قصة قوة الضمائر
البارت السابع 7
بقلم طارق اللبيب
طبعا" ستو بقت تودي وتجيب .. ياربي الزول ده فعلا" جاي للعزاء بس .. ولا جاي يقلب لي المواجع القديمة؟ .. ستو اصلا" بمجرد ما زواجها تم من الخير ود يوسف .. عليه رحمة الله .. دفنت الشي الجواها وتاني ما اتلفتت ليهو ابدا" .. وبعد ما اتزوجت بي سنة بس .. صديق ود السيد اتزوج .. وهسي بي اولادو ماشاء الله .. المهم الافكار جواها عاملة عمايل ..
ومرات تقول ياربي لو الزول ده .. كان عندو نية زي دي..
انا اتصرف كيف ؟ تاني تقول بري يايمة .. مالي ومال حياة الضرات .. اقعد في بيتي واربي اولادي .. مالي ومال الجهجة والكلام الماياهو ..
ومرت الايام وجدو شغال في الصالون .. يوم هو في الصالون ومركب تلفونو في الشاحن .. اتصل عليهو صديق في تلفونو .. رد عليهو .. كيف الحال يا عم صديق ..
قال ليهو : والله تمام .. اسمع يا يوسف انا في شارع الوادي .. قريب لي مقابر احمد شرفي .. وريني انت وين؟ .. انزل اسلم عليك واخد خبرك .. وصف ليهو .. بعد عشرة دقايق وصل .. سلامات وبتاع ..
قال ليهو : اها كيف الامور عندكم؟ .. والله يا يوسف انا وضعكم ما مطمني .. وماقادر اسافر واخليكم بالحالة دي ؟ قال ليهو : والله يا عم صديق تسلم .. لكن اطمنك .. والله الوضع تمام .. والامور ماشة زي الساعة .. ياريت اصحاب ابوي كلهم لو زيك ..
قام قسم بتاع الصالون قال ليهو : يايوسف .. انت مالك .. عامل فيها عفيف كدا .. يعني الزول مادام صاحب ابوك .. ماتحكي ليهو قصة الديون الجبرتك تخلي جامعتك وتشتغل .
يوسف قال ليهو : لالا المواضيع عادية يازول .. والديون بسيطة مافي داعي .. نقلق بيهو ساي .. هو اساسا" شكلو شفقان من وضعنا .. بعدين يا قسم ياخي مالك انت .. السألك منو؟
المهم صديق ماحاول يضغط على جدو .. عشان يعرف منو التفاصييل .. وجابو ليهو كبابة شاي شرب وطلع ..لمن بقى قريب للشارع كورك لي قسم .. قسم مشى ليهو .. وجدو يحلق ويعاين ليهم بي طرف عينو ..
صديق قال ليهو : خلاص ياقسم اديني رقمك .. انا بعيدن بتصل عليك لاني اتاخرت .. على الزول الماشي ليهو .. اداهو الرقم وصديق فات ..
بعد قسم جاء راجع .. قال لي جدو : ياخي الراجل ده شكلو زول شهم وكريم .. هسي انت من جيت اشتغلت عندي هنا .. لافي زول اتصل عليك لافي زول جاك .. زول جاك بي نفسو .. وشكلو داير يقدم ليك مساعدة .. انت عامل فيها عزيز النفس ؟؟
جدو قال ليهو : هسي هو ناداك لي شنو؟ ..
قال ليهو : شال مني الرقم ..
جدو قال ليهو : شكلو عايز ياخد منك تفاصيل الحاصل .. اقول ليك حاجة ياقسم ؟ .. والله الزول ده من اول يوم شفتو .. قلبي اتفتح ليهو .. زول تحس بيهو نضيف من جوة .. واي كلمة تطلع منو تحس بيهو صادق فيها .. والله يخجل الزول .. هسي انا والله مستحي منو ساي .. ماعايزو يشغل بالو بينا .. نحن الحمد لله وضعنا المية المية ..
