رواية غجريه أسرت قلبي الفصل الخامس عشر 15 والسادس عشر 16بقلم أسماء السيد


رواية غجريه أسرت قلبي

الفصل الخامس عشر 15 والسادس عشر 16

بقلم أسماء السيد

بعيون مكبوت فيها الدموع.. قرب منها قدامهم كلهم وحضنها.. حضنها بقوه وهنا انهارت كل قوته.. معدش همه حاجه خالص من الدنيا الدنيا بتنهار من حواليه  ومعدش غيرها حضن وسكن ليه.. 

عاوز يبكي بس خايف هيبته تنهز قدامهم كلهم.. 

بس هي فهمته ومن وسطهم اقتلعته ومن عيونهم خبته..مينفعش يبان ضعيف ابدا.. 

وهمستله أنا جنبك.. 

اول ما بقوا لوحدهم نفض قوته.. 

وبكي.. بكي بحرقه.. 

وضعفه في حضنها هي كان قوته.. 

همست..ألياس...

بلع كلامها  كله اللي كانت هتقوله، بشفايفه.. ومن بين حزنه اللي بيشتته كانت هي دواه 

وهمس..

انا تعبان اوي ياصبا..

تعبان اوي..

حضنته بقوه..سلامتك من التعب ياعيون صبا..

ألياس..

انت قدها وثريا هتبقي كويسه..الازمه هتعدي وكل حاجه هترجع لاصلها..حبيبي قوي..جبل مش اي حد يهزه..

سامع..انت قوي ياالياس..وهتعدي..طول مااحنا مع بعض هتعدي..

وعلي سرير المستوصف..خدته في حضنها..

وبكلامها قوته..

(صبا..)

حسيت بيه بيندهلي..بيقولي محتاجك ياصبا مكدبتش خبر وجريت عليه زي المجنوونه..

اتصلت عليه وعرفت منه انه في المستوصف..

كان صوته حزين..مش دا الياس ولا دي نبره صوته اللي كنت متوقعاها منه..

وصلت المستوصف..بعد ماقالي بوضوح تعاليلي ياصبا..

اول ما وصلت كانو وقفين قدام العنايه المركزه اللي اتنقلتلها ثريا

مهران اللي اول ماشافني عينه قادت نار وساجي اللي انصدم من شوفتي بس مهتمش

كان حزين وهو واقف قدام باب اوضه تانيه قصاده حربيه بتبصله بغل..

وعرفت ان كل الحقايق انكشفت والغمه انزاحت..وهيبدأ عهد الكدب ينجلي..

 عيني ركزت علي اللي ساب الدنيا وجري لحضني..

حضني  هو زي الطفل الصغير..معقول دا الياس

 انا عارفه انه معايا بيكون الياس تاني بس ضعفه قصاد الكل كان شي تاني..

صوته المخنوق في حضني خلاني اتأكدت انه هيبكي وهيبته تنهز وخصوصي واناشايفه مهران  ابوه زي المجنون قدامي..

سحبته وهو طاوعني لاوضه جار العنايه كانت فاضيه وقفلت الباب ووقتها انهار قدامي..

عرفت اللي حصل منه..ومن وسط كلامه افتكر هروبي..وجز علي سنانه واتنفض من حضني..

 الياس بغيظ،، كنتي فين ياصبا؟

وفي نفسي..

ياادي النيله مش هينسي انا عارفه..

وبمكر هو عارفه قربت و

ابتسمت وحضنت وشه وبوسته بوسه طويله علي خده..

فحسيت بابتسامته..وهو بيقولي..

كلي بعقلي حلاوه كلي؟

ـ بردو كنتي فين؟

ضحكت ومديت ايدي حاوطت رقابته وقربته مني.. وبهدوء حكيتله وأنا في حضنه..

ضحك وحضني بقوه وقالي..طب اعمل ايه فيكي.؟.دا يشفعلك عندي..بس بردو هربيكي بس لما ثريا تفوق واطمن عليها..

قبل مااتكلم واساله عن وضع ثريا بالظبط مالها كان انفتح الباب..وعينك ماتشوف الا النور..

