*نؤة:* إيه ده هو في فرح في الحارة ولا إيه.
*نبوية:* فرح إزاي من غير ما يعزمونا.
*نؤة:* أستني هشوف كده.
لتنظر نؤة من الشرفة:
- *نؤة:* مافيش فرح ولا حاجة، الحقي ده في يافطة متعلقة في بيت نعمات، زوبة العالمة لجميع الأفراح.
- *نبوية:* أنتي بتقولي عالمة؟ هو ده اللي كان ناقص.
- *نؤة:* خلاص هتبقى حارة العوالم.
- *نبوية:* أمشي يا بت من هنا.
*أما جميلة فها هي تعد الحمص والترمس ثم تتحدث مع والدتها:*
- *جميلة:* أما كريمة.
- *كريمة:* نعمين يا عين أمك.
- *جميلة:* خدي القرشين دول، هاتي باقي علاج أبويا وأدفعي النور والماية.
- *كريمة:* طب هاتيلك عباية جديدة.
- *جميلة:* البيت أولى، وبعدين خلاص العيد الكبير فاضل عليه شهرين أبقى أشتري إن شاء الله.
- *كريمة:* ربنا يوسع رزقك يا بنتي.
- *جميلة:* آمين يا رب العالمين، يلا أنا هنزل بقى.
- *كريمة:* ملكيش دعوة بالزفت رضا.
- *جميلة:* أنا في حالي يا أما، أستني أرن على سرسأ ييجي يشيل معايا.
- *فرج:* ممكن بنتي حبيبتي تعملي كوباية حمص وتكتر الشطة والليمون.
- *جميلة:* بس كده من عيوني يا قمر.
- *كريمة:* شطة قليل عشان معدتك.
- *فرج:* حاضر.
وبعد أن نزلت جميلة إلى الحارة تجد الأطفال في انتظارها:
- *الأطفال:* أتأخرتي ليه.
- *جميلة:* حقكم عليا بس النهارده في ترمس كمان.
- *الأطفال بفرحة:* هييه.
- *جميلة:* سرسأ خد روح هات ليمون أحسن خلص.
وهنا يقترب منها طبلة:
- *طبلة:* إزيك يا أبلة جميلة.
- *جميلة:* الحمد لله.
- *طبلة:* عايز عشرة حمص.
- *جميلة:* في ترمس.
- *طبلة:* آه شايفة، هاتي عشرة كمان وخدي حسابهم.
- *جميلة:* ياخد عدوينك.
*أما في منزل المعلمة زوبة نجد أن زوبة تتحدث في الهاتف بلهجة غريبة:*
- *زوبة:* طيب ماشي حاضر من عيني.
ثم تغلق الهاتف:
- *زوبة:* بقولكوا إيه يا عيال جايلنا فرد جديد في الفرقة هيمسك الحسابات.
- *طبلة:* أنا جيت وجبت الطلبات.
- *زوبة:* طيب هات أما أدفي صوتي.
- *سومة:* والمحاسب ده شكله حلو يا معلمة أحسن من الأشكال ديه.
- *زوبة:* اتلمي يا بت احنا بناكل عيش.
- *طبلة:* أما يا معلمة البت بتاعة الحمص ديه إيه غصن بان، يا ريت لو تشتغل معانا.
- *زوبة:* حلوة يا ولا.
- *طبلة:* فورتيكة.
- *زوبة:* هبقى أشوفها ولو تنفع هبقى أسألها.
- *سومة:* هو احنا ناقصين ما احنا حلوين كده.
*أما في مطعم رضا كان رضا يجلس مع صبيانه:*
- *رضا:* وبعدين في وقف الحال ده، كل يوم نعمل الطعمية ونرميها وقدرة الفول زي ما هي وبقيت الحاجة بتبوظ.
- *زيزو:* البت جميلة واكلة الجو خالص مننا، ديه مبتهمدش يا معلمي.
- *فولة:* أنا عندي الحل اللي يخليها تغور من وشنا.
- *رضا باهتمام:* حل إيه.
- *فولة:* هنفذ وهتعرفوا.
- *زيزو:* أوعى تعملها حاجة مش ناقصين نصايب.
- *فولة:* عيب عليك كله هيبقى في السليم.
- *رضا:* والله يبقالك الحلاوة، أنا مروح بقى مادام مافيش شغل.
- *فولة:* بالسلامة شكل الست بديعة عاملة أكلة تمام.
- *رضا:* هي ناقصة عين أهلك، آه يا أخويا كوارع وفتة إنما إيه لوز اللوز، يلا أسيبكم أنا.
