
رواية خلف حدود الوطن الفصل الاول 1 بقلم حميده عبد الحميد
قصتي غريبه شديد حصلت عام 2016 واي زول قلبوا ضعيف م بنصحوا يقراها نهائي طيب ندخل في لُب الموضوع. اسمي محمد وعايش في مدينة من ذكر اسمها نحن أسرة فقيرة مكونة من اربعة أشخاص انا وامي وابوي واختي
وبعترف انو انا ما كنت انسان نافع أو ولد صالح كنت كعب وسفيه ٠٠٠
اختي قرت لحدي الصف الثاني اساس وخلت المدرسة بسبب الظروف. وانا قريت لحدي الصف الثامن والحمدلله عرفت القراءة والكتابة وياهو من خليت المدرسة ياريت الدرب الكعب وعندي تلاته أصحاب عمر وخالد وعلى ٠٠
وكانو أصدقاء سوء بكل م تحمل المعاني من كلمات ابوي راجل كبير في السن وانا كنت بشتغل اجيب ليهم شوية مصاريف يمشو بيها حالهم ومرات كنت ما بديهم شي وباكل القروش في حاجات تافه شديد
امي بتريدني ريدة مجنونة بس انا عمري م حسيت ب ريدتها دي الا بعد فوات الأوان
في يوم من الايام وياهو 2016بالضبط الوقت داك كان عمري 18سنة اجتمعنا انا واصحابي وعمر اقترح علينا نطلع ونهاجر ونمشي دول الأجانب ع اساس كل حاجه متوفرة هناك وكل شي جائز الفكرة عجبتنا كلنا وايدنا فكرة عمر ومن هنا بدت الطامة الكبري وبدت معاناتي
نزلنا شغل طُلبة لمدة ٣شهور لحدي م لمينا لينا قروش كويسه وع اساس ح تقضي لينا احتياجاتنا في فترة سفرنا ٠٠٠ جيت ل ابوي وقلت ليو انا مسافر بطريقه غير شرعية
ابوي رفض وقال لي كلمة للان ماقادر انساها وقدر م بتذكرها بتقطع مية قطعة من جوه قلبي ٠٠
قال لي ي ولدي انت الليله كبير البيت وشايفني جلست خلاص وم بقدر ع الشغل زي زمان كيف قلبك يسمح ليك تسافر وتخلينا برانا؟ ومنو ال ح يرعا امك واختك؟
الوقت داك انا كنت م شايف حاجه قدامي غير السفر وكان هدفي الأول والأخير انو بس اسافر قلت لي ابوي معليش بس انا خلاص قررتا وم ح اتراجع وانتو دبرو حالكم جات امي جات امي حنستني وبكت ب دموعها عشان م اسافر بس انا نهائي م غيرت رائي. لمن شافوني متمسك في قراري استسلموا للأمر الواقع امي قالت لي الله معاك ي محمد ولدي بس لمن ترجع من سفرك م ظنيت ح تلقانا تاني ٠٠ سكت وم قلت ليها اي شي
وفي ليلوا داك مشيت لي اصحابي واتفقنا انو تاني يوم ح نطلع مع الأذان الأول وكان معانا مجموعه من الشباب وفيهم رجال كبار واكبر مننا ب كتير كانو متفقين معانا يعني ح نطلع كلنا سوا وكده
المهم جا اليوم المنتظر ومع الاذان الأول طلعنا كلنا واتجمعنا في نقطة واحدة وبتذكر لمن كنت طالع من بيتنا لقيت امي وابوي واختي بيعاينوا لي بنظرات كلها حزن وحسرة ودعتهم وطلعت وياريت لو م طلعت
جانا بوكسي وكان سايقوا واحد ظاهر عليهو م سوداني ركبنا ووصلنا مكان كدا وبعدو ركبنا الباص. وكان ماشي بينا يومين وبعد يومين وقفنا في محطة في محطة كدا كان فيها ناس كتار يعني كنا م برانا. المهم جونا زي تلاته بكاسي بعد م نزلنا من الباص ركبنا في البكاسي دي وقعدونا تحت جابو مشمعات وغطونا بيهم وبقينا م شايفين شي غير الظلام واتحركنا فضلنا ماشين زي ٧ساعة كدا
لحدي م وقفنا نزلو كم راجل من قدام جابو لينا مويه. عشان نبل عطشنا ورجعوا غطونا تاني كنت سامع أصوات ناس بيتكلموا لغة غريبه وا اول مرة اسمعها حياتي. اتكلموا زي ربع ساعة ورجعوا ركبوا واتحركنا. وطول الليل كنا ماشين. في الصحراء ٠٠٠٠
يُتبع ....