاك، يعني اتكلم معاك أو لا ما ظنيت دي حاجه بتزعلك!
طبعاً فهمت قصدو!.... قلت ليهو خليك من موقف أمس، انا شايفه انو العلاقه دي ما ح تمشي لقدام، ما فيها احترام ولا تفاهم..... قال لي أديني مثال، عدم الإحترام وين وعدم التفاهم وين؟؟
طبعاً هنا سكت!.... أحيانا بكون جوانا زعل كتير وغيظ من الطرف التاني وأول ما يجي الطرف دا يواجهنا و يسألنا عن شنو المزعلنا منو بلنقى كل حاجه اتبخرت!.... حرفياً انا بقيت افكر في شي اقولو ليهو اطلعو الغلطان بس ما عرفت اقول ليهو شنو وما ح أقدر اقول ليهو في جملة انت أمس اتجاهلتني وانا كنت عايزه احكي ليك الحصل معانا!
لمن لقاني ساكته، شال الخاتم مع العربيه ومداهو لي، قال لي الأمور ما بتتحل بالطريقه دي، ما تطلعي الخاتم دا لأي سبب كان، غلطت عليك، زعلتي مني في حاجه تعالي واجهيني، يمكن انا ما منتبه أو عندي تفسير تاني لتصرفي!
قلت ليهو سؤال واحد بس عايزاك تجاوبني بصدق :
ليه مُصر على الإستمرار؟
قال لي وليه ما أصر عليهو؟
قلت ليهو جاوبني!
قال لي سؤالي دا الجواب! ماف شي يخليني انهي العلاقه دي بدون سبب!
قلت ليهو جاوبني جواب زي الناس! قال لي يعني هسي الجواب دا زي الحيوانات!؟ 😁
قلت ليهو انت عارف انو دا ما جواب سؤالي! قال لي سمممح شففيني الإجابه، جواب سؤالك شنو؟
قلت ليهو يااااخي انا والله ما بهظر معاك! قال لي ولا انا!
عاينت ليهو مسافه بعدها قلت ليهو انت واحد متناقض، عارف الحاجه دي؟
قال لي والسبب الخلاك تقولي كدا؟..... جاوبي عشان اعرف ارد عليك؟
قلت ليهو بس متنااااقض وخلاص!
قال لي انا ما شايف أي تناقض، قلت ليك من البدايه اني ما معترض على الزواج دا، موافق عليهو بكامل إرادة واصلا ماف زول بقدر يجبرني على شي، قلت ليك ح نعيش زي أي متزوجين، حياه مستقره بس عندي شروط قلتها ليك، غير كدا كلو تمام وانا ما بقصر منك!
قلت ليهو طيب شروطك دي بتطبق علي انا بس ولا نحنا الإتنين؟
قال لي الإتنين
قلت ليهو طيب لييييه أمس حاولت انك تمنعني من المبيت في بيت صحبتي وليه جيت توصلني؟ مش مفروض ما تدخل فيني زي ما طلبت مني ما أتدخل فيك بعدين والحاله انو ماف شي بيناتنا وماف شي بربطنا ببعض غير الخواتم دي وياهو طلعت ليك خاتمك!
طبعاً هنا لأول مره اشوفو ارتبك!.... دائما كان بجاوب بكل ثقه وعامل فيها صريح وماف شي بغلبو!
ربع يدينو وقال لي الواضح انو في سوء فهم، قلت ليهو ماف أي سوء تفاهم، قال لي سوء فهم ما سوء تفاهم، انتِ فهمك شنو لجملة كل زول يكون في حالو بعد الزواج؟
قلت ليهو ما عندي ليها اي فهم وما تمشي بعيد، تاني ماف لا قبل زواج لا بعد زواج!
واصل كلامو وقال لي :
عايزه تبيتي في بيت فيهو شباب؟ بيت صحبتك كمان يعني لا بيت خالك لا عمك! ولاحظي اني ما فرضت رأيي عليك انا بس نصحتك! قلت ليهو نصحتني وطوالي جيتني الساعه 4!؟
قال لي شوفي، شروطي القلتها ليك ديك كلها ماف ولا شرط معناهو انك مثلا تبيتي برا البيت وفي بيت أي زول!.... قلت ليهو اي زول يكون في حالو دي معناها شنو؟
قال لي ابسطها ليك :
معنى شروطي البسيطه زواج بدون مشاعر، بس دي كل القصه! وما أظن دي حاجه غريبه معظم الناس بتتزوج زواج صالونات بدون حب ومشاعر! قلت ليهو ديل مخلين مشاعرهم لبعد الزواج لكن نحنا م..... هنا سكت.... تاني قلت ليهو ما عايزه اتناقش اكتر و..... قاطعني لمن مد يدو وكان عايز لبسني الخاتم، لمن زحيت يدي منو قال لي ألبسيهو براك طيب!
