رواية رشيد وكارمن الفصل التاسع 9 بقلم ملك إبراهيم


رواية رشيد وكارمن الفصل التاسع 9 بقلم ملك إبراهيم


"بعد 4 سنين، وقفت قدام الباب اللي كان يوماً ما بيتها..
وفتحه هو.. بنفس الوش، بنفس العينين، بس بقلب تاني خالص" 
صوت فتح الباب وقفها، لفت تبص مين فتح الباب... شافت رشيد واقف قدام الباب، باين عليه كان لسه صاحي من النوم حالا ، كان مغمض عينيه شوية وشعره متناثر فوق جبينه بطريقة فوضوية. وقفت قدامه تبص ليه بصدمة، فتح عينيه شوية وبص ليها ببرود وقال: "ادخلي نضفي البيت وجهزيه بسرعه."

لف للداخل قبل ما يسمع ردها. تابعته بصدمة بعد ما خفق قلبها بقوة وتخبطت مشاعرها لما شافته كده، متغيرش عن الماضي، كان ومازال وسيم وخطف قلبها لما شافته.

خطت برجليها لجوه، رعشة قوية أصابت جسمها بعد دخولها الشقة، وقفت أنفاسها وهي بتفتكر دخولها للشقة دي أول مرة من أربع سنين... ✋.

{افتكرت كارمن اللي حصل من 4 سنين بعد ما أتجوزت رشيد عند المأذون}

كان يوم الخميس.. شتاء عام 2019.. المفروض ان دا يوم كتب كتابها على مطاوع.

قالت ليها والدتها ان مطاوع في الطريق ومعاه المأذون عشان يتم عقد القران. جريت بسرعة لأوضتها وكلمت رشيد عشان تقوله. سمعها رشيد بهدوء وقال لها انها تجهز شنطتها وتحط فيها كل هدومها ومتعلقاتها وتكون في انتظاره جوه أوضتها.

عملت اللي قاله وهي في أشد حالات الخوف والتوتر. قفلت الباب من جوه عشان متشوفهاش والدتها وهي بتجهز شنطتها.

بعد وقت قليل وصل مطاوع ومعاه المأذون والشهود، خفق قلبها بخوف لما جت والدتها لأوضتها عشان تقولها ان العريس وصل ومعاه المأذون. قالت لوالدتها من ورا الباب.. وقالت ليها كارمن انها بتلبس هدومها وبتستعد.

رجعت والدتها للضيوف وقعدوا في انتظار العروسة.

دقايق قليلة ووصل رشيد، وقف قدام باب بيتهم واتصل على كارمن وطلب منها تخرج من أوضتها دلوقتي. خرجت من أوضتها وجسمها بيرتعش من شدة الخوف.

فتحت والدتها الباب واتفاجأت بوجود رشيد، بصت ليه باستغراب وكملت ببرود: "انت جاي تشهد على عقد الجواز ولا ايه يا حضرة الظابط؟!"

رمقها بغضب وجاوبها بسخرية: "لا حضرتك انا جاي اخد مراتي."

حدقت بيه بصدمة، جف حلقها وهي بتتكلم بذهول: "مراتك مين مش فاهمه؟!"

اتقدم لجوه بخطوات واثقة متجاهل صدمة سهير، قرب من مطاوع والمأذون والشهود وقال ليهم بقوة: "ممكن اعرف ايه اللي بيحصل هنا؟!"

وقفت كارمن بتتابع اللي بيعمله بتوتر وقلق، بص ليه مطاوع باستغراب وبعدين قال لسهير والدة كارمن: "مش ده الظابط ابن طليقك يا سهير؟!"

قربت منهم سهير وجاوبته بتوتر: "اااه هو.."

بص ليها رشيد بسخرية وبعدين جاوب على مطاوع بقوة: "وابقى جوز بنتها.."

انتفض مطاوع من مكانه وقال بصدمة: "بنتها مين!!"

جاوبه رشيد بثقة: " هي ملهاش غير بنت واحدة."

