رواية شتات الفصل السابع والعشرون 27 بقلم مها حولي
_ ما تعمل لي فيها محايد ومثالي وتقعد تدافع عنها، بعد العملتو دا كلو انت لسه ما بترضى فيها؟ حتى بتفضلها علي وشايفها ملاك وانا شيطان؟
=انتي عارفه كويس اني ما قلت كدا! لو هي غلطانه انتي كمان غلطانه! ما كان عندك مشكله تواصلي معاهو رغم معرفتك انو هو ما عايزك هسي مالك راميه اللوم عليها؟ قبلها ما كلمتي زول ولمن طلبتي منو الطلاق برضو ما كلمتي زول ولا استشرتي زول! انت براك عملتي كدا في نفسك وهسي جايه تتباكي؟
_ما اتباكى كان اتباكيت قايلها بارده؟ شفت البت دي لو ختت يدها في المصحف انا ما بصدقها مشت كلمتو وعملت نفسها بريئه، قلبت الطاوله وطلعتني انا الغلطانه و دي حاجه ما جديده عليها! هي روح قلبها الناس تكون غلط وهي صاح، فنانه وشاطره جداً في كسر قلوب الناس، بتستمتع لمن تلعب بمشاعر اولاد الناس وتخليهم يجروا وراها وانت واحد من ضحياها، ما عارفه البت دي بتسوي ليكم شنو عشان تخليكم تجنوا بيها ومهما تعمل فيكم تدافعو عنها في غيابها وحضورها!
=انا ما دافعت عنها والموضوع داك انتهى من زمااان بالنسبه لي!
_بدليل انك لسه رافض الزواج!
= رافض لأني ما جاهز وما لاقي بت مناسبه، انا ما بعرس عشان انسى زول أو انتقم منو، بعرس لما اكون عايز أعرس ولما ألقى البت المناسبه 😊
_ بالله!! وأسيل دي شنو، امي مش قالت تخطبها ليك رفضتها؟
=لأني عارف ليه انتوا وانتي تحديداً مُصرين على البت دي و متمسكين بيها، وابشرك البت دي لو تبقى آخر بت لا بخطبها لا بعرسها، الفي بالكم ما بسويهو ليكم وبقولها ليك تاني انا ما بضحي بنفسي وأعرس واحده ما عايزها عشان أقهر زول!
_ ههه بتطاعني بالكلام!.... ما عارفه ليه انا انحرقت واتوجعت من كلام الناس و أخوي في بيتنا ما مقصر! في الحاله دي مفروض ما اعتب على الغريب إذا القريب بجرحني على الطالعه والنازله! 💔
= الاء عليك الله ما تزيديها علينا! ماف زول فينا لايمك قلت ليك خلاص حصل الحصل لكن وائل دا كان بقى آخر راجل ما بنرجعك ليهو، الموضوع دا هسي خليهو على جنب براك شايفه حالة امي و ابوي، الفيهم مكفيهم، ما تقعدي كل مره تزيدي النار حطب، عارف الحصل ما هين لكن هونيها على أهلك! قايلاهم هسي هم كدا مرتاحين؟ عارفه شعورهم شنو وهم بتهم اتطلقت حتى قبل ما يكتمل عرسها! عارفه احساسهم شنو وهم شايفنك بالحاله دي وما قادرين يعملوا ليك شي؟!
_______________________
ابوي لمن جا راجع لقى البيت غير! التوأم بلعبوا كوره في البيت ومرام بتسرح ل مآب وهم بتناقشوا في حاجه و هناك امي في المطبخ واقفه تطبخ و ريحة الأكل اللذيذ ماليه المكان! كنت معاها في المطبخ ومن دخلنا بحاول اقول ليها خليل وأهلو جايين المساء بس ما قدرت، مفروض خالتو سميره تتصل عليها تكلمها! ابوي لمن جا داخل علينا في المطبخ، قال لينا ما شاء الله الليله في شنو!... كان جايبو معاهو حاجات كتيره، ختاهم وقال لأمي الناس ديل كلموكم مش و عاين لي!
أمي قالت ليهو ناس منو؟
عاين لي وقال لي ما قالوا ليكم ولا شنو؟.... بتردد قلت ليهو قالوا....عاينت لأمي وقلت ليها هسي جايه أكلمك! قالت لي ناس منو ديل! ابوي قال ليها ناس خليل، جاين بعدين يتكلموا في موضوع العرس دا مره تانيه!
طوالي أمي عاينت لي، قلت ليها كنت جايه أكلمك، قالت لي متين لما ألقاهم قدامي وسميره ليه ما اتصلت كلمتني!
