قصة جهاد وسلامه
البارت الثاني والعشرون22
بقلم مريم نصار
عند صباح في الكوافير كان في صوت زعيق في قلب المحل والست خارجه تتمتم بكلام مش مفهوم، وعنايات جت على الصوت العالي وشافت صباح متنرفزه وبتقول للست:- مع السلامه ياختي السكه اللي تودي، ستات هم وحاره لمت شويه ناس هباب جاتكم نيله.
سألتها عنايات:- ايه يا بت يا صباح مالك في ايه؟! وصوتك جايب اخر الشارع ليه؟
قعدت صباح بزهق وقالت بعصبيه:- تعالي يا عنايات وشوفي واسمعي ياختي، ده انا شكلي هيتخرب بيتي على ايدها بنت الرفدي دي.
سألتها باستغراب:- يتخرب بيتك؟ وهي مين دي يا بت اللي هيتخرب بيتك على ايديها هي الغاز ولا ايه ما تتكلمي؟
صباح بشر:- المدعوقه اللي اسمها فردوس.
عنايات:- مالها هببت ايه تاني؟
صباح:- وهي لسه هتعمل!! ما هي عملت خلاص.
عنايات بقله صبر:- يا بت ما تتكلمي واخلصي هو سر؛ ما تقولي فيه ايه؟
صباح خبطت على رجليها بغيظ وقالت:- عاجبك الهِو اللي انا بقيت فيه ده؟! وكله بسبب فردوس كل واحده تيجي الكوافير تقولي اسعارك في العالي وفردوس اسعارها في المضبوط وتقوم سايباني وخارجه وتطلع على كوافير اللي ما تتسماش فردوس، واهو على يدك لسه دلوقتي واحده متخانقه معايا علشان قال إييييه!!! الأسعااااار.
عنايات:- وده من امتى ده ما هو طول عمرك كده والناس عارفه السعر بتاعك ايه الجديد؟
صباح بنرفزه:- يوووه منك يا عنايات!! ما قلنا الجديد هي فردوس؛؛ اااه يا نااااري ولسه؛ ولسه الخراب جاي ااااه يامين يسيبني عليها اقفش في زماره رقبتها ما سيبهاش الا وهي بترفص تحت رجلي .
عنايات :- طيب طيب بطلي نواح انا هاتصرف وهاريح قلبك.
صباح مسكت أيد عنايات وقالت بلهفه:- قوليلي انك هتولعي في الكوافير يا عنايات.
ابتسمت عنايات وقالت برفعة حاجب:- ومش بس كده دي الورشه قبل منها كمان... يومين بالكتير ويتم المراد.!!!
شقاوه ماكانش مصدق اللي سمعه، ولا كان مصدق أن بين ايديه فلوس بالكم ده، لأ وكمان دي فلوس شبكه فردوس، بص لجهاد وكأن الكلام كله اتبخر لكن سأله وقال :-أيه!! شبكه!!!! انا، انا مش فاهم حاجه قصدك ايه يا جهاد؟ وايه كل الفلوس دي؟ وجبتها منين؟
جهاد بضحكه:- حيلك حيلك عليا ياعم عابد، واحده واحده انا هاجاوبك، بص بقى انا مبدئيا كده ما عملتش اي حاجه تستدعي انك تتفاجئ كده، والفلوس دي انا جبتها من مكان امين وكمان ما تقلقش فلوس حلال، وزي ما انت سمعت دي فلوس شبكتك للانسه فردوس.
شقاوه:- بس دي فلوس كتير وكمان انا مش هاقدر اقبل بحاجه زي كده.
جهاد عدل النضاره وقال:- انت مكبر الموضوع كده ليه؟! عابد انت محتاج للفلوس دي اكتر مني وانا حاليا مش محتاجها، و يا سيدي اعتبره دين وتبقى سدده على مهلك المهم بقى خلينا نفرح بيك.
شقاوه بتعجب:- انت ايه حكايتك يا جدع أنت؟ وطلعتلي منين؟! وايه اللي يخليك واثق فيا قوي كده انك تجيبلي مبلغ زي ده؟
اخد نفس عميق واتنهد:-حكايتي!!! ممكن حاليا مقدرش اني....، او الاصح يعني اني مش قادر اجاوب على السؤال ده دلوقتي، و طلعت ليك منين؟! فده اللي المفروض انا اقوله لأنك أنت وأهل الحاره غيرتوا فيا جوايا حاجات كتير وفي فترة صغيره، وبعدين اللي يحرم نفسه ويضحي بمستقبله علشان خاطر يطمن على اخواته ويأمن مستقبلهم!!! فده سبب كافي قوي أني اثق فيك، وكلامي ده ليك من غير مجامله والمبلغ ده ولا حاجه قصاد انك فتحتلي قلبك وبقينا اصحاب ياعابد.
شقاوه رغم إعجابه بكلام جهاد لكن حس بالقلق من اجابته الغامضه على اول سؤال وانه مش قادر يقوله حكايته ايه، وسأل نفسه بحيره:- يا ترى حكايتك ايه يا جهاد!!! ويا ترى ايه اللي وراك!!! رجع بصله وبص للفلوس ومش عارف ياخد القرار الصح، جواه تمني كبير بأنه ياخدهم ويجري يحقق حلمه ويتجوز من البنت اللي حبها، لكن في نفس الوقت كبريائه وعزة نفسه تمنعه انه ياخد حاجه زي كده وعزم الامر وقال بتنهيده:- انا مش هاقدر أخد منك المبلغ ده، جهاد سامحني انا عارف ان كلامي ده ممكن يخليك تقول عني غبي اني اضيع فرصه زي دي، لكن حقيقي مش هاقدر.
جهاد : ليه يا عابد؟ وليه ترفض؟
شقاوه بحزن داخلي:- مش هقدر ياجهاد صدقني،انا آه بحب فردوس ونفسي دلوقتي تبقى مراتي قبل بكره لكن الظروف زي ما انت عارف ولو اخدت الفلوس دلوقتي بحجة الجواز بكره اكيد هظلم فردوس معايا بحجة الظروف، وانا يعز عليا اني اشيلها هم مش همها.
جهاد بدهشه:- هم ايه بس؟ الفلوس اهي موجوده وبيت الانسه فردوس قدامك، وا....
قاطعه شقاوه بوهن:- برده هاظلمها الموضوع مش موضوع شبكه وبس لأ، الجواز دلوقتي بقى عامل زي الحج لمن استطاع اليه سبيلا، صعبوا كل حاجه علينا، كأنهم بينتقموا مننا وبيعاقبونا إننا اتولدنا من الأساس.
خلص كلامه وحط الظرف في ايد جهاد وقام وقف وقال:- إنك تحس بيا وتتعب نفسك فدي كبيره عندي قوي يا جهاد.
