*فهيمة:* ربنا يهديها، هعمل إيه بس، كله عشان جوزي مش عايزة أخرب بيتي.
*جميلة:* معلش ربنا يحلها من عنده.
*فهيمة:* أسيبك أنا عشان ألحق لسه هستنى الأتوبيس.
*جميلة:* ربنا يعينك.
وبعد ساعتين تصل فهيمة إلى المصلحة الحكومية التي تعمل بها لتجد زملاءها في انتظارها:
- *سيهام:* جيبتي البليلة.
- *فهيمة:* آه جيبت يا أختي بس أكيد بردت عشان الأتوبيس أتأخر أوي النهارده.
- *الأستاذ ظريف:* عملتي حسابي معاكم.
- *فهيمة:* آه طبعاً يا أستاذ ظريف.
- *ظريف:* إيه ده ديه ساقعة أوي.
- *فهيمة:* معلش الأتوبيس أتأخر على ما جيه.
- *ظريف:* وأنتي ليه تركبي أتوبيس، أنتي مش جوزك مسافر برا.
- *سيهام:* الاسم مسافر ومتغرب بس أمه هي اللي بتاخد الفلوس والغلبانة ديه متمرطة في الأتوبيسات.
- *ظريف بخبث:* صعبتي عليا، أنا ممكن أوصلك في طريقي وأجيبك في طريقي برده.
- *فهيمة:* لا كتر خيرك أنا بتصرف.
- *ظريف:* احنا إخوات وزملا متقوليش كده يا ست فهيمة.
- *سيهام:* آه والله صح، أقله يوفر عليكي تعب المواصلات.
- *فهيمة:* ربنا يسهل.
*أما في الحارة فكانت جميلة قد انتهت من بيع بضاعتها:*
- *رضا:* يعني معملتش حاجة يا حلو.
- *فولة:* لسه برتب لها يا معلم عشان هتبقى القاضية.
- *زيزو:* ونشتغل احنا بقى ونعيش.
- *رضا:* بقولكوا إيه تعالوا ورايا المخزن عشان نتكلم كلمتين مهمين بس راقبوا الحارة الأول.
وهنا ينظر فولة ليجد أن السيدة عفاف قادمة إليهم:
- *فولة:* الحق يا زوز العجوزة الشمطاء العاشقة.
- *زيزو:* عايزة إيه ديه.
- *رضا:* في إيه فهموني.
- *فولة:* أصل عفاف شكلها معجبة بزيزو وكل شوية تيجي تعمل أي حاجة عشان تلفت نظره.
ليضحك رضا:
- *رضا:* وماله شكل الواد عاجبها، أشبك معاها يا واد، ديه على قلبها شيء وشويات.
- *زيزو:* أيوه بس ده عجوزة أوي وعاملة زي المقطورة.
- *رضا:* يا عم يعني أنت هتحطها في الحلة مش هتستوي.
- *فولة يضحك:* لا هيوزنها بالكيلو.
وهنا تدخل عفاف المطعم:
- *عفاف:* صباح الخير، إيه واقفين كده ليه.
- *فولة:* أصلنا شوفناكي قولنا نعملك تشريفة.
- *عفاف تضحك:* حلوة التشريفة ديه، خد يا زيزو هاتلي حبة فول وكام قرص طعمية أحسن المخفية مرات ابني سابتلي عيالها وعايزة أطفحهم.
- *زيزو:* من عيوني يا ست البنات.
- *عفاف:* جاتك إيه يا واد ده أنا جدة.
- *زيزو:* وحياتك ولا باين عليكي.
- *عفاف:* ما أنا قولتلك جوزوني صغيرة أوي.
- *زيزو:* آه منهم لله.
- *عفاف:* أصل يا ولا العرسان كانوا طوابير عليا، ده حتى في واحد موت نفسه لما أبويا رفضه.
- *زيزو:* والله ربنا بيحبه.
- *عفاف:* بتقول حاجة.
- *زيزو:* بقول خسارة شبابه، لكن قوليلي هو جوزك مات إزاي.
- *عفاف:* أنهو واحد فيهم.