بص مطاوع لسهير والدة كارمن وقال ليها بصدمة: "الكلام ده حقيقي يا سهير؟ انتي ضحكتي عليا!"

قربت منه سهير وقالت بقوة وصراخ: "لا كدب.. متصدقوش.. بنتي مش متجوزة.. بنتي مش هتتجوز غيرك انت زي ما اتفقنا."

قرب رشيد من المأذون واداله عقد جوازه من كارمن وهتف بقوة: "ده عقد الجواز.. اتفضل حضرتك شوفه واتأكد."

بص المأذون لعقد الجواز وبعدين وقف من مكانه وكمل بتأكيد: "لا حول ولا قوة الا بالله.. كنتي هتودينا في داهية يا هانم لو كنت كتبت كتابها وهي متجوزة.. عقد الزواج صحيح.. اظن وجودي هنا دلوقتي ملوش لازم.. عن اذنكم."

مشي المأذون ووراه الشهود، وقفت سهير تبص لرشيد بصدمة، وبعدين لفت تبص لبنتها الواقفة بعيد بتتابع اللي بيحصل من غير تدخل، قربت منها والدتها بخطوات واسعة ومسكت بدراعاتها وضغطت عليها بقوة وكملت بصراخ: "انتي فعلا اتجوزتيه؟ انطقي.. ردي عليا؟!"

بكت كارمن من الخوف وهزت راسها بالايجاب وجاوبت على والدتها بصوت مبحوح: "اه يا ماما اتجوزته."

صفعتها والدتها بقوة، جري رشيد على كارمن وأخدها من قدام والدتها ووقف هو قدامها وقال ليها بغضب وتحذير: "دي اول واخر مرة ايدك تتمد على مراتي.. انتي لو مكنتيش مامتها انا كنت دفعتك تمن القلم ده حياتك."

صرخت سهير بصدمة وهي مش مصدقة انه اتجوز بنتها وانتصر عليها، أخد رشيد كارمن وخبى وشها جوه صدره بحماية وهي بتبكي جوه حضنه.

وقف مطاوع بيتابع مشهد حضن رشيد لكارمن بصدمة ، قرب من سهير وقال ليها بتهديد: "كل الفلوس اللي خدتيها مني ترجعلي تاني يا سهير، يا اما انتي عارفه انا ممكن اعمل فيكي ايه."

خلص كلامه ومشي بغضب، وقفت سهير بتصرخ وبتبكي بعد ما ضاعت فرصة الجواز والحصول على كتير من فلوس مطاوع مقابل جوازه من بنتها.

بص ليها رشيد باشمئزاز بعد ما اتأكد من حقيقة انها أرادت تبيع بنتها للراجل ده مقابل الفلوس! طبطب على ضهر مراته وهمس ليها بهدوء: "حبيبتي احنا لازم نمشي من هنا."

رفعت وشها وهي بتبكي جوه حضنه وقالت ليه بصوت مبحوح: "هنروح فين؟"

مسد على وشها بحنان وجاوب: "هنروح بيتنا."

بصت لوالدتها بعيون باكية، مش عايزة تسيب والدتها بالحالة دي، بعدت عن رشيد وقربت من والدتها وقالت ليها ببكاء: "سامحيني يا ماما انا اسفه.. بس صدقيني انا مكنتش هقدر اتجوز الراجل ده."

رمقتها والدتها بغضب وكملت بنبرة حادة: "ابعدي عن وشي مش عايزة اشوف وشك تاني.. امشي مع اللي اتجوزتيه من ورايا.. بس خلي بالك لما يزهق منك ويطلقك هتلاقي بابي مقفول في وشك."

انتفض جسمها من قسوة كلام والدتها معاها، شال رشيد شنطتها وقرب منها ومسك بايديها وقال لسهير قبل ما ياخد كارمن ويمشي: "من حقك تغضبي من جوازنا.. بس انا عايزك تعرفي قبل ما نمشي ان مفيش راجل في الدنيا هيحب بنتك قد ما انا حبيتها.. ومفيش مخلوق في الكون كله هيقدر يحافظ عليها ويسعدها قدي."