جهاد قام وقف وفتح عينيه بصدمه:- آنسه فردوس؟!!!!!
شقاوه لف بسرعه وشاف فردوس واقفه وراه واكيد سمعت كل كلامهم وكل كلمه قالها شقاوه، عينيها فيها لمعه وعتاب كبير لكن حبة تبرر موقفها وقالت بغصه:- اء،، انااا ،،انا كنت جايه انادي عليك يا استاذ جهاد، تيتة محاسن بتسأل عليك من الصبح ،وسلمى كلمتني وقالتلي انده عليك تطلعلها، أحم ،، بالاذن أنا.
خلصت كلامها ومشيت بسرعه على المحل وقفلت الباب وقعدت مكانها تعيط، شقاوه الخنقه عنده زادت وزهق من كل حاجه أنها عكس بعض واقف مكانه مش عارف يعمل ايه، جهاد كان في موقف لا يحسد عليه ،وحس انه السبب في إن الفجوه بينهم تكبر أكتر ومعرفش يتكلم ولا يقول اي حاجه لكن حط الظرف بين ايدين شقاوه وخرج وسابوا بين حيرته وعيونه اللي بتبدل النظر بين الفلوس وحبيبته.
عند سلامة
عبقرينو عرف سبب وجود خاله بكار ومهتمش قوي وقعد مكانه ومحاسن سألته:- كنت فين يا واد يا حسين؟ وخدت الواد دحلاب على فين؟ وفين ياواد الشندوتش اللي قالي هاجيبهولك؟
سلامه:- وبعدهالك يا سونا؟ اصبري على الواد شويه هيقولك كل حاجه وهو بيتغدا، هاقوم اغرفله الأكل.
عبقرينو حط ايده على بطنه وقال بشبع:- لا لا انا واكل وشبعان لما قايل يا بس، جهاد ظبطني النهارده.
سلامه كشرت عينيها وقالت:- اكلت ايه يا حزين بره؟! وبعدين انا عايزه اعرفك انتوا كنتوا فين من الصبح كده؟
عبقرينو بإنبهار:- اسكتي يا سلمى ياختي ده جهاد شكله مهم في الدوله،ما فيش مشوار روحناه غير لما يطلب اوبر وايه بقى؟ عربيه مكيفه واخر روقان، رحنا البنك و ياوعدي ياوعدي على الفخامه، الواحد مش عايش والله يا جدعان.
سلامه عوجت بقها وقالت بتريقه:- بنك!!! ابو فصاده ده يروح البنك؟ ياما نفسي اعرف حكايته ايه ابن ال،،، وسكتت وبعدها كملت وقالت:- كمل كمل يا قلب امك وبعدين؟
عبقرينو:- جهاد قعدني كده في مكان زي الاستراحه بس إيه؟ اخر موضه وبعدين قعدت ساعه كده وجه معاه شنطه صغيره و قالي يلا بينا يا عبقرينو وخرجنا وركبنا اوبر تاني وقالي انت مش جعان؟ قلتله هموت واكل اي حاجه،هههههه كنت برميهاله يعني واقصى طموحي ساندوت كبدة من عند عم زغلول، بس ايه بقى وعدي ياوعدي، خدني مطعم ايه يا نهار فوحلقي قد الحاره دي كلها ،ولا إيه بقى بشوات بتقدم الأكل والله الواحد يضربلهم تعظيم سلام من الشياكه، والوان واشكال من الاكل ما اقولكيش وهيص وافرح بقى يا عبقرينو واكلت اكل يا جدعان لسنه قدام، وا..........
اتخض من الشبشب اللي اتحدف فيه من ستو محاسن وقالت بغيظ:- انت بتفرسني يا ابن الجز*مه فرحان عشان طفحت؟! قوم غور من وشي.
عبقرينو بألم:- اااه ايه بس يا ستي انا عملت إيه؟
محاسن:- عملك اسود ومهبب يابن حليم، غور يا واد إن شاء الله اللي كلته بط بط يطلع عليك وز وز.
نبويه بشهقه:- ياختي الف بعد الشر عليه، ده بدل ما تقوليلو مطرح ما يسري يمري، والف هنا على قلبه؟ كل ده عشان جهاد ماجابش ليكي الوليمه؟
سلامة بتكشيره :- وليمة إيه؟
ردت نبويه بشماته:- اصل بسلامته قالها ما تتغديش يا آنه انتي وناناه هاجيبلكم اكل حلو، وشكله كده نسي وكل هو والواد حسين،،، هي بقى تُسكت؟ لأ وابور قايد ، ونار طالعه من عينيها.
محاسن نهرتها:- وابور يولع في جتتك يا وش النحس ياجلابة النصايب، وانتي مالك انتي؟ بتحشري نفسك في اللي ملكيش فيه ليه؟ ولا أنتي تموتي لو ما تهزقتيش مني وتاخديلك كام كلمه في جنابك يعدلوكي.
عبقرينو قام وقف يسكتهم وقال:- بااااس بس استهدوا بالله يا جدعان، وانا دلوقت فهمت.
كلهم في صوت واحد:- فهمت اييييه ياوااااد؟
عبقرينو:- اصل جهاد اشترى كيسة سندوتشات قد كده وقال انا عازم ناس مهمه النهارده على سندوتشات، ولما سالته قالي دي شاورما وشيش طاووق وانواع تانيه كده.
محاسن:- اهم حاجه الطحينه علشان ما اظورش.
سلامه بنفاذ صبر:- لا حول ولا قوة الا بالله؛ كل الهيصه دي يا ستو؟ علشان شاورما!! ما كنت طلبتهالك من عند عمي زغلول.
محاسن:- لا تعبت من اكل الكلاب خلينا نجرب القطط.
سلامه بضحكه :-طيب اشطا، عموما انا بعت فردوس تنادي عليه من عند شقاوه تخليه يطلع يكلمك.
محاسن مصمصت شفايفها وقالت بهدوء :- الواحد شبعان خليه يجي على مهله.
كلهم اتعجبوا من كلامها،الباب خبط ودخل جهاد وكان جواه زعلان لكن رسم الضحكه ودخل سلم عليهم وعلى سلمى وقعد جنب محاسن وقال:- أتأخرت عليكي يا آنه انا اسف.
محاسن بمسكنه:- لا يابني مافيش حاجه انا حتى كنت باقولهم الواحد شبعان اي والله مش كده يا نبويه؟
نبويه هزت راسها وقالت:- ايوه ياختي صادقه دانتي من ساعة ونص تقولي شبعانه ولا ليا نفس لايتوها حاجه.
سلامه من بين اسنانها:- والله ستي دي تنفع في شهادة الزور.
