رواية أبيض وأسود الفصل الرابع 4 الجزء الثاني بقلم منى محمود بركات


 رواية أبيض وأسود

الفصل الرابع 4 الجزء الثاني 

بقلم منى محمود بركات


الدكتور خرج من الأوضة وهما الأتنين جريوا عليه بلهفة وخوف 

بهاءــ طمني يا دكتور خير هو كويس مش كدة ؟

الدكتور 

ــ حضراتكم أولاده ؟

بكر بدهشه 

ــ أولاده ؟ أولاده إزاي يا دكتور ؟! هو مؤمن فيه إيه ؟ !

الدكتور 

ــ أنا محتاج إذن من أقارب المريض إني أعمله قلب مفتوح حالآ الحالة صعبة جداً هو واضح إن قلبه كان تعبان والحادثة  خلت الموضوع لا يحتمل التأجيل 

بهاء بعدم فهم 

ــ مؤمن عمره ما أشتكي من قلبه قلب مفتوح ازاي ؟! في إيه ؟

الدكتور بنفاذ صبر

ــ أنتم أولاده ولا لأ خلصوني 

بكر بعصبية 

ــ هو إيه اللي ولاده ولاده أنت اعمي ولا مابتشوفش دا شاب في سننا هنكون أولاده إزاي يعني خلفنا وهو في اللفة مثلاً ولا إيه ؟!

الدكتور 

ــ شاب في سنكم إزاي ؟ اللي جوه في أوضة العمليات دا راجل معدي الستين عشان كدة لازم موافقه حد من أهله علي العملية 

بهاء بصدمة 

ــ أنت بتقول إيه ؟ أومال مؤمن فين ؟ العربية اللي عملت حادثة علي الدائري كان فيها دكتور شاب إزاي أنت جالك راجل معدي الستين ؟ ازاي ! 

الدكتور وهو راجع أوضة العمليات 

ــ واضح إنكم بتتكلموا عن مريض تاني عن أذنكم أشوف شغلي المريض اللي جوه حالته متسمحش بأي تأخير 

سابهم ودخل أوضة العمليات وهما رجعوا تاني علي الإستقبال وأتاكدوا ان بيانات العربية إللي عملت الحادثة واللي مكتوبة في الكشف بتاع المستشفى هي هي بيانات عربية مؤمن بالظبط خرجوا من المستشفى وهما هيتجننوا مؤمن راح فين !!!

ــ طب انا أتصل أقول ل مراته إيه ؟ عمل حادثة ولا أختفي ولا أعمل إيه ؟ 

ــ أتخطف ... هو الأكيد إنه عمل الحادثة واتخطف بعدها ملهاش أي تفسير تاني يا بهاء

ــ فرضاً كلامك صح ... نصر خطفه ليه ؟! لو هو بينتقم وقلب العربية ب مؤمن هيخطفه بعد كدة ليه ؟!

ــ أفتح النت كده خلينا نشوف إيه اللي نعمة قالته 

ــ دا وقته يا بكر ما تولع نعمة دلوقتي

ــ يا عمنا أفهم اللي نعمة قالته أكيد وراه نصر و أختفاء مؤمن أنا بردوا واثق أن وراه نصر خلينا نعرف هو عايز إيه ولا بيخطط لإيه بالظبط يلا  

هز بهاء رأسه بمواقفة وفتح تليفونه وأتفاجئ برسائل كتير من أحمد ولينكات كتير لصفح كبيرة علي الفيس والانستا فيها فيديو ل نعمة ... فتح واحد منهم .. كانت نعمة بتقول فيه ..👇👇

