رواية جزيرة غراب الوادي الفصل السابع عشر 17 بقلم سمارة آل حربي


رواية جزيرة غراب الوادي الفصل السابع عشر 17 بقلم سمارة آل حربي


صلوا على النبي 🤍
اللَّهُــمَّ صَلِّ وَسَـــلِّمْ وَبَارِكْ على نَبِيِّنَـــا مُحمَّدﷺ

«أتيتُ إليك لأضع حدّاً لخوفٍ أثقل كاهلي.. جئتُ أبحث عن كلمة صدقٍ واحدة وسط كل هذا الزيف» 

(قرار تحت سترة الليل) 

﷽

عند سماع حديثه تملكها شعور كبير بصدق كلامه.. التفتت إليه ببكاء تنظر في وجهه دون رد.

جلال (بنبرة ترجي هادئة): فكري قبل ما الأوان يفوت.

رأت موج أحداً يأتي من خلف جلال ليمر بالشارع فالتفتت سريعاً وغادرت بخطوات مضطربة، بينما تنحى جلال ليخفي نفسه والتفت هو الآخر مغادراً على أمل أن تقتنع بحديثه قبل أن يسبقه شاهين بفعل خبيث نحو موج أو أذيتها.
ــــــــــــــــــــــــــ**

عادت للمنزل ودلفت لغرفتها بصمت أبدلت ثيابها واستلقت في سريرها تخفي رأسها بذراعها.

دخلت إليها خلود:
خلود: خير يا هانم؟ نايمة دلوك ليه ثم مين سمحلك تلبسي الطقم بتاعي من غير ما تقولي لي وتستأذني؟ وأنتِ عارفة إنه جديد ملبستوش غير مرتين!

لم تجب موج على حديث خلود فاستغربت واقتربت منها تهزها بيدها:
خلود: موج فزّي مالك أنتِ زينة؟

موج (بصوت مخنوق دون أن تلتفت): سبيني يا خلود دلوك الله يخليكي..

خلود: وه مالك طمنيني طيب!

موج: أنا زينة، بس راسي تقيلة.. الظاهر صايبني برد.

خلود: متأكدة؟

موج: اه سبيني شوي لبين أبوي ما ييجي للعشا.

خلود: ماشي.. طيب أجيبلك برشامة؟

موج: خدت من الخالة زينب.. اطلعي بقى واقفلي النور.

تركتها خلود وخرجت بينما انفجرت موج بالبكاء وحيدة وحائرة.. لا تصدق أن والدها رفض جلال الأعزب من أجل شاهين المتزوج من اثنتين وسمعته التي لا تذكر إلا بالسوء 

ولكن نظرات جلال وحديثه يبدو صادقاً.. كانت لا تعلم ماذا تفعل ولكن أن تتزوج من دون علم والدها كان أشبه بالمستحيل.

ظلت هكذا حتى المساء دلفت إليها خلود لتوقظها للعشاء بعد عودة والدهما فتهيأت وخرجت غسلت وجهها ودخلت إليهم لتتناول العشاء.

فايز: مالك أنتِ زينة؟

موج: اه يا بوي الحمد لله.

أومأ فايز برأسه ثم صمت.

مرّ العشاء وبعده مباشرة عادت للغرفة مرة أخرى فدلفت خلود خلفها:
خلود: موج ده مش برد وتعب.. أنتِ فيكي إيه؟

موج: قلت تعبانة!

خلود: حد كلمك أو زعلك؟ ريحيني!

موج: له، قلت لك راسي تقيلة عاوزه أنام وبس ودلوك كفاية حديت لأني مصدعة.

صمتت خلود بغير تصديق لكنها أرادت أن لا تزيد في الأسئلة فخرجت مرة أخرى.
ـــــــــــــــــــــــــــــ**

مرّ الليل ثقيلاً وحزيناً على موج وأيضاً جلال الذي كان يفكر بها طوال الوقت.. ماذا تفعل؟ هل هدأت أم ما زالت على حالها؟ أمسك هاتفه عدة مرات ليتصل بها، ولكن ولا مرة استطاع أن يفعل.
~
في اليوم التالي. نفس الهدوء والصمت والتفكير من كلا الطرفين ودون رد من موج على طلب جلال.
~
في مساء اليوم الثالث دخلت موج وخلود للنوم في غرفتهما، فطرق فايز الباب ودلف.