مهران بقوه..ايش جاب الغجريه ديه اهنه ياألياس؟ وايه علاقتك بيها ياشيخ النوارس.؟

قبل ماايد مهران تطولني..ماهو كان عاوز يسحلني يرميني برا

كان الياس صدها عني وبقوه خلتني اسعد واحده في الدنيا..

كان صارخ فيه ومقربني تاني لحضنه..

ـ ايدك اوعي تلمسها..اياك..عارف اياك...

الغجريه دي مراتي وليا الشرف تكون مراتي.

مهران النوارس انصدم..وحط ايده علي قلبه..

مهران بصدمه..مرتك..كيف ده..كيف تتجوز الغجريه يابن النوارس..؟

انت حطيت راسنا في التراب..

الياس بحده..العشق ياوالدي ولا هو حلال ليك تعذب في ثريا سنين باسم العشق وحرام ليا..

صبا مراتي واللي هيقربلها ههد الدنيا.. انت فاهم..

مد مهران ايده يمسد بيها علي قلبه حسيته هيروح فيها بس مهتمتش بعد اللي قاله.

ـ مهران بغل..هحرج جلبك عليها وبكره تشوف مهران النوارس فعل ولا جول ياألياس..

وسابنا وخرج..

وقبل مااتكلم كان حضني وقالي..

متخفيش ياصبا محدش في الدنيا يقدر يمد ايده عليكي..اللي يقربلك يكون معدي علي جثتي الاول..

ابتسمت وانا بقوله..

مقدرش اخاف غير من بعدك يابن النوارس..

قربت منه، ولسه صوره نيسان في حضن مهره بتلعب في دماغي..نفسي ابقي ام مليش دعوه..

ـ الياس..

ـ عيون الياس..

ـ عاوزه نونو صغير منك ياألياس..

ـ بصلي بصدمه وضحك وغمزلي

وقالي دلوقت ياصبا..

ـ مديت شفايفي بعند..وانا بقوله..ااه دلوقت ياألياس..

ـ ضحك اكتر وهو بيسحبني لبرا..

ـ حبكت يعني ياصبا..أومال فين كلامك..

وعيب يألياس..وميصحش يألياس..

ـ ضربته علي صدره..وانا بقوله..

الليله ياألياس..

 ضحك..واول ما خطينا برا الاوضه..

كان عاشق تاني داخل زي القشاش..

ـــــــــــــــــــــــــــــ

طارق..

بوجع بقلبي دخلت ارض الغجر..واول مادخلت ووصلت صدمتني الحقايق وكل ماامشي خطوه اسمع ايه حصل للشيخه..بقيت زي المجنون..

وجناني زاد وانا كل اللي في دماغي اني اقتله..

هقتله..واخدها بعيد عنه..كان لازم اعمل كدا من زمان..

معرفش منين عرف تمام وحتي فوجأت بسامر وسوزان قدام المستشفي..

واللي شكيت فيه اتأكدت منه..

سوزان بنتها..

بدموع قربت مني..

سوزان بلهفه..

ارجوك خدها من هنا..انقذها..

مبقتش شايف قدامي...أيه حصلها..هموت جارها لو فارقتني وبعدت عني..

لقيت تمام ورايا بيقولي..مش عاوزك تتهور وهعملك اللي انت عاوزه..

زقيته بايدي..وبعدته عني..مش عاوز حد قدامي..

وصلت للعنايه لقيته قدامي واقف زي الشيطان.. 

لسه متغيرش..

اول مالمحني اندفع وخرج سلاحه...

جاي هنا ليه يابن الغجر..؟

اتشاهد علي روحك..

ولان الكل عارف ايه بينه وبيني الكل اتنحي وبعد..عنه..

وهنا خرج المارد..اللي مخبيه من سناني..

ياما اتمنيت اقتله واشفي غليلي منه..

وياما كنت هنفذ لولا قاسم وكلامه اللي كان بيحتويني..

بس لحد هنا وخلاص..

وبكل قوتي..ضربته..بغل السنين وحرقه قلبي مهتمتش لسلاحه وهو بيجعر بصوته كله..

ومحدش ادخل..

ولقوتي وصغر عمري.

