رواية رشيد وكارمن الفصل الثامن 8 بقلم ملك إبراهيم


رواية رشيد وكارمن الفصل الثامن 8 بقلم ملك إبراهيم


"الحب لوحده عمره ما كان كفاية. فيه ماضي بيطاردهم، وعائلات بتحاربهم، وقلوب بتتوجع، واختيارات صعبة لازم ياخدوها وهما مغمضين عينيهم.
رشيد وكارمن حكاية مش عن اتنين حبوا بعض وبس..
هي حكاية عن اتنين حاولوا يفضلوا مع بعض، والدنيا كلها كانت بتحاول تفرقهم" 
"المقابل اني احرق قلبك واجوزها لغيرك، انا مستحيل اسمح لبنتي انها تدخل عيلتكم اللي متشرفتش بيا."

بص لها بصدمة، مش مصدق انها بتحاول تنتقم منه بالطريقة دي! وقفت عن الكلام للحظات قليلة وبعدين كملت بنبرة ساخرة: "والعيلة اللي متتشرفش بيا ويجبروني على الطلاق وكمان كانوا عايزين يلبسوني قضية.. انا مستحيل ادخل بنتي للعيلة دي."

وقف من مكانه وهو بيبص لها بصدمة، استرخت في قعدتها وكملت ببرود: "نورتنا يا حضرة الظابط.. كان نفسي تحضر كتب الكتاب وتكون شاهد على عقد الجواز."

رمقها بغضب ومشي بسرعة من البيت عشان ميفقدش أعصابه أكتر ويعمل حاجة يندم عليها بعد كده، مش مصدق انها أم وشايلة في قلبها مشاعر الأمومة! ازاي بتفكر في تدمير حياة بنتها مقابل الانتقام منه!

خرج من البيت وقفل الباب وراه بقوة، قفلت كارمن باب أوضتها وهي بتبكي بانهيار بعد ما سمعت كلام والدتها مع رشيد واتأكدت من استحالة جوازهم.

قعد جوه عربيته وهو في أشد حالات الغضب، مش ممكن يتخلى عن كارمن ويسيبها لمصير مظلم بتتحكم فيه والدتها، غمض عينيه بيفكر في سبب قانوني يقدر من خلاله ينقذ كارمن من انتقام والدتها. ملقاش قدامه غير أمر واحد بس، بص قدامه وهمس لنفسه بحزن: "للاسف مفيش قدامي غير الحل ده."

أخد تليفونه عشان يتكلم مع كارمن.

كانت كارمن بتبكي بانهيار جوه أوضتها، سمعت صوت تليفونها، أخدت التليفون وبصت لاسمه وهي بتبكي، كانت عارفة باللي هيقوله ليها، من المؤكد انه هيتخلى عنها بعد كلام والدتها معاه. ضغطت على زرار الرد وايديها بترتعش بشدة.

سمع صوت شهقاتها بالبكاء وهي بتتكلم وبتعتذر منه على كلام والدتها معاه، صوتها الباكي قطع قلبه، حاول يهديها وقال بنبرة هادية: "كارمن حاولي تهدي واسمعيني كويس."

جاوبته بانهيار وهي بتبكي بشدة: "مش هقدر اسمعها منك يا رشيد، انا عارفه ان حكايتنا انتهت، بس ارجوك متزعلش مني وافتكرني دايما عشان انا مش هقدر انساك."

مقدرش يتحمل اللي بتمر بيه دلوقتي، قد ايه اتمنى لو كانت معاه دلوقتي ويقدر يحضنها بقوة عشان يطمنها ويقولها انه مش هيسيبها مهما عملت والدتها. قال ليها بقوة في محاولة انه يقولها اللي عايز يقوله: "كارمن اسمعيني.. انا مش هتخلى عنك وانتي مش هتكوني لراجل تاني غيري وده وعد مني."

سكن جسمها شوية بعد ما سمعت كلامه، حاولت تستوعب اللي قاله دلوقتي! حس بهدوئها وبدأ يشرح ليها اللي يقصده بهدوء: "كارمن.. انا عايز اقولك قبل أي كلام ان اللي انا بفكر فيه دلوقتي ده غلط، وغلط كبير كمان، وصدقيني لو كان قدامي حل تاني انا اكيد مكنتش هفكر في الحل ده."