نظر نحو خلود ثم قال:
فايز: اطلعي يا خلود بره دقيقة عاوز موج في موضوع.

استغربت خلود لكنها أومأت بطاعة وخرجت مغلقة الباب خلفها بينما تسارعت ضربات قلب موج برعب خوفاً من حديثه عن الزواج من شاهين كما أخبرها جلال!

فايز: جاييكي عريس وعاوز رأيك.

تنهدت موج بضيق وهي تسأل بنبرة خائفة:
موج: عريس مين؟!

فايز (ويبدو عليه الفرح والاعتزاز): ولد الحاكم الكبير.. شاهين بيه!

ما إن سمعت موج الاسم حتى سالت دموعها بخنق شديد، لا تستطيع الرد ولا حتى التقاط أنفاسها!

فايز (بعجب): غريبة مالك فيه إيه؟!

موج (بدموع يابسة): مفيش.. بس مش شاهين بيه ده متجوز؟!

فايز: وماله افرض متجوز؟ بعدين أول ما قلت اسمه بتبكي ليه؟!

موج (بحرقة): يعني إيه يا بوي هتجوز راجل متجوز وكمان علي حرمتين..ده غير الكلام اللي بيقولوه عنه!

فايز: وايه الكلام ده؟!

صمتت موج لا تستطيع الحديث في أمور شاهين النسائية ولا علاقاته المشبوهة.

فايز (بنبرة حاسمة): اسمعي يا بتي.. شاهين بيه راجل زين ومحترم غير إنه ابن العمدة الكبير يعني بكرة وبعده هيكون هو حاكم الجزيرة وأنتِ هتكوني ست الناس دي كلها وبالنسبة لحريمه مالكيش صالح خليكي في روحك وبس!

موج: بس ما أقدرش أتجوز واحد متجوز!

فايز: ليه ما تقدرِيش فين المشكلة؟! لا عيب ولا حرام، شرع ربنا!

موج: يا بوي ما...

فايز (مقاطعاً وهو يقف لينهي النقاش): فكري مع نفسك وبكرة تخبريني.. الموضوع مش هيطول والجواز على طول بصي للدنيا حواليكي؛ كل صحابك واللي من دورك اتجوزوا وخلفوا 

وده نسب يشرف وهيرفع شأنك وشأننا معاكي.. وما تنسيش مين متقدم ولو رفضتي يبقى بترفضي مين وولد مين!

تركها وخرج بينما انفجرت باكية بحزن يعتصر قلبها.. فلقد صدق حديث جلال بالنص! 

أمسكت الهاتف سريعاً لتتصل بجلال لكنها تراجعت في آخر لحظة:

موج: هقول له إيه كلامك صوح هيقول نكتب من ورا أبوكي يعني يا أما أتجوز شاهين على ضرتين يا أتجوز جلال في الدرى من ورا أبوي آه يا موج.. آه!

دلفت إليها خلود مسرعة بفضول فأخبرتها موج بحديث والدها:
خلود (بصدمة ورفض): مستحيل أوَعاكي توافقي!

موج: تفتكري حديت أبوكي ده لو رفضت هيفرق؟!

خلود: اه هيفرق مش معقول يغصبك على واحد زي ده.. مقام إيه وزفت إيه؟! ده متجوز اتنين وراجل الظاهر عينه فارغة!

موج: مش عارفة.. مقفلة في وشي من كل جهة!

خلود: إن شاء الله خير.. قالك فكري لبكرة. بكرة قولي له فكرت ومش موافقة أكيد لو هيغصبك ما كانش قال لك فكري كان قال لك هتتجوزي شاهين بيه من غير ما ياخد رأيك!

موج: يا ريت يا خلود يكون معاكي حق!

خلود (بغيظ): إن شاء الله هما ولاد الحاكم خلاص خلصت البيوت والبنات في الجزيرة ما فيش غيرنا؟! ده إيه القرف ده!

