رواية غالية سيدة قلب يونس الفصل الرابع والعشرون 24 بقلم نسرين نادر
وسط ضجيج الخناقة والصراخ، وتحديدًا في اللحظة اللي الدنيا قامت فيها وما قعدتش، طلع صوت واحد بيزعق بعزم ما فيه، فكل العيون اتلفتت ليه في جزء من الثانية.. وفجأة، دوّت طلقة نار خلت الدوار كله يرتعش، ورن الصوت في الأرجاء.
ومباشرة بعد الطلقة، ظهر الشخص اللي ضرب بالنار وهو بيلف وبيعزم أمره على الهرب، فصرخ «أيمن» في رجالة منصور بصوت عالي هادر يملى المكان:
– «وراه! ما حدش يسيبه.. هاتوه لي حي!»
انطلق رجالة منصور يجروا وراه بسرعة البرق عشان يلحقوه قبل ما يختفي وسط الزراعات.
وفي نفس اللحظة، جرى «أيمن» برعب وقلق شديد ناحية «منصور»، ونزل على ركبه بخوف وهو بيقول بصوت مهتز:
– «مالك يا أخوي؟! إيه اللي حصل؟! وريني دراعك بسرعة!»
حط منصور إيده التانية على دراعه المصاب، وبابتسامة كلها ثبات وجدعنة صعيدية قال وهو بيجز على أسنانه:
– «ما تخافش يا أيمن.. دي جت في دراعي، اطمن.. مش عميقة يا أخوي، دي سطحية وما فيهاش حاجة.»
وقف أيمن وسط الكل، وكان الغضب والشرار طالعين من عيونه، وبص للناس الغريبة اللي كانوا عاملين المشكلة وقال بصوت قوي ومرعب:
– «عجبكم اللي حصل وارتحتوا كده؟! أظن أنتم أخدتم حقكم دلوقتي بالمحاصيل اللي باظت من ري المية.. كل واحد فيكم يرجع على داره دلوقتي حالًا! والعمدة يونس جاي في الطريق وهيحكم في الموضوع بنفسه.. واللي حصل في إصابة منصور ده مش هيتسكت عليه واصل، وأنتم عارفين كويس مين عيلة العزازية!»
بدأت القلوب ترجف والناس تتلقلق بين بعضها، وقال واحد منهم بخوف:
– «والله يا سي أيمن إحنا ما نعرفش مين اللي ضرب بالنار.. وإحنا مستحيل نعمل كده في سيدنا منصور، حقكم علينا وإحنا آسفين، دي مش عوايدنا!»
سند أيمن «منصور» اللي وقف بثبات وعزة نفس، ووجه كلامه للناس بحزم وقوة:
– «كل واحد يرجع على داره، ويوم المجلس الكلي هتيجوا كلكم.. واحد واحد باللي كان موجود هنا!»
وبص لـ«عواد» وقال بصوت آمر:
– «جيب لي الكشوفات حالًا واديها لأيمن عشان آخذها وأنا مروح.»
وبعدها وجه نظره للغفر والرجالة وقال بحزم شديد:
– «كل واحد يقعد في مكانه وما حدش يتحرك واصل لحد ما أقول لكم!»
وبص للناس التانية اللي كانوا متجمهرين وقال بنبرة تحذير قاطعة:
– «يلا.. كل واحد يروح على بيته، وما أشوفش مخلوق هنا واصل، أما والله ما هيحصل له خير واللي عندي قلته!»
ركب منصور وأيمن العربية، ودور أيمن الموتور واتحركوا. وبسرعة طلع أيمن تليفونه وقال بقلق:
– «أنا هتصل على يونس عشان أخبره باللي حصل ويجي حالًا.»
حط منصور إيده على تليفون أيمن بحسم وقال:
– «للا.. مش دلوقتي خالص، ما تبرجلوش.. هو يا دوبك لسه واصل مصر، خليه يشوف شغله هناك وهيوصلنا عشية كده. خدني أنت بس على المستشفى عشان أنظف الجرح وألفه، عشان لما أدخل على أهلي في الدوار ما حدش فيهم يتخض، وهي زي ما بقول لك سطحية وما فيهاش حاجة تخوف.»
بصله أيمن بأسى وقال:
– «يا راجل ده أنت نزفت دم كتير!»
ابتسم منصور بخفة وهو بيحاول يخفف عنه وعن القلق اللي جواه، وقال بضحكة هادية:
– «عشان تعرف بس يا ولد أبوي إن عندي دم! مش على طول تقعد تقول لي ما عندكش دم يا منصور.. أهو وريتك إثبات عملي أهو!»
ضحك أيمن غصب عنه وقال بصوت مليان خوف حقيقي:
– «ما فيش فايدة فيك أبدًا! ده زينب لو عرفت باللي حصل ده هتولول وتخرب الدوار على اللي فيه.»
قال منصور بجدية وهو بيضغط على دراعه:
– «عشان كده بقول لك.. سوق طوالي وبأسرع ما عندك عشان نروح المستشفى، نضمد الجرح ونخلصه قبل ما يوصل خبره للدار وما يجرالوش حاجة أكتر من كده.»