- *زيزو:* أنتي اتجوزتي أكتر من واحد.
- *عفاف:* آه أربعة.
- *زيزو:* يخرب بيتك أربع رجالة.
- *عفاف:* آه وماتوا كلهم وورثتهم بس مخلفتش غير واد بس مافيش غيره وحيد واسمه وحيد.
- *زيزو:* ليه هما الأربعة مكانوش بيخلفوا.
- *عفاف:* يا واد لا كانوا عواجيز يعني رجلهم والقبر، وبيني وبينك نفسي أتجوز شاب يرجعلي شبابي.
- *زيزو:* وورثتي كتير على كده.
- *عفاف:* متعدش عماير وأراضي غير الفلوس اللي في البنوك وكلها هتبقى تحت أمر عريسي الجديد.
- *زيزو:* طب ما نحن هنا.
- *عفاف:* بس يا واد.
- *زيزو:* ليه مش قد المقام.
- *عفاف:* ده أنت المقام كله.
- *زيزو:* طب إيه نكتب الكتاب ونعلي الجواب.
- *عفاف بكسوف:* كتاب إيه يا واد وأقول لابني إيه.
- *زيزو:* وأنتي يعني كنتي قولتيله إيه على الأربعة اللي فاتوا.
- *عفاف:* كان صغير، وبعدين في واحد منهم يبقى أبوه.
- *زيزو:* طب بقولك إيه ما تيجي كده نخرج نتفسح، أهو تغيري جو الحارة الممل ده وأغديكي كباب وكفتة.
- *عفاف:* طب والعيال.
- *زيزو:* أقفلي عليهم وأمهم لما تيجي تفتح لهم، هي ناقصة دوشة.
- *عفاف:* عندك حق لازم أشوف حالي، أصبر هطلع أغير وأجيلك بس أستناني بعيد عن الحارة عشان محدش يشوفنا.
- *زيزو:* بس كده عيوني يا ست البنات.
- *عفاف:* تاني يا سيد الجدعان.
لتتركه عفاف وتنصرف، ثم يدخل المخزن:
- *رضا:* إيه الأخبار.
- *زيزو:* لفيتها.
- *فولة:* تعرفوا بقى إن الولية الخرفانة ديه هتنفعنا في تخزين الصنف وبيعه، أصل محدش هيشك فيها.
- *رضا:* برافو عليك مخك إيه كمبيوتر، بس يا أخويا مفلحتش ليه مع البت جميلة.
- *فولة:* أصبر والفجر هتسمع أحلى أخبار يا سيد المعلمين.
- *رضا:* أمته بس نفسي أخلص منها.
- *زيزو:* هو أنت في حاجة بينك وبينها احنا منعرفهاش، أصل موضوع الفول مش مبلوع.
- *رضا:* آه في، البت الشحاتة أطلب إيدها تسمعني موشح طويل عريض، ده أنا رايدها في الحلال أكسر أنفها بس وأتجوزها وبعدين أذل أنفاس أهلها.
*أما جميلة فها هي تنزل الحارة لتشوي الذرة وها هي فهيمة عادت من عملها:*
- *جميلة:* أتأخرتي ليه، عيالك عمالين يصرخوا وطلعتلهم لقيتهم جعانين وحماتك قافلة عليهم ومش موجودة.
- *فهيمة:* يا حبايبي.
- *جميلة:* متخافيش فتحولي الشباك ودخلتلهم أكل ولسه نازلة من عندهم حالاً.
- *فهيمة:* متحرمش منك يا رب، يا ترى الولية ديه راحت فين، منك لله يا عفاف دائماً واجعة قلبي.
- *جميلة:* خديلك كوزين درة دفي قلبك.
- *فهيمة:* هو حساب الأكل اللي طلعتيه للعيال كام.
- *جميلة:* كده برده تزعليني منك، جرى إيه هو مش الناس لبعضها برده ولا إيه.
وهنا تقترب منهم نؤة:
- *نؤة:* إيه يا حلوين، مالك يا فهيمة.
- *فهيمة:* يعني هيكون مالي، حماتي منها لله.
