*كريمة:* والله وكبرت يا عاصم وبقيت شاب يشرح القلب.
ونتركهم ونذهب إلى منزل عفاف، حيث دخل زيزو على عفاف وهي جالسة، ولكنها كانت على طبيعتها بدون طقم الأسنان وبدون مكياج، حتى بدون باروكة، وما أن شاهدها زيزو حتى قال:
- *زيزو:* سلام قولاً من رب رحيم.
- *عفاف:* إيه شوفت عفريت، وبعدين أنت إيه اللي جابك يا خاين.
- *زيزو:* وأنا برده أقدر أستغنى عنك يا فوفتي.
- *عفاف:* بجد، ده أنا صدقت، ما أنا أصلي عبيطة.
- *زيزو:* كده برده مش تسأليني الأول أنا عملت كده ليه بدل الظلم ده.
- *عفاف:* أطلع برا يا واد أنت.
- *زيزو يمثل الحزن:* كده برده أهون عليكي، أنا مقدرش أعيش من غيرك يا روح قلبي.
- *عفاف:* يا سلام، أمال البت المصدية ديه أم عرقوب خطبتها ليه، أنت جاي تضحك على مين.
- *زيزو في نفسه:* يا وليه ده أنتي موتي قبل مرتين، الله يحرقك.
- *عفاف:* عايز تقول إيه أنت يا واد، بكلمك.
- *زيزو:* لا مؤاخذة، هقولك يا قلب الزوز، خطبتها ليه.
- *عفاف:* قول، أكدب عليا أصل أنا خمة.
- *زيزو:* عيب عليكي، أصبري بقى خليني أتكلم.
- *عفاف:* طب متخلص.
- *زيزو:* هقولك بس خليه سر ما بينا.
- *عفاف بتأفف:* أخلص بقى.
- *زيزو:* أصل المعلم رضا واقع في غرام البت جميلة بتاعة البليلة، وكان عايز يخطبها، فقالي أدخلها من ناحية صاحبتها، وبعدين يا فالحة بعقلك أنت، لو أنا خطبتها بجد كنت أعمل خطوبتي في بيت العوالم، أقله كنت روحت خطبتها من أمها، مسألتيش نفسك أمها مش موجودة ليه.
- *عفاف:* يا سلام، أمال طردتني ليه.
- *زيزو:* عشان أسبك الحكاية عليها، وبعدين أنتي عارفة إن المعلم رضا ولي نعمتي ومقدرش أكسرله كلمة، ده ممكن يطردني وأجوع، وبعدين خدي يا ستي ده تنازل مني عن البيت عشان تعرفي إني حبيتك لشخصك.
- *عفاف:* معلش حقك عليا، ظلمتك، مش كنت قولتلي من الأول، ورضا إيه اللي يتحكم فيك ده، سيبك منه وأنا أديك اللي أنت عايزه، والبت المصدية ملكش دعوة بيها تاني.
- *زيزو:* عيب عليكي، ده أنتي اللي في القلب.
- *عفاف:* أنت عارف أنا أكبر من البت نؤة ديه بسبع شهور وكام يوم.
- *زيزو:* مش باين، اللي يشوفكم مع بعض يقول هي أكبر منك بكتير.
- *عفاف:* كلت يا ولا.
- *زيزو:* وحياتك من ساعتها مافي حاجة نزلت جوفي.
- *عفاف:* وأنا كمان مكلتش غير جوز فراخ وحلة محشي.
- *زيزو:* يا حبيبتي، طب أنا هنزل أجيب فول وطعمية عشان ناكل لقمة.
- *عفاف:* فول إيه ده بس، هات تليفوني من جنبك.
- *زيزو:* ليه.
- *عفاف:* هعمل طلب كباب وكفتة وحمام.
- *زيزو:* أطلبي لنفسك، أنا زعلان منك ومش هاكل معاكي.
- *عفاف:* ليه طيب.
- *زيزو:* عشان فضحتي سرنا وقولتي كل حاجة، أفرضي بقى حد عرف ابنك.
- *عفاف:* لا متخافش، ابني خلاص أتأكد إن مراته خاينة، ومهما يقولوله مش هيصدق حد.
