رواية رحم للايجار
الفصل الثاني والسبعون 72 ج1
الجزء الثالث
بقلم ريحانة الجنه
((حب الفرسان))
(( الجزء الاول من الفصل الثاني والسبعون ))
🌹بقلم ريحانة الجنه🌹.
وقف محرك العربية بهدوء والتفت ليها بحزن علي حالها واللي بتعرفه في كل مرة بيوصلها لنفس المشوار اللي بيتكرر ولكن كل مرة مكان جديد وشخصية جديدة وحكاية مختلفة ..حكايات كلها انكسار وحزن ودموع .. مشوار الوجع واللي بقي حياتها من يوم ماعرفت حقيقته !! واللي لسة مستمر معاها ومش عارفة هتخلص من الحمل التقيل المرهق ده امتي وازاي !!
وليد بص عليها بشفقة واتنهد بهدوء: احنا وصلنا ...جاهزة !!
غمضت عيونها بآلم من اللي هتشوفه وتعرفه بعد دقائق معدودة !! بتتمني ترجع وتمحي كل شئ عرفته وتتراجع عن المسؤلية المتعبة دي.. لكن اللي بيخليها تكمل المشوار للنهاية الضحايا دول!! ايوة هما حاليا السبب الاول اللي بيخليها تكمل علشان تطمنهم وتحسسهم انهم في آمان وخلاص!! السجان اللي كان حابس ذنوبهم وغلطاتهم مات وانتهي وانتهت معاه المعناه والقلق من اكتشاف المستور ! يمكن في البداية كانت بتحاول علشانه ..علشان يسامحوه لكن حاليا وبعد اللي شافته وعرفته بقت المسامحة دي اخر أمل ليها !! مش كلهم كان عندهم القدرة علي مسامحته !!
اخدت نفس طويل بتعب وحركت رأسها بتأكيد: ايوة جاهزة مش هتأخر عليك...
وليد بقلق عليها: ليه كل مرة بترفضي اني اكون معاكي!! علي الاقل اخفف عنك حدة الموقف وبدايته واللي بتسمعيه منهم في البداية اول مابيعرفوا انك من طرف مالك!! خاليني انا اخد الصدمة دي وانتي كملي !! انا حقيقي مش عارف انتي لسة متحملة كل اللي بيحصل ده ازاي!!
ابتلعت غصة وجع وابتسمت ليه بسخرية: يمكن اتعودت علي الصدمات يا وليد !! يمكن احساسي مات !! يمكن مابقاش يفرق معايا رد فعلهم العنيف عليا في البداية!! الهدف اللي بوصله في نهاية المقابلة يستاهل اني اتحمل !! كفاية الراحة والفرحة اللي بشوفها في عيونهم لما بيعرفوا انهم بقوا احرار!! مافيش تهديد !! مافيش ذل وانكسار!! مافيش مالك في حياتهم من تاني !!؟
وليد اتنهد بموافقة ليها علشان يريحها: عموما انا موجود رهن اشارة منك لو حصل اي حاجة تخوفك كلميني هكون عندك في لمح البصر..وعموما انا مظبط كل شئ زي كل مرة هي حاليا لوحدها اطمني !!
ماليكة ابتسمت ليه بشكر: انا حقيقي متشكرة اوي يا وليد !! انا من غيرك مش عارفة كنت هعمل ايه !! كنت هوصلهم ازاي وازاي كنت هطمن كدة من غيرك!! انا فعلا تعباك معايا مش لاقية كلام يوفيك حقك ولا اشكرك بيه!!
وليد ابتسم: مافيش شكر يا دكتورة ده واجبي ناحيتك !! حضرتك انسانة جميلة تستاهلي كل خير وبجد ماكنتيش تستاهلي كل الوجع ده لكن ده قدر ربنا ولعله ليه حكمة فيه احنا لسة مش عارفنها !! كمان حضرتك وفادي بيه والملك ليكم عليا افضال كتير!! انا تقريبا جزء من العيلة والدي كان بيشتغل مع الملك من زمان وحاليا انا كمان وتقريبا الملك هو اللي مربيني وعلمني كل حاجة ..انا الراجل بتاعكم يا دكتورة مش غريب علشان تشكريني !! والملك مفرغني ليكي انتي وبس لحد ما تنهي كل حاجة وتستغني عني وعن خدماتي .ولحد ده ما يحصل انا تحت امرك ٢٤ ساعة متواصل !!
ماليكة ابتسمت : ومين قالك بقي اني هستغني عنك وعن خدماتك !! انا خلاص تقريبا مش بطمن الا وانت معايا في أي مكان .. وطلبت من جدو رعد انك تكون معايا بإستمرار حتي بعد ما الموضوع ده يخلص .. ولا عندك مانع!؟؟
وليد ابتسم: مانع ايه بس!! انا قولتلك انا تحت امرك طول عمري وزي ما حضرتك تحبي انا جنبك دايما اطمني !! روحي قبل روحك .
ماليكة حركت راسها بهدوء: طيب انا هنزل بقي وادعيلي يا وليد!!
وليد بيطمنها : ان شاء الله ربنا هيوفقك انتي بتعملي خير للبنات والستات دي !! وزي ما قولتلك انا هنا جنبك اتفضلي انا منتظرك !!
نزلت ماليكة من العربية بهدوء وخوف وهي بتبص للبناية اللي هتطلعها واللي بعد دقائق هتعرف فيها واحدة جديدة .. وحكاية جديدة مؤلمة !!
اخدت نفسها بقوة ودخلت البناية وطلعت ووصلت للشقة المطلوبة ورنت الجرس !! فتحت ليها بنت جميلة تقريبا في منتصف العشرينات من عمرها !!
ماريان بتساؤل : ايوة!!
ماليكة بتوتر : احمم!! مدام ماريان !!
