رواية رحم للايجار
الفصل الثالث والستون 63
والرابع والستون 64 الجزء الثالث
بقلم ريحانة الجنه
((حب الفرسان))
شايف في عيونها الحزن ..وملامحها مسيطر عليها الحيرة والتفكير والتيه!!!
يمكن كان بيتمني انه يكون أول حبيب ليها ومشاعرها ليه لوحده!! ما كنش حابب انه يكون في الصراع والحرب دي كلها علشان بس يحاول يقرب منها .فضلا عن إنه يخليها تحبه وتتعلق بيه!!
الازمة انها مش مجرد واحدة مجروحة وخارجة من تجربة مريرة لا !! دي عاشقة ومغرمة لكن موجوعة ومحتارة وحزينة!!
بيتمني يشوفها نسيت وتخطت المرحلة دي والحكاية كلها وتبدأ معاه من جديد!! لكن هو للاسف قصاد سد منيع وقوي ...وهو خصم شديد وشرس!! شديد وشرس في حجم حبها ليه وتعلقها بيه حتي برغم جرحه ليها والوجع اللي اتسبب فيه!! لكن لسة مكانه محفور جواها وذكرياته مطرداها في كل مكان ..وكل حوار ..وكل موقف...
اتنهد بحزن وابتسم بخفة وهدوء وهو بيتأملها وهي بتستعد لتسجيل الاغنية الجديدة!!
مرتضي بحب: هاه يا فنانة!! مستعدة للتسجيل!!؟ ولا تحبي نعيد بروڤة تاني !!
چنا ابتسمت بلامبالاه واتنهدت: لا يا مرتضي جاهزة بلغهم اني داخلة اسجل ...
مرتضي اتنهد: ليه اختارتي الاغنية دي بالاخص يا چنا!! انا وقتها عرضت عليكي أكتر من أغنية ويمكن كنت شايف ان كان فيه أغاني تانية مناسبة للجو الصيفي اللي احنا فيه وللحفلات اللي جاية ليه اختارتي الدراما والحزن!؟
چنا اتنهدت بوجع وابتلعت غصة آلم وفراق : يمكن لاني حستها أكتر!؟ ويمكن لانها شبهي!! ويمكن لانها فيها أمل برغم الحزن!! مش عارفة يا مرتضي صدقني!! لكن اول ما سمعتهاني حستها اوي ولمست قلبي!!
مرتضي قرب منها بحزن وتمني: چنا انتي لازم تنسي أكمل!! صدقيني ضروري تبدأي من جديد!! مش لازم أبدا توقفي حياتك ودنيتك علي شخص ما شوفتيش منه غير الاذي والجرح !! انتي من حقك وحق نفسك عليكي تسلميها لإنسان يحبك ويختار راحتك وسعادتك حتي لو علي حساب نفسه!! مش شخص أناني ومغرور كل الدنيا لازم تكون خاضعة ليه ولرغباته هو بصرف النظر عن مين اللي هيتألم قصاد رغبته دي مش مهم!! المهم هو وبس!! بصي حاوليكي وشوفي الناس اللي بتحبك بجد!! يمكن تلاقي الانسان اللي يتمني رضاكي وسعادتك حتي لو علي حساب سعادته هو !!
چنا اتنهدت وابتسمت بحزن: مرتضي انت تعرف سبب طلاقي من أكمل!!؟
مرتضي عقد حاجبه بدهشة: أيوة علشان هو مش بيخلف !! ده اللي سمعته وعرفته !! وإنتي من حقك تتجوزي وتخلفي وتعيشي حياتك بشكل طبيعي!! لكن هو إنسان اناني عايز يحكم عليكي تعيشي محرومة طول عمرك من الاطفال!! هو فيه سبب أكبر من كدة ولا أهم !!؟
چنا ابتلعت آلمها وجرحها بقوة وتماسك: بس مش أكمل لوحده اللي مش بيخلف يا مرتضي!!
مرتضي بشك وصدمة: تقصدي إيه!!؟
چنا بتمحي دمعة هاربة من عيونها بتماسك وسط ضعفها: أنا كمان مش بخلف لاني فقدت الرحم وحاليا أنا مستحيل أكون أم!! تفتكر مين الشخص اللي ممكن يضحي بسعادته ورغبته كأب ويتجوزني ويتحمل إنه يعيش حياته كلها من غير ما يكون أب ولا ليه أولاد؟!؟
وقتها صدمة مرتضي افقدته التركيز وقعد مكانه بتعب وإهمال وسط دعشته: بس!!! بس والدك الاستاذ حمزة ما قاليش حاجة زي دي!؟ ولا كمان مدام فتون!! يعني إنتي عقيم زي أكمل!!؟
وقتها قربت منه بغضب وعيون دامعة وملامح شرسة: أيوة انا وأكمل زي بعض وده قدرنا ونصيبنا...وأي حاجة تخصنا ما تخصش أي مخلوق غيرنا...أنا لو كنت قولتلك دلوقتي ده علشان بس تبطل تحاول ترقص علي جثة حكايتي مع أكمل !! او تتخيل انك هتكون الفارس النبيل اللي علي عكس كل صفات الانسان الفاشل اللي كنت متجوزاه!! ولا تتخيل ان مجرد فروسيتك المزعومة دي هتكرهني فيه او تخليني انساه واتبهر بيك وبمشاعرك!!
مرتضي أنا عايزة افهمك حاجة انا إنسانه شبعانة حب ومشاعر من أول عائلتي أبويا وامي وكمان جدي وجدتي اللي شوفت الحب والتضحية الحقيقية وبجد في حياتهم وسط بيتنا وعائلتنا ...لحد أكمل اللي مش عاجبك ده!! أكمل يمكن يكون غشيم !! يمكن يكون متسرع!! يمكن يكون شرس ومجنون!! يمكن كمان مغرور اوقات كتير!! لكن مش مخادع ولا كداب ولا منافق!! أكمل حبني وعشقني أكتر ما أي انسان ممكن يجي بعده ويحبني ويعشقني!!؟
اللي بيني وبين أكمل كبير وكتير اوي من أي واحد او اي حاجة تقدر تمحيه او تنسيني !!
سواء وجعي منه او قراري في بعدي عنه او حتي اني ارجعله ده بتاعي انا وهو وبس مش ملك حد غيرنا ولا من حق أي حد غيرنا انه حتي يدخل فيه !! وعايزة اقولك معلومة صغيرة يمكن توفر عليك حاجات كتير ومجهود أكبر!! أنا سواء كان أكمل في حياتي او اختارنا انا وهو إننا نبعد عن بعض !! أنا مستحيل هيدخل حياتي راجل غيره!! لاني ببساطة مابحبش الخيانة !! علشان أنا عمري ما ححب راجل غير أكمل حتي لو كنت اختارت ابعد عنه ده مش هيمحي حقيقة حبي ليه!! ولو انا فكرت ارتبط بغيره يبقي أنا كدة بخون الانسان ده لاني لا هقدر أحبه ولا أقدمله حب ووفاء ...وأكمل هيفضل جوايا وفي قلبي وقتها أنا هبقي بخونه بحبي لأكمل وبخون أكمل بإرتباطي بغيره وبخون قلبي لاني هدمره في دوامة هو مش حملها ولا مستعد ليها!!؟
بعدت عنه بتعب واتنهدت : أنا هدخل اجهز للتسجيل ياريت تحصلني بسرعة..
