رواية تزوجت عاشقة فجعلتني أعشقها ج2 الفصل الخامس عشر 15 والأخير بقلم عائشة البشير


رواية تزوجت عاشقة فجعلتني أعشقها ج2 الفصل الخامس عشر 15 والأخير بقلم عائشة البشير



السلام عليكم ورحمة الله وبركاته 
اللهم صل وسلم وبارك على سيدنا محمد


خالد، بصدمه😮: يعني أنتي حق مانحلمش أني؟؟

فرح بعدت شويه، وبإبتسامة☺: شوفني أهو قدامك، لا ماتحلمش ياعمري

خالد جبدتها في حضني، وإنهرت بالبكي😭، حالتي وقتها لاتوصف كل المشاعر تلخطت عليا، حزن وفرح، قهر وحسره، سعاده وتعاسه، ضحك وبكي، 
معاش عرفت نبكي ونحزن على رفيقي اللي راح😢
 ولا نفرح ونضحك على فرح اللي ردتلي☺، كيف بنقوللها كيف بنوصلها الخبر، كيف راح يكون موقفها😓، ياربي ليش مافيش مره فرحتي تكمل😔

فرح إستغربت😮 من بكي خالد وإنهياره وهوا حاضني، حسيته زودها شويه في ردة فعله، معقوله هذا كله على خاطري، سحبت روحي منه، وقعدت نشوفله بتعجب🤔: خالد خيرك ليش هالدراما هذي كلها، ماتوقعتش ردة فعلك هكي راك أوفرتها بصراحه😅

خالد ماقدرتش نشوف لعيونها ولا نقيم رأسي ليها، بس لازم تتكلم ياخالد، راح تسمع توا ولابعدين الأحسن تسمع منك أنت أحسن، بحزن😔: فرح تعالي نقعمزو في الجنان شويه

فرح هزيت رأسي ومشيت وراء خالد وأني مستغربه في حركاته وحالته واضح مش طبيعي وفيه شي، يارب إن شاءالله خير، معاش عندي طاقه نتحمل أي شي، تكلمت بسرعه وخوف😟: خالد شني فيه تكلم بسرعه باللهي عليك

"" أيها الحزن....
رفقاً بقلوبنا فهي لم تعد تحتمل أكثر ""

خالد خليتها تقعمز وجبدت كرسي وقعمزت قدامها  وشديت إيديها، وبحزن😞: الموت حق علينا كلنا ياروحي، والبقاء لله وحده، واللي وسكتت لما قصت عليا فرح😔

فرح بخوف😟: شني هالمقدمه ياخالد تكلم بسرعه قولي في مني !! ونزلو دموعي😢

خالد قويني وقويها ياربي، وبدموع😢: في ماضيك ورفيقي يافرح

فرح زفرت براحه لما ماقالش واحد من أهلي، بس شني قصده بماضيك !! وتجمدت لما قال رفيقي، برجاء🥺: لا ياخالد باللهي ماتقولهاش، ورأس أمك وبوك ماتقولها

خالد، بدموع😢: البقاء لله ياروحي

فرح نزلت من الكرسي زحف وقعمزت قدام خالد، وبرجاء: باللهي ياخالد قول أي حد ثاني باللهي ياخالد قول أي حد أي حد إلا هوا ورأسك، ماتكسرنيش فيه ياربي😭

خالد نزلت لمستواها وخذيتها في حضني، وبدموع: كسرتنا وحده يافرحته

فرح وقتها بس حسيت أنه وليد هوا قلبي فعلا، وهذا وين إنكسرت كسر صعب جبره، الموت حاره وبالأخص لما يكون هالشخص هو أول أسباب فرحك في هالحياة، عيطت بقهر وحسره: لا ياربي لا ليش هو ليش

خالد لا عرفت نصبر فرح ولا نصبر روحي، خليت فرح اللي مقعمزه تندب وتعيط، ووقفت لما طلعو أهلي يتجارو لما سمعو العياط، ومديت أيدي قدام أمي لما قدمت لفرح، بدموع: خلوها ماحد يقربها

عمران، بخوف: شني صار خيركم شني جاكم؟؟

زاهيه، بخوف: تكلم ياولدي في مني هالمصيبه تكلم !!