ماريان عقدت حاجبها بدهشة: ايوة انا !! مين حضرتك !؟
ماليكة بتتلفت حاوليها بقلق من الناس والجيران : طيب ممكن ندخل ونتكلم جوا وانا هفهمك انا مين وموجودة هنا ليه !!؟
ماريان بإستغراب: نعم!! تدخلي فين!! هو انا اعرفك علشان ادخلك بيتي!! انتي مين وعايزة ايه!! لو مش هتقولي انتي مين الاول هقفل الباب واتفضلي مع السلامة !
ماليكة بضيق: طيب انا هقولك انا مين ومن طرف مين بس ليا عندك طلب !! ياريت من غير عصبية وصوت عالي وتسمحي ندخل جوا واوعدك مش هاخد من وقتك كتير وهمشي علي طول ممكن !!؟
ماريان عقدت حاجبها بشك وقلق: انتي هتتشرطي عليا !! انطقي انتي مين ومين باعتك ليا !!؟
ماليكة بحزن : انا ماليكة وجايالك من طرف مالك ...
ماريان خافت واتعصبت : مالك!! والكلب ده باعتك ليه !! اسمعي روحي قوليله ماريان بتقولك مش عايزة تشوف وشك ولا وش اي حد من طرفك ولا تسمع عنك حتي !! وانه لو لسة عايز يدمر حياتي ويبوظها انا هقتله !! فاهمة هقتله !!
ماليكة بشفقة عليها: طيب ممكن تهدي وتسمعيني!! انا لا جاية ادمر حياتك ولا ابوظها انا هقولك كلمتين وهمشي من فضلك اسمعيني وبعدها اعملي اللي يعجبك من فضلك !!
ماريان شايفة هيئة ماليكة واسلوبها وواضح انها مش من النوع اللي بيشتغل مع مالك وبيبعته دايما ليهم !! شكلها مختلف عنهم !!
ماريان بحدة : هتدخل وتقولي اللي عندك وتمشي علي طول قبل ما جوزي يرجع فاهمة !! ومش عايزة اشوف وشك ولا وش الزفت ده بعدها انتي سامعة ؟
ماليكة ابتلعت غصة اهانتها اللي بقت مجبرة تتحملها من كل واحدة فيهم اول ما بتعرف انها من طرف مالك !!؟
ماليكة حركت رأسها بموافقة وهدوء ودخلت ...ماريان قفلت الباب ودخلت وراها بعصبية ...
ماريان وقفت قصادها بحزم وغضب: اتفضلي اتكلمي !! عايزة ايه وباعتك ليه مالك الزفت ده !؟
ماليكة بحزن : انا مش مستغربة موقفك ولا مقابلتك ليا !! انا تقريبا اتعودت علي المقابلة دي من كل واحدة فيكم بتسمع اسمه !! وعلشان تهدي وتطمني وتسمعيني من غير عصبية !! مالك مات خلاص.. يعني مافيش لا تهديد ولا تدمير لحياتك زي ما انتي فاكرة!!
ماريان بعيون لامعة بدمعة فرحة وراحة ابتسمت: مات !! انتي بتتكلمي جد!! مالك مات !!
ماليكة بحزن: ايوة مات !! ومات قصاد عنيا كمان اطمني ...
ماريان قعدت براحة وآمان افتقدته من سنين طويلة !! لكن التفتت لماليكة بدهشة!!
ماريان : ولما هو مات !! انتي مين ! وعرفتي طريقي ازاي ! وجاية ليه!؟
ماليكة اتنهدت : مالك لما مات وصاني اني اخد الاسماء اللي سابهم ليا وبيانتهم واروح لكل واحدة منهم واقولها انها خلاص تطمن وان كل شئ عن ماضيها انتهي واتمحي ومافيش حد ممكن يهددها بيه تاني لا هو ولا غيره !! واطلب منها انها تسامحه علي كل اللي عمله معاها !! وانتي كنتي من الاسماء دي !! وجاية اطلب منك تسامحيه !!
ماريان قامت من مكانها وضحكت بقوة وجنون ضحكة وجع وسخرية !!
ماريان: اسامحه!! انتي مجنونة!! طيب هو كان مريض ومختل ومش غريبة عليه النكتة دي!! لكن انتي كمان زيه!! متخيلة اني ممكن اسامح الشيطان ده!!؟ ده انا لو اطول ادخله النار ومايخرجش منها لا حي ولا ميت هعمل كدة!! تقوليلي اسامحه!! انتي بتحلمي زيه ولا ايه!!؟
ماليكة بوجع عليها وقد ايه ضحكتها دي كانت محملة حزن وسخرية من اللي شافته!!
ماليكة : انا كل يوم بعرف واحدة جديدة وحكاية مختلفة عن التانية !! بس انتي بالاخص مختلفة !! غضبك ووجعك منه غريب غيرهم ! انتي حكايتك ايه!؟
ماريان قعدت قريب منها بفضول: انتي شكلك كدة بنت غريبة عن النوعية الوسخة اللي كان يعرفهم مالك وبيخلصوا ليه شغله ويبعتهم للبنات اللي بيدمرها ويستغلها !! لا شبهه ولا شبهم !! انتي مين وتعرفي الشيطان ده منين وليه!؟
ماليكة خرجت بطاقتها وقربتها منها : تقدري تتأكدي انا مين وتطمني!! انا دكتورة ماليكة الحديدي ! اما عرفته ازاي وعلاقتي بيه ايه ححكيلك عنها بس بعدين مش دلوقتي! المهم حكايتك انتي !!