قلت ليهو انت شايفني شافعه ولا مختله عقلياً عشان ما تشتغل بكلامي! من قبيل انا بقول ليك في شنو؟ يعني بالغصب عايزني ألبس الخاتم كأنو كلامي القلتو هزل!
قال لي لا شافعه لا مجنونه، طلبت منك تلبسي الخاتم لأنو الموضوع ما يستاهل انك تطلعيهو و تنهي البينا.... يلي هو الخطوبه دي!
قبل ما اقول ليهو شي قال لي ثواني، فتح باب عربيتو، طلع منو بوكس اسود، قال لي الهديه دي مفروض أديك ليها من أمس لكن حصل الحصل و..... قاطعتو وقلت ليهو احتفظ بخاتمك و هديتك لنفسك وطوالي مشيت خليتو!
اتصلت على ناس جمانه وصفو لي مكانهم، طبعا ماف وحده سألتني عن شي لأني ملامح وشي كانت جااااده شديد و ظاهر علي ما متحمله اي سؤال! غفران قالت لي قررنا نمشي..... قاطعتها وقلت ليها جايه اقول ليكم امشوا انتوا انا ما بقدر، راجعه البيت.... قلت ليهم كدا ومشيت البيت طوالي!
بعدها مروا يومين على الكلام دا وانا في كل مره بكون مترقبه لإنو امي تجيني داخله في أي لحظه وتسألني الحصل شنو بيني وبين خليل، ليه فسختوا الخطوبه بس ما حصل، حتى جويريه وخالتو سميره لمن يتصلوا علي أو يرسلوا لي ما بجيبوا لي سيرة الموضوع، و دا معناهو انو خليل ما كلمهم، عن نفسي ما قادره اتكلم، خليهو يكلمهم هو.
________________________
_ يعني خلاص الموضوع دا طرشق؟
= ما عارف
_ ياخ مش قلت رجعت ليك الخاتم، معناها طرشق جد جد
= لكن هي للآن ما كلمت زول وإلا الكلام كان وصلني بخصوص الموضوع دا!
_ يمكن منتظراك انت تتكلم
= وانا عمري ما ح اتكلم، هي العايزه الموضوع يطرشق معناها تتكلم بخشمها
_ اووووو شكلك وقعت وما سميت يا ابو الشباب!
= وقوع شنو ياااااخ معقوله تقول كدا وانت صحبي!
_ شايفك متمسك فيها وليك يومين زعلان وبتتزهج في الموظفين! 🤣
= انا ما متمسك فيها لشخصها، انت عارف السبب!
_ كان ممكن تشوف غيرها بس وتعرسها وتاخد قطعة الأرض و تبدأ مشروعك وخلاص!
= ما عايز ابدا من الصفر، صدقني ما عندي أخلاق اقعد اشرح لكل بت شروطي وارجع تاني اهز وألز لبت جديده! الحاجه دي طلعت مرهقه شديد!
_ في دي صدقت وانا خير دليل، العندي دي بكايه وشكايه وجنها نكد و تحقيقات، مشيت وين وهسي وين وقاعد مع منو وبتعمل في شنو وليه ما رديت علي قبل ما ارسل ليك وحاجات كدا مرهقه شديد 😂💔
= انت ذكرت كل الحاجات الأنا بكرها ومااا بطيقها! والبت دي هي الوحيده الوافقت على شروطي!
_يمكن وافقت عليها عشان شافتها شروط وهميه ساي، يعني كيف تقول لوحده اي زول يكون في حالو وانت عايز تنجب منها أطفال! 🤣🤣 شفت التناقض دا كيف!
= ياخ انتوا ليه ما عايزين تفهموا! ليه محسسني انو كل الأزواج ديل عايشين قصص حب! كلهم عايشين حياه زوجيه عاديه، و دا الحيحصل معانا بشرط انو كل الحاجات الإنت ذكرتها فوق دي تكون مااا موجوده! الما منطقي في دا شنو يعني؟
_ والله يا زولي دي حاجه صعبه، والبنات ديل ما بقدروا يعيشوا بدون نكد وتحقيقات.... وانت على كل الأحوال البت ضاعت منك!
