*وحيد:* وأنتوا كمان وراها برا، أكيد أنتوا مش ولادي.
ثم يغلق الباب خلفهم.
*فهيمة وهي تبكي بحرقة على حالها:* أنا عملت إيه بس يا ربي يخليه يعمل فيا كده.
ثم أخذت تطرق على الباب:
- *فهيمة:* أفتح يا وحيد، أبوس رجلك أفتح.
- *وحيد من خلف الباب:* أمشي من هنا أحسنلك، أنتي طالق.
- *فهيمة:* طب ألبس حاجة تسترني.
- *وحيد:* لا أمشي زي ما أنتي كده يا ساقطة، عشان الناس كلها تعرف إنك مفضوحة.
- *فهيمة:* حسبي الله ونعم الوكيل، ربنا ينتقم منكم ويوريني فيكم يوم، أنت المنتقم الجبار يا رب، اللي يفضح وليه غدرت الزمان عليه قوية.
ثم تأخذ أطفالها وتنزل إلى أسفل:
- *فهيمة:* هروح فين بس يا ربي دلوقتي، لو روحت لأهلي ممكن أمي تطب ساكتة وتموت فيها.
وأثناء وجودها في الحارة مع أطفالها يراهم العم ياقوت بائع العصير:
- *العم ياقوت:* خير يا بنتي إيه اللي موقفكم كده.
- *فهيمة ببكاء:* أسترني الله يسترك.
- *ياقوت:* ليخلع ياقوت البالطو، خدي يا بنتي أستري نفسك وتعالي معايا.
- *ياقوت:* على بيتي يا بنتي، تقعدي مع مراتي عشان العيال الغلابة دول ملهمش ذنب، دول شكلهم مصروعين.
- *فهيمة:* أنا مش عايزة أقعد في الحارة ديه.
- *ياقوت:* لا مش في الحارة، هاخدك عند مراتي لبيت أهلها، أصلهم سافروا واحنا اليومين دول قاعدين هناك، مش بعيد، بعدينا بكام شارع.
- *فهيمة:* ربنا يستر عرضك وعرض ولاياك يا رب.
- *ياقوت:* اللهم آمين.
ثم يذهب بها ياقوت إلى منزل أهل زوجته:
- *مديحة:* يا مديحة.
- *زوجته:* إيه يا ياقوت أنت جيت، الله ومين ديه وإيه العيال دول.
- *ياقوت:* هقولك بس أعملي كوباية لمون للبنية تهدي أعصابها.
- *مديحة:* حاضر.
وبعد أن أعدت مديحة الليمون:
- *مديحة:* خدي يا أختي أشربي بألف هنا وشفا، وأحكيلي أنتي إيه حكايتك.
لتقص عليهم فهيمة كل ما حدث:
- *ياقوت:* أخص عليك يا وحيد، بقى المحترمة بنت الأصول اللي بتمشي وشها في الأرض ومبتكلمش حد وفي حالها تعمل فيها كده.
- *مديحة:* أقطع دراعي إن مكانت أمه عاملة ملعوب.
- *ياقوت:* تصدقي كلامك صح.
- *مديحة:* أنتي تقعدي هنا معززة مكرمة أنتي وولادك، وأنا أشيلكم فوق راسي، وأهلي كده كده هيطولوا والبيت واسع، ده أنتوا هتملوا عليا الدنيا، والمدرسة بقى تاخدي منها أجازة أنتي والولاد، وأنا بكرة هنزل أشتريلكم لبس وحاجات حلوة.
- *فهيمة:* أيوه بس أنا مش معايا فلوس حالياً.
- *ياقوت:* عيب عليكي، أعتبرينا أبوكي وأمك، واحنا مخلفناش وأهو ربنا رزقنا على كبر.
- *فهيمة:* صدق رسول الله صلى الله عليه وسلم "الخير في أمتي"، الجميع عليه أفضل الصلاة والسلام.
- *مديحة:* يلا يا ولاد تعالوا كلوا لقمة عشان تناموا، وكمان في عندنا هنا لعب كتير أوي بتاعة البت بنت أختي.