ماريان بتحقق في بيانات ماليكة بصدمة: انتي من عيلة الحديدي اللي احنا نعرفها دي!! دي عيلة كبيرة وغنية !! وايه اللي وقعك في طريق مالك بس!! هو عمل معاكي زي عادته ولا مات ومالحقش!؟ واشمعن انتي اللي باعتك بالوصية دي!؟
ماليكة اتنهدت بتعب: ماقولتلك ححكيلك بس بعدين! انا عايزة اعرف انتي عرفتي مالك ازاي وعمل فيكي ايه!؟
ماريان اتنهدت بوجع كبير : انا اصلا من عيلة كبيرة في الصعيد وطول عمري بحب الدراسة ومتوفقة ومن صغري في مدرسة انترناشونال بابا كان مهتم بتعليمنا كلنا سواء اخواتي الرجالة او انا لاني البنت الوحيدة والعيلة كلها عندنا تعليمهم عالي وفيهم كمان اللي سافر وكمل دراسته برا مصر ومنهم اخواتي الرجالة كمان لكن بعدها رجعوا واشتغلوا هنا لان شغل بابا واملاكه كبيرة وكتيرة وانا كنت زي ما تقولي مدلعة اوي بابا كان بيحبني بزيادة ودايما عايزني احسن وافضل بنت في العيلة والبلد كلها ..مدراستي كانت بتبعد عن البلد بساعات لكن هو صمم اني اتعلم في افضل المدارس مش مجرد مدرسة للدراسة وبس!! كنت بخرج مع السواق من قبل الفجر علشان اوصل مدرستي في معادي ولانك اكيد تعرفي ان نظام المدارس دي مختلف لما كنت برجع البيت حتي لو متأخرة ماكنتش بحتاج اذاكر كتير لان اصلا مهمة المدرسة مش بس اليوم الدراسي لا بنكمل اي تكليفات هناك وبمساعدة المدرسين لكن كنت ارجع تعبانة وافضل اذاكر كنت بعشق دراستي ودايما تقديراتي ممتازة ! و بمجرد ما انتهت مرحلة الثانوي قررت ادخل الجامعة الامريكية ! بابا كان رافض في البداية لاني كدة لازم اقعد في القاهرة ..لصعوبة الرجوع كل يوم والدراسة في الجامعة ..لكن لانه صعب يرفض ليا طلب وافق تحت ضغط مني ومن أمي ... لانها كمان كانت دكتورة جامعية لكن ماكنتش بتشتغل الفكرة كانت بس في الالقاب مش اكتر !! وافق بابا ودخلت الجامعة واخد ليا شقة قريبة من الجامعة وبعت معايا واحدة من البلد تقعد معايا وتاخد بالها مني ...وهو وأمي واخواتي من وقت للتاني بيزوروني وكل حاجة كانت تمام وكويسة !! كل سنة بتفوق وتقدير !! كان فخور بيا اوي ودايما محتار يهاديني بأيه !! كان حنين اوي !! كانت حياتي جميلة وليا اصحابي ودنيتي وماخطرش لحظة في بالي ان كل ده ممكن في يوم يتقلب ويتحول لجحيم !! خصوصا اني طول عمري قوية وشخصيتي شديدة وعمري ماكنت بنت خفيفة وبتقع بسهولة ... كنت رافضة الحب والارتباط نهائي ومركزة حياتي لدراستي ونفسي وبس عايزة اخلص واشتغل في مكان مرموق ويكون ليا كيان وقيمة كبيرة اعملها لنفسي مش علي حساب شغل بابا وفلوسه!! لحد ما في سنة من السنين عملت حادثة بسيطة قريب من بيتي وانا راجعة بالليل وكان السبب في الحادثة مالك !! وقتها هو حسسني اني الغلطانة واني انا اللي كنت سارحانة !! اعتذرت طبيعي وهو كان لطيف وزوق كعادته وهو بيصطاد ضحاياه !! وكل ده كان مترتب ومرسوم وانا ماكنتش فاهمة طبعا !! المهم اخدنا ارقام بعض وبدأت اول مكالمة بينا ...تخيلت انها مكالمة عابرة ..مجاملة وبس .لكن المكالمة جرت مكالمة لحد مابقينا تقريبا بنتكلم كل يوم ...في كل وقت وانا في الجامعة..وانا مع اصحابي ..وانا في البيت بالليل ...اتعلقت بيه بشكل مرضي.. استغربت نفسي واني بقيت ضعيفة قصاده بالشكل ده ..الشخصية القوية الجادة بقت رومانسية وحالمة ... حبيته بجد وافتكرت وقتها انه كمان حبني او زي ماهو كان عايز يوصلي ..بدئنا نتقابل لحد ما بيقينا مش بنتفارق الا وقت قليل في اليوم !! اللي بيكون هو فيه في الجامعة عنده شغل ..وقتها صمم اننا لازم نتجوز. انه لازم يتقدم لبابا ويطلبني منه! وقتها سعادتي ماكنش ليها حدود...اتأكدت انه حقيقي بيحبني وانه مش بيلعب بيا ولا بيتسلي !! واطمنت ...روحلت بابا وفاتحته في جوازي من مالك وشرحتله كل حاجة ..كان رافض الموضوع بشكل غريب ورافض مالك حتي من قبل ما يقابله...لانه كان شايف اني لازم يوم ما اتجوز اتجوز حد شبهنا في نفس المستوي والعيلة ومش شرط من عيلتي من اي عيلة كبيرة وغنية من البلد !! المهم اني مش هتجوز حد غريب مالوش اصل كبير زينا وهو ما يعرفهوش!! صممت وجادلت واتحايلت وعملت كل شئ تتخيليه !! لكنه رفض رفض قاطع...وكلمت مالك وفهمته وصمم يجي لبابا ويتقدم ويحاول يقنعه !! فعلا راحله وقابله لكن بابا كان مصمم علي رأيه ..
ماليكة بفضول : وبعدين عملتي ايه !؟
ماريان اتنهدت: ولا حاجة ..مالك وقتها قالي مافيش قصادك غير حل من الاتنين !! اما نبعد عن بعض ونسلم بالامر الواقع!! او الحل التاني !
ماليكة عقدت حاجبها: وايه هو الحل التاني ده !؟
ماريان ابتسمت بسخرية : قالي اني اهرب من البيت وابعد عنهم كوسيلة ضغط فترة صغيرة علشان بابا يحس ان الموضوع مش سهل وهو في الوقت ده هيحاول معاه لحد ما بقتنع وبعدها ارجع ونتجوز !!
