*حنان:* شخصية مين.
*عاصم:* أمي، وعارفك عايزة تعرفي كل حاجة، هقولك يا ستي، لما جيت الحارة هنا قابلت بنت جدعة جداً وطيبة وحبيبة الكل، وأنا كمان حبيتها، وواقفة وقفة جدعنة معايا.
*حنان:* بتقول حبيتها.
*عاصم:* معرفش إزاي بس حبيتها، ولما تيجي هبقى أكملك.
*حنان:* يا ألف بركة، الحمد لله.
*أما جميلة فكانت تجلس مع نؤة في منزل العم ياقوت:*
- *جميلة:* لا حول ولا قوة إلا بالله العلي العظيم، معقولة عفاف تخرب بيت ابنها بإيدها.
- *مديحة:* شيطانة والعياذ بالله.
- *نؤة:* سيبولي أنا بقى الطلعة ديه.
- *جميلة:* أخيراً بقالك عوزة يا نؤة، ده عبده لما يعرف هيعمل منك شاورما.
- *نؤة:* آه يا أختي بس إيه يعني، أنا بعمل خير، وعشان أبلة فهيمة أعمل أي حاجة.
- *فهيمة:* كتر خيرك يا نؤة، نخدمك في الأفراح.
- *نؤة:* تعيشي يا أبلة، أتصل الأول على عبودي أفهمه، وبعدين أروح أشنكل زيزو على بوزه.
لتتصل نؤة على عبده لتبلغه بكل ما حدث:
- *عبده:* نهار أبوه أسود، عايز يتجوز حبيبتي.
- *نؤة:* يا عم روح بقى، بقولك في بيت أتخرب.
- *عبده:* وبعدين فيكي، مش هقدر أقولك لا، بس المهم تعالي عندي المحل وهندب خناقة كبيرة معاكي، وأكيد هو هيفرج على الخناقة، وأقوم ضاربك كام قلم كده عشان أفش غلي فيكي.
- *نؤة:* نعم يا حلو، ده أنا كنت أكسرلك إيدك.
- *عبده:* وهون عليكي.
- *نؤة برومانسية:* متهونش طبعاً.
- *جميلة:* مش وقت نحنحة منك ليه، أخلصي.
- *نؤة:* آه صح، المهم وبعدين.
- *عبده:* هقولك غوري في داهية، مش عايز أعرفك تاني، هتقوليلي بكرة أتجوز سيد سيدك، هو وقتها هيخش على الخط وأنتي وشطارتك، بس ورحمة أبويا لو مسك إيدك حتى لأكون قاتله، فاهمة.
- *نؤة:* متخافش كله هيبقى كلام في كلام.
- *عبده:* يلا تعالي.
وبعد أن أغلقت نؤة الهاتف مع عبده:
- *نؤة:* هروح أنا بقى، تعالي معايا يا جميلة عشان أنتي ليكي دور.
- *مديحة:* دور إيه، أنتوا هتمثلوا فيلم.
- *نؤة:* بقولك إيه يا خالتي أصحي معايا الله يكرمك، بصي يا جميلة أنتي اللي هتكوني همزة الوصل بيني وبين زيزو، وكمان هتشتمي عبده عشان نسبك الحكاية.
- *جميلة:* ماشي، يلا بينا.
- *فهيمة:* ربنا يخليكم ليا.
وها هن يذهبن إلى الحارة، لتذهب نؤة إلى ورشة عبده لتفتعل معه مشكلة، ليعلو صوته عليها وسط الحارة، ويحدث هذا وأهل الحارة يشاهدون ما يحدث:
- *جميلة:* جرى إيه أنت فاكر نفسك مين يا شحات يا اللي مش عارف تجمع المهر، هي نؤة شوية.
- *نؤة:* قوليله المشحم المزيت، أنا اللي غلطانة إني بصيتلك.
- *جميلة:* ده أنا هجوزك سيد سيده.
- *وهنا يقترب منهم زيزو:* إيه يا جماعة أهدوا بس.
- *نؤة:* شايف يا سي زيزو بيعاملني إزاي.
- *جميلة:* شايف الرجالة، أمال لو كنت في شياكة وحلاوة زيزو كنت عملت إيه يا شيخ روح.
- *زيزو:* تشكري يا أبلة، تعالوا تعالوا أشربوا حاجة تروق دمكم.