سمع صوتها الضعيف بتسأله بقلق: "ايه الحل ده؟"

تنهيدة حزينة خرجت من صدره وهو بيفكر ازاي يقولها، خد نفس عميق وقال ليها بتوتر: "الحل الوحيد اننا نتجوز."

شهقت بصدمة وهي بتسمعه، مش مصدقة اللي قاله دلوقتي، مداهاش فرصة للتفكير وكمل بقوة: "كارمن صدقيني هو ده الحل الوحيد ومفيش اي حل تاني هقدر امنع بيه جوازك غير الحل ده."

وقفت وهي بتجفف دموعها وقالت ليه بقلق: "بس احنا هينفع نتجوز ازاي وماما؟"

جاوبها بقوة: "مامتك عايزة تدمر حياتنا في انتقام احنا ملناش ذنب فيه، احنا لازم نتجوز يا كارمن ونكتب كتابنا قبل يوم الخميس."

قعدت فوق السرير بحزن ووطت وشها في الأرض وقالت بخوف: "مش عارفة يا رشيد بس انا خايفة اوي."

سمع ليها بحزن، سكتت شوية وبعدين كملت ببكاء: "بس لو ماما غصبتني اتجوز الراجل ده انا هنتـ.. حر."

خفق قلبه بقوة من شدة الخوف عليها، قال ليها بلهفة: "مش عايز اسمعك بتقولي كده مرة تانيه، كارمن انا مقدرش اعيش من غيرك، واللي انا بفكر فيه دلوقتي صدقيني لمصلحتنا احنا الاتنين، مامتك عايزة تنتقم من عيلتي ومش فارق معاها انها تدمر حياتك! وعيلتي رافضين علاقتنا بسبب مامتك.. احنا دلوقتي لازم نختار وبسرعه، يا اما نبقى ضحايا للعداوة اللي بينهم دي ونخسر بعض وحياتنا تدمر.. يا اما ناخد القرار ونتجوز ونحطهم قدام الامر الواقع."

سكتت شوية بتسمع كلامه وبتفكر فيه، خد أنفاسه عشان يهدى شوية وكمل بهدوء: "كارمن.. انا عايز اسمع رأيك دلوقتي.. موافقه تتجوزيني؟"

حست بحيرة شديدة، تزاحمت الأفكار في عقلها، مكنش بالسهل عليها التفكير وأخد القرار بالسرعة دي، لكن الموضوع ميحتملش التفكير أكتر، هي بتحبه وبتثق فيه وهو كمان بيحبها، مش ممكن تتجوز راجل تاني، عليها أخد القرار من غير تردد. اتنهدت بحزن وجاوبته بصوت مبحوح: "انت عندك حق يا رشيد، انا موافقة."

اتنفس براحة وقال بتأكيد: "تمام يا حبيبتي.. يبقى لازم نروح للمأذون ونكتب كتابنا في أقرب وقت، والأفضل لو يكون بكره."

شهقت بتوتر قائلة بفزع: "بكره!!"

جاوبها بتأكيد: "مفيش وقت يا كارمن.. مامتك اتفقت مع العريس ان كتب كتابكم يوم الخميس.. يعني بعد خمس ايام من النهاردة!"

خفق قلبها بخوف وقالت بتوتر: "خلاص اللي تشوفه يا رشيد.. قولي اعمل ايه وانا هعمله."

سمع صوتها بحزن، حس بخوفها وتوترها، لكن مش في ايديه حل تاني، قال ليها بتأكيد: "احنا هنستنا لبكره، واول ما مامتك تخرج من البيت انتي تجهزي نفسك وتكلميني ومتنسيش تجيبي معاكي البطاقه الشخصيه بتاعك وانا هاجي اخدك ونروح للمأذون نكتب كتابنا."

اترعش جسمها بخوف وتوتر وهي بتسمع كلامه ونبرة صوته القوية الجادة وهو بيأكد عليها اللي عليها تعمله بكره، قالت ليه بصوت ضعيف: "حاضر يا رشيد، هكلمك بكره اول لما ماما تخرج من البيت."

حس بحزنها وقال ليها بهدوء: "انا مش عايزك تزعلي يا كارمن.. صدقينى لو كان في ايدي حل تاني كنت عملته."