مرتضي وقتها كان ما بين غيران !! مصدوم!! محتار!! متغاظ كمان!! ازاي واحدة تبعد عن واحد وتختار طلاقها منه وكمان في ظروفها دي وهي بتحبه الحب ده كله!! وبتدافع عنه الدفاع الشرس ده!؟؟ ازاي قادرة تبعد عنه مادامت بتحبه!؟ وليه لما هي عشقاه كدة مش عايزة ترجعله!؟؟
هو لا فاهم ولا هيقدر يفهم!! لان ببساطة هو مش عارف تفاصيل الحكاية كلها !!
كمان هو وكتير غيره مش هيقدروا يستوعبوا ان الانسان ممكن يكون روحه في حبيبه وبيعشق حتي صدي صوته !! لكن مجبر يبعد عنه بإيرادته واختياره!! احساس صعب ومؤلم ومش بسهولة يتوصف ولا يتشرح!! لكنه فقط يتحس!! الحب والوجع بيتحس أكتر ما يتوصف!! اوقات الوصف بيظلم الاحساس ويضيع جماله ودقته!! حتي لو كان احساس بالوجع!!؟
وقفت قصاد المايك واخدت انفاسها بحنين ودموع غلبتها لمجرد انها بدأت الموسيقي تداعب مسامعها بهدوء !!!
وبدأت الكلمات تتغني علي شفايفها بحنين وإشتياق ووجع!! وهي كل خيالتها وكل ذكرياتها بتنعاد قصاد عيونها بوضوح!!
وبينا معاااد لو إحنا بعاد!! أكيد راجع ولو بيني وبينه بلاااد !!
دموعها زادت غصب عنها وهي بتتمناه معاها !! شايفاه وشايفة ضحكته وابتسامته !!!
قبل ما تيجي علي الاستديو قلبها اخدها غصب عنها لشقتهم والحنين غلبها وهي واقفة وسط المكان اللي جمعهم وشهد فرحتهم!! شهد أول ليلة ليهم كزوج وزوجة!! شهد خناقهم!! شهد جنونهم!! شهد مشاكستهم!!! شهد حتي رغبتهم في بعض!! كانت بتشوف البومات صورهم سوا وهي بتتوجع من القدر اللي فرقهم!؟ بتتمني المعجزة اللي تحصل وتخفف جرحها منه وتنسيها انه دبحها بقوة وتقدر ترجع من تاني ليه!؟ وحشتها ليه ولهفتها عليه كانت واصلة لمنتهاها !!؟
مش شايفة راجل غيره! مش قابلة حبيب من بعده!! مش متخيلة نفسها بين احضان راجل تاني غيره هو!! هو وبس !! مهما كانت المغريات!! مهما كانت التضحيات اللي بتتقدملها!! لكن هي مش شايفة ولا عايزة غيره؟؟ هو وبس الغبي !! المتسرع!! الهمجي!! العصبي!! المجنون!! لكن هو الوحيد اللي عشقته!! هو الوحيد اللي ملك قلبها وعقلها!! هو وبس!! أكمل!!؟
قصاد عيني في كل مكان !! ومن تاني أكيد راجعين ..انا دايب وكلي حنين ولا عمري ابيع لو مين قصاد عيني!! ومش قادر علي الايام وطول ليلي ولما بنام قصاد عيني في كل مكان!!
في مكان غير المكان !! وبلاد غير البلاد!! ووسط ناس غير الناس كان واقف قصاد البحر في دبي وحيد!! حزين !! موجوع!! عقله لا قادر يبطل يفكر فيها!!؟ ولا قلبه بيبطل حنين ليها!!؟
برغم انها آخر مرة جمعتهم سوا كانت قاسية اوي!! وجرحته بقوة!! الا انه من جواه بيعزرها لان جرحها مش هين !! ووجعها مش سهل !! كمان ذنبه وخطأه في حقها مش قليل ولا يتغفر بسهولة!! لكن هو دائما بيراهن علي شئ واحد بس !! حبها ليه وحبه ليها!! حبهم لبعض اللي مافيش مخلوق ولا شئ يقدر يشكك فيه او يكدبه!!؟
رفع ايده قصاد عيونه بحنين وهو بيبتسم لخاتم جوازهم اللي محاوط صباعه بإحكام وتمسك!!
وقتها لمح إمراة جميلة !! ومثيرة بتحاول تلفت انتباهه بنعومة وإثارة وغمزة عيون تجذب أي راجل مكانه او بمعني أدق اي ذكر بيستجيب لاي انثي بتناديه او بتغويه!! لكن للاسف من حظها السئ انه كان أكمل!! اللي برغم عيوبه الكتير الا انه فيه ميزة مهمة ونادرة جدااا !! الا وهي الوفاء!! الحب اللي مسيطر علي قلبه وجوارحه لچنا واللي واقف حاجز وسور منيع بينه وبين أي ست غيرها واي انثي مهما كانت مكتملة او متفجرة الانوثة !!
هو مش عايز ولا راغب ولا دايب غير فيها هي !! هي وبس!! چنا اللي قلبه حبها من وهي طفلة لحد ما اصبحت مراهقة واخيرا اصبحت أنثي جميلة وناعمة ومثيرة في نفس الوقت!!؟
وقتها ابتسم ليها بخفة وأسف ورفع ايده وشاورلها بخاتم جوازه من چنا وكأنه بيقولها أسف!! انا الرجل الخطأ!! انا مخطوف ومتقيد بحبها ومش شايف غيرها!!؟
وقتها ابتسمت ليه بأسف وبعدت وكأنها بتحسد صاحبة الخاتم سعيدة الحظ!؟؟
أكمل وقتها ضم ايده بالخاتم لقلبه وغمض عيونه بحنين ليها !! وشوق غريب بيمزع ثنايا قلبه وبيتمني يشوفها او حتي يلمح طيفها!!؟
جواه شئ بيأكدله إن الحب بينهم مستحيل ينتهي بالسهولة دي وأكيد مش دي النهاية !!؟
في يوم هنعود ده بينا وعووود!! و في غيابه أكيد لسة الامل موجود!!
قصاااد عيني في كل مكان !! ومن تاني أكيد راجعين!! انا دايب وكلي حنين !! ولا عمري أبيع لو مين قصاد عيني!! ومش قادر علي الايام ولا يوصف هوايا كلام !!
قصاااد عيني في كل مكان*
انتهت من تسجيل الاغنية وسط حنين!! ودموع!! وحيرة !! وتفكير مالوش حدود!!