وفعلًا، داس أيمن بنزين العربية وانطلقوا طوالي على المستشفى.
وفي النجع..
كانت الناس كلها في الدوار خلصت يومها وطلعت عشان تنام، بس «زينب» كانت حاجة تانية خالص؛ قاعدة في الأوضة رايحة جاية مش قاعد لها قرار، رايحة وجاية كأنها على جمر من النار. وكانت «كريمة» بايتة معاها عشان تونسها، وبصت لها بقلق وهي متابعة خطواتها وقالت:
– «واه يا زينب.. خيلتيني يا خيتي، اقعدي شوية بقى واهدي! أخوي منصور إن شاء الله زين وما تقلقينيش عليه.. كيفك أنتِ كمان كده؟!»
وقفت زينب ودموعها في عيونها وقالت بصوت مهتز:
– «ما قادراش يا كريمة.. جيايله ومأكدة عليه إني لما أتصل عليه يرد عليا، وبقاله كذا ساعة بتصل وبنرن ومحدش بيرد عليا! قلبي مقبوض وقلقانة قوي.»
سكتت زينب ثواني وكأنها افتكرت حاجة، وبصت لكريمة وقالت بلهفة:
– «أنا هكلم أيمن!»
بصت لها كريمة بذهول وقالت:
– «ماله أيمن؟»
ردت زينب بسرعة:
– «مش هو معاه؟!»
قالت كريمة:
– «أيوه معاه.»
قالت زينب وهي بتمد إيدها:
– «طيب هاتي رقم أيمن وأنا أكلمه أطمن.»
فتحت كريمة عيونها بصدمة وقالت:
– «واه! هتكلمي أيمن؟! وهتجيبي رقمه منين يا مخبولة أنتِ؟!»
قالت زينب بعزم:
– «من حمزة!»
هزت كريمة راسها برفض وقالت:
– «لا.. باينك اتجنيتي خالص! هتروحي تقولي لحمزة أخوكِ: "هات لي رقم أيمن عشان أطمن على منصور"؟!»
قعدت زينب مكانها بقلة حيلة، وحطت إيدها على قلبها وقالت بدموع:
– «ولا أعمل إيه بس يا بت يا كريمة؟! القلب واكلني عليه، حاسة إن في حاجة وحشة حصلت، وأنا قلبي ما بيجذبش عليّ واصل!»
قربت منها كريمة وطبّطبت عليها بحنان وقالت:
– «اهدي بس كده وصلي على النبي.. وإن شاء الله كمان ساعتين وهيكون هنا، هو مش قايل على طلعة الفجرية جاي؟! ما عادش غير ساعتين بس على الفجر يا خيتي.. تعالي بقى نامي عشان بكرة.. بكرة يوم طويل ومليان تجهيزات.»
هزت زينب راسها برفض وقالت:
– «لا.. نامي أنتِ يا كريمة، أنا هقعد هنا في الفرندا أشوفه لحد ما يجي وأطمن عليه بنفسي.»
وفي الناحية التانية.. في النجع وبالتحديد في الدوار.
كان «رجب» سهران في أوضته لوحده، قاعد على السرير وبيدخن بعصبية والقلق بياكل في أعصابه. وفجأة.. رن تليفونه بنغمة مزعجة.
فتح الخط بسرعة ورد بصوت واطي ومليان غضب:
– «عملت إيه يا هباب البرك أنت؟! نيلت إيه؟!»
جاءه صوت الراجل من الطرف التاني مرعوب وبيتكلم بصعوبة:
– «جات.. جات طلقة في كتف منصور يا رجب بيه! والله ما أقصد!»
اتجنن رجب وصرخ بغضب وعروقه برزت في رقبته:
– «يا بهيم! أنا مش قلت لك تخوفه بس مش تطخه بالنار يا غبي؟!»
رد الراجل بصوت كله خوف:
– «والله ما أعرف.. هي جت كده لوحدها وأنا ماليش دعوة! ده رجالة منصور وأيمن بيجروا ورايا في كل حتة، وأنا تايه وسط الأراضي ومش عارف أعمل إيه!»
فقد رجب أعصابه تمامًا وقال بصوت مرعب ومسموع:
– «اسمعني كويس وحط كلامي حلقة في ودنك! عارف لو حد مسكك ونطقت بحرف واحد أو نطقت اسمي على لسانك.. هموتك أنت وعيلتك نفر نفر، ومش هسيب فيكم واحد حي، سامعني؟! امسح رقمي حالًا وما أشوفش وشك ولا تجيب سيرتي واصل لأقطع لسانك! وقبل ما هما يوصلوا لك.. هوصل لك أنا وأنت عارف أنا أقدر أعمل إيه.. غور من وشي!»
وقفل السكة في وشه بعنف.
رمى رجب التليفون على السرير، ورجع شعره لورا بعصبية ووجهه أصفر ومرعوب، وبقى يلف حوالين نفسه وهو بيكلم نفسه بخوف:
– «لو حد عرف إن أنا اللي عملتها.. هيبقى يوم موتي ونهايتي خلاص!»