خيري، بصدمه من حالة فرح اللي تخبط وتعيط: إن شاءالله غير مش في حد من أهلها

خالد إتكيت على الحيط ونزلو دموعي، شني بنجاوبهم !! شني بنقول !! كيف بنبرر هالموقف !! غلطت وتسرعت وقتلها المفروض روحت بيها وحكيتلها في حوشنا أقل شي ماحدش راح يشوفها بهالشكل، بس حالة الحزن اللي أني كنت فيها ماكنتش تسمحلي نفكر في شي وقلت وهذا اللي صار  

مانعرفش كم إستمرينا على هالوضع فرح اللي تعيط وحالتها تصعب على الكافر، ولا أهلي اللي مابطلوش أسئلة، ولا أني وحزني وحيرتي على الموقف اللي إنحطيت فيه، لحد ماعيطت أمي

زاهيه، بعياط: ألحقوني المرأه بتموت

خالد نضت بسرعه لفرح اللي معاش قادره تتنفس، قمتها في غمري وطرت بسرعه مخلي وراى أهلي اللي بتأكلهم الحيره من الموقف اللي صار

مرت ليلة مظلمه وكئيبه وطويله عليا فقدت فيها شخص من أعز الناس على قلبي، وليد ماكانش بس صاحبي كانت أعز حتي من خوتي هو الوحيد اللي وقف معاي في الوقت اللي حتي أهلى وقفو ضدي، جرحي كبير وكسرتي أكبر من فقدت وليد، ولا من منظر فرح اللي كل ماتفيق تعيط وتنهار أكثر ويطرو يعطوها إبرة مهدئ😔💔

ثاني يوم

خالد خليت فرح راقده بعد ماعطوها أبرة مهدئ، وطلعت ماشي للجنازة، ماكانش فيه هلبا ناس أشخاص معدودين، محرها وقت تنزل غاليك وتحطه في هذيكا الحفره وبإيدك تحط التراب عليه وانت عارف انك خلاص معاش بتشوفه ولا مازال راح تسمع صوته 

خالد تمت الجنازة وإستأذنت منهم ورجعت لفرح في العياده، أول ماخشيت شفت فرح مقعمزه على السرير وتبكي بهدوء😭

فرح، ببكي: دفنتوه خلاص، حطيتو عليه التراب، كيف طاوعكم قلبكم هكي إديرو فيه😭

خالد قربت وخديتها في حضني، بدموع😢: البقاء لله، سلامتك أنتي ياروحي، وحدي الله يافرح هذا حد يومه، هو تعذب وتحمل وقعد ساكت، أدعيله ربي يتقبله برحمته

فرح، بإنهيار: معناها كان عارف انه بيموت عارف أنه أيامه معدودات في هالدنيا ياخالد

أصلا بروحي أستغربت كيف يتخلي عليا هكي حتي بعد ما رجع وشافني، ماكانش يبي يعلقني فيه أكثر وهو عارف روحه مفارق، ضحي بروحه على خاطر مايبكينيش ويقهرني عليه، ليش دار هكي ليش،

عادي كنت راضيه يخذلني ويكسر قلبي مليون مره بس مايموتش، علاش ياربي تأخذه هو قاعد صغير، ليش تكسرني فيه
آآآآآآه ياقلبي آآآآآآه 💔😭

توقعتها ماتصير لكن صارت
عزيز يندفن روحه على توارت 

نحساب أن والله مايعزوني
ومانحسب نا تنزل دموع عيوني
لا كأينه في البال ناس يجوني
يقولو غلاك اليوم روحه طارت
توقعتها ماتصير لكن صارت
عزيز يندفن روحه على توارت 

نحساب أنا والله مانجربها
فقدت عزيز ودمعتي نسكبها
ومانحساب نار الفقد نا نقربها 
لكن الله غالب الموت إختارت 
توقعتها ماتصير لكن صارت
عزيز يندفن روحه على توارت 

زاهيه، بخوف: فرح وينها ياخالد !! كيف حالها؟ فهمنا شني اللي صارلها ؟؟ من إمبارح وأني نتصل بيك نبي نطمن عليها تليفونك مقفل

خالد، بحزن: فرح كويسه ياأمي باللهي اللي صار إمبارح مايطلع لحد ويقعد بينا، أحني الليله طالعين لمصر نبو نرتاحو شويه

عمران بغضب: تي فهمنا شني اللي صاير !! كيف فجأة هكي تقول طالع لمصر

خالد، بحزن: ورأسك يابوي راهو حيلي منهد وماعندي جهد إناقش ولا نجادل حد، أني ومرتي مسافرين نبو نرتاحو شويه ونغيرو جو شني صار يعني، ووقفت، هيا بسلامتكم توا

زاهيه، تنهدت بأسف: توصلو بالسلامة ياوليدي

عمران، بغضب: عاجبك تصرفاته هالولد بيجلطني باللي يدير فيه، الصبر ياربي الصبر

خيري خش ومستغرب: خيره خالد طالع ومايشبح في حد قدامه نكلم فيه ومايردش 

عمران: خوك هذا هبل خلاص دماغه هرب مسكين

خيري قعمز وتنهد: قبل بنقوله على صاحبه وليد ياناري توفي أشبح سمع بيه ولا لا

عمران،بإستغراب: لا حول ولا قوة الا بالله إنا لله وإنا اليه راجعون، خيره شني سبب الوفاة