انتبه من وسط حنينه وذكرياته ليها علي رنة فونه خرجه من جيوبه وابتسم براحة ورد علي المكالمة !!!
أكمل: حبيبتي انا!! وحشتيني !!
لكن الصدمة كانت في الرد اللي وصل لمسمعه!! والوجع اللي انغرس في قلبه !!!!!!؟
*** بقلم ريحانة الجنه***
كانت الطائرة بتستعد للهبوط داخل المطار وهي كانت بين ضلوعه وحضنه زي طفلة بريئة بتخاف دائما وتهاب اللحظة دي !!؟
ياسو ضاممها بحنان وابتسم: هو إنتي مش هتكبري بقي!؟؟ لسة زي ما إنتي بتخافي من لحظة طلوع الطائرة ولحظة هبوطها!؟؟
نغم بتتخبي في حضنه بهروب: اسكت بقي الله يخليك!! انا بكره اللحظة دي بحس وقتها إن قلبي بيقع في رجلي!!؟
ياسو بمزاح: سلامة قلبك ورجلك يا روحي !؟ شالة يارب قلبي انا ورجلي انا!؟ ولا روحي تتألم ولا تتوجع!!؟
نغم رفعت عيونها ليه بضيق ونفي: لا!! اوعي تقول كدة ابدا قصادي!! عمري ما اتمنالك اللي انا فيه ولا تشوفه عمرك!! ده انت عكازي وسندي يا ياسو!؟
ابتسم وهو بيداري حزنه ووجعه عليها بحنان: وهفضل عمري كله سندك وعكازك يا نغمي!! وحياتي بقي تتعودي وتتعاملي بشكل طبيعي بقي كفاية كل كلمة تاخديها علي إحساسك بالشكل ده!!؟ اللي إنتي فيه مؤقت وبيتحسن!؟ ومع الوقت وباقي العلاج الطبيعي والجلسات هترجعي تبقي طبيعية من تاني!!؟ بلاش تتعبي نفسيتك وتتعبي قلبي معاكي وعليكي!؟
نغم بتخبي دموعها بوجع: اااانا مش قصدي حاجة!! اااانا بس مش بحبك تتمني لنفسك اي حاجة وحشة!! كفاية انا واللي حصلي!؟
ياسو انتهد: وهو اللي حصلك ده كان بسبب مين !! وعلشان مين!!؟ مش بسببي انا وعلشان غبائي!؟
نغم وقتها انتبهت لهبوط الطائرة واعلان الكابتن لوصولهم بخير وسلام!؟
نغم بدهشة: غريبة!! ماحستش بالخوف بتاع كل مرة!!
ياسو ابتسم: علشان كنتي في حضني وباصة في عنيا!! انا عنيا ليها سحر يا روحي ما يتقومش!؟؟
نغم رفعت حاجبها بغيظ: اوعي تفتكر اني هعديلك معاكسة المضيفة علي خير!! ده انا بس اروح البيت وانا هوريك النكد علي أصوله يا ياسين!!؟
وقتها قربت منهم المضيفة بإبتسامة: حمد لله علي السلامة يا جماعة!!
ياسو بغزل : الله يسلمك يا بطل والله الرحلة دي ما كان ليها طعم من غيرك !!
وقتها نغم ضربته في جنبه بقوة واظافرها علمت في جسمه بشراسة !!
ياسو اتألم بخفوت وتوتر: احممم قصدي يعني ان ياريت كل الابطال!! قصدي كل المضيفات تشوف شغلها زيك كدة!! إنتي فالتة والله !!؟
نغم ضربته تاني بقوة وغيظ وابتسمت بغيظ وغيرة : احممم ايوة عنده حق !! ده حتي إنتي كنتي سايبة كل الركاب ومركزة معانا احنا وبس!! وكأن مافيش غيرنا في الطيارة!! حقيقي بنشكرك!!؟
ياسو بيتألم من اظافر نغم اللي غارزة في جسمه بغيظ: احممم ااايوة والله بس الله يخليكي تمشي دلوقتي علشان انا خلاص مش قادر هموت!؟
المضيفة بدهشة: خير مالك!! انت تعبان!!؟
ياسو بمعاكسة وغزل ضغط علي شفايفه بإثارة: هو انا تعبان بعقل!!؟ احممم قصدي تعبان من الرحلة يعني وعايز بقي انزل علشان كدة ححتاج عشر غرز في جنبي اللي اتشوه ده!!؟
نغم بغيظ وهي بتغط علي أسنانها بقوة: سلامة جنبك يا حبيبي نروح البيت وححطلك عليه مياه نار!! قصدي مضاض للتعب يا تعبان انت!!؟
المضيفة ابتسمت : طيب انا بس بارجاكم تنتظروا نزول باقي الركاب علشان المسعفين يطلعوا وينزلوا المدام !؟؟
ياسو اتحولت ملامحه بضيق: هو مش واحنا هناك في مطار المانيا قولتوا كدة وانا رفضت وصممت وشيلتها انا وطلعتها الطيارة!!!
المضيفة بإستسلام: حقيقي اسفة لحضرتك بس هناك كان النظام مختلف !!! هنا في مطار القاهرة مش هينفع!؟
ياسو بغضب: اظن انا اللي احدد ايه ينفع وأيه مايتفعش مش انتي ولا حتي شركة الطيران اللي مشغلاكي!! وانا اصلا غلطان اني حجزت علي شركة طيران مصرية !!
المضيفة بإبتسامة وهدوء: طيب ممكن حضرتك تهدي ومن غير انفعال!!؟ انا هبلغ الكابتن يجي ويتفاهم مع حضرتك!؟
قرب منهم مهاب وچودي : خير يا ولاد فيه إيه!؟؟
ياسو بضيق: مافيش يا باشا هي رحلة مالهاش ملامح من أولها!! اللي عملناه في مطار المانيا هنعيده هنا تاني شكلنا بس علي انيل!! علشان أنا مش طايق هدومي أصلا وأي حد هيطلعي هنا هرميه من باب الطيارة اقسم بالله واولهم انتي بقي إيه رئيك!!؟
نغم كانت بتخفي ضحكتها بفرحة وهدوء لمحها ياسو من جنب عيونه !! مال عليها بخفوت وبهمس: طبعا علي قلبك عسل كدة وانا برفص النعمة برجليا مش كدة!!؟
نغم بهمس: نعمة لما تلهفك ياكشي تتقلب معاها من باب الطيارة لو فضلت تعاكسها كدة يا بتاع الستات انت يا سافل!؟
ياسو بإثارة: بصراحة البت تهوس !! طب بذمتك مش إمكانيتها جامدة!! دي فاضلها تكة وتنور بنت الجزمة!!؟
نغم سحبته من هدومه بقوة وغيظ: يارب تنور انت وهي بحريقة يا ياسو يارب !!!
ياسو غمزها بمشاكسة: ما أنا قلبي مولع حريقة بحبك يا روحي !!