تلألأت عينيها بالدموع مرة تانية وهي بتجيبه بتأكيد: "انا مش زعلانه يا رشيد.. انا خايفه من اللي هنعمله ده."

سمع كلامها بحيرة، هو كمان مش حاسس بالراحة للي ناوي يعمله، لكنه مش هيسيبها تتجوز من غيره وتقع ضحية لانتقام والدتها، قال بهدوء عشان يحاول يخفف حزنها وتوترها: "متخافيش يا حبيبتي من اي حاجة وصدقيني كل ده هيعدي.. المهم اننا نبقى مع بعض."

هزت راسها بالموافقة وهي بتسمع كلامه وبتفكر في اللي جاي بخوف.
رواية رشيد وكارمن بقلمي ملك إبراهيم. 
اليوم التالي.
راحت والدة كارمن عشان تشتري هدوم جديدة ليها عشان تلبسها يوم عقد قران بنتها.

استنت كارمن شوية لحد ما اتأكدت من ذهاب والدتها وقامت بالاتصال على رشيد عشان تقوله.

منامش رشيد من ليلة امبارح، سهر طول الليل لحد الصبح بيرتب كل حاجة مع صاحبه المقرب خالد، واتفق مع صاحب تاني ليه عشان يكون شاهد على عقد الجواز مع خالد واتفق مع مأذون شرعي قريب من بيت كارمن، وأكد عليه انه يكون على استعداد في أي وقت.

قالت ليه كارمن ان والدتها مشيت من البيت، دقايق قليلة وكان رشيد واقف بعربيته قدام بيتها، خرجت من البيت وهي حاسة بالخوف الشديد، جريت لعربيته وركبت جواها وقعدت جنبه وجسمها بيرتعش بشدة ووشها شاحب.

لاحظ رشيد توترها وشحوبها، بص لها بعمق وقال بهدوء: "انا عارف انه قرار صعب.. بس مفيش قدامنا غيره."

هزت راسها بالموافقة وقالت ليه بصوتها الرقيق: "انا عارفه يا رشيد، وطول الليل بفكر في حل وفعلا ملقتش غير الحل ده."

ابتسم ليها بحنان وقال ليها بتأكيد: "صدقيني يا كارمن انتي عمرك ما هتندمي على القرار ده."

ابتسمت وهزت راسها وقالت بخجل: "وانا متأكده اني عمري ما هندم."

ابتسم بسعادة وهو بيسمع كلامها وعارف قد ايه هي بتثق فيه، قام بتشغيل محرك العربية وانطلق بيها لمكتب المأذون الشرعي، كانت قاعدة جنبه وبتفرك بايديها بخوف وتوتر، عايزة ترجع لبيتها وتتراجع عن القرار المصيري المخيف ده، لكنها عارفة ان في انتظارها جواز إجباري من راجل بيكبرها بكتير وحياة صعبة وانتقام هي ملهاش ذنب فيه.

وقف رشيد بعربيته قدام مكتب المأذون الشرعي ونزل من العربية وأخد كارمن واتقدم بيها لجوه المكتب.

كان اتنين من صحابه في انتظارهم جوه ومن بينهم خالد صاحبه المقرب، أخد المأذون هوية كل واحد فيهم وقام بتسجيل البيانات واتمام عقد الزواج الشرعي بينهم. خلص المأذون من عقد القران وبارك ليهم.

ابتسم رشيد بسعادة وهو بيبص لكارمن، مش مصدق ان حبيبته بقت على اسمه، مش ممكن لحد بعد كده يفرقهم، ولا يحق لراجل تاني النظر ليها.

أخدها من ايديها بعد ما شكر اصحابه وقال للمأذون وأكد عليه سرعة توثيق عقد الجواز.

خرج معاها من مكتب المأذون وهو ماسك ايديها ومش عايز يسيبها، فتح ليها باب العربية وركبت جواها وجسمها بيرتعش وقلبها بيخفق بقوة شديدة، ركب هو كمان جوه العربية وقعد جنبها، عايز يتكلم معاها ويقولها حاجات كتيرة لكنه مش عارف يبدأ الكلام منين.

بصت ليه كارمن وهي مش مصدقة لحد دلوقتي اللي حصل، مش مستوعبة انها بقت مراته، قالت ليه بتوتر: "هو احنا كده اتجوزنا فعلا؟!"