خيري، بحزن: قالو عنده المرض في الدماغ( اللهم ماعافينا وإياكم )

خالد سافرنا لمصر في نفس الليله كل همي كان نبعد فرح من أهنايا فتره لين تهدأ وتتحسن نفسيتها شويه وتتقبل الصدمه مانبيش حد يشك في إنهيارها أو يعرف و يفهم شي وتكثر الدوه ونخسر كل شي قاعد نحارب على خاطره الفتره اللي فاتت كلها

فرح قعدت إسبوع وأني حالتي كل يوم في الزايد دموعي ماوقفوش نهائي حتي وأني راقده نحلم بيه وإنوض مفزوعه ودموعي على خدي، قعدت باليومين والثلاثه مانطقتش حرف ولا ناكل ولا نشرب، لدرجة أهلي ماقدرتش نكملهم كان خالد يبعتلهم في رسايل على أساس أني ويقوللهم أنه سعر المكالمات غاليه أهنايا

واجعني خالد اللي تعذب معاي وماسبينيش ولا لحظه، بس الحاله اللي أني فيها مش بإيدي، الموت أعظم مصيبه ممكن تصيب المؤمن، وواعره هلبا تفقد جزء من روحك، شعور الفقد واعر هلبا ماحدش راح يفهمني أو يحس بيا إلا اللي جرب هالشعور

خالد لما يأست من تحسن فرح إطريت نرفعها لدكتور أمراض نفسيه، والحمد لله من 5 جلسة بدي في تغير ملحوظ، اليوم سكرنا شهر في مصر وعمي بعتلي رسالة بأن عرس خوت فرح الأسبوع الجاي ولازم نروحو باش نحضرو العرس

خالد، بإبتسامه: ها ياروحي شن رأيك نحجزو غدوه

فرح ببرود: عادي على راحتك

خالد بإبتسامه: لا على راحتك أنتي ياقلبي، ماتبيش تحضري عرس خوتك

فرح : عادي كله زي بعضه نحضر ولا مانحضرش مافيش فرق

خالد تنهدت بقهر هذي حالة فرح صح تحسنت على لما جينا بس مرجعتش فرح الأولى💔

حجزت ثاني يوم ورجعنا يوم الأحد وفرح طلبت نحطها في حوش أهلها على طول
....
....
....
أمينه، بصدمه: معقولة!! هذا كله صار!! ماتقوليش خالد صبر عليك شهر ياناري

فرح: تي أي شهر، من لما تزوجنا وهو صابر، خالد ماقربش عليا بكل ياأمينه

أمينه😱: حيييييي من غير كذب !! معقوله قريب تسكرو سنة متزوجين راهو، كيف هكي ؟؟

فرح نزلت رأسي، بأسف: أني اللي مانبيش وهو ماغصبنيش على شي

أمينه بصدمه: كيف إديري هكي يافرح حرام عليك راهو، فاهمين أنك تحبي وليد بس خالد شن ذنبه تظلميه هكي، حتي ربي مايرضاش بيه اللي درتيه، راهو الملائكه قاعده تلعن فيك كل ثانيه

فرح خفت من كلام أمينه زعما حق يلحقني الذنب مني اللي درته في خالد، بخوف: أنتي شفتي على عينك ماأرتحتش بكل من حاجه لحاجه، كل مانقول خلاص ارتحت ونبي نقرب منه يصير شي يعرقل الموضوع 

أمينه: أسمعي يافرح والله لو واحد ثاني راهو لوحك قداش ليه مش ملزوم يتحمل نزواتك وانتي عايشه على أطلال الماضي
مهما كان متفهم في النهاية بكل هو راجل وليه حقوق عليك غلط اللي قاعده إديري فيه، 
راهو واضح من صبره عليك أنه يحبك هلبا وشاريك ومش مفرط فيك حتى بعد كل اللي صار، ياريت ماتخسريشي باأنانيتك يافرح وبعدين الحي أبقى من الميت و وليد مات خلاص ،  
أني مش راح نقولك أنسيه أو طلعيه من قلبك بس حاولي أعطي لروحك ولخالد فرصه أنكم تعيشو وترتاحو، مافيش حد يموت على حد يافرح، صدقيني حياتك محتاجه خطوه واحده منك بس وشوية قوه تتغلبي بيها على الضعف والإنهزام اللي داخلك وتوا تشوفي كيف يتحسن كل شي وقتها وتقولي أمينه قالت،
 وقفت وهيا تقول :أرتاحي توا أكيد تاعبه وفكري في كلامي كويس وبعدين نزيدو نحكو 
..
..
..
فرح فعلا كنت تعبانه بس ماقدرتش نغفي لحظه وكلام أمينه قاعد يدور في عقلي، أني من أول يوم مع خالد وأني حاسه بالذنب إتجاهه بس كل مره نحاول نصلح اللي بينا يصير شي ويخرب علينا، 
فعلا خالد مايتعوضش فكرة أني نفقده أو يتخلى عليا في يوم من الأيام تخوفني وتخلى جسمي يرجف، يارب قدرني ونقدر نتخطي هالحاجز اللي داخلي
..
..
..
..