سكت سااااي، ابوي قال ليها بتكون قالت البت ح تكلمك، قالت ليهو ما ياهو انت اتصلو وكلموك كان غالبها تتصل علي!
طبعاً خفت الموضوع دا يكبر و يفشل مره تانيه! أمي أتلفتت عاينت لي وقالت لي وانتي مش براك لغيتي الخطوبه دي وما كلمتي زول، هسي جايباهم تاني وما دايره تكلمي زول؟
لساني إتربط! ابوي قال ليها ما تكبري الموضوع،خليهم يجوا نشوف العندهم..... خليتو يتكلم مع امي و طلعت من المطبخ، مرام قالت لي ديل منو الجاين؟ سامعاكم قلتو في ناس جاين؟... ما رديت عليها، مآب قالت ليها ديل ناس خليل، سمعتهم قالوا كدا!
دخلت جوه وبقيت بفكر الح يحصل شنو؟ وأمي ليه زعلت قدر دا وزعلها دا ح يكون عائق للزواج دا!.... ياخ انا بقيت نفسي أغمض وافتح ألقى العرس دا حصل بدون أي اعتراض و تدخلات من زول، عايزه اكون مع خليل وعايزه حالي يتغير عشان أقدر اساعد ابوي، للآن ما لقى ليهو شغل ثابت و لسه راجياهو المدارس و الجامعه ل مرام! مسؤوليات ومصاريف كتيره منتظراهو وهو سبحان الله ما حصل شكى! ما حصل قال مصاريفكم كتيره وقروشي كفايه، ما حصل بخل علينا في شي بسبب القروش، لو عندو ما بقصر ولو ما عندو بجيب من العدم عشان يقضي لينا الغرض!
انا والله نفسي اخفف عنو و اساعدو، هسي لو عرست ح اشيل منو مسؤوليات و رسوم الجامعه، خففت عنو حق سنتين وحق المصاريف اليوميه والموسميه زي الأعياد والمناسبات، لو عرست خليل بقدر اساعدو حتى لو ما قبل بطريقه مباشره أو غير مباشره ح أمد ليهو يد العون، ما بخليهو يتحمل المسؤوليات دي كلها براهو.... إتلفت حوليني بفتش للتلفون ما لقيتو، اتذكرت اني نسيتو في المطبخ، طوالي مشيت على المطبخ لما وصلت الباب سمعت ابوي قال لأمي:
اسألي أي زول لو حصل سمعني شاكلتك أو رفعت يدي عليك، خلي أي زول أولادك ديل ما اظن واحد فيهم سمعني وانا بتناقش معاك أو برفع صوتي عليك، عشان ما قاعد اشاكلك؟ بشاكلك والله وانتي عارفه بس انا عارف متين اتكلم ومتين اسكت، عارف وين ومتين اتكلم معاك بالأسلوب المناسب، مشاكل كتيره حصلت بيناتنا أولادنا ما حصل حسوا بيها عشان انا ما عايزهم يحسوا بيها وعشان ما عايزهم يشوفوني بنهر أمهم أو بشاكلها تقومي انتي دا كلو تخليهو وما تتعلمي منو شي وتجي تشاكلي بتك وتضربيها قدام البسوى وما بسوى؟ قايله الحاجات دي ما بتأثر عليهم؟ برضيك الكلام السمعتي أولادك قالوهو عنك؟ يعني انا ذاتي ما عارف كيف نفسك تسمح ليك تبشعي ببتك و تضربيها قدام الناس عشان بس تثبتي ليهم انك ام ما بترضى الغلط وبتعاقب أولادها لمن يغلطو على الناس؟ انتي متين تخلي حركة انك ترضي الناس على حساب أذية أولادك؟
فجأه تلفون أمي رن، كان في السرير جنب مرام و مآب، مرام شافت المتصل وقالت دي خالتو سميره، قالت لي هاك أدي التلفون لأمي، طبعاً هي لسه كانت بتسرح لمآب، شلت منها التلفون و دخلت بيهو المطبخ أديتو لأمي وشلت تلفوني ورجعت غرفتي، فتحت الشبكه وطوالي دخلت الواتس و يدي مشت ل دردشتها، كنت عايزه ارسل ليها، عايزه احكي ليها، عايزه اشاركها تفاصيل البحصل معاي حالياً و أكلمها انو خليل جاي مع أهلو اليوم بس إترددت! اصلا قوة العين اجيبها من وين وانا طول المده الفاتت لا رديت على رسايلها لا اتصالاتها مع اني اونلاين لحدي ما قنعت وبقت لا بترسل لا بتتصل!.... إتراجعت و دخلت دردشة خليل وكتب ليهو الموقف الحصل بعد ما طلب مني اعتذر من امي، في الختام كتبت ليهو : انا ما عارفه أشكرك على شنو وأخلي شنو، شكرا ليك على حاجات كتيره الشكر براهو ما كفايه عليهو، ما كان داخل بس المهم انو كان لازم اكتب ليهو الكلام دا و أرسلو ليهو.