جهاد بص لسلامه وقال:- لو سمحتي يا آنسه سلمى، ممكن صينيه واطباق؟
سلامه اضايقت انه طلب منها حاجه وانه كده في وجهة نظرها خد عليها ومشيت وهي بتبرطم بالكلام وقالت:- عايز صينيه واطباق كنت خدامة ابوك انا؟
جابت الصنيه ورزعتها قدامه وقالت بتحذير:- اتفضل ويارب نهدى؛؛ هااااا..!!
بصلها ونفسه يقولها إن الإعصار ما يجيش جزء صغير منها،لكن هز راسه بإبتسامة مصطنعه وقال:- اوكي يا آنسه سلمى متشكر جدا.
هي مردتش وقعدت جنب عبقرينو وفتحت الفون بتلعب جيمز، جهاد بيطلع الساندوتشات والسلطات ومحاسن ونبويه مبهورين من حجم الساندويتش وشكل السلطات واخد ساندوتش وقال لمحاسن اتفضلي:- يا آنه دي الشاورما.
وناول نبويه وقال:- اتفضلي ياناناه.
اخدته منه ومحاسن باصه ع حجم الساندويتش و بتتفحصوا من اوله لاخره وقالت بدهشه:- كل ده شاندويتش؟ ده قد دراع فاتن بنت روحية راديو مرات فرغلي.
ضحك وقال:- انا طلبت لحضرتك حجم الچامبو ومتاكد انه هيعجبك.
محاسن بتعجب:- چامبو؟! ده چامبو على جمبه، وهما دلوقتي بقوا بيعملوا الشندوتش مقاسات بالمتر؟!! ياحلاووه عشنا وشفنا ياولاد.
بيضحكوا ع رد فعل الست محاسن، ونبويه من أول قطمه قالت بإعجاب:- امممم الله،، وكمان طعمه حلو قوي تسلم مجايبك ياجهاد يبني.
:-متشكر يا ناناه واتفضلي بقى السلطات اهي.
محاسن شافت أنواع مختلفة وشاورت ع طبق وقالت بتعجب:- ايه الطبق ده ياواد شكله عامل كده ليه؟
جهاد بعفوية:-دي سلطة كلوسلو يا آنه.
محاسن:- ايييه؟ سلطة الموكوس أبوه؟ هما عملوا من الوكسه سلطه؟ ودي يبني ناكلها ولا نتحسر عليها؟!!!
الكل ضحك وجهاد وقال:- يا آنه دي اسمها كلوسلو، عباره عن كرنب وجزر ومايونيز ولبن وعصير لمون وخل وسكر. ومفيده ومتأكد انها هتعجبك يا ريت تدوقيها .
محاسن:- وانبي مهزعلك وهدوقها.
اكلت منها وقالت:- ايه القرف ده يابني هو في سلطه مسكره انتم بتهببوا ايه فينا؟! ناقص ترش سكر ع الفراخ من ع الوش، لا هاتلي الطحينه.
جهاد:- هههه اتفضلي يا آنه.
حط السلطه قدامها وبص على سلامه اللي كانت مندمجه في الفون ومتردد من انه يعزم عليها علشان رد فعلها العصبي من اقل حاجه لكن حط ساندوتش في طبق وقام لحد عندها وقال:- اتفضلي يا آنسه سلمى ويا ريت ما ترفضيش وا........
سلامه مندمجه لكن قالت بجدية:- حطهم عندك وهات رغيف كمان ولو في مخلل هات.
جهاد مكنش متوقع منها رد فعلها وابتسم واتأكد ان المعده بتغير من مود البني ادم وخصوصاً البنات.
بعد لحظات جه حليم وشفاعه وشقاوه ووصله لحد فوق ،جهاد كان جايب للكل وقعدوا كلهم ياكلوا وكانوا مبسوطين وجهاد لاول مره يشوف نفسه في المقام الاول وثقته في نفسه بدات تزيد.
مساءاً
عصفوره واقف قدام المحل اللي بيهش وينش ومتضايق من كل واحد يعدي يقرا اليافطه يضحك عليه وجه ولد في سنه 13 تقريبا وقف يقرا ويضحك وبيقول:- ههههههه محل نُكت؟ ايه الهبل ده هو في محل اسمه محل للنُكت؟ هههههههههههه
عصفوره مسك الولد ده من قفاه وقال:- بتقول إيه بقى يا روح امك؟
الولد ماخافش منه وقال:- وانت مالك أنت؟ اقول اللي انا عايز اقوله هو حد كلمك؟
عصفوره واقف مش موزون وقال:-وانا ،،وانا مالي ده انت يومك أوسد، انت مش عارف انت بتتكلم مع مين؟
الولد ضحك وقال:- لا عارف باتكلم مع مين هههههه مع ملك النكته الجديده،، اوعا يا عم سيب هدومي انت مخبول في دماغك ولا إيه؟
عصفوره اتغاظ وطلع مطوه وقال:-وحياة أمك،،، طب ايه رايك بقى لا تكون انت اول زبون وهتدخل المكتب وهتضحك غصب عنك وبطل عياط ياض ما تخافش مني.
الولد بشجاعه:- يا عم عياط ايه وانا اخاف منك ليه؟انت مسطول ولا إيه؟ وسع يا عم خليني اروح اجيب العشا.
عصفوره زقه في المكتب وقعده على كرسي بالغصب وقال:-اكتم ياض واسمع النكته دي من معلمك المعلم عصفوره، لا انا المهندز عصفوره.
الولد نفخ بخنقه:-اللهم طولك يا روح ده مجنون ده ولا أيه؟اوووف قول يا عم يمكن أضحك خلينا نخلص.
عصفوره اسمع يا سيدي:- مره مكرونه اتخانقت مع جوزها قالتله انا رايحه اندومي.
الولد مضحكش عصفوره بص على وشه واضايق انه مضحكش وقال:- طيب اسمع دي،بيقولك مره واحد فضولي والتاني اقصر مني.
الولد برده مضحكش عصفوره جاب اخره ومسك كتفه وقال:- انت ايه ياض وايه حكايتك واسمك ايه؟
الولد :- اسمي زيكو عايز ايه بقى؟
عصفوره انت ما بتضحكش ليه ياض؟ اللي هيضحك هياخد خمسه جنيه اضحك ما تبوظش سمعتي.
زيكو بدهشه:-ايه 5 جنيه للي يضحك؟
عصفوره:- اه؛ ايه مش عاجبك؟
زيكو كشر عينيه وقال بتفكير:- الراجل ده شكله عبيط، انا لازم اطلع باللي في جيبه وبص لعصفوره وقال بضحكه:- انت تقصد ان واحد فضولك والتاني اقصر منك ههههه يا لهوي ياني على الضحك مش قادر يا عم عصفوره ههههههه.
