
رواية ضماده قلبي الفصل الثالث 3 بقلم ندي المغربي
استيقظت على صوت المنبه
الساعة الرابعة والنصف فجراً، كان الظلام لا يزال ثقيلاً، والبرد خفيف. قامت دون أن تشعر بثقل كعادتها، توضأت بماء بارد لسع وجهها فأيقظها تماماً، فرشت سجادتها
صليت الصبح، وأطلت في السجود
يارب اني مقبله على ايام احتاج توفيقك وتسهيلك ف يارب وفقني واجعل لي من التوفيق نصيب وسهل لي كل عسير
اللهم إني اسألك توفيق يلازم خُطاي .. يارب وفقني ويسر لي أمري وسهل علي كل صعب وكل عسير واجبر خاطري جبرآ يتعجب منه اهل السموات والأرض 🥹🤲
بعد الصلاة بقيت جالسة، قريت سورة البقره بصوت هادئ وطلعتا صبحتا على ناس البيت
صباح الخير يا حلوين 🥰
عمر : صباح النور
ناهد : صباح النور تعالي اشربي الشاي
شربت الشاي كان حار، يدفي القلب
وعد : يابا دعواتك قبل تمش🥹
عمر : بالتوفيق ي بتي ربنا يوفقك🥰
ابوي طلع الشغل وفضلنا انا وامي نتونس لي الساعه ٥ ونص غسلتا عده الشاي ودخلت غرفتي
فتحت الدولاب، طلعت عباية سوداء بسيطة وواسعة، وطرحة سوداء، واسبورت أبيض
وقفت قدام المراية
تأملت نفسي طويلاً وأمكن لاول مره من بعد 4 شهور
لم ترَ تلك الفتاة المكسورة التي تركها ياسر، رأت فتاة أخرى.. عيونها ما زالت متعبة، لكن فيها لمعة جديدة، لمعة قرار🥰
وعد لنفسها بهمس
ما تخافي يا وعد.. انتي ما ماشة عشان تثبتي لي زول حاجة.. انتي ماشة عشان تثبتي لنفسك إنك لسه قادرة تقيفي 😌
اتنهدتا بتعب شلتا ملفي ودخلتو الشنطه طلعتا بعد م ودعتا امي ودعت لي بالتوفيق وصلت موقف العربات ولحسن الحظ العربيه ناقصه نفر وصلت
السوق كان زحمة شديد، ناس داخلة ومارقة، وريحة الخضار والسمك طالعة وصوت بتاعين الخضار والفواكه بنادو
كنتا ماشة بسرعة على عشان الحق
قدامي بي كم خطوة، كانت واقفة ومتكله على عربيه توسان وكانت بتتكلم بي التلفون
"أي يا أحمد أنا في السوق، 10 دقايق وبجيك "
في اللحظة دي، جاء واحد عاين يمين وشمال وفجأة خطف منها الشنطه وجرى
المرأة اتخلعت وصرخت
شنطتي! الحرامي شال شنطتي!
الناس كلها عاينت، لكن م في زول لحق الحرامي !
ما فكرت ولا ثانية، مسكت الخاله شنطتي ورفعت عبايتي عشان اقدر اجري ونسبه لانو السوق زحمه فالحرامي كان ماشي بسرعه م قادر يجري
الولد كان بمش سريع وبدفر في الناس وانا جاريه واراهو
مسكتو من ملابسو من ورا
حاول يضربني بي الشنطه ، لكن مسكتها منو الشنطة وبقيت اكورك
الحقووووني! امسكوووه! حرااااامي
هنا الناس جرت علينا اتنين من الرجال مسكو الولد، وواحد شال منو الشنطة.
الولد فك نفسو وجرى وزاغ بين الناس والاتنين لحقو
اتفضلي يا اخت ويا ريت تاني مره تخلي بالك م تلاحقي الحراميه م مضمونين بكونو مسلحين مرات م تعيديها تاني !
وعد : شكراً ليك
العفو
شلتا الشنطه ومشيت محل م كانت الخاله واقفه مديت ليها الشنطه اتفضلي يا خالتو شوفي حاجاتك قاعده أو لا ومن دون مقدمات حضنتني عليها!