ابتسم بسعادة وقال ليها بشغف: "طبعاً يا حبيبتي.. انتي دلوقتي بقيتي مراتي رسمي."

اتكسفت كتير ووطت وشها، استرسل ليها عقلها أسئلة كتيرة، رفعت وشها تاني وقالت ليه: "يعني اللي احنا عملناه ده مش غلط يا رشيد؟"

بص ليها وهو سايق العربية وجاوبها: "الغلط لو كنتي اتجوزتي الحاج مطاوع اللي والدتك اختارته!"

شهقت بصدمة وهي بتفتكر مطاوع اللي جه عشان يتجوز منها، ازاي لراجل بعمر الخمسين انه يفكر بالجواز من بنت في العشرين من عمرها. غمضت عينيها وهي بتفتكره لما شافته في بيتهم. قالت لرشيد بصدمة وهي بتوصف ليه شعورها لما شافت مطاوع: "انا مش عارفه كنت ممكن اتجوز الراجل ده ازاي.. مش قادرة انسى شكله اول ما شوفته، راجل عجوز واقرع وتخين وعنده كرش كبير وبيشرب القهوة بصوت مزعج جدا، وماما بتقولي ده عريسك!"

ضحك رشيد وهو بيسمع وصفها لمطاوع وهي بتخفي عينيها ومش عايزة تفتكره أكتر، سكت شوية وبعدين قال ليها بفضول: "طب انتي كنتي بتفكري تتجوزي واحد شكله ايه؟"

فتحت عينيها وهي بتسمع سؤاله وبتفكر فيه، بصت ليه وهو سايق العربية بيبص للطريق قدامه، اتأملته بعمق، لأول مرة تتأمله عن قرب، كان وسيم للغاية، طويل القامة، صاحب جسم رياضي قوي، شعره اسود وبيصففه لفوق بطريقة رائعة، عيونه سودا حادة. اتنهدت من قلبها وجاوبته بصوت رقيق وهي بتتأمله بنظرات عاشقة وبتوصفه من غير ما تحس: "كنت بفكر انه يبقى طويل وجسمه رياضي ومعندوش كرش طبعاا.."

سكتت للحظات قليلة واتأملت شعره الاسود وكملت بصوت ناعم: "ويكون شعره اسود.. وعيونه سود وحلوين..."

حس بنظراتها ليه وصوتها الرقيق وهي بتصف ازاي بتشوفه بعينيها، كان بيتعمد يظهر انشغاله بالسواقة عشان تتكلم على راحتها، بص ليها وشاف في عينيها نظرات عاشقة وهي بتتأمله عن قرب، اتكسفت منه ووطت وشها بسرعة، وقف بالعربية على جنب الطريق، بص ليها ومسك ايديها ورفع وشها عشان يقدر يشوف عينيها وقال ليها بشغف: "كارمن ممكن تبصيلي."

رفعت عينيها ببطء وبصت ليه بخجل، كانت ايديها بترتعش بين ايديه، قرب ايديها من شفايفه وباسها برقة، اترعش جسمها بالكامل وأخدت ايديها بسرعة من بين ايديه: "ليه جسمك كله بيرتجف كده؟"

مجاوبتش على سؤاله. وطت وشها بخجل. اتأملها بنظرات عاشقة، أراد يقرب منها أكتر لكنه تراجع عن الفكرة عشان متخافش منه، عارف انها مش مستوعبة انها بقت مراته لحد دلوقتي، اتربكت كتير من نظراته وبعدت عنه شوية وقالت ليه بتوتر: "هو المفروض احنا هنعمل ايه بعد كده؟"

بعد هو كمان واتعدل على مقعده وبص قدامه بيفكر وبعدين جاوبها: "اول حاجة انا لازم اشتري بيت مناسب نعيش فيه وطبعا ده هياخد وقت.. بس انا هحاول الاقي بيت في اسرع وقت ممكن."

هزت راسها وكملت: "وماما هقولها ايه؟ وعيلتك.. هتقولهم ازاي؟"

اتنهد بإرهاق وهو بيبص قدامه وجاوبها: "بلاش حد منهم يعرف دلوقتي.. خلينا لما الاقي شقة ونكون جاهزين وانا هبلغهم بنفسي."

