موج ادهم
اسكريبت الاول 1
بقلم عهد عامر
وبفتكرك إذا بصيت بالليل من الشباك
وأقول هتفوت
ياخدني بعدها سرحان .. يرد سكوت
حبيبك كل يوم بيموت
لكن واقف على رجليه
وضِحكُه مع الصحاب طالع
لكن برضه في شيء في عينيه
لا بد الشيء ده يبقى سؤال
رفضتي عليه تجاوبيني
وحشتيني عشر مرات وانا بكتب وحشتيني 🖤
(عمرو حسن)
»»»»»»»»»»»»»»»»»
_ادخل اقولها وحشتينى؟
= خلى عند الى خلفوك كرامة شوية
_الاه، مالك يا عمر
عمر: بلا عمر بلا زفت بقى، بقالك 3 سنين مش عارف تنساها وهى اللى سايباك، هى اللى محسستكش بقيمتك يا ادهم
ادهم: هى ملهاش دعوة صحبتها اللى وقعت بينا عشان كانت عايزانى وانا رفضت وقولتلها تنى بحب موج، صحبتها السبب يا عمر.
عمر: تمام معاك يا ادهم، بس هل هى معندهاش عقل للدرجادى انها تفكر ولو للحظة فى الكذب ده؟ معندهاش قلب بيدق ويكذب اللى حصل؟
ادهم بوجع: يكذب ايه، دى شايفانى فى السرير مع صحبة عمرها، دخلت وشافتنا مع بعض يا عمر،وعلى سرير شقتها يعنى لو حلفتلها بايه مش هتصدقنى، قفلت معاها عقل الست بيركن على جنب فى النقطه اللى زى دى
عمر: يبقى انساها، عاجبك حالك كده؟!
ادهم: ماله حالى؟ مانا زى الفل اهو
عمر: اه زى الفل، بأمارة دقنك اللى طولت، وملامحك اللى الحزن عرف طريقه عليها، فرحان بنفسك كده وانت بتضيعها؟ كل اللى حواليك نفسهم ترجع زى الاول الواد الفرفوش اللى مفيش فى خفة دمه اتنين، انت دلوقتى الحزن والاكتئات بقيوا جزء. من حياتك مش بيفارقوك، فوق يا صحبى قبل فوات الاوان.
سابه ومشى وهو مش عارف يعمل ايه فى صاحبه اللى حياته بتضيع وهو واقف يتفرج.
ادهم وهو ماسك صورته مع موج: عايزينى افوق وانساكى، طيب ازاى؟ هنسى ازاى احلى سنين عمرنا سوا؟ هنسى ازاى حبنا، قوليلى انسى ازاى اول مرة قولتيلى فيها بحبك؟ انا انا تايه من غيرك، حياتى وقفت، اكتشفت فجأة ان مش قلبى بس اللى متعلق بيكى، لا ده كيانى كله حبيتك وعشقتك واتعلقت بيكى لدرجة ان الكل كان بيحسدنا على حبنا لبعض، والنهاية كانت ايه؟ حبنا انتهى قبل ما دنيتنا سوا تبدا!
انا كل يوم بموت من غيرك، مش عارف اوصلك ولا قادر الاقيكى، قوليلى اعمل ايه فى قلبى اللى مش قادر يدق لغيرك، ولا عقلى اللى مش قادر يفكر فى حد غيرك، يومى كان بيبدأ بوجودك، من اليوم اللى سبتينى فيه مبدأش يوم جديد تانى، انساكى ازاى وانا عمرى معرفت يعنى ايه حياة غير وياكى؟ ارجعيلى، حبيبك بيموت كل يوم الف مرة من غيرك.
وحضن صورتها ونام.......
«««««««««««««««
_ايه يا موجة، برضو مش عايزة ترجعى اسكندرية، موحشكيش هواها ولا بحرها؟
موج: لا، ولا وحشنى وهواها وولا وحشنى بحرها يا شهد
شهد: كذابة يا موج، انتى بتهربى، انتى ليه ضعيفة كده؟
موج: ضعيفة؟ ده ليه بقى ان شآء الله؟!