عصفوره ضحك ببلاها واخد نفس سيجار وقال:- عجبتك يا زيكو.؟
زيكو بضحكه :- هههههه لا مش قادر دي جامده جموده قولي واحده كمان عايزه اضحك أنا ما ضحكتش كده من زمان هههههه.
عصفوره قعد على كرسي المكتب ورفع رجليه على المكتب بكبرياء وقال:- بيقولك موظف بياخد رشوه 200 جنيه ركبوله كاميرات بقى بياخد 250 جنيه
200 ليه و 50 لبتاع الكاميرات.
زيكو مثل الضحكه:- ههههااااي لا لا لا دي اجمد بكتير اااايه الضحك ده، انا اول مره اسمع نُكت بالجمدان ده انت بتجيب الحاجات دي منين يامهندز عصفوره؟
عصفوره بثقه:- الحاجات هى اللي بتيجيلي، مش انا اللي بروحلها.
زيكو قام وقال:- طيب انا ضحكت اهو على النكت هات بقى ايدك على الفلوس.
عصفوره ناوله 10 جنيه وقال:- خد مش،،مش خساره فيك أنت هتبقى أهم زبون عندي
زيكو بمكر:- ده انت نمره؛ وهجيب اخواتي ونضحك عليك.
جهاد فتح الباب لأن حد بيخبط وكان شقاوه وجهاد اتكلم:- عابد؟! أهلا ياعابد تعالى اتفضل.
شقاوة بتهالك:- معلش يا جهاد سامحني اني جيت في وقت زي ده.
جهاد.:- عيب متقولش كده، بس تعالى ادخل الاول وطمني عليك.
شقاوه برفض:- لأ معلش خليها مرة تانيه انا جايلك علشان...
وطلع الظرف من جيب الجاكيت وكمل:- اشكرك على وقفتك معايا، ومش اي حد في الزمن ده بقى يحس بغيرو، أمسك ياجهاد.
جهاد بدهشه:- عابد احنا اتكلمنا في الموضوع ده، خليهم معاك انا مش محتاجهم دلوقتي، أرجوك خد خطوه وا....
قاطعه شقاوه بوهن واتكلم:- لو لينا نصيب ربنا هيميشها بمعرفته.
ساب الفلوس لجهاد ومشي، وجهاد واقف وسرحان في كل حاجه بتحصل.
فات يومين كمان.
جهاد بيتكلم مع عيلته على الرقم المنزلي يطمنهم عليه وكان بيختار الاوقات اللي موجود فيها نضال في البيت علشان ينقذوا من اسئله مامته المتكرره، سلامه بتنزل تقعد مع فردوس ومستغربه تغيير فردوس المفاجئ. لأنها ما بتتكلمش في اي حاجه ولا بتتكلم مع اي حد حتى سلمى وقررت انها تتجنب شقاوه ومبقتش تتكلم معاه حتى لو السلام ما بقتش تقوله خالص، وده ضايق شقاوه وعايز يتكلم معاها يفهمها هو عمل كده ليه؟ وهو حاليا قاعد قدام الورشه مستني لما فردوس تقفل علشان يكلمها، وجه الوقت اللي فردوس خلصت شغلها وقفلت باب المحل وعدت من قدامه من غير ولا كلمه منها وهو قام بسرعه وقال:- آنسه فردوس، آنسه فردوس.
فردوس مردتش عليه وداخله من باب العماره وتليفونها رن وردت على مامتها وقالتلها ان مفيش عيش للعشا، وقالتلها هترجع تشتري قبل ما تطلع وقفلت التليفون وخرجت من العماره ومشيت في الحاره، شقاوه ساب الورشه وراح وراها واتكلم بجديه:- آنسه فردوس ممكن تقفي علشان نتكلم؟
فردوس وقفت واتكلمت بتمثيل البرود:- خير ياسطى شقاوه في حاجه؟!
شقاوه مستغربش انها بتنادي باسمه المعروف لكن قال:- ماشي يا انسه فردوس بس انا لازم اتكلم معاكي شويه؛ عايز ادافع عن نفسي في اللي انتي سمعتيه.
فردوس:- تدافع عن نفسك مرة واحده؟ ليه هو انا مهمه عندك اوي كده؟ وبعدين ياسطى مالهوش لازمه الكلام خلاص، كل واحد ينام ع الجمب اللي يريحه.
شقاوه:- يا بنت الناس بلاش الطريقه دي، انا لحد دلوقتي ماعرفش انتي سمعتي ايه بالظبط؟ ومن يومها وانتي واخده مني جمب و ماتكلمتيش معايا تاني، هو انا هونت عليكي قوي كده؟
انفجرت فيه وقالت:- زي ما انا هونت عليك يا عابد، وزي ما انت خدت قرار لوحدك إنك تبعد، مرة تروح تقول لسلمى انك عايزني وقريب هتتقدملي، وشويه الاقيك قاطع معايا كلام، وبعدين اسمع منك انك مش عايز تظلمني معاك؟ هو انت لسه شايف ده دلوقتي إنك ممكن تظلمني؟ وشبكه!!!!! شبكة ايه اللي بتتكلم فيها؟ شبكة ايه اللي تخليك ما تبصش في وشي وتخليني اعيش يومين افكر فيهم طول الليل يا ترى انا عملت ايه لكل ده؟ لا وبكل ثقه بتتكلم انك هَتشيلني هم مش همي!!! هو ده كل اللي فارق معاك؟! انت واحد اناني وطماع وما بتفكرش غير في نفسك وبس ياعابد.
شقاوه بتنهيدة وجع:- أنا عارف إنك مضايقه وليكي حق تزعلي مني كمان، بس ليه شايفه انه طمع؟ طب ليه ما قلتيش من كتر حبي ليكي مش عايزك تزعلي في يوم من الايام ولا عايزك تشيلي همي وهم بكره، انا فعلاً حاليا مش هاقدر اجيب شبكه ولا اقدر اشطب الشقه بالشكل اللي كنت بتمناه، أهو على يدك كل يوم والتاني الاسعار في الطالع وانا ظروفي على قدي والقرش اللي محوشه مش هيكفي، والله العظيم انا لو عليا اكتب عليكي دلوقتي بس....!!!
فردوس قاطعته بصدمه:- شبكه تاني؟! وتشطيب شقه!!! طيب وروحي!! ونفسي!!وقلبي!!! كل دول ما لهمش لازمه عندك؟! اللي يفرق معاك الشكليات وبس؟
شقاوه بنفي:-عمري ما افكر ابدا في الشكليات يا فردوس؛ انا كل همي اني اسعدك؛ انا لو عليا عايز ابنيلك قصر واجيبلك الماس لو اقدر.
مسحت دموعها وقالت:- بس انا بحب الفضه.
شقاوه بشك:- قصدك إيه؟!