بصت له وقالت بتوتر: "طب والعريس اللي ماما عايزة تجوزني ليه ده؟.. دا فاضل اربع ايام والمفروض هيجي عشان يتجوزني؟"

بص ليها بقوة وكمل بانفعال: "هيتجوزك ازاي وانتي مراتي! خليه بس هو او غيره يقرب منك وشوفي انا ازاي هندمهم على اليوم اللي اتولدو فيه."

اترعش جسمها من انفعاله وصوته الغاضب، بصت ليه بخوف وقالت بصوت هادي: "هما مش عارفين اننا اتجوزنا."

لاحظ خوفها منه ومن انفعاله الزايد قدامها، حاول يسيطر على انفعاله وقال ليها بهدوء: "متقلقيش يا حبيبتي.. انا هحاول اجهز شقة بسرعه وهاجي اخدك من بيت مامتك والدنيا كلها هتعرف اننا اتجوزنا."

هزت راسها وهي بتبص ليه بخوف، ابتسم ليها عشان يصالحها على انفعاله معاها وقال ليها بمشاكسة: "انتي عارفه انك المفروض من الليله دي تنامي في حضني."

احمرت وجنتيها بشدة وبصت ليه بصدمة، ضحك وهو بيبص ليها وكمل بنبرة مرحة: "بس مفيش مشكله كلها يومين تلاته بالكتير وتنامي في حضني ووقتها مش هسيبك تبعدي عن حضني ابداا."

اتكسفت كتير من كلامه وبصت قدامها بصدمة وقالت ليه بارتباك: "رشيد انت لازم توصلني البيت دلوقتي حالاً.. اكيد ماما هترجع البيت دلوقتي وهتبقي مشكله لو رجعت وملقتنيش."

ابتسم وهو بيتابع ارتباكها وخجلها الشديد منه، أعاد تشغيل محرك العربية وهو بيبص ليها بعشق... ✋.

{رشيد رجع من ذكرياته معاها وهو جوه الشقة اللي اشتراها من أربع سنين عشان تكون بيتهم بعد ما اتجوزوا} 

كل حاجة هنا بتفكره بيها، خيانتها ليه بتمزق قلبه لحد دلوقتي، سهام من نار بتحرق قلبه وروحه كل ما يفتكرها.

قعد يحطم كل حاجة في البيت، مش عايز يفتكرها بعد كده، نيران بتحرق قلبه، مش قادر يهديها، أخد كل حاجة وحطمها على الأرض بقوة، أراد لو يحطم قلبها زي ما حطمت قلبه من غير ما يطرف ليها عين.

قعد على الأرض بعد ما حطم كل حاجة حواليه، بقى أثاث البيت متناثر ومحطم فوق الأرض بطريقة فوضوية، بص للخراب حواليه! نفس الخراب اللي بقت حياته فيه، بقت كل حاجة في حياته محطمة، عشان كده مش حاسس بالغربه وسط الخراب ده. غمض عينيه بتعب، بيتمنى لو يقدر يخرجها من قلبه.. عايز يشوفها وهي بتتألم وبتتعذب وبتندم على اللي عملته فيه. أخدته أفكار كتيرة في الانتقام منها، فتح عينيه وهو بيبص قدامه بقسوة وبيتوعد ليها بأقصى العذاب.
رواية رشيد وكارمن بقلمي ملك إبراهيم. 
صباح اليوم التالي.
صحيت كارمن بدري عشان تروح للعنوان اللي اداه ليها مدير المطعم عشان تقوم بالتجهيزات والتخديم في حفل ميلاد ابن جوزها السابق "رشيد الجبالي" ، مقدرتش تنام طول الليل؛ كانت بتتساءل جواها؛ ازاي وامتى اتجوز؟ ومين هي مراته؟

أسئلة كتيرة تزاحمت بأفكارها، لكنها النهاردة هتلاقي الرد. تقدر تشوف مراته النهاردة وتشوف ابنه وتقدر تعرف امتى اتجوز وأنجب طفل.

حاولت تتجاهل الأفكار دي، رشيد كان جوزها في الماضي والنهاردة بقى جوز ست تانية ومش من حقها تفكر فيه لحد دلوقتي. خلصت بسرعة من لبس هدومها قبل ما تصحى والدتها.

