*شهاب:* إيه ده أنا عمري ما قابلت النموذج ده من البنات، بنت جميلة ومكافحة فعلاً، اللي يعيش ياما يشوف.
ويمر الوقت ونحن الآن قبل أذان الفجر، ليستعد شهاب للنزول لأداء صلاة الفجر، وبعد أن نزل إلى الحارة، ها هو يجد أن فولة يضع شيء في قدرة الفول أثناء عدم وجود جميلة وسرسأ:
- *شهاب:* إيه ده بيعمل إيه هنا، ده حاجة غريبة، طب أعمل إيه أفضل واقف ولا أروح أصلي، الأحسن أروح أصلي ولما أرجع هفهم في إيه.
وها هو شهاب يذهب لأداء الصلاة، وبعد أن عاد من صلاته وجد الشرطة تأخذ جميلة وسرسأ، ليقترب منهم شهاب:
- *شهاب:* في إيه حضرتك.
- *الظابط:* الحلوة بتتاجر في المخدرات وعاملة العربية ستارة ليها.
- *شهاب:* مش معقولة، مش ممكن.
- *جميلة:* والله العظيم بريئة.
- *الظابط:* هي هي نفس النغمة، يلا يا ماما جاتكم القرف في أشكالكم.
- *شهاب:* مستحيل البنت ديه كويسة، أنا لازم أتصرف.
وبعد أن أخذتهم الشرطة، نجد أن شهاب يتصل على شخص ما:
- *شهاب:* عايزك ضروري.
- *الشخص:* خير.
ليقص عليه شهاب كل ما حدث:
- *الشخص:* تمام أنا هتصرف، بس قولي إيه الأخبار عندك، حد اكتشف حاجة أو حتى عرف إنك عاصم نوار مش شهاب.
- *عاصم:* الحمد لله محدش عرف، أنا بس عايزك تتصرف بسرعة قبل ما البنت تتبهدل.
- *حسن:* حاضر هتصرف متقلقش أنت بس.
- *عاصم:* ربنا يستر.
وأثناء التحقيق مع جميلة يحضر حسن ويتحدث مع الظابط ويقص عليه كل ما حدث:
- *الظابط:* كده تحت أمرك يا باشا، هقفل المحضر على إننا مخدناش بالنا من المخدرات وهنخليه عدم وجود بطاقة صحية.
- *حسن:* تمام أوي كده.
- *حسن:* أسيبك أنا عشان الموضوع شكله دخل في الجد.
- *الظابط:* ربنا معاك.
ليتصل حسن على عاصم:
- *حسن:* خلاص يا سيدي كل حاجة تمام، البنت خارجة، بس أنا لازم أقابلك ضروري.
- *عاصم:* خلاص تعالي عند زوبة كأنك زبون عنده فرح.
- *حسن:* قصدك حضرة الملازم أول نادية.
- *عاصم:* أنا عارف كل أساميه متغيرة، ده أنا قربت أنسى اسمي.
- *حسن:* ربنا يهون علينا المهمة ديه، أنا عارف ومتأكد إن طاهر ورا كل ده.
وبعد إتخاذ الإجراءات تخرج جميلة هي وسرسأ:
- *جميلة:* أنا مش فاهمة في إيه، دخلنا في إيه وخرجنا في إيه.
- *سرسأ:* بيقولوا بطاقة صحية.
- *جميلة:* بس الظابط في الأول قال مخدرات.
- *سرسأ:* أعوذ بالله، مش عارف ليه شاكك في الواد فولة، عشان لما نزلت كان واقف جنب العربية.
- *جميلة:* طب لو كلامك صح وحطلنا مخدرات سابونا ليه، أنا مخي هيشت.
وها هي جميلة تصل إلى الحارة لتجد أن والدها ووالدتها يقفون لا حول لهم ولا قوة:
- *جميلة:* في إيه، إيه اللي نزلكم في الحارة، أطلع يا أبا أنت تعبان.