بعد مرور ثلاثة سنوات

خالد مر وقت طويل وتغيرت فيه هلبا حاجات

( خلود وعماد )
عماد دار العمليه وتعب هلبا وقضي فترة علاج طبيعي طويله هلبا ومتعبه، بس اللي كان مهون عليه وجود خلود في حياته كانت سانداته وتدعم فيه ديمه ومافيش مره شكت أو قالت تعبت أو مليت
وبفضل الله اولا والزوجه الصالحه الداعمه ليه رجع عماد يمشي على رجليه من اول وجديد  ،
 وحياته هو وخلود من أحسن مايكون وجابو ولد زي العسل عمره 4شهور توا
عماد مثال للراجل المناسب اللي تتمناه كل أنثي حنون ومتفهم ومتواضع ومتصالح مع الكل واهمهم مع نفسه 

وخلود مثال للمرأة الأصيله اللي وقفت في ظهر زوجها وسنداته وحاولت على قد ماتقدر أنها تكون قوته في ضعفه 
..
..
..
( خوله وأسامه )
خوله حرجت مره وإثنين وثلاثه بس كل مره بوي يرجعها بحجة أنه مافيش سبب كافي يخليها تحرج 
وهيا بسبب كبريائها وكرامتها ماقدرتش تحكي السبب الأساسي وتشمت فيها حد أو تشوف نظرة التعاطف مع حالتها في عيونهم، 
إتحملت وصبرت خوفا من بوي ومن صورتها قدام الكل ومن نظرة المجتمع للمطلقة وفي أغلب الأحيان نجحت أنها ثمتل قدام الكل دور المرأه السعيده والمتهنيه في حياتها
بس الفتره الأخيرة تقول أنه أسامه قاعد يتغير للأفضل بالأخص بعد زادت عليهم بنت وسموها نور وعمرها سنه
أسامه من الأشخاص المتشددين عقليا يميل للعنف في أغلب الأحيان مايحبش يوري لحد ضعفه وإستسلامه ديمه يحاول يتصنع القوة والجبروت بس أكيد لابد أنه يلين شويه مع المواقف والعشره
خوله إنسانه مغروره ومتسلطه بنوعها بس بعد زواجها من أسامه إطرت أنها تتنازل عن هلبا حاجات وأولها شخصيتها المتكبره وصبرت وتحملت أو خلينا نقولو تعودت وتحاول تتعايش مع الواقع اللي إنفرض عليها أو خلينا نقولو مشتله بموافقتها 
..
..
..
( خليل ومنال )

خليل من النوعيه الهاديه وهذا اللي مخلي زواجه من منال مستمر لهالحظه متحملها رغم كل اللي صار ورغم حقدها وأنانيتها ، وزاد عليهم ولد ثاني، توا عندهم قصي وعدي
..
..
..

( خليل )

شخص فكاهي من الدرجه الأولي ومش إمدير حساب للدنيا، عايش كل يوم بيومه، من فتره خطب ندى أخت وليد الله يرحمه، شافها مره وعجباته وتقدملها، بس بوي قاعد مايبيش يزوجه، على كلامه لين يدير عقله في رأسه 😅
.
.
.
.
.
.

فرح

( سالم ورغد )

علاقتهم جباره بصراحه رغم كل اللي صار معاهم واللي عاشوه وحرمانهم من بعض سنين طويله، وأخيرا أجتمعو في بيت واحد وبالحلال، وعندهم زوز بنات سجي وساجده 

( عامر وسناء )

عايشيين حياتهم ومرتاحين ومتهنيين وعامر فرحان بصغار سناء ويحبهم يمكن لو صغاره من دمه ولحمه مش راح يحبهم هكي، قصتهم إمتثال لقول الله (وعسي أن تكرهو شيئا وهو خيرا لكم)

( جلال وأميره )

جلال هالشخص المتسلط المشكاك وأخيرا هدي وألتزم بحوش وعيله، وأميره بنت جيرانا قدرت تجيبه للطريق، وعندهم ولد وبنت هبه وأحمد

( صالح وزينب )

أكثر واحدين قاعدين على حالهم وزينب قاعد تجري وماتدري على الصغار بس ربك قاعد مارزقهمش من غير شهد اللي عمرها توا 10 سنوات، ربي يرزقهم ويرزق كل محروم🤲
...
...
...