مهاب سحبه بغيظ من هدومه وقربه ليه: يا ابني ركز معانا وبطل نحنحة!! مش وقتك دلوقتي ليك بيت ابقي اتهبب فيه براحتك !! انت بتبلطج علي مخاليق ربنا ليه!!؟ دي اجرائات وحاجات طبيعة !! وحتي لو عايزين حاجة هتحصل بس بالهدواة والعقل مش بالغباوة وفتحة الصدر بتاعتك دي!! ثم البنت مالها اصلا دي بتقدي شغلها وبس !!؟
ياسو بهمس: ااااخ يابخت شغلها يا عمو والله!! يارتني كنت انا يا أخي!!؟
مهاب بهمس: تصدق !! يارتنا كلنا معاك يا جدع!! دي ترجع الواحد شباب في 3 دقائق!!
ياسو عقد حاجبه بمزاح: لا هو انت منهم يا عمو!! وانا اللي كنت فاكرك اسد وقدها!؟
مهاب بغيظ: بس ياغبي!! انا قصدي سرعة الاداء مش أكتر انت اللي عيل سافل ودماغك بتحدف شمال!؟؟
ياسو حك شعره بحرج: اححممم ايوة ..ايوة فهمت خلاص!! المهم انك بترفع رأسنا يعني وشايف شغلك!؟
مهاب: يا ابني الله يخربيتك هو ده وقته!؟؟ خلصنا في شبكتك السوداء دي!!؟
چودي قربت منهم : هو فيه ايه!! هو ده وقت وشوشة!! انتم بتقولوا ايه!؟
مهاب: احممم لا ابدا ولا حاجة!! أصل ياسو عايز هو اللي يشيل نغم زي اول الرحلة!!؟
چودي بقلق: طيب يا ابني ما تخليهم يطلعوا السرير هنا ويشوفوا شغلهم !! انا خايفة عليها وعلي ظهرها !! كفاية انها صممت تقعد طول الرحلة كدة مش تنام في المكان المخصوص ليها!! ربنا يستر من عندها وعندك ده!!؟
ياسو قرب منها وبهمس: أنا غصب عني والله خايف تزعل ويصعب عليها نفسها!! مش عايزها تشوف نظرة شفقة ولا استغراب من حد تضايقها وتوجعها!! لكن وانا شايلها في حضني هي مش بتكون مركزة مع حد وبتبقي مطمنة!؟ كمان أي حد هيتخيل انها مجروحة !! رجلها اتلوت او اتكعبلت!! لكن السرير والمسعفين واضحة اوي!!؟
چودي بصت عليها يشفقة وضيق واتنهدت: لا اله الا الله!!! ربنا يستر بقي !!
المضيفة كانت استدعت مسؤل من المطار وكابتن الطائرة كمان!؟
ياسو قبل ما يتكلم منعه مهاب واخدهم بعيد عن نغم ومسامعها وعرفهم بنفسه وفهمهم كل شئ بهدوء!!
المسؤل: بس حضرتك دي مسؤلية كبيرة !! احنا متبلغين من مطار برلين انها حالة حرجة وتستدعي الحذر !! لكن لو انتم مصممين يبقي لازم زوجها يمضي علي الاقرار ده !! وإن اي ضرر هيحصلها بسبب النقل الخطأ مش تقصير من الشركة ولا مسؤلين عنه!؟؟
ياسو: وانا موافق..هات الاقرار!
وبالفعل ياسو اخد الاقرار ومضاه وسط نظر نغم ليه!! وقرب منها بهدوء وحنان وابتسم !!
ياسو بحب: روحي جاهزة!!! كلها دقايق ونرجع بيتنا حبيبنا ونبقي لوحدنا !!؟
نغم حركت رأسها بموافقة وابتسمت بدموع: جاهزة!!؟
ياسو نزل علي ركبته قصادها بضيق وهو بيمحي دموعها: ليه الدموع بس!! مالك يا نغم ؟؟
نغم بدموع وإنكسار: أنا بقيت حمل كبير اوي عليك وعليكم كلكم!! انا مش عايزة اشوف حد.ولا حد يبص عليا وأنا كدة ارجوك يا ياسو !! روحني البيت بسرعة من فضلك!؟؟
ياسو ضمها لحضنه بقوة ووجع: حاضر يا روحي!! حاضر أنتي بس خاليكي في حضني وغمضي عيونك ولا تبصي لحد ولا تفتحيها الا لما نوصل العربية اتفقنا!!؟
نغم بدموع وانكسار : حاضر بس أنا عارفة إني هتعبك!! هتشيلني كتير كدة!! حقك عليا أنا!! اااانا اسفة!!
وقتها انفجرت بالدموع أكتر والحزن وهو ضمها أكتر بحنان: شششش..بس ..اهدي بقي وبطلي عياط !! هزعل منك كدة وهسيبك هنا واروح لوحدي أيه رئيك بقي!!؟
نغم بتحاول تبطل دموع: خلاص مش هعيط!!
ياسو خرجها من حضنه بحنان وضم ملامحها بقبضته الحانية وإبتسم : نغمي أحنا مش لسة كنا بنقول إني سندك وعكازك!!؟ يبقي ما تبكيش تاني ولا أشوف الانكسار ده في عيونك وملامحك!؟؟ ارفعي رأسك زي ما أنا هفضل طول عمري رافع بيكي رأسي وشايلك في عيوني قصاد كل الناس!!
نغم بصت في عيونه بحزن وسط دموعها: بحبك♥️
ياسو ضم إيديها لشفايفه وباسها بحنان: بعشقك♥️ اشوف بقي إبتسامتك مش نازل انا من ام الطيارة دي إالا لما تضحكي!؟
نغم ضحكت من بين دموعها: إنت مجنون!! بس بحبك !!
ياسو شالها وضمها لحضنه بقوة وخبي عيونها في دفئ ضلوعه... ونزل بيها من الطائرة...وكالعادة كانت النظرات والاستغراب والدهشة غالب علي عيون وملامح كل حد يشوفهم!! هي كانت زي طفلة حقيقي مخبيه عيونها مش عايزة تشوف حد يبص ليها بنظرة تجرحها او توجعها !! حتي لو كانت نظرة شفقة!!
أما هو كان كأنه شايل جائزة او نيشان !! فخور بيها ومبتسم !! لا مالل !! ولا متأفف!! ولا خجلان!! ولا محرج !! بالعكس كان بيمشي بيها خطوات هادية وبطيئة وكأنه بيأكد لكل ناظر ليهم أيوة انا خادمها !! أيوة انا حبيبها!!؟
*******************
انتهي البارت ...تبع 🌺
الفصل الرابع والستون
((حب الفرسان))
((الفصل الرابع والستون))
🌹بقلم ريحانة الجنه🌹.
كان سايق عربيته من المطار من وقت وصوله بجنون ..وقلق وخوف وبسرعة رهيبة لحد ما وصل المستشفي ودخل الغرفة وشافهم كلهم منتظرين في الاستراحة والحزن والقلق علي ملامحهم!! قلبه انقبض اكتر وابتلع غصة حزن ببطئ..