- *فرج:* هما خدوكي ليه.
- *جميلة:* معرفش.
ليقترب منهم فولة:
- *فولة:* هما سابوكوا إزاي.
- *سرسأ:* إيه خدونا عشان البطاقة الصحية وأبلة جميلة أديتهالهم.
- *فولة:* أمال إيه مخدرات ديه.
- *سرسأ:* معرفش شوف أنت بقى.
- *جميلة:* يلا يا سرسأ قفل العربية وروح النهارده أجازة.
- *سرسأ:* حاضر يا أبلة.
لتصعد جميلة مع أهلها إلى شقتهم:
- *كريمة:* خشي ريحي شوية.
- *جميلة:* حاضر يا أما.
لتدخل جميلة غرفتها ويدخل وراءها والدها:
- *فرج:* إيه اللي حصل يا بنتي.
- *جميلة:* يا أبا إيه اللي خلاك تمشي على رجلك، مش الدكتور قال متتحركش.
- *فرج:* سيبك مني أنا كويس، فهميني بس إيه اللي حصل.
- *جميلة:* والله ما فاهمة حاجة يا أبا بس خير كله خير، عن إذنك هنام شوية أحسن جسمي واجعني.
- *فرج بخضة:* حد عملك حاجة.
- *جميلة:* لا بس عارف يا أبا المعاملة كانت وحشة أوي بس فيه ظابط أول ما جيه عاملوني كويس وخرجوني.
- *فرج:* ديه دعوتنا ليكي إن ربنا يوفقلك ولاد الحلال دائماً، أنا هخرج وأنتي ريحي ونامي.
ليخرج فرج ويترك جميلة لتغط جميلة في نوم عميق من كثرة الإرهاق.
*أما رضا فكان يجلس في مطعمه:*
- *رضا:* إيه يا فالح أهي خرجت أهيه، بس شاطر تقولي هعمل وأعمل، جاتك الهم.
- *فولة:* خرجت بس إزاي وأنا حطيتلها الصنف في العربية والقدرة.
- *رضا:* يخرب بيتك أنت عايز تودينا في داهية، صنف إيه ما أكيد هيشمشموا ويعرفوا إننا تجار الصنف، أوعى تتصرف تاني من مخك الجزمة ده.
- *فولة:* طب سابوها إزاي.
- *رضا:* عشان حظي أنا، جايز معرفوش يلاقوه.
- *فولة:* إزاي ده أنا حاطه وأنا اللي مبلغ عنها.
- *رضا:* الله يحرقك، أتصلت من خطك.
- *فولة:* آه.
- *رضا:* أرمي الخط بسرعة عشان أكيد هيحاولوا يعرفوا الخط ده بتاع مين.
- *فولة:* مش باسمي، ده أنا شاريه كده.
- *رضا:* كسره وأرميه وبحذرك إياك تتصرف كده تاني.
- *فولة:* حاضر.
- *رضا:* الولا زيزو فين.
- *فولة:* قول العريس بقى، أصله كتب على عفاف.
- *رضا:* يخرب بيتك أمته.
- *فولة:* امبارح بالليل بس كتبوا عرفي، ورقتين يعني.
- *رضا:* يا حلاوة وبعدين.
- *فولة:* معرفش لما ييجي أبقى أسأله، أنا هشيل همي وهم غيري.
وها هو زيزو يصل المطعم ولكنه يرتدي طقم شيك جداً ومعه هاتف جديد:
- *فولة:* أش أش إيه ده بركات العروسة.
- *زيزو:* أنت لسه شوفت حاجة.
- *رضا:* همتك بقى عشان نخزن البضاعة عندها، إلا الزفت ده عمل كارثة.
- *زيزو:* ده عيل حيوان وأنا قولتله بلاش عشان متجرش علينا بلاوي.
- *رضا:* يعني أنت كنت عارف يا زيزو.