اها خالتو سميره بإتصالها دا كلمت امي انهم ح يجوا بعدين يفتحوا موضوع الزواج دا مره تانيه، المهم بعد داك أمي رخت الخيط شووويه و جهزت البيت ومأكولات والمشروبات، وكل زول رتب نفسو ولبسو، لحد ما بعد صلاة المغرب، انا كنت مقلقه وخايفه وكل ما اسمع صوت حركه أو صوت زول قلبي بقرب يطلع من مكانو، بعد صلاة المغرب بأكتر من نص ساعه الجماعه وصلو!.... لمن جوا داخلين وابوي وامي مشوا استقبلوهم انا خلاص جسمي كلو بقى يرجف وقلبي وصل رجليني! كنت جوه بس سامعه أصواتهم وحتى لو كنت ما سامعه شي اخواني ما بقصروا، عاااد اول ما ديلك وصلوا جاتني مآب متسابقه مع التوأم قالت لي ناس خليل وصلوا! طبعاً امي قبلها اتصلت وكلمت مياده بالحاصل وقالت ليها تجي، قالت جايه لكن لسه ما وصلت!
كنت متوقعه يجي خليل وخالتو سميره و جويريه بس اتفاجأت لما عرفت انو في ناس جوا معاهم! توتري زاد و اطرافي بدت ترتعش والحاله اني لسه ما طلعت ليهم برا!
كانوا جايبين معاهم كميه من الحاجات، امي واخواتي ضيفوهم وانا ما طلعت ليهم، كانوا في الصالون التاني قريب للباب يعني بالإتجاه التاني للبيت، أثناء ما انا في الغرفه ماشه وجايه فجأه جاني صوت :
ما طالعه تسلمي علينا ولا شنو!
لما إتلفت لقيتها جويريه!.... انبسطت شديد بشوفتها، ضمينا بعض و سلمت عليها وانا عيوني مليانه دموع، قلت ليها ما مصدقه اني شايفاك قدامي! مشتاقين والله، قالت لي لو مشتاقه ح تجي ما ح تقطعي علاقتك بالناس بسبب زول واحد!
قلت ليها اووووف تاني رجعنا للموضوع!
قعدت وقالت لي بحمااااس خلاص خلينا من دا تعالي هنا قولي لي احساسك شنو وكيف ومتين قررتي انتي وخليل ترجعو لبعض مره تانيه!
طبعاً هنا انا استوعبت انو نحنا ما قررنا هو القرر! يعني ما حصل اتكلمنا في الموضوع دا و اتفقنا نرجع لبعض، رسل قال لي نجيكم المساء وقلت ليهم تعالو و بس زي لعب الشفع!
جويريه قالت لي احكي لي سررررعه قبل ما نطلع نمشي ليهم!
حكيت ليها الحصل، قالت لي كذابه والله، انتوا مخططين من بدري 😂
قلت ليها ما حصل والله، القلتو ليك دا هو الحقيقه، لا قررنا لا اتفقنا لا خططنا، بس ساي كدا قال لي نجيكم المساء قلت ليهو تعالو وما عارفاكم ذاتو جاين تقولو شنو 😂
قالت لي ياااا شيخه!
قلت ليها معليش معليش مشيها لي!
مرام جات داخله و قالت لي يااااهي ارح قالو ليك تعالي سلمي!.... هنا مسكت شديييد في يد جويريه، قعدت تضحك وتقول لي اتطمني دا خليل ذاتو ما زول تاني!
في قلبي قلت ليها ما دي المشكله ذاتا! مع انو دا ما أول لقاء،والمشهد دا متكرر بس حاساهو كأنو اول مره! حرفياً كل حاجه جواي قعدت ترجف! طلعت مع جويريه ومرام مشت قدامنا، شغاله ل جويريه والله خاااايفه انا وهي تضحك علي!
مع كل خطوه مني قلبي كانت بتزيد دقاتو، لمن وصلنا الباب انفاسي إنحبست!.... أخدت نفس عميق وجويريه ضغطت شديد على يدي، اول ما دخلنا عيني وقعت على خليل!