خالد بضيق: أكيد كلكم تسألو شن صار بيني أني وفرح، للأسف أطلقنا😔😔
.

فرح بغضب: يابارد😒 ليش تكذب معاش تفاول هالفال الباهي🤨

خالد: تي خليني نرعشهم شويه😂

فرح: ياسر أني اللي مرعشني بعمايلك ديمه😓 وحرمتني من العرس اليوم☹

اليوم عرس علاء ولد عمتي على هاجر بنت عمه سبحان الله ليهم أكثر من 4 سنوات مخطوبين وكل مايحددو موعد العرس يموت حد من أقاربهم ويطرو يأجلو، طبعا السيد خالد ماخلانيش نمشي للعرس🤨😏

خالد برفعة حاجب: لا محلاني ومخليك ماشيه لعرس واحد كان يبيك من قبل، هني روحك ياماما😒

فرح : تي كان نعرف مني إمقايلك بس أنه كان يبيني🤨

خالد: أني نعرف كل شي يخصك ياقلبي ياروحي أنتي🤤❤( طبعا عرفت انه علاء ولد عمتها اللي كان يبيها لما إذكرت عركتها هيا ووليد على خاطره من قبل)

فرح☺ خلاص بطل براده وانت كان بديت تتعسل شني مازال يسكتك،
خالد بتهديد: توا نوريك كان مازال سمعتي مني كلمه حلوه الحق فيا أصلا عودتك على.........
فرح قطعت عليه: باهي خلاص خلاص أني الغالطه و أنت الصح  غير تعالا خلينا نحكولهم شني اللي صار

خالد شافلها بنظرة إنتصار وقرب منها وهو يرقص في حواجبه وقال: نحكو ليش لا

Flashback 

فرح روحت مع خالد يوم السبت بعد كملنا عرس سالم وجلال، طول الطريق وكلام أمينه اللي قعدت طول الإسبوع تزن على رأسي بيه يتردد في دماغي

أمينه: أسمعيني يافرح والله أني لو مانعزك وحاسباتك زي واحده من خواتي وأعز، وتهمني مصلحتك ماكنت نكلمك ولا ندخل في حياتك من أساسه، 

- بس أنتي توا في نقطة فارقه في حياتك وفي وضعك هذا والضياع اللي عايشه فيه محتاجه لحد ينصحك ويوريك غلطك ويوجهك صح،

- حطي في عقلك أنه خالد في النهاية بكل إنسان زينا زيه وليه قدرة تحمل معينه وإلا مايجيه يوم ويمل ويفد من هالوضع اللي مافيش راجل يتحمله

- يعني معقولة بعد السنه اللي عشاتها معاه وكل شي داره على خاطرك ووقفته معاك في أكثر من موقف قاعده ماحبيتيش أو حتى معزه تشفعله عندك على الاقل

- لو قعدتي هكي من توا حطي في بالك رجعتك للحوش هذا مش مطوله وصدقيني هو يأخذ غيرك ولا يهتم بكل

-راهو خلاص الماضي راح ومعاش يرجع، ليش تظلمي في روحك وفي ولد الناس معاك، 

- أنسي يافرح ولاماتنسيش بس ديري روحك تتناسي،  أعطي فرصه لقلبك يتنفس من جديد، حرام إضيعي خالد من إيدك اللي زيه مستحيل يتعوض، شغلي دماغك وفكري بيه وخلي قلبك على جهة وبطلي هبال وحني على الراجل ياسره مسكين

خالد، بمزح: اللي واخذ عقلك😁

فرح، بإبتسامه😊: تتهني إن شاءالله 

خالد، بإستغراب🤔: أني قصدك؟؟

فرح، بإبتسامه😊: أي أنت ليش عيب ولا حرام ولا ممنوع مثلا نفكر فيك🤨

خالد، بفرحه: لا ياقلبي لا عيب ولا حرام ولا ممنوع ليش تتعصبي بس، مديت إيدي وشديت إيدها وبستها، وبحب: والله ياروحي متمني أنك ترجعيلي زي قبل تهدرزي وتضحكي وتبصري، والله حياتي مظلمه من غير ضحكتك

فرح:  بطل وأنتبه قدامك مازال مانبيش نموت ونخليك لغيري

خالد بفزع: بعيد السوء ياقلبي، وأطمني أني اللي مانبيش غيرك، ونموت قبلك لو إطر الأمر 
فرح ضغطت على إيده أكثر وأبتسمت: ربي مايحرمني منك
خالد مش عارف شني اللي صارلي وقتها بس أول مره نحس روحي طاير في السمي من مجرد كلمه