- *جميلة:* تعالي يا نؤة، عبده في ستين داهية، غوروا.
ليتركوه ويذهبوا:
- *زيزو:* هدي نفسك يا آنسة نؤة، ده أنتي ألف مين يتمناكي.
- *جميلة:* عن إذنكم هكلم رضا ييجي يقعد معانا.
- *زيزو:* بقولكم إيه تعالي نروح ناكل لقمة ونقعد نتكلم.
- *جميلة:* طب أنا عندي حل حلو، خطوبتي على رضا النهارده هنعملها في بيت زوبة العالمة، متيجي يا زيزو.
- *زيزو:* أجي وماله.
- *جميلة:* بس خليك عارف خطوبة في السر من غير أهلي ولا أي حد يعرف.
- *زيزو:* مفهوم، عقبالك يا آنسة نؤة.
لتنظر نؤة في عينيه:
- *نؤة:* إيه ده أول مرة أعرف إن عيونك حلوة أوي كده.
- *زيزو بهيام:* أنا مش مصدق نفسي.
- *نؤة:* هروح الحمام وجاية.
وبعد أن تركتهم وذهبت:
- *جميلة:* بقولك إيه أنا عارفة إنك بتحب نؤة.
- *زيزو:* إيه بحب مين، وعرفتي منين.
- *جميلة:* أخلص بتحبها ولا.
- *زيزو:* بحبها بس ده أنا واقع لشوشتي.
- *جميلة:* خلاص سيب الحكاية ديه كلها عليا أنا، وممكن كمان نعمل خطوبتكم معانا، بس برده في السر.
- *زيزو:* طب وهي هتوافق.
- *جميلة:* ما هي كمان شبه بتحبك كده.
- *زيزو:* أحلفي.
- *جميلة:* وحياة أبويا وأمي، بس زي ما تقول لما لقيتك مش معبرها قالت خليني في عبده، طب ديه ياما كلمتني عنك.
- *زيزو:* يا قلبي.
- *جميلة:* وبعدين الخطوبة لازما تبقى في السر لغاية ما أخوها يرجع.
- *زيزو بارتياح:* عندك حق.
ليتحدث مع نفسه: وأكون أنا كمان خلصت من الزفتة عفاف.
- *زيزو:* ماشي، يا فرحتك يا قلبي.
لتقترب منهم نؤة:
- *نؤة:* مش يلا بينا.
- *جميلة:* بقولك إيه فاكرة الراجل اللي أنتي فاكرة معجبة بيه.
- *نؤة بتمثيل:* وهو أنا أقدر أنساه.
- *زيزو:* يا قلبي أنا كمان بحبك أوي ودايب في هواكي.
- *نؤة:* بجد.
- *زيزو:* جد الجد، يا حلم عمري.
- *جميلة:* بقولك إيه النهارده خطوبتك على زيزو.
- *نؤة:* إزاي.
- *جميلة:* هو كده، هتبقى في السر لغاية ما إبراهيم يرجع بالسلامة.
- *نؤة:* أنتي شايفة كده، خلاص ماشي، موافقة.
- *زيزو بفرحة:* هو النهارده ليلة القدر يا ولاد ولا إيه.
- *جميلة:* طب يلا بينا ونتقابل عند زوبة.
- *نؤة:* هتوحشني يا عريسي.
ليتركهم زيزو ويذهب:
- *جميلة:* آه لو عبده عرف إنك قولتيله يا عريسي كان حطك تحت العربية وداس عليكي.
- *نؤة:* المهم بقى عايزين حد يبلغ عفاف.
- *جميلة:* بسيطة، رقم غريب يكلمها ويقولها، ولو زيزو أتكلم هنقوله إن عبده هو اللي عمل كده.
- *نؤة:* يا سلام، طب وعبده عرف منين.
- *جميلة:* هو في حاجة بتستخبى في الحارة ديه.
- *نؤة:* على رأيك، يلا يا أختي نروح نجهز.
- *جميلة:* أستني نطمن أبلة فهيمة الأول.
- *نؤة:* عارفة الأحسن إيه، إن عبده هو اللي يبلغ عفاف وييجي معاها عند زوبة عشان يصور كل حاجة بتحصل، وبعدين يبعتهم لوحيد، عشان أنا بطريقتي هخلي عفاف تعترف بكل حاجة.