عمر مهران ضعف عمري..وقع عالارض ومديت رجلي دوست علي ايده اللي ماسك بيها سلاحه..

ـ مهران بغل...هجتلك يابن الزناتي..هجتلك..

قبل مااكلم كان صوت ورايا بيقول..

ـ ماعاش ولا كان اللي يمد يده علي ولدي طول ماانا عايش يامهران..

همست..ابويا...

استغل مهران صدمتي ولسه هيزقني..كان الزناتي..صارخ..

ركز ياطارق..عشان تعرف تاخد بطارك كويس..

هنا بس عرفت قيمه الاهل والعيله..

قيمه انك يكون ليك اب حارس وحامي..

وبكل قوتي فشيت غلي فيه والغريب ان ابنه نفسه كان واقف يبصله بروح ميته

مفيش غير سوزان..اللي لولا دموعها مكنتش عتقته

سوزان..كفايه ياطارق بالله عليك..هيموت في ايدك..سيبه..دا بردو ابويا..

بعدت عنه..عشان خاطر دموعها ومنظرها..

قعدت هي عالارض جار مهران..ابوها..اللي رغم الضرب اللي ضربتهوله بيبص لسه زي الشيطان..

لسه بتمد ايدها تمسكه..

سوزان..قوم يابابا هات ايدك..

وبدل مايتسند عليها كان طايحها بايده..

ـ بعدي يدك عني يافاجره..

قبل ماارجعله..

كان سامر شدها بعيد عنه..

وقال بعلو صوته...سوزان اشرف من الشرف..

ويشرفني تكون مراتي واللي هيتعرضلها ايا كان مين هقتله، وانا بقي مش زي طارق بضرب

انا هقتل علطول.. واخش فيه السجن ولا يهمني..

قبل مايتكلم كان جت سياره الاسعاف اللي هتنقل ثريا..معايا..

استحاله هسيبها هنا..خلاااص انتهت..

وكل شئ تم في ثانيه..بالمال والنفوذ

جن جنون مهران والمرا دي..

كانت ايد ألياس اللي حشته..وهو بيصرخ..

ألياس بحده..بعد يدك ياابويه عن ثريا لو انكتبلها عمر وفاقت من اللي هي فيه..بأيدي هخليك تطلقها واجوزها لطارق..

مهران بحده...انت جنيت ياالياس عايز تفضحنا بين الجبايل..

دانا كنت موتك انت وهي..

معرفش همسله بايه بودنه خلاه ينكمش علي نفسه زي العيل الصغير.

ويسيب ثريا..

بس مهتمش..كل اللي هممني..ثريا وبس..

قبل مااركب العربيه..قربت من ابويا..

وبوست ايده..

ـ راضي عليا..

مد ايده وطبطب علي راسي..

ـ، راضي عليك في الدنيا والاخره..روح مايكسرلك خاطر ويبرد قلبك ياطارق يا ولدي..

روح ياولدي..هستناك تعود انت وهي..

 بكيت وحضنته..ادعيلي ترجعلي ياابويا..

ادعيلي بالله عليك..

ـ هتعود ياولدي..الشر ساعه والخير كل ساعه ياولدي..

توكل عالله انت..يالا..

اول مادخلت العربيه ولمحتها..مقدرتش 

وقتي الوهميه انتهت لحد هنا..

كانت سوزان جارها بتبكي..

واول مادخلت سحبها سامر..وخرجو 

وهنا مقدرتش خلااص..

وبكيت وانا دافس نفسي في حضنها..

ارجعيلي ياثريا..

اتمسكي بالدنيا علشاني

عشاني ياثرياا..

ــــــــــــــــــــــــــــــ

بخيمه المؤامرات


ماما..

كلمه طول عمري نفسي اقولها..رغم اني كنت كتير بقول لنواعم ياامه بس عمرها ماكانت من قلبي..

اه نواعم كانت حنينه عليا وعمرها مأذتني بس حضن الام حاجه تانيه..

امي والبقيه تأتي زي مابتقول صبا..

امي بين ايديها نسيت الدنيا..

من ساعه ماشوفتها وانا في حضنها عماله احكيلها وتحكيلي هي..

