رواية بستان الاشجان
الفصل السابع عشر 17
الكاتب بقلم مجهول
شيرين مع ولاء شقيقة ساهر يجهزون الشقة.
ولاء : مش عايزة اوصيكي على ساهر يا شيرين.
شيرين : دا في عينيا، وصيه انتي بس عليا.
ولاء : من غير ما اوصيه ساهر ابن حلال.
شيرين : طبعا ومين يشهد.
ولاء : صدقيني مش عشان اخويا، هو فعلا قلبه طيب.
شيرين : عشان كدا هتجوزه.
ولاء : ربنا يهنيكوا ببعض.
يدخل عليهم ساهر.
ساهر : ايه الانس دا؟
شيرين : كانت بتوصيني عليك.
ساهر : طب اعملي بوصيتها بقى.
شيرين : انت ميتخافش عليك يا ساهر، حقك بتعرف تجيبه بأي طريقة.
ساهر : يا ساتر من اولها كدا.
شيرين : مهو انا ناوية ادبحلك القطة قبل ما تدبحها انت.
ساهر : احنا كدا هنقضي على قطط البلد.
يضحكون جميعا.
ساهر مع هدى في المكتب.
ساهر : انا مش جاي بكرا يا هدى.
هدى : دا شئ مفهوم.
ساهر : هاخدك معايا اعرفك البيت عشان تيجي الفرح.
هدى : لا معلش مش هقدر.
ساهر : انتي كدا بتزعليني منك.
هدى : ارجوك بلاش النعومية دي.
ساهر : هو انا صورتي اتهزت عندك اوي كدا؟
هدى : معادتش فارقة.
ساهر : طب لو قولتلك عشان شوية المعزة الباقية ليا عندك لازم تيجي الفرح.
هدى : وفر كلامك لاني مش هاجي.
ساهر : انا مبحبش الح على حد.
هدى : وانا مقولتش تلح.
ساهر : براحتك بس هييجي اليوم اللي تقدري فيه موقفي.
هدى : تهانينا للعروسة.
ساهر : الله يبارك فيكي ياختي.
الفرح مقام في بيت شيرين، ساهر وشيرين في الكوشة.
ضياء : الف مبروك يا جماعة.
شيرين : الله يبارك فيك، عقبالك.
ضياء : قريب ان شاءالله.
نورهان : الف مبروك.
وتعطي نورهان ظرف لساهر به مبلغ من المال.
ساهر لشيرين : دي مدام نورهان بنت الحج محمد.
شيرين : اه اهلا وسهلا، الله يبارك فيكي.
نورهان : ممكن اخد معاكوا صورة.
ساهر : اوي اوي ( ينظر لها بتعجب) .
ضياء مع ندى في الكلية يوم الامتحان.
ضياء : متتصوريش بابا وماما فرحوا قد ايه.
ندى : طبعا مش انا هبقى مرات ابنهم.
ضياء : على فكرة ساهر دخل يوم الحد اللي فات.
ندى : روحت الفرح؟
ضياء : طبعا مش ابن خالتي.
ندى : عروسته حلوة.
ضياء : مش احلى منك يا حبيبتي.
ندى : من زمان مسمعتش الكلمة دي.
ساهر وشيرين في بيتهم الجديد، ساهر يغلق درج المكتب بمفتاح.
شيرين : نفسي اعرف انت مخبي ايه هنا.
ساهر : هخبي ايه يعني، ورق شغل مهم.
شيرين : يعني مش فلوس؟
ساهر : لا الفلوس في الدولاب لاي طارئ.
شيرين : تعرف ان بابا وحشني.
ساهر : وحشك! ، مهو كل يوم هنا.
شيرين : انت زعلان ولا ايه؟
ساهر : لا ابدا انا برد عليكي بس.
شيرين : طب قولي ايه رأيك في الجواز.
يجذبها ساهر ليلتصقا ببعضهم.
ساهر : احلى حاجة في الجواز هو انتي.
ثم يقبلها ويتركها ويتحرك للدولاب.
شيرين : انت اللي بتكروت اهو.
ساهر ضاحكا : لا متتعوديش على كدا، بس لازم اروح المكتب.
شيرين : صحيح هي البنت اللي شغالة معاك ماجتش ليه؟
ساهر : انا عملت اللي عليا وعزمتها.