 معاش عرفت نفرح ولا كيف إندير، مش لاقي كلام يوصف اللي حسيته وقتها 

بس إبتسامتي مافارقتش وجهي وقعدت فرح تحكيلي في كل شي صار في العرس بالتفصيل وهيا متفاعلة ومتحمسه في الكلام وأني منتبه معاها بكل حواسي،
طول الطريق وفرح ماسكتتش وأني مركز معاها بكل مافيا ومش مصدق اللي قاعد نشوف فيه فرحان بيها وفي نفس الوقت خايف نطلع نحلم 

مش عارف كم مره نجينا من حادث وأني مش منتبه للطريق وعيوني عليها بس ومتمني الطريق ماتمش ولا هيا تسكت كنت لحضتها نتمني العمر كله تقعد تتكلم على قد مامشتاقلها، ممكن ساعات السعاده هاذم معاشتهمش من قبل ولا راح نعيش زيهم بكل

وأستمرينا على هالحال لين وصلنا 
ااااااه وأخيرا فرح وجهها يضحك من جديد😍
.
.
.
ويوم عن يوم بدت فرح ترجع لحالتها الطبيعية قبل وفاة وليد شويه شويه، وأني هذا حد السعاده عندي نشوفها مرتاحه و فرحانه يكفيني

خالد كنت مقعمز إندخن في الجنان، تلفت لفرح اللي واقفه في فم الباب وتنادي، وقفت وأني نتكلم بعصبيه: تي كيف تطلعي هكي خشي ألبسي حاجه الجو مصقع توا تمرضي

فرح، بإبتسامه: باهي تعالا شويه نبيك ولوح اللي في إيدك

خالد تنهدت بإنزعاج على إهمالها، وقدمت منها بسرعه، ودفيتها الداخل، وبعصبيه سكرت الباب: تي خشي ياهمي الجو مصقع، ماصدقت أمتي شديتي صحتك ورجعتي نشطي زي قبل علاش ماتهتميش بروحك قداش بنقعد في جرتك أني

فرح ليا  ايام من بعد ماروحنا وأني نفكر وإندور في سبب أو طريقه نقدر نقرب بيها منه وحسيت وقتها أنه هذي فرصتي ، قدمت من خالد وحضنته، وبدموع: ممكن معاش تعيط عليا وبعدين أني مانبيش نهتم بروحي نبيك أنت تهتم بيا

خالد معاش قدرت نتكلم لفيت إيديا عليها وحضنتها بقوة، وذبت مع الريحه اللي حاطتها 🤤أول مره نشمها عليها😍، إستاحشتها وكل عرق في جسمي قاعد ينبض يبيها، بس خايف تصدني زي كل مره هذا ليش مخليها هيا اللي تبادر

فرح لما خالد ماتكلمش حاولت نبعد، وبدموع😢: ماعجبكش كلامي ماتبيش تهتم بيا مليت مني

خالد مديت إيدي ومسحت دموعها، وبحب❤: ليش هالدموع ياعويناتي، مستحيل نمل منك ياقلبي، في حد عنده طفلة حلوه زيك ومايهتمش بيها😚

فرح، بحزن😔: باهي ليش تعيط وتعصب عليا

خالد بست على جبينها😘 وحضنتها من جديد، بحب❤: أسف ياقلبي بس والله كله لمصلحتك، معاش نبي نشوفك تعبانه أو مريضه ثاني 

فرح، بإبتسامه😊: باهي خلاص مادامه هكي سامحتك
خالد رجعت ضميتها: ياروحي على الحنين أني
فرح: لقيت فيلم حلو تعالا نحضروه مع بعض ممكن

خالد، بفرحه☺: أكيد ممكن ياروحي، هو أني نطول شي معاك ونقول لا
..
..
..
فرح كنا مقعمزين في الصالة ومنسجمين مع الفيلم لحد ماوصلت رسالة لتليفون خالد  بعد عليا وفتحها وإبتسم وسكر التليفون وحطه جنبه، بدي الفار يلعب في عبي😅

قربت أني وأتكيت على رجل خالد وشديت إيده وقعدت نلعب بيها، وبإبتسامة😊: مني باعتلك مسج في هالوقت

خالد هذي على شني ناويه الليله تصرفاتها غريبه كيف نقدر نقاومها، بحب❤: واحد معاي في العمل ياحبي

فرح زعما حقه ولا يكذب، بتوتر😟: خالد حبيت من قبل مافيش مره حكيتلي شي

خالد عادي ماأترش فيا السؤال🙂: يعني قصه قديمه وأنتهت من زمان مافيش داعي نحكي فيها

فرح، بخوف😧: يعني هيا مره واحده ولا هلبا😒

خالد هذي لشني تبي توصل بالضبط، بإبتسامه😊: هلبا ياقلبي، ولما شفت ملامحها اللي تغيرو للغضب، بضحكه😁: بس الهلبا هاذم كلهم أنتي حبيتك بمليون طريقه❤