كان لابس على الله سمنيه و حالق و مرتب الحلاقه! شكلو كان جذاب، كمل الوسامه!.... طبعاً نهاي ما فكيت يدي جويريه، بدون ما أحس كنكشت فيها، سلمت عليهم وانا ماسكه يدها وخليل كان آخر زول اسلم عليهو، ابتسم علي بس ما قدرت اعاين ليهو كتييير، فجأه جويريه قالت لي خلاص فكي لي يدي! كلهم قعدوا يضحكوا علي! كان معاهم 3نسوان، اتنين خالات خليل و وحده ما عرفتها،و5 رجال، عرفت اتنين والباقي لا، قعدت جنب خالتو سميره و جويريه، ابتسمت لي خالتو سميره بس المره دي حسيتها مختلفه، ما زي المره الفاتت كانت دائما بتضحك و تتبسم لي ولمن اقعد جنبها تتكلم معاي لكن المره دي ما قالت لي شي و اصلا ما عاينت لي! حسيت بطعنه في قلبي!
بدوا الكلام، اتكلموا عن الزواج وعن الخطوبه الإتفسخت انو ما كان نستعجل و نلغيها وانو النقاشات وسوء التفاهم بحصل بين أي اتنين لكن الواحد ما يستعجل للشينه و و و...... الخ
طبعاً انا كل ما اعرف عيني ألقى خليل بعاين لي لمن زاد توتري! حسيت نفسي لو قعدت أكتر ح اسيح، عايزه امشي وما قادره اقوم واتحرك قدامهم كأني اتلصقت في الكرسي!.... ميلت على جويريه وقلت ليها بصوت واطي، ارح معاي انا طالعه من هنا، قالت لي ليه؟ قلت ليها بس ارح معاي!.... طوالي وقفنا على حيلنا وهي قالت ليهم عن إذنكم يا جماعه وطلعنا وخليل كان متابعنا ب نظراتو، لمن رجعنا الغرفه، قلت لجويريه أخيراً ح اتنفس كويس! ضحكت وقالت لي يا حليلك لاحظت ليك متوتره! قلت ليها ونظرات اخوك وترتني زيااااده وهو متقصد يعمل كدا، ياخ حسيت نفسي آيسكريم و ح اسيح! ضحكت وقالت لي انتوا اكتر اتنين متناقضين اشوفهم، لكن يلا أخيراً ح تتلموا في بيت واحد، قلت ليها الكلام دا لسسسه عليهو كتير، قالت لي حقو يعقدوا ليكم هسي و يريحوكم، قلت ليها مستحييييل ما برضى بحاجه زي دي، ما بحب عرس الكلفته والبشتنه، الوصول للزواج بمر بمراحل لازم نمر بيها، قالت لي دا جر هوا ساي، عرسوا واختصروا على روحكم، قلت ليها لاااا انا عايزه اجهز و أرتب نفسي، عايزه اعمل كل حاجه بتخص زواجي على مهلي، حتى كروت الدعوه، عايزه اعزم ناس كتيره، عايزه اعمل كل الحفلات القبل الزواج و حاجات كتيره، قالت لي شفتي ولمن اقول ليك مخططين من بدري تنكري! قلت ليها لا دي أفكار حتى من قبل ما أعرف اخوك! لو هو أو غيرو انا دي مخططاتي!.... سكتت بمسافه بعدها قالت لي بالنسبه للحصل داك.... قصدي قصة بت خالتك و ولد خالتو سميه، عارفه دا ما وقتها لكن.... قاطعتها وقلت ليها الحصل انو وائل كان عايزني قبل يخطبها وانا رفضت والحاصل بينو وبين الاء شي بخصهم بس اتهامها لي ما صحيح و وائل نفسو عارف انو انا ما عندي ليهو أي شي و عارف انو الإنقال ما صحيح! خليل نفسو عارف.... قلت لي ايوه عارفه خليل عارف،وصدقيني سؤالي ما اتهام ليك بالعكس كنت عايزه اسمعو منك انتي! قلت ليها عادي ماف مشكله عارفاهو ما اتهام!.... المهم ونحنا بنتكلم كدا فجأه سمعنا صوت زغاريد!... قلت ليها في شنو وهي قعدت تتبسم! بقيت مخلوعه وخايفه من الفكره الجات في بالي! مرام طوالي جاتني داخله وقالت لي اتخيلي عقدوا ليكم! كانوا جايبين مأذون معاهم!
قلت ليها بخلعه شنوووو!.... جويريه ضمتني عليها وقالت لي مبرووووك يا قلبي، قصدي يا مرت اخوي!.... دموعي جات نازله بقيت اقول ليها كيف يعني عقدوا، خليل ما قال لي كدا، ليه ما شاوروني، ليه ما سألوني، يعقدوا ليه!!.... جويريه قالت لي كنتي ح ترفضي يعني؟؟
فجأه امي وخالتو سميره جوا داخلين يباركوا لي و وراهم النسوان الجوا معاهم وانا دموعي عشره عشره، قلت لأمي دا شنو دا؟؟ ليه تعقدوا؟ خالتو سميره قالت لي خير البر عاجله! المشكله وين، العقد احسن شي!