بص لنفسه في المراية وقال بضحكة هستيرية وهو حاطط إيده على صدره:
– «بس.. بس أنا حاسس إني مرتاح.. على الأقل أهو عذبت يونس في منصور!»
وبسرعة فكر في خطة تنجيه؛ دخل على تليفونه، مسح رقم إسماعيل وكل المحادثات اللي كانت بينهم بالكامل، وبعدين قفل تليفونه خالص ورماه على جنب، وراح على السرير قلع هدومه وعمل نفسه نايم بعمق، عشان لما الخبر يجي لهم.
وفي قلب العاصمة (القاهرة)..
كانت العربية ماشية لحد ما وصلت، و«غالية» خلاص كانت بتغفل وبتنام على نفسها من التعب والسفر. بص لها يونس بحب وقال:
– «تعالي يا غالية.. أوديكي الفيلا بتاعتنا ترتاحي فيها وتنامي لك كم ساعة.»
بصت له غالية بدهشة ونوم وقالت:
– «واه.. عندكم هنا فيلا في مصر يا يونس؟!»
ابتسم وقال بتهادي:
– «أمال إيه.. عندنا بيوت وعقارات كتير هنا.»
قالت بانبهار وبراءة:
– «ما شاء الله.. بس لا، أنا هاجي معاك الشركة.»
قال يونس برفض واهتمام:
– «يا حبيبتي ما هتقعدي معايا هناك طول ما أنا بخلص شغلي، وأنتِ ما نمتيش ودايخة، وما فيش مكان هناك للنوم.. هتتعبي يا غالية! أنا هحطك في الفيلا ترتاحي وأخلص وأجيلك طوالي.»
أصرت غالية وقالت بعند طفولي وهي بتمسك دراعه:
– «لا.. رجلي على رجلك، هاجي معاك الشركة وهرتاح هناك والله ما تقلقش عليّ، ومش هعمل أي حاجة واصل، بس ما تسبنيش لوحدي.»
حاول يونس معاها كتير بس هي أصرت بإصرار الصعايدة، فابتسم بيأس وقال:
– «أمر لله.. تعالي معايا.»
طلع بيها على مقر الشركة الرئيسي. وأول ما العربية دخلت الجراج ونزلت غالية، رفعت عيونها ببلاهة وانبهار، وفتحت بوقها وهي شايفة المبنى الضخم العملاق، كله واجهات زجاجية لامعة بتعكس ضوء الشمس والسما كأنه لوحة فنية، والعربيات الفارهة الفخمة مصطفّة بانتظام.
حطت إيدها على صدرها وقالت بذهول عفوي:
– «بسم الله ما شاء الله.. الله أكبر! إيه دي يا يونس؟!»
ضحك عليها يونس وقال بتبجح لطيف:
– «ما تبصيش كده.. ده أنتِ داخلة مع صاحب الشركة بنفسك!»
بصت له وقالت بكسوف وهي بتبص للمكان:
– «مش قادرة والله يا يونس.. ما شاء الله كبير قوي وشكله يفرح ويخوف في نفس الوقت!»
مسك إيدها بحنان وقال:
– «دلوقتي هتشوفي من جوه.. هتدخلي والناس كلها هتعرفك، عشان أنتِ مرات المدير الكبير وصاحبة الشركة كمان.»
قالت بابتسامة:
– «بتقول صاحبة شركة؟!»
ضحك وقال:
– «أنتِ نسيتِ إن عمي هو اللي مؤسس الشركة دي كلها؟ يلا بس ندخل عشان أخلص شغلي في السريع ونرجع فورًا.»
أول ما دخلوا من البوابات الزجاجية الواسعة، كل الموظفين والأمن الموجودين وقفوا فجأة بانضباط واحترام، وبدأوا يحيوه:
– «حمد لله على السلامة يا فندم.. نورت المكان!»
كان يونس بيرد التحية برأسه وثقة وجدية رسمية. وفي الوقت ده، كانت «غالية» بتبص حواليها بانبهار، وفجأة لفت نظرها البنات اللي شغالين في الاستقبال والمكاتب؛ منهم اللي لابسة قصير، واللي بشعرها منسدل، واللي حاطة مكياج أوفر وألوان فاقعة، والبنات بقوا بيبصوا ليونس بنظرات ملهوفة ومبتسمة.
هنا.. بدأ وش غالية يتغير، وانقبض قلبها بغيرة صلعاء، رغم إنها كانت من ثواني مبسوطة وبتضحك ومكسوفة!
دخل بيها يونس على المصعد الفاخر (الأسانسير)، وأول ما ركبت وقفلت الباب، حسّت بالمكان بيتحرك بيها فخافت ورجعت لورا، ومسكت في دراع يونس وهي بتترعش وبتقول بخضة:
– «يا ويلي! يا ويلي يا يونس اهدى!»
ضحك يونس بصوت عالي وقال:
– «يا بنتي اهدي، ما تخافيش!»