قامت بلهفة وجريت عليه ورمت نفسها في حضنه بحزن وإنكسار ..وكأنها لقت الآمان أول ما وصل وكأنه هو اللي ابوها مش هي اللي أمه!! أيوة هي امه حتي لو كانت مش هي اللي ولدته!! لكنها امه اللي سهرت وربت وإهتمت ...
أكمل ضمها بحنان وخوف : طمنيني هو حصله إيه !!
ريما خرجت من حضنه بحزن وهي بتبكي: تعبان اوي يا أكمل مروان بيروح مني... أنا هموت لو جراله حاجة قلبي مش هيتحمل ...
أكمل غمض عيونه بحزن وخوف واخد نفس طويل بيحاول يتمالك نفسه ويستقوي: انا عايز ادخل اشوفه عايز اطمن عليه!!
أكمل الجد قام بهدوء وقرب منه: مروان في العناية المركزة يا حبيبي مش جوا لان حالته حرجة شوية اخرج روح لسامر وهو هيطمنك عليه...
تسنيم قربت منه بدموع: عامل ايه يا حبيبي وحشتني اوي يا أكمل !! مالك شكلك تعبان ومرهق كدة ليه!!
أكمل الجد بضيق: يعني يا تسنيم واحد جاي من دبي متصربع وخايف علي ابوه عايزاه يبقي وشه مورد والدموية بتنطح منه!!؟
تسنيم بعصبية: الله !! انا عارفة انه خايف وقلقان علي أبوه ماقولتش حاجة!! لكن انا قصدي حالته بشكل عام مش مظبوط !! انت مش واخد بالك الولد شكله ايه!! مش شايف خاسس وممأوت ازاي!! ولا الكبر والنظر اللي ضاع مش مخلينك تشوف كويس!!؟
أكمل الجد بضيق وتأفف: يارب صبرني!! يا ستي انتي هو ده وقته!! ما تخلينا في اللي إحنا فيه !! الراجل بيموت جوا وانتي تقوليلي خاسس وممؤت!!
أكمل قرب من جدته قبل ما ترد علي جده بأي كلمه علشان ينهي النقاش اللي مش في وقته ولا مكانه!!
أكمل بتعب: أرجوكي يا ناناه كفاية !! جدو مش قصده حاجة هو بس قلقان علي بابا شوية ..وانا حبيبتي كويس وزي الفل شوية تعب في الشغل بس وارهاق وقلة نوم مش أكتر... المهم عن اذنكم هروح اطمن علي بابا !!!
خرج أكمل بسرعة ..اما تسنيم التفتت لأكمل بضيق: افهم بقي مالك مش بالع ليا كلمة ليه !! ومتعصب كدة وبتخانق دبان وشك!!!
أكمل اتنهد بنفاذ صبر: علشان انتي مش عارفة تفرقي بين الوضع والمكان والظرف اللي ينفع تتكلمي فيه وتقولي إيه وامتي!!
تسنيم بعصبية: انت قصدك ايه!! تقصد إني ما بفهمش!!؟
أكمل دفن وشه بين كفوفه بتعب واتنهد : إستغفر الله العظيم واتوب اليه!!!
تسنيم بغضب : استغفر كمان ما اهو انا اللي بقيت بحملك ذنوب!!
ريما كانت بتتابعهم بصمت وحزن اتنهدت بوجع وجواها عتاب كبير!! حاسة انهم المفروض يحتوها اكتر ويقدروا وضعها وحزنها وخصوصا تسنيم !! ازاي في وسط المصيبة اللي هي فيها وتسنيم كل اللي فارق معاها حفيدها وبس وكأنها نسيت ان حفيدها ده يبقي إبنها هي كمان مش ابن چنا بنتها وبس!!!
وقتها ريما استأذنتهم بحزن: عن اذنكم هروح اشوف مروان واطمن علي حالته!! اسفة لو كنت معطلاكم معايا وتعباكم لو حابين تروحوا امشوا اكيد عايزين ترتاحوا !! كتر خيركم لحد كدة...واهو أكمل رجع بالسلامة وهيبقي معايا مش هبقي لوحدي!! كمان رعد كان معايا طول الليل ومشي الصبح هو وهمس!! ماتقلقوش !!
أكمل فهم انها زعلانة وشايف انه حقها!! اتنهد بضيق: مافيش بينا الكلام ده يا ريما ولا تعب ..ولا عطلة ..ولا الكلام ده !! احنا كلنا عيلة واحدة مافيش فرق بينا!! انا او رعد اللي فينا موجود يسد!! كمان انتي عارفة مروان يبقالي ايه!! مروان مش مجرد كان زوج چنا الله يرحمها ولا والد أكمل حفيدي وبس!! ده اخويا وعشرة عمري!!
روحي اطمني عليه انتي وتعالي انتي وأكمل طمنونا! احنا موجودين مش هنمشي!!
ريما وقتها اتنهدت براحة يمكن علشان ما كنتش عايزة تشوف اي تغير في علاقتهم وخوفهم علي بعض!! يمكن علشان مش حمل صدمة الفتور وتغير السنين!! ايا كان الاحساس او السبب المهم انها ارتاحت .. هي عايزة مروان يشوف ويحس بكل العيلة وان كل اصحابه واهله حاوليه...مش عايزاه يحس ولو للحظة انه وحيد ..حركت راسها بخفة وموافقة وخرجت بهدوء ..
وقتها أكمل التفت لتسنيم بعتاب: فيه إيه يا تسنيم!! مالك !!؟
تسنيم بحزن ولوم: انا برضوا!! بتسالني انا مالي!؟ إسأل نفسك انت فيه ايه! من وقت ما جينا هنا وانت متعصب ومش طايق مني كلمة وكل شوية تحرجني وتكسفني!! انا عملت ايه لكل ده!! وانت من امتي كدة وبتتعامل معايا بالشكل ده!!؟
أكمل اتنهد بهدوء: انتي اللي من إمتي كدة!! ازاي مش مقدرة حالة ريما وحزنها علي مروان وانتي حتي من قبل وصول اكمل وانتي عمالة تعتبيها وتلومي عليها انها بلغت اكمل وخضته علي ابوه!! وازاي تخليه جاي الطريق كله كدة وهو خايف وقلقان عليه!! واول ما وصل سبتي الوضع الاصلي اللي احنا فيه وكل اللي شاغلك حفيدك خاسس ومرهق وتعبان! معقول ياتسنيم!!؟ ليه تحرجيها وتتجاهلي حزنها وحالة خوفها علي مروان بالشكل ده؟؟
تسنيم ببراءة: ااانا ما قصدش كل ده صدقني... اااانا كل اللي كنت بعتب عليها فيه انها ماكنش لازم تبلغ أكمل بتعب مروان بالشكل ده انت عارفه عصبي ومتهور افرض عمل حادثة وهو رايح المطار ولا حتي وهو جاي منه علي هنا !! افرض ماكنش لقي حجز طيارة بسرعة!! كان هيعمل ايه وهيفضل علي اعصابه لحد ما يحجز ويوصل ازاي!! كمان كان زمانه عمل الف مشكلة وخناقة ! أكمل حفيدك وانت مربيه وعارفه زيي واكتر !! كنت خايفة عليه غصب عني ده هو اللي فاضلي من ريحة چنا!! كل اللي قولته انها كانت تقوله اي حجة يرجع بيها من غير ما تعرفه حاجة ولما يوصل نبقي نقوله!!! كمان لما وصل يا قلبي شكله قطع قلبي خاسس اوي ومرهق وتعبان وعيونه دبلانة!! هو ده أكمل اللي كان ماشاء الله طول وعرض ووسامة قلبي وجعني اول ما شوفته!! غصب عني لقتني بسأله واطمن عليه!!؟ انا ما أجرمتش!! وريما تزعل ليه!! مش هي اللي ربته وبتقول انها زي امه!! لو ده حقيقي هي كمان كانت هتزعل علشانه زي تمام وتحس بالتغير اللي حصله!! انا ام وجدة يا أكمل قلقانة وخايفة علي حفيدها ما غلطتش!