باركوا لي وانا لسه دموعي نازله!
بعدها النسوان قعدوا في الهول والرجال في مكانهم وانا لسه جوه بتكلم مع جويريه وبقول ليها اخوك ليه يعمل كدا و ليه ابوي يوافق!.... طوالي رسلت لخليل في الواتس ما كان فاتح شبكه، رسلت ليهو رسالة SMS :
_انت ليه تعمل كدا بدون ما تشاورني؟ ليه بتقرر براك؟
أمي جات قالت لي خلاص الحصل حصل و دي ما كارثه عشان تقعدي تبكي البكى دا كلو!... ارح بهناك ابوك بناديك!
ناس خالتو سميره مشوا بهناك قدامنا، مشيت مع امي و جويريه وانا مغيوظه من خليل، لمن وصلنا جنب باب الصالون سمعنا صوت صرخه قويه جايه من بعيد!.... قلبي اتقبض! امي قالت بسم الله الصوت دا جاي من وين!.... لمن الصوت اتكرر تاني التيمان طلعوا يشوفو الصوت جاي من بيت ناس منو، ما عرفناهو صراخ حقيقي ولا صوت تلفزيون شغال بصوت عالي!.... المهم دخلنا الصالون وانا منزله راسي، ابوي والرجال باركو لي وانا ما فتحت خشمي، خليل نفسو ما اتكلم معاي ولا انا عاينت ليهو، ابوي قال لي شفنا العقد أنسب شي وعقدنا، واحد من الرجال قال ليهو ايي دا الصاح، العقد احسن من الخطوبه وعوارضها!
هم بتكلموا وانا بقول في نفسي مستحيل امشي كدا، عرس كشى مشى دا ما بنفع معاي! يعني خليل مستكثر فيني انو يعمل عرس وعقد زي الناس! عايزني امشي معاهو غبش كدا و بالبساطه دي! كنت عايزه أطق من الغضب والواجعني اكتر انو ما كلمني! انا ما بحب المفاجآت المن النوع دا! يمكن الحركه دي كان ممكن تفرح أي بت تانيه غيري بس انا لا🤚
وانا بفكر كدا، رفعت راسي لقيت خليل بعاين لي! عاينت ليهو بنظرات مليانه غضب وانا صاره وشي، ابتسم لي بس!.... هو قايلني بهظر ولا بستهبل!
فجأه كدا سمعنا صوت الباب بتلز بقوه، جوا التوأم جاريين أي واحد سابق التاني، وقفوا جنب باب الصالون وبصوت واحد قالو :
_أمي خالتي رقيه ماتت!
صدى الجمله دي اتردد كتير في مسامعي! حسيت نفسي بحلم أو بتخيل أو سمعت غلط! امي من الخلعه قالت ليهم رقيه منو؟.... بقوا شغالين ليها خالتي رقيه، خالتي رقيه يا أمي وهي لسه بتحاول تستوعب رقيه منو! قامت جاريه وتوبها زاتو ما لابساهو زي الناس، انا طوالي طلعت وراها ومرام اصلا كانت برا في الحوش لمن سمعت التوأم جرت بيت خالتي طوالي!.... لمن وصلنا بيتها شفنا جيرانا داخلين بيتهم، دخلنا جوه لقينا الاء قاعده على الأرض وبتصرخ، بتعاين لمكان معين وبتبكي و أخواتها كل وحده مقبله على اتجاه بتبكي! امي بقت تسألهم في شنو؟ في شنو يا ناس، رقيه وين زول اتكلم ماف!.... جات أقرب جاره لناس خالتي وقالت لأمي أحمد وابوهو جروا بيها المستشفى قالوا تعبت، امي قالت ليهم و دي مالا وأشرت على الاء، طبعاً الاء كانت بتقول أمي ماتت، أمي فاتت، جارة خالتي قالت ليها البت مخلوعه من صرخت وجينا لقيناها كدا وأمها رفعوها قدامنا وهي حالفه ما تقوم وما تسكت! أمي قعدت مع الاء على الأرض وقالت ليها يا بت جنيتي انتي؟!
الاء قالت ليها يا خالتي أمي ماتت، أمي دي ما راجعه تاني، هي ذاتا قالت لي كدا!.... بقت بس تبكي وتقول أمي ماتت!