دموعي مغرقه حجرها...

مر ساعات والليل ليل هنا، وانا لسه في حضنها..

ماما..

ـ نعم ياعيون ماما..

ضحكت وقلت..لا بس لساني فرحان بكلمه ماما..

ضحكت وقالتلي..انتي مجنونه شكل ماقالت صبا..

انفلعت وقعدت مربعه..وغمزتلها..

ال ايه صحيح حكايه مؤيد دي..انا سمعت منه

عاوزه اسمع منك انتي بقي.

من ساعه ماقعدنا وانتي حكيتي كل حاجه وبتتهربي منها..

مدت ايدها تمسح دموعها وقالت..

قصه قديمه وانتهت مش عاوزه افتكرها ياساره..

رديت بشرود ساره..

وحطيت ايدي علي بوقي..

تصدقي حلو الاسم دا..انا طول عمري بكره اسم مهره والله..

ـ ضحكت وضربتني علي راسي..والله انتي فعلا هبله..

لسه هتكلم سمعنا دق علي باب الخيمه..

 جريت عشان افتح وانا بقول اكيد سبأ..

بس انصدمت لما لقيته هو..

واقف مرتبك زي العيل الصغير وسالته بهمس..

عمو مؤيد..عرفت منين ان اننا هنا..؟

ظهرت سبأ من وراه وقالت مني انا..

تعالي..

مدت ايدي وسحبتني لبرا..

وقفلت الخيمه وزقته هو..

مهره بغيظ..يخربيتك ايه اللي عملتيه دا..

انتي اتجننتي..

سبأ بغيظ..ياام الجهل..دي لحظه خاصه بيهم لازم تسيبيهم انتي مش بتفهمي خالص كدا..

وبعدين انتي هنا مش داريه باللي بيحصل برا

مهره بقلق..في ايه بيحصل برا..؟

سبأ..بسرعه..حكتلي..

اول ماسمعت كنت طايره..دا ساجي..اللي الدنيا بحالها عرفت دلوقتي انه غجري 

لازم اكون في جاره دلوقت..

ــــــــــــــــــــــــ

ساجي..

انك تقول انا ابن فلان حاجه سهله..

وانك تتربي عالعز والمشيخه مش حاجه سهله..

بس انك تبقي عندك القدره تتخلي عن كل دا وترجع لاسم وهويه..ميجوش جمب دا كله شي

قمه القوه..

انا ساجي العزازي..

انولدت لاب غجري وام غجريه..وافتخر

مش معني اني غجري دا يبقي وصمه عار..الناس واخده فكره وحشه عن الغجر وحكاويهم..بس احنا في الحقيقه بشر..

بشر بنحس وبنفهم وبنتألم زيكو..

عشت سنين باسم الشيخ عارف ابن الشيخ سمعان..ابن النوارس..بس معشتش مرتاح..

تحكمات وعادات وتقاليد لا ليها معني غير انها بتقيد حريتك..

تحب مين وتتجوز مين مش في لهجتك..

لحد ماقبلتها هي..لعنتي في الدنيا مهره..

وقتها اشتعلت في قلبي روح التمرد وشعلل الحب جوايا..

وبعدها جت الضربه القاضيه بكوني غجري..

انا مبسوط..بس من وسط دا كله..

تعب ابويا الللي رباني قطم ظهري..

انا بحبه رغم اني مش من دمه..

مين قال الاب اللي خلف..الاب اللي ربي وكبر وعلم..

الراجل دا زرع في قلبي تعاليم لو عشت عمري كله غجري مكنتش هتعلمها..

الراجل دا هو حظي الجميل في الدنيا.

فوقت من شرودي وانا قاعد جاره علي الكرسي مستني يفتح عينه واطمن..

فوقت علي ايده اللي مدها يمسك بيها ايدي..

عارف..

اتنفضت ومسكت ايده بوستها..

ايوا ياحاج..

ـ بصلي بحزن وبصوت بيخرج بالعافيه..

انت ابني ياعارف..انا اللي ربيت وكبرت وعلمت..مش العزازي..

مش اجده ياولدي..

دموعي نزلت وانا ببوس ايده 

اجده ياوالدي..