فردوس بصدق:- قصدي عايزه شبكه فضه يا عابد، وعايزه تشطيب شقه على القد، والفرش اوضة نوم وانتريه وبس، وقدام واحده واحده نجيب اوضة الاطفال.
شقاوه بحيره:- بـ،،بس...!
فردوس بحزن داخلي وعتاب:- يبقى كده انت مش شاري يابن الناس.
رد عليه بنفي ولهفه:- انااا مش شاري ؟!!! أقسم بالله أنا شاري وباقي عليكي، دانا عايزك تبقي دنيتي واخرتي.
بصت في عينيه وقالت:- يبقى نرضى بالمقسوم، و على قد لحافك مد رجليك.
شقاوه:- قصدك إيه؟
:- انا شارياك يا عابد.
رد بدقة قلب وابتسامة أمل:- بكره الساعه 8:00 بالتمام هكون قدام باب بيتك يا ست البنات.
طلع النهار وشقاوه قال للكل انه هيتقدم لفردوس النهارده وكانوا مبسوطين علشانه بالخبر الحلو ده، فردوس في الكوافير بتعمل استشوار لبنت صغيره وكان وشها منور وسلامة كانت معاها واتكلمت بتفكير :- امممم بقى الحكايه كده!!! يعني انتي كنتي قالبه وشك ده علشان تجيبي الواد شقاوه الغلبان ده على بوزه؟ اممم حريم مش سالكه برده، فينك يا بت يا حنان تيجي انا وانتي ناخد دروس عند المعلمه فردوس.
ضحكت قالت:- يا سلام هو ده كل اللي جه في دماغك ياسلمى بعد كل اللي حكتهولك؟! يا بت انا كنت واخده على خاطري قوي منه، يعني بدل ما يحكيلي همه ويشاركني كل كبيره وصغيره ويقولي على ظروفه؟ يقوم ياخد جمب مني ويبعد!! بس تعرفي ياسلمى؟ الحمد لله انك قولتيلي اروح انادي على جهاد، لولا كده؟ ماكنتش عرفت حاجه أبدا.
قامت سلامه وزادت حيرتها وحطت ايدها تحت دقنها بتفكير وقالت:- بقى ابو فصاده ده؟ يطلع منه كل اللي سمعته منك، سبحان الله انا لحد دلوقتي مش مصدقه اللي بتقوليه ده، يعني جهاد كان في البنك علشان يجيب فلوس لشقاوه؟ هو الواد ده عبيط؟!!
فردوس خلصت شعر البنوته واخدت الحساب والبنت خرجت، وهي بصت لسلمى وقالت:- ده مش عبيط يا سلمى، دي طيبه واصل طيب، تعرفي؟ جهاد علي قوي في نظري بعد الموقف ده، يعني لا يعرفنا قوي ولا احنا نعرف عنه حاجه، يقوم يتصرف التصرف ده؟ يبقى بجد ده شخص كويس قوي من جوه ومن بره.
مصمصت شفايفها وقالت بتريقه:- ايه ده؟! فردوس بتقول شعر ياولاد، انتي يا بت مش خايفه لا شقاوه يسمعك وانتي بتقولي كده على ابو فصاده؟
فردوس بضحكه:- لا ياختي مش خايفه بس اعترفي إن اللي عمله جهاد ما يعملهوش غير راجل من ضهر راجل.
سلامه سكتت ومردتش، فردوس كشرت عينيها وقالت:- غريبه!!! فين صوتك يعني مش سامعاه؟
هرشت في شعرها وبصت بعيد وقالت:- احم غريبه ليه يعني؟! وبعدين هو ساعد صاحبه انا مالي بقى؟
ضحكت فردوس وقالت:- ايه ده مين دي اللي بتتكلم؟ ايه يا بت الرقه دي، تصدقي معرفتكيش.
سلامه خبطتها في كتفها وقالت بتذمر:- انتي بقيتي رغايه ليه لوكلوك من الصبح لما صدعتينا، انجري قدامي بقى علشان نشوفلك فستان حلو كده.
فردوس:- يعني انا بأجر فساتين خطوبه وافراح للعرايس، وهروح اشتري فستان من بره؟! لا انا هوفر تمن الفستان لحاجه اهم، يلا بقى هتعرفي تعملي شعري ولا هتحرقيه؟
سلامه بضحكه:- لا تعالي اجرب فيكي، هخليكي شبه صباح ام شعر شايط ههههههه.
فردوس قعدت على الكرسي وهى بتضحك ، وسلامة فكتلها الحجاب وبيضحكوا وبدات تعملها شعرها وميك اب خفيف.
في محل ملابس.
جهاد وشقاوه وعبقرينو كل واحد بيشتري طقم علشان المناسبه ،شقاوه طلع من البروفه وكان لابس طقم بنطلون وتيشيرت وقال:- ها ايه رايكم في العظمه دي؟ جامد عليا صح؟
عبقرينو بإنبهار:- ده جامد جموده جامده، تعرف ياسطى شقاوه اللي يشوفك؟ هيقول عليك دكتور.
شقاوه ضحك بكبرياء:- كنت عارف اني كاريزما؛ وانت قولت ايه يا جهاد ومالك بتبصلي بقرف كده ليه؟
جهاد بص لعبقرينو وقال:- ايوه نافق نافق حلو كده، بقى ده شكل دكتور ولا واحد من المافيا؟
وكمل لشقاوه:- ممكن اعرف ايه اللي انت لابسه ده؟! في واحد يروح يتقدم لعروسه في طقم اسود بنطلون وتشيرت اسود؟! ليه هي كان عليها حكم وهتاخدك تخليص حق؟
شقاوه فتح بُقه وبص على نفسه وبص لعبقرينو وهمس بزهول:- تخليص حق؟!!
جهاد سابهم وراح عند الاستاند يتفرج واختار طقم كامل لشقاوه وجاب - بنطلون لاتيه وقميص كحلي وبليزر كحلي وحزام بني وشوز جملي ومنديل لاتيه.
وراح لشقاوه وقال:- اتفضل ادخل قيس الطقم ده، انا جبته نفس المقاس اللي عليك اتفضل.
شقاوه بص للطقم وقال:- تفتكر هيعجب فردوس؟!
عبقرينو:- يا عم خش قيسه الاول لما نشوف هيعجبنا احنا الاول ولا لأ!!
جهاد :- ادخل قيسه هاكون انا اخترت طقم لعبقرينو وليا.
شقاوه بيجرب الطقم وجهاد اختار لنفسه بنطلون كحلي وقميص بيبي بلو وبليزر جملي وشوز جملي منديل كحلي لون البنطلون، شقاوه خرج من البروفا وكان چان حقيقي، عبقرينو صفر بإعجاب وقال:- وعدي يا وعدي، ايه الفخامه دي ياسطى شقاوه؟
بص لنفسه في المرايه وهز راسه بإعجاب واضح وكان جهاد واقف وراه وشقاوه ابتسم لجهاد في المرايه وشكرو وقال:- مش عارف اشكرك ازاي يا جهاد انا لما شفت نفسي دلوقتي ما عرفتنيش مش ميكانيكي سيارات أبدا.