شهد: عشان اختارتى الهروب مش المواجهه، لو كنتى واجهتيه من اخر. مرة مكنش ده هيبقى حالك
موج: وماله حالى بقى؟ انا اشتغلت على نفسى اكتر ونجحت وبقيت اشطر كاتبة فى مجالى يعنى موقفتش حياتى عليه
شهد: ده اللى فارقلك؟ بالنسبة ان كل رواياتك وقصصك عن الفراق؟ وعن الخيانه؟ وبالنسبة لعياطك اللى كل ليله بيوصلى؟
وخاتمه اللى انتى مش. خلعاه من ايدك ابدا؟ وغيره وغيره كل ده وبتقولى انك كويسة؟ وحياتك موقفتش؟
موج: انتى عايزة توصلى لايه يا شهد؟
شهد بغضب: عايزاكى تفوقى من كل ده، عايزاكى تفتحى عنيكى وتعرفى الحقيقه
موج بغضب مماثل: حقيقه ايه؟ حقيقه انه خانى مع صحبة عمرى واحنا فرحنا كان فاضل عليه شهر؟ ولا حقيقه انه عمل اكتر حاجه بتوجع وبتقهر؟ وهى انه خانى؟!
شهد: انتى مديتلهوش فرصه يبرر يا موج
موج: كان هيقولى ايه؟ سورى صحبة عمرك واللى انتى اختارتيها بنفسك وصممتى عليها تعمل ديكور شقتنا قررت تجرب العفش بدالك؟
كان هيبرر ايه يا شهد، كان هيقول ايه؟
شهد: موج، ادهم حياته واقفه زيه زيك ويمكن اكتر، حاول كتير يوصلك ويحكيلك وانتى مسمعتلوش.
موج: ولا هسمعله، موضوع ادهم خلص معايا لحد كده، ولو على الخاتم اللى فى ايدى ف اهو
(خلعت الخاتم من ايدها) اديهوله وقوليله لو فيه ذكرى واحدة فاضلة فى قلبى ليه فاتفضل اهى
وسابتها واخدت شنطتها وطلعت تتمشى فى شوارع القاهره، على الرغم من برودة الجو حواليها الا انها مهتمتش وكل اللى شاغل تفكيرها (هل فعلا شهد عندها حق فى ان ادهم مظلوم؟!)
»»»»»»»»»»»»»»»»»»»
تانى يوم
صحيت من النوم على مكالمه من الدار طالبة منها حضورها معرض الاسكندرية عشان تعمل حفلة توقيع هناك، وشهد شجعتها على كده وقالت(احنا هنكون فى المعرض ومش هنحتك بيه)
جهزوا شنطهم واتجهوا لاسكندرية.......
««««««««««««««
ادهم بفرحة: بتتكلم جد، موج جاية؟
عمر: اه، شهد لسه الى قايلالى انهم قدامهم ساعه ويوصلوا
ادهم: انا انا هلبس واستناها او بص، انا لسه عايز احلق عشان هى بتحب دقنى خفيفه، وعايز اشترى طقم جديد يكون اسود فى ابيض، وكمان عايز اشترى البيرفيوم اللى بتحبه، موج جاية بجد يا عمر.؟
عمر صعب عليه حالة صاحبه وحضنه بكل قوته وقال
عمر: جايه يا صحبى، روحك رجعالك قوم بسرعه عشان نجهز وتقابلها بكرة فى المعرض
جرى ادهم ولبس هدومه ونزل اشترى كل حاجه عايزها وحلق ورجع البيت حاول ينام ومقدرش..
ادهم: هنام ازاى وانا روحى هتتردلى بكره يا عالم؟!
فضل يستغفر ربنا كتير لحد م نام
٪٪٪٪٪٪٪٪٪٪٪
عند موج
وصلت شقتها القديمه وفتحتها وكانت باعته حد ينضفها
شهد: يا ساتر يا دوب اخد دش وانام، الجو هنا تلج اكتر من القاهره
موج: عندك حق يلا ادخلى انتى الحمام ده وانا هدخل اللى جوة
بعد فترة كانت هى وشهد نايمين جنب بعض
شهد: هتعملى ايه لو شوفتى ادهم؟
موج: تصدقى انى مش عارفه، عندى حنين ليه بشكل لا يوصف حاسة انى بمجرد مهشوفه هجرى اترمى فى حضنه زى ما كنت بعمل، وفى نفس الوقت مش طايقاه بسبب اللى عمله
شهد: ايه الاحساس الاقوى عندك؟
موج: نامى يا شهد، نامى.
قفلت موج الموضوع واتقلبت على الجنب التانى وهى بتقول لنفسها: يا ريتنى اقدر اجرى عليه واحضنه دلوقتى واقوله ان موجة قلبه تعبانه ومش هترتاح غير هنا!
بس مينفعش.........