رمقته بنظرات غاضبة وصرخت فيهم بقوة: "خدها وابعدوا عن وشي.. انا بنتي ماتت ودفنتها.. سامعين.. بنتي ماتت ودفنتها."

بكت كارمن بصدمة، أخدها رشيد من ايديها لبره البيت، كانت بتبكي بانهيار، كلام والدتها وغضبها عليها كان قاسي ومتحملتوش. أخدها رشيد للعربية وركب جواها وانطلق بيها لبيتهم الجديد، منقطعش بكائها طول الطريق، كل ما تفتكر قسوة والدتها بتحس بألم شديد في قلبها، موقفتش عن البكاء لحد ما وقفت على أعتاب الشقة دي... ✋.

{فاقت كارمن من ذكرياتها على صوت خطواته }

رجعت من ذكرياتها على صوته وهو خارج من أوضة النوم بعد ما بدل هدومه وصفف شعره وبقى جاهز للخروج من البيت: "انتي لسه واقفه عندك!"

بصت ليه بتوتر وبعدين رجعت ببصرها لأثاث البيت وكل محتوياته المحطمة ومتناثرة فوق الأرض، بلت ريقها وبصت ليه تاني قائلة بتوتر: "مين اللي عمل في البيت كده؟!"

قرب منها وهو بيلبس جاكيته ووقف قدامها بيرمقها بغضب وقال: "ده شئ ميخصكيش.. يلا نضفي البيت وجهزي كل حاجة."

وقوفه قدامها خلى جسمها يرتعش وقلبها يخفق بقوة، مازالت المشاعر في قلبها زي الماضي وأكتر، مبدلش الفراق بينهم حاجة، بل زاد الاشتياق وشعل اللهفة جواها، بتشتاق كتير ليه، شعورها بالأمان جوه حضنه، لمسة ايديه الدافية، صوته الحنون، رقته معاها ومزاحه المستمر، لما كان بيدلعها ومعاملته الطيبة. بتشتاق ليه بشدة. قد ايه اتمنت لو يرجع بيهم الزمان مرة تانية!

رمقها بنظرات غاضبة، عايز يصفعها بقوة على كل اللي عملته فيه، عايز يصرخ فيها ويسألها "ليه خدعته؟ إيه إللي عمله غلط معها عشان تبادل حبه وعشقه ليها بالخيانة وكسر الوعود! ليه سابته من غير ما تلتفت ليه! ليه خذلته؟ فين برائتها ولمعة عينيها ؟
معقول هي بارعة في الخيانة بجد زي والدتها؟ ده اللي حذره منه جده في الماضي وهو مسمعش ليه، قد ايه خذلته قدام الكل، قد ايه حطمت قلبه وجعلته غايب عن الوعي والاستيعاب لعدة شهور، بيؤلمه قلبه بشدة، رؤيته ليها بتعذبه، وعدم رؤيته ليها بيألم قلبه وروحه.

هتف بيها بغضب وهو بيتطلع ليها بقسوة: "اعملي اللي قولتلك عليه مفيش وقت."

سابها وتابع سيره اتجاه الباب، وقفه صوتها وهي بتنادي اسمه. غمض عينيه بألم بيفتكر لما كانت بتوقفه بصوتها في الماضي وهو رايح لشغله، كانت بتجري عليه وبتحضنه بقوة وبتتمسك بيه في محاولة منها عشان ميسبهاش لوحدها ويروح الشغل ويفضل معاها، كان بيبادلها الحضن بقوة وبيمازحها بحنان. قد ايه كان سعيد معاها واتمنى انها تفضل معاه لآخر العمر، لكن مفيش لأمنياته معاها مكان في العالم ده.

لف يبص ليها ومستني هي عايزة ايه، قربت منه بخطوات مرتبكة وقالت ليه بصوت مبحوح: "مراتك وابنك فين؟"

رمقها بغضب وجاوبها بقسوة: "انتي جاية هنا النهاردة تشتغلي خدامه في البيت ده.. يعني مش من حقك تسألي اي سؤال، وتاني مرة مش عايز اسمع اسمي بصوتك لاني بقيت بكرهه."