- *جميلة:* ده أنتي طلعتي مشكلة كبيرة.
- *نؤة:* أمال إيه، ما هي ديه آخرة الفرجة على الأفلام البوليسية.
- *جميلة:* طب يلا يا أختي أتصلي على عبده وعرفيه هيعمل إيه.
- *نؤة:* عبودي حبيب قلبي الغالي.
- *جميلة:* أخلصي يا بنتي ما فيش وقت.
- *نؤة:* طيب إيه وجع الدماغ ده.
لتتصل نؤة على عبده لتقص عليه ما سوف يفعله:
- *عبده:* حلو ده، أقفلي بقى وأنا هروح لعفاف.
وبعد أن أغلق عبده الهاتف مع نؤة، فها هو يذهب إلى منزل عفاف:
- *عبده:* ست أم وحيد، كنت عايزك في موضوع كده.
- *عفاف:* خير يا عبده.
- *عبده:* أنا عارف إنك متجوزة زيزو بتاع الفول.
- *عفاف ببجاحة:* آه متجوزاه، خير عايز حاجة.
- *عبده:* طب دخليني، هفضل واقف على الباب كده.
- *عفاف:* مقدرش أدخلك وراجلي مش موجود.
- *عبده:* راجلك اللي هيتجوز عليكي.
- *عفاف:* بتقول إيه أنت.
- *عبده:* زي ما بقولك كده.
- *عفاف:* مين اللي قالك الكلام ده.
- *عبده:* محدش قاللي، أنا شوفت بعيني، أصله هيتجوز خطيبتي.
- *عفاف:* قصدك البت نؤة.
- *عبده:* آه، وكمان عرفت هيعملوا الخطوبة فين، أصلي مشيت وراهم وراقبتهم وعرفت إن الخطوبة هتكون عند زوبة العالمة.
- *عفاف:* آه الندل الجبان، بس عارف لو كنت بتكذب هتعرف شغلك.
- *عبده:* وأمته بقى الخطوبة ديه.
- *عبده:* كمان شوية، تعالي أنزلي معايا وهنستخبى، ولما يطلعوا نطلع وراهم وأفضحيه براحتك.
- *عفاف:* ده أنا هخرب بيته.
*أما في منزل زوبة لنجد أن السيدة حنان قد وصلت ومعها خالد ليحتضن عاصم والدته:*
- *خالد:* أيوه يا عم أنت هايص هنا.
- *عاصم:* أبوشكلك بطل.
- *حنان:* أمال فين اللي قولتلي عليها.
- *خالد:* هي مين هاه.
- *حنان:* مش صاحبك حب وطب.
- *خالد:* أوبا، ألف مبروك يا عاصومي.
- *عاصم:* أخرس، هتيجي كمان شوية، أصل خطوبتها النهارده.
- *حنان:* خطوبة إيه.
- *عاصم:* أقعدي وأنا هفهمك كل حاجة.
وبعد أن قص عاصم كل شيء على والدته:
- *حنان:* الله ديه بنت هايلة، أنا حبيتها قبل ما أشوفها.
- *خالد:* غرام المليونير وبائعة البليلة.
- *عاصم:* خليك في حالك أنت.
- *حنان:* طب هي شعورها إيه من ناحيتك.
وبعد فترة قليلة من الزمن تصل جميلة ومعها نؤة وهن في أبهى صورهن:
- *زوبة:* أهلاً بالعرايس، تعالوا أدخلوا، العرسان لسه مجوش.
لتدخل جميلة وبعدها تدخل نؤة:
- *زوبة:* أستاذ عاصم تعالي.
ليخرج عاصم ومعه والدته وخالد ليرى جميلة في أبهى صورها:
- *حنان بذهول:* إيه القمرات دول، أنهي واحدة فيهم.
- *عاصم يشاور على جميلة ظناً منه أنها لا تراه:* هي ديه يا أمي.
- *حنان:* ملكة جمال يا حبيبي.
- *حنان:* إزيك يا جميلة.
- *جميلة:* أهلاً بحضرتك.
- *حنان:* أنا أبقى والدة عاصم، وجابني هنا عشان أتعرف عليكي.
- *عاصم:* إيه بس اللي بتقوليه ده يا أمي.
- *خالد:* أمك أعترفت عليك من قبل أول قلم.
الفصل الثاني عشر من هنا