(من موقعى هذا تحت البطانيه ودموعى فى عينى بقولك ينفع يا ولية😒🥲)
٪٪٪٪٪٪٪٪٪٪٪٪٪٪٪٪٪٪٪٪٪٪
فى الصبح
جهزت موج وشهد ونزلوا رايحين المعرض
وادهم وعمر جهزوا كذلك وراحوا على المعرض
عمر: ادهم، عشان خاطرى امسك نفسك اما تشوفها، دى بنت مجانين وممكن تصوت
لكمه ادهم فى معدته وهو بيقول: اتلم ومتشتمش موج، سامع يلا
عمر بألم: سامع، سامع، قال يعنى غلطت فى الأميرة ديانا
بص عليه ادهم بنظرة نارية: اجمل من الاميرة ديانا يا حج اعوذ بالله
ضحك ادهم على عمر وعمر فرح جدا انه واخيرا ادهم ضحك.
♡♡♡♡♡♡♡♡
وصل المعرض وشافها واقفه وسط بنات كتير بتوقعلهم على رواياتها بفرحة وسعادة، وقف يتأملها والدموع بتلمع فى عنيه مبسوط بيها وفخور انها قدرت تحقق حلمها واهو بقيت اشطر كاتبة فى مجالها والناس بتجيلها من كل مكان
ادهم بهمس لنفسه: بنتى بقيت اجمل كاتبة شافتها عينى.
عند موج
كانت فرحانه وسط البنات اللى جولها والامضاء بتاعها على الروايات وكمان الهدايا الكتير اللى جاتلها، كانت واقفه بتمضى روايه وفجأه قلبها دق اوى لدرجة انها حست ان كل اللى حواليها سامع دقاته من علوها
موج: رفعت عينى لقيت ادهم قدامى، بيراقبنى وهو فاكر انى مش واخدة بالى منه، لسه زى ما هو شكله اللى يبهر ووسامته اللى ملهاش زى وريحة برفانه اللى بتخطف قلبى بمجرد حضوره لأى مكان، اكتشفت انه واحشنى اوى واحش قلبى لدرجة انى مش قادرة انزل عينى من عليه.
وفجأة لقيت ادهم اختفى من قدامها دورت عليه بعيونها ملقيتهوش، افتكرت انه مجرد سراب والحزن خيم على وشها فجأة.
اخر اليوم موج كانت بتتمشى هى وشهد فى جنينة، وكانت مستمتعه بالهوا رغم برودته وف ايدها كوباية قهوة
شهد: مالك يا موجة؟ انتى مرة واحدة قلبتى بعد ما كنتى فرحانه، ايه اللى حصل؟
موج بتنهيدة: شوفته يا شهد، شوفت ادهم قدامى معرفتش اعمل اى حاجه غير انى ابصله واتأمل فيه، لسه زى ما هو يا شهد، قلبى المهزأ نسى كل حاجه عملها فيه وفرح بوجوده، نسى وجعه وقهرته وكسرته منه وحن ليه تانى، حن لكل لحظة بينا، حن لمشينا سوا بليل وجرينا على كوبرى استانلى حن لكل دقة كان بيدقها وهو معاه
شهد: اديله فرصة يبرر
موج: يبرر ايه يا شهد، يبرر خيانته؟!
شهد: لا يا موج يبرر كل اللى حصل انتى وقتها لميتى هدومك واختفيتى من غير اى حاجه، ولولا انك بتخافى تقعدى لوحدك مكنتيش خدتينى معاكى.
موج: مكنتش هقدر يا شهد، مكنتش هقدر ابين قهرى ووجعى منه، زمان أدهم قالى لما تتوجعى والدنيا تيجى عليكى حضنى هيكون امانك، اجرى عليه وفضى كل اللى جواكى وهو هيشحنك بكل سعادة وكان مفيش وجع مس قلبك، بس للأسف مقدرتش اجرى عليه، ولا اجرى واقوله ان قلب موج زعلان من ادهم، ادهم اللى فى كل وقت كان بيبقى معايا اول واحد، انتى عارفه
مرة اتصلت بيه الساعه 3 الفجر وفضلت اعيطله قولتله ان ماما مسافرة عند خالتو وانا لوحدى عارفه عمل ايه
شهد: ايه؟
موج بدموع: جه وقعد على باب الشقة من برة ومرضيش يمشى لحد الصبح م طلع وخدنى ونزلنا نفطر وخرجنى لحد م ماما رجعت تانى،وقتها صمم اننا نكتب الكتاب وكتبناه بعدها باسبوع،هه كان دايما يقول لماما خوف مراتى حضنى اولى بيه، كان مصدر أمانى يا شهد بس اتخلى عنى، اتخلى بالرخيص اووى
انهارت فى العياط وشهد حضنتها وفضلت تهدى فيها
شهد: طيب محاولتيش تعرفى منه الحقيقه ليه ؟
موج:بعدت عنه لانى خايفة اتكسر مرة تانية يا شهد.