وبعد أن تركهم رضا ليذهب إلى منزله:
- *بديعة:* حمد الله على السلامة يا معلم.
- *رضا:* الله يسلمك.
- *بديعة:* مالك مكشر كده ليه.
- *رضا:* البت جميلة ديه واكلة مننا الجو وبخسر كل يوم.
- *بديعة:* ما أنت اللي ماسك في الفقر.
- *رضا:* يا وليه ما أنتي عارفة اللي فيها، الفول والطعمية ستارة بس.
- *بديعة:* أمال مالك قالب خلقتك علينا ليه، ده حتى الإيراد النهارده تمام، ده أنا بفكر نغلي شوية أصل العايز أهبل.
- *رضا:* وماله يا أبا غلي براحتك.
- *بديعة:* ناكل بقى تلاقيك جعان يا قلبي.
- *رضا:* الحقيني أحسن أنا واقع من الجوع.
- *بديعة:* حالاً ويكون الأكل عندك.
- *رضا:* مش الحارة فيها بقى فيها فرقة عوالم.
- *بديعة:* عوالم إيه يا راجل أنت بتهزر.
- *رضا:* وحياتك أبداً سكنوا فوق نعمات، كنا ناقصين دوشة.
- *بديعة:* يا راجل ديه طاقة رزق اتفتحت لينا.
- *رضا:* ليه هترقصي معاهم.
- *بديعة:* أرقص إيه أنت مش عارف إن العوالم دول بتوع مزاج، يعني هيشتروا مننا.
- *رضا:* آه صح بس أصبري أما يقعدوا شوية في الحارة ونجس نبضهم، مش ناقصين مشاكل مع اللي ميتسموش.
- *بديعة:* أيوه يا أخويا عارفة وفاهمة، يلا تعالي كل ورم عضمك.
- *رضا:* الله ريحة الكوارع تفتح النفس.
- *بديعة:* بألف هنا وشفا.
*أما نعمات فكانت تجلس مع بناتها شادية وفادية:*
- *نعمات:* بقولكوا إيه أنا هطلع أرحب بالجماعة الجداد دول، أهو ينوبني من الحب جانب.
- *شادية:* يا أمي حرام عليكي هو احنا ناقصنا حاجة، أبويا الحمد لله مكفينا.
- *نعمات:* ناقصني كتير عايزة أتسيغ وألبس دهب، مشوفتيش مرات رضا لابسة دهب أد إيه.
- *فادية:* خلينا في حالنا والحمد لله على اللي احنا فيه.
- *نعمات:* آه احنا حلوين أوي، نص الشهر عدس ومسقعة ويوم لحمة في الشهر ويوم فراخ، غيرنا بياكل بط ورومي، أنا زهقت من العيشة ديه وعايزة أهج، جاتكم الهم أنتوا وأبوكم قرفتوني.
لتتركهم وتدخل غرفتها.
*أما السيدة أم عبده فها هي تعد طعام العشاء لولدها عبده، ليدخل عبده:*
- *عبده:* السلام عليكم يا أما.
- *أم عبده:* وعليكم السلام، على ما تغير وتتشطف أكون حضرتلك العشا.
- *عبده:* حاضر بس بسرعة أنا جعان وعايز أنام.
- *أم عبده:* حاضر يا حبيبي.
وبعد أن أخذ عبده حمامه واستبدل ملابسه، ها هو يجلس بجانب والدته يتناول عشاءه المكون من طبق باذنجان وطبق طماطم وطبق بطاطس، وبعد أن تناول عبده عشاءه:
- *عبده:* الحمد لله على النعمة، أنا هخش أنام يا أما.
- *أم عبده:* مش هتشرب شاي.
- *عبده:* والله ما قادر، خدي يا أما فلوس الأسبوع أهيه، شيلي جزء وأصرفي من الجزء التاني.
- *أم عبده بفرحة:* ربنا يوسع رزقك يا ابني.
- *عبده:* تعيشي يا أما.
- *أم عبده:* بكرة بقى هدبحلك دكر بط يرم عضمك، يوم الأجازة بقى ولازم تتغذى.
- *عبده:* متحرمش منك يا أما.
*أما شهاب فكان قد وصل إلى الحارة ليتصل على زوبة:*
- *زوبة:* حاضر هبعتلك طبلة يجيبك، أنت لابس إيه.
- *شهاب:* في بنت بتبيع حمص وترمس هقف عندها.
- *زوبة:* تمام.
ليقترب شهاب من جميلة:
- *شهاب:* من فضلك ممكن كوباية حمص.