موج: صوح.. اشمعنى؟! 

تنهدت موج بحزن رفعت رأسها للسموات بدعاء خاشع:
موج: يا رب اعميه ابعده عني!
ـــــــــــــــــــــــــــــــــــ*"

في اليوم التالي 

انتظر جلال مرة أخرى أي رد أو اتصال منها ولكن دون جدوى. كان يجلس بضيق واعتصارٍ يسري في صدره، حتى أتت إليه عمتُه نجاة ورأته على تلك الحال، فجلست بجواره وقالت:

نجاة: خير يا جلال اصبري يا عمتي وهأظبط كل حاجة.. وإيه الجديد؟

جلال (بنبرة جادة وقاطعة): بقول لك إيه يا عمتي.. لو كتبت كتابي من ورا أبوي وجيت خبرته بعدها هيقتنع؟!

نجاة (بدهشة واستنكار وذهول): تعمل إيه أنت بتقول إيه يا جلال؟!

جلال: إن شاء الله هاجوز.. وبعدين أقول لأبوي.

نجاة (وهي تلطم بيديها): يا مَري أنت فاكرها لعبة؟!

جلال: مش لعبة بس مستحيل هيوافق بعد مشكلتي مع شاهين!

نجاة: مش مهم نحاول ونقنعه.. إنما من وراه يا جلال؟! أبوك يتبرى منك!

جلال: ماظنش.

نجاة: له، ظُن غنّام واعر عند كسر كلمته.. طيب شوف غيرها اتجوزها!

جلال: مش عاوز غيرها.. وشاهين عاوز يتجوزها عِندٍ ليه أعمل اللي عايزه هو مش اللي عايزه أنا؟!

نجاة: الله يرضى عنك يا ولدي.. بلاش شيطانك يضحك عليك!

جلال: ما تخافيش.. المهم لو حصل تقفي في صفي ولا تخافي من أبوي؟!

نجاة: ما خافش إيه وصفّك إيه أنا مش مصدقة أصلاً!

جلال: صدقي.. وادعي لي بس اللي في راسي يتم.

نجاة: مش هادعي.. هادعي ربنا يهديك.

جلال (بابتسامة جافة): وماله.. زين برضه!

نجاة: مش فاهمة مالك اليامين دول يا جلال.. وليه متمسك بالبت دي بالذات أوعى تكون لفت راسك وبتضحك عليك؟!

جلال (بتنهيدة حارة): تضحك؟ وهي اللي عاوزة كده يعني؟! يا ريت يا عمتي!

نجاة: أومال إيه طيب؟!

جلال: خير.. هتشوفي إن شاء الله كل خير.

أكملت نجاة حديثها معه محاولةً إثنائه واقناعه بالعدول عن هذا التفكير المجنون وفي تلك الأثناء، عاد فايز بَاكراً من عمله في الدكان..

دخل البيت ووجد موج قد عادت هي الأخرى من عملها وجالسة في الصالة فاقترب منها وسألها بمباشرة ونبرة تنتظر الموافقة:

فايز: عملتي إيه؟!

موج (بقلق وتوتر شديدين من رد فعله): يا بوي سامحني.. مش هأقدر أنا مش موافقة!

فايز (بنبرة قاطعة تحاول كبح غضبه): هاعتبر روحي لسه ما خدتش رأيك وهسيبك يوم تاني تفكري زين!

موج (بدموع وقهوة): طيب لما أنت مش عاوزني أرفض ليه بتاخد رأيي من الأول؟!

فايز: أهو عاوز الجواز ييجي بالرضا.

موج: بس أنا مش راضية يا بوي بلاها جواز خالص!

فايز: زي ما قلت هاعتبر لسه ما رديتيش وهستنى رأيك بكرة!

تركها ودلف إلى غرفته يبدل ثيابه.. جلس على السرير وأخرج هاتفه ممسكاً به بقلة حيلة لاختبار شاهين علّه يصرف النظر دون خلق خصومة مع عائلة الحاكم.

ضغط على زر الاتصال فجاءه الرد سريعاً:
شاهين: ألو!