فرح أبتسمت😊 على كلامه، زعما نسأل على التعليقه ولا لا، تي شني قاعده تقولي يافرح مش هكي المفروض تتصرفي، باهي كيف بندير إمالا🤔، قعمزت بسرعه وشديت لخالد أيديه الإثنين، بتوتر😟: ممكن نسأل سؤال؟

خالد مش طبيعيه رسمي ديمه لما تكون عند أهلها وتروح هذا حالها لين نشك أنهم بدلوهالي😅، تلفتت وقعمزت مقابلها، وبإبتسامة😊: تفضلي أسالي ياعمري

فرح، بتوتر: أنت تحبني أو لا؟ 🤦‍♀️ تي مش هكي ياهبله😅

خالد إمالا توا شني كنت إنقول أني😓، معليشي عاود ياخالد هما هكي يبو حد يسايرهم على قد عقلهم😁، بحب❤: نحبك هذي كلمة قديمه أني نعشقك، وقربت وبستها من خدها😘 بصراحه منظرها بالتوته الورديه اللي لابستها لايقاوم🤤

فرح، بتوتر😦: باهي ليش ماقربتش........وسكتت تحشمت ونزلت رأسي لوطه 

خالد هذي شني تقول شني تقصد؟؟ معقوله !! مديت إيدي ورفعتلها رأسها فوق، وبحب❤: روحي أنتي تبي هالشيء، متأكده؟؟

فرح، بخوف😟: علاش أنت ماتبيش؟؟

خالد، بفرحه☺: لا ياعمري أكيد نبي ونبي ونبي وهلبا مش شويه🤤، بس مانبيش نجبرك على شي😔

فرح، بإبتسامه😊: ومني قال أنك راح تجبرني؟؟

خالد قدمت وشديت وجهها بين إيديا، تصدقو عيوني دمعو من الفرحه🥺 تعبت هلبا على خاطر هاللحظه هذي، بفرحه☺: متأكده ياقلبي أنك راضيه❤

فرح إبتسمت وهزيت رأسي بالإيجاب😊

خالد حضنتها بحب ولهفه وشوق😍، بس بعدتها بسرعه، ونضت وقفت: خليك في مكانك ماتتحركيش 

فرح مديت أيدي وشديت أيده، بخوف😧: وين ماشي

خالد: بنطلع نعيط ونجي، لازم نفرغ من الطاقه اللي عندي شويه باش مانضركش🤤😉

فرح مسكت إيده: باللهي قعمز بلا هبال نخش نرقد راهو🤨

خالد رجعت في لمح البصر قعمزت قدامها، 🤤: وين ترقدي ياقلبي أني ماصدقت حنيتي عليا، معاش فيه نوم من الليله خلاص😘

فرح ضحكت بصوت عالى على ملامح وجهه اللي مستحيل حد يعرف يفسرها، فرحان ومش عارف كيف يتصرف، استغليت حالته وتحركت بسرعه وخديت تليفونه فضولي بيقتلني نبي نعرف مني اللي بعتله الرساله😁

خالد🤤: لا إلا الضحكه هذي، بتبدي اللعب شكلك وقربت وبستها بحب ولهفه💋 وحتي وهيا بين أيديا قاعد مش مصدق أنها خلاص بعد كل هالتعب ولت ليا❤❤

" دلوعتي💖
                خاصمتها😔
                            صالحتها 💋
لما بكت وتوسدت أحضاني😭💞
ألقت عليا القبض مشتاقا لها 😍
فتحولت عصبيتي لحناني😡💫😚
أن الرجال فوارسآ 😠🏇
لكنما لاسلطة تعلو على النسواني😌😏

عدنا🥰 
     عدنا نشاكسو بعضنا حتي الصباح😚💋
     عاد المزاح والمزاج كما يجب🙈😘
           خطفت بمكرِ هاتفي😌
            قفزت لصدري😍😘
        بدأ الحساب والتحري يامحب🤨😉

من هذه!!؟؟🤔
             صاحبتها!!😠
كم نمرة!!؟؟🤔
              ألغيتها!!😉
كم حلوة!!؟؟🤔
              في غيابنا غازلتها💔🥺
هيا أعترف ياحضرة السلطان🤨😠

أ أعد كم !!
أ أقول كم !!
فل أعترف مجموعة وتجمعو في واحده😍❤
هيا أنتي🥰
يادلوعتي❤
طيوبتي💖
محبوبتي😘
المتوقده🔥
المتجدده 😌
المتفرده😇
فتصافحت وجناتنا😘😘
وتهامست أنفسنا💋💋
أشهد لنا ياحبنا ❤❤
هيا😍 أو أنا😚
لا لن نضيع في الخصام ثواني💋😘