قالت برعب وبطنها بتتقلب:
– «اهدى إيه يا يونس؟! أنا حاسة إن بطني بتطلع معايا لفوق وروحي بتتسحب مني! نزلني والنبي!»
ضحك عليها جامد وهو بيطبطب على إيدها وقال:
– «ده الأسانسير يا غالية، عشان يطلعنا بسرعة للدور اللي فوق بدل ما نطلع على السلم ونتعب.»
وأخيرًا وقف الأسانسير وفتح، وخرجوا على الطابق الإداري الخاص. وقبل ما يوصلوا مكتبه، طلعت تجري بسرعة السكرتيرة الخاصة به «جيلان»، وسابت الملفات اللي في إيدها، وقالت بصوت متمايع ومليان دلع مصطنع:
– «مستر يونس! أخيرًا جيت.. حضرتك وحشتنا جدًا، المكان كان مظلم من غيرك والله!»
أول ما غالية سمعت الكلام وشافت شكل جيلان اللي لابسة لبس مكشوف ومكياجها اللي مخليها زي (الأرجوز)، فتحت عيونها بصدمة، وبسرعة التفتت وقرصت يونس في كتفه جامد من الغيظ!
جلجل يونس في حنجرته بكحة محرجة وقال بصوت جاد ورسمي عشان يتفادى الموقف:
– «أهلًا يا جيلان.. متشكر جدًا. أحب أعرّفك.. المدام غالية رضوان العزازي!»
تصلبت جيلان في وقفتها، وبصت لغالية من فوق لتحت بنظرة تقييم واستخفاف، لكنها تداركت نفسها بسرعة وقالت بابتسامة صفراء:
– «أهلًا وسهلًا.. اتفضلوا يا فندم، أنا هجيب لحضرتك الملفات والقهوة اللي بتحبها.»
وحاولت تتمايع أكتر قدامه.
هنا.. ما استحملتش غالية أكتر من كده! تقدمت خطوة لقدام، وبصت لجيلان من تحت لفوق بنظرة حادة، وبعدين لفت ضهرها ببرود وقالت بصوت عالي وواضح:
– «لا يا حبيبتي.. مش هيشرب قهوة! ولو عايز يشربها.. أنا اللي هعملها بإيدي!»
سحبت يونس من إيده ودخلت مكتبه بغضب وقفلت الباب في وش جيلان بكل قوة!
فضلت جيلان واقفة مكانها مصدومة ومتغاظة، وبصت غالية ليونس وقالت بدهشة:
– «أول مرة أعرف إنك بتتكلم مصري يا يونس!»
ضحك وهو بيبص لها بغمزة شقية:
– «من قعدتي هنا بعرف أتكلم مصري، وصعيدي، ولغات تانية كمان!»
بعد دقايق، دخل «علاء»، واندمج يونس معاه في الشغل. ومع مرور الوقت، بدأت غالية تمل من كتر ما يونس مشغول وهي قاعدة لوحدها.
وفي الدوار..
صحى الدار كله على حركة وهيصة ملء المكان؛ فاليوم هو "الحنة الكدابة" اللي بتسبق الفرح الأساسي، والكل مشغول في التجهيزات والتحضيرات والترتيبات.
أما «زينب»، فكانت قاعدة في الصالة، عيونها على التليفون، بترن على «منصور» للمرة المية، وكل مرة بيجيلها الرد المزعج: «التليفون المطلوب مغلق أو خارج نطاق الخدمة». قلبها كان بيدق بجنون وحاسة إن روحها مسحوبة منها.
وفي وسط الانشغال ده، كانت «نعمة» واقفة قدامها في الصالة، قربت منها وقالت بجدية:
– «يا زينب!»
رفعت زينب عيونها ببطء وبصت لها، ورجعت تاني تبص في شاشة تليفونها بقلق.
رفعت نعمة صوتها بعتاب وقالت:
– «هو أنا مش بنادي عليكِ ولا إيه؟! مش سامعاني؟!»
ردت زينب بصوت بارد ومشتت:
– «لا سامعاكي يا خالة.. نعم، محتاجة حاجة؟»
اتعصبت نعمة وقالت بغضب:
– «بتكلميني كده ليه يا بت أنتِ؟! هو أنتِ ناسية إنك مرات ولدي ولا إيه؟!»
بصت لها زينب بسخرية واستهزاء وقالت:
– «لا.. ما نسيتش يا خالة، بس أنا مشغولة دلوقتي بزوجي اللي هو ولدك.. بشوفه هيجي إمتى.»
ظهر على وجه نعمة الاضطراب والفضول لأول مرة وقالت:
– «هو ده اللي أنا جاية أسألك عليه.. هو منصور لسه ما جاش؟! ما كلمكيش؟!»
هزت زينب راسها وقالت بغصة:
– «لا.. بتصل بيه من امبارح وتليفونه مقفول، وقلبي حاسسني إن فيه حاجة.»