// السلام عليكم ورحمه الله وبركاته أنا نعمة اللي طلعت من مدة واتكلمت علي قضيه عمر وعصام رحمه الله عليهم وروحت شهدت كمان في النيابه واكدت كلامي اللي أتقال في الفيديو ...أنا جاية انهاردة ومعايا تحاليل وأشعه ليا نتائجها اني في المرحله الأخيرة من سرطان المخ ... يعني أيام وبقضيها ... من وقت ما عرفت ب مرضي وأنا مش شاغل بالي غير حاجة واحدة بس هقابل ربنا إزاي وأنا في رقبتي ذنب كبير أوي مش عارفة ربنا هيسامحني عليه ولا لأ ... أنا عارفة إني هتعرض للمسألة القانونية بعد الفيديو دا بس مش مهم حتي لو هتحبس مش مهم كل دا ولا حاجة قصاد رضي ربنا عني قصاد إني لما أروح له قريب مكنش خايفة وأبقي حاسة إني كفرت عن ذنبي علي قد ما اقدر قبل ما أموت ... الظابط اللي أسمه بهاء معتز الدميري فيه بينه وبين عيلة عمر الله يرحمه مشاكل من زمان الولاد ماتوا فعلا بس كانو بيتخانقوا سوا ووقعوا هما الأتنين من الدور الرابع في الدار بهاء بيه لما عرف علاقة عمر الله يرحمه بالدار وعرف من ناس مجندهم لحسابه حوار موت الأطفال بالطريقة دي وإن الدار دارت السبب الأساسي للوفاه ... أستغل كل دا وجالي وهددني إني اقول الحكاية اللي قولتها دي وأروح أشهد في القسم كمان ب كدة ولما رفضت وقلتله مش هعمل كدة تاني يوم كان جيلي مخبر شغال معاه أسمه بكر بركات وخد أبويا علي القسم وعمله محضر حيازة مخدرات ابويا الراجل اللي معدي ٧٠ سنه بات ليلة في الحبس مع المجرمين والحرامية وهتتعمله قضية كمان خفت علي أبويا دول عليتين قادرين قصاد بعض أنا أجي إيه جنبهم أستسلمت ووافقت أكيد مش هخلي أبويا يتبهدل في أخر أيامه... طلعت في الفيديو وقلت اللى قولته عصام دا أنا معرفوش ولا أعرف قتل عمر ليه أصلآ هو قالي أقول كدة ف قولت ودلوقتي أبويا من قهرته علي نفسه مات وأنا وجالي المرض الوحش عقاب علي عملتي اللي عملتها كان لازم أريح ضميري وأعترف بكل حاجة منه لله الظابط اللي أستغل وظيفته ودمرلي مستقبلي منه لله وحسبي الله ونعم الوكيل فيه هو والمخبر اللي بهدل أبويا في آخر أيامه منهم لله ....

انهارت في البكاء ... بكاء حقيقي من قلبها علي كل كلمة قالته .. واضطرت أنها تقولها... بكاء عن الذل والقهر اللي اتعرضت عليه عشان تكدب ويا عالم الموضوع هيخلص علي إيه 

*********************

بهاء قفل الفيديو وبص ل بكر 

ــ مهددينها وأكيد بحاجة كبيرة يا بكر عشان تقول كدة 

ــ طب هنتصرف إزاي 

ــ إيه يا بكر ركز شوية المقصود بالفيديو أن أبقي تريند والدنيا تتقلب عليا ف القيادات تبعدني مؤقتاً عن الصورة لحد ما التريند يتنسي ويجي غيره ... كلام نعمة كله أغلاط .... وبعدين أنا كنت بعيد عن كل اللي حصل أبوها مدخلش القسم عندنا ولا أنا ولا أنت عملناله محضر ولا شوفناه ... أنا كنت مقفل محضر رسمي أن الموضوع اتقفل بموت عصام بطريقة طبيعية جداً ف أنا مالي باللي أتقال علي السوشيال ميديا أو البرنامج أو شهادتها في النيابة حتي 

ــ معقول يعني كل دا عشان تبقي تريند وبس يا بهاء مش منطقي بصراحة  ؟

ــ التريند دا خطوة خطف مؤمن دا خطوة الخطوات دي لايه بالظبط دا اللي احنا لسه مش عارفينيه يا بكر 

ــ طب أنا عايز أقولك علي حاجة بس تفكر فيها كويس بعد اذنك 

ــ قول في إيه !!

ــ احمد الشيمي؟؟؟

بهاء بصله وابتسم ابتسامه صغيرة وسكت 

بكر كمل 

ــ لااا خلاص بعد الضحكة دي أنا معنديش حاجة أقولها واضح إنك قريت زي ما أنا قريت بالظبط 

اتنهد بوجع 

ــ يلا نرجع ل مكان الحادثة يا بكر نشوف أي كاميرا مراقبة يمكن نعرف مؤمن فين يلا 

اتحركوا سوا علي مكان الحادثه تاني وطول الطريق المرة دي بيتناقشوا وبيفكروا سوا ممكن يكون إيه الهدف ومؤمن هيظهر ازاي؟

*********************************

في بيت بهاء بعد ما بسمة أطمنت إن معتز نايم كويس وتاليا كمان أكلت ونامت خدت بدور ودخلوا المطبخ يحضروا العشا 

