*خالد:* أمك اعترفت عليك من قبل أول قلم.
*عاصم:* بس يا زفت مش وقتك، أنت هتاخد ماما وهتمشوا، وأنا هبقى أتصل عليكم عشان نشوف هنعمل إيه.
*خالد:* متخليني أحضر الخطوبة.
*عاصم:* أمشي يا خالد.
*حنان موجهة حديثها لجميلة:* ممكن رقمك يا حبيبتي.
*جميلة:* آه طبعاً.
ثم تملي عليها جميلة الرقم.
*حنان:* خلي بالك من عاصم، عن إذنكم.
*أما عفاف فكانت تقف مع عبده في ركن حتى لا يراهم أحد:*
- *عفاف:* فين زيزو ده اللي قولت إنه هيخطب، بقالنا واقفين ياما.
- *عبده:* يا ستي أصبري على رزقك شوية، أهو جاي هناك أهو، شوفي متشيك إزاي، وقال جايب ورد قال.
- *عفاف:* برده مش هصدق إلا لما أشوف بعيني.
ثم يقترب زيزو من منزل زوبة ويدخل المنزل، وبعد خمس دقائق يصل رضا هو الآخر:
- *عبده:* إيه صدقتي.
- *عفاف:* مش يمكن جاي يوجب مع رضا.
- *عبده:* بقولك إيه خليكي كده، على العموم أول ما نسمع الزغاريد هنطلع.
- *عفاف:* ماشي.
وفي شقة زوبة كان رضا يرتدي جلباباً لونه أزرق فاقع وشوز أزرق أيضاً، وها هو قد صبغ شعره وحلق شنبه:
- *رضا:* إيه رأيك يا عروستي.
- *جميلة:* آه حلو أوي.
- *زيزو:* إيه ده عروستي طالعة زي القمر.
- *رضا:* عروستي أحلى من عروستك.
- *زوبة:* ألف مبروك، زغرتوا يا بنات.
وعندها سمع عبده صوت الزغاريد، صعد ومعه عفاف لتدخل عفاف الشقة لتجد أن زيزو يجلس بجانب نؤة وهو يضحك، لتصرخ عفاف:
- *عفاف:* آه يا زبالة يا خاين.
- *وعبده يصور كل ما يحدث:*
- *عفاف:* ده أنا خربت بيت ابني عشانك، آه واطي، ده أنا مشيت وراك ودمرت كل حاجة، واتهمت البت الغلبانة في شرفها، وخليت ابني يسافر بعد ما بهدل مراته وطردها وفضحتها.
- *زيزو:* أنتي مجنونة يا وليه، أنا مالي بيكي.
- *عفاف:* ليه هو أنت مش جوزي عرفي، وكمان كتبتلك البيت باسمك يا ضلالي.
ثم تقص كل ما حدث وهي في حالة انهيار، ليسجل عبده كل ما حدث في تصوير فيديو، ثم يغلق الفيديو ويذهب إلى نؤة:
- *عبده:* آه يا خاينة يا زبالة، تبعيني أنا عشان ده، والله متستاهلي قلبي.
- *زيزو:* يلا يا عم خد الولية الخرفانة ديه من هنا، وبقولك إيه يا عفاف مترجعيش البيت خلاص، بقى شوفيلك حتة تتاوي فيها، جاتك داهية تاخدك، وليه بومة.
- *عفاف:* طب أنا هرجع بيتي، ووريني هتمشيني منه إزاي.
- *نؤة:* خلاص بقى بوظتوا الخطوبة وارتاحتوا.
- *زيزو:* ولا تزعلي نفسك يا قلب قلبي.
- *عبده:* يلا بينا يا أم وحيد.
- *عفاف:* يلا، طب يا زيزو هشوف أنا ولا أنت.
ثم يتركوهم ويذهبوا:
- *عبده:* هتروحي فين دلوقتي.
- *عفاف:* هروح بيتي، ولو راجل يخرجني منه، عشان ساعتها أقتله.
- *عبده:* الطيب أحسن، تعالي أقعدي مع أمي.
- *عفاف:* لا أنا هروح بيتي.
لتتركه عفاف وتذهب، ليتصل عبده على وحيد:
- *وحيد:* إيه يا عبده، أمي بخير.
- *عبده:* هبعتلك فيديو على الواتس، يا ريت تشوفه وتسمعه كويس.
- *وحيد:* حاضر بس في إيه فهمني.
- *عبده:* شوف الفيديو عشان تعرف إنك ظلمت الست المحترمة مراتك.
- *وحيد:* بتقول إيه.
- *عبده:* بطل رغي وشوف وأسمع، وبعدين كلمني.
- *وحيد:* حاضر حاضر، سلام.
ليغلق وحيد الهاتف مع عبده، ليشاهد الفيديو وهو في حالة ذهول:
- *وحيد:* معقولة يا أما كل ده يطلع منك وتخربي بيتي، حرام عليكي ليه كده، وكمان تكتبيله البيت وتتهمي مراتي.
ثم يغلق الفيديو ويتصل على عبده:
- *وحيد وهو في حالة انهيار وبكاء:* أنا نازل يا عبده.
- *عبده:* تنزل فين، الموضوع كبير أوي.
- *وحيد:* يعني عايز أصالح مراتي وأبوس رجليها، بس يا ترى راحت فين هي والولاد، أمي كانت قالتلي إن أهلها ميعرفوش عنها أي حاجة.
- *عبده:* مراتك وولادك بخير وفي الأمان، قاعدين مع مرات عم ياقوت في بيت أهل مراته، ومحدش يعرف.
- *وحيد:* هي وصلت لكده، ولادي يتطردوا من بيتهم ويقعدوا في بيوت الناس، وبعدين إزاي نؤة سابتك.