= بما انها لسه ما كلمت زول، معناها لسه في امل..... ياخ انا نفسي اخلص من دا كلو بسرعه، لو علي أعقد الجمعه الجايه دي و خلاص!
_ اسمعني لو وصلتو لطريق مسدود ولقيت انها ما بتنفع معاك لزها لي جاي.........لا لا دي شنو النظرات دي يا صحبي 🤣🤣 ما تفهمني غلط ما ح ألعب بيها، ح أعرسها لأنها عجبتني، شفتها يوم خطوبتك و.......
هنا خليل ما خلاهو يتم كلامو، طوالي ضربو على وشو ومسكو من لياقة القميص وقال ليهو مجنون انت، دا شنو البتقول فيهو دا!
صحبو قعد يضحك وقال ليهو اقسم بالله يا خليل بهظر معاك، عايز اشوف ردة فعلك، و ياهو شفتها، طلعت متمسك فيها هي لشخصها لكن نااااكر وانا عارف لأنو قدامك بدائل وحلول غيرها بس انت متقصد تضيق النطاق واقفل عليها هي وبعد دا كلو ما معترف 😂
_________________________
مروا أيام فوق اليومين دي وماف زول جاب طاري الموضوع دا، وهو من اليوم داك تاني لا اتصل لا رسل حتى في الميديا ما منزل شي، ما مراقباهو بس عرفت، المهم يوم اتصلت علي جويريه قالت لي ما تنسي مناقشتي بعد بكرا، لاااازم تجي، قلت ليها ان شاء الله، قالت لي كلمي ناس بيتكم، امي ذاتا عازماكم، قلت ليها اي اتصلت كلمت امي! قلت لي ما تمشيني سااااي تجي فاهمه ولا لا؟ قلت ليها حاضر حاضر ح اجي ان شاء الله 😂
أمي لمن كلمتها قالت لي اي سميره كلمتني، امشي انتي ومرام، مرام قالت لي والله نفسي امشي لكن بعد دا الإمتحانات قربت ونحنا شغالين دروس مكثفه ما بقدر اغيب عنها، مآب قالت لي انا بمشي معاك، قلت ليها خلاص يا زوله خليك جاهزه بس.
أمي قالت لي ما تنسي امشي ل الاء، بعد دا ح تبدأ حبستها، قلت ليها بمشي ليها بكرا، قالت لي ما تبقي كعيبه انتي كمان، بيت خالتك دا ليك كم منو؟ الواحد كمان ما يبقى قاطع رحم للدرجه دي! إذا خالتك اتعدلت ورجعت انتي مالك؟
قلت ليها خلاص ماااشه ماااشه!
مشيت استحميت وصليت العصر، لبست لي عبايه ومشيت ناس خالتي، اول ما دخلت حسيت انو لي سنوات من البيت دا!.... كأنو مهجور! زمان اول ما ادخل بلقى أحمد يا طالع يا داخل يا قاعد جنب الباب، هسي أحمد ماف والبيت بقى زي الخلا!
لمن دخلت لجوه سامعه خالتي بتتكلم وكانت بتقول اختكن دي حيرتني معاها!! البت إلا كان ممسوسه أو طاقاها عين، هسي دي حالة واحده ماشه على عرس! بتسوي في نفسها كدا مالا!؟.... لمى قالت ليها يمكن متشاكله مع وائل يا أمي؟!.... وكان متشاكله معاهو بتسوي كدا؟ انا سألتها مية مره لو في شي اتكلمي، لو في شي اتكلمي وكل مره بتقول لي ماف شي وهسي تجي تقول ما دايره تتحبس! مالا كان جنت تكلمنا!
رجعت وعملت صوت من برا وبقيت انادي واقول يا خالتي يا خالتي..... قالت لي مرحب مرحب نحنا هنا، دخلت ليهم جوه لقيتها قاعده مع بناتها لمى و ولاء لمن سلمت عليهم ولاء قالت لي ايييييك انتي بيتنا دا ليك كم ما دخلتيهو؟! لمى قالت لي عليك الله لمن كنتِ جاياني ما ضعتي؟ عرفتي البيت كيف!
قلت ليهم هيييي خلوا الاستهبال 😂 على أساس انتوا قاعدين تجونا يعني؟
خالتي قالت لي انا يومين في بيتكم، لمى قالت لي أنا ذاااتي لكن لمن اجي انتي بتكوني في الجامعه!