ــ الحمد لله أن أبيه بهاء بيجيب حاجات البيت اول كل شهر كنا أحتسنا بعد ما أكدوا علينا لا ننزل ولا نفتح حتي الباب لحد 

ــ معلش يا بسمة جينا عملنالكم إزعاج وإنتم مش ناقصين أكيد 

ــ إيه الكلام دا يا بدور مفيش بينا الكلام دا طب ما بكر بقاله كذا يوم مشغول معانا وراح وجه معايا أنا وبابا كذا مشوار أقوله معلش يا بكر أزعجتك يعني ولا إيه 

ــ ربنا يديم المعروف والود بينا 

ــ اللهم آمين ... إيه دا شكل توتي صحيت روحي شوفيها وأنا هكمل 

ــ ماشي يا حبيبتي هنيمها وأجيلك علي طول 

ــ يا بنتي خليكي جمب بنتك أنا خلاص هدخل صينية المكرونة الفرن وهجي أقعد معاكي يلا بقا حرام بتعيط 

ــ طيب ماشي هستناكي

خرجت بدور تشوف تاليا ووقفت بسمة تكمل الأكل ... سرحت في بداية معرفتها ب بكر وأول مرة شافته فيها

فلاش باك ...

كانت قاعدة في أوضة الإجتماعات هي وسوزي ومستنين بكر عشان يتعرفوا عليه ... وفي المعاد مظبوط الباب خبط والسكرتيرة بلغتهم بوجوده بره وثواني ودخل 

بكر 

ــ مساء الخير 

سوزي وبسمة

ــ مساء النور 

سوزي 

ــ أتفضل يا أستاذ بكر ... بدايه مبشرة في معادك مظبوط 

بكر 

ــ شكراً يا فندم أنا فعلاً بحب المواعيد المظبوطة جداً 

سوزي 

ــ طيب تشرب إيه قبل ما نبدء في الشغل 

بكر 

ــ قهوة مظبوط 

طلبت البوفية وبلغتهم بطلبه ورجعت بصتله

ــ فهمني بقا إيه في دماغك بالظبط عشان نبدء ونتعرف بسرعه ويبقي لينا إسم في السوق 

وقبل ما يرد عليها تلفونها رن برقم دولي

سوزي وهي بتقوم 

ــ أنا أسفه جداً بس لازم أرد فون ضروري بسمة معاك ظبطوا مع بعض كل حاجة عن أذنك 

بكر 

ــ إتفضلي 

بسمة 

ــ بص أنا أصلآ مضيفة كار التجارة دا مش كاري ف لو هتشرح حاجة بسطهالي أوي علي قد ما تقدر ديل ؟

بكر ضحك 

ــ عارف بهاء حكالي إنك هنا بصورة مؤقته عشان تساعدي عمتك لكن هترجعي شغلك الأساسي تاني وبعدين أنا كمان الكار دا بحبه بس مش كاري متقلقيش مش هقولك كلام معقد يعني 

بسمة 

ــ تمام نبدأ بقا أنت قلت ل أبيه بهاء أن معاك تيم مش كدة 

ــ قلتله أعرف تيم كويس بس لازم يكون لهم مدير يشرف عليهم بس لسه مكلمتش حد منهم 

ــ طب ليه كدة دا أنا قلت هنبدء شغل علي طول 

ــ كان لازم أجي أتكلم معاكم الأول وأعرف الدنيا ماشية ازاي المرتبات و  العقود الكلام دا عشان أعرف أروح أتكلم مع الناس لأن في منهم بيشتغل في أماكن تانيه أصلآ 

ــ أمممم معاك حق ... بس أنا في الماديات والمرتبات مش أد كدة الموضوع دا مع عمتو مش معايا 

ــ خلاص لما ترجع هظبط معاها الموضوع دا ... بس أنتم كدة أكيد غيرتم النشاط ولا  لسة بتفكروا ؟

ــ لأ غيرنا خلاص وظبطنا وضعنا القانوني كمان وعمتو بدأت مع شركات كبيرة أنها تبقي موزع ليهم

ــ وأتفقتم علي العمولة بتاعتكم ؟ وهتبقي بعقود ثابتة ولا متغيرة ؟ وبإشعارات خصم ولا فواتير ؟

