*جميلة باستغراب:* هو مش حضرتك الظابط اللي كنت في القسم، إيه جايين تاخدوني تاني بس المرة دي بزفة عوالم.
ليضحك عليها حسن:
- *حسن:* لا يا ستي مش جايين ناخدك ولا حاجة، أقعدي بس وهتفهمي كل حاجة.
- *جميلة:* حاضر أدينا قعدنا، خير يا باشا.
- *حسن:* أنتي مالك عصبية ليه كده.
- *جميلة:* أصل حاجة غريبة، الحكومة والعوالم متجيش ديه.
- *حسن:* يا بنتي أصبري.
- *عاصم:* من فضلك لو سمحتي أقعدي عشان تفهمي.
- *جميلة:* وأنت بقى تطلع إيه، سفير النوايا الحسنة.
- *زوبة:* ده أنتي مشكلة.
- *طلعت:* أبلة جميلة أسمعي الكلام.
- *جميلة:* عشان خاطرك أنت بس يا طلعت.
- *حسن:* هو الصبي بتاعك فين.
- *جميلة:* سرسأ في بيتهم.
- *حسن:* طب ممكن تتصلي وتخليه يحضر حالاً.
- *جميلة:* حاضر بس ممكن أسأل سؤال.
- *حسن:* ممكن بس بعد ما تتصلي على صبيك.
لتتصل جميلة على سرسأ لتبلغه أن يحضر في شقة العوالم:
- *سرسأ:* خير يا أبلة.
- *جميلة:* معرفش بس تعالي ومتعرفش حد إنك جاي هنا وخلي بالك ومتخليش حد يشوفك.
- *سرسأ:* تمام حاضر.
وبعد أن أغلقت جميلة الهاتف مع سرسأ:
- *حسن:* أسألي سؤالك.
- *جميلة:* أنتوا وديتوا الولية نعمات فين، أصلها عاملة زي الغفيرة.
- *زوبة:* طلعناها رحلة هي وجوزها وأولادها.
- *جميلة:* أنتوا مين، أصل شكلكم مش شكل عوالم.
- *طلعت:* لما سرسأ ييجي هتعرفي، وبطلي تسألي، تشربي إيه.
- *جميلة:* ولا حاجة.
وبعد ربع ساعة يصل سرسأ:
- *سرسأ:* إيه يا أبلة في إيه، احنا هنسيب شغلنا ونشتغل مع ولاد الكار دول، أنا أطبل وأنتي ترقصي.
- *حسن:* طيب نتكلم بقى، أسمعوني كويس.
*فلاش باك:*
كان حسن جالساً في مكتبه يراجع المحاضر وإذا بشخص ما يتصل عليه:
- *المجهول:* الحق صاحبك الظابط عز الدين اتضرب بالنار من رجالة طاهر.
- *حسن بخضة:* بتقول إيه.
- *المجهول:* الحقه عشان خلصوا على القوة كلها، مش فاضل غير الظابط عز الدين.
- *حسن:* مكانه فين.
ليبلغه المجهول بالمكان، ليأخذ حسن قوة ويذهب إلى مكان عز الدين ليجده غارقاً في دماؤه:
- *حسن بلهفة:* عز إيه اللي حصل.
ليبلغه عز بما حدث، ثم يطلب منه أن يأخذ بتاره وتار رجاله، ثم يلفظ أنفاسه الأخيرة بعد أن أوصاه على زوجته منار، العروسة التي لم تكمل أسبوع زواج.
- *حسن بدموع:* قسماً بربي لأخد حقكم حتى لو ده كلفني حياتي.
وأثناء تشييع جنازة الشهيد عز اقترب الشخص المجهول من حسن:
- *المجهول:* حضرة الظابط حسن أنا عندي معلومات عن طاهر.
- *حسن:* معلومات إيه.
- *المجهول:* توعدني إنك بعد ما تاخد المعلومات مني تأمنلي حياتي.
- *حسن:* أوعدك بس نتكلم بعد الجنازة.