- *الأطفال:* هو احنا مش هنرجع بيتنا تاني.
- *مديحة:* هترجعوا إن شاء الله، بس يا ريت متضايقوش ماما.
- *الأطفال:* لا احنا بنحبها أوي.
*أما وحيد فها هو يجلس مع والدته عفاف بخبث:*
- *عفاف:* متفهمني عملت إيه البت ديه.
- *وحيد:* أرجوكي يا أمي متجيبيش سيرتها تاني.
- *عفاف:* طب أنت هتعمل إيه دلوقت.
- *وحيد:* الحمد لله إني نزلت يومين بس عشان كنتوا واحشيني، أنا مسافر تاني راجع مطرح ما جيت.
- *عفاف بفرحة:* هو أنت لحقت تقعد.
- *وحيد:* أنا هخش أخد شنطتي وأمشي، كويس إني لسه مفضيتهاش.
- *عفاف:* الصباح رباح طيب.
- *وحيد:* معلش يا أمي أنا لازم أمشي.
- *عفاف:* طيب اللي يريحك، بس هتلاقي طيارة دلوقت.
- *وحيد:* أنا معايا تذكرة عودة، يعني هرجع في أي طيارة أو أستنى في المطار لغاية ما ألاقي مكان في أي طيارة.
- *عفاف:* أعمل اللي يريحك، أنا المهم عندي راحتك، بس يعني لو حد من أهل مراتك جيه أقوله إيه، مش لازم أعرف هي عملت إيه عشان أعرف أرد عليهم.
- *وحيد:* هقولك عشان لو حد منهم جاه تديله بالجزمة.
ليقص عليها وحيد كل ما حدث، لتضرب عفاف على صدرها:
- *عفاف:* يا لهوي، أتاريها البت بتتأخر وساعات كانت بتسيب العيال معايا وتخرج، وكانت مش مظبوطة كده، يطلع منك يا سهتانة، حتى الفلوس اللي كنت بتبعتها مكانتش بتكفيها وكانت دائماً تاخد مني فلوس، ده غير مرتبها، إيه يا سهتانة يا بهتانة، طب بس يبقى حد يفكر يقرب وأنا أفضحهم كلهم في الحتة هنا.
- *وحيد:* بلاش يا أما.
- *عفاف:* بلاش ليه يا عين أمك.
- *وحيد:* عشان كده أنتي بتفضحيني أنا.
- *عفاف:* وأنت مالك، هو أنت اللي خاين، ده هي مقصوفة الرقبة.
- *وحيد:* مش كانت مراتي، الناس هتقول عليا إيه، مش راجل ومراتي بتبص برا.
- *عفاف:* آه عندك حق، ياكش يجيلها نصيبة تاخدها.
- *وحيد:* خدي يا أما الدهب ده، أنا المغفل كنت جايبه عشانها، وخلي المبلغ ده كمان معاكي، ولما أوصل هحاول أبعتلك تيجي تعيشي معايا عشان مش هرجع هنا تاني خلاص، ملناش حد هنا.
- *عفاف:* سافر أنت بس الأول وبعدين نشوف هنعمل إيه.
- *وحيد:* أشوف وشك بخير.
ويتركها وحيد ويذهب، لتتصل على زيزو:
- *عفاف:* كله تمام والولا سافر كمان، ده أنت طلعت ابن أبالسة.
- *زيزو:* خلاص أنا جاي أبيت معاكي، مراتي حلالي.
- *عفاف:* تنور قلبي وبيتي كمان.
- *زيزو:* بيتك طيب.
- *عفاف:* مالك يا واد.
- *زيزو:* لما أجيلك هقولك مالي.
ونتركهم ونذهب عند جميلة حيث كانت تجلس مع نؤة:
- *جميلة:* عرفتي هتعملي إيه.
- *نؤة:* آه طبعاً عرفت، ده أنا هجيبلك بوظة على الأرض.
- *جميلة:* أوعي تغلطي.
- *نؤة:* متخافيش ده أنا هبهرك، عن إذنك بقى أنزل أشغل الشغل.
- *جميلة:* ربنا معاكي.
- *نؤة:* ربنا يسترها من عبده، أصله بيغير عليا أوي.