ــ إيه دا إيه دا مش أتفقنا علي شرح بسيط وكلام معقد لا مالك أتحولت ليه ؟

ــ هههههههههه والله كدة مبسط جداً 

ــ لأ مش لاعبة لا 

ــ أومال أنتي هنا بتعملي إيه بالظبط؟!! ... أحم آسف علي السؤال فضول مش أكتر 

ــ لا عادي أسأل براحتك دا أولآ ... ثانيا يا سيدي عمتو بتقولي هي عايزة إيه من الشركات والمعارض وبتكون جنبي ولاني الحمد لله يعني خمسة عليا متحدثة لبقة جداً بعرف أقنعهم بس أول ما بقفل المكالمة والله بنسي أنا كنت بقول إيه أصلآ 

ــ 😂😂😂

ـــ أضحك أضحك بس حقيقي دا اللي بيحصل غير بقا الأمور الإدارية حضور إنصراف تظبيط مواعيد كبيرى حضور أي ميتينج مهم مع عمتو جوة الشركة أو برة وأخيراً أي شغل داتا انتري أنا اللي بعمله بنفسي حتي لو مش فهماه عمتو مش بتثق في حد هنا غيري وبس كدة

ــ لا بتتعبي بصراحة 

ــ حساك بتتريق عليا 

ــ لا بتكلم جد طبعا ... أنا مقدر جداً أن دا مش مجالك الفرق بينا أن أنا بحب المجال دا جداً وشاطر فيه لكن أنتي بتحبي شغلك وشاطرة فيه ف المجهود اللي بتعمليه هنا دا حتي لو شيفاه صغير ف هو كبير جداً وبجد أنا مدرك إنك بتتعبي لأنك بتعافري في شغلانة مش بتاعتك أصلآ 

ــ ☺️ شكراً علي كلامك دا 

ــ العفو ع إيه بس ... عموماً يا ستي أنا هستني مدام سوزي تخلص تلفونها براحتها وأعرف منها كل التفاصيل تمام كده. ؟ 

ــ تمام كده 

باك 

ابتسمت لذكري أول لقاء جمعهم وقد إيه كان متفاهم ولطيف وحسسها إنها بتعمل حاجة كبيرة عكس عمتها اللي كانت ديما تحسسها أنها فاشلة ف أي حاجة تعملها 

فاقت من ذكرياتها دي ورجعت علي أوضتها عشان تقعد مع بدور ومتسبهاش لوحدها بعد ما أطمنت أن الأكل بيستوي وشبه جاهز 

ـــ إيه الأخبار تاليا نامت تاني خلاص 

ــ أه الحمد لله 

ــ طب تعالي نقعد برة عشان منقلقهاش حرام 

هزت بدور رأسها وخرجت مع بسمة قعدوا برة 

ــ طب أرن عليهم أشوفهم هيجوا أمتي ولا إيه 

ــ مش عارفة بصي جربي رني علي بهاء رد رد ماردش خلاص شوية ونجرب تاني عشان منزنش ويتعصبوا علينا

ــ تمام هجرب 

رنت بسمة علي بهاء اللي رد عليها من تاني جرس وهو قلقان

ــ في ايه يا بسمة ؟ أنتم كويسين ؟

ــ أحنا بخير والله مفيش حاجة أهدي يا أبيه 

ــ أومال متصله ليه في حاجة حصلت ؟

ــ يا أبيه مفيش حاجة أحنا زي الفل أنا بس حضرت عشا وقلت اشوفكم فين وراجعين امتي ؟

ــ لا يا حبيبتي أحنا هنتأخر شويه اتعشو انتم وصحي بابا بالعافيه خليه يأكل وياخد دواه في معاده أنا وبكر مش راجعين دلوقتي 

ــ طب لا قدامكم شويه أحنا 

ــ بسمة أحنا ممكن نبات برة منعرفش هنرجع أمتي اسمعي الكلام واتعشو أنتم وانا شويه كدة هتصل بيكي عشان اطمن علي بابا تمام 

ــ حاضر يا أبيه المهم أنكم كويسين 

ــ احنا تمام يا حبيبتي متقلقيش 

ــ ماشي يا أبيه مع السلامة

ــ سلام حبيبتي 

قفلت معاه وقامت هي تصحي معتز وبدور تحضر السفره عشان يتعشو سوا 

*******************************************

وصل بهاء وبكر مكان الحادثه وللأسف لأنه علي الدائري مكنش فيه أي مكان قريب فيه كاميرات مراقبه ... كانو حاسين بالعجز ومش فاهمين إيه اللي هيحصل بعد كدة ..  وقبل  ما يتحركو من مكانهم تلفون بهاء رن برقم برايفت رد بسرعه وهو فاتح الأسكبير 