فايز (بنبرة متلعثمة): أيوه يا شاهين بيه..

شاهين (بلهفة ومكر): أيوه فرّحني إيه الأخبار؟

فايز: والله جيت بدري وسألت البت عن رأيها وقالت إنها مش عاوزه تتجوز دلوك.

ضحك شاهين ضحكة ساخرة جافة أرجعت الصدى في السماعة:
شاهين: وإيه السبب يا فايز؟

فايز: زي ما قولتلك يا شاهين بيه بتقول مش هاتجوز دلوك.

شاهين (بنبرة قاسية ومسمومة): بس مش ده السبب.. الظاهر إنك غافل!

فايز (بعقد حاجبيه بوجل): يعني إيه؟!

شاهين: شوف ما حبتش اعمل مشاكل وطلبتها منك بما يرضي الله وعلى سنة رسوله وعداني العيب.. بس أحب أنبهك بنتك رفضتني علشان عاوزه تتجوز جلال!

اندهش فايز وتجمد الدم في عروقه واشتعل رأسه بذهول غريب:
فايز: يعني إيه؟! مش فاهم حاجة!

شاهين (يفرز سمه بثقة): بنتك على علاقة بجلال وبتقابله وأنا عارف وحبيت ألم الموضوع من غير شوشرة بس ما نفعش!

فايز (بصوت مرتعش وغضب مكتوم): علاقة بمين وبتقابل مين؟!

شاهين: والله مش مصدقني اسألها لو أنا كداب ويمكن كمان بتكلمه في التليفون ويا عالم وصلوا لغاية فين سوا وأنت نايم على ودانك!

سكت شاهين قليلاً ثم أردف بجمود ومكر ثعلب:
شاهين: أنا مش هاممني بنتك ولا يفرق جوازي منها بحاجة.. بس أنت خابر الشغل اللي بينا وإني خليفة أبوي وبعدين قلت لك مكانتك هتتغير لما آخد الحكم

بس الكلام ما هينفعش غير بصلة قوية زي الجواز.. عشان كده قلت لك أتجوزها. بس مش مهم حصل خير.. مع السلامة دلوك عشان مش فاضي.

أغلق شاهين الهاتف بابتسامة خبيثة انتصرت على الشاشة المظلمة وهو على يقين تام بأن حريثه وسّمه الذي نفثه في أذن فايز سيغير كل شيء وأن هذا الجواز سيتم فوراً وفي أسرع وقت!

خرج فايز من غرفته كالثور الهائج وقد أعمى الغضب بصره وشل تفكيره متوجهاً صوب غرفة ابنتيه مباشرة.

كانت موج قد دلفت للتو تحاول التخفيف عن صدرها الضيق ففوجئت به يقتحم الغرفة كالبركان الثائر ينظر إليها بعيون تشتعل شراراً!

فايز (بصوت يرج أركان البيت): أنتِ يا بت أنتِ فيه حاجة بينك وبين جلال بيه؟!

انتفض جسد موج رعباً وتسارعت أنفاسها وتجمدت الدماء في أطرافها من هول الصدمة والمفاجأة!

فايز (بصراخ يملأه الغضب): انطقي!

موج (برعب وبكاء متلعثم): له يا بوي أعرفه منين أنا؟!

وقع نظر فايز على فراشها فرأى هاتفها ملقى هناك. خطفه بسرعة ومده نحو وجهها بآمرية قاسية:
فايز: افتحي التليفون ده!

موج (بذهول ورجفة): ليه يا بوي؟!

فايز (بصوت جهوري زلزل المكان): قلت لك افتحيه!

ارتعدت موج كالعصفور البللور من صوته العالي وأخذت الهاتف بأصابع مرتعشة وفتحت قفل الشاشة وما إن فتحته حتى خطفه من يدها بعنف! 

أخرج فايز هاتفه الخاص وبدأ يملي أرقام جلال ليكتبها في شريط البحث بهاتف موج.. وما هي إلا لحظات حتى ظهر الاسم مخزناً في سجل الأسماء ومعه قائمة بمكالمات صادرة وواردة!

