رواية نتيجة اغتصاب
الفصل السادس والعشرون 26
بقلم مجهول
انا استغربت طبعا من ردة فعلها قلت: ليه م بتعتذري ليها ؟!
قالت : انا عملت شنو عشان اعتزر ثم ثانيا غيرة شنو وكلام فارغ!
قلت : افهميني ي رباب وبعدين هند زولة حساسة وزعيلة انا والله من امس اموري حايطة بسبب زعلها عليك الله اعتذري ليها عشان خاطري حلفتك . رباب بصرة وش كده قالت : خير بعتذر ليها عشان خاطرك بس هي م بتهمني كتير . طوالي اتصلت ع هند واديتها رباب اعتذرت ليها وعادت المياه لمجاريها ..
بلسان هند: انا طبعا انبسطت شديد ودقت طعم الانتصار ولقيت كلام ميادة في مكانوا بالنسبة لمعاملة الرجال الواحد الا يمشوهوا كده واسماعيل يتصل لي كل شويتين شكلوا م مصدق اني سامحتوا .. طبعا انا الايام دي مشغولة مع اماني لانها محبوسة وباقي حكاية ٢٠ يوم او اقل للمناسبة وانا طبعا وزيرتها وحابساها وقلت بالمرة اظبط روحي معاها..
- مرت ١٥ يوم والتجهيزات ماشة تمام وكنا بنجهز لحفلة الحنة حقتها لانها بكرة وعمتي مريم (ام اسماعيل ) قالوا عيانة قلت امشي اشوفها ع السريع واجي خلاص مشيت ليهم وم لقيت واحدة من بناتها بس لقيت عايدة ورباب ..سلمت ليهم رباب سلمت لي بطرف اصابعها في ستينها انا مالي ومالها وصارة وشها طبعا انا قعدت مسافة كده وودعتهم جيت مارقة وطبعا حجة مريم مبسوطة شديد اني جيت شفتها وجبت ليها حفيدتها خلاص اسماعيل قال : ارح عشان اوصلك وهنا رباب لمن لولوت خشمها انا قمت مديت ليه نون وودعت عمتي وبقينا مارقين
بلسان رباب : انا بقيت اشوف هند مية مية لانوا اسماعيل طلب اعتزر ليها ومشت كلامها فيني والشي اصلا اسماعيل م حاسي بيه من زمان اني بحبوا اي والله العظيم بحبوا بس هو م حاسي بي وانا م عندي الشجاعة اكلموا ولما كان مسافر انا انبسطت وحسيت انوا لمن يرجع اموا تختارني ليه بس حصل الحصل وم عارفة هند دي ظهرت من وين في حياتوا وكمان مسيطرة عليه كده وانا لو ختيتها في راسي من ناحية بدمرها بدمرها .. واسماعيل حيكون لي طال الزمن قصر ...