أمي طوالي وقفت على حيلها وبقت تقول ودوها أي مستشفى وبقت تقول أدوني تلفون، الوقت داك ناس ابوي و خليل والباقين كلهم كانوا موجودين، ابوي كان واقف جنب باب الشارع بتكلم بالتلفون ومعاهو خليل، مشينا ليهو انا وأمي و ورانا اخواتي امي قالت ليهو ارح نحصلهم، وطلعت من بيت خالتي أبوي وقفها و قال ليهم ماف داعي هم جاين راجعين! قالت ليهو الحصل شنو!.... قال ليها مشوا بيها المركز القريب دا وسكت.... أمي قالت ليهو واها قالوا ليها شنو!.... ابوي عيونو إتملت دموع، انا لحظتها قلبي بقى يدق بسرعه و اتمنيت لو دا كلو خيال! بس ملامح وش ابوي و دموعو دي و نبرة صوتو ما بتبشر بالخير، قالت ليهو ما تقول لي، ما تقول لي، قال ليها لمن وصلوا الدكتور وشافها قال ليهم جات متوفيه، امي ختت يدينها الإتنين على راسها وبقت تصرخ، رجعت دخلت جوه وبقت تقول الليله وووووبعلي انا من اختي وبقت تصرخ، لمى و ولاء اول ما شافوا امي بتبكي وبتصرخ جنوا زياده و اتأكدوا انو أمهم اتوفت! الاء نفسها الكانت بتصرخ و بتبكي من قبيل وبتقول أمي ماتت اتخلعت لمن شافت امي بتصرخ و تبكي!.... جات لأمي وقالت ليها أمي وينا؟.... أمي بس بقت تصرخ و فجأه كدا البيت إتملى نسوان وكلو بقى بكى و كواريك! انا لحد اللحظه ديك ما مستوعبه شي! قاعده في الأرض جنب الاء هي بتصرخ وانا بس بعاين ليها هي وأمي، خالتو سميره بقت ماسكه أمي و بتحاول تهديها و جويريه و بنات الجيران مع الاء و باقي الجارات ماسكات ولاء و لمى ومآب ومرام، انا دا كلو كنت شايفاهو زي السراب بعيد! ما قادره أصدق! ما قادره استوعب! خالتي اتوفت!... البكى والموت الكنا بنشوفو بعيد عند الناس الليله جانا وشال خالتي!
كل الناس حوليني بتبكي بس انا ما قادره ابكي!....بعد شويه ازداد البكى والنواح لما جوا داخلين وهم شايلين خالتي ومغطنها! أحمد عينو ما رفعها من الأرض، امي لحظتها صوتها انقرش من شدة البكى، دخلو خالتي جوه وامي مسكت في أحمد وبقت تبكي فيهو وهو دمعه ما نزلت منو، عمو مبارك دا عيونو بقت حمراء من شدة البكى بس أحمد دمعه ما نزلت منو و وجعو انا حسيت بيهو، نفس صدمتي و عدم استيعابي للحاصل رغم اني شايفاهو قدامي هو كمان حاصل معاهو كدا وأكتر!..... اللحظه ديك البيت إنشق من كترة البكى والصراخ، وامي لسه ماسكه في أحمد تبكي فيهو، دا كلو جوه الغرفه الدخلوا فيها خالتي، الاء طوالي فتحت وش امها ورقدت على صدرها وبقت تبكي وتقول ليها قومي يا أمي عليك الله قومي، انا امشي وين بدونك، أقبل على وين يا أمي مخليانا لمنو، ما لينا زول غيرك في الدنيا دي، الليله نمشي وين يا أمي، نقول يا امو، انا دائما بجيك جاريه احكي ليك مصيبتي الليله أجري لمنو ومصيبتي بقت فيك!.... بقت تبكي و أخواتها يبكوا معاها، أحمد مشى عليها و ضماها عليهو وهي تبكي وتتكلم، الموقف دا هزاني من جوه و نزل دموعي! منظر أحمد و أخواتو وجنازة أمهم القدامهم خلت جسمي كلو يرجف، مشيت مسكت في الاء وبقيت ابكي فيها، التقول ياداب استوعبت، ابكي وكل ما اعاين لخالتي المغمضه عيونها كأنها نايمه يزيد بكاي! أحمد طوالي غطى ليها وشها وما عرف يسكت منو و يواسي منو ويخلي منو! مياده اختي ذاتا وصلت وخالتو سميه جات وبقت تبكي مع أمي وتحاول تصبر فيها وأمي ماف شي بصبرها على البقت فينا.....