أكمل سحبها بهدوء لحضنه بندم: حقك عليا اسف اني اتعصبت عليكي!! بس حقيقي حالة مروان حرجة اوي!! وانا قلبي مش مطمن وحاسس انها مش زي كل مرة!!
وقتها الباب خبط ودخل رعد وهمس...ومعاهم عدي وعشق..
رعد بهدوء: مساء الخير يا جماعة.
أكمل ابتسم: اهلا مساء النور! كويس انكم جيتم ...مروان سأل عليكم كتير عايزكم ضروري.
عدي بقلق: طمني عليه يا أكمل هو حالته ايه دلوقتي!!؟
أكمل بأسف: حالته صعبة اوي يا عدي ومش مرتاح لحالة الاستسلام اللي هو فيها دي !!
الله !! اومال هو فين مهاب عز الدين!! مروان سأل عنه كتير!!؟
الباب وراهم اتفتح ودخل مهاب ومعاه نغم ...
مهاب بمزاح: ايه مات ولا لسة!!؟
كلهم ضحكوا بيأس منه طباعه هي هي مهما اختلفت المواقف !!!
أكمل بعتاب: ياخي الملافظ سعد!! انت مش هتتغير!!
رعد بسخرية : وهو اللي زي ده هيتغير ازاي وهو ضارب الدنيا طناش ومروق علي نفسه بلمة الستات حاوليه!! هيفضل كدة مصغر نفسه وفاكر روحه عنده ثلاثين سنة المسن اللي بقي جد واحفاده قربوا يخلفوا كمان!! راجل متصابي بصحيح!!
مهاب بهدوء ولا مبلاه اخد نغم بخفة وقعدها وابتسم: تعالي يا روحي ارتاحي انتي لحد ما اشوف العجوز الخرفان الغيران مني ده عايز ايه واجيلك !! اقعدي هنا جنب الستات اللي زي الورد دول!!
والتفت لعشق وغمز لعدي بإعجاب: جون جامد ان جيت للحق يا صاحبي حاجة كدة اكسير الشباب بصحيح يسهله!!
عدي ابتسم: خد بالك بقي علشان بقت مرات اخوك بطل معاكسة مراتك قاعدة اهي اختشي علي دمك!!
نغم بتعب ويأس: والله مراته خلاص نحست يا عدي!! ده هيفضل كدة لحد ما يجلطني او اطب ساكتة بسببه مافيش ست حلوة تعدي كدة من قصاده بسلام ! والغريب انهم بيحبوه حتي البنات الصغيرة بتنسي نفسها معاه تقول بيعملهم سحر!!
عشق ابتسمت: ماهو برضوا يا جماعة ان جيته للحق سيادة اللواء عليه طلة كدة ولا شاب في العشرين وماشاء الله زي القمر وكمان خبرة في الستات ولسانه بينقط سكر! قولولي انتم الستات هتقاومه ازاي!!؟
مهاب ابتسم اكتر وغمزها: والله ماحد سكر الا انتي يا صاروخ !! احمم قصدي يا مدام عشق!!
عدي قرب منه وضربه في كتفه بغيرة: ما تتلم يا جدع انت انا واقف!!!
مهاب بهمس وببراءة: ماهو بصراحة البت جامدة اوي يا عدي!! وقعت عليها فين دي!! بس اخدت بالك وهي بتقولي خبرة!! عليا النعمة البت دي بتفهم!! الا قولي بصحيح احنا اخوات يعني!! انت قادر تسد مكانك ولا الاعصاب باظت والركب خلعت!! اصل البطل ده عايز تسفله صيدلية مقويات وانت يا قلب امك خاسس كدة وضعفان وحالتك تصعب علي الكافر! لو عايز اي مساعدة قول انا اخوك. ستر وغطاء عليك!؟
عدي بغيظ: مهاااااب!!؟
مهاب تجاهل عصبيته وبعد عنه ببراءة وراح لرعد وكأنه ما نطقش بأي شئ!!!
مهاب: قولتي بقي كنت بتقول ايه يا راجل يا عجوز انت!!؟
****🌹بقلم ريحانة الجنه****🌹
كانت واقفة بعيد من خلف الازاز وعيونها علي حياتها كلها!! ايه حياتها!! هي فعلا حياتها كلها بتختصر في الاتنين دول!! مروان وأكمل!! زوج وحبيب حبته بجنون من اول ما بدأ قلبها يحب ويدق !! اتحدت علشانه كل الفروق وكل الصعاب!! اتوجعت بسببه ومعاه وشربت نار الغيرة والقهرة وهي شايفاه بيحب غيرها ويتجوز ويعيش مع غيرها!! حاولت تبعد عنه لكن حبها الاسطوري ليه منعها من البعد!! اجبرها تعيش وتكمل معاه وكل لحظة الغيرة والنار تنهش فيها ببطئ!! حتي لما ماتت چنا وبقي ليها لوحدها!! حزنه وذكريتها معاه فضلت قصادها !! وكأنها لسة عايشة وبتشاركها فيه!! ومع ذالك فضلت تحبه وتعشقه !! والتاني نور دخل حياتها نورها وبرغم انه ابن اكتر انسانه جرحتها واتسببت في غيرتها وحرقة قلبها حتي لو كانت بدون قصد ومش متعمدة لكن حب مروان ليها كان كفيل يخليها تكرها لكن برضوا هي ماعرفتش تكرهها ولا تكرهها ولا تكره إبنها اخدته ..وحبته ..وربته. واحتوته.. وكانت ليه ام بجد.. كل الحب والعاطفة اللي جواها غرقته فيها من غير حساب!حياتها كلها اتقفلت عليهم الاتنين...سخرت حيانها ليهم ولسعادتهم وبس!!