- *زيزو:* آه وحذرته بس هو اللي عامل فيها الشيخ الشريب.
- *رضا:* خلاص احنا هنهدي شوية أما نشوف أخرتها إيه.
- *زيزو:* طب أسيبكم أنا بقى وأطلع للعروسة.
- *رضا:* ومرات ابنها.
- *زيزو:* في شغلها، أروح قبل ما تيجي عشان ألحق أقلب قرشين.
- *فولة:* عيل محظوظ طول عمرك.
ليذهب زيزو إلى منزل عفاف:
- *عفاف:* خش بسرعة قبل العيال ما يرجعوا من المدرسة.
- *زيزو:* وحشتيني يا فوف.
- *عفاف:* أول مرة حد يدلعني.
- *زيزو:* أيامك الجاية كلها هتبقى دلع وشخلعة يا فوفتي.
- *عفاف:* بس بقى يا واد أحسن أخد على الدلع.
- *زيزو:* ومين يتدلع غيرك يا قلب الزوز.
ونتركهم ونذهب إلى منزل زوبة العالمة وها هو الظابط حسن قد وصل إلى المنزل:
- *حسن:* حضرة الظابط طلعت.
- *طلعت:* أيوه كده يا راجل اسمي وحشني.
- *سومة:* إيه يا أفندم وأنا أخباري إيه.
- *حسن:* حضرة الظابطة سمية.
- *سمية:* كل تمام، الحكاية كلت مع أهل الحارة.
- *حسن:* طيب تمام، عايزين نقعد ونتكلم، أمال فين عاصم.
- *طلعت:* بيصلي العصر وزمانه طالع.
لتخرج عليهم زوبة:
- *حسن:* حضرة الملازم أول زوبة.
- *زوبة:* خليها زوبة عشان منساش اسمي الجديد.
- *حسن:* عايز حد يندهلي البنت جميلة بتاعة الفول والصبي بتاعها.
- *طلعت:* أنا هروح أندهلهم، بس هو حضرتك عايزهم ليه.
- *حسن:* لما ييجوا هتعرف، روح بقى.
وها هو عاصم قد انتهى من صلاة العصر لينظر حوله فلا يجد عربة جميلة:
- *عاصم:* إيه ده هي مش بتشوي درة ليه، بس معذورة اللي حصلها كان صعب جداً على بنت في سنها.
ليجد طلعت يقترب منه:
- *طلعت:* حسن بيه فوق وعايزك وبعتني أجيبله جميلة وسرسأ.
- *عاصم:* ماشي بس متخضهاش.
- *طلعت:* حاضر، بس إيه.
- *عاصم:* إيه في إيه.
- *طلعت:* لا مافيش عن إذنك.
ليتركه عاصم ويذهب، ليصعد طلعت إلى منزل جميلة:
- *كريمة:* خير يا ابني في إيه.
- *طلعت:* كنت عايز الست جميلة، كنا عايزين درة مشوي.
- *كريمة:* بس هي أجازة النهارده.
- *طلعت:* معلش يا خالتي أصلي وعدت الجماعة أجيبلهم درة، يرضيكي أطلع عيل صغير معاهم.
- *كريمة:* لا يا ابني هخش أصحيها.
وبعد أن أيقظت كريمة جميلة ابنتها:
- *جميلة:* خير يا طبلة النهارده أجازة.
- *طلعت:* عايزينك في موضوع مهم أوي عند المعلمة.
- *جميلة:* وأنا هعمل إيه مع العوالم.
- *طلعت:* لما تيجي هتفهمي.
- *جميلة:* أمري لله.
وتذهب معه جميلة إلى منزل زوبة لتجد حسن جالساً معهم:
- *جميلة باستغراب:* هو مش حضرتك الظابط اللي كنت في القسم، إيه جايين تاخدوني تاني بس المرة ديه بزفة عوالم
الفصل السابع من هنا