قسم قال ليهو : انا عارف انت ما محتاج لزول لكن يامعلم .. الديون دي والله تجيب الهم .. بس طيب لو الزول ده هسي ساهم معاك ساي بريحك ..
قال ليهو : انت داير الناس تساهم ليه؟ .. ماتساهم معاي انت ..
قال ليهو : والله تستاهل .. لكن انت عارف انو الوالدة بتتعالج بالملايين .. وانا والله هسي ماقادر اكفي مصاريف العلاج .. ربك يهون القواسي ..
بالليل شديد كدا .. صديق ود السيد اتصل على قسم بتاع الصالون ..لقاهو ماشي على البيت ..
قال ليهو يا قسم : ناس يوسف ديل انا في مقام ابوهم .. وامرهم بهمني شديد .. عليك الله اي حاجة بتخصهم كلمني بيها .. عشان على الاقل انا اقدر اعمل ليهم حاجة .. لاني قبيل شفتك انت قلبك عليهم .. وطبعا" يوسف شايل طبعة ابوهو الانفة وعزة النفس ..
قسم قال ليهو : والله الناس ديل حسب ماحكى لي يوسف .. عندهم زول طالب قروش من ابوهم .. وبعد وفاة الوالد .. جا ضايقهم لغاية ما وصلهم المحكمة .. المهم بعد جرجرة هسي بسددو ليهو كل شهر مليون .. وفي الاول يوسف امو كانت بتعمل الكسرة .. لكن هسي شغلها قلا ..
المهم يازول قسم بتاع الصالون كشف لي صديق ود السيد كل الحاصل في اسرة ناس جدو ..
وقال ليهو : عليك الله لو عندك اي حاجة .. عايز تقدمها لله الناس ديل هم في حوجة ماسة والله .. على الاقل الديون دي بتحتاج لي مساعدة .. لانها قريب 13 مليون .. عشرة من الزول ده وتلاتة مليون وشوية من ناس تاني ..
قال ليهو : المشكلة ياقسم .. الناس ديل مابقبلو مساعدة من زول .. لا الزول ده ولا امه .. امو دي ابوها الله يرحمه
وعمدة بلد .. مستحيل تقبل مساعدات من الناس .. لكن يازول الفيها خير ربنا يسويها .. بس انا طالب منك طلب يا قسم الاتصال ده يوسف مايعرفو ..
قالو : جدا" يا حبوب سرك في بير ..
ستو طبعا" ياجماعة الحمل ظهر في صحتها .. مع تعب الشغل بتاع البيت .. والهم بالمعيشة البقت شبه مستحيلة لي ناس زي ديل ..
يوم جاتها حياة جارتها في البيت .. بتونسن في الحاصل .. والسوق بتاع الكسرة البقى كعب ..
ستو قالت ليها : والله يا حياة انا مقتنعة انو الارزاق بيد الله ربنا رازق الطير والوحش .. مابقسى عليهو يتكفل بينا نحن .. عشان الراجل مات .. وبقى ماعندنا كبير في راسنا ..
قالت ليها : والله ياستو .. حتى الرجال بقو يتهربو من المعيشة .. محاسن جارتنا دي .. راجلها قال ليها : انا ماقادر اعيشكم انتي واولادك وادفع حق ايجار البيت ماقادر .. امشي اهلك .. والمراة اهلها في اخر الواطة .. في جيهة النيل الازرق مع الحدود الجنوبية .. واهلها كلهم ماتو .. كل يوم تحنس فيهو .. بتقول ليهو اصبر علي انا ماعندي حتة امشي عليها ..
ومرات اولادها يومين ماياكلو .. والله نحن قاعدين نودي ليهم الاكل .. ابوهم يقعد تلاتة اربعة يوم بره البيت ..
ستو قالت ليها : حقيقة قالو البشوف مصيبة الناس تهون عليهو مصيبتو .. نحن والله نحمد الله من اول يوم مات فيهو الخير .. لي تاريخ اللحظة دي .. ما حصل احتجنا لزول.. ولا فوتنا وجبة ولابتنا القوا .. ماكلين وشاربين .. وساكنين في ملكنا .. اكان مو الراجل ده الجا ضايقنا ده ماعندنا اي مشكلة ..