جهاد ابتسم وقال:- احنا اللي بنعمل للبس قيمه يعابد مش اللبس اللي بيعمل لنا قيمه ؛ المهم دلوقت الطقم حلو قوي عليك يلا بقى علشان ننزل ندفع الحساب.
شقاوه شاف فخامه الطقم واكيد سعره غالي وقال بحيره:- بس ده غالي قوي يا جهاد انا بقول نجيب الطقم الاولاني وامشي نفسي بيه.
جهاد:- بص بقى علشان نبقى متفقين انت رفضت تاخد الفلوس، لكن الطقم ده هديه مني ليك ومفيش نقاش.
نزلوا ودفع الحساب و واقفين قدام المحل عبقرينو عاجبه قوي طقمه وطقم شقاوه وقال:- الطقم فعلا كان جامد عليا وعليك حاجه كده فخمه من الاخر.
شقاوه بضحكه:- لا ده انا كنت فيه ولا رجال الاعمال.
اختفت ضحكه جهاد لما سمع كلمه رجال الاعمال وافتكر اكرامي وحاسس ان في طوق اتلف حوالين رقبته، استغرب لسكوته شقاوه وقرب منه وقال:- جهاد في ايه مالك؟!
انتبه جهاد وحاول يبتسم وقال:- انا كويس يا عابد بس بجد الطقم عليك حكايه، وانا متاكد انه هيعجب الكل.
عبقرينو بزهق:- مش يلا نمشي بقى إحنا هنتأخر فاضل ايه تاني؟
شقاوه كأنه افتكر وخبط على جبينه وقال:- اوف صدقوا نسيت اهم حاجه!!!!
قالوا:- نسيييت ايييه؟
شقاوه:- نسيت اشتري حاجه ادخل بيها ع العروسه ماينفعش ادخل وأيدي فاضيه.
جهاد ابتسم وقال بكبرياء:- ما تقلقش طول ما انا موجود، بص بقى اسبقنا انت على البيت وغير هدومك وظبط حالك، واستناني قدام الشقه بتاعتي ساعه واشتري الحاجه انا وحسين ونكون عندك.
شقاوه بامتنان:- والله مش عارف من غيرك كنت هاعمل ايه يا جهاد نخدمك يوم فرحك ان شاء الله.
في المهندسين.
ريناد بعد ما رجعت من الامتحان نامت ولسه صاحيه وخارجه بتفرك في عينيها من الاوضه وراحت الليفنج، رجاء كانت رايحه جايه وباين عليها القلق والضجر في نفس الوقت وسالتها ريناد:- خير يا ماما ماا حضرتك انتي بخير؟!
ردت بحزم:- خير!!!!! وهيجي منين الخير يا ريناد؟
حست بالقلق وقالت:- في ايه يا ماما حضرتك قلقتيني هو بابا كويس؟!
بصتلها بغيظ مكبت لكن رفعت راسها لفوق وقالت:- والدك كويس، لكن كل اللي بيعملوا وتصرفاته كلها مش كويسه، ازاي لحد دلوقت قادر يبعد عني ابني؟ مفيش حد بيعمل كده.
ريناد اضايقت جدا من اسلوبها وردت عليها:- ماما حضرتك عارفه ان بابا بيعمل كل ده علشان مصلحه جهاد، هو خايف عليه، ومفيش في أيدو حاجه يعملها اكتر من اللي عمله.
رجاء بجديه:- غلط،، والدك كل اللي بيعمله ده غلط، ومش من مصلحه ابني انه يبعد عني، انتوا ازاي جاتلكم فكرة ان جهاد ابني عايش دلوقتي في أمان؟ انا اكتر واحده عارفه ابني جهاد متربي بين إيديا انا، ومستحيل يبعد عني أكتر من كده.
ردت ريناد بخنقه:- يا ماما ارجوكي سيبي بابا يتصرف وجهاد كل يوم والتاني يكلمنا ويطمنا عليه، وهو قال لحضرتك بنفسه انه مبسوط واتعود على العيشه هناك، يبقى ليه كل القلق ده.؟
نهرتها رجاء:- انتي معايه ولا معاه يا بنت انتي؟ انا امك واكتر واحده عارفه مصلحتكم كويس، وانا مش هاسكت عن اللي بيحصل ده أكتر من كده، ولازم اعرف العنوان بالظبط ولازم حل جذري واروح ارجع ابني لبيتي من تاني ومستحيل اخليه يبعد عني بعد كده، انا واثقه انه مش عارف يتأقلم مع الناس ولا هيعرف يتعاش مع اي مستوى ادنى منه.
ريناد زاد تحملها وانفجرت فيها وقالت:- ومين السبب في كل ده!!! هااااا!!!!! مين السبب في ان اخويا جهاد مش عارف يعيش بره البيت ده ولا عارف يكّون صُحاب ولا عارف حتى يحب ويتحب؟
مين اللي حبس جهاد في قوقعه نعم وحاضر؟ مين السبب اللي خلى جهاد متحاصر بين اربع جدران والسجان واقف على اول الباب مراقبه؟ مين اللي وصل جهاد للسلبيه اللي هو فيها دلوقتي؟ وفي أول مصيبه تقابله هرب ومعرفش يتصرف؟ مش حضرتك!!!! ارجوكي سيبي جهاد يعيش حياته، يشق طريقه، سيبيه يشوف ناس تانيه خليه يطير في السما وتكبر جناحاته بلاش تقصقصي ريشنا أنا وهو اكتر من كده، بلاش تخلينا كارهين حياتنا وسنينا اكتر من اليوم اللي قبله، انا كرهت نفسي وكرهت الدنيا، دي مش عيشه دفنتينا تحت رجليكي، ربيتينا زي السيد والعبد بالظبط، انا تعبت، وجهاد تعب وكل ده بسببك،، بسببك انتي وبس، سيبينا في حالنا بقى حرام عليكي ابعدي عن جهاااااد.
حل الصمت بينهم، الأم مصدومه والبنت دموعها نازله وبتنهج، لكن الرد الوحيد كانت صفعه قويه من رجاء على وش ريناد، والشاهد الوحيد كان نضال اللي واقف عند باب الشقه.
مساءاً
في شقه فردوس تحديدا في اوضتها كانت سلمى وحنان بيظبطوا ليها الفستان وكانت لابسه فستان لونه كافيه هادي مع ميك اب خفيف، وحنان لابسه فستان وردي لايق عليها، اما سلامه لابسه بنطلون جينز وسويت شيرت ومش حاطه اي ميك اب، حنان اتكلمت بفرحه:- جميله قوي يا فردوس زي القمر الفستان هياكل منك حته.
