رواية ضره من عالم اخر الفصل الرابع والعشرون 24 بقلم نوسه حمد
من الحاجات الكانت مرضيه واسعدتني زياره علا لي رغم انها بتزكرني بالماضي واهلي القلبي مقطوع علي شتاتهم بعد وفاه امي وابوي الاتزوج بت صغيره وما مالي عينها وبتخونو في بيتو وفي حضورو ماعارفه الحاصل عليهو شنو وكلو دا كوم والولد الولدتو كوم تاني والاحزني اكتر علا قالت لي سند بقت حالتو اسواء وما كان نفسي يصل للمرحله افتكرت رجوعو لي اهلو ح يرجع ليهو الزاكره وح يرجع احسن من اول انسان قلبو ملان بالايمان بس اصعب حاجه في الدنيا اهلك يخلوك براك تواجهه مشاكل الدنيا الما بترحم اتوجعت لي حالتو ما عشان عاودني ليهو الحنين عشان نفسي لمن اولادو يشوفوهو يكونو فخورين بيهو مانفسي اعيشو في صراع مع حياه ابوهم وحياتهم وحوجتهم لحياه خاليه من المشاكل والعراقيل بس دا نصيبهم لابي يدي لا بي يدهم الله عالم بي لمن كنت في عصمتو عشت اصعب الايام واجهت معاهو الجن وما استسلمت دا كلو عشان ما ابقا انا واهلو عليهو والزمن بس الدنيا كان عندها راي اخر قابل الاكعب من الجن متاب استغلت ضعفو واتزوجتو وبدل تكون ليهو زوجه مطيعه كانت انسانه مخادعه وغشاشه وان شاء الله القانون ياخد مجراهو شيلت هم الدنيا والعالمين وبقيت في صراع داخلي لدرجه لجأت لطبيب نفسي سعد وقف جنبي وعمل المستحيل عشاني ومنال زوجتو ماقصرت مني ماحسيت في يوم انها لي ضره حسيتا اكتر من اخواتي حاولو معاي كتير بس من جواي حاسه بذنب عظيم اخواتي واخواني الجادعين ابوي لواحده خربت سمعت عايلتنا وكل زول في حياتو الخاصه وابو اولادي الاهلو ماشغالين بيهو وخلوهو للدنيا حسيت بعجز واني ماقادره اعمل حاجه اتناقشت مع سعد وقلت ليهو ما تفتكر خوفي علي سند حبا فيهو لا والله انا مابخونك حتي لو مع قلبي مابخونك بس خايفه اولادي يقولو لي ليه ما وقفتي جنب ابونا ونفسي اتعالج عشان اولادو ما عشاني سعد قال لي نوسه انا متفهم الحاجه دي وختيت نفسي مكانو اكيد لو حصل لي الحصل ليهو اولادي اول ما يكبرو اول سؤال ح يجي في بالهم ليه امنا م وقفت مع ابونا وانا يا نوسه عشان اولادك مستعد اقيف مع زوجك بس بياتو حق لا انا عندي حق لا انتي عندك عليهو حق قلت ليهو حق الانسانيه يا سعد انا والله ماعندي ليهو زره مشاعر بس انت عارف خوفي من شنو ولو قدرت ساعدتو ربنا بديك اجر قال لي ان شاءالله اوعدك اعمل اقصي جهدي واقيف جنبو من غير ما احسسو انا منو اكيد ما ح يكون متزكرني بس عندي شرط انتي ما تظهري ليهو اعتبريها غيره علي عرضي قلت ليهو موافقه والله في الشارع ما اعاين ليهو قال لي ابشري اعتبري اولادك لمن يجو السودان يلقو ابوهم سند الزمان ما تخافي قلت ليهو ان شاء الله وخوفي علي ابوي قال لي ابوك يا نوسه بي اولادو والبعملو فيهو دا ماصاح وما تزعلي من كلامي انتي تعملي شنو ابوك طردك يا نوسه بس اولادو ملزمين ينزلو السودان ليهو هم ما خايفين انو البعملو فيهو دا يحصل ليهم مفتكرين واجبك قصاد ابوك ترسل قروش ابوك صراحه في مرحله خطره مراهقه الكبر دي مشكله اعملي العليك للنهايه اتصلي عليهم وريهم اي شي ما تدسي شي وتاني هم حرين وربنا ما بعاقبك انتي بعاقبهم هم قلت ليهو طيب انا بتصل ليهم اخر مره اتصلت لي اخوي اتكلمت معاهو ووريتو اي شي قال لي نحنا