جه صوت من وراها وقال: لا عاش ولا كان اللى يكسرك يا موجة قلبى.
موج قلبها وقف فى الوقت ده، واترددت تلف وتبصله عن قرب عشان عارفة انها هتضعف وده مش وقت ضعف ابدا.
جه ادهم ووقف قدامها
ادهم: وحشتينى
موج غمضت عنيها وفتحتها تانى
موج بقوة: نعم؟ حضرتك عايز ايه؟!
ادهم بحزن: عايزك تعرفى الحقيقه، عايزك تسامحينى
موج: اسامحك؟ بسهوله؟! ده على اساس انك دوست على الكوتشى الابيض بتاعى من غير قصد؟!
ادهم بمرح: على اساس وقتها سامحتى، انتى طلعتى طماعه ودبستينى فى عزومة بيتزا وسينما وشطبتى على جيبى
ابتسمت موج ابتسامة خفيفه للذكرى دى وادهم استغل الفرصة وقرب منها وحضنها بكل قوته
ادهم: والله م ليا ذنب فى كل اللى حصل
موج وقتها نسيت كل حاجه واتعلقت فيه بكل قوتها وانهارت بين ايديه فى العياط وكأن دموعها اللى كانت بتنزل السنين اللى فاتت نقطة فى بحر دموعها دلوقتى.
ادهم بعياط: والله م ليا ذنب والله، هى اللى خدرتنى وجابت واحد معاها عشان انتى تطلعى وتشوفى كل اللى حصل قدامك وتشكى فيا ونطلق، هى قالتهالى قالتلى انها عايزانى وانها مستكترانى عليكى، صدقينى يا موج انا بحبك وقلبى عمره م حب ولا شاف حد غيرك، صدقينى
بص لموج لقى مفيش اى رد منها شالها من حضنه لقيها وقعت من طولها بين ايديه
ادهم بخضة: موج، فوقى مالك
جريت عليه شهد وقالت: شيلها ع المستشفى بسرعة
جريوا بيها على المستشفى والدكتورة طمنتهم ان اللى حصلها طبيعى من قلة اكلها وكمان التوتر اللى اتعرضتله
قعد ادهم على الكرسى جنب سريرها ومسك ايدها وباسها
ادهم: حقك على قلبى يا موجة قلبى، هروبى منك كان خوف من مواجهتك ورفضك ليا، حاولت اوصلك وكله بعدنى عندك حتى انتى قفلتى كل اكونتاتك وكل حاجه كانت بتربطك بيا، سبتينى لوحدى اتعذب ببعدك 3 سنين، قلبى تعب من بعدك وروحى جفيت من فراقك، كان نفسى اقولك كلام كتير يا موج، بس لازم اما تفوقى اول حاجه تفتحى عينك عليها هى دليل برائتى وانا عارف هجيبه ازاى
مسح دموعه وباس كف ايدها وسابها جنبها وغطاها كويس وخرج لقى عمر وشهد قاعدين قدام باب الاوضه
ادهم: عمر تعالى معايا، وانتى يا شهد خليكى مع موج ولو حصل حاجه كلمينى
وخد عمر ومشى بيه
٪٪٪٪٪٪٪٪٪٪٪٪٪٪٪
تانى يوم الصبح
فتحت موج عنيها لقيت ادهم نايم على الكرسى جنبها وماسك ايدها بقوة، وشهد نايمه على الكنبة قصاد السرير من الجنب التانى.
استجمعت موج قوتها وسحبت ايدها من ادهم اللى حسها من اول م حركت ايدها .
ادهم: حمدلله على سلامتك يا حبيبتى
موج بقوة: انا مش حبيبة حد، ووجودك هنا مش صح اتفضل حضرتك برة.
شهد: موج ادهم..
قاطعتها موج وهى بتقول: انا مش عايزة اسمع حاجه من فضلك امشى وجودك هنا ميصحش
ادهم: وايه اللى خلاه مش صح يا ابلة موج؟!
موج: من غير تريقة حضرتك غريب عنى اتفضل بقى
ادهم: غريب عنك؟ اول مره اعرف ان الزوج بيبقى غريب عن زوجته
موج بصتله باستغراب: يعنى ايه؟
ادهم: يعنى انا مطلقتكيش يا موج عشان ابقى غريب عنك، انا لسه زوجك.
موج مقدرتش تنطق وفضلت باصه عليه وهى ساكتة.