ماليكة بدهشة : وانتي بعقلك الكبير ده وشخصيتك دي اقتنعتي بالكلام ده ووافقتي!! وخصوصا انك من عيلة في الصعيد!؟؟
ماريان بدموع: كنت عمياء مغيبة !! ماشية وراه زي المسحورة مش سامعة غير صوته ..ولا شايفة غير صورته !! كأني عمياء وهو الضي الوحيد اللي بينور حياتي كلها!! وافقت وهربت من غير ما اعرف اي حد حتي أمي زي ما مالك طلب مني وقفلت خطي وهو اخده وقعدني في شقة ليه بعيد عن شقته لان طبعا ده اول مكان هيدوروا عليا فيه !!!
ماليكة: وبعدين حصل ايه!؟
ماريان : بابا واخواتي فعلا راحوا لمالك وسألوه عني !! جاني وقالي انه قالهم اني في آمان لحد ما يوافقوا علي جوازنا وانه مستحيل يتخلي عني ! لكن ده كان كدب!! تخيلي قالهم ايه وقتها !!
ماليكة بفضول: قال ايه !؟
ماريان بسخرية وجع : قالهم اني منحلة وماشية علي حل شعري كل يوم مع راجل شكل..واني عايشة لوحدي وهما مايعرفوش عني حاجة وانه اتخدع فيا وكان فاكرني بنت ناس لحد ما عرف اني هربت مع واحد تاني من اللي اعرفهم وانه حمد ربنا انه عرف حقيقتي في الوقت المناسب ... وانه كان مستحيل يتجوز واحدة زيي اهلها سايبنها علي حل شعرها بالشكل ده وطردهم وكمان عملهم محضر بعدم التعرض !!؟
ماليكة بصدمة: معقول !! عمل كدة ! لكن انتي عرفتي كل ده ازاي وانتي مقاطعة اهلك وقتها !!
ماريان بدموع وانكسار: عرفت من أمي لما كلمتها بعدها بسنين !!
ماليكة بحزن: وبعد كدة حصل ايه وعملتي ايه !؟
ماريان اتنهدت: وقتها اقنعني اني لازم اوافق اتجوزه عرفي مؤقتا لحد ما نحل الموضوع مع بابا وكل ما بيعدي الوقت بابا هيهدي ويسلم !!
ماليكة بشك: واتجوزتيه فعلا !!
ماريان : اتجوزته وبعدها بشهر تقريبا عرفت منه اللي عمله بابا !! اخد قرار صعب وقاسي اوي لكن انا كنت استاهله فعلا !
ماليكة : قرار ايه !؟
ماريان: بابا يأس من رجوعي وظن ان كلام مالك حقيقي واني فعلا زي ما قال عني وطيت رأسه في التراب!! قال للكل اني موت في حادثة في القاهرة وعمل عزايا ودفني واخد العزا فيا وانا عايشة !! وقال اني لو حتي رجعت في يوم هيقتلني !!
ماليكة بدموع وشفقة عليها : هو كمان كان موجوع ومصدوم فيكي كان معذور !!
ماريان بحزن ودموع : الابشع اني كنت السبب في موته مقهور ومكسور !! مات بعدها بكام شهر بس من غير ما اشوفه ولا اطلب منه يسامحني !! من غير ما اقوله الحقيقة واني مش زي ما سمع عني !! بعدها مالك صمم انه يعملي شهادة ميلاد جديدة بإسم جديد ..لاني رسميا ميتة علي الورق وكمان علشان ماحدش من اهلي يقدر يوصلي ويقتلني !! ومن يومها وانا بقيت مجبرة ابقي مريان !! حتي اسمي اتحرمت منه !! اوقات بيوحشني اسمعه ! مافيش غير ماما هي اللي بتناديني بيه لما بتيجي تزورني من ورا اخواتي لانهم مستحيل يعرفوا اني عايشة لانهم مصممين يوم ما أظهر يقتلوني !! مش بس لعملتي اللي عملتها..كمان لاني كنت السبب في موت بابا!!
ماليكة : هو انتي اسمك الحقيقي ايه !؟
ماريان بحنين : ضحي!! اسمي ضحي
ماليكة قربت منها بحزن وضمتها برفق: انا عارفة اني فكرتك بحاجات توجع انا اسفة يا ضحي بجد اسفة !!
ماريان خرجت من حضنها بمرار : وانتي فاكرة ان اللي فات ده كان يوجع!! الوجع لسة جاي !!
ماليكة بدهشة: هو لسة فيه حكاية ووجع تاني !!؟
ماريان بسخرية مريرة : الوجع كله لسة ما كنش بدأ !!! فات كام شهر وعرفت اني حامل في اول طفل ليا !! ومن هنا بدأت المأساه وبدأ الوجع اللي بجد !!!
ماليكة بدموع : انتي كنتي حامل من مالك !؟؟
ماريان حركت رأسها بتأكيد : للاسف!! حملت منه ومرت شهور الحمل في سعادة وفرحة مزيفة ! كان محسسني اني مليت حياته انا والطفل اللي جاي !!
ماليكة بفضول: طيب فين اهله والده والدته اخته !! ليه ما عرفوش بجوازكم وحملك !؟
ماريان: كان بيقولي انه مستني الوقت المناسب علشان يقولهم لأنهم ممكن يشوفوني بشكل سئ لظروف جوازنا واني بمجرد ما هولد هناخد البيبي ونروح ليهم ويعرفوا كل حاجة !! وانا زي الغبية كنت بصدقه دايما !!
ماليكة حركت رأسها بتفهم : مفهوم طبعا... طيب فين الطفل ده دلوقتي !؟ وايه حصل بعدها !!
ماريان بدموع وقلب بينزف وكان كل نسيج فيه وشريان بيتمزق من الحزن والقهرة !!!