فردوس وشها كان احمر ومتوتره وقالت:- تسلمي يا حنان منحرمش منك ابدا.
حنان لو بُقها وقالت:- وانتي يا ست سلمى؟ مش كنت لبستي فستان هو احنا هيكون عندنا فرح كل يوم يعني؟
سلامه بجحت وقالت:-ما لكيش دعوه انا البس اللي يريحني، وبعدين أنتي مش لبستي؟ يبقى خلاص ريحي علشان تستريحي.
حنان بغيظ:-ابو شكلك يا شيخه قاموس في الرد ماعرفش اخد منك حق ولا باطل اعوذ بالله، كان نفسي اشوفك بفستان زي ال......
فردوس لحقتها قبل ما سلامة تشد عليها وقالت:- بس بس انتي وهي مفيش يوم تفوتوه من غير خناق؟ وبالله عليكم بلاش تتخانقوا في يوم زي ده.
وبصت في الساعه وكملت بقلق:- هو اتاخر كل ده ليه بس؟
سلامة كمان بصت في الساعه وقالت:- لسه ربع ساعه مش هو قالك هيشرف الساعه 8:00 خلاص اصبري،باقولكم ايه انا هاروح اكل لقمه على السريع واطلع.
فردوس بدهشه:- انتي هتسيبيني دلوقتي وتروحي تاكلي؟
سلامه:- يا بت جعانه انا من العصر وانا على لحم بطني.
فردوس بضجر:- يوووه، طيب امي عامله اكل جوه روحي كلي وتعالي بسرعه.
سلامه بعناد:- لأ امي عامله طاجن باميه هاروح اضربلي خمس ارغفه على الطاير وراجعه يلا سلام.
سابتهم وخرجت بسرعه وهما بيضحكوا عليها فردوس ضمت ايديها لقلبها وقالت بتمني:- يا رب تمم فرحتي على خير.
سلامة نازله على السلم وشافت شقاوه واقف قدام شقة جهاد ومعاه عبقرينو وصفرت بإعجاب وقالت:- او ماي جاد, يا الهي ما الذي تراه عيناي؟ مش معقول، ايه ده يا شقاوه ايه الشياكه دي ايه الاناقه دي؟
شقاوه لف حوالين نفسه بضحكه وقال:- ها ايه رايك يا بت يا سلمى أعجب؟!
سلامه بإعجاب:- يابني اقسم بالله انا ما عرفتك في الاول، بس لأ شياكه شياكه يعني، دي البنت فردوس هيغمى عليها اول ما تشوفك.
شقاوه رفع ايديه للسما وقال:- يا رب بس يعدي اليوم ده على خير.
عبقرينو بتذمر:- وانتي يعني نازله بعين واحده؟ ما شوفتيش غير اسطى شقاوه وبس؟ هو انا مش موجود هواء؛؛؛ بخار ولا علشان هو العريس يبقى راحت علينا؟!
سلامه بصتله وفتحت عينيها وقالت بدهشه:- ميييين!! الواد حسين اخويا المعفن بتاع الحلبسه مع الخدامين؟! والله ما عرفتك الا من صوتك ايه يا واد الحلاوه دي؟ يخربيتك قمر وسكر، ده انت هتتشقط النهارده.
شقاوه ضحك على تذمر عبقرينو وهو بيقول:- خلاص ياختي بعد إيه؟! ما هى كده كده معروفه يعني، العريس هو اللي هياكل الجو في الليله دي كلها،اوعدنا يا رب.
سلامه بفضول:-سيبك أنت ياض من كل ده وقولولي، ايه اللبس ده وجبتوه منين؟ أنا أول مرة اشوفكوا بالمنظر ده؟
عبقرينو بيعدل هدومه بكبرياء وقال:- إيه رأيك؟ علشان تعرفي أننا مش وش حواري، والباشمهندس جهاد هو اللي أختار لينا الشياكه دي كلها.
سلامة رفعت حاجبها وقالت:- جهاد؟ اممم.
وكملت:- آه وماله شغال برده،المهم انتوا واقفين كده ليه؟ بابا واخواتك البنات فوق ياشقاوه مستنينك.
شقاوه :- اصل مستني جهاد يشتري ليا الزياره اللي هادخل بيها على نسايبي.
كشرت عينيها وقالت:- هو بسلامته لوحده؟ وهيعرف يجيب حاجه ده؟
حسين رد وقال:- لا انا كنت معاه بس سبقته علشان البس، هو كده كده لبس في المحل وظبط نفسه وشويه ويوصل.
سلامة بتريقه:- بالسلامة، طيب انا هاروح البيت ثواني و طالعه، تكون انت طلعت ياشقاوه وفتحت كلام مع حماتك ويا رب ننجز علشان الست بتنام بدري.
سابتهم وراحت على البيت وشقاوه نفخ بتوتر وقال:- يا ترى أتأخرت ليه ياعم جهاد.
جهاد طالع على السلم وشايل بوكيه ورد وعلبه شيكولاته وكان الورد شيك، وصل عند شقاوه اللي اتنفس الصعداء لكن استعجب من جهاد لانه مش شايل حاجات غير الورد والشوكولاته بس؟ لكن قال لنفسه:- يمكن الحاجه تحت وعيال الحاره هيطلعوها.
جهاد لابس ومتشيك وكأنه عريس وقال:- مساء الخير وصلت على الميعاد بالظبط.
شقاوه قاله بلهفه:- ايوه ع المظبوط تمام، بس فين بقى الزياره والحاجات اللي جبتها؟
جهاد ناوله الورد وقال:- اتفضل يا سيدي اجمل باقة ورد للعروسين.
بص للورد وكمل وقال:- ماشي فين باقي الحاجه؟!
جهاد بتساؤل:- حاجة إيه؟ ما هو ده بوكيه الورد ومعاه شوكولاته.
شقاوه بصدمه:- فين الفاكهه فين الموز والتفاح!!! فين العنب والجوافه!! فين الجاتوووووه.
جهاد بتكشيره:- ليه كل ده؟! المفروض العريس بيروح بيبوكيه ورد وعلبة شيكولاته.
شقاوه جز على اسنانه:-شيكولاته!!!!!! هو اليوم ده مش هيعدي حلو ولا ايه؟ يا عم انت انا قولتلك عايز اجيب حاجات والذي منه، اللي هي يعني الفاكهه والجاتوه، ورد ايه بس وزفت ايه في الليله دي؟
جهاد بيأس:- فاكهه!!!! ليه هو انت رايح لاختك؟ اطلع بس ومش هتندم.