Now

فرح وهكي كانت أول ليله لينا❤❤

خالد أحلي ليلة في عمري والله❤، فعلا متعة الشي اللي تتعب على خاطره أحلى بهلبا من الشي اللي يجيك بالساهل❤😍

فرح 😒وليش باقي الليالي مش حلوات ولا مش عاجبينك😏

خالد لا ياقلبي مش قصدي، والله العمر كله جنبك جنة❤، بس ياحبي ديمه البدايات ليها طعم مختلف😉 شن نرأيك نوريك توا الطعم المختلف🤤

فرح لاتوريني ولانوريك أقعد فيها😒

خالد تي غير تعالي ياحبي ليش زعلتي😘

فرح شوف كلامك وتوا تعرف ليش زعلت😒

خالد باللهي كلامي فيه شي يزعل، باهي خلاص ياقلبي أني أسف عارفتيني مانحبكش تزعلي،😘 مانبيش تمر علينا دقيقه واحده وأنتي زعلانه مني💋

فرح ربي يخليك ليا ومايحرمني منك❤، بس أستني نبي نقول شي، ماحدش يفكر أني نسيت وليد أبدا الحب الأول مستحيل حد يقدر يأخذ مكانه أو يمحيه، بس خالد فعلا ملئ عليا حياتي خلاني مانقدرش نفكر في غيره

"" رأيت فيك كل ماأريد.. كل ماأحتاج.. كل ماأحب..! وأحيانا مالا أطيق.. وهكذا أحببتك ""

خالد🤨 أحم أحم راهو أني قاعد أحترميني شويه

فرح ولأني محترماتك ياحبي نذكر فيه قدامك😊، لأني مانقدرش نذكره في غيابك هالشي يخليني خاينه في نظر نفسي، وبعدين أنت أكيد إنجنيت تغار من شخص ميت🤯

خالد ماهو هذا اللي مخليني ساكت أنه ميت ودافنه بإيدي ربي يرحمه😔، وإلا شفتي شن درت فيك باش تحرمي تنطقي أسم حد غيري على لسانك🤨 هيا تعالي وخشي وتي روحك و ياسرك دوه

فرح حي نسيت المشوار بكل هيا دقيقه وتلقاني واتيه، وخشت تجري

خالد قعد يتبع فيها بعيونه لين اختفت وعلى وجهه إبتسامه حلوة هلبا

رجع لف وهو يقول: تعالو جاي شويه  

لو تسألو على المشوار اللي بنطلعوله أني وفرح بعد شويه، فهو لدار رعاية الأيتام...
أي مخصصين يوم من كل إسبوع نمشو فيها ونرفعو للصغار شوية حاجات
ونقعدو شبه اليوم كله مع ولد فاتن اللي حطوه غادي بعد توفت حناه أم أمه وخالته رجعت لراجلها بعد تزوج عليها، وبوه من يوم اللي صار سافر ومعاش روح وأهل بوه مافيش حد أعترف بيه، وفرح متعلقه بيه هلبا وهيا اللي أصرت على شوفته بإستمرار بعد ماحكيتلها قصته

بما أنه فرح معطله شويه بنقوللكم شي، كل يوم نحمد في ربي على هالنعمه اللي أني عايش فيها 
وطول هالثلاثة سنين نقول أنه حياتي كامله ومكتمله بفرحتي والحمدلله

بس الكمال لله وحده لحد هالوقت ربي مارزقناش بصغار وعالجنا قداش مره وكل دكتور يطلعلنا بقصه مختلفه لين كرهنا العلاج، مفكر بعد مافرح تناقش مشروعها الفتره الجايه، نطيرو للأردن، أدعولنا ربي يكمل علينا ويرزقنا ويرزق كل محروم🤲🤲

‏وتبقى أفضل الأمنيات هي أن يجد كُلٌ منّا من يستطيع أن يسكُن إليه وبه، من نبدأ معهُ وننتهي معه، أن لا نُعاني من الفقد، أن نجد من يُهوّن علينا مُرّ العيش، من يبقى كما عرفناهُ أوّل مرّة، أن لا نقطع طريقًا كاملاً مع شخص ثم نكتشف أن عمرنا تناثر هباءً، أن لا نُخدع، أن لا نفقد.. ويبقي العشق دائما وأبدا ينبض في قلوبنا 🖤.

نتمني تكون نالت إعجابكم😍😍

شكرا لدعمكم ليا ولو بكلمة بسيطه💜💜

دمتم في رعاية الله🤲...



                        تمت بحمد الله 



وأيضا زرونا على صفحة الفيس بوك 


وايضا زورو صفحتنا سما للروايات 

 من هنا علي التلجرام لتشارك معنا لك

 كل جديد من لينك التلجرام الظاهر امامك

تعليقات
×

للمزيد من الروايات زوروا قناتنا على تليجرام من هنا

زيارة القناة