اتألم قلبها من قسوة كلماته، نظراته الغاضبة وصوته القاسي بيؤلم قلبها بشدة، تلألأت الدموع جوه عينيها وهي بتتراجع لورا مرة تانية، هزت راسها ووطت وشها في الأرض قائلة: "انا أسفه."

رمقها بسخرية وهو بيسمع عبارتها المعتادة، قال ليها ساخرًا قبل ما يسيب البيت ويمشي: "وانا مبقتش آقبل اسفك."

خرج من البيت وقفل الباب وراه بقوة، وقفت تبص قدامها بصدمة، هنا سمحت لدموعها بالتساقط، انهارت وهي بتبكي وبتتألم، كتمت صوت شهقاتها وبكائها بايديها. مش ممكن تعمل حاجة دلوقتي، بس ممكن تبكي بحسرة وندم على اللي وصلت ليه علاقتهم. عارفة ان البكاء مش هيرجع بالماضي.

بصت حواليها وعينيها مازالت بتذرف دموع الندم، حطت ايديها فوق الأثاث ومسدت عليه بحزن، هناك الكنبة اللي كانوا بيقعدوا عليها وهي جوه حضنه في ليالي الشتا الباردة، كانت بتعمل المشروبات السخنة وهما بيشاهدوا التلفزيون مع بعض. وهنا المطبخ اللي كانت بتقف فيه بالساعات وفي الآخر بتخرج منه وهي بتبكي بعد ما حرقت الأكل، كان بيتقبل فشلها في طهي الأكل بصدر رحب، كان بيمازحها وبيساعدها في كل حاجة. قربت من أوضتهم الخاصة، وقفت تبص للأوضة وبتفتكر مجيئها للبيت ده بعد ما أخدها من بيت والدتها...✋.

{افتكرت الليلة الأولي لها في الشقة دي}

رشيد قالها ان الشقة دي بتاعتهم دلوقتي، وقالها ازاي اشتراها. كانت سعيدة جدا بجمال الشقة ورقي أثاثها، فضلت تدور جواها وتشاهدها من جوه بحماس، قربت منه وهي بتبتسم بسعادة : "الشقة حلوة اوي اوي يا رشيد.. مش مصدقه ان ده بقى بيتنا!"

خفق قلبه بشدة وهو بيتابع ابتسامتها الرائعة وسعادتها الكبيرة، قرب منها أكتر وحضنها بقوة وقال: "انتي اللي ضحكتك حلوة اوي علي فكرة."

ابتسمت بخجل وهي بتتنعم بدفئ حضنه، رفع وشها ليه واتأملها بحبها ، بعدت عنه بتوتر وجسمها بيرتعش بشدة. تفهم خوفها وتوترها من اكتمال زواجهم . قرر انه يديها شوية وقت عشان تعتاد عليه وعلى البيت. أخدها لأوضتهم الخاصة وقالها ان دي هتكون أوضتهم وتقدر تحط هدومها فيها وساب ليها مساحة كبيرة من حرية الحركة جوه الأوضة لما قالها انه هيروح شغله وهيرجع بسرعه مش هيتأخر.

 هزت راسها وهي بتسمعه بتوتر لحد ما مشي من الشقة، التقطت أنفاسها وهي بتبص حواليها بسعادة وشغف.

عدا كام يوم واتعودت على البيت بسرعة وقدر رشيد انه يطمنها بحنانه وحبه الكبير ليها، لحد ما اكتمل جوازهم وبقت كارمن مراته رسمي. 

افتكرت ليلة اكتمال زواجهم. 
استمر بكائها بطريقة طفولية أكتر من ساعتين ورشيد بيحاول يهديها ويوقفها عن البكاء، لحد ما اتنهد بتعب وقال ليها بهدوء: "حبيبتي انتي بقالك اكتر من ساعتين بتعيطي!"