نشتغل ولا نجي نحرس ابوك هو زي ما ابونا ابوك جيبي يقعد معاك قلت ليهو هو متزوج كيف اجيبو قال لي طيب مدام عارفه متزوج خلاص مسؤوليتو في رقبه زوجتو قلت ليهو الساكت عن الحق شيطان مرتو من يوم اتزوجها رجال اشكال وانواع داخلين بيتنا بيتنا الطاهر بقا عباره عن دعاره قال لي انتي زوله شكاكه مافي كلام بالشكل دا قلت ليهم انا ما بشك ساي انا شفتها وسمعت بي اضاني والغلط ما تأيدوهو انزلو شوفو ابوكم اخوي رما اللوم علي وقال لي هو ابوك زي ماهو ابونا ومسؤوله منو لو عايزه قروش نحنا جاهزين قلت ليهم حرام عليكم ابوكم خرف ما محتاج قروش محتاج البقول ليهو دا صاح ودا غلط الدنيا دواره ودا واجبكم قال لي وواجبك زي ما واجبنا نحنا ما مستعدين نخسر شغلنا وانتي عارفه الشغل في السودان صعب واولادنا صعب يقدرو يعيشو في السودان حسيت انهم عاوزين مصلحه اولادهم اكتر من ابوهم حزنت من جواي شديد حكيت لسعد الحاصل طلبت منو امشي البلد لي ابوي قال لي تمام اولادك خليهم هنا منال قاعده وانا عندي شغل كتير ماعندي طريقه امشي قلت ليهو تمام
عديت يومين ونزلت الحله لقيت ابوي ما ياهو ابوي وعندو رجفه خوف ولا مرض ما عرفتها لمن شافني حسيتو فرح ماياهو ابوي الطردني وكانت مرتو مشيلاهو ولدها وهي مافي وولدها فرق الليل من النهار ولا دمو ما زي دمنا انتظرتها لنص الليل لمن جات وما عارفاها كانت وين بس في عربيه نزلتها لمن شافتني كانها شافت الموت سلام ماسلمت عليها قلت ليها تجدعي ولدك لي ابوي وهو كبير في السن علي الاقل سوقي معاك قالت لي ماعندك فيني شغله جدعتيهم اتنين ومنك نتعلم في زول سألك حسيت بغضه في حلقي قلت ليها انتي ما بتقارني نفسك بي وانتي كنتي سبب في جدع اولادي قالت لي سبب مالي قلت لي ابوهم جن ولف بالشوراع ما دا نصيبك حسيتا انها عارفه اي شي عني قلت ليها ماجيت اتناقش معاك جيت اسوق ابوي قالت لي تسوقي من بيتو وبعدين انتي قال ليك ماشي وبقت تنهر في ابوي وتقول ليهو انت ماشي وين وابوي خايف منها كانها ماسكه عليهو زله وبقت تضرب في ولدها انا بقيت ما بشوف ومسكتها من شعرها الفاكاهو وعاجبها دا واظنو هو ما شعرا مركباهو طلع في يدي لمن ابوي انخلع وبقا يقول لي فكيها فكيها وحسيتو خايف علي ومن هنا عرفت ابوي م كويس شاكلتها وضربتها ولميت فينا الناس وبقت تمثل وتقول اني مجنونه وفي ثواني ناس حلتنا م بقصرو جابو لينا عسكري والعسكري من حلتنا زول عرف بالفساد قال لي ح اسجنك انتي اتعديتي علي مره في بيتها قلت ليهو دي مشاكل عائليه ما تدخل فيها قال لي انتي مفتكرانا مابنفهم في المشاكل العائليه وبعدين دي زوجه ابوك ما امك وشكلك انتي شايله الضر وما اتفاهم معاي صبحني في السجن بتهمه اني اتعديت علي مرت ابوي وضربتها ولبسوني قضيه زي السلام عليكم وقدر ما حاول افهم الضابط ابا يفهم وقال لي الناس كلها شهدت عليك انك ضربتي مرت ابوك وهي قالت حقها ما بتخليهو وانا ما بطلعك من السجن قلبي بقا ادق وغلبني البعملو قلت ليهو طيب انا عاوزه اتصل وكنت حافظه رقم سعد اتصلت وكلمتو اني اتسجنت سعد انخلع وفي نفس اليوم جا وطلعني بكفاله وحسيتو لاول مره مضايق مني شديد وكلام م اتكلم معاي حاولت افهمو بس سكتني وبقينا ايام هو مخاصمني الدنيا مسخت علي وبقين بين ميه نار وبقيت