ماريان: بمجرد ما جه معاد ولادتي وولدت ...فوقت لوحدي وسألته عنه ! عني ابني.. يومها ابتسم ابتسامة شر عمري ماهنساها لحد ماهموت !! يومها شوفت وش مالك الحقيقي لاول مرة !! وكأني شايفة الشيطان متجسد قصادي في جسم بني ادم!!
ماليكة بفضول ودهشة: ليه!! هو عمل في الطفل ايه!؟
ماريان بوجع وانهيار: باعه!
ماليكة بصدمة ودموع حركت رأسها بنفي: باعه! باع ابنه !! انتي بتقولي ايه!؟
ماريان بدموع: باع حتة مني ! باع روحي اللي لسة حتي عيوني ماكنتش شافته ولو لمرة واحدة.. ما سابليش منه حتي لمحة صغيرة اعرف بيها شكله واضمه لحضني !! كان نفسي ارضعه حتي ولو لمرة واحدة!! لكن للاسف هو مسخ مقرف ما يعرفش حاجة عن المشاعر دي !!؟
رجعت البيت وانا مصدومة ..موجوعة ...تايهة ...
قالي وقتها الحقيقة!! اني مجرد بطن وبس !! بطن تحمل وتولد ومالهاش حق في اللي هتولده ولا ليا حق اعرف هو فين واتباع لمين !!
ماليكة بدموع: وانتي وافقتي!! رضيتي !!؟
ماريان ضرخت فيها : ارضي ازاي ووافق ازاي!! انا صرخت وبكيت وكسرت واتجننت ...لكن هو كان ثابت وهادي !! قالي قصادك حل من الاتنين !! تسكتي وتعيشي معايا علي الوضع والحال اللي هرسمه ليكي او ترفضي وتمشي بس افتكري ان كل شئ كان بينا متسجل صوت وصورة وفضيحتك وفضيحة اهلك هتملي الدنيا والبلد وهتوصل لكل عيلتك ! ووقتها كمان الكل هيعرف ان ابوكي كان كداب وانك لسة عايشة لكن عايشة بالعار ! وافرحي بقي بفضيحة ابوكي واخواتك وكمان اعرفي انك هتموتي لانهم مستحيل يسبوكي عايشة يوم واحد !! ده غير انك ماضية ورقة بخط ايدك ببيعك لابنك اللي انا نفسي هنكر اني ابوه وقابضة الثمن ومتوثق علي الورق كمان ! الورقة اللي انا نفسي مش عارفة انا مضيتها ازاي وامتي ! وبكدة حتي لو بلغت عنده هكون انا المذنبة لاني انا اللي بيعت حتة مني وقبضت ثمنها مش هو !
صدقيني انا ماكنتش خايفة من تهديده ليا سواء ان جزاء ده اني اموت او اتسجن ! لا بالعكس ده كان اهون كتير من سجني وذلي مع الحقير ده! لكن انا خوفت علي فضيحة عيلتي واخواتي !! وسمعة بابا اللي كنت هوسخها ! بكفاية اني كسرته في حياته وموته مقهور ومكسور!
ماليكة بتعب وحزن: وعشتي معاه!! كملتي معاه في نفس المشوار ده !؟
ماريان بمرار يقتل: مش بقولك الوجع لسة جاي !؟
ماليكة بتيه وضياع: هو لسة فيه وجع بعد كل ده !؟
ماريان : اللعبة ماكملتش علي كدة! مش كل مرة الشاري عايز طفل وخلاص! فيهم عايزين طفل منهم من صلبهم مش من راجل تاني !؟
ماليكة بتحرك راسها بنفي وجنون: لا ! لا قولي ان اللي فهمته ده مش حقيقي!! قولي اني فهمت غلط !
ماريان بمرار وذل لذكريات تمزع الروح والجسد حركت رأسها بتاكيد !
ماريان: صح!! اللي فهمتيه صح ! كان بيجبلي رجالة تنام معايا علشان اخلف منهم مش منه هو !؟ والجنين يكون ابنهم !
ماليكة بتلف حاولين نفسها بصدمة وانهيار: مستحيل !! مستحيل يكون في انسان عنده ذرة قلب واحساس يعمل كدة !! ده مش شيطان ده اسوء!! اسوء بكتير اوي كمان !؟؟
ماريان بدموع: فضلت علي الحال ده خمس سنين من عمري ! مسجونة بحمل منه او من غيره !! واولد ويتاخد مني من غير ما اشوفه !! خمس اجنة اتحرمت منهم وحتي مش عارفة اتباعه لمين وفين !! حتي اللي كانوا بيجوا علشان احمل منهم كنت بعرفهم شكل وبس من غير هوية ولا اسم !! تخيلي يتاخد منك خمس مرات حتة منك وتروح لغيرك !!
لحد ما ولدت اخر مرة وقتها الدكتور قاله اني حالتي الصحية متدهورة .. واني فيه احتمال لو حملت تاني اموت انا او الجنين ! واني لازم ارتاح فترة كبيرة من غير حمل لان الرحم وصل لحالة حرجة !
ماليكة بإرهاق وحزن: وهو عمل ايه لما عرف كدة !؟؟
ماريان بسخرية : سابني فترة ارتاح واقف علي رجلي واسترد صحتي وجاني بالبديل !! كان وسخ طول عمره وعنده حل لكل حاجة وبيعرف يستغل كل شئ في ايده!! قالي هنكمل شغل زي ما احنا بس من غير حمل!! دعارة وبس!؟
ماليكة بتقزز وكره لاكتر انسان حبته والنهاردة بتكرهه وبتتمني لو كان يعيش لحد ما تشارك في موته وتشفي غليلها من كل اللي عرفته عنه !؟.