- *جميلة:* عرفنا يا أختي إنه بيغير عليكي، أخلصي بقى.
لتتركها نؤة وتنزل لتذهب إلى مطعم رضا:
- *نؤة:* إزيك يا روض الفرج.
- *رضا:* جرى إيه يا بت، أنتي إيه روض الفرج ديه.
- *نؤة:* بت إيه، متحسن ملافظك، الحق عليا إني بدلعك، قصدي يعني يا جنة الفرج اللي هيجيلك على إيدي.
- *رضا:* شكراً يا حلوة مش عايزين، فوتي علينا بكرة.
- *نؤة:* حتى لو كان قلب جميلة.
- *رضا:* بتقولي إيه، أقعدي أرتاحي، ولا يا فولة خد الورقة ديه وروح أشتري الطلبات اللي فيها ووديها على البيت، وشوف المدام لو محتاجة أيتوها حاجة هاتهلها.
- *فولة:* من عيوني.
ليتركهم فولة ويذهب:
- *رضا:* كنتي بتقولي إيه بقى يا ست البنات.
- *نؤة:* بقولك إيه متفرهدنيش، رضا ميبقاش خلقك ضيق أوي كده.
- *نؤة:* أنا مستعدة أجيبلك جميلة لغاية عندك بس بشرط.
- *رضا:* على راسي.
- *نؤة:* هما الصراحة شوية شروط، أول حاجة تتصاحب على الولية زوبة العالمة، وأنا هجيبلك جميلة هناك عندها، وكمان تشغل عبده معاك عشان أمي طالبة منه مهر كبير وهو يا حرام هيجيب منين.
- *رضا:* ماشي، إيه تاني.
- *نؤة:* وكمان هميلك دماغ جميلة، أستاهل إيه بقى.
- *رضا:* صنية عليها فول وطعمية، طلب فول كامل من مجاميعه يعني.
- *نؤة:* طلب فول في عينك، حد قالك إنه واحشني، ده أنا طافحاه، وبتتمطع أوي كأنك بتقولي هدبحلك خروف، وبعدين الفول بتاعك مسوس والطعمية كلها عيش مبلول والبتنجان ممرر ومبذر وحالته عيضة، أسكت بقى متخليش أتكلم.
- *رضا:* كل ده ومتكلمتيش.
- *نؤة:* خلاص متقوليش تاني، أجيبلك أكل من عندي، وبعدين معقولة كل العز اللي أنت فيه ده من الفول المسوس والطعمية اللي بالعيش.
- *رضا:* وأنتي مالك، ده أنتي حشرية أوي.
- *نؤة:* أنا غلطانة، كنت هجيبلك زباين كتير للصنف بس تراضيني.
- *رضا:* صنف إيه.
- *نؤة:* خليك حلو عشان أحبك وأنفعك.
- *رضا:* وأنتي عرفتي منين.
- *نؤة:* أنا أعرف دبة النملة في الحارة ديه، طب ما أنا عارفة إن شلبي بيتاجر في السلاح، ما شاء الله والله ما قصرتوا، الحارة فيها كل أنواع الشمال، خدونا على جناحكم يا عم.
- *رضا:* طب بس أسكتي، وعلى كده عبده عارف.
- *نؤة:* طبعاً، وكمان مستني إشارة منك، زهقنا من الفقر، عايزين نقب على وش الفتة.
- *رضا:* هتقبوا يا أختي بس تقبي بالراحة.
- *نؤة:* أنت ناسي إن أخويا مسافر بلاد برا، يعني أصرف براحتي.
- *رضا:* أخوكي شكله مش لاقي ياكل هناك، ولا مكانش ده بقى حالكم.
- *نؤة:* البركة فيك بقى.
- *رضا:* ماشي بس أقعد مع جميلة الأول.
- *نؤة:* الأول هتروح عند زوبة العالمة كأنك بتتعرف عليهم وترتب معاها إنك هتقابل حبيبتك عندنا، وبعدين تتصل عليا وأنا هجيبها وأجي بعد ما أقولها كلمتين حلوين في حقك.
الفصل العاشر من هنا