قرب منها سامر وابتسم بخفة: الجميل واقف ليه كدة!! وما تدخلي انتي كمان مع اكمل تطمني عليه!!؟
ريما اتنهدت بتعب وابتسمت : لا هما محتاجين يكونوا مع بعض لوحدهم شوية !! كمان انا متعتي كلها وانا شايفاهم قصاد عنيا كدة مش عايزة اكتر من كدة!!؟
سامر اتنهد بتمني: قوليلي هو فيه ستات زيك كدة تاني!! معقول في حبيبة تحب حبيبها بالشكل ده وبرغم كل اللي انتي شوفتيه لكن تفضلي تحبيه كل السنين دي !!!؟ انتي عملة نادرة اوي بجد!!؟
ريما ابتسمت بحب وهي عيونها علي مروان : انا مش بس بحبه!! انا بعشقه !! مروان ده اول راجل يدخل حياتي واخر راجل! لا حبيت قبله ولا عنيا شافت غيره!! حبي لمروان مش حب عادي ولا احساس ست بجوزها لا!! مروان من يوم ما عرفته وهو وحيد!! وقتها لقيت نفسي حبيبته.. واخته.. امه...وصاحبته..بقي هو حياتي كلها ...انا جوايا عاطفة غريبة ناحيته!! بحسه ابني ومسؤل مني قبل ما يكون حبيبي وجوزي!! مروان ده روحي يا سامر!!
والتفتت ليه وبمزاح: قولي بقي وانت وحبيبة القلب مش ناوين تفرحونا بقي!! أكمل كان قالي ان ربنا فك عقدة لسانها خلاص!! متأخرين ليه بقي؟؟
سامر ضغط علي شفايفه بغيظ من أكمل وهو بيبص عليه من بعيد وبيتوعده : هو سي هباب ده ما بيتبلش في بقه فولة!! لحق قالك!! ده انا قايله سر!!؟
ريما ابتسمت بحب: ياحبيبي عمر الفرح والحب ما كان سر!! تخبي ليه!! قول وسمع الدنيا كلها وعيش وحب وافرح!! ليه تستني!! الدنيا دي غدارة يا ابني وقت ما يجيلك فرح خده واستمتع بيه...علشان مش هتضمن الفرح ده هيستمر لأمتي!! في لحظة الحلو بيتبدل والفرح بيغيب!؟
سامر اتنهد بتعب وحيرة: والله عندك حق!! بس هي مجنونة كل ساعة بحال!! كمان الوضع العام مش مريح ومش مشجع!! العيلة كلها مشاكل وازمات !! تنحل من هنا تقوم تتعقد من هنا!! مش عارف القيها منين ولا منين!؟
ريما طبطبت عليه بحنان: معلش بكرة بأمر الله كل شئ ينحل ويتصلح!! وربنا أكيد هيفرحك ويفرحنا كلنا !!!
سامر ابتسم وضم ايديها بحنان : ان شاء الله ربنا يسمع منك والغمم دي تنزاح ونفرح كلنا بقي!!؟
****🌹بقلم ريحانة الجنه🌹****
كانت قاعد قصاده بحزن وضامم كف ايده بين قبضة ايده بحنان!! احساس غريب ومعكوس بفعل السنين والعمر !! في البداية كان هو الضعيف الصغير.. وابوه هو الكبير القوي!!.. كان هو اللي بيتحامي في ابوه وهو اللي محتاجله!... دلوقتي ابوه هو الاضعف هو اللي محتاجله!!...
الدنيا عكست الادوار واصبح هو القوي الشديد وابوه كانه صغر وضعف!! الوهن والكبر والمرض غيروا الادوار !!؟
كان ضامم كف ايد ابوه بحنان وهو بيستغرب ازاي كبر كدة فجأة وازاي بقي ضعيف كدة!! معقول كان ده بيحصل بشكل تدريجي وهو اللي ما كنش بيركز ولا واخد باله!!؟ ولا المرض الاخير كان شديد لدرجة انه غيره وبدل حاله بالشكل ده!!؟
الحقيقة احنا دايما بنرفض فكرة اننا بنكبر ومسؤلين ...مهما كبرنا وكبرت مسؤليتنا تجاه حياتنا ونفسنا واولدنا لكن بنلاقي نفسنا بستمتع بإحساس الصبي مع الاب والأم !! احساس اننا لسة صغيرين وانهم لسة بيمارسوا سلطة ..وحنان.. وخوف واحتواءالابوة والامومة معانا شئ ممتع بيهون علينا مصاعب وتعب الحياة !! انك ان دايما تلاقي ابوك وامك في حياتك بيساعدوك في دنيتك ومشاكلك ولما تزورهم يعاملوك انك لسة صغير نفس الاهتمام والحنان والقلق بتاع زمان بيخليك تاخد نفس وتغمض عنيك وتاخد استراحة قصيرة من متاعب وهموم الحياة اللي بتعصرك وتطحنك !! كل ده وهما قصادك لسة بصحتهم حتي برغم كبرهم..وحتي لو هما بيخبوا ويداروا آلمهم وعجزهم قصادك ..وانت مش واخد بالك...لحد اللحظة اللي عكازهم بيتكسر...وآلمهم يزيد ومقاومتهم تقل والضعف والانكسار يظهر ويبان ..وقتها بتشوف الحقيقة غصب عنك وتعرف انهم كبروا فعلا وانهم حاليا هما اللي محتاجنلك مش العكس ...وكأنك كنت مغيب مش شايف ولا مستوعب انهم في كبرهم بيتحولوا للاصغر وانك فعلا خلاص!! كبرت!! ايوة وقتها بس بتتأكد انك كبرت !! وكبرت اوي كمان!!
مروان فتح عيونه من نومته اللي بفعل تعبه والادوية اللي بياخدها...اول ما فتح عيونه ابتسم بفرحة لما شاف أكمل قصاده وماسك ايده!!
مروان بوهن وتعب: كنت خايف اموت من غير ما أشوفك!!
أكمل انتبه لصوته وإفاقته ابتسم بفرحة وبص في عيونه بعتاب : مين ده اللي يموت يا راجل يا عجوز !! انت فاكر اني هيدخل عليا الشغل ده !! بتاع تعبان وهموت وقلبي بقي وبتاع!! لا لا الكلام ده تضحك بيه علي الغلبانة اللي واقفة برا دي انا بقي فاقسك وعارف دلعك ده كويس!! عارف انت شكلك بتتلكك وعايز تعملها وتتجوز للمرة الثالثة !!
مروان ضحك بقوة من وسط تعبه وتصاارع دقات قلبه : هههههههه...ااااه يا ظالم لو تسمعك ريما هتتجنن علي طول مش بعيد تحقني بحقنة هوا وتخلص مني!!
أكمل غمزه بمكر: طب عيني في عينك كدة!! قول بس انا ابنك وهداري عليك!! هجبلك عروسة ايه تصحي فيك كل اللي مات وترجعك شباب من تاني!!!
مروان لسة بيضحك: يا ابني انت لسة صغير مش عارف حاجة فيه حاجات يا ابني لما بتموت مافيش حاجة بتصحيها ...
