*رضا:* دماغك حلوة أوي يا حلويات.
*جميلة:* مش أحلى ولا أعلى من دماغك يا رورو.
- ليضحك رضا ضحكة عالية: وكمان بتدلعيني، شكلها هتلعب معاك يا رورو.
*جميلة:* يلا نروح بقى عشان أتأخرت.
*رضا:* كلام جماعتنا أوامر.
*أما سرسأ فكان يجلس بجانب والدته وهي تبكي من شدة الألم:*
- *سرسأ:* إيه يا أما المسكن معملش حاجة.
- *والدته السيدة وفاء:* لسه يا ابني بطني بتتقطع.
- *سرسأ:* طب أنا هسيبك وأروح أتصرف في فلوس عشان أوديكي للدكتور.
- *وفاء:* منين بس يا ابني.
- *سرسأ:* ربك عظيم يا أما.
وهنا يتصل عليه عاصم:
- *عاصم:* إيه يا سرسأ، فينك مش باين ليه.
- *سرسأ:* والله يا باشا الوالدة تعبانة شوية، الحمد لله على كل حال.
- *عاصم:* ألف سلامة، عندها إيه.
- *سرسأ:* مش عارف، جيبتلها مسكن معملش حاجة، ومستني بس تليفون أبلة جميلة يتفتح عشان أتصرف منها وأودي الحاجة للدكتور.
- *عاصم:* بقولك إيه، جهز والدتك وأجهز، في عربية هتيجي تاخدكم وتوديكم المستشفى.
- *سرسأ:* كتر خيرك، أنا هوديها مستوصف الجامع.
- *عاصم:* أسمع الكلام وبطل سرسأ.
- *سرسأ:* أيوه بس.
- *عاصم:* الكلام أنتهى لغاية هنا، يلا أجهزوا.
- *سرسأ:* حاضر.
ليغلق عاصم الهاتف مع سرسأ، ثم يتصل على خالد:
- *عاصم:* عايزك تبعت عربية الحارة فوراً.
- *خالد:* في حاجة، طمني.
- *عاصم:* متقلقش أنا بخير، ده موضوع إنساني.
- *خالد:* حاضر.
- *عاصم:* وأنت هتبقى منتظرهم في مستشفى الدكتور باهر، عشان يعملوا اللازم للست.
- *خالد:* حاضر.
ليغلق عاصم الهاتف مع خالد، ثم يتصل على سرسأ:
- *عاصم:* عايزك تقف أنت والوالدة على أول الحارة.
- *سرسأ:* حاضر يا باشا.
وبعد ساعتين كان الطبيب قد أتم الكشف على السيدة وفاء، وها هو يخرج ليبلغهم:
- *الطبيب:* حالة مرارة واضحة جداً، ولازم تتشال بسرعة قبل ما تنفجر.
- *خالد:* أعمل اللازم.
- *سرسأ:* طب نروح مستشفى حكومي.
- *خالد:* شوف شغلك يا دكتور.
- *باهر:* تمام عن إذنكم.
- *خالد:* أنا نازل وجاي تاني.
لينزل خالد إلى الحسابات ليدفع مبلغ تحت حساب العملية.
*أما فهيمة فها هي قد انتهت من حديثها مع زوجها:*
- *مديحة:* خلاص يا بنتي المسامح كريم.
- *فهيمة:* لا يا خالتي، ده أتهمني في شرفي، يعني ده راجل ميتأمنش.
- *ياقوت:* أيوه يا بنتي بس هو برده معذور، أتعملت عليه حيلة ميعملهاش الشيطان.
- *فهيمة:* المفروض يكون واثق في مراته يا عم ياقوت، أنت بنفسك شوفت شكلي عامل إزاي، ده شكك في نسب ولاده.
- *مديحة:* عندك حق يا بنتي، بس هنقول إيه، ربنا يهدي.
- *فهيمة:* بعد إذنكم أنا لازم أروح بيت أهلي، عشان لازم أنا وولادي نرجع مدرستنا.
- *مديحة:* ولو أنكم هتوحشوني أوي وهتفضوا البيت عليا، بس مصلحتكم أهم من أي حاجة.
- *فهيمة:* ليكي عليا إن شاء الله نيجي نقضي معاكي كل يوم جمعة.
- *مديحة:* بجد.
- *فهيمة:* آه والله بجد.
- *ياقوت:* إن كان كده ماشي.
- *مديحة:* خلاص يا حبيبتي أتكلي على الله.
