
رواية خلف حدود الوطن الفصل الثالث 3 بقلم حميده عبد الحميد
الشباب الملثمين أو المتفلتين بدو يجمعوا في الأرقام لحدي م وصلوني قالو لي ارح اكتب. رقم زول من اهلك قلت ليهم ياخ انا دا م عندي أهل واحد منهم عاين لي ب استنكار وقال لي . كيف م عندك اهل ؟ قلت ليو انا دا مقطوع من شجرة واتربيت ف الشوارع لا بعرف ام لا أب لا اخ لا عم لا خااال. انا من وعيت ف الدنيا دي لقيت نفسي برااي ومن دون أي سند .....صراحه كنت مجبور اكذب واقول ليهم كدا. لانو حتي لو اديتهم رقم اهلي م ح يقدرو يرسلو لي ولا قرش .ومنها اكيد ح يقتلوني واهلي ناس وضعم تعبان وانا كنت الوحيد. القعد بصرف عليهم
وفترة كنا في الصحراء لقيت...خاتمين حقات دهب اظن ديل لي اسرة كانو ماشين ليبيا. عن طريق الصحراء وانقطعوو فيها ولو م بقيت نبيه وعارف الخريطه سمح ح تموت فيها من العطش والجوع واكيد الأسرة دي ماتو ي جوع ي عطش
المهم شلتهم ودخلتهم ف اصبعي الوساطني. ومثلت نفسي اتجرحت مشيت شلت شاش من بتاع البوكسي وربطه بيهم رجلي نظام وهمه وكده. وانا بي جوووو لابس الخواتم لانو لو عرفو انو لقيت خواتم دهب اكيد ح يشيلوهم مني. قلت في سري ي محمد دي فرصتك مدام الناس ديل عايزين قروش بس لي م اديهم الخواتم دي ويخلوني اطلع من السجن ٠٠٠
بعد م قلت ليهم كدا سخنو معاي شديد وحولوني للضابط الكبير. قال لي انت لو بتعلب معانا م من صالحك يا ولد احسن تمشي معانا عديل قلت ليهم ياخ انا جادي معاكم واسالو اصحابي ديلك ياهم. ووقت انتو عايزين قروش انا عندي حاجه ممكن اديكم ليها. وتخلوني اطلع؟
قالو لي عندك شنو؟ فكيت الشاش من رجلي وطلعت الخواتم. قلت ليهم شيلو ديل بس عليكم الله طلعوني. الضابط شال الخواتم وقال ليهم رجعوا السجن
وفعلا ساقوني ورجعوني السجن كنت خايف شديد يارب ح يعملوا فيني شنو ٠٠٠
عدت كم ساعة لحدي م جا واحد مهم وندح ع اسمي وقفت ع حيلي وقلت ليو نعم قال لي شيل شنطتك وتعال م اكذب عليكم في اللحظة دي حيلي برد معقوله عايزين يعدموني؟ رفعت شنطتي ومشيت عليهو قال لي انت ح تتطلع من السجن
قلعت عيوني وقلت في سري معقوله ح اطلع بالسهولة دي ياربي يعني انا حظي طلع حلوو لي درجه دي؟. كشفت لي اصحابي لقيتهم . مصدومين والحسد قتلهم قتل اديتهم نظرة كده نظام انتو عفنوو هنا ي كلاب. وطلعتت منهم بس م كنت عارف امشي وين ولا اعمل شنوو. ولا أقبل على ياتو جهة
ام الارانب دي مدينه ولا قريه م عارف المهم كبيره وفيها ناس من مختلف الاجناس. قابلت واحد من اولاد تشاد. ديل
قال لي انت لو عايز تتطلع عن طريق البحر لازم تشتغل هنا لي مدة سنه وحاجه تلم ليك قروش وتمشي بيهاا طرابلس. ...