أكمل ضحك بقوة: لا لا انت مش متابع اسألني انا هنصحي الميت ونعدل المايل انت بس طاوعني!!
مروان بيلتقط انفاسه بتعب : المهم بقي نتكلم بجد وياريت تسمعني من غير ما تقاطعني فاهم!!! انا بقالي فترة وانا حاسس اني خلاص عمري انتهي لحد كدة...والموت ده حق علينا وانا عارف ده وراضي بحكم ربنا..لكن علشان جربت وجعه والحرمان اللي بيسببه وقت ما ماتت چنا ...عارف ومتوقع حالك وحال ريما هيكون ايه!!
أكمل بيحاول يتكلم ومروان منعه بإشارة صمت وسكوت: ششش اسمع قولتلك ومن غير ماتقاطعني!!
كمل مروان بتعب: انا عارف ان ربنا أكرمني وغيرك من ناحيتي قبل ما اموت واليأس يتملكني!! انا كنت خلاص بفقد الامل انك تحن عليا وتحس بحبي ليك وخوفي عليك! وربنا استجاب ليا فعلا ورجعتلي بعد سنين حرمان ووجع...انت اكيد هتحزن عليا ..لكن ريما هتموت بالبطئ!! خد بالك منها علشان خاطري!! انا عارف انك بتحبها لكن وقتها هي هتكون محتجالك اكتر من زمان واكتر من دلوقتي بكتير!! وقتها هتكون لوحدها وكمان حزينة!!؟...ريما ليها رعد وهمس واولادهم ايوة!! لكن انا وانت حاجة تانية ! وانت بالاخص...اوعي تسيبها لوحدها لحظة!! هتقعد هنا تخليها في حضنك.. هتسافر دبي تاخدها معاك!! اوعي تسبها للوحدة والحزن يا أكمل!!
أكمل دموعه بدأت تخونه وقاطعه غصب عنه: ارجوك كفاية بقي!! ااااانا مش مستوعب اللي انت بتقوله ده!! ااانت مكبر الموضوع اوي!! شوية تعب كالعادة وهيروحوا مالك بقي!!؟
مروان دموعه خانته هو كمان : أمك وحشتني اوي!! سنين وانا بتمني اموت وادفن جنبها واتونس بيها!! كنت كل مرة اروح ازورها اتمني اموت وانا هناك !! وهي بقالها كتيير بتجيني في احلامي وعلي غير العادة بتحضني وتاخدني معاها!! وچنا مش بتكدب !! مادامت جات واخدتني يبقي خلاص...دي بشارة من ربنا اني رايح معاها!!
أكمل بدموع: وهو الموت بقي بشارة يا بابا!!؟
مروان ابتسم وسط دموعه: طبعا بشارة!! لما حبيبتي وام ابني تخدني ليها يبقي بشارة!! المهم دلوقتي توعدني انك تنفذ اللي طلبته منك!! ريما يا أكمل!!! ريما امانة في رقبتك!؟
أكمل ضمه بقوة ودموع ومروان كمان إتمسك بيه بقوة : انا مالحقتش اعوضك عن عقوقي ليك كل السنين دي!! مالحقتش اشبع منك ولا اشبعك مني!! ارجوك خاليك معايا!! انا محتاجلك اوي يا بابا محتاجلك اوي !!
مروان بدموع: أمك ريما معاك...وجدك اكمل وجدتك تسنيم وكل العيلة معاك!! وقبلهم كلهم ربنا يا حبيبي!! وزي ما ربنا صبرني وقواني علي فراق امك!! هيصبرك ويقويك علي فراقي!!
بدأ مروان يتعب ونفسه يضيق وكلامه بقي صعب وتقيل: أكمل!! اخرج وابعتلي رعد وأكمل ومهاب وعدي بسرعة يا ابني!!
أكمل مش قادر يخرج ويسيبه : طيب قولي عايز ايه انا جنبك اهو!؟
مروان بتعب وتصميم: بسرعة يا أكمل!! بسرعة حبيبي!!
خرج أكمل وكانوا كلهم منتظرين قصاد الاوضة!!!
أكمل بدموع : بابا عايزكم بسرعة !!
دخل رعد وأكمل وعدي ومهاب بسرعة ولهفة وخوف علي مروان من حالة أكمل ودموعه!! ريما حاولت تدخل معاهم لكن اكمل منعها وحضنها وهي مش مستوعبة ولا عايزة تصدق اللي بيحصل!!
مروان بتعب: اسمعوني من غير مناهدة ولا مقاطعة: انا عارف ان رعد مش هيسيب ريما لوحدها علشان انا متأكد هي بالنسبة ليه ايه!! وعارف كمان ان أكمل مش هيسيب حفيده لوحده لانه حتة منه ومتاكد من حبه ليه!!؟
لكن انا مش عايز كدة!! انا مش عايزهم يتفرقوا!! ريما وأكمل في كفة واحدة !! دي وصيتي ليكم..اياكم تفرقوهم عن بعض!! او حتي تسمحلهم يفترقوا!!
حالة من الحزن مسيطرة عليهم والدموع بتنزل من العيون بصمت وسكوت....مروان التفت لأكمل بتعب ونده عليه ...أكمل قرب عايزك!!
قرب منه أكمل بدموع: يا مروان وحد الله!! انت تعبان وان شاء الله هتقوم بالسلامة!!
مروان بإنقطاع للكلام وصوته ضعف لاقصي درجاته: ادفني معاها!! عايز اتونس بيها!! اوعي تدفني بعيد عنها!!
وقتها سكت صوته!! وغمضت عيونه!! وانتهي مشواره ودوره!!
همهمات عليت بصوتهم بالتوحيد والحزن والصدمة كمان!! لكن حالة الانهيار اللي صبتها هي لما سمعت صوت همهماتهم واتأكدت بغيابه الازلي عنها وفراقه المحتوم ...انهارت بدموعها في حضن أكمل بضعف ووجع!!
ريما بدموع: لا لا لا...هما بيقولوا ايه!! ابعد علشان خاطري دخلني عنده !! ابعد يا أكمل خاليني احضنه ابعد ...
دفعت أكمل بقوتها ودخلت وجريت عليه وحضنته بصراخ ونحيب: لييييه!! بتسبني وتمشي ليه!! انا مش هعرف اعيش لوحدي من غيرك!! للدرجة دي بتحبها!! بتسبني لتاني مرة وتروحلها!! خاليك معايا وحياتي!!؟ ابوس ايدك ما تعملش فيا كدة!! ليه تقهرني كدة!! انت بتتفنن في وجعي ليه ليييه!!!
رعد سحبها من حضن مروان وضمها لحضنه بحزن : كفاية حبيبتي..كفاية !! ادعيله بالرحمة هو محتاج لكل دعوة دلوقتي!!؟
ريما بنحيب وضعف: وانا مين يرحمني!! انا مين يدعيلي !! انا بموت يارعد بمووووت...