قلت ليها خلاص معليييش، اها الاء وين؟
خالتي قالت لي في الغرفه ديك، عليك الله ادخلي اتكلمي معاها، تعبتني البت دي! قلت ليها ليه مالا؟ قالت لي قالت ما دايره تتحبس و دائما صاره وشها ومبشتنه!
مشيت دقيت ليها الباب بس ما فتحت، بتردد قلت ليها الاء دي انا!
بعد شويه جات فتحت لي الباب، دخلت وقفلت الباب وراي، قلت ليها في شنو مالك؟
قالت لي مالي؟
قلت ليها قال ما عايزه تتحبسي؟ قالت لي اي سااااي كدا، قلت ليها عايني مش انتي و وائل بديتو صفحه جديده؟
قالت لي القال ليك منو الموضوع متعلق ب وائل؟ ليه طوالي كدا جريتي عليهو؟
وقفت على حيلي وقلت ليها غلطانه انا، آسفه على الإزعاج، قالت لي هسي انا قلت ليك شنو!.... قالتها بزهج كدا وكان واضح عليها انها متوتره وقافله معاها و حالتها ما تمام!
بقيت واقفه بعاين ليها وهي بتحاول ما تخت عيونها في عيوني لحد ما في الآخر دموعها جات نازله!
قعدت جنبها، مسحت دموعها وقالت ليها ياااا بت المبكيك شنو؟.... اتكلمي انتي عشان لو في شي الناس تلقى ليك حل!
بقت تبكي بس وانا احترت فيها، قلت معقوله تكون اتشاكلت مع وائل؟ طبعاً نهاي ما سألتها السؤال دا وما جبت ليها سيرتو، قلت ليها إذا البكى ح يريحك ابكي طيب بعدها نتفاهم، مسحت دموعها وقالت لي انا ما عايزه افارق امي!..... طبعاً اتحيرت!
النفسنه والبكى دا كلو عشان بس ما عايزه تفارق امها! ح تفارقها تمشي وين يعني ما هداك بيت وائل!!
قلت ليها يعني هسي ما عايزه تتحبسي عشان دا بس!
قالت لي أحمد مشى خلانا، ما نفسي امشي انا كمان واخليهم!
قلت ليها اخوك مشى يشتغل زيو وزي اي راجل، وانتي ما ماشه بعيد، بيت ناس خالتو سميه دا بتمشي بالرجلين لمعلوماتك، قالت لي لا، وائل قال ح نسافر طوالي.
سكت مسافه بعدها قلت ليها وخالتو سميه؟ يعني ح تمشوا و تجوا راجعين و..... قاطعتني وقالت لي لا ح نستقر هناك!
تاني ما عرفت اقول ليها شنو!.... بعد شويه تلفونها رن، المتصل كان وائل، خاته قلب قدام اسمو، طوالي شالت التلفون وقفت على حيلها و وقفت قدام الشباك.... بقت تقول ليهو ما تقول لي حبيبتي مش عايز تبعدني عن اهلي..... طبعاً بقت تبكي ليهو وهو أظن بحنس فيها، في الآخر قالت ليهو عارفه لكن لو بتحبني بالجد ما ح تخليني ابكي البكى دا كلو!.....تاني اتكلمت معاهو شويه وجات قعدت جنبي و ختت التلفون، وتااااني اتصل عليها، المره دي ما ردت، ما عارفه بس حسيت انها ما عايزه ترد عشان انا قاعده معاها! بس قبل شويه ردت عادي و شغاله ليهو حبيبتك وما حبيبتك قدامي عادي ف ليه هسي ما عايزه ترد! قلت ليها اخدي راحتك ح اطلع اشوف خالتي لو عايزه مساعده في حاجه.... قلت ليها كدا و طلعت منها، خالتي قالت لي اها ما قالت ليك شي، قلت ليها بتبكي عشان ما عايزه تفارقكم، قالت لي عليك الله شووووف البت دي، تفارقنا تمشي وين، هداك ليهو بيت سميه لو كوركت ليها هسي بتسمعني!.... قلت ليها يعني هي ما كلمتكم انهم ح يستقروا برا السودان!؟
قالت لي برررري والله! كيف يعني يستقروا هناك، الهبله دي ما قالت لي! تبكي ساي لكن خشمها ما فتحتو.... كدي النمشي ليها ليه ما كلمتنا!.... خالتي مشت ليها وانا طلعت برا المظله قعدت مع لمى و ولاء، ولاء كانت بتتكلم بالتلفون وبتقول والله كويسين الحمد لله..... الاء كويسه.... لا لا ما قالت لينا شي.... هسي معاها كانت معاها ما عارفه قالت ليها حاجه ولالا...... اي جاتنا قبل شويه!..... قاعده.