شقاوه بتصميم:- اطلع ايه؟ عتلاق ما يحصل، دول ياكلوا وشي، دي الحاره كلها بكره الصبح على الريق قبل حباية الضغط هتكون عارفه إن شقاوه راح قرا فاتحه من غير كيس فاكهه ولا كيلو تفاح.
حط الورد في ايد جهاد وقال بغيظ:- امسك يا عم امسك يا رب الاقي اي فكهاني على الناصيه دلوقت.
ونزل بسرعه وهو بيقول:- حصلني يا عبقرينو.
نزل وراه بسرعه وجهاد واقف مكانه ومش مستوعب ومسك باقة الورد وعدل النضاره وقال بتعجب:- فاكهه!!!! فاكهة ايه في يوم زي ده؟ ومط شفايفه وقال بعمليه:- فاكهه حلو جميل واقتصادية برده.
بعد دقايق سلامة خلصت اكل وطالعه بسرعه من باب الشقه بتلبس الشوز وهي مستعجله وبتقول:- يخربيت الكرش اللي انا فيه زمانهم قراوا الفاتحه وخلفوا شفتوره وريعو.
بتلبس الفرده التانيه باستعجال وهوب اتزحلقت ووقعت، جهاد فتح عينيه بدهشه و ساب الورد على السلم وجري عليها وقالت بلهفه:- آنسه سلمى على مهلك هاتي ايدك.
سلامه حاولت تتعدل وحطت ايدها في ايده علشان تقوم واتعدلت وهي بتنفض في هدومها وقالت من غير ما تبصله:- يخربيت كده هو اليوم باين من اوله كنت هتكربس على وشي.
جهاد:- انتي كويسه يا آنسه سلمى؟
بتنفض ايدها وبصتله وهى بتتكلم:- اه تسلم يا ...........!
فتحت عينيها بدهشه وجابته من اوله لاخره بانبهار حقيقي وقالت جواها:- جهاد!!!! يخربيتك في الكحلي، ايه الواد ده؟ ده غلب شقاوه بمراحل لااااء بيوتفل بيوتفل يعني.
جهاد:- آنسه سلمى أنتي كويسه دلوقتي مش تخلي بالك؟
انتبهت وقالت:- اء، اه انا كويسه تمام، تمام وعادي يعني بتحصل هو انت ما وقعتش قبل كده؟ ده انت حتى بوست السلم بتاعنا سلمه سلمه.
هز راسه بيأس منها لان ما فيش فايده وقال:- فعلاً مفيش فايده، اوكي يا آنسه سلمى انا عارف اني وقعت قبل كده، لكن دلوقتي انا بطمن عليكي.
سلامة:- انا قولت تمام هى قصه؟ وبعدين فين شقاوه هو انا اطلع ما الاقيش حد موجود ولا ايه؟
جهاد :- شقاوه راح يجيب فاكهه موز وتفاح لزوم الشيء يعني.
سلام لوت بقها:-ومالك بتقولها كده ليه؟! زي ما يكون هيجيب ليمون ويعصروا عليك.
جهاد من بين اسنانه:- استغفر الله ،ولا حاجه، ولااا حاااجه انا بس جبت ورد وماعجبش شقاوه.
سلامه بصت حواليها:- ورد؟!!!! فين ده!!
جهاد بفرحه:؛ ثواني هاجيبهولك.
راح وجاب البوكيه وقالها:- اتفضلي هو ده.
سلامه:- مسكت البوكيه وابتسمت وقالت بإعجاب وحب:- الله؛؛ حلوه قوي ده شكله جميل والوانه تهبل.
جهاد بفرحه:- عجبك؟
سلامه بدون وعي:- حلوه قوي وحبيته موت.
جهاد بدقه قلب وتوتر:- خلاص اعتبريه ليكي.
سلامه:- نعععععمممم؟
جهاد بنفاذ صبر:- يا ستي استهدي بالله، انا كنت جايبه لعابد ومعجبوش ومش عايزه، يبقى انتي اولى بيه، بدل ما حد ياخدوا اتفضلي.
سلامه: اااه اذا كان كده ماشي.
جهاد ابتسم ومستنيها تقوله شكراً لكن مقالتش وسألها :- مش هتقوليلي حاجه؟
سلامه:- حاجة إن شاء الله؟
جهاد:- أحم، يعني زي شكرا وكده!!
سلامه بجديه:- ليه هو انت كنت جبته علشاني؟ ولا مشيت وحفيت وجبته؟ ده انا واخداه يعتبر بواقي ومرتجع.
جهاد حط ايدو ع ودنه من صوتها:- يا ساتر يا رب سارينا بتتكلم!!! اوكي يستي انا اللي باقولك شكرا انك قبلتيه مبسوطه كده؟
سلامة بتكبر:- العفو يانجم، ويلا بالاذن في عروسه فوق عاوزين نزغرتلها.
سابته ومشيت وسط ذهول جهاد اللي مش قادر يفسر شخصيتها.
بعد لحظات
فردوس جريت بتفتح الباب وكان شقاوه واقف ومعاه الجاتوه وجهاد شايل اكياس الفاكهه، قلبها دق بقوه من جماله ومش مصدقه ان اللي قدامها ده الاسطى شقاوه البسيط اللي حبته ده لابس ولا زي بتوع السيما، شقاوه كمان شافها في فستان الخطوبه قلبه ده جامد وحبها اكتر من أي وقت فات وقال:- مساء الخير يا آنسه فردوس!
فردوس بتوتر:- مساء النور يا سي عابد. وفضلوا واقفين ساكتين جهاد وكزو في جمبه، شقاوه انتبه وقال:- آه احم ممكن ندخل ولا إيه؟
فردوس هزت راسها بارتباك وشاورت ليهم يتفضلوا، دخلوا وجهاد شايل الفاكهه ومش عارف يحطها فين، فردوس كانت عينيها على شقاوه وشياكته وهو بيسلم على العيله وانتبهت لجهاد وشاورتله يوديها المطبخ، جهاد راح المطبخ وحط الاكياس ومستغرب الاجواء عندهم كانهم كلهم عيله واحده.
الكل قاعد وحليم بدأ في الكلام وطلب ايد فردوس لشقاوه واتفقوا على كل حاجه بعد موافقتها والاتفاق كان في حدود المعقول واللي يمشي الجوازه في ابسط الحدود ومحطوش اي عوائق قدامهم تعرقل الجوازه ،وان النهارده قراية الفاتحه وبعد شهرين من تاريخه كتب الكتاب والفرح.
الساعه تلاته الفجر.
جهاد شاور ليهم وزعق لأول مرة:- انت لازم تمشي من هنا حالا والا هابلغ الشرطه.
ضحكوا عليه وقالوا:- شرطه؟!
:- انت عبيط بقى؟!
ودلقوا عليه البنزين و ولعوا في جهاد