لكن والله محاسن حننتني ياحليلا يا حياة .. امانة ما طيبة .. ربنا يكون في عونها ..
قالت ليه : ا اي والله محتاجة للدعوات ..
قالت ليها : يا حياة انا طالبة منك طلب .. انا في عواستي البعوسها دي برسل ليهم كسرة ورغيف .. حق اليوم .. ما مكلفني حاجة .. انتي بس اعملي ليهم ملاح باقل تكلفة .. ان شاء الله تسوي ليهم عدس .. المهم مايقعدو جيعانين .. الشفع الصغار ديل ..
حياة قالت ليها : والله دي احسن فكرة .. وانا موافقة يا ستو ان شاء الله ربنا يبارك ليك في عملك ياستو ..
قالت ليها : يازولة قليلا رايح وكتيرة رايح .. وانا طرقات الكسرة البتأكلهم ما مؤثرة معاي ..
وستو بقت من اليوم داك تكلم الحبشية تقول ليها .. قبل ماتودي الكسرة لاي دكان .. تغشي ناس محاسن تديهم الكسرة الفي الكيس الكبير دي ..
وحياة بترسل حلة الملاح من الصباح بفطرو وبتغدو محاسن واولادها .. الحمد لله مشكلة واتحلت ..
شوية كدا جدو بقى يتاخر .. وقال لي امو : اليومين دي الشغل ماشي معانا كويس .. والصالون بقى يوميا" مزدحم .. والحمد لله النسبة بتاعتي زادت .. وانا بقيت خطير في الحلاقة .. حتى العرسان بقو يحلقو عندي ..
قالت ليهو : ماشاء الله .. واللهاها الليلة جبت كم ..
قال ليها : 140 ..
قالت ليهو : احمدك يا الله .. ماقصرت معاي ياربي ..
قالت ليهو : انا من يوم بقيت اطلع من كسرتي شي لله .. عارفة ربنا بفتحها علي .. اصلو قالو البدي ربنا بديهو والبمنع ربنا بمنعو ..
قال ليها صاح والله يا امي .. ربنا يعينك ويقوي يمينك ويبارك في ايامك .. والله بقيتي لينا ام وابو .. ربنا يبارك فيك ..
اول من قال ليها كدا اتذكرت جية صديق ود السيد .. وقالت جواها كلام .. قالت ( هسي انا معقول اقبل بي صديق .. واحرم اولادي .. الحاسين انو انا امهم وانا ابوهم؟؟ مستحيل اقبل .. تاني ضحكت براها .. قالت هي ياستو انتي هسي التقول صديق جا طلب يديك .. هسي تلقيهو ولاخاتك في حساباتو) ده كلو كلام بينها وبين نفسها .. المهم
مر شهر تاني وضربو للامين يجي غاشيهم يوم الجمعة .. عشان يشيل قروشو الشهرية .. وبرضو الامين جاء راكبة معاهو المراة الكبيرة ..
وفي التلات مرات الجات المراة دي ستو طبعا" ما شافتها لانها .. مابتزل من العربية .. وجدو ماحصل كلم امو قال ليها الامين بجي راكبة معاهو مراة كبيرة .. تمام؟ ..
المهم سددو لي الامين مليون فضل ليهو تسعة .. الحمد لله الامور ماشة تمام ..
بعد يومين من الكلام ده .. نصت نهار كدا باب ناس ستو دقه .. وجدو كان في الشغل .. وستو كانت بتعوس .. لمن الباب دقة كتير ستو نفضت يدها من العواسة .. وقامت مشت وقفت جمب الباب .. والباب مقفول .. ومن جوة قالت مين ؟
قالت ليها : انا حاجة فاطمة .. افتحي لي الباب .. طبعا" ستو ماعرفت حاجة فاطمة دي منو؟ ..
