رواية نتيجة اغت*صاب
الفصل الثالث والثلاثون 33
بقلم مجهول
قلت : ايواه انا بس ..
قال : ايواه عارفك حتقولي لي انوا ده نوع من التجميل والناس كلها بتعملوا ..
قلت : وانا اصلا .
قال : م تقاطعيني ي هند لانوا انا لما طلبت يدك كنت عايزك كده بطبيعتك حلوة وعاجباني كده م عايز اي شي يشوه طبيعتك ..
انا طبعا م بحب النهير دموعي طوالي نزلت جاء حضني وبقى يشرح لي وجهة نظروا ..
مر شهر وانا الحمدلله بقيت كويسة و احسن بس لسه اثار البثور موجودة وبستخدم مرطبات ولوشنات طبيعية عشان تخفيها لي وام اسماعيل رجعت مننا وحياتنا ماشة بصورة كويسة في يوم كده اسماعيل مشى الشغل وجاء راجع بدري ع غير العادة وجاء حصلني في المطبخ وفتح لي الموضوع انوا وزعوه يشتغل في ولاية تانية وانو حيجينا في الشهر اسبوع انا طبعا الموضوع م عجبني نهاءي زعلت شديد بس اتقبلت لانوا ده شغل ولازم اتحمل لحدي المساء كده دخلت الاوضة وستفت ليه الشنطة وانا ببكي ساي م عايزاه يبعد مني والله جاء حصلني وبسالني وانا بتكلم معاه ومدنقرة ..
قال : انا لما اتكلم معاك عايني لي وردي ي حبيبي .
ابيت ارد جاءةرفع راسي اتخلع من دموعي استغرب طبعا
قال : والدموع سرها شنو ي روحي .
قلت : لانك مسافر ي ابو اماني .
حضني عليه وقال : معقولة ي روحي والله ايام وبتعدي ويعني بتودعيني كده نحنا عايزين اليوم ده يكون مميز وغمز لي ..
قلت : م فهمت ..
قال : ي بت خلي الامور انتي فاهمة ..
مر اليوم وباليل طلعنا روقنا ورجعنا ومرت ليلة حلوة كوداع لاسماعيل يعني وتاني يوم سافر وانا م خليت دمعة طايرة وقال اني امشي اقعد مع ناس اموا لحدي م يرجع بعد شهر وانا اصلا الموضوع م عاجبني بس م بقدر اعارضوا.. وكده خلاص مشيت ليهم والمطاعنات والمغارز بدت وطبعا رماح ورباب م عايزني نهاءي مر اسبوع معاهم ورباب عاملة فيها نظام بتقرف مني وكده عشان اثر الندوب العندي .. اما رماح بتقول لي م القاك في المطبخ لانك م بتعرفي نظام بيتنا ونظام طبخينا ..