رفع فايز عينيه ونظر إليها بذهولٍ قاتل امتزج بالعار والخيبة:
فايز: يا بنت الكلب بتقرطسيني وبتتسرمحي مع الرجال من وراي؟!

موج (ببكاء وشهاق وتوسل): له والله يا بوي والله ما عملت حاجة غلط اسمعني يا بوي!

ألقى الهاتف من يده بكل قوته على التخت وأصبح كالمجنون لا يرى أمامه.. انهال عليها ضرباً مبرحاً بكفيه وقدميه يفرغ فيها خيبته وغضبه المسموم من كلمات شاهين!

صرخت موج صرخات متتالية تمزق القلوب وهرعت على أثر الصوت أمها وخلود وفرح يصرخن بالويل والندب وحاولن الالتفاف حوله وإبعاده عنها والإمساك بيده لكن دون جدوى.. 

فقد كان يدفعهن بقسوة وعنف وواصل ضربها وموج صريعة تحت قدميه تبكي وتتوسل برجاء مكسور!
فقد عقله تماماً وكان عنفه شديداً تجاهها حتى تعب جسده من قسوة ضربه لها

فتراجع عائداً للخلف يلهث بشدة تحت صرخاتها المتتالية وبكاء أمها وأخواتها الذي لم يتوقف.. كن يقفن غير مدركات لما يحدث، ولا يعلمن سر هذا العنف المفاجئ والجنوني!

وقف فايز أمامها بعينين تشتعلان غضباً وثأراً لكبريائه وأشار إليها بإبهامه مهدداً:

فايز: هتتجوزي شاهين بيه غصب عنك! تجهزي حالك من دلوك!

انحنى وأمسك بهاتفها من التخت وتابعة بنبرة قاطعة تحبس الأنفاس:
فايز: مفيش تليفون ولا شغل ورجلك لو طلعت بره باب الدار.. هادفنك حية!

تركهم وغادر المنزل كالعاصفة يضرب الباب خلفه بقوة زلزلت أركان البيت.

هرعت خلود وفرح ونزلتا على ركبتيهما تساعدان موج بصعوبة على النهوض من مكانها لتجلس على التخت، والدموع تنهمر من عيون الجميع.

سعدية (ببكاء ونحيب وهي تمسك يديها وتتفحص وجهها المليء بالكدمات): اسم الله عليكِ يا بتي إيه اللي حصل؟! أبوكي ماله بيكي ضربك ليه كده؟!

موج (ببكاء مرير وألم يمزق صدرها وجسدها): الحقيني يا ماي ساعديني الله يخليكي!

خلود (بدموع مكتومة): قولي لنا طيب حصل إيه؟!

موج: أبوي هيجوزني غصب لشاهين بيه!

سعدية (بصدمة): شاهين بيه مين فيهم مش ده ولد العمدة الكبير؟!

خلود: هو!

سعدية: كيف يعني ما هو متجوز!

موج (تنتخب بحرقة): وعاوز يتجوزني علي حريمه!

ظلت الأم وأخواتها يتساءلن عن الأمر في حيرة وضياع، تحت بكاء موج المستمر وألم جسدها المنهك من الضرب والخذلان..
ــــــــــــــــــــــــــــــــــــ**

وفي آخر المساء...
نفد صبر جلال تماماً وقرر أن يحدثها ليسألها عن رأيها وليفهم هل حدث شيء سيئ في هذه الأيام التي مرت على صمتها وهدوئها المريب.

أمسك الهاتف وضغط على رقمها بحذر ولهفة، لكنه صُدم عندما أتاه صوت التسجيل الصوتي الجاف:
"عفواً.. الهاتف المطلوب مغلق أو خارج التغطية. 

جلال (بعقد حاجبيه بوجل): يعني إيه مغلق مقفول ليه؟!

سكت قليلاً وتسلل الشك إلى عقله فأردف:
جلال: ولا حظرتني؟!

فكر قليلاً ثم اتصل من رقمه الآخر لكن نفس التسجيل أتاه مرة أخرى يعلن أن الهاتف مغلق.

جلس جلال حائراً والنار تأكل في صدره؛ لا يعلم هل هي من أغلقت الهاتف بسبب آخر حديث جرى بينهما ورغبتها في الابتعاد، أم أن هناك أمراً قد حدث لها!

