رواية المشردة
الفصل الرابع 4 والخامس 5
بقلم مجهول
مالك ي عزو مع البت!
دي كانت دنيا ...
)دنيا من اكبر بياعات الشاي بتشتغل في منطقة توتي في اطراف ضفاف النيل...عمرها في الثلاثينات كده ...والسمعه نقط نقط )
عزو :وييين ي حب ! ليكي كم يوم محاربانا !؟
دنيا : انا حاربتكم ولة انتو !؟ بضاعتنا بقت م نافعه ولة شنو !؟
)اكيد عرفتو البضاعه شنو !؟ طبعآ البضاعه عبارة عن عرقي و حشيش عافاكم الله )
عزو : مشغووول ي قلب
والشغل متشعلق لي ف راسي
وزي م انتي شايفه الشباب ديل عايزين انضباط ...
بالذأت البنات...وقام حمر لي نون ....
دنيا : بي مناسبة البنات انا جأياك ف موضوع
عزو :خير ي قمر ...اتفضلي
دنيا : عايزه لي مزتين يشتغلو معاي...وعاينت لي آمال و نون ...وقالت : وشكلي لقيت طلبي...
عزو عاين لي نون وآمال ..الفكرة م عجبتو لانو الاتنين ديل احلي بنات عندو...بالذأت نون...
بس ي قمر انتي عارفه اني محتاجهم ...
دنيا مدت بوذها لزوم زعلت وكده : خلاث م حنك ...انسي اني طلبته .الطلب دأ منك ..
عزو : خلاص خلاص انتي تأمري...
نون : دقيقه دقيقه ..انت بتبيع فينا !؟
عزو : هوي ها ! انتي تسكتي خالص..م عايز اسمع منك ولا كلمه ..عشان كده م تكتري حروف وهوس!
نون : لا م بسكت وم ماشه لا مع دنيا ولا آخرة ....
آمال مسكتها من يدها عشان تسكت بس نون ابت : لالا ي آمال ..انا تاني م بسكت نهائي علي حقنا لا لي عزو ولا لأي زول !
عزو غضب منها وعيونو حمرو ونزل ضرب في نون ...
آمال ودنيا حاولو يحجزوهو بس بدون فايده ...
نون نزفت كتير من انفها ...وكانت بتبكي...
في اللحظه دي نورس جأ ...( نورس ....
20سنه ...
واحد من المشردين التحت رحمة عزو ....
بس كان بكره عزو شديد...
نورس مغرم بي نون حد الجنون وما برضي فيها نهائي...
وسبب انها تكون نقيه وطأهرة لي هسع بيرجع لي نورس...
لانو كان بحميها بي روحو.)
نورس هجم علي عزو وفك منو نون ..ونزل فيهو ضرب...نورس كان شهم بالجد...بالرغم من قوة عزو الا انو نورس قدر يتغلب عليهو ...
ف النهايه عزو لز نورس بعيد ومشي من المحل ..دنيا لحقتو ...
نورس مشي لي نون الكانت راقده في كرعين آمال ...: نون ! انتي كويسه !
ارح أوديك المستشفي ..الله يسخطو الراجل الماعندو قلب دأ¡
م معقول يتقاوي علي النسوان ¡
آمال: عزو عايز يدفعنا لي دنيا نشتغل معاها ف الشاي
نورس : لالا نهائي ..دنيا بتغطس حجركم لانها شغاله مع رجأل.
آمال عضت علي شفايفها وقالت : انا م مشكله بس نون المشكله..بت عفيفه وانا خايفه عليها ..
نورس : عشان كده دنيا الشغل معاها م كويس..
آمال : بس ي نورس انا شايفه احسن نمشو معاها ...الاوضاع هنا م تمام ...
نورس : كلامك صح ...بالذأت سومه ..انا خايف عليها ..البت جسمها ضعيف..
هنا نون بكت بحرقه..وآمال كمان..
نورس : مالكم !
ف شنوو!
وصحي سومه ووين!
آمال : سومه ماتت الليله الصباح ي نورس !
نورس خته يدينو في راسو واتشهود...
في اللحظه دي سمعو ليهم كواريك !
ي ربي دي كواريك شنو !؟
والحصل شنو !؟
وهل نون حتمشي مع دنيا !؟
م معروف.....
يتبع.....
(5)
وقت جرو جيهة الكواريك ..لقو المشردين متجمعين ...وفي نصهم زول راقد ... +
نون : ف شنو !
مالكم !؟
نورس زح الناس و فتح الدايرة ...كان عباس راقد وم بتحرك ...( عباس واحد من المشردين ..عمرو 14 سنه . ..)
نورس : عباس مالو !
واحد رد ليهو انو عباس م بتحرك ..و م بيتنفس كمان!
نورس خته يدو في رقبة عباس عشان يقيس النبض..وللأسف لقاهو واقف!
نورس : للأسف شكلو ميت..
عباس م كان واضحه فيهو أي أثار للضرب ..عشان كده عرفو انو مات بي مرض!
آمال : يومي واحد فينا بموت!...لغاية ما نكمل يعني!
نون قالت وهي بتبكي : الخوف يكون دأ مرض وبائي ! تبقي مشكله والله !
نورس : لالا دا بس من الجوع وعدم الراحه والحوامه ف الشمس ...
آمال : لازم الجثه تتشرح عشان نعرف السبب
نورس ضحك لما بكي ...
بعدها قام مشي منهم...
دفنو عباس ...و المغرب جأ ...
قعدو كلهم في دأيرة وكانو قدأمهم مولعين نار
آمال قالت لي نون : نحن لازم نمشو من هنا
لو قلنا نقعد هنا حنموت مية موته ...لو ما موتنا بي سبب الجوع غبينه ساي حتكتلنا ..
نون ما ردت ..بس دموعها نزلن وقامت رقدت في كرعين آمال ...
نون شالت هم كبير ..ما لي نفسها لالا ..
شالت هم لي الشفع اليومي بموتو وما عارفين ليهم سبب
مش كفايه ولدوهم في الشارع!؟
مش كفايه انو جزء منهم ما عندو اهل !؟
مش كفايه انو ما دخلو مدأرس !؟
مش كفايه انهم بنومو في الارض!
مش كفايه بسموهم اولاد الشمس!!!!!!
حراااام والله!
الصباح نون قامت علي حيلها ومشت لي عزو وكان في راسها حاجه...
كانت عايزه تقول ليهو شي ...
بس ما كانت عارفه انو هي بقولها دأ حياتها كلها حتتغير !
ي ربي نون حتقول شنو !
والحيحصل شنو !!
وحياتها حتتغير كيف !!!!...