فتحت نعمة عيونها بدهشة وقالت بصوت مهتز:
– «واه!.. هو أنتِ كمان حاسة إن فيه حاجة؟!»
بصت لها زينب بسخرية لاذعة وقالت:
– «واه! هو أنتِ كمان بتحسي يا مرات عمي؟! ولا إيه الحكاية؟!»
اتنفضت نعمة وقالت بغضب وعروقها بارزة:
– «قصدك إيه يا بت أنتِ؟! إيه قلة الأدب دي يا مكسوفة الرقبة!»
ردت زينب بسخرية وهي بتقوم من مكانها:
– «لا.. ما أقصدش حاجة خالص يا خالة.. وعموماً، أنا رايحة أشوف حمزة أخوي، أعرف منه لو وصله عنه خبر.. بعد إذنك.»
وسابتها ومشيت من قدامها. وقفت نعمة باصة في أثرها بغيظ وهي بتمتم لنفسها:
– «ما أعرفش ابني حب فيكي إيه والله العظيم على طول لسانك دي!»
وتنفست بعمق ومشت هي كمان.
وبعد حوالي ساعة من التوتر ده..
دخل «منصور» من باب الجنينة الوراني اللي بيؤدي للفرندا مباشرة، عشان يدخل على مكتب الحاج نعمان من غير ما حد يحس بيه، خصوصًا إن الدار مليان ناس وضيوف بسبب الفرح ومش عايز يخض حد.
طلع تليفونه وكلم «حمزة» وقال بسرعة:
– «افتح لي البوابة الورانية بتاعت الفرندا يا حمزة عشان عايز أدخل منها.»
سأله حمزة باستغراب وقلق:
– «ليه يا منصور؟! في حاجة ولا إيه؟!»
رد منصور بصوت هادئ ومتحفظ:
– «لا.. مافيش حاجة، بس يلا افتحها بس كده عشان في ناس كتير بره، وأنا مش عايز أدخل من وسط الزحمة أنا وأيمن.»
استغرب حمزة، ونزل بسرعة وفتح البوابة. وأول ما فتح، لقى وش منصور وأيمن، والصدمة إنه شاف الدم مالي قميص منصور!
جري عليه حمزة برعب وقال بصوت عالي:
– «واه! إيه اللي حصل يا أخوي؟! منين الدم ده كله؟!»
رد منصور بثبات مصطنع وهو بيحاول يطمنه:
– «ما تخافش يا حمزة.. أنا بخير، أنا زين والله.»
قاطعهم حمزة بعصبية وخوف وهو بيبص لأيمن:
– «زين كيف بدمك ده؟! في إيه يا أيمن.. ما تنطق!»
رد أيمن بسرعة:
– «بس ندخل جوه المكتب بس دلوقت، وهقول لك على كل حاجة.»
دخلوا التلاتة بسرعة على المكتب، وكان قاعد فيه الحاج نعمان، وعم عبد الرحيم، وعم عبد الحميد. وأول ما شافوا منصور بالمنظر ده، قاموا مفزوعين وجريوا عليه.
قرب أبوه عبد الرحيم بخوف وقال بصوت مهتز:
– «إيه اللي جرى يا ولدي؟! مال دمك سايح كده يا ضنايا؟! طمني إيه اللي حصل؟!»
واتكلم الحاج نعمان بلهفة وقلق:
– «ما تنطق يا ولدي.. فهمنا، سابت ركابنا!»
كان منصور تعبان ومش قادر يتكلم كتير، فبادر «أيمن» وقعد يحكي لهم على اللي حصل من أوله لآخره بالتفصيل، وإزاي الطلقة جت في دراعه غدر وسط الخناقة.
زعق حمزة بقهر وقال:
– «وهو ما كلمتنيش ليه يا منصور من ساعتها؟!»
رد منصور بتعب:
– «يا أخوي دي طلقة في طرف دراعي.. وما كانش له داعي للقلق، والحمد لله الطلقة جت سطحية مش عميقة ولا حاجة، وطلعناها بسهولة وأديني قدامكم أهو زي الحصان.»
رد أبوه بوجع:
– «حويط كيف يا ولدي؟! ده أنت عريس ويحصل فيك كده قبيل فرحك بيومين! لا حول ولا قوة إلا بالله!»
قال عم عبد الحميد بقلق:
– «بس واضح عليك يا ولدي إنك نزفت دم كتير وجسمك مهجود.»
قال أيمن بسرعة:
– «حصل يا عمي.. دلوقتي لازم يعملوا له حاجة ياكلها عشان يلحق يعوض اللي فقده.»
وفي اللحظة دي.. سمعوا صوت خبط على باب المكتب.
قال الحاج نعمان بصوت عالي:
– «مين؟.. ادخل.»
اتفتح الباب ودخلت «زينب». وأول ما دخلت ووقفت عيونها على منصور وهو بالمنظر ده وقميصه مليان دم، حطت إيدها على صدرها وصرخت بانهيار ودموع:
– «يا مراري! إيه اللي حصل؟! إيه اللي جرى لك يا منصور؟! إيه الدم ده كله؟! أنا كان قلبي حاسس والله العظيم من إمبارح وقلبي مقبوض وما نمتش طول الليل.. إيه اللي جرى لك يا راجل؟! قل لي إيه اللي حصل!»