ماليكة : ووافقتي وكملتي طبعا بسبب التهديد القديم مش كدة!؟
ماريان بملامح قوية وغاضبة: كنت فوقت وقويت واتعلمت منه المكر والحيلة !! كنت بسجله اي كلام بينه وبين اوي واحد بيجي علشان احمل منه صوت وصورة !! ولما كان بيجيني علشان ياخد مزاجه كنت بقلب في تلفونه واخدت من عليه ارقام واسماء لناس كتير وشتات توديه في مليون داهية !! واي مكالمة لشغله الوسخ كان بيعملها وهو عندي كنت بسجلها ليه صوت وصورة !! واي اتفاق كان بيتفق معايا عليه كنت برضوا بسجله ليه صوت وصورة !! جهزت نسخة من كل التسجيلات والشتات اللي معايا وسبتها ليه ومشيت وهددته انه لو فكر يفضحني او يفضح اهلي هفضحه واسجنه باللي معايا والاهم ان الناس اللي كانت متورطة معاه ماكنتش هتسيبه يعيش!! كانوا هيقتلوه لانه فضحهم كنت هنشر صورهم وڤيدوهاتهم معاه والكل يعرف وساخته ووساختهم !! خصوصا ان ماكنتش لوحدي اللي بيعمل معايا كدة بنات كتير كانوا نفس الحال ومش كل الاجنة بتتباع للتبني زي ما كنت فاكرة !!؟
ماليكة بدهشة: اومال بيتباعوا ليه غير كدة !؟
ماريان بحزن: فيهم كانوا بيتباعوا لوكالات اجنبية بستخدمهم في ابحاث وتجارب !! زي الفران كدة !؟
ماليكة مسكت رأسها بشتات وتيه وصدمة قوية : مستحيل!! انا في كابوس!! يارب يكون كابوس وافوق منه!! ازاي دول محسوبين من البشر وعايشين معانا ازاي!!؟
رفعت عيونها لمريان بحزن: ورضي بالامر الواقع وبعد عنك فعلا !!؟
ماريان اتنهدت: عرف طريقي طبعا ووصلي وحاول معايا كتير لكني كنت دايما اطرده واهدده !!
ماليكة بفضول: وعشتي ازاي وكملتي حياتك ازاي !! اخدتي منه ثمن السنين دي !؟
ماريان بإنكسار: تفتكري هاخد ثمن ولادي !! هقبض ثمن حتة مني اتاخدت مني غدر واتباعت !! هقبض ثمن شرفي اللي لطخه ووسخه بقذارته وداس عليه هو وغيره!!؟
ماليكة : طيب كملتي ازاي !؟
ماريان : وقتها ماكنش فيه قصادي غير ماما ! كلمتها واترجتها تسامحني !! رفضت في البداية لكن غريزة الأمومة والعاطفة اللي جواها اجبرتها تسمعني وتقابلني !! قابلتها وحكيت ليها كل حاجة !! اتوجعت علشاني ضعف وجعها مني لما هربت وموت بابا بحسرته !! ادتني فلوس وجابتلي شقة اعيش فيها بعيد عن اخواتي وعن اي حد يعرفني !! وفتحت جاليري بعمل فيه شغلي اللي بحبه !! وعشت فترة وحيدة رافضة حتي اصاحب اي حد او اعرف اي حد جديد !! كرهت الناس والبشرية كلها !! فقدت ثقتي في كل الناس الا امي!!! لحد ما ظهر في حياتي أكرم جوزي !! اتعرفنا بسبب الشغل !! هو دكتور انسان لمن مهوس بالانتيك والقطع النادرة !! في الاول كنت خايفة ورافضة اطمن لاي حد او ادخل اي مخلوق حياتي!! لكن أكرم مختلف !! انسان محترم !! حبني بجد !! لكن طبعا كان مستحيل احكي ليه عن كل اللي حصل ! اكتفيت بس بالجزء الاول من الحكاية! اني هربت من اهلي بسبب واحد حقير خدعني واتجوزنا عرفي وبعد كدة اتطلقنا !! كان طبعا مصدوم ومتشتت في الاول لكن حبه ليا كان اكبر من كل حاجة!! وثق فيا وصمم نتجوز واتجوزنا رسمي وماما حضرت الفرح لكن طبعا فهمته ان مش لازم اخواتي او عيلتي يعرفوا اني عايشة !! وافق ورضي وحاليا احنا منتظرين بيبي !! انا حامل في الشهر الرابع !!
ماليكة ابتسمت من بين دموعها : بجد !! انا حقيقي مبسوطة انك قدرتي تقومي بالشكل ده وتحاولي وتقفي علي رجلك وتكملي حياتك من جديد!! ربنا يسعدك يا ضحي وتولدي بالسلامة!!
ماريان ابتسمت: حلو الاسم منك يا ماليكة !! بس تفتكري بعد كل اللي حكيته ليكي ده !! هقدر اسامح مالك !؟ تفتكري !؟؟
ماليكة حركت راسها بنفي: مستحيل !! لو كنت مكانك كان مستحيل اسامحه ولو بطرفة عين !! عندك حق!؟ علشان كدة كنتي انتي بالاخص مشدد اني احاول معاكي تسامحيه دلوقتي عرفت السبب!!؟
ماريان اتنهدت: ياريت موته كان علي ايدي !! ياريت!
ماليكة بحزن: اهو مات في النهاية والدنيا كلها خلصت وارتاحت منه !! انا هقوم بقي طولت عليكي وارهقتك ووجعتك !! انا اسفة يا ضحي !؟
ماريان ابتسمت : كدة هتخليني اتعود علي الاسم من تاني وانا خلاص اتعودت علي ماريان !؟
ماليكة بحنان: مش مهم الاسم!! المهم انتي!! انتي تكوني بخير وسعيدة!! وعموما انا هسيب ليكي رقمي ياريت من وقت للتاني نتكلم واطمن عليكي ! ولو تسمحي ليا لو ينفع ابقي احضر احتفال البيبي لما يوصل بالسلامة واطمن عليكي وعليه ممكن !؟
ماريان بتأكيد: طبعا تحضري وهنتكلم كتير قبلها ونشوف بعض لازم اعرف حكايتك انتي كمان انتي وعدتيني !؟
ماليكة بوجع: حاضر !! ححكيلك كل حاجة اكيد مع السلامة اشوفك علي خير !!