قالت ليه ببكاء وهي بتضرب بايديها فوق صدره: "انت ضحكت عليا يا رشيد."

ضحك على طفولتها وقال ليها بدهشة: "ضحكت عليكي في ايه يا كارمن انتي مراتي!"

حست بالغيظ من سخريته وحاولت تبعد عنه، مسك بايديها وهو بيحاول يكبت ضحكته بصعوبة: "يا حبيبتي انتي مراتي.. ودا عادي يعني؟!"

وقفت تبص ليه بغيظ، حاول يكتم ضحكته ورسم الجدية على ملامحه وقال ليها: "ممكن تهدي بقى وتخلينا ننام."

جاوبته بعناد: "لا مش هنام."

هز راسه وقال ليها بمكر: "تمام برحتك.. انا اصلا اللي غلطان، كان المفروض اسيبك تتجوزي مطاوع."

شهقت بفزع وبصت ليه بصدمة: "لا يا رشيد متقولش كده تاني.. دا كان شكله بيخوفني اوي."

فتح دراعه ليها عشان تقرب وتنام جوه حضنه وقال ليها بجدية مصطنعة: "خلاص تعالي نامي في حضني وانا مش هقول كده تاني."

قربت منه بخجل، جذبها لجوه حضنه وضمها ليه بقوة وهمس ليها بعشق: "بحبك...."

{فاقت من ذكرياتها وهي بتمسح دموعها }

كانت بتفتكر قد ايه كانت سعيدة معاه وحياتهم كانت رائعة، اتمنت لو يرجع بيها الزمن ومستحيل كانت هتعمل فيه اللي عملته، لكن الزمن مش هيرجع ابدا لانه مستحيل يسامحها.
رواية رشيد وكارمن بقلمي ملك إبراهيم.
وقف رشيد بعربيته قدام بيت عيلته، اتقدم لجوه البيت وهو بيفكر ازاي هينتقم منها. جري عليه "مروان" ابن أخته، صاحب التلات سنين، جري عليه بسعادة وهو بيردد بصوته الطفولي: "خالو.."

التقطه رشيد جوه حضنه ووقف وهو شايله وبيقبله بسعادة.

قربت منهما رهف أخت رشيد وهي بتبتسم قائلة: "من ساعة ما وصلنا وهو نازل زن عليا "فين خالو؟ .. فين خالو؟""

ابتسم رشيد وهو بيداعب ابن أخته وقال ليه بمرح: "خالو كان بيجهز مفاجأة لـ مروان."

ابتسم الطفل بسعادة وقالت رهف بفضول: "مفاجأة ايه؟"

غمز رشيد لمروان بمرح وجاوب على أخته بمشاكسة: "دي سر بيني وبين البطل مروان.. صح يا بطل؟"

جاوب الطفل بحماس: "صح."

ضحكت رهف وقالت بمرح: "يعني اخرج انا منها!"

ضحك الطفل وهو جوه حضن خاله، قال رشيد لأخته: "لبسي البطل وجهزيه عشان هاخده ونخرج مع بعض."

بصت ليه رهف بدهشة قائلة: "هتروحوا فين؟"

جاوب رشيد: "هحتفل بعيد ميلاده."

ابتسمت رهف وقالت ليه بهدوء: "بس عيد ميلاد مروان كان من شهر واحنا احتفالنا بيه يا رشيد!"

هز راسه وقال: "بس انا من شهر كنت مسافر ومحتفلتش بيه."

ابتسمت بحنان وهزت راسها وأخدت مروان عشان تجهزه للخروج مع أخيها.

قربت والدة رشيد منه وهي بتبص ليه بدهشة قائلة: "رشيد انت منمتش في البيت النهاردة؟!"

اكتفى بهزة بسيطة رد على سؤال والدته، زاد فضولها وقالت ليه بدهشة: "ونمت فين؟!"

جاوبها بهدوء: "نمت في شقتي."