كئيبه ماحبيت خصام سعد لي بس انا اعمل شنو منال كل يوم تحنس فيهو وهو زعلان شديد قال لي مرتي انا تنسجن حاولت اقنعو اني ماغلطانه ومرت ابوي دمرت ابوي قال لي ابوك عندو رجال واجبهم اتجاهو ينزلو يشوفو الحاصل عليهو شنو ومن الاول م كنت رضيان مشيتك ليهم علي حسب كلامك البتقولي في مرت ابوك بس م حبيت احرجك قلت ليهو انا ماقادره وخايفه ربنا يسألني ما ردا علي لانو هو متفهم انو دا ابوي ومن حقي افقدو واشوف الحاصل عليهو حسيت روحي في نار وبعد شفت ملامح ابوي وخوفو قلبي وجعني وحسيت الدنيا دي فيها الانسان يمكن يكون اخطر من الجن زي مرت ابوي دي زوله قادره وناهره بس ابوي ورط نفسو بس سمعتها زي الطين وقدر بناتو كيف يتزوجها بس نقول شنو منال قالت لي نوسه عايني لي اولادك وكلام سعد صاح اخوانك ينزلو لي ابوهم قلت ليها تمام اتصلت علي اخواني وحكيت ليهم اي شي قالولي غلطانه انتي مالك ومالو وقدر ما حاولت افهمن انو ابوي مضايق قالو لي لا ما مضايق ومبسوط وكل مره بتصل لينا نرسل ليهو انتي بتتوهمي ساي قلت ليهم انا شفتو حقيقه وشفت علامات الخوف في وشو وبقا يرجف قالو لي انتي موهومه وعشان مادايره مرت ابوي بتقولي كده قلت ليهم ربنا ح يسالكم وحق ابوي في رقبتكم وانا عملت العلي وزياده وما ح اخرب بيتي لانو زوجي م موافق امشي بيت ابوي وزي ما اولادكم اهم بيتي واولادي اهم وقفلت الخط وكل يوم بمر علي قلبي في ابوي ونظرات الخوف الفي عيونو ما بنساها ابدا
سعد دخل ناس وقدرو اقنعو مرت ابوي تتنازل من المحضر بس للاسف طلبت مبلغ كبير قصاد انها تتنازل وسعد بع عربيتو واداها المبلغ انا كنت بتقطع من جواي سعد زول طيب ما حسسني اني اذنبت شديد ولا قال لي كل منك بعتا عربيتي ودا كلو عاوز سترتي للنهايه وحمدتا الله عليهو وكرهت مرت ابوي وكل يوم بدعي عليها اتنازلت عن المحضر بعد مسكت القروش بس انا الخجله عاوزه تقتلني مانفسي اخسر سعد حاجه بس قدر الله وما شاء فعل سعد قال لي سمعتك عندي بالدنيا شكرتو ووعدتو اني ما اخزلو تاني وح ابدا صفحه جديده معاهو وقلت ليهو عشان ما تدخل في متاهات تاني معاي سند ما تشتغل بيهو اهلو اولي انهم يعالجوهو والله عالم بي نيتي انا تاني ما ح ادخلك في اي مشاكل من ناحيتي قال لي انا سند قاصد فيهو خير كنت بس ما اكذب عليك بطني طمت من اي شي شايفك انتي قبليني تعبتي بس بدون فايده وزي ماقلتي اهلو اولي بيهو وربنا كريم عليهو واولادك ما اختارو ابوهم يكون كده وربنا كريم قلت ليهو انت ماقصرتا وخلينا نشوف حياتنا قال لي تمام رجعت علاقتي بيهو اقوي من اول وحملت للمره التانيه وسعد كان طاير من الفرحه وفي نفس الشهر الحملت فيهو سعد ربنا وفقو واشتري عربيه احلي من الخسرها قال لي الفي بطنك دا فاتحه خير علي رغم تعبي في الحمل بس قررت اشتغل واثبت نفسي واعمل مشروع صغير وسعد دعمني وكنت مجتهده جدا فيهو وانجزت فيهو كتير ومحمد دعمني بالواسطات وقال لي لو نزلت السودان ح اجي اشاركك فيهو ونزيدو اكتر واكتر قلت ليهو تمام اخباري انقطعت من ابوي وسند لغايه ما يوم حصلت جريمه هزت الحله كلها وكانت فيها سبب مرت ابوي واخواني نزلتهم الفضيحة والخبر هزا حلتنا وكل الولايه وقسم ضهرنا النص تتوقعو الجريمه الحصلت شنو …..يتبع.
الفصل الخامس والعشرون من هنا