وبعد أن انتهوا من تشييع عز إلى مثواه الأخير، مسح حسن دموعه وتحدث مع المجهول:
- *المجهول:* أنا يا بيه اسمي أبو سنة، كنت شغال مع طاهر بوزع في المناطق بتاعة الناس الأغنيا، بس في مرة وأنا بوزع لقيت أخويا بيشتري مني، وطبعاً معرفنيش عشان كنت مداري وشي، بس بعد كده أخويا خد جرعة زيادة ومات، يعني دوقت من نفس الكاس اللي كنت بدوقه للناس، حبيت أبعد عنهم وأتوب، طاهر هددني بمراتي وعيالي وفضلت غصب عني، وفي مرة روحت ناحية القسم عشان أبلغ عنه، بس رجالته كانوا مراقبيني وخدوني عنده، معمليش حاجة بس شوفت مراتي وهي مضروبة علقة موت ومتربطة من كل حتة، وقاللي المرة ديه احنا معملناش فيها حاجة تذكر، بس المرة الجاية مش هتشوفها هي وولادك إلا جثث، وقعت في عرضه وحبيت على رجله وفهمته إني معاه وعرفت معظم أسراره، بس للأسف هو برده انتقم مني وقتل مراتي وبناتي، وبعد ما فوقت من الصدمة حبيت أردله القلم، وصدقني يا بيه عمرك ما هتعرف توصله حتى لو قبضت عليه ومتلبس كمان هتلاقيه بيضحي بأي حد من رجالته وعلى قلبهم زي العسل عشان هو مبيقصرش معاهم.
- *جميلة بدموع:* أعوذ بالله هو في حد جاحد كده ومعندهوش قلب، ربنا ينتقم منه يا رب ويوقعه في شر أعماله، بس إيه علاقته بوجودكم هنا في الحارة، ده أنا حاسة إني قاعدة في وزارة الداخلية ذات نفسها.
- *حسن:* أنا هقولك، أنا جاتلي أخبار من أبو سنة إن رضا بتاع الفول دراعه اليمين في الأماكن الشعبية.
- *جميلة:* يخرب بيتك يا رضا، أمال إيه حكاية الفول والطعمية ديه.
- *حسن:* للأسف ستارة، وكمان مراته شغالة معاه.
- *جميلة:* بديعة المشخلعة.
- *حسن:* أنتي تعرفيها.
- *جميلة:* آه كانت رقاصة وتابت، أو بيقولوا تابت.
- *حسن:* وصبيانه.
- *سرسأ:* فولة وزيزو، أتاري الفلوس معاهم زي الرز.
- *حسن:* أمال إيه مش فلوس مش تعبانين فيها.
- *سرسأ:* ده زيزو ماشي مع الست عفاف حماة الست فهيمة، أصله غاوي الحريم الكبيرة.
- *حسن:* وعرفت منين.
- *جميلة تضحك:* أصل ده يجيب الخبر من بطن السبع.
- *حسن:* برافو عليك كده أنت هتنضم لينا.
- *جميلة:* رضا ده مفتري.
- *حسن:* هو ليه حطلك المخدرات في العربية.
- *سرسأ:* أصله كان عايز يتجوزها وهي رفضته وبهدلته.
- *عاصم بغيره:* بتقول يتجوز مين.
- *سرسأ:* الأبلة جميلة يا أستاذ شهاب.
- *حسن:* ده عاصم بيه نوار، رجل الأعمال المعروف يا سرسأ، بس لأنه عنده مشكلة وحياته مهددة جيبناه هنا.
- *جميلة بخوف:* ومين اللي مهدد حياته.
- *حسن:* هو نفسه طاهر.
- *عاصم:* طاهر حط مخدرات في الخشب اللي أنا بستورده، وللأسف لما عرف إني كشفته سلط حد ضرب عليا نار.
- *جميلة:* لتضرب جميلة على صدرها، يا لهوي المفتري، ربنا ينتقم منه البعيد.
لينظر لها الجميع باستغراب، لتحاول جميلة ظبط الحديث:
- *جميلة:* طب واحنا يا باشا مطلوب مننا إيه.
- *حسن:* أنا كنت ناوي إنك تراقبي رضا من بعيد، لكن بعد ما عرفت إنه عايز يتجوزك فضلت إنك تشتغلي مع زوبة بحيث إنه يلاقي طريقة يدخلك منها.
- *سرسأ يضحك:* أبلة جميلة هتبقى نادية الجندي في مهمة في تل أبيب.
- *جميلة:* بس يا أهبل، أيوه يا باشا بس هقول لأهلي إيه.
- *حسن:* وهو أنتي يعني هتشتغلي بجد، ده نوع من أنواع التوقيع لرضا، وبكده تقدري تعرفي طاهر وتوقعيه، أصله بيحب الحلوين وأنتي ما شاء الله قمر.
- *عاصم بغيره:* جرى إيه يا حسن هنشتغل أرايل على آخر الزمن.
- *حسن:* أنا قولت كده برده، جميلة بنت بميت راجل وتقدر تحافظ على نفسها كويس، أرجوكم ساعدوني إني أقضي على العصابة ديه، دول كل يوم بيدمروا آلاف الشباب.
- *جميلة:* أنا موافقة بس لازم أبويا وأمي يعرفوا.