حقيقة الموت من أفجع الأقدار،في لمح البصر بخطف مننا أعز ما نملك وبخلف وراهو حياة كامله ما ح تعرف كيف تستمر بدون الشخص دا،
بقولو الجمره بتحرق الواطيها والوجع ما بحس بيهو إلا سيدو لكن وجع موت الأم كل الناس بتحس بيهو، الفقد أمو والخايف من فقدها، هو الوجع الوحيد الكل الناس صغار وكبار بتحس بيهو، دا من أصعب وأمرر الأوجاع، الأم ما مجرد زول ساكن معانا في البيت، هي روح البيت و ركنه الأساسي، هي الصوت الإتعودنا عليهو،واليد البتمسح علينا، هي التفاصيل الصغيره والكبيره البتدي أيامنا طمأنينه وانشراح، وأقسى حاجه في الفراق انك تضطر تعمل حاجات انت نفسك ما مصدق وما مستوعب انك بتعملها زي انك تودع وشها للمره الأخيره و تشارك في غسلها و تكفينها،وتشيل جنازتها، وتنزلها في قبرها وتقف قدامو عشان تستوعب انك هنا دفنت أعز وترجع للبيت المتعود انك لمن تجيهو تلقاها قدامك و تتذكر انك خليتها هناك وراك و دخلت في عالم تاني ما فيهو أمك!
أنا الحاجات دي كلها عشتها مع اولاد خالتي، مع الاء و لمى و ولاء و مع احمد لما رجعوا من الدفن!
انا اكتر حاجه واجعه قلبي انو خالتي اتوفت وهي زعلانه مني، اتوفت وانا لي أيام ما شفتها، اتوفت في أهم يوم في حياتي 💔
لمن الرجال رجعوا من المقابر الاء تعبت شديد وكانت مهبطه،رسلت مآب تنادي أحمد نوديها المستشفى بس لمن مشت وجات قالت لي جاء وائل، واقف برا قال بوديها هو، طوالي لبستها طرحتها كانت لابسه العبايه، سندناها انا و جويريه وطلعنا بيها برا، لقيت وائل واقف لينا جنب الباب طوالي مسكها مننا و ركبها العربيه، قلت لجويريه ح امشي معاهم وطوالي دور العربيه ومشينا بيها المستشفى أخدت درب، أحمد اتصل علي يسأل عن اختو وجاط ليه ما كلمتو، قلت ليهو راجعين، وفعلاً لمن رجعنا لقيناهو منتظرنا في الشارع، لمن نزّل الاء بقى يبكي!.... الإتنين ضموا بعض وبقوا يبكوا و ديك كانت أولى مره أحمد يبكي فيها بالطريقه دي! الوجع حار و الفراق صعب، دي أمهم 💔
أحمد دخل جوه مع اختو وانا بقيت أمسح في دموعي، وائل قال لي خلي بالك منها، لو احتجتوا شي اتصلوا علي انا قريب!.... ما رديت عليهو، مشيت على الباب وكنت ح ادخل بس لقيت خليل قدامي! من قبيل ما شفتو واصلا الحاله الأنا كنت فيها ما خلتني أشوف زول، عزاني و وقف اتكلم معاي شويه وبعدها انا دخلت جوه.
_____________________
الاء:
الموت رغم غرابتو و قربو كان بالنسبه لي شي أشبه بالخيال، أشبه بالقصص بتحصل لكن بعيد عننا، بنسمع بموت زول بنترحم عليهو و نواصل يومنا، ورغم معرفتي انو الموت حق و واقع ح يمر بينا كلنا لكن الآن عرفت حقيقة الكلمه دي وكيف انها ممكن تهدم حياة وعالم كامل!
فهمت وعرفت انو الموت بجي في صمت، بلمح البصر، بجي في كل الأوقات مساء أو صباح عادي ويقسم العمر نصين، عمر كانت فيهو أمي و عمر ما فيهو أمي!
لحظة وقعت قدامي و بقيت بحاول أرفعها و هي بتلفظ أنفاسها ما فارقتني، قالت لي خلي بالك من أخوانك، اتصبروا ما تتبشتنوا، اخواتك وأحمد وابوك ما تقصري منهم، كانت بتوصيني عليهم وهي ما عارفه اني ما قدر المسؤوليه دي، انا ولا شي بدونها، نحنا محتاجين ليها في كل يوم وكل دقيقه و كل لحظه!
كل لحظه مرت في اليوم داك كانت ثقيله على قلبي،بالذات وقت غسلها وتكفينها،هنا الموت كان أقسى ما اي شي و اتحول من خبر لحقيقة شايفاها قدام عيوني!
أمي الإحتضنتنا ونحنا صغار و كبار، و سهرت في مرضنا و دراستنا والكانت بتنتظر رجوعنا بقلق في كل مره نطلع فيها من البيت، الدائما بتمسح دموعنا و بتواسينا و تقيف معانا اليوم جنازتها اتمددت قدامي!