انت ابوي وحظي الجميل في الدنيا..

بكي علي بكايا وقالي..لو كنت ايش ماتكون غحري جن ازرق انت ولدي ياعارف..

مهسيبكش تبعد عني واصل..

واللي اذوك لازم ياخدو عقابهم في الدنيا..

ابتسمت وانا بطبطب علي يده..انا جنبك ياوالدي ومفيش قوه هتبعدني عنك..

عنك انت بس..

ابتسم...ايوا ياولدي اني بس..

ربنا يريح جلبك ياعارف

ضحكت وقولتله..قولي ياساجي

ابتسم وقالي..ساجي عارف..انت ولدي وبس ياعارف..

لسه هكمل..لمحتها واقفه علي باب الاوضه بتهمس

ساجي..ايدي اترعشت وانا عاوز اجري اترمي في حضنها

سمعته بيقولي..بتحبها ياخايب..

انصدمت وقولت.. هااا..

قالي..

حتي لو كنت شيخ وابن النوارس وعشجتها..

هجوزهالك ياعارف..

روح ياولدي..روح طمنها وجولها..

هنا انقضيت عليه بوسته في كل حته في وشه

وهو بضحك..بعد عني ياعارف..جبر يلمك..

ضحكت وجريت خطفتها..

وبقوه حضنتني..

انا لقيت ماما ياعارف..

ــــــــــــــــــــــــــ

استني، هنروح فين ياالياس؟

(الياس)

لاول مره بتخلي عن قلبي الضعيف ناحيه ابوياواهدده علني..

هددته باللي اعرفه واني هعقد مجلس شيوخ وافضحه واقولهم ايه هو...؟

مكنش في حل قدامي انه يترك ثريا تروح مع طارق غير كدا..

ثريا تستحق واختي كمان بعد اللي شافته تستحق تعيش بحريه..

بايدي اقسمت هطلقها منه واجوزها لطارق واجوز اختي لسامر..

وان اللي يعشق ينول..مادام مفيهوش غضب لربنا

واللي في دماغي هنفذه من هنا ورايح..

من الليله هتنقفل صفحه مهران واحل مكانه انا ألياس النوارس..

دوله الظلم ساعه ودولت الحب والخير كل ساعه..

كل اللي اذونا هنتقم منهم..وكل اللي جاي خير وفرح..

اتنهدت وانا عارف اني احلامي لسه طريقها صعب..بس لازم ابداها..

ابدأها وهي جاري..

ومن الليله..الكل هيعرف  ان صبا العزازي مرات ابن النوارس..

سحبتها من ايدها..وهي بتسألني..رايحين فين ياالياس.؟

ببسمه مرتاحه لاول مره في حياتي 

ـ علي بيتك ياقلب ابن النوارس..

ضحكت وقالت..بس انا عاوزه اقضي معاك الليله..

ابتسمت وغمزتلها..ومين قال اني هسيبك الليله 

انا قتيلك الليله ياصبا..

ولسه هتكلم كنت ساحبها باتجاه قصر النوارس..

شهقت وهي بتبصلي..استحاله..هدخل...

وبغيظ كملت..هجيبها من شعرها..

انا مراتك وبس..

ضحكت وصوتي علي..وانا بقولها..مفيش غيرك ياصبا..انا طلقتها..

انا فعلا طلقتها من اول ما انكتب اسم صبا جار اسمي بقسيمه حقيقيه علي يد مأذون..

مبحبش الكدب والخداع ودور الضحيه اللي بيعيش فيه الرجال..

انا قلبي واحد ومعرفتش اعشق غير هي..

يبقي ليه اربط بنات الناس بيا..

انا لصبا وبس..

قلبي معرفش يدخله الا هي..

صبا جميله الجميلات..

صبا الغجريه..

سحبتها لجناحي والعيون كلها عليا مفتوحه بصدمه..

بس مهتمتش..رغم اللي هلاقيه والمعارضه اللي هقابلها من شيوخ القبايل مهتمتش

ولاول مره حكاوي العشق والعشاق اللي كانو بيحكوها عن عمتي ساليمه والراوي تأثر فيا..