*****🌹بقلم ربحانة الجنه🌹*****
وسط جاليري ضخم متنوع الاغراض كانوا الاتنين منهمكين بتركيز في الاختيار بين التصاميم المحببة ليهم بحيرة واعجاب..!!
شذي: ايه رئيك انا حابة الاوضة دي اكتر ...اللون الشامبين ده انا بعشقه ومناسب لاوضة النوم انت رئيك ايه!؟
رسلان بإعجاب وتركيز في الكتالوج اللي بين ايديهم !!
رسلان ابتسم: فعلا هي لطيفة اوي وشبهك كدة مطرقعة ولونها جديد وغريب !!
رفعت حاجبها بغرور وغيظ!!
شذي: انا مجنونة وغريبة!! عموما ايوة انا غريبة عندك مانع!؟؟
رسلان ابتسم بهدوء واعجاب: دي اكتر حاجة شدتني ليكي وحبتها فيكي!! كل شئ فيكي عكسي تماما كأنك جيتي حياتي تكملي الناقص والمفقود فيها !! جنونك عكس عقلي!! شقاوتك عكس هدوئي !! ضحكتك وخفة دمك عكس صمتي وجدية حياتي!! انتي الغرابة اللي فيكي كانت هي المفتاح اللي فتحلي باب السجن اللي كنت حابس نفسي فيه!! انتي غيرتي فيا حاجات كتير وجرأتيني علي حاجات ما كنتش اتخيل اني اقرب منها او حتي افكر فيها في يوم !؟
شذي بتسمعه بإعجاب وخجل وابتسمت !!
شذي: انت انسان مميز يا رسلان في كل شئ!! مش عارفة هو التناقض اللي في طباعنا وفي حياتنا ده هو اللي قربنا لبعض ولا هو مجرد قدر!؟
واختفت ابتسامتها وركزت في عيونه بحيرة وخوف!!
شذي: رسلان هو انت ممكن بعد الجواز تتغير !؟
رسلان عقد حاجبه بدهشة : اتغير!! اتغير ازاي وليه مش فاهم سؤالك ! اتغير في حبي ليكي تقصدي!؟
شذي بخوف وحيرة: لا مش بس حبك ليا.. انا قصدي انبهارك بيا وبطباعي المختلفة عنك .. إعجابك بحياتي الغريبة عن حياتك ... يعني بعد شوية وقت الانبهار والاعجاب وحب التغير اللي حصل جواك وفي حياتك ينطفي ويختفي وتحن لحياتك انت زمان وتشوف كل حاجة كانت عجباك فيا بقت بتسببلك ضيق ومش مرتاح ووقتها تحاول تعودني علي طباعك انت وحياتك انت !! رسلان انا مش هخبي عليك واظن انا صارحتك بكل شئ من الاول انا يمكن كنت واخدة حريتي من صغري وبسافر وبعيش علي هوايا لكن ما فيش مرة غلطت الغلط اللي يخليني اخجل من اي شئ في حياتي ! لكن يمكن تكون حياتي بالنسبة لناس كتير وانت كنت منهم لوقت قريب.. حياه مجنونة ..تافهة...فيها تحرر زايد وغريب علي بنت شرقية وعلي طباع مجتمع عربي!! علاقاتي بأصحابي ووجودهم المهم في حياتي !! يعني خايفة يجي عليك وقت تحاول تمحيني انا وتطفي حماسي وحيوتي !!
رسلان ابتسم بهدوء: شذي انا لما قربت منك كان بمزاجي مش اجبار منك ! وكمان انا شوفت كل اللي انتي قولتيه وزيادة وفكرت مع نفسي في كل ده ويمكن كمان سألت نفسي نفس اسألتك دي!! بس انا عايزك تطمني انا عمري ما هبقي عايزك نسخة مني..ولا هبقي عايزك واحدة تانية غير اللي انتي عليها وحباها..مش المفروض اي اتنين في علاقة يكنوا همهم الوحيد انهم يغيروا بعض بأي شكل!! كل واحد عايز التاني نسخة مفصلة علي كيفه هو وراحته هو من غير ما يشوف ويراعي مشاعر التاني واحتياجاته!! طيب لما انا كل شئ فيكي مش عاجبني وعايز اغيره ليه قربت منك من البداية وليه دخلت حياتك !! طيب ما الاسهل بقي كنت اشوف واحدة تانية متفصلة جاهز علي طلباتي من غير ما اقرب من واحدة وابقي همي كله ابدلها واغيرها !؟ شذي انتي انسانه زيي تمام مش قطعة انتيك زي اللي مالي المكان حاولينا هنا اختارها وانبهر بيها واشتريها واروح البيت انقلها من مكان لمكان علي مزاجي وممكن كمان احطها في مكان وسط عفش وزوق بعيد عنها وعن تصمميها اللي اتصممت بيه وده في حد زاته هيضيع قيمتها وجمالها والهدف اللي اتصممت علشانه!!؟
قرب منها اكتر واتنهد بحب : شذي انا عمري ما هجبرك علي شئ انتي مش عايزاه ولو في يوم حسيتي انك مش قادرة تكملي معايا عمري ما هغصبك ...هكون اكتر حد يفهمك ويحتويكي ويقف معاكي كمان!!