بصت ليه بصدمة، وبعدين كملت بصوت غاضب: "وانت ايه اللي يوديك الشقه دي تاني! معقول مش قادر تنساها بعد كل اللي عملته فيك!"

حاول يكتم غضبه وجاوب على والدته: "انا خرجتها من حياتي خلاص يا امي وهي ملهاش علاقه بالشقه!"

غضبت والدته بشدة وقالت بانفعال: "انت لازم تبيع الشقه دي وتخلص منها، انا مش فاهمه انت ليه متمسك بيها لحد دلوقتي!"

خرج جده من أوضة مكتبه على أصواتهم العالية، قرب منهم وقال بدهشة: "ايه الحكاية؟ ليه صوتكم عالي!"

زفر رشيد بغضب واحتفظ بصمته، قربت منه والدة رشيد وجاوبته بلوم على ابنها: "اسأله كان نايم فين امبارح يا عمي! معقول لسه محتفظ بالشقه ومش عايز يبيعها ويخلص منها!"

بص ليه جده بصمت، خفض رشيد وشه في الأرض وقال بغضب مكتوم: "ياريت محدش يدخل في حياتي.. انا كبير كفايه ومش محتاج نصايح من حد."

رمقته والدته بصدمة وصدح صوتها الغاضب عالي: "سامع يا عمي بيقول ايه.. مش عايزنا نتدخل في حياته.. يبقى البنت دي رجعت دخلت حياته تاني وهتقدر تضحك عليه زي ما عملت قبل كده!"

نفذ صبره ومتحملش كلام والدته، ارتفع صوته الحاد رد على كلام والدته: "كفاية بقى انا تعبت.. ليه محدش حاسس بالنار اللي جوايا.. ليه مش مقدرين ان انا خسرت أغلى حاجة في حياتي وخسرت شغلي ومستقبلي! انا خسرت حياتي كلها على ايد البنت الوحيدة اللي حبتها، انا مستحيل انسى خيانتها ليا.. مستحيل انسى انها دمرت حياتي! ازاي فاكرين اني ممكن اسمحلها ترجع لحياتي بالسهولة دي! انتوا ازاي متخيلين ان الاربع سنين اللي عشتهم بعيد عنها وعنكم وعن البلد كلها قدروا ينسوني خيانتها!"

قرب منه جده وقال ليه بهدوء: "هو ده اللي قلقنا عليك يا رشيد، ان انت لحد دلوقتي مقدرتش تنسى!"

بص لجده وهز راسه بحزن وقال: "صدقني يا جدي.. اللي يعيش الصدمة والوجع اللي انا عشته، مستحيل ينسى بالسهولة اللي انتوا فاكرينها دي!"

قربت منهم رهف وهي شايلة ابنها مروان، لاحظت وجود توتر بين أخيها وجدها ووالدتها، جري مروان لرشيد بحماس، شاله رشيد وقبله بحب، وبعدين بص ليهم وقال قبل ما يمشي: "انا هاخد مروان نحتفل بعيد ميلاده انا وهو."

مشي من قدامهم وهو شايل ابن أخته وبيداعبه بمرح، تابعته عيون جده ووالدته وأخته. بصت والدة رشيد للجد وقالت ليه بقلق: "وبعدين يا عمي! احنا هنسيبه يدمر اللي باقي من حياته كده؟"

بص ليها الجد بتفكير، خايف ان يرجع رشيد للبنت دي مرة تانية. قعدت رهف تفكر معاهم بشرود لحد ما صدح صوتها بشغف: "الحل الوحيد ان رشيد يتجوز."...بقلمي ملك إبراهيم.
... يتبع
طبعا انتوا عايزين تعرفوا ازاي كارمن خانت رشيد واتسببت في كل الأذى اللي حصله دا🫣🏃
تفتكروا عملت إيه ؟ وامها لها علاقة بالموضوع ولا لا🤔
حبايبي متنسوش التفاعل بعد القراءة ♥️.



                     الفصل العاشر من هنا 
تعليقات
×

للمزيد من الروايات زوروا قناتنا على تليجرام من هنا

زيارة القناة