ــ الو 

ــ surprise 

ــ عايز مننا إيه يا نصر ؟

ــ إيه الرد دا اومال فين حمد لله على السلامه يا نصر ... عامل إيه يا أبو النسور ... فين اراضيك يا جدع 

ــ ما تخلص وتقول عايز أي في ليلتك السودا دي 

ــ عايز سلامتك يا حبيبي ... يلا مش هرد علي طريقتك اللي مش عجباني دي وهقدر الموقف اللي أنت فيه 

ــ اللهم طولك يا روح 

ــ هههههههههه قفوش اوي .. علي العموم يا سيدي الدوك بخير و بيسلم عليك ولو وخدلي بالك أنت من لو دي لو عايز تشوفه تاني هو طلب صغير أوي تنفذه أنت وال الأخ اللي جمبك دا 

ــ طلب إيه !!

ــ حاجة بسيطة خالص ترجعو تشتغلو مع بعض تاني ... أنت مثلا عندك قضيه مفروض تخلصها ومن بكرة تكمل تحرياتك وهو بكرة الصبح يكون معاك في القسم ويقطع الإجازة بتاعته بس كدة 

ــ هو دا الطلب ؟! متاكد ؟

ــ شوفت بقا أنا حنين إزاي ؟ حسيتك هتهمل شغلك خصوصا وبكر مش معاك كل اللي عملته دا عشان ترجعو وتشتغلو سوا أنتم الاتنين شوفت حنيه قلب زي قلبي بزمتك اكيد لا 

ــ عايز إي يا نصر ؟ هات من الاخر وبلاش لعبه القط والفار دي 

ــ اللعب دا انت اللي بدأته يا بهاء مش انا وطالما بدأت حاجة خليك قدها ... حاليا مش مطلوب منك غير كدة وكلمة راجل ل راجل لو رجعت انت وبكر الشغل بكرة الصبح ... بالليل مؤمن هيكون في بيته ... يلا سلام يا حضرة الظابط الهمام

******************************

في شقه نجاة وصبري كان قاعد صبري بيتفرج علي التلفزيون و مركز مع برنامج الكورة اللي شغال بس فجأة دخلت نجاة وقعدت جمبه ومسكت الريموت وقفلت التلفزيون خالص 

ــ إيه دا ليه كدة يا نجاة أنا 

قاطعته وهو مكشرة

ــ أنت تركز معايا دلوقتي وتسيبك من الكورة دي خالص 

ــ في إي ؟ خير يا رب 

ــ أنا مش مرتاحة ل حماة بنتك وأبنها ... الناس دي مش سالكه وبيسحبو بنتي مني شويه ب شويه أنا مش هسكت يا صبري 

ــ تاني ! نفس الموال تاني أحنا مش خلصنا والبت باستمرار عندنا عايزة اي تاني ؟ 

ــ الوليه دي عمله سحر ل بنتي عشان تبعد عني وتبقي تحت طوعها هي وأبنها

ــ لاااا أنتي هبت منك علي الأخر يا نجاة ... ما تعقلي بقا 

ـــ أنا عاقله وعارفه أنا بقول أي كويس اوي بنتي مش طبيعيه يا صبري صدقني... الوليه دي شكلها عمله عمل ومشرباه ومأكلاه للبت كمان 

ــ لا حول ولا قوه الا بالله العلي العظيم وبعدين معاكي 

ــ يا راجل حس بيا أنا قلبي بيتقطع عشان بنتي وأنت بارد كدة ليه بقولك أنا اتاكدت أنهم سحرين للبت الشيخ المندوه هو اللي قالي وأداني الأمارة كمان 

ــ لا والله ؟ ومين بقا المندوه دا ؟ وشوفتيه ازاي وامتي يا نجاة ؟ وايه الأمارة دي يا ست الشيخة ؟

نجاة ....

نعمة روحت شقتهاة وهي دموعها نازله مبتقفش فتحت الباب وهي عارفه أن اللي هتشوفو هيقسملها قلبها نصين خدت نفس طوييييل وبعدين دخلت وكانت الصدمة ليها.


           الفصل الخامس من هنا       

  لقراءة جميع فصول الرواية من هنا

تعليقات