إنتي كويسه يا بتي م كان تجري وراهو كان ممكن ياذاك عادي
وعد : كويسه يا خالتو
تسلمي كتير حبيبتي مره تانيه جد كدا انا م كان بتهمني الشنطه بس فيها صور اولادي 🥹
الخالة قفلت شنطتها ولسه يدها بترجف، لكن كانت بتعاين لي من فوق لتحت.. لعبايتي الاتوسخت طلعت لي مويه ومناديل نضفتا عبايتي وشربتا وشكرتها
وعد : يلا يا خالتو خلي بالك من نفسك انا لازم امش
ماشه وين ي بتي خليني اوصلك
*وعد:* لا والله يا خالتو ما في داعي، أنا قريبة....
لالا لازم اوصلك م بخليك تمشي براك اركبي
*وعد:* ماشة المستشفى الخاص جمب البنك الزراعي
المستشفى الخاص؟
وعد بهمس: أي..
سبحان الله.. تعالي اركبي
اسمك منو انتي يا بتي؟
*وعد:* اسمي وعد
وانا منال يا وعد
وعد : اتشرفتا يا خالتو
منال : الشرف لي حبيبتي
طول الطريق خالتو منال كانت بتتكلم وبجد كدا ظريفه حسيت نفسي كانو بعرفا من زمان اندمجت معاها وبقت تسال فيني ماشة المستشفى و لي ووريتا أنو عايزه اقدم لي وظيفه ....
وصلنا المستشفى ورفعت راسي اعاين المستشفى كان بلمع في الشمس، قزازو نظيف للحظه حسيت بي حاجه غريبه شعور م مفهوم
خالتو منال نزلت وبتتكلم بالتلفون استغربتا قلتا احتمال عندها مريض عايزه تقابلو شويه كدا جو بنتين وشاب كدا لابس بدله قلتا اخش اشوف الحاصل شنو وح اجيها تاني لو لقيتا قاعده
دخلت جوة كان في صالة كبيرة مليانة بنات وشباب شكلهم برضو عايزين يقدمو
سجلتا اسمي و قعدت في آخر كرسي
الموظفة بتنادي بالدور.
كان كل واحدة بتدخل وتطلع
حزينه اتوترتا لمن شفتا الناس بتطلع بي الحاله دي كنتا بهز في رجلي
لحد ما جاء دوري
*الموظفة:* وعد عمر
قمت وقلبي بدق شديد، دخلت مكتب الـ HR
الموظف كان شاب، لابس نظارة، بيعاين في الملفات بقرف
الموظف وهو بفتح ملفي
كورس تمريض 6 شهور؟
*رديت عليهو بصوت واطي:* أي..
الموظف قفل الملف وقعد يضحك هههههههه هو القارين تمريض عديل م شغالين تشتغلي انتي 🙂
احنا قلنا بكلاريوس كحد أدنى، ما بنقبل كورسات، شوفي ليك عياده صغيره او مركز في قريتكم🙂
م اتناقشت معاهو طلعت من المكتب وعيوني مليانة دموع، لكن كنتا ماسكة نفسي وبقول لي خير ❤️
وعد ؟
رفعت راسي لقيت خالتو منال ومعاها الشاب الكان واقف معاها بره
مسحت دموعي ووقفتا
ي بتي من متين أفتش ليك احمد دي البت القلتا ليك سكت الحرامي 😂
*أحمد:* السلام عليكم 😊
ومد لي يدو
ختيت يدي اليمين في صدري بالجنبة كده، ونزلت راسي شوية
*وعد:* وعليكم السلام
هو في الأول اتفاجأ، يدو فضلت في الهواء ثانية، بعدين طوالي فهم، جمع يدو وختاها هو زاتو في صدرو وابتسم وشكرني
وعد : العفو م عملتا حاجة 😊
اها ي بتي إن شاء الله ظبطت معاك ؟
وعد : لا يا خالتو م ظبطت خيرا في غيرا ذي م بقولو
خالتو منال سكتت ثواني، وعاينت للملف في يدي، وبعدين عاينت لي أحمد أحمد فهما وطوالي اتحرك
*احمد:* طيب اقعدو هنا م تمشوا ولا حته
كنتا شايفه احمد داخل على مكتب الإدارة
وعد : خالتو لازم امش بعد ده
منال : م تستعجلي اصبري عايزاك في موضوع 😉
وعد : طيب
بعد 5 دقايق بالضبط، طلع احمد
من بكرة مداومة معانا
فضلت دقائق وانا بحاول استوعب
بجد ؟ يعني اتقبلت؟🥹
*منال:* اتقبلتي يا بتي باركت لي وحضنتني عليها
وعد : بس كيف من شوية قالت انو....( قاطعني احمد)
احمد : انا مدير المستشفى 🙂
وعد : ......