انهارت زينب في العياط وجريت عليه وهي بتمسك فيه بترعش، فقام أبوها يطبطب عليها وقال بصوت حازم بيهديها:
– «اهدي يا بنتي.. اهدي، جوزك قدامك أهو زي الفل، ما تخافيش.»
بكت زينب بحرقة وقالت:
– «يا أبوي أنا كان قلبي حاسس.. قلبي بينط من صدري! قول لي إيه اللي حصل لك والنبي!»
ابتسم منصور بتعب، وقام وقف قدامها بثبات وقال بصوت دافئ وهو بيحاول يهديها:
– «والله زين وما فيش أي حاجة.. دي طلقة جت في دراعي بس سطحية وما فيهاش أي أذى، شوفي.. أنا واقف قدامك أهو وزين وما فيش فيا حاجة خالص!»
بصت له بدموع وهي بتهز راسها بعدم تصديق:
– «ما فيش فيك حاجة كيف بس؟! ده أنت كلك دم!»
تدخل أيمن وقال بجدية:
– «مش وقت الكلام ده دلوقتي يا زينب.. خليه يدخل يرتاح في أوضته، واعملوا له لقمة وعصير يروقوا دمه عشان يقف على رجليه بالليل وما يتعبش.»
مسكه حمزة وأيمن من دراعاته وسندوه بحذر عشان يطلعوه لأوضته. وقبل ما يخرجوا، وجه الحاج نعمان كلامه لـ«زينب» وقال:
– «شوفي يا بنتي أنتِ وراهم.. لو في حد غريب بره الدار ولا لأ.. مش عايزين حد يعرف باللي حصل ده ويكثر الكلام.»
نزلت زينب تشوف الموضوع، وطلعوا بمنصور على فوق.
وأثناء ما هما طالعين على السلم، شافتهم «نعمة»، ففتحت عيونها برعب وجريت عليه بلهفة الأم الحقيقية وقالت:
– «يا ولدي! إيه اللي جرى لك؟!»
بص لها منصور بجمود ونبرة رسمية وقال:
– «ما فيش حاجة ياما.. أنا طالع أرتاح دلوقتي.»
قالت بدموع وهي شايفة هدومه المليانة دم:
– «ما فيش حاجة كيف يا ولدي؟! هدومك كلها دم! إيه اللي حصل فهمني؟!»
هنا.. قربت «زينب» بحنية وقالت بصوت أنثوي هادئ:
– «ما تقلقيش يا خالة.. دي كانت عورة بسيطة والحمد لله اتضمدت وبقى زين، أنا طالعة أعمله لقمة ياكلها وتغذيه.»
قالت نعمة بقلق:
– «لا.. اطلعي أنتِ وياه ارتاحوا، وأنا بنفسي اللي هعمله الأكل الدافي وأجيبه له لحد عنده.»
بعد ما طلعوا أوضته وارتاح على السرير، كان «رجب» واقف فوق على السلم مراقب الموقف كله من بعيد بذكاء خبيث. أول ما شافهم داخلين الأوضة ومنصور مصاب، رسم على وشه ملامح الصدمة والخوف المصطنع عشان ما حدش يشك فيه نهائي.
جرى رجب بسرعة ناحية أوضة منصور، ودخل عليهم وهو بيفرك إيديه بقلق مزيف وقال:
– «يا نهار أسود! إيه اللي حصل يا منصور؟! إيه الدم ده كله يا ولد عمي؟!»
بص له منصور بنظرة ثابتة وثاقبة، ووقف ثواني بيحلل ملامحه المرتبكة تحت التوتر الخفي. لاحظ رجب نظرة منصور، فحاول يثبت عينيه ويتحكم في توتره ويثبت نظراته ببرود كذاب.
طبطب منصور على كتف رجب بخفة وقال بصوت هادئ ومقصود:
– «لا يا ولد عمي.. ما تقلقش، أنا زين.. وزين قوي كمان!»
وسابه ودخل عشان يرتاح.
دخل رجب أوضته وقفل الباب وراه كويس بالمفتاح. قعد لوحده، وكان حاسس إن لهجة منصور كانت غريبة و«مريبة جدًا»، وكأن منصور عارف حاجة أو شاكك فيه! فضل قاعد مكانه بياكل في نفسه من التوتر والخوف، ومش عارف مصيره رايح على فين!
ومع مرور الوقت في القاهرة..
بدأت غالية تمل من كتر ما يونس مشغول وهي قاعدة لوحدها، فقربت منه وقالت بدلع:
– «يا يونس.. عايزة أسبح (أدخل الدبليو سي/الحمام).»
بص لها يونس باستغراب وقال بضحكة:
– «تسبحي إيه يا غالية؟! أنتِ في الشركة مش في البحر!»
قالت بعند صعيدي:
– «يا عم الدبليو سي.. أنا بقول لك عايزة أدخل الحمام، دلوني عليه بقى!»