مر عليه الليل ثقيلاً كالجبل يتقلب في فراشه بين التفكير والضيق القاتل، يريد أن يطمئن عليها بأي طريقة.. لكنه لا يعلم كيف الوصول إليها!

ظل جلال على حاله حتى الصباح يحترق بنار القلق والشك. 

انتظر قبل موعد ذهابها إلى العمل بمهلة كافية وخرج متوجهاً نحو الشارع الرئيسي ليقف في معبر طريقها، يترقب ظهورها من بعيد ليطمئن عليها ويحسم الأمر معها.

مر الوقت حثيثاً وتعدى منتصف النهار وفات موعد مرورها المعتاد دون أن يلمح لها أثراً! 

بدأ القلق ينهش صدره أكثر فأكثر.. انتظر ساعة كاملة أخرى والحرارة تأكل وجهه حتى لم يعد يطيق الصبر فأمر أحد حراسه بالذهاب إلى الصالون ليستعلم إن كانت قد مرت من طريق آخر

لكن الحارس عاد إليه بإجابة زادت من اشتعال ناره: البنت ما جتش الشغل النهاردة يا بيه ومن غير ما تخبر حد!"
ـــــــــــــــــــــــــــــــ**

في العمل...
كانت الخالة زينب تجلس حائرة هي الأخرى تتساءل في سرها عن سر غياب موج المفاجئ دون إذن، وقد زاد شكهُ وقلقُها بعد سؤال حارس جلال بيه عنها بشكل غير طبيعي!

أمسكت هاتفها وضغطت على رقم موج فأتاها التسجيل الصوتي المعتاد بأن الهاتف مغلق.

احتارت زينب كثيراً وقررت الاتصال بهاتف أختها خلود لتطمئن فجاءها الرد بعد لحظات:
خلود: ألو..

زينب: ألو أيوه يا خلود، عاملة إيه؟

خلود: الحمد لله يا مرت خال أنتِ عاملة إيه؟

زينب: بخير الحمد لله.. والجماعة عاملين إيه؟ طمنوني عنكم!

خلود: كله بخير الحمد لله.

زينب (بحذر حتى لا تفشي سر عمل موج للجميع): وموج أخبارها إيه دلوك؟ ليها وحشة والله!

صمتت خلود قليلاً ونبرة الضيق في صوتها لا تخفى على بديهة زينب:

خلود: موج زينة الحمد لله.. هي بس تعبانة شوي النهاردة وما قدرتش تاجي الشغل يا خالة.

زينب (باندهاش): أنتِ تعرفي؟!

خلود: اه أعرف.. أنا بس في البيت.

زينب: طيب هي صوح تعبانة قافلة تليفونها ليه؟!

خلود (بتلعثم محاول للتغطية): يمكن فصل شحن!

زينب: ماشي ابقي سلمي عليها وقولي لها ألف سلامة وخليها تكلمني لما تبقى زينة.

خلود: حاضر يا مرت خال، لما أروح هقول لها.

زينب: ماشي.. مع السلامة.

أغلقت زينب الهاتف وهي تستشعر غصّة في حديث خلود ورسمت علامات الاستفهام في رأسها لكنها تصنعت التصديق ومسحت حيرتها متمنية أن تكون الفتاة مريضة حقاً ولا شيء أكثر من ذلك!
ــــــــــــــــــــــــــــ**

ذهب جلال إلى عمله لكن عقله كان غائباً تماماً.. لم يستطع التركيز في شيء من شدة قلقه القاتل عليها وسبب اختفائها الغريب وقطع التواصل معه فجأة! 

كان متيقناً في قرارة نفسه أن الأمر ليس مجرد ظروف عادية وأن هناك طبخة خبيثة تدور في الخفاء بين شاهين وفايز لإتمام هذا الزواج بالضغط أو الإجبار.

ظل جالساً في مكتبه يطرق بأصابعه على الطاولة في توتر يفكر في طريقة مضمونة يفك بها هذا الغموض ويستكشف بها ما يدور خلف الأبواب المغلقة.. حتى دلف إليه منعم

جلال (بنبرة حاسمة وصوت خفيض): بقول لك إيه يا منعم..