ظلت وعد واقفة مكانها، لا تستوعب. الكلمات
مدير المستشفى ؟
احمد ضحك بخفه اي مدير المستشفى ومدير صعب كمان 😅
منال ضربت احمد بخفه في كتفه : خلاص يا ولد م تخوف البت😅
اها خيرا فيها هي زاتا ي بتي
وعد بصوت مخنوق من الفرح: شكراً يا خالتو منال.. شكراً ليك شديد والله ما عارفة أقول شنو..
وشكراً ليك يا أستاذ أحمد، تعبتكم معاي
أحمد باحترام ووضع يده على صدره مرة أخرى كأنه اعتاد طريقتها: ده واجبي يلا في شويه إجراءات لازم نعملا تعالي معاي
امي لازم تمشي البيت انتب !
اي يا ولدي يلا يا وعوده بالتوفيق حبيبتي وخلي بالك من نفسك 🥰❤️
اتحركنا انا وأحمد بعد م انا وخالتو منال اتبادلنا ارقام بعض وأحمد كان بعاين فينا وبضحك😂💔
مشينا مكتب شؤون الموظفين عملنا ملف التعيين وعقد العمل وبصمة الحضور والانصراف ووقعتا عليهن وسلموني بطاقه الموظفة
والمشرفه ورتني دوامي ببدا من الساعه 8 صباحاً لي 5 مساء لانو انا قلتا ليها م بقدر اشتغل دوام مسائي
وقالت أنو يوم الجمعه بس اوف يعني يوم واحد في الاسبوع خلصتا الإجراءات وشكرتا احمد أصر أنو يوصلني بس انا رفضتا ودعتو وطلعتا
خرجت من المستشفى، وكانت الشمس قد أصبحت في كبد السماء، لكنها لم تعد حارقة كانت الشوارع نفسها، والزحام نفسه، وضجيج السوق نفسه، لكن كل شيء في وعد قد تغير.
كانت تمشي وكأنها تطير، حقيبتها التي تحتوي على ملفها المرفوض قبل قليل، أصبحت الآن أثقل بما تحمله من أمل.
في الحافلة، طلعتا تلفوني كتبت في قروب ( بيتنا 🫰♥️) ( قروب فيهو انا وامي وأبوي واخواتي 🤣💔)
"أمي، أبوي" لا..... بعد اصل احسن
فتحت باب البيت بقوة
وعد : اووومييييييي
لقيت امي في المطبخ حضنتها ومسكتها من ايديها قبلونييييي
وابتسامة كبيرة تكاد تشق وجهها، ودموعها وبتنده اتقبلتا
ناهد: هاااا؟ مبروك ي بتي 😍
احتضنتها بقوة وبكيت بعدا جاء ابوي
حضنتو ووريتو أنو قبلوني
حكيت ليهم بي اي شيء ( بس م قلتا ليهم جريت وراء الحرامي لانو ابوي بقتلني😂💔)
أما عمر، فكان ينظر لابنته المكسورة عادت، لكنها لم تعد وحدها، عادت ومعها لمعة القرار التي رأتها في المرآة صباحاً
بعد ما رجعت من المستشفى.. حسيت روحي خفيفة، خفيفة شديد
كأنو في حجر كبير كان قاعد فوق صدري واترفع.
