رواية بائعة البليلة الفصل الخامس عشر 15بقلم سلوي عوض


رواية بائعة البليلة الفصل الخامس عشر 15بقلم سلوي عوض


*جميلة:* مينفعش بيه كبير كده نتأخر عليه.
*رضا:* وجب يا حلويات.

وبعد ساعتين يصلوا إلى فيلا طاهر الذي كان في انتظارهم:
- *رضا:* أحلى مسا على باشا مصر.
- *طاهر:* أهلاً يا رضا، هي ديه عروستك الجديدة.
- *رضا:* آه هي، إيه رأي معاليك.
- *طاهر:* حلوة، مبروك.
- *جميلة:* الله يبارك في حضرتك.
- *طاهر:* بس هو أنت إزاي تديها الأمان بسرعة أوي كده.
- *جميلة:* ده احنا عشرة يا باشا، وبعدين يعني أنا عندي خطة لشغلكم هتخليكم تبيعوا كمية أكبر عن طريقي، أصل أسم على مقامك، أنا واقفة بعربية بليلة في الحارة، يعني أقدر أبيع الصنف من غير ما حد يحس بيا، وأهو ننفع ونستنفع، أصل بيني وبينك زهقت من الفقر.
- *طاهر:* أممم وإيه كمان.
- *رضا:* أنا أضمنها برقبتي معاليك.
- *طاهر:* تمام.
- *جميلة:* معقولة بيه كبير زيك يقلق من حتة عيلة غلبانة زيي، طب ما هو أنا لو عملت حاجة تقدر تفعصني بجزمتك.
- *طاهر:* كويس إنك عارفة.
- *جميلة:* لكن ما شاء الله إيه البيت الجميل ده، ده تقريباً أكبر من حارتنا.
- *رضا:* ده قصر مش بيت يا حلويات.
- *جميلة:* لمؤاخذة يعني هو حضرتك مش متجوز.
- *طاهر:* تعرفي إني أنا أستريحتلك.
- *رضا:* قصدك إيه معاليك.
- *طاهر:* متبقاش حمار، أنا يستحيل أبص لأي واحدة تخص راجل من رجالتي.
- *جميلة:* شكل حضرتك عندك مشكلة عاطفية.
- *طاهر:* جيتي على الجرح، تعرفي أنا بهيلماني ده كله وفلوسي ونفوذي مقدرتش أخلي مراتي تحبني، مع إني خدتها فقيرة وجعانة ومش لاقية تاكل، أبوها كان شغال عندي وبعدين مات، ولما جاتلي هي وأمها كانت حالتهم كرب، أتجوزتها وخليتها هانم والكل تحت أمرها، لكن تقولي إيه الفقري فقري.
- *جميلة:* يا حرام، للدرجة ديه بتحبها.
- *طاهر:* بحبها بس، ده أنا بعشقها ونفسي ترضى عني.
- *جميلة:* طب ممكن أقعد معاها.
- *طاهر:* مش عارف هتوافق ولا لا.
- *جميلة:* خلي أنت حد بس يوديني عندها وأنا هتصرف وأحاول أقنعها.
- *طاهر:* يا ريت، ده أنا كنت أديكي اللي عايزاه.
- *جميلة:* كفاية رضاك علينا يا باشا.
- *رضا:* إيه دخلك أنتي في الحاجات ديه، راجل ومراته أنتي مالك.
- *طاهر:* أسكت أنت، تعالي يا جميلة، أسمي جميلة.
- *طاهر:* تعالي يا جميلة.

لتذهب جميلة مع طاهر ليصعدوا إلى جناح زوجته، ليطرق طاهر عليها الباب:
- *زوجته ريم:* مين.
- *طاهر:* أنا، أفتحي في ضيفة عايزة تقعد معاكي شوية.
- *ريم:* طيب.

لتفتح ريم الباب، وإذا بنا نرى فتاة لم تكمل العشرين من عمرها، جميلة جمال أوروبي، جسدها قليل وقصيرة نوعاً ما:
- *ريم:* هي ديه الضيفة.
- *جميلة:* أيوه أنا، ممكن أقعد معاكي شوية.
- *ريم:* أتفضلي.