لكن بالنسبة لحبي وغيرتي عليكي وبعض الحاجات اللي كنتي متعودة عليها قبل ما نعرف بعض اكيد بحكم رجولتي وكمان اني راجل شرقي لازم تتعدل وتتغير ! وده مش تغير فيكي علي قد ماهو تكيف منك لحياتك معايا وكمان انا هغير حاجات فيا وفي حياتي علشان تناسبك !! يعني الموضوع كله تفاهم ورضي ومحبة مش اجبار!؟
شذي ابتسمت براحة واعجاب: ريحتني بجد وانا مصدقاك ومتأكدة انك عاقل وعمرك ما هتظلمني!! اما بالنسبة لموضوع غيرتك دي انا فهماها كويس وعدلت علاقات كتير بأصدقائي الرجالة واللي كان من بينهم واقربهم ليا ياسو وانت عارف كدة كويس!؟
رسلان ابتسم : عارف واخدت بالي كمان ..وصدقيني مافيش مانع اصحابك يكونوا اصحابي لكن في حدود وكمان بلاش كلمة صاحبي دي بتعصبني بصراحة ! يعني نسافر كلنا سوا ...نتقابل ونخرج ..نسهر تمام لكن مش طول الوقت مكالمات في الفون كأنهم بنات اصحابك والمفروض انا اتقبل ده ! ولا كمان اي واحد منهم تضرب في دماغه يعدي عليكي في البيت يجيلك زي الاول وانا مش موجود !! الحاجات دي يا شذي مستحيل اني اقبلها وده مش راجعية مني ولا تعنت !! ده دين واصول وعادات لازم نحترمها ونتقبلها!! لكن غير كدة مهما كانت طباعك ومهما كان جنانك واختلافك انا حابه وقابله وقادر اتكيف معاه !؟
شذي: وانا والله فاهمة كل ده وعارفة انك عندك حق فيه واوعدك عمري ما هعمل حاجة تضايقك او تهز ثقتك فيا !! احنا اصحاب قبل ما نحب بعض ونتخطب !!
رسلان قرب منها وابتسم بهمس: وقريب هنتجوز ما تنسيش دي!؟
شذي بخجل وتوتر: احمم قولي صح هنختار السفرة مودرن ولا كلاسك !؟
رسلان ابتسم: اهربي دايما كدة لما اجبلك سيرة الجواز ! انا مش فاهم هو الكسوف ده ليا انا بس!! والضرف اللي كانوا اصحابك دول وليل نهار مع بعض وتسافروا واكلين شاربين مع بعض ماكنتش بتتكسفي منهم ليه بقي!؟
شذي بحب وهدوء: علشان دول طول عمرهم من صغرنا اصحاب زي اخواتي عمري ما شوفت واحد منهم انه راجل وفيه بيني وبينه مشاعر!! كلامنا وعلاقتنا كانت اكني راجل زيهم او هما بنات زيي فاهم حاجة !؟
رسلان ضحك بقوة: هههههه! عايزة تقوليلي ان ياسو كانت زي البنات اصحابك !؟
شذي ضحكت : هههههه!! لا لا كله الا المجنون ده لو سمعك بتقول كدة هيقتلك او يضيع مستقبلك!! ده الوحيد اللي تقدر تقول كنت انا اللي ببقي راجل زيه ! ياسو ده اطيب انسان ممكن تقابله وكمان اكتر بني ادم مجنون وغبي وقت غضبه ممكن تقابله !؟ بس بجد هو صاحب واخ ما يتعوضش!؟ ياسو ده صديق طفولة وطول عمرنا اخوات ودايما اسرارنا مع بعض وانا اكتر حد كان بيفهمه ويتحمل غباءه ومخه المتشقلب ده !! وشاهدة علي قصة حبه هو ونغم من الالف الياء..وبجد بتمني ازمة نغم دي يكون ليها حل .البنت دي وقفت جنبه كتير في مواقف صعبة وازمات تهد جبل ...مافيش واحدة تتحمل واحد بكل العيوب والعناد اللي كان عليها ياسو دي... لكن حبها ليه كان كبير ومختلف ...بس الصدمة اللي اخدها الاتنين بحادثة نغم كانت قوية اوي يارسلان!! كأنه اختبار اخير لكل شئ بينهم وهيتحدد عليه حكايتهم وكمان هيكون المقياس الاخير لمقدار حبهم لبعض وتمسكهم ببعض...اوقات كنت بحس ان ياسو بيكفر عن كل غلطاته معاها بوقفته جنبها...لكن مع الوقت وطول المدة اتأكدت انه حب مش مجرد سد لدين عليه!!
رسلان بشفقة: لكن من وجهة نظري هي اتوجعت اكتر منه يا شذي ومن زمان كمان وده من كلامك انتي عن حكايتهم انا مش عارف هو قدم ليها ايه زمان!! لكن كل اللي شوفته من كلامك انها هي اللي كانت بتدعمه وتقدم ليه المساعدة وواقفة معاه في كل لحظات ضعفه!! وده بقي دوره هو حاليا انه يثبت ان هو كمان قادر علي تعوضيها عن كل وجع كان هو او حتي غيره اتسبب فيه ..
شذي بحزن : ياريت يا رسلان ياريت !! ياسو انطفي واتبدل كأنه واحد تاني من وقت حادثة نغم ..تحس ان الضحكة غابت عنه وعيونها الحزن ساكنها طول الوقت..
رسلان قرب منها بغيره: علي فكرة بقي انا بدأت اغير من ياسو بجد!! يعني انتي واخدة بالك من الحزن اللي في عيون حضرته !؛ ومش واخدة بالك من الشوق اللي في عيوني انا واني هتجنن ونخلص الشقة دي بسرعة ونتجوز وانتي مبهدلاني وراكي في المولات والمحلات علشان أدق التفاصيل اللي مش عارف هنستفاد منها ايه دي كلها!!
شذي بخجل: احممم !! اولا بقي قولتلك ياسو ده بالاخص اياك تغير منه !! كمان هو انت سيادتك اللي مش واخد بالك انك عمال ترغي ومعطلنا عن اللي ورانا!! خلينا نخلص احنا لسة قصادنا حاجات كتير !؟
رسلان رفع حاجبه بدهشة: انا!! انا برضوا اللي مأخرك يا مجنونة!؟
شذي ببراءة: ايوة انت اللي مأخرنا!! واتفضل بقي قدامي خالينا نشوف هنختار ايه !؟
رسلان ابتسم بإستسلام: ماشي يا ستي اللي انتي شيفاه بقي انا يبقي انا !!! اتفضلي يا هانم لما نشوف اخرتها معاكي !؟
******🌹بقلمي ريحانة الجنه🌹.....