- *عبده:* هقولك كل حاجة، بس كلمني على الإيمو عشان رصيدك.
- *وحيد:* لا أتكلم براحتك، مستورة الحمد لله.
ليقص عليه عبده كل شيء:
- *وحيد:* يا ستار يا رب، كل ده مخدرات وقرف.
- *عبده:* خليك عندك، ونؤة هترجع البيت ليكم تاني، واحنا هنا مكانك يا أخويا، بس كلم مراتك صالحها.
- *وحيد:* بعد اللي عملته فيها مش هترد عليا.
- *عبده:* أتصل على عم ياقوت، هو في البيت دلوقتي.
- *وحيد:* حاضر، كتر خيرك، هكلمهم وأرجعلك.
- *عبده:* سلام.
ليغلق وحيد الهاتف مع عبده، ثم يتصل على العم ياقوت:
- *ياقوت:* الحمد لله إن الغمة انزاحت، خدي يا فهيمة كلمي جوزك.
- *فهيمة:* قصدك طليقي يا عمي.
*أما نؤة فها هي قد نزلت مع زيزو إلى الشارع في طريقهم إلى كافيه ليجلسوا ويتحدثوا، وما أن وصلوا:*
- *نؤة:* أنا كده خربتلك حياتك.
- *زيزو:* فداكي.
- *نؤة:* بقولك إيه، الولية ديه عندها سبائك دهب كتير، أمي كانت قايلة لي.
- *زيزو:* تغور هي ومال الدنيا كله، أهم حاجة أنتي عندي.
- *نؤة:* أسمعني بس، أنا عايزة مصلحتك، الأحسن إنك تروح تصالحها وتعتذرلها وتفهمها إنك غلطت، وإن رضا لعب في دماغك، وإنك خلاص سيبتني لغاية ما ناخد كل اللي حيلتها، وفرصة إنها قاعدة لوحدها، مع إني بغير عليك بس مصلحتك أهم عندي.
- *زيزو بهيام:* معقولة مصلحتي تهمك أوي كده.
- *نؤة:* أمال إيه، هو أنا ليا غيرك.
- *زيزو:* حبيبتي.
*أما جميلة فكانت تجلس هي الأخرى مع رضا في كافيه على النيل:*
- *جميلة:* إلا قولي بقى يا رضا.
- *رضا:* أقولك إيه.
- *جميلة:* مش معقولة العز اللي أنت فيه ده كله من المطعم.
- *رضا:* قصدك إيه.
- *جميلة:* مش احنا بقينا واحد دلوقتي.
- *رضا:* آه طبعاً.
- *جميلة:* يبقى تقولي بقى إيه حكايتك.
- *رضا:* هقولك كل حاجة، ما أنتي بقيتي الجماعة بتاعتي.
- *جميلة:* طبعاً يا حبيب قلبي.
- *رضا:* شوفي يا قلبي، محسوبك بيتاجر في الصنف.
- *جميلة:* صنف إيه.
- *رضا:* صنف السعادة اللي بيخلي الناس مبسوطة ومفرفشة.
- *جميلة:* برشام يعني.
- *رضا:* كل حاجة بعيد عن إيد الحكومة.
- *جميلة:* نهارك أسود، مخدرات، لا يا أخويا أنا مليش دعوة.
- *رضا:* يا بت ديه فلوسها كتير أوي، والباشا بتاعنا راجل كبارة ومحدش يقدر ييجي جنبه، حتى الحكومة بتعمله ألف حساب.
- *جميلة:* للدرجة ديه.
- *رضا:* وأكتر كمان.
- *جميلة:* يعني الحاجات ديه بتكسب.
- *رضا:* ملايين.
- *جميلة:* طب ما تشغلني معاك، وكمان عايزة أتعرف على الباشا ده.
- *رضا:* ليه بقى.
- *جميلة:* عشان أطمن على جوزي حبيبي.
- *رضا:* ماشي يا قمر، هبقى أكلمه وأخد منه ميعاد، وأنتي كمان عايزك تبطلي تقفي في الشارع تبيعي حاجات.
- *جميلة:* بالعكس، ده كده فرصتي في بيع الصنف هتكون أكبر.
- *رضا:* بس أنا بغير عليكي.
- *جميلة:* متخافش يا حبيبي، خطيبتك بميت راجل.
- *رضا:* حبيبك.
- *جميلة:* كل ده ومش حاسس، أمال كنت ببيع فول وأضايقك ليه، مش عشان تحس بيا.
- *رضا:* أمال ليه كنتي بترفضيني لما أتقدمتلك كذا مرة.
- *جميلة:* كنت بشوف غلاوتي عندك، وهتفضل مصمم عليا ولا لا.
- *رضا:* يعني بردك كنتي دايبة الهوا.
- *جميلة:* أمال إيه، ده أنا كنت لما بشوف مراتك معاك كنت ببقى هتجنن.
- *رضا:* يا حلويات.
- *جميلة:* المهم أنت هتعمل إيه مع مراتك.
- *رضا:* هخليها على ذمتي، أصلها شغالة معايا في الصنف والذي منه.
- *جميلة:* آه عشان كده.
- *رضا:* ولما نتجوز هخليها تحت رجلك تخدمك، تشوف طلباتك.
- *جميلة:* المهم هتقعدني مع الراجل الكبير أمته.
- *رضا:* حظك حلو، عندي معاد معاه بكرة، تعالي معايا.
- *جميلة:* من عنيا، بس لازم تفهمه إني كنت بوزع الصنف معاك عشان ميقلقش مني.
- *رضا:* دماغك حلوة أوي يا حلويات.
الفصل الثالث عشر من هنا