ثم يتركها طاهر ويذهب:
- *جميلة:* أنتي حلوة أوي.
- *ريم:* كتر خيرك.
- *جميلة:* لا والله بتكلم بجد.
- *ريم:* وإيه فايدة الحلاوة وأنا محبوسة في قفص، هو آه قفص دهب، بس في النهاية أسمه حبس.
- *جميلة:* طب متعيشي سنك وحياتك، ده حتى البيه بيحبك أوي ومستعد يعمل أي حاجة عشانك.
- *ريم:* ده كلام بس، لكن أنا عمري ما حبيته ولا هحبه.
- *جميلة:* في حياتك حد تاني.
- *ريم:* أبداً والله، بس أنا مش حباه، حياته كلها إجرام وحرام، وأنتي أكيد زيه، نفسي ربنا يخلصني منكم، بجد اللي بيحصل ده حرام.
- *جميلة:* وليه متكنيش أنتي بتمثلي عليا ومتفقين عليا أنتي وهو، مع إني جاية بطيب خاطر وسماحة نفس.
- *ريم:* بتقولي إيه، أنتي حد الله بيني وبين الحرام، ثم تمسك بالسلسلة التي في رقبتها، وحق المصحف ده أنا بكرهه وبكره عيشتي معاه وبكره الحرام، أنا مش أد عذاب جهنم أو إن ربنا سبحانه وتعالى يغضب عليا، طب هقولك حاجة، تعرفي إني لسه بنت وهو ملمسنيش.
- *جميلة:* مش عارفة ليه أنا مصدقاكي، هو أنتي أهلك فين.
- *ريم:* أنا مليش غير أمي اللي حرمني منها، ومنعها تيجي ومنعني أروح أزورها.
- *جميلة:* طب أسمعي كلامي وأنا هخليكي تروحي تزوري أمك، وهروح معاكي كمان.
- *ريم بجد:* بجد.
- *جميلة:* بس تسمعي كلامي وتنفذيه.
- *ريم:* طب وأنتي هتساعديني ليه.
- *جميلة:* بعدين تعرفي، بس لو طلعتي بتكذبي عليا متلوميش غير نفسك.
- *ريم:* موافقة.
- *جميلة:* احنا بقى هننزل تحت نقعد معاهم، أنتي هتلطفي الجو مع طاهر وسيبي الباقي عليا.
- *ريم:* ماشي.

لتنزل جميلة ثم تذهب إلى طاهر:
- *طاهر بحزن:* أنا عارف حظي وبختي، طبعاً راكبة دماغها.
- *جميلة:* هي مين ديه.
- *ريم:* طب بص هناك كده.

لينظر طاهر ليجد ريم آتية إليه:
- *جميلة:* أهم حاجة قبل ما تيجي هتقولك عايزة أزور أمي، أنت هتوافق وأنا هوديها وأجيبها.
- *طاهر:* إيه هو ده.
- *جميلة:* مش أنت عايزها تحبك، وافق على أي حاجة أقولها وهتشوف النتيجة، وأهو من قعدة واحدة معاها نزلتها تقعد معاك.
- *طاهر:* أيوه بس أنا مانعها تخرج خالص.
- *جميلة:* بقولك إيه أنا مرارتي ضيقة، عايزها تحبك ولا لا.
- *طاهر:* يا ريت.
- وبعد أنا هاخدها أوديها عند أمها وأقعد معاها وأرجعها، وأبعت يا سيدي رجالتك معانا وخلي رضا عندك رهن.
- *رضا:* جرى إيه يا حلويات.
- *جميلة:* بهزر يا قلبي.
- ثم توجه حديثها نحو طاهر: بس بعد كده لما تنول المراد أنا ليا حلاوتي.
- *طاهر:* طبعاً طبعاً، أمال إيه.
- *جميلة:* أنا عايزة أدخل الحمام.
- *طاهر:* أدخلي القصر وخلي واحدة من الشغالات تطلعك الحمام الخاص.
- *جميلة:* شكراً.