طول اليوم أنا قاعدة مع ناس البيت في الحوش، أمي بتحكي وأبوي بضحك وأخواتي بنقنقو فيني تالين جابت التلفون وفتحت الليدو لعبنا كتير كان كل م افوز بقعدن ابكن 😂
ما كنت بفكر في حاجة، كنت بس حاسة إني وسط اهلي ناسي، امنه وبس .❤️
بالليل بعد م اتعشيت وصليت العشاء، دخلت الغرفه وقفت قدام المرايا
عاينت لي نفسي كتير.
خلاص يا وعد، البكا الكتير والزعل الكتير داك كلو انتهى.!
أنا الليلة حلفت، حلفت عديل إني أنسى أي حاجة وجعتني، وأبدأ صفحة جديدة، بيضاء بعيداً عن أي حاجة اذتني
مسكت تلفوني، فتحت الاستديو، لقيت صوري القديمة كلها، وصورو هو، .... عملتا تحديد الكل وحذفتهن
مسحتها مرة واحدة، بدون ما أعاين تاني.
اتنهدتا ودعيت انو ربنا يرزقني راحه البال
رقدت وأنا خفيفة، و اول م غمضتا عيوني ك العاده الأفكار كان بتداهمني بس كنت بطردا لمن النوم سرقني م صحيت الا الصبح قمتا اتسوكتا واتوضيت وصليت وطلعتا صبحتا على ناس البيت نضفتا سريع سريع ( تالين وتاليا نائمات😒💔) وشربتا الشاي
دخلت غرفتي لبس عبايه بي الاسود بي البيجي وجزمه بيجيه وطرحه سوداء وشلتا شنطتي ودعتا امي وطلعتا الموقف وازمه المواصلات بعد تعب جات عربيه ركبتا
وصلت باب المستشفى وأنا بنهج، الحافلة كانت زحمة والدنيا من الصباح سخانه
وقفت قدام الباب الكبير، أخدت نفس عميق وقلت: بسم الله
اتوجهتا على الاستقبال وسألتها من المشرفه وصفت لي المكتب بتاع المشرفات
المشرفه قالت لي تعالي معاي مشينا المخزن سلمتني اسكراب أزرق جديد، مقاسي بالضبط
ودخلتا غرفه الممرضات غيرت سريع، عاينت لي نفسي في المراية.. يا الله، نفس الاسكراب الكنت بحلم بيهو
طلعت وأنا حاسة إني دكتوره م ممرضه😂
لبست الاسكراب وطلعت من غرفة الممرضات، كنت ماسكة تلفوني ودفتري الصغير ويدي بتترجف
المشرفة كانت واقفة في الكاونتر مع ممرضة
*المشرفة:* يلا يا وعد، اليوم ح تكوني مع سستر عائشة، هي المسؤولة أي حاجة ما عارفاها اسأليها، ما تتصرفي براك وبكده شغلي معاك انتهى!
وعد : تسلمي سلمتا عليها
*سستر عائشة، مره كبيرة في الأربعينات، وشها حنين لكن كلامها حاسم:* تعالي يا بتي، أول حاجة ح نعمل تسليم
مشينا العنبر، 12 سرير، كلو مليان
عائشة بدت تشرح لي بسرعة وانا بكتب:
سرير 1 عندو سكري وضغطو عالي، كل ساعتين بنقيس ليهو
سرير 3 عندو درب كينين ماشي، تابعيهو ما يخلص
سرير 7 عملية اول امس، جرحو لازم يتغير بعد شوية
أنا كنت مركزة خايفة أغلط
الساعة 9 جا الدكتور مر مرور، ومعاهو ناس الامتياز،
بعدو جاء احمد سلم علي وقال بالتوفيق وانو إذا حصلت لي اي مشكله ولا زول ضايقني تعالي لي ابتسمتا ليهو وشكرتو
بعد المرور، عائشة قالت لي: يلا قيسي الضغط لي المريض رقم 2
جابت لي جهاز الضغط، أول مرة أقيس لي مريض حقيقي براي، كنت خايفة، المريض كان عمي كبير.