شيرين : تلاقيها زعلانة عشان اتجوزنا.
ساهر : الجنان اشتغل ولا ايه؟
ساهر مع هدى في المكتب.
هدى : دي اوراق عايزة تتوقع.
ساهر : هاتيها.
تتحرك هدى نحوه وتعطيه الورق.
ساهر : اشتريتي الغسالة ولا لسة؟
هدى : اه اشتريتها من يومين كدا.
يرن جرس الهاتف ويرد ساهر
ساهر : الو
الشغالة : استاذ ساهر نورهان هانم مغمى عليها في البيت.
ساهر : ايه اللي حصل؟
الشغالة : الحج محمد تعيش انت.
ساهر : انا جاي حالا.
هدى : في ايه.
ساهر : الحج محمد مات.
ساهر في الڤيلا مع نورهان.
ساهر : شدي حيلك يا نورهان.
نورهان : انا مكنتش مطمنة للسفرية دي من الاول.
ساهر : وحدي الله طيب واهدي.
نورهان : الجثة هتيجي الساعة 4 لازم اروح أستلمها.
ساهر : استريحي انتي وانا هخلص كل حاجة.
نورهان : لا انا هستنى في القرافة.
ساهر مع نورهان في المقابر بعد انتهاء الدفن.
نورهان : مش قولتلك الدنيا بتستكتر عليا افرح.
ساهر : متحطيش الموضوع في دماغك، يلا بينا نروح.
يتحركان نحو السيارة ويذهبان للبيت.
ساهر : انا هجيلك بليل عشان في موضوع مهم.
نورهان : انا دماغي مش فايقة.. خير.
ساهر : اصل كان في ظرف الحاج سابه معايا وقالي افتحه لو مرجعش.
نورهان : يعني انت كنت عارف.
ساهر : والله ما اعرف حاجة، اكيد هنعرف ونفهم لما نفتح الظرف.
نورهان : خلاص هستناك.
شيرين جالسة مع والد ساهر في الصالة، يدخل ساهر من باب الشقة.
شيرين : انت ما صدقت نزلت؟
ساهر : معلش اصل الحج محمد مات.
شيرين : صاحب الشغل؟
ساهر : اه، مات وهو بيعمل عملية قلب مفتوح في لندن.
الاب : لا حول ولا قوة الا بالله.
ساهر : هاتيلي اي حاجة اكلها لحسن انا واقف من صباحية ربنا على رجلي.
الاب : وناوي تعمل ايه.
ساهر : يومين كدا واشوف نورهان بنته هتعمل ايه.
ساهر مع نورهان في حجرة المكتب بالڤيلا.
ساهر : الظرف اهو مرضتش افتحه غير في وجودك.
نورهان : طب افتحه.
يفتح ساهر الظرف ويخرج منه عدة اوراق.
ساهر : دا يا ستي عقد بيع الڤيلا باسمك، ودا كمان عقد بيع للمكتب باسمك بردو، ودا حساب مفتوح بعشرين الف باسم هدى، ودا حساب ب 100 الف باسمي انا، وحساب باسمك ب 2 مليون جنيه.. وتقريبا دا جواب.
نورهان : اقراه لو سمحت.
ساهر : ابنتي الغالية نورهان، سامحيني انا سافرت اعمل عملية من غير ما اعرفك عشان متتعبيش معايا، انا رتبت كل حاجة من بعدي منعا للمشاكل مع باقي افراد الاسرة، ويا ريت تخلي كل حاجة في المكتب زي ما هي وساهر معاكي وهو خلاص فهم الشغل يعني تقدري تعتمدي عليه، رجائي الاخير منك ان تطلبي لي الرحمة في كل وقت.
نورهان : الله يرحمك يا بابا ( دموعها تنهمر)
ساهر : كان طيب وقلبه كبير.
نورهان : ساهر عايزة كل حاجة تبقى زي ما بابا قال.
ساهر : مش فاهم.
نورهان : يعني خد الحساب بتاعك وادي لهدى حسابها، والشركة تمشي كأن بابا موجود بالظبط.
ساهر : اللي تشوفيه.
نورهان : انا رايحة للدكتور بكرة.
ساهر : ليه في حاجة؟
نورهان : لا بطني وجعاني شوية بس.
ساهر : اجي معاكي؟
نورهان : لا بس هستناك بليل هنا