ضحك وقال:
– «طيب يا ستي حاضر.. هنادي لك جيلان تاخدك.»
نادى لجيلان، وجت خدتها. وأثناء ما كانت غالية ماشية معاها في الممر، كانت جيلان كل شوية تبص لها من فوق لتحت بسخرية. فوقفت غالية والتفتت لها بحدة وقالت:
– «مالك يا أختي؟! جايباني من فوق لتحت كده ليه؟! صورتيني وصورتِ كل حتة فيا؟!»
ردت جيلان بتمايع:
– «أنا مش قصدي.. بس أصل شكل حضرتك غريبة عن هنا.»
قالت غالية بعزة نفس:
– «أيوه.. أنا من الصعيد، بنت عم يونس ومراته! ما مليش عيونك ولا إيه؟!»
قربت جيلان منها وقالت بخبث في ودنها:
– «لا إزاي.. بس عدلي من لبس حضرتك شوية، خليكي متحضرة!»
وبصت لها بسخرية ولفت عشان تمشي.
بس قبل ما تتحرك، مدت غالية إيدها ومسكتها من شعرها جامد وقالت بصوت هادر ومرعب:
– «بتتنقي.. اتعدلي وتتكلمي وياي زين يا روح أمك! عايزاني أطلع لحمي بره عشان الناس تقعد تبص عليه وتاكل في لحمي زيك كده؟! يا بت ده أنتِ ما تجيش فيا حاجة أصلًا! روحي يا حلوة.. روحي، ده إحنا لو حشنا البوهية اللي حطاها على وشك دي هتطلعي قرد! وخلي بالك.. لو ما احترمتيش نفسك وبطلتِ تبصي لجوزي، هيتقطع عيشك من هنا، ومفيش أي حد في مصر هيشغلك عنده، وخلي بالك إن نص الشركة دي باسمي.. فاحترمي نفسك!»
وزقّتها بقوة وقالت:
– «روحي شوفي شغلك يا سنيورة!»
ورمت طرف طرحتها وراها بثقة ومشيت، بينما فضلت جيلان واقفة متغاظة وبتغلي من الغل!
وراحت جيلان بسرعة على مكتب موظف جديد اسمه «عمار»، وقالت له تتفق معه يسخف على غالية ويعترض طريقها، وفعلاً استناها عمار أول ما طلعت من الحمام ووقف قدامها وقال بطريقة استفزازية:
– «القمر ده كله رايح فين؟! مش شايفاني واقف ولا إيه؟!»
بصت له غالية بقرف وقالت:
– «قمر مين يا جدع أنت؟! أنت هتبقى مين أصلًا عشان أشوفك؟! وسع لي الطريق عشان أعدي، وتتعدل في وقفتك وابعد عن طريقي!»
حاول عمار يتمادى ويمسكها من دراعها، فهبت فيه بصوت عالي وقالت بحدة:
– «نهار أسود ومنيل! أنت عايز تمد إيدك عليا يا حيوان؟! أنت ما تعرفش أنا مين ولا إيه؟! إزاي تجرؤ تمد إيدك عليا يا قليل الرماية!»
اتصدم عمار من زعيقها وقوتها وقال:
– «خلاص خلاص.. أنا كنت جاي أتعرف عليكي، مالك طلعانا فيها كده؟! وعاملة لنا الشريفة العفيفة.. هتلاقيك مقضياها بره وجاية بس هنا رسمة الدور علينا!»
فقدت غالية أعصابها وقالت:
– «يا قليل الحياء يا قليل التربية! والله لأوريكم!»
قلعت الكوتشي اللي في رجلها، ونزلت على دماغه تقعد تضرب فيه بكل قوتها وهي بتزعق، وجريت جيلان تنادي ليونس اللي جه مذعور ولقى غالية ماسكة عمار بتضربه بالكوتشي، فهجم يونس على عمار ينزل فيه ضرب وبوكسات بعد ما عرف اللي حصل، وطرد جيلان وعمار من الشركة نهائي.
ولما دخلوا المكتب، تفاجأت غالية إن يونس مش زعلان منها، بل بالعكس فخر بيها وقال إنها بستة راجل، وقرر إنه يخرجها ويفسحها.
أخدها يونس ولف بيها في شوارع القاهرة ووقفوا على كورنيش النيل، وبعدها دخلوا مول تجاري ضخم عملاق؛ أول ما دخلت غالية فتحت عيونها بصدمة وبقت تبص يمين وشمال على السلالم اللي بتتحرك لوحدها وقالت برعب عفوي وهي متمسكة بدراع يونس:
– «يا واه! يا واه يا يونس! السلم.. السلم بيتحرك لوحده! يا لهوي ياما!»
ضحك يونس بصوت عالي وقال:
– «يا مجنونة وطي حسك.. هتفضحيني هنا وسط الناس!»
وهي دايخة من كبر المكان قالت:
– «يا يونس أنا دوخت.. المكان كبير أوي!»