طبعاً كانت بتتكلم و بتعاين لي وانا متوتره، لمن قالت ليهو دقيقه اديك امي اتأكدت اكتر انو دا أحمد، طوالي مشت جوه لأمها، لمن رفعت راسي لقيت لمى بتعاين لي، قالت لي مالك اتجمدتي، قلت ليها لا لا ماف شي!
خالتي جات طالعه بالتلفون وبقت تتكلم معاهو، ما عارفه بس خفت تمد لي التلفون، قلت ل لمى بجيكم بعد شويه، وقفت على حيلي واشرت لخالتي نظام ماشه وجايه وطوالي مشيت.....
______________________
أحيانا لمن نحاول نعالج غلط صغير بتلقى نفسنا وقعنا في غلط أكبر وعالجنا الغلط بغلط أكبر مني، ب بتلقي نفسك واقف في النص لا قادر تتراجع لا قادر تواصل، لا عندك شجاعه تنهي الحاصل دا كلو و تغادر لا عندك شغف تكمل بيهو البديتو!
والأشد إيلاماً لمن تكون انت صاحب الجرح و المسببو لنفسك!
بس انا اعمل شنو! إذا أنا انظلمت بت الناس دي ذنبها شنو! وهي ما عارفه، يمكن لو كانت عارفه كانت ح تخفف احساسي بالذنب تجاها، كانت ح تفهمني و تعرف اني ما قادر استقبل مشاعرها و اهتمامها لأنو في غيرها جوه قلبي! يمكن كانت براها نهت الحاصل دا و ريحتني من عذاب الضمير و طلعتني من المتاها دي!.... انا مقدر مشاعر الاء وشايف وعارف اني باذله وساعيه تودي العلاقه دي لقدام و اتحملت كتير مني و صابره على برودي احيانا وعدم تجاوبي معاها! مع ذلك ما كلت وما ملت و دا الزايد علي عذاب الضمير، انا حرفياً بقيت زي الدكتور اجرح و أداوي!
احيانا لمن احس نفسي زعلتها شديد واني عملت تصرف ما كان مفروض اعملو بعتذر منها وبحاول أصلح غلطي وأول ما تقبل اعتذاري وتعشم اكتر وتميل علي بلقى نفسي نافر منها! و دا بقى شكل حياتنا! يوم زعل، يوم اعتذار، يوم لوم، يوم تراضي و كل يوم عذاب ضمير!
اخليها؟
بعد وصلتها للمرحله دي اجي اقول ليها ما عايزك؟ ما عايزها وانا البراي عقدت عليها و دخلتها في الدوامه دي!.... هي لو ما كانت بت حلال ما كان اتحملتني و عذرتني!
مرات بتمنى لو هي تعرف، لو عرفت متأكد انها ما ح ترضاها لنفسها وما ح ترضاها لي أعرس واحده ما حابيها!
بس انا ما بقدر اقول ليها لكن وعدت!.... وعدت منو؟.... وعدت نفس الإنسانه السبب في دا كلو! الواجعني اكتر اني مع ذلك ما قادر اخلف بوعدي ليها!
وعدها اليمكن ينشاف بسيط دا بالنسبه لي كأنها امنتني على روحها!.... ما عايزه زول يعرف وانا وعدت ما اتكلم وانا عندي وعدي!.... وما عارف ليه اصلا أوفي بوعدي لوحده غدرتني وما اوفقت بأي وعد!.... ليه الإنسان بكون وفي لمن لا يقدر الوفاء! ليه ما قادر اعمل زيها؟ ليه ما قادر اقول دي مشكلتها وما بهمني لو أهلها عرفوا أو لا؟ ليه ما قادر اجرحها زي ما جرحتني جرح عميق!
انا بقيت ما قادر استوعب شي، ما قادر ابكي على نفسي ولا على الاء، وكل مره مضطر اتصل عليها و أراضيها!