منعم: نعم يا جلال بيه؟

جلال: ابعت لي حد يراقب فايز زي ضله حتى لو روح بيته برضه يراقب.. يشوف حد هيروح داره النهاردة أو أي حاجة تحصل يخبرني وبرضه حد يراقب داره من بعيد لو حد طلع أو دخل منها أعرف في ساعتها!

منعم (بهز رأسه فوراً): حاضر يا بيه.

جلال (مؤكداً بشرارة تحذير في عينيه): خلي بالك يا منعم.. أوعاك حد يدخل أو يطلع وأنا ما أعرفش!

منعم: ما تقلقش يا جلال بيه اعتبره حصل!

خرج منعم سريعاً لتنفيذ الأمر وتكليف رجال ثقاة بهذه المهمة بينما عاد جلال يستند برأسه إلى الخلف يغرق في شروده القلق وينتظر أي خيط يوصله إلى حقيقة ما يقع لموج!
ــــــــــــــــــــــــــــــــــــ**

في منزل فايز كانت سعدية تجلس بجوار موج على طرف التخت ترفع يدها بقلة حيلة وتمسح على رأسها وتنظر إلى كدمات وجهها ومظهرها المكسور بحزنٍ يدمي الفؤاد.

سعدية (بحرقة ونحيب خفيض): يعني يرفض اللي مش متجوز.. عشان يجوزك واحد متجوز ومعاه عيال.. أنا مش فاهمة ماله أبوكي عاد عقله فين؟!

موج (بدموع ورجاء): أوَعاكي تكلميه يا ماي أديكي شفتي عمل إيه لما اتكلمت.. ضربني وكان هيموتني!

سعدية: طيب ما جلال ده كان هايموت ويجوزو فرح والسعادة طيرت عقله وقتها ولما قلت له البت صغيرة وبتتعلم قال لي: ما تدخليش فرح مش بتِك مالكيش تدخلي ولا زعلانة عشان هتجوز ولد العمدة وعاوزة ترميها لواحد ينيمها من غير عشا؟!

استغربت موج الحديث ورفعت عينيها المحمرتين بذهول:
موج: يعني أنتِ ما كنتيش موافقة؟!

سعدية: له وأنتِ كمان اتكلمتي زي أبوكي بس العكس، افتكرتيني عاوزة أخلص منها!

صمتت موج بحزن وثقل دون أن تجد رداً يواسي جراحها ثم سالت دموعها ساخنة على وجنتيها المجهدتين:

موج: يعني أعمل إيه دلوك أتجوز الراجل ده كيف؟! ليه الرمية دي بس يا رب؟
مش عارفة.. لو عشان ولد العمدة طيب ما التاني ولد العمدة برضه راسي وجعتني من التفكير وحاسّة روحي حبيسة ومفيش مخرج!

جلستا معاً في ظلام الغرفة والشجن يعتصر قلبيهما تنتظران مصيراً مجهولاً حتى ألقى المساء سدوله الثقيلة على الدار.
ـــــــــــــــــــــــــــــ**

كان فايز كعادته يتهيأ للخروج مساءً من المنزل فالتفت نحو موج التي كانت تجلس بصمتٍ وانكسار دون أن تستطيع النظر في وجهه من أثر ما حدث:

فايز (بنبرة قاسية لا تقبل النقاش): يامين وهايكتب عليكي شاهين بيه وده راجل ليه مكانته ومجوز زي ما خابرة، ومش هايعمل فرح.. هو كتابه وياخدك على السرايا!

ثم التفت إلى سعدية بأمرٍ صارم:
فايز: جهزي بتِك وافردي سحنتك دي!

تركهم وغادر الدار ليعود الصمت الثقيل يخنق الجو من جديد..

خلود (بصدمة ونحيب خفيض): يا مَري يعني إيه مش هايعمل حتى فرح ليه ما تتجوزش زي البنات؟! ناقصها إيه أبوي جراله إيه؟!