مسك إيدها بحنان وسندها، ودخلوا محلات المكياج والملابس الفخمة واختار لها حاجات كتيرة و«بجامات قصيرة» شقية، وأول ما شافتها غالية احمر وشها من الكسوف وهو ضحك عليها بحب. وبعدها أخدها اتغدوا في مطعم راقي على النيل.
وبعد ما خلصوا يومهم الطويل في القاهرة..
ركب يونس وغالية العربية في طريق العودة للنجع. كانت غالية من تعب اليوم كله وتفاصيل الرحلة غرقت في النوم على الكرسي وهي حاطة رأسها براحة.
وفي وسط الطريق الهادي، لاحظ يونس في المراية عربية «تريلا» ضخمة ماشية وراهم بقالها تقريبًا ساعة كاملة!
حاول يونس ما يحسسش غالية بأي توتر عشان ما يخضهاش، فقرر بهدوء إنه يغير طريقه ويدخل من طريق فرعي تاني. لكن العجيب إن التريلا فضلت ماشية وراه بنفس الإصرار!
في الوقت ده، كانت عربيات البودي جارد التابعة ليونس ماشية وراه بس على مسافة بعيدة نسبيًا. حس يونس إن الموضوع مش مطمن، فطلع تليفونه وكلم رئيس الحراسة وقال له بصوت حازم وخافت:
– «اسمعني كويس.. أنا هغير طريقي دلوقتي، وعايزكم تتابعوا العربية التريلا اللي ماشية ورانا دي، هتدخل ورانا ولا لأ؟ والطريق هنا ضلمة ومقطوع، وعايز عربياتكم تقرب من عربيتي حالًا!»
رد البودي جارد بسرعة:
– «علم يا فندم، إحنا جاهزين وراكم على طول.»
وفعلًا، دخل يونس من طريق تاني ضلمة ومقطوع، وبص في المراية لقى إن التريلا مش بس دخلت وراه، دي زادت في سرعتها بشكل جنوني، وبقت عايزة تيجي تخبط عربية يونس بأي طريقة!
حاول يونس يتفاداها كتير وبمهارة عالية، بس التريلا كانت مقربة منه جدًا وبتضغط عليه. في اللحظة دي، عربيات البودي جارد حاولت تلحقها وتقرب عشان تصدها، بس قبل ما يلحقوها.. كانت التريلا خبطت عربية يونس وغالية بعنف وقوة!
صحيت غالية مفزوعة على الصدمة والرزع المرعب، فصرخت بهستيريا وهي بتمسك في يونس وبتقول بدموع وذعر:
– «الحقني يا يونس! واااه ياما!»
وقبل ما يلحق يطمنها، اتزحلقت العربية بيهم من قوة الخبطة ودخلت مقلوبة ومخبطة في شجرة كبيرة على جنب الطريق. وفي نفس اللحظة الخطيرة دي، قدرت عربيات البودي جارد توصل وتعمل مناورة سريعة وهجمت على التريلا بكل قوتها لحد ما قلبت عربية التريلا الضخمة على جنبها في نص الطريق!🔥💣
رأيكم يهمني يا أحلى عيلة ❤️
بعد النهاية الصعبة اللي وقفنا عندها النهارده، مستنية أسمع توقعاتكم وآراءكم في اللي حصل:
1️⃣ مين في رأيكم ورا محاولة الاعتداء على يونس وغالية؟ وهل رجب هو اللي دبّر الحادث بنفسه، ولا فيه حد أكبر منه بيحركه؟
2️⃣ هل يونس وغالية هيقدروا يخرجوا من الحادث سالمين؟ ولا اللي جاي هيكون أصعب مما نتخيل؟
3️⃣ منصور بدأ يشك في رجب.. تفتكروا هيقدر يكشف حقيقته، ولا رجب هينجح في الهروب من الشكوك؟
4️⃣ زينب هتعرف مين السبب في إصابة منصور؟ وإيه رد فعلها لما الحقيقة تظهر؟
5️⃣ هل فرحة يونس وغالية هتكمل أخيرًا، ولا لسه القدر مخبّي لهم مفاجآت تانية؟
وبقولكم حاجة من قلبي يا حبايبي.. ❤️
أنا زعلانة شوية إن التفاعل والكومنتات بقوا أقل من الأول، وإحنا خلاص قربنا نودّع حكاية غالية ويونس، بعد كل الأحداث والمواقف اللي عشناها مع بعض.
نفسي نكمل الأيام الأخيرة دي بنفس الحماس واللمة الحلوة اللي بدأنا بيها، ونشوف تعليقاتكم وتوقعاتكم اللي بتفرح قلبي وبتخليني أحس إنكم عايشين معايا كل لحظة في الرواية.
ما تحرموش الكاتبة من كلامكم الحلو، واكتبولي توقعاتكم بالتفصيل.. نفسي أشوف الكومنتات منورة الفصل زي زمان. ❤️
بحبكم يا أحلى عيلة، وربنا يديم بينا المحبة والود دايمًا...
الفصل الخامس والعشرون من هنا