- *نؤة:* تعرفي أنا شوفت حماتك ماشية مع مين على أول الحارة.
- *جميلة:* مين.
- *نؤة:* الواد زيزو الصبي بتاع رضا، وحماتك إيه عاملة في نفسها عمايل وفضلت واقفة مستنية لغاية ما ركبت وراه على المكنة، بس شكله كان خايف على المكنة أوي منها.
- *فهيمة:* أنتي متأكدة إنها حماتي.
- *نؤة:* آه والله شوفتها بعنيا دول.
- *جميلة:* ربنا يستر.
- *فهيمة:* طب عن إذنكم أنا بقى أروح أشوف ولادي.
لتجلس نؤة بجانب جميلة:
- *نؤة:* شوفتي يا جميلة الحارة بقى فيها عوالم، أنا خايفة أوي أحسن واحدة منهم تشاغل عبودي.
- *جميلة:* يا بت أنتي دماغك فاضية، فكري في أي حاجة تعمليها تشغلك عن عبده شوية، وبعدين ما هو قاعد هيروح فين.
- *نؤة:* أنتي هتعملي زي أمي.
وهنا يقترب منهم شهاب:
- *شهاب:* لو سمحتي يا آنسة ممكن كام كوز درة.
- *جميلة:* حاضر من عيوني.
- *نؤة:* هروح أشوف خالتي أم عبده وأرجعلك.
- *جميلة:* ماشي.
لتتركهم نؤة وتذهب:
- *جميلة:* عايز كام كوز.
- *شهاب:* هاتي عشرة.
- *جميلة:* حاضر.
- *سرسأ:* هات كرسي للأستاذ على ما أشويله الدرة.
- *سرسأ:* حاضر أتفضل يا أستاذ.
- *جميلة:* هو حضرتك من القاهرة.
- *شهاب:* لا من الأرياف.
- *جميلة:* أصل شكلك يعني ميقولش إنك شغال مع العوالم.
- *شهاب:* وهما العوالم ليهم شكل.
- *جميلة:* مش قصدي بس احنا يعني واخدين عنهم فكرة من التلفزيون.
- *شهاب:* مش كل اللي بنشوفه حقيقي، لكن قوليلي أنتي بترتاحي أمته.
- *جميلة:* برتاح طبعاً.
- *شهاب:* أمته وأنتي الصبح بتبيعي والعصر كمان حتى بالليل.
- *جميلة:* أعمل إيه أكل عيشي.
- *شهاب:* هو والدك موجود.
- *جميلة:* آه بس تعبان وأنا بنته الوحيدة والأصول إني أقف جنبه.
- *شهاب:* برافو عليكي بس يعني مافيش شغل أحسن من كده.
- *جميلة:* شوف يا أستاذ أنا يا دوبك خدت الدبلوم ومتاخذنيش أي مكان هروح أشتغل فيه صاحب الشغل هيبصبص لي، بالمرتب، لأني فعلاً حاولت واشتغلت وملقيتش حد كويس، مش معنى كده إن الناس كلها وحشة بس يمكن حظي أنا اللي وقعني في الناس دول، وبعدين صدقني اللقمة الحلال اللي بتتاكل بشرف بيكون طعمها أحلى من الشهد، وبعدين آديني هنا تحت عين أمي وأبويا وآديها بترزق.
- *شهاب:* بس مش كده تعب عليكي.
- *جميلة:* ربنا سبحانه وتعالى قال في كتابه العزيز "لقد خلقنا الإنسان في كبد" صدق الله العظيم، وبعدين أنا لازم أشتغل عشان أسعد أهلي، دول ياما تعبوا عشاني أوي، هي كده هما يراعونا في الصغر واحنا نراعيهم في الكبر.
- *شهاب:* برافو عليكي، عن إذنك.
- *جميلة:* أتفضل.
ليتركها شهاب وهو يفكر:
- *شهاب:* إيه ده أنا عمري ما قابلت النموذج ده من البنات، بنت جميلة ومكافحة فعلاً، اللي يعيش ياما يشوف.
الفصل السادس من هنا