*أما جميلة فها هي تصل إلى منزلها لتقص على والديها كل ما حدث:*
- *كريمة:* يخرب بيتك يا عفاف، إيه الولية ديه مبتتهدش، كل شوية والتانية جوازة.
- *فرج:* ده مرض والعياذ بالله.
- *جميلة:* تفتكروا هتعمل إيه مع زيزو.
- *كريمة:* مش قولتي إن نؤة هتخليه يرجعلها تاني عشان القضية تتسبك.
- *جميلة:* آه.
- *كريمة:* هترجعه، عفاف مهتصدق.
- *جميلة:* يا ريت، خلينا نخلص من الفيلم البوليسي ده.
- *كريمة:* أهم حاجة عندي تخلي بالك من نفسك.
- *جميلة:* ربك هو الحارس، أنا هنزل بقى أشوف شغلي عشان محدش يلاحظ حاجة، هو سرسأ مظهرش النهارده.
- *كريمة:* خالص.
- *جميلة:* يووه نسيت أفتح تليفوني.
لتفتح جميلة هاتفها، لتجد أن سرسأ قد اتصل عليها عدة مرات، لتتصل عليه:
- *جميلة:* إيه يا سرسأ أنت رنن عليا كتير أوي كده ليه، في حاجة.
- ليقص عليها سرسأ كل ما حدث:
- *جميلة:* ألف سلامة عليها، معقولة عاصم عمل كده.
- *سرسأ:* آه والله، ده حتى جاي دلوقت.
- *جميلة:* طب أقفل، أنا جاية لك.
- *كريمة:* في إيه يا جميلة، مالها وفاء.
- *جميلة:* بتعمل عملية المرارة.
ثم تقص عليهم ما حدث من عاصم:
- *فرج:* يا ربي الدنيا لسه بخير، ربنا يكرمه ويجازيه خير.
- *جميلة:* ووالدته كمان ست طيبة أوي.
- *كريمة:* وأنتي تعرفي أمه منين.
- *جميلة:* لما أرجع من المستشفى هبقى أحكيلكم، أخش أغير المهرجان ده وأنزل.
*أما نؤة فكانت قد ذهبت إلى منزلها لتجد والدتها في انتظارها:*
- *نبوية:* كنتي فين يا حلوة، وإيه اللي عاملاه في نفسك ده.
- *نؤة:* هقولك كل حاجة، ما أنا عارفاكي لازم تقعدي على الخبر.
لتقص نؤة على والدتها كل ما حدث:
- *نبوية:* مليش دعوة، أنا عايزة أخدم الوطن زيكوا.
- *نؤة:* عايزة تخدمي الوطن، تطبخيلنا محشي وبط ونعزم عليه عبده والجماعة كلهم.
- *نبوية:* صدقي الولا عبده يستاهل يتجوزك.
- *نؤة:* أخيراً وافقتي.
- *نبوية:* آه أصله طلع جدع.
- *نؤة:* طب إيه رأيك تتصلي عليه وتقوليله كده بنفسك.
- *نبوية:* أقل منها، ده طلع واد وطني.
*أما في المستشفى فها هي جميلة تلتقي مع عاصم لينظر لها عاصم بشوقاً وحباً:*
- *جميلة:* هو بيبصلي كده ليه، يكونش معجب بيا، بس إزاي، إيش جاب لجاب، بس نظرته ليا غريبة أوي.
ليقترب منها عاصم بلهفة وخوف المحب:
- *عاصم:* عملتي إيه مع الزفت اللي أسمه رضا ده.
- *جميلة:* تمام، وكمان هيقعدني مع الراجل الكبير.
- *عاصم بخوف:* بلاش يا جميلة، أنا مش مستعد أخسرك، وأنا ما صدقت لقيتك.
- *جميلة:* بتقول إيه.
ليدخل خالد بينهم:
- *خالد:* آنسة جميلة، عاصم بيحبك، وعشان هو لخمة مش هيعرف يقولك، فقولت أقصر عليه الطريق وأقولك أنا، عايزين حاجة مني، سلام أنا بقى.
- *عاصم:* الله يخرب بيت أهلك.
- *جميلة:* إيه الكلام اللي صاحبك قاله ده.
- *عاصم:* هو حيوان بس قال على كل اللي أنا حاسس بيه.
- *جميلة:* أيوه بس أنا يعني مش أد المقام.
- *عاصم:* مقام إيه يا عبيطة، ده أنتي اللي كتيرة عليا.
- *جميلة:* أنت عارف إني أنا كمان أحساسي نفس أحساسك، وبفرح أوي لما بشوفك.