ليلى: المَرّة دي أبوي مزوّدها كنه الراجل ده هدّده ولا غسل مخه!

ظلت موج صامتة تستمع لحديثهن حتى سمعت صوت بكاء والدتها الخافق فقالت بقوة مفاجئة:

موج: ما تعيطيش يا ماي.. أصلاً مش هاجوزه!

التفت الجميع إليها باستغراب وذهول:
فرح: يعني إيه؟!

موج: هاتفهموا يعني إيه.

سعدية (بفزع ولطم على صدرها): يا مَري هتعملي حاجة في روحك؟!

موج (بثبات رغم شحوب وجهها): هبلة أنا ولا ناقصة عقل أموت كافرة عشان واحد زي ده عينه فارغة؟!

خلود: يعني هتعملي إيه وأبوي؟!

موج: ما تقلقوش مهيحصلش غير كل خير.. دلوك أدخل أنام راسي وجعتني كتير من العياط وقلة الحيلة.

سعدية (بتوجس): أنتِ زينة يا موج؟!

موج: اه يا ماي زينة والله.. ما تخافيش.

تركتهم ودلفت للغرفة أومأت سعدية لخلود بعينيها فأرسلتها خلفها فوراً خوفاً من أن تفكر في أمر يؤذيها ثم دلف الجميع إلى مضاجعهم والغم يلتف حول الدار.

انتظرت موج لوقتٍ ليس بالقصير حتى ساد الهدوء أرجاء الدار بينما كانت خلود تجلس جوارها بصمتٍ يترقب خطواتها.

التفتت موج إليها فجأة وكسرت الصمت:
موج: أنتِ معاكي رقم دميانة صوح؟

خلود: اه معايا.. وصوح نسيت أقول لك الخالة زينب رنّت تطمن وقلت لها إنك تعبانة شويه.

موج: زين.. أكيد لأني مقلتلهاش مش هاجي.

خلود: اه أكيد.

موج (بحرص): هاتي تليفونك.

أخذت الهاتف من يد خلود بأصابع مرتعشة وضغطت على رقم دميانة وسرعان ما أتاها الرد:
موج: ألو.. يا دميانة نايمة؟

دميانة: له لسه عاملة إيه أنتِ؟ زينة؟

موج: اه زينة.. معلهش يا دميانة جوزك فين دلوك؟

دميانة (باستغراب): في الشغل لسه ما رجعش..

موج: طيب كلميه اعرفي مطرحه فين بالظبط.

دميانة: ليه خير طمنيني!

موج: معلهش هقول لك بعدين دلوك اسأليه زي ما قلت لك، وتأكدي إن جلال بيه معاه!

دميانة: ماشي.

أغلقت موج المكالمة فاستدارت خلود نحوها بفضول وقلق بالغيْن:

خلود: مالك بيهم أنتِ هتعملي إيه؟!

موج (بعينين جادتين): هطلع أقابل جلال بيه.

خلود (بلطم خفيف على صدرها): يا مَري ليه؟!

موج: أنتِ كمان هقول لك بعدين يا خلود.. دلوك مش حمل تفسير!

انتظرتا لوقتٍ مرّ كأنه دهور حتى اتصلت دميانة مجدداً وأخبرتها بمكانهما بالتحديد وفي أي جهة من الجزيرة.. أغلقت موج الخط فوراً ثم وقفت وأبدلت ثيابها سريعاً ولفت شال رأسها بإحكام تحت نظرات الخوف والترقب من خلود.

موج: تعالي اقفلي ورايا.

خلود (برعب): افرض أبوي قابلك؟!

موج: إن شاء الله له.. لما بيطلع بيتأخر أكون رجعت.

خلود: طيب ولما تاجي معكيش تليفون ترني؟!

موج: دلوك أطلع ولما آجي يحلها حلال!

تنهدت خلود بقلة حيلة وسارت خلفها بخطوات حذرة ترقبت موج الشارع بجمود وعينين تحبسان أنفاسهما، ثم انسلت وخرجت بخطوات متسارعة متوجهة نحو جلال!.



تعليقات
×

للمزيد من الروايات زوروا قناتنا على تليجرام من هنا

زيارة القناة