وها هي ريم قد أقتربت منهم:
- *ريم:* عاملين إيه.
- *طاهر:* أخيراً الشمس طلعت.
- *ريم بتمثيل:* ده أنت الشمس والقمر.
- *طاهر:* بجد.
- *ريم:* آه طبعاً، جميلة فهمتني إني لازم أفكر وأراجع نفسي، فيا ريت تديني فرصة عشان أقدر أحبك.
- *طاهر:* براحتك، أنا مش مستعجل، أهم حاجة تكوني جنبي، ويا ستي عشان تعرفي غلاوتك عندي، أنا موافق إنك تروحي تزوري والدتك، وهبعت كمان جميلة معاكي، ومش هبعت حد من الرجالة عشان متزعليش.
- *ريم بفرحة:* بجد، ثم تقبله في خده، شكراً أوي.
- *طاهر:* هو اللي حصل ده بجد.
- *ريم:* آه طبعاً.
- *طاهر:* هي باستني يا رضا.
- *رضا في نفسه:* إيه الراجل الهايف ده وعاملي نفسه مافيا وكوماندا، حتة عيلة تعمل فيه كده.
- *طاهر:* رضا بكلمك.
- *رضا:* آه يا باشا، بجد.

*أما جميلة فها هي قد دخلت دورة المياه لتراسل الظابط حسن على الواتساب وتبلغه بكل ما حدث:*
- *حسن:* خليكي على موقفك لغاية ما نشوف إيه حكاية ريم ديه، ممكن يكون حوار هما متفقين عليه، طاهر ده راجل شمال ودماغه سم، أهم شيء تثبتي على موقفك، وأنا هعمل تحرياتي وأقولك تعملي إيه.
- *جميلة:* تمام، أنا هتعامل معاها على الأساس ده.
- *حسن:* أمسحي الرسايل، ولما توصلي عند بيت أهلها أبعتي اللوكيشن.
- *جميلة:* حاضر.

ثم تفعل جميلة ما طلبه منها حسن وتنزل إليهم:
- *طاهر:* روحي معاها يا جميلة عند والدتها، السواق هيوصلكم ويرجعلي، ولما تحبوا ترجعوا كلميني.
- *جميلة:* أنا هرجع على الحارة.
- *رضا:* يعني إيه مش مالي عينك، أنا زي ما جيتي معايا هتروحي معايا.
- *جميلة:* أمرك، أنا قصدي بس عشان متأخرش.
- *رضا:* يا ستي عادي، كله عشان البيه يرضى علينا.
- *طاهر:* ده خدمة العمر يا رضا، وشوف بقى أنا هعمل معاك إيه.
- *رضا:* إيه يا باشا طمني.
- *طاهر:* همسكك تجارة السلاح وأركن شلبي.
- *رضا بفرحة:* بجد يا باشا.
- *طاهر:* أنت تعرف عني إني كلمتي واحدة.
- *رضا:* يا سعدك يا فرحتك يا رضا، صحيح الحريم أعتاب، والبت جميلة ديه وش الخير.
- *طاهر:* فعلاً بنت عندها كاريزما في الإقناع هايلة.

وهنا تقترب منهم جميلة:
- *جميلة:* مش يلا بينا يا ريم.
- *ريم:* أنا فرحانة أوي عشان هشوف ماما.
- *طاهر:* أحلامك أوامر.

وبعد ساعة كانت جميلة قد وصلت مع ريم إلى منزل والدة ريم السيدة مجيدة:
- *مجيدة وهي غير مصدقة:* ريم بنتي، معقول أنتي هربتي إزاي من المفتري ده.
- *ريم:* مهربتش، أعرفك على جميلة يا أمي.


                الفصل السادس عشر من هنا 

تعليقات
×

للمزيد من الروايات زوروا قناتنا على تليجرام من هنا

زيارة القناة