- *زيزو:* طيب أنا ماشي، هتعوزي مني حاجة.
- *عفاف:* هتمشي ليه، أخس عليك.
- *زيزو:* أنا كنت جاي بس عشان أفهمك الحكاية وأديلك التنازل، وأنا ربنا يعيني على كسرة قلبي ويقدرني أنساكي، سلام يا فوفتي.
ثم تنزل دموعه التمثيلية:
- *عفاف:* يا قلبي بتبكي عشاني، حقك عليا أنا آسفة، ثم تقبل يديه، سامحني بقى وغلاوتي عندك.
- *زيزو:* حلفتيني بالغالية.
- *عفاف:* خلاص صافي يا لبن.
- *زيزو:* حليب يا أحلى قشطة.
- *عفاف:* خليك هنا شوية وجاية.
لتتركه وتدخل غرفتها لتضع طقم الأسنان والباروكة وتضع المكياج وتستبدل ملابسها، ثم تفتح الصندوق الذي تضع فيه أموالها، لكن لا أحد يعرف مكانه غيرها، فهو صندوقاً قديماً تخفيه خلف صورة قديمة أيضاً في الحائط، ثم تخرج منه رزمة مالية تقدر بحوالي خمسون ألف جنيه، ثم تخرج له لينظر لها زيزو بقرف ويقول في نفسه: إيش تعمل الماشطة في الوش العكر.
- *عفاف:* خد يا زوز الخمسين ألف دول شبرق نفسك بيهم.
- *زيزو:* لا مش عايز، أنا من النهارده اللي هشتغل وأصرف ونعيش على أد فلوسي، وأهو يوم عدس يوم بصارة يوم مسقعة، واللحمة كفاية مرة واحدة في الشهر، هي ديه ظروفي يا بنت الناس، مش كل شوية تعايريني بفلوسي وبيتي، نعيش على أدنا أحسن.
- *عفاف:* أنت بتقول إيه، عدس إيه وبصارة إيه، أنت عايز تهفت مني وتقع، أنت راجل ومحتاج غذا، وبعدين أنا وأنت واحد ومافيش فرق بينا.
- *زيزو:* لا احنا نعيش على أدي، وممكن كمان أشتغل شغلانة تانية عشان أكفيكي.
- *عفاف:* أنت مش هتشتغل خالص، واللي تعوزه وزيادة هديهولك، خد الفلوس بقى متوجعش قلبي.
- *زيزو:* لا مش عايز.
- *عفاف:* تعدمني لو مخدتهمش.
- *زيزو في نفسه:* يا رب يسمع منك وأخلص من شبكة أمك السودة ديه، بس بعد ما أخد كل اللي أنا عايزه.
- *زيزو:* بقولك إيه هنزل، إيه على ما تطلبي الغدا.
- *عفاف:* رايح فين.
- *زيزو:* هروح للمصدية ديه وأقولها إني مش عايزها، أنا مراتي عندي بالدنيا، وكده كده المعلم خطب جميلة.
- *عفاف:* آه صح، غورها في داهية.
- *زيزو:* آه لو تعرفي بحبك أد إيه يا فوفتي.
- *عفاف:* بس بقى يا واد بتكسف.
ثم يتركها زيزو وينزل ليتصل على نؤة:
- *زيزو:* حب الحب، قلب القلب، بقولك إيه قابليني على ناصية الحارة بسرعة.
- *نؤة:* حاضر يا عمري.
وبعد عدة دقائق تقابل نؤة زيزو:
- *نؤة:* ها عملت إيه مع أم جلامبو.
- ليضحك زيزو: كلفتها والبركة فيكي، خدي بقى خلي دول معاكي، وأي حاجة هسلكها منها هعينها معاكي لغاية ما أشطب عليها وأديها بالرجل، ده أنتي دماغك ديه ألماظ.
- *نؤة:* أديتها التنازل المضروب.
- *زيزو:* آه أمال، أسكتي يا شيخة، ده روحت لقيتها شبه شيتا والعياذ بالله، الولية عندها ييجي سبعين سنة وبتقولي قال إيه إنها أكبر منك بكام شهر، ودخلت يا أختي ركبت الباروكة والسنان وحطت أحمر وأخضر، فاكرة نفسها لسه بنت أمبارح.