قالت ليها : معاك منو؟
قالت ليها : مامعاي زول براي .. على اساس انو المراة الحابس مابتقابل الرجال .. ستو كانت خايفة يكون معاها راجل ..
دخلت المراة الكبيرة .. وسلمت على ستو .. وهي داخلة كدا عينها وقعت على ملكة .. قاعدة زي الملاك من الجمال .. وطبعا" ما ظاهر انها مابتقدر تقوم براها .. الا يدرجوها وكدا .. والكولة في رقبتها .. وطبعا" ستو مستغربة في المراة دي منو ياربي؟ ..
قالت ليها : اتفضلي انا عندي صاج مولع .. النطفيهو واجيك .. مشت اخدت ليها عشرة دقايق وجابت ليها عصير للمراة .. المراة قالت ليها : انا عندي سكري مابشرب السكر .. اديني موية ساده .. جابت ليها الموية وقعدت معاها .. الغريبة المراة دي ماعزت ستو في راجلها .. وده الزاد استغراب ستو من الموضوع .. دي منو ياربي المراة الجاياني وحتى البركة فيكم ماقالتها لي ..
بدت المراة كلامها بسؤال ..
قالت ليها : انا مابعرفك .. وانتي مابتعرفيني .. لكن جاية اسألك سؤال ..
انا جيت الحلة دي تلاتة مرات .. وكل مرة بشوف راجل سايق ليهو بوكسي دبل قبين .. بدخل في بيتكم ده .. وبياخد ليهو عشرة دقايق ويطلع .. ده منو وعايز منكم شنو؟
قالت ليها : ههه الامين ؟ .. ده الامين ياحجة .. الامين كان صاحب زوجي .. زوجي اتوفى ليهو شهرين وشوية .. والراجل ده كان عايز قروش من ابو اولادي .. وبعد الوفاة طوالي جانا قال داير قروشو .. او بمشي المحكمة .. المهم حكت ليها الفيلم بتاع الامين بي تفاصيلو المملة .. المراة قالت ليها : سبحان الله يا الامين ..
انتي اسمك منو يابتي ؟؟؟ ..
قالت ليها : انا اسمي ست الجيل .. والبت القاعدة جوة دي ياها بتي .. الكانت في الحادث .. والولد هسي مافيش مشى الشغل بتاعو الفي الصالون .. وجامعتو السنة دي راحت عليهو بي سبب الامين الله يسامحو ..
لكن ماقلت لي .. انتي منو ياحجة؟؟ وليه مهتمة بي موضوع الراجل ده كدا ؟؟ ..
قالت ليها : انا امه .. انا ام الامين ياست الجيل .. وكل مرة يجي هنا بجيبني معاهو .. بكون راكبة معاهو في البوكسي .. انا عندي كسر في يدي .. ومتابعة مع بصير ..جمبكم بي جاي .. وكل ما اجي بيهنا هو بغشاكم .. بٍسأله بقول ليهو البيت البتدخل فيهو ده عندك فيهو شنو؟ بقول لي شغل يا امي شغل ..
وانا كنت شاكة في الموضوع .. وقلت شغل شنو الفي البيوت .. قلت لازم امشي بي نفسي .. اشوف الحاصل شنو ؟ لكن وحات الله الخلقني ياست الجيل .. انا الليلة الامين ده مابخليهو .. الامين ده من الليلة لاولدي ولابعرفو .. واحد كلب .. وربنا نازع الرحمة من قلبو .. اعوذ بالله .. عشان كدي ربنا اصلو ماقسم له بت الحلال .. اي بت يتقدم ليها تقول : ماني دايراهو ..
قالت ليها : عليك الله يا الحاجة .. ماتعملي معاهو اي شي .. هو هسي ماقصر معانا .. كونو يمهلنا نسدد ليهو كل شهري براها فايدة .. وامورنا ماشة كويس .. وانا والله لو عارفاك انتي امو والله مابحكي ليك .. لكن قايلاك غريبة وخفتك تشكي فينا وفي دخلتو لينا .. الامين بطالب بي حقو ياحجة والقال حقي غلب ......