قلت ليو خلاص م تشغلني معاك لانو انا مابعرف زول هنا. قال لي والله انا دا م عندي طريقه اشغلك لكن ف وحده. ح بوصفها ليك تمشي ليها وتقول ليها انا جيت من طرف فلان. قلت ليو خير م قصرت معاي والله شكرا ليك . وصف لي المكان زين ودعتوا ومشيت ع حسب الوصف وسألت كم شخص لحدي م وصلت المكان المقصود . كانت مرا كباريه كدا عمرها يجي زي ٥٠سنه عندها مطعم بتعمل فيهو اكلات شعبيه. مشيت وحكيت ليها اي حاجه قالت لي خلاص ح تشتغل معاي ف المطعم هنا تغسل الصحون ووو..... ومرتبك ح يكون حسب الشغل يعني مرات يكون ماف زبايين. عشان كده ما ح احدد ليك القيمه قلت ليها م مشكله وممكن ابيت عادي هنا قالت لي تمام ومنو تحرس لي المحل زاتو قلت ليها عديله. وطوالي نزلت شنطتي وبديت شغل صراحه اليوم داك كان الشغل م شاءالله راشي رش. اشتغلت لحدي الليل م دخل بعدها هي مشت وانا دخلت جوو المطعم ونمت في الأرض . تاني يوم الصباح اتزكرته اصحابي قلت ياخ ماظريفه مني بعد العشرة دي كلها لازم امشي ليهم واديهم نظره وكده شلت اذن من ست المطعم قلت ليها ساعتين بس وارجع ليك قالت لي تمام
اتحركت و مشيت ليهم ف السجن لقيت حالتهم اسفه والجوع داير يقتلم وف اليوم يدوهم وجبه وحده وهي مكرونه. لا غير وعرفت تحت تحت انو اهلهم رفضو يرسلو ليهم قروش وواحد ابو قال خلي يقتلو اصلن مامنو فايده المهم جيت سلمت عليهم وقالو لي دايرين أكل بس وانا صراحه الوقت داك جنيه ما معاي قلت ليهم تمام. طبعا ليبيا م شاءالله ملانه شجر نخيل وتلقي البلح دا مجدع ساي. طوالي مشيت اقرب محل شلت لي كيس مليتو ليهم بلح وجيتهم راجع اديتو ليهم. وبعدو رجعت شغلي. اها بقيت اشتغل واشتغل والملم ف القروش والمرا دي كتر خيرها بجد انسانه طيبه كانت بتديني اكل مجان من غير م تخصم من مرتبي المهم جرت الايام سريع ومرت سنه والحمدلله بقاا عندي قروش كويسه شديد. تاني يوم طوالي مشيت للتشادي وقلت. ليو حصل كدا وكدا. اسي انا اطلع كيف قال لي انا بكره طالع طرابلس عندي شغل هناك ارح امشي معاي ومنو اوديك لي واحد بعرفو عندو. القوارب او مايسمونه السمبك اها تاتي يوم طلعنا طرابلس وفعلاا وداني للزول دا وقال لي العندك كلو جيبو اديتو قروشي كلها وقال لي بعد تلاته يوم تعال راجع مشيت منو.
وجيتو بعد. تلاته يوم. واتفاجات بي كمية من الناس نسوان وشفع ورجال كبار وصغار. ديل كلهم كانو طالعين هجرة ونصهم صومالين واثيوبين ويمنيين وسوريين . قعدنا هناك لي الساعه 3. المهم اطرو يغيرو اليوم لانو البحر كان هايج شديد وفيهو خطوره لانو المركب ح يتقلب بينا. المهم عداا اليوم دا وجاا اليوم المنتظر. جابو المركب وركبنا كلناا النسوان والشفع بقو ف النص ونحنا قعدونا بالاطراف متخيلين معاي رجلك وحده ف المركب والتانيه ف البحر 💔حاجه ف قمة الخطورة ي وصلت ي وقعت.ف البحر وبقيت رزق لسمكة القرش
بسم الله القارب اتحرك. وكل زول قلبو ف يدوو. وصلنا نص البحر كان ف سمكه. كبيره حايمه حولينا يعني عادي تقد المركب الناس خافت والفي راسهم طار وحدين شالو الشهاده ووحدين مسكو ف لا حولا ولاقوة الا بالله. ...
يتبع...