- *حسن:* وهو كذلك، هتردي علينا أمته.
- *جميلة:* بكرة إن شاء الله.
- *حسن:* تمام.
- *عاصم:* خلي بالك من نفسك.
- *جميلة:* إن شاء الله.
- *جميلة:* أنا في حاجة تانية عايزة أقولها.
- *حسن:* قولي.
- *جميلة:* صاحبتي نؤة مرتبطة بعبده الميكانيكي، وده في الحارة ليل نهار، وفولة وزيزو عمالين يزنوا عليه يقفل الورشة ويشتغل معاهم في المطعم، هو ميعرفش نشاطهم إيه.
- *حسن:* متأكدة.
- *جميلة:* آه والله ده طيب ومحترم جداً.
- *حسن:* طب أنا عايز أقعد معاه.
- *جميلة:* أمته.
- *حسن:* بكرة زي دلوقت.
- *زوبة:* وعبده ده فايدته إيه لينا.
- *حسن:* لو كان زي ما جميلة بتقول يبقى هينفعنا كتير، أولاً هو اللي هيجيب رجل جميلة هنا ويظبط كمان قعدتها مع رضا، وبكده جميلة هتفهم رضا إنها موافقة تتجوزه بس لازم تعرف كل حاجة عنه.
- *جميلة:* وكمان هفهمه إني قرفت من الفقر ووقفة الشارع ونفسي كده أبقى غنية وعندي فلوس كتير، وأشترط عليه يطلق بديعة.
- *عاصم بغيره:* ليه هو أنتي هتتجوزيه بجد.
- *جميلة:* إيه مين ده اللي أتجوزه، أنا هعمل كده بس عشان يعترفلي بكل حاجة ووقتها أنا هلعب لعبتي.
- *سرسأ:* الله عليكي يا أبلة، مش أنا قولت نادية الجندي في مهمة في تل أبيب.
ليضحك عليه الجميع:
- *جميلة:* ربنا يقدرني، عن إذنكم، يلا يا سرسأ.
لتتركهم جميلة وتذهب هي وصبيها دون أن يراهم أحد:
- *جميلة:* أوعى يا سرسأ حد يعرف اللي حصل فوق.
- *سرسأ:* عيب عليكي أبلة، ولا كأني سمعت أو شوفت أي حاجة.
- *جميلة:* طب روح أنت بقى وأنا هطلع فوق عشان أعرف أبويا وأمي.
- *سرسأ:* ربنا يستر ويوافقوا.
- *جميلة:* يا رب.
- *سرسأ:* بس قوليلي يا أبلة هو شهاب ده ولا عاصم بيه كان بيبصلك كده ليه.
- *جميلة:* والله ما خدت بالي.
ونترك جميلة تصعد لأهلها لتقص عليهم ما حدث وتحاول أن تقنعهم، ونذهب إلى عفاف حيث كانت تجلس في شقتها بعد أن ذهب زيزو وتركها:
- *عفاف:* إيه ده أنا كنت عايشة ميتة، المنيل على عينه زيزو رجعلي شبابي، وكويس إن الزفتة مرات ابني لسه مرجعتش.
وهنا تسمع صوت طرق على الباب:
- *عفاف:* إيه ده وحيد ابني رجعت بالسلامة.
- *وحيد:* عاملة إيه يا أما وحشتيني أوي، أمال فين مراتي وعيالي.
- *عفاف:* أنا عارفة، أهي دايرة على حل شعرها.
- *وحيد بغضب:* قصدك يا أما.
- *عفاف:* هاه لا مافيش، بس أصل أنا على طول قاعدة لوحدي وبقضي شغل البيت كله وأنا مبقيتش قادرة.
- *وحيد:* مش بتشتغل يا أما، تحبي أقعدها من الشغل.
- *عفاف:* لا خليها شغالة بس تبقى تساعدني.
- *وحيد:* طب أنتي سمعتي أي حاجة كده ولا كده عليها.
- *عفاف:* أنا لا يا حبيبي.
- *وحيد:* طمنتيني، أنا هخش أريح على ما ترجع.
- *عفاف:* طيب.
وبعد أن دخل وحيد غرفته، نجد أن عفاف تتصل على زيزو:
- *زيزو:* إيه يا وليه لحقت أوحشك.
- *عفاف:* أسكت بقى، الولا ابني رجع من السفر، هنتقابل إزاي.
- *زيزو:* وإيه اللي رجعه ده.
- *عفاف:* هنعمل إيه دلوقت.
- *زيزو:* شككيه في مراته، يقوم يطلقها ويسافر تاني ويخلي لينا الجو.
الفصل الثامن من هنا