غسلها كان من أصعب و أمرر اللحظات، قوة قلب ساي خلتني اقيف فوق راسها في اللحظه ديك، كان في صمت تقيل ضاغط على قلبي و دموعي جفت وقتها من هول الصدمه والقدر البقى واقع!
اتمنيت الزمن يقيف لحظتها أو ينتهي العالم قبل ما يكتمل الوداع الأبدي!
أما التكفين، كان أشبه بإنك تقفل باب انت ما مستعد تقفلو للأبد،إحساس انك تشوف ملامح انك للمره الأخيره قبل ما تمشي منك بعيد إحساس كعب وصعب شديد، بتسابق الزمن عشان تحفظ آخر ملامحها في ذاكرتك، ولو عليك تشيلها كلها و تحتفظ بيها جواك💔
لما رفعوا الجنازه حسيت روحي اترفعت معاها، الأم الشايله همومنا سنين اليوم هي المحموله على أكتاف من بينها كتف ولدها أحمد! وعن كمية المراره والوجع الحس بيها أحمد وهو رافع جنازتها في كفتو وماف أصعب من انو يشيّع الإنسان الزول كان طول عمرو حامي حماهو و مصدر أمانو وطمأنينته! وماف أصعب من انك تدفن امك ب يديك و ترجع البيت بدونها، ترجع براك وانت دفنت جزء منك تحت التراب، خليتو وراك براهو في ظلمة القبر.
وجا الليل!
الليل الكان في بدايتو بنقعد المساء كلنا بنتونس مع أمي، نشكي ليها و تحل لينا مشاكلنا، تضحك و تضحكنا، تقيف معانا في الغلط والصاح و تدافع عننا!.... الليله ديك كانت من أطول الليالي في حياتي كلها، البيت كان مليان ناس بس حسيت نفسي براي، بيتنا الكان جنه بوجود امي بقى صحراء قاحله!
اما في الصباح!
في شروق شمس أول يوم وجعني ضو الشمس مع اني ما نمت!
دخلت أشعة الشمس من الشباك زي كل يوم بس أمي ما جات عشان تصحيني! ما سمعت حركتها وما سمعت صوتها وهي بتنادي علينا من المطبخ!
بعدها كل الأيام بقت متشابه وكل يوم الوجع بزيد، وقتها بس فهمت انو الموت ما بنتهي بإنتهاء الجنازه ولا وقت يرجعوا الناس من المقابر، الموت ببدا بعد الحاجات دي كلها ولمن يرجعوا كل الناس الحوليك لبيوتهم و يفضى البيت الأصلا لو اجتمعوا فيهو كل سكان الأرض ما ح يملو فراغ غياب فقيدة قلبي.
من وقتها والبيت بقى ما زي زمان، اتحول من جنه لمقبرة،في كل ركن و زاويه ذكرى،والفكره الأشد إيلاماً انو الحياة مستمره حتى لو كانت بشكل مريب و ملل و مؤلم، لكن مهم يحصل في حياتنا دي من مواقف و أحداث في كل حدث حيكون في مقعد فارغ، وفي كل مره نرجع فيها للبيت حتكون في أمنيه صغيرة ما ح تتحقق:
انو تجي امي و تفتح الباب.
______________________
شهر إلا 3 أيام! كيف الزمن بمر بسرعه لكن الوجع ثابت! مروا 27 يوم على وفاة خالتي! بحس وفاتها دي كأنها امبارح!
قال لي ربنا يرحمها ويجعلها من أصحاب اليمين! قلت ليهو والله حاسه نفسي بحلم! يارب يكون حلم عشان أصحى منو!
قال لي الموت حق ماف مفر منو، وكلنا ح نموت في يوم، قلت ليهو بس وفاتها كانت أكبر صدمه في حياتي! حاجه كدا زي الكذب! حصلت في لمح البصر!
قال لي الموت اصلو كدا! بجي فجأه وما بتوالف!
بعدها الإتنين سكتنا وانا أخدت نفس وغمضت عيوني، هو قبلها كان سايق بس لمن بديت اتكلم وقّف العربيه على جنب، حصلت لحظات صمت طويله بعدها هو قال لي عارف انو وجعك كبير ولسه ما شفى، ويمكن دا ما الوقت المناسب بس انا عشان عايزك اكون معاك على طول عايزك تمشي معاي البيت! .... بيتك الجديد!
"الموتُ مُر
والفقد مُر
والفراق مُر
وكل ألفاظ الوداعِ مُرة..
وكل شيءٍ يسرق الإنسان من الإنسان مُر! "
يتبع.....
الفصل الثامن والعشرون من هنا