بسبب آخر تصرف مني اتصلت عليها قبل شويه، في المره الأولى قفلت الخط في وشي، قلت ليها حق تزعل، رجعت اتصلت عليها تاني، ردت علي و اعتذرت منها وقلت ليها تبريرات و أعذار واهيه ما عارف كيف هي بتقتنع بيهم! قالت لي تمام وقفلت الخط! واضح انها وصلت الحد مني وانا بعد دا ما قادر ابذل جهد اكتر وما عارف زاتو اكتر من كدا اعمل شنو!!
______________________
يوم مناقشة جويريه، مآب اختي من بدري جهزت نفسها، كانت متحمسه شديد، طبعاً مجهزين الهدايا، امي قالت لي ما تتأخروا عشان الليله ح نقيل مع ناس خالتك، لمن ترجعوا طوالي تعالوا بهناك، قلت ليها كويس..... سقت معاي مآب و مشينا جامعة ناس جويريه، لمن دخلنا لاقينا ناس خالتو سميره، كانت بس هي و بناتها و أطفال بناتها و خالتهم واحده، اتخيلت يكون معاهم اكتر من نفر، خالتو سميره انبسطت شديد ب جيتي، جويريه كانت مع صحباتها لمن شافتني جات سلمت علي و عرفتني على صحباتها، الزمن داك المناقشه لسه ما بدت، طبعاً ما شفت خليل، قلت يمكن ما جا معاهم، بعد شويه تلفوني رن والرقم كان غريب، خليت مآب مع ناس خالتو سميره وطلعت وقفت جنب المبنى و رديت بس ما جاني صوت، قلت ليهو منو معاي؟
برضو ما كان في رد، لمن قفلت الخط تاني اتصل علي، رديت بس ماااف رد!... قلت ليهو يااااخ انت منو!... ما رد علي، طوالي قفلت الخط وتاني اتصل، رديت عليهو بزهج وقلت ليهو منو انت ياااااخ ما تكرهني اتكلم منو انت، قفلت الخط وحظرت الرقم، وأول ما إتلفت وراي لقيت خليل قدامي!!
طبعاً حسيت كأنو لي سنوات ما شفتو، قلت ليهو دا انت صاح! بتتصل من رقم غريب مالك؟
قلع النظاره وقال لي انا ما اتصلت عليك، وماف شي يخليني اتصل عليك برقم غريب وبعدين ليه اتصل عليك وانتي واقفه قدامي!
في نفسي قلت معناها دا أحمد!... بقيت افكر بيني وبين نفسي، قطع تفكيري صوتو وهو بقول لي في زول زاعجك؟
قلت ليهو ايوه.... انت!
قلت ليهو كدا و دخلت جوه خليتو، بعدها بدت المناقشه، و جويريه دخلت ناقشة مع قروبها، احتفلنا معاها و اتصورنا، قالت لي ما تمشي انتظرينا نرجع سوا، ف بقينا قاعدين و هي عامله فعاليات مع صحباتها و دفعتها، نادتني بس قلت ليها اتصوروا انتوا ف بقت حايمه في الجامعه مع صحباتها يتصوروا في كل مكان و تريندات وحركات..... بعد شويه كدا خالتو سميره قالت لي خليل وين؟
قلت ليها ما عارفاهو، قالت لي ما يكون مشى كدي امشي شوفيهو لي! قربت اقول ليها اتصلي عليهو بس سكت، طلعت برا اشوفو ليها، ما لمحت، مشيت بوابة الجامعه ولمن طلعت برا لمحت جويريه واقفه قصاد عربيه مظلله و كان ظاهر عليها كأنها بتتشاكل!.... إتلفت بس ما شفت خليل، وانا ماشه عليها، شايفه يد اتمدت من داخل العربيه مسكت جويريه من يدها وهي بقت تحاول تتفك منو والكلام دا كلو جنب الظلط مشيت عليها بسرعه ولمن كنت عايزه اقطع الظلط هي جرت يدها منو بسرعه و رجعت ورا على الظلط وكانت ح تجري بس فجأه كدا جات عربيه ضربتها و وقعت قدامي!.... انا من الخلعه ما قدرت اصرخ! دمها سال و وصل رجليني وانا بس برجف!
أصعب شعور الوقوف في المنتصف، أن تكون المشاعر معلقة، لا هي باقية ولا هي ذاهبة، لا هي قريبة بما يكفي لتطمئن، ولا بعيدة بما يكفي لتنسى، وهذه المنطقة هي التي تستهلك القلب أكثر من أي وجع آخر.
يتبع....
الفصل العشرون من هنا