*عائشة واقفة وراي:* ما تخافي، اربطي كويس.
قست الأول، التاني، يدي بقت تعرق، لحدي ما اتعودت.
طلبت مني أودي عينات دم للمعمل، جريت، المعمل في المبنى التاني
رجعت لقيت واحدة من المريضات بتبكي، ام البنت قالت لي السخانه م نزلت
ناديت عائشة، عائشة جات قاست الحرارة، ادتها خافض،
الساعة 12 قالو بريك 30 دقيقة اتوجهتا على البوفي طلبتا سندوتشات قعدتا في واحده من الطاولات،
شويه كدا جو تلاته بنات ، لابسات الاسكراب قالو لي ممكن نقعد قلتا ليهم اتفضلو قعدو واتعرفنا على بعض
انا ريان
وانا هدى
وانا إيمان قولي لي ايمي 😅
وانا وعد اتشرفتا
فطرنا مع بعض وكانن ظريفات شديد خصوصاً ايمو نضامه م بتسكت ولا دقيقه😂
ريان مشت جابت لينا مويه وقعدنا ناخد ونعطي لمن م حسينا بي الوقت
ايمو : الليله القهوه على حسابي وعد بتشربي قهوه موش ؟
وعد : ايوا
هدى : اشيييي ايمو لي اي زول 🤣ي ريت قهوه جنزبيلا كتير
ايمو : ي بتاعت الملح😂
قعدنا نضحك😂
ايمو جابت القهوه شربناها
وكل واحدة مشت على عنبرها.
رجعت لقيت سستر عائشه بتفتش علي
*عائشة:* يلا يا وعد تعالي،
وقفت جنبها وهي بتشرح لي:
ده بنادول، ده مضاد، ده حق الضغط، لازم تتأكدي من الاسم والسرير قبل ما تدي.
كنت مركزة شديد، بكتب أي حاجة بتقولها.
مشينا نوزع، أنا شايلة الصينية وهي قدامي.
سرير 1، سرير 3، لحدي ما وصلنا سرير 7، بتاع العملية.
*عائشة:* ده جرحو لازم يتغير، عايني كيف بنعمل.
فتحت الجرح، أنا قلبي وقف، المنظر كان صعب، وريحتو قوية، حسيت روحي دايخة.
عائشة عاينت لي: مالك؟ وشك بقى أبيض؟
*وعد:* لا كويسة.
*عائشة:* أول مرة صعبة، أقيفي بعيد وعايني بس
وقفت بعيد وبقيت أعاين وهي بتغير بيدها السريعة ، والمريض ساكت وماسك الملاية.
بعد ما خلصنا، غسلت يدي
واتوجهتا على غرفه الممرضات اتوضيت وصليت الضهر ورجعتا العنبر بقيت متابعه مع المرضي اقيس لي ده ومتابعه مواعيد الدربات
بعدا مشيت الكولر شربتا مويه ولقيت ناس ايمو طالعات غرفه الممرضات مشيت معاهم صلينا العصر وبقينا نتونس ونضحك وهدى ضحكتا فضيحه بس😂
بعدا اي واحده فاتت على شغلا خلصت شغلي سريع سريع وطلعت
، مشيت لي السستر الشغاله دوام المساء ووريتا أنو أنا خلصت، والسرير 1 عندو كده، السرير 7 غيارو اتعمل، السرير 2 الدرب الفلاني مواعيدو الساعه كدا
مشيت مضيت في دفتر الحضور والانصراف،
دخلتا استراحه الممرضات
لميت حاجاتي ، قلعتا الاسكراب
طلعتا لقيت البنات منتظراتني طلعنا سوا ودعتهن واتوجهتا للموقف وكنتا مصدعه وتعبانه من الوقفه وريحه الديتول😓
وصلتا البيت م شايفه قدامي صليت المغرب واتغديت وقعدتا احكي لي أمي وأبوي عن يومي من الالف للياء
تلو جهزت القهوه شربتا لي كبايه صليت العشاء واستلمتا السرير والمره دي من التعب م فكرتا في شيء نمتا ما صحيت الا الصبح...