- لتضحك نؤة: عسل يا زوزي.
- *زيزو:* بتقولي زوزك.
- *نؤة:* أمال أنت الزوز بتاعي أنا بس، ويزو يا مقرب البعيد، بقولك إيه أنا فهمتها إني نازل أقطع معاكي قطعة تقطعها.
- *نؤة:* حلو كده.
*أما جميلة فها هو رضا يتصل عليها:*
- *رضا:* أجهزي وأنزلي عشان هنقابل الباشا الكبير.
- *جميلة:* من عيوني يا عيوني.
وبعد أن أغلقت الهاتف مع رضا:
- *عاصم:* مين ده.
- *جميلة:* ده رضا بيقول هنقابل الراجل الكبير.
- *عاصم:* أنا بقول بلاش وأخرجي أنتي من اللعبة ديه، أنا خايف عليكي.
- *فرج:* متخافش عليها، جميلة بنتي بميت راجل.
- *حنان:* طب بقولك إيه يا أبو جميلة، احنا عايزين نجدد كلامنا.
- *جميلة:* كلام إيه.
- لتضحك كريمة: أصلكم كنتوا مخطوبين وأنتوا صغيرين.
- *عاصم:* يعني أنتي خطيبتي من زمان أوي.
- *جميلة:* طب مش لما نخلص من اللي احنا فيه ده الأول.
- *حنان:* ماشي كلامك، بس أوعي تكوني بتاخدينا على أد عقلنا.
- *عاصم:* قال يا جميلة.
- *جميلة:* أبداً والله، بس عاصم يخلص من الناس اللي مهددين حياته دول، أنا مقدرش أتخيل حياتي من غيره.
---
---
*عاصم بهيام:* طب أمشي من وشي بدل ما أرتكب فعل يعاقب عليه القانون.
*كريمة:* شوف العيال، ولا كأننا واقفين وسطهم.
*حنان:* متسيبهم بقى، ده أنا ما صدقت إنهم نطقوا.
*عاصم:* جميلة خلي بالك من نفسك عشاني يا قلبي.
*فرج:* جرى إيه يا عم عاصم، أنا ساكت من بدري، لاحظ إني قاعد وسطكم.
*عاصم:* مخلاص بقى، ما هي بقت خطيبتي.
*فرج:* خلاص عفونا عنكم.
*جميلة:* أروح أنا بقى، أدعولي.
*كريمة:* ربنا معاكي يا بنتي وينصرك على الأعداء.
*حنان:* أبقي طمنينا عليكي.
*جميلة:* أنا هقفل تليفوني، بس هبقى أتصرف وأطمنكم.
لتتركهم جميلة لترتدي عباءة زرقاء اللون ومطرزة، وكانت جميلة تشبه أميرات الحواديت:
- *عاصم:* لا مش هتخرجي كده، طاهر ده عينه زايغة أوي.
- *جميلة:* ما قالك أبو جميلة إني بميت راجل.
ثم تتركهم وتنزل لتقابل رضا، الذي حينما نظر إليها قال:
- *رضا:* يا لهوك يا رضا، بقى الجمال ده كله ليا، يا بت ده أنتي قمر وتهبلي.
- *جميلة:* طب يلا بقى أحسن نتأخر على الباشا الكبير.
- *رضا:* خلي بالك أحسن يلعب بعقلك ويحاول ياخدك مني، ساعتها أقتله، أينعم هو الباشا الكبير، بس برده أنا المعلم رضا.
- *جميلة:* أنت بس اللي في القلب يا معلم.
- ليضحك رضا حتى ظهرت أسنانه السوداء من كثرة الشرب: للدرجة بتحبيني.
- *جميلة في نفسها:* حبك حنش وأتلفح بيك.
- ثم تعود لتقول: وأكتر من كده بكتير، ده أنا قلبي في حبك بيغلي زي الفول في القدرة.
- *رضا:* وأنا في حبك بتقلي زي الطعمية والبتنجان في الطاسة، إيه الحب اللي يجيب حمو على الصدر ده، يلا بينا يا عم.
- *جميلة:* مينفعش بيه كبير كده نتأخر عليه.
الفصل الخامس عشر من هنا