- *جميلة:* هقولك تاني أنا مش أد المقام.
- *عاصم:* ده أنتي المقام كله، المهم إننا بنبادل بعض نفس الشعور.
- *جميلة بكسوف:* هي خالتي وفاء عاملة إيه، وكمان كتر خيرك على اللي عملته مع سرسأ.
- *عاصم:* متقوليش كده، أنا حاسس إني وسط أهلي الحقيقيين، ما هو أصل الناس الطيبين اللي زيكم الواحد يتشرف بيهم.
- *جميلة:* تشكر يا ذوق.
- ليضحك عاصم: بقولك إيه أنا نفسي في البليلة أوي.
- *جميلة:* خلاص تعالي الصبح لما أفرش، أبقى خدلك طبقين.
- *عاصم:* لا مش هقدر أصبر للصبح.
- *جميلة:* خلاص أطمن على خالتي وفاء ونروح البيت عندنا وأعرفك على أهلي، وبالمرة تدوق البليلة.
- *عاصم:* ده أنتي بتدبسيني فيكي بقى.
- *جميلة:* أدبسك ليه يعني، شايفني رمية.
- *عاصم:* بهزر معاكي، طب إيه رأيك إني هجيب أمي كمان.
- *جميلة:* أيوه بس.
- *عاصم:* مبسش.
وبعد أن اطمأنت جميلة على السيدة وفاء:
- *جميلة:* خلي بالك من أمك يا سرسأ، وخد دول خليهم معاك.
- *سرسأ:* معايا يا أبلة والله، الأستاذ عاصم قام بكل حاجة وأداني فلوس كمان.
- *جميلة:* خد بس.
ثم تذهب جميلة لعاصم:
- *جميلة:* أنا هوصل البيت قبلك، وبعد شوية أبقى تعالي ورايا عشان محدش ياخد باله.
- *عاصم:* حاضر.
وها هي جميلة قد وصلت إلى منزلها لتبلغ والديها بأن عاصم سيحضر إليهم ليتعرف عليهم:
- *فرج:* يشرف وينور، أعملي حاجة حلوة يا أم جميلة.
- *كريمة:* عيوني حاضر.
- *جميلة:* هو عايز بليلة.
- *كريمة:* يا سلام من عنينا.
وبعد مرور ساعة، ها هي حنان تصل إلى الحارة وتصعد مع عاصم إلى منزل جميلة، ليطرق عاصم الباب لتفتح لهم جميلة الباب:
- *جميلة:* أهلاً بيكم نورتونا.
- *حنان:* منور بيكي يا حبيبتي.
وها هي كريمة قد أتت لترحب بهم، وما أن رأتها حنان:
- *حنان بذهول:* كريمة، كنتي فين كل السنين ديه، وحشتيني، أوعي تقولي إن جميلة ديه هي جميلة بنتك.
- *كريمة:* حنان، آه يا واطية، أنت يا أختي اللي بعد ما سافرتوا أخباركم انقطعت، ولا كأننا كنا جيران وأهل، وآه هي جميلة.
- لتحتضن حنان كريمة: أختي وحبيبتي وعشرة عمري.
- *حنان:* أمال فرج فين.
- *كريمة:* خشي تعالي، فرج جوه، ده هيفرح أوي لما يشوفك، أستني هو ده عاصم ابنك.
- *حنان:* آه.
- *كريمة:* إزيك يا عاصم، على فكرة أنا ربيتك لغاية ما كملت عشر سنين، وكنت دايماً بتلعب مع جميلة وتقول ديه عروستي.
- *عاصم:* وأنا أقول من وقت ما شوفتها وأنا وقعت في غرامها.
- *جميلة:* فهموني بقى أنتوا تعرفوا بعض إزاي.
- *حنان:* أبداً كنا جيران وأصحاب، وطول النهار يا كريمة عندي يا أنا عندها، وبعد ما خلفت عاصم، أمك خلفتك بعده بسبع سنين، وبعد سافرنا برا وقعدنا سنين والدنيا تلاهي، ولما رجعنا روحت المنطقة اللي كنا ساكنين فيها وسألت عليهم قالولي عزلوا من زمان.
- *كريمة:* فعلاً احنا هنا بقالنا زي 15 سنة وأكتر.
- *حنان:* الحمد لله إن الشمل أتجمع تاني.
- *كريمة:* والله وكبرت يا عاصم وبقيت شاب يشرح القلب.
الفصل الرابع عشر من هنا