أخدت شنطة ايديها بهدوء وقبل ما تخرج من الأوضة وقفها صوت والدتها: "كارمن.. قبل ما تمشي سيبي فلوس عشان اشتري سجاير."

لفت تبص لوالدتها بصدمة وقالت بذهول: "ماما انتي لسه شاريه علبتين امبارح!.."

قربت من والدتها كام خطوة وهي بتكمل بحزن: "يا ماما انتي كده بتموتي نفسك بالبطئ."

زفرت والدتها ببرود وقالت ليها بانفعال: "ده على اساس ان صحتي فارقه معاكي!"

حدقت بيها كارمن قائلة بصدمة: "طبعا يا ماما صحتك فارقه معايا وتهمني!"

ضحكت والدتها بنبرة ساخرة وقالت: "اللي اعرفه انك لو خايفه على صحتي صحيح كنتي على الاقل ترحمينا من الفقر ده وتسمعي كلامي وتستغلي جمالك اللي هيضيع على الفاضي!"

بصت لوالدتها بصدمة وكملت بغضب: "لو سمحتي يا ماما بلاش نتكلم في الموضوع ده تاني."

قربت من السرير وطلعت فلوس من شنطتها وحطتها فوق السرير وكملت بحزن: "دي كل الفلوس اللي معايا ومفيش معايا غير اجرة التاكسي اللي هيوصلني شغلي."

مهتمتش والدتها بأمرها وتجاهلتها ببرود، غمضت كارمن عينيها بتعب واستغفرت ربها وخرجت من الأوضة عشان تروح لعنوان شقة رشيد.
رواية رشيد وكارمن بقلمي ملك إبراهيم. 
بعد أقل من ساعة. كانت كارمن جوه تاكسي بينقلها لعنوان شقة رشيد، وقفت العربية قدام البرج السكني اللي بيضم عدد كبير من الشقق الفخمة، نزلت من العربية وهي بتبص للبرج بحزن، دا نفس المكان اللي اتجوزها فيه.. معقول رشيد اتجوز في نفس الشقة اللي كانت بتجمعهم! معقول هي هتشتغل خادمة النهاردة جوه شقتها السابقة!

وقفت بتردد بتفكر هتعمل ايه دلوقتي، بصت لشنطتها الفاضية من الفلوس بعد ما أخدت والدتها كل الفلوس اللي معاها، هي محتاجة شغل ضروري ولازم تصبر وتستحمل. 

التقطت أنفاسها وهي بتحاول تظهر القوة عشان تقدر تكمل شغلها في بيت رشيد ومراته.

طلعت للدور السادس وبياخدها الحنين للماضي، كان بيتها في الماضي ومسكنها الأمن، وقفت قدام باب الشقة وعينيها بتتلألأ بالدموع وهي بتحاول تلتقط أنفاسها بقوة عشان متسمحش لدموعها بالانطلاق بره عينيها حسرة وندم على اللي اتعرضت ليه من خسارة حبيبها وخسارة حياتها معاه، مش مصدقة انها لما تخبط على الباب دلوقتي هتخرج مراته وترحب بيها، بقت دلوقتي غريبة عنه وعن بيتها، البيت ده اللي عاشت فيه أجمل وأسعد أيام حياتها.

رفعت ايديها المرتعشة وخبطت على الباب بتوتر، كانت في صراع كبير مع دموع عينيها، بتحارب تساقط الدموع من عينيها بصعوبة. خبطت كام مرة ورا بعض ومجاش ليها رد من جوه، وقفت تخبط على الباب بقوة لحد ما يأست من وجود حد في البيت وكادت انها تمشي، لكن صوت فتح الباب وقفها، لفت تبص مين فتح الباب.....بقلمي ملك إبراهيم.
... يتبع اتاكد انك عامل متابعة ليا عشان تشوف باقي الرواية 👈 @أبرز المعجبين 

تفتكروا مين اللي فتح الباب🤔🤔 
عرفنا ازاي رشيد اتجوز كارمن 🫣 لسه هنعرف إزاي اتفرقوا بعد الحب الكبير اللي كان بينهم💔
حبايبي متنسوش التفاعل بعد القراءة ♥️.


                      الفصل التاسع من هنا
تعليقات
×

للمزيد من الروايات زوروا قناتنا على تليجرام من هنا

زيارة القناة