- *جميلة:* عيني حاضر، شطة ولمون.
- *شهاب:* ماشي.
- *جميلة:* اتفضل أحلى كوباية حمص وعليهم شوية ترمس.
- *شهاب:* متشكر جداً، أتفضلي حسابك.
- *سرسأ:* أنت شكلك غريب عن الحارة.
- *شهاب:* آه فعلاً أول مرة آجي الحارة هنا.
- *سرسأ:* نورت وجاي زيارة ولا عابر سبيل.
- *جميلة:* بطل رغي وأنت مالك، دع الخلق للخالق.
- *شهاب:* لا جاي شغل، هشتغل محاسب في فرقة الست زوبة.
ليضحك سرسأ:
- *سرسأ:* وهما العوالم بيجيبوا محاسبين.
وهنا يحضر طبلة ليقترب من شهاب:
- *طبلة:* الأستاذ شهاب.
- *شهاب:* أيوه أنا.
- *طبلة:* أهلاً بيك تعالي معايا، عن إذنك يا أبلة ولا أقولك هاتي كوباية حمص.
- *جميلة:* أبقى هات الفارغ أحسن معنديش كوبايات.
- *طبلة:* حاضر هوصل الأستاذ وأجيبهمولك.
- *جميلة:* ماشي.
- *سرسأ:* إلا قولي هو بتكسبوا كويس.
- *طبلة:* ليه.
- *سرسأ:* أصلك طالع نازل تشرب حمص تاكل درة تاكل ترمس.
- *طبلة:* مستورة الحمد لله، إيه عايز تشتغل معانا.
- *جميلة:* بطل دوشة يا زفت.
- *سرسأ:* حاضر، أبقى هات الفارغ يا عم.
ثم يذهب شهاب مع طبلة إلى منزل زوبة:
- *زوبة:* أهلاً وسهلاً بيك، اتفضل يا أستاذ شهاب.
- *سومة:* إيه القمر ده.
- *طبلة:* شهاب ديه مش لايقة على شغلنا، أنت من النهارده اسمك شوش.
- *زوبة:* حلوة شوش ديه.
ويمر الوقت وها هو أذان الفجر لتصلي جميلة فرضها وتنزل إلى الحارة، ونجد أن شهاب نزل إلى الحارة ليصلي الفجر ليلمح جميلة وهي تقف على عربة الفول ليذهب إليها:
- *شهاب:* صباح الخير.
- *جميلة:* صباح النور.
- *شهاب:* هو مش أنتي بتاعة الترمس والحمص.
- *جميلة:* آه أنا.
- *شهاب:* وبتبيعي إيه.
- *جميلة:* فضلة خيرك فول وبليلة، وفي نص النهار بشوي درة، المعايش صعبة يا أستاذ، شهاب ربنا يعين الجميع.
- *شهاب:* طب ممكن على ما أصلي تحضريلي فول وبليلة.
- *جميلة:* عايز بكام.
- *شهاب:* مش عارف بس عايز لكل الناس اللي فوق.
- *جميلة:* حاضر هحسب الحسبة وأجهزلك الحاجة ولما ترجع من الصلاة أقولك الحساب كام، بس في حاجة غريبة أنت شكلك بيه كده وابن ناس، إيه اللي رماك على العوالم.
- *شهاب:* نصيبي، كلنا ولاد تسعة، عن إذنك.
ليتركها شهاب ويذهب إلى الجامع ثم يعود بعد الصلاة:
- *جميلة:* اتفضل وده حسابك.
- *شهاب:* شكراً.
- *جميلة:* تحب أحطلك بتنجان حادق طعمه إيه زي العسل.
- *شهاب:* ماشي حطي.
وبعد أن أخذ شهاب طلباته ترك جميلة وذهب:
- *جميلة:* الجدع ده غريب أوي شكله في حاجة وراه.
وهنا تقترب منها فهيمة:
- *فهيمة:* صباح الخير يا جميلة.
- *جميلة:* صباحك فل.
- *فهيمة:* هاتي خمسة فول وخمسة بليلة عشان أكلك عجب زمايلي أوي.
- *جميلة:* ألف هنا، أمال فين الولاد.
- *فهيمة:* أجازة النهارده عشان يقعدوا مع ستهم، قولت أخليهم يزهقوها شوية خليها تشرب.
- *جميلة:* هي لسه برده بتضايقك.
- *فهيمة:* ربنا يهديها هعمل إيه بس، كله عشان جوزي مش عايزة أخرب بيتي لكن هي مصرة تخرب بيتي
الفصل الخامس من هنا