ـ بصدمه وعيون مفتوحه...من جرأتها..

بتعملي ايه ياصبا

ضحكت وهي بتدفعني بايدها لورا 

بعد ماجردتني من قميصي..وانا سارح في دنيا تانيه..

ضحكت وغمزتلي..


ـ عاوزه نونو الليله يابن النوارس..

مقدرتش امسك ضحكي..من وسط عتمه قلبي وجراحي...قادره تخرجني عن حزني..

ـ دانتي مصممه ياصبا بقي..

ـ جزت علي سنانها..وهي بتقولي..

ألياس..

قبل ماتكمل..كنت بالع كلامها بشفايفي..

عيون ألياس..

وانا يعني اقدر ارفضلها طلب..

ماانتو عارفين..

ــــــــــــــــ

قد تأتيني في حزني وقد تأتيني في وجعي

وقد اتمني ان تكن جاري ولم يفرقنا البعد..  

اتمني وأتمني وهل ياعمري بالمني نلتقي..؟

ــــــــــــــــــــــــــــــــــ

مؤيد..

اول مااتصلت عليا سبأ من  ورا تمام.. مصدقتش نفسي..

معقول اللي سمعته..معقول هشوفها واملي عيني منها..

معقول نيسااان..بعد  العمر دا كله..رجعت مكنتش لسه وصلت..

رجعت علي نفس الطياره..

وانا بين الخيال والواقع ومش داري بحاجه قبلني زهري وانا يشهد الله مش في حالتي الطبيعيه..

حاسس اني رجعت مؤيد المراهق اللي كان بيستناها طالع نازل علي باب بيتهم عشان يكلمها ويلمحها..

اد ايه كانت حياتنا طبيعيه..واد ايه كنا اصحاب وحبايب مين بس سمح للشيطان يدخل بينا..غروري ولا طيبتها وتصديقها كلام الناس عليا..

والف سؤال وسؤال في دماغي..

يا تري نسيتني..؟

هترتمي في حضني.؟

ولا المشاعر البارده هتكون مسيطره علي حالها وحالي..

ومن بين دا كله لقيتني ادام خيمه في قلب الصحرا..وجاري الصبيه العاشقه لابني الغالي..

واول مانفتح الباب زقتني وسحبت مهره ومبقتش غيرها أنا وهي..

اقول ايه وانا شايفها قدامي..

كانت مدياني ظهرها..

بجسم رغم السنين زي ماهو..نيسان بجسمها الضعيف وشعرها اللي زي لون الشمس بيضوي علي ضهرها..

قلبي بينبض بقوه في صدري وهي مش واخده بالها مفكراني بنتها..

لسه بدور راسها وبايدها بترمي شعرها لورا..

كنت ارتعشت ورجعت بخوف ورعشه لورا..

وهنا..بس..

شهقت وكأن دلوقت بس روحي رجعت برجوعها لارضها..

سمعت شهقتها باسمي..

مؤيد..

زي تغريد البلابل....صوتها..ونظره عنيها تسحر القلب في ثواني..

مش عارف اطلع صوتي، ولا ارد علي همسها..

بس لساني لقيته بيردد..

احضنيني وبعد كدا اعملي اللي انتي عاوزاه..

انا غلطان..ندمان واعملي مابدالك

بس..

مقدرتش اكمل..خطفت المسافه..

وبايدي خطفتها

نيسااان..

ـ اااه ياوجع مؤيد 

ااه ياندم العمر كله..

ـــــــــــــــــــــــــــــــــ


قد القاك في سفر وقد القاك في غربه

وقد يمن الله علينا بلقاء بعد فراق طال العمر كله

وقد يشتاقني قلبك وقد اشتاقك وسع الكون كله

وقد يمن علينا الرب بالرؤيه

مادمنا نحيا ومادمت انت علي وعدي في الدنيا..

ياحافظ الوعد...وياعذابي ولوعتي..

اخبرك سرا..

أعشقك فوق العشق عشقا..

عشقا بمقدار حزني ولوعتي..

عشقا سرمديا ابديا..

عشقا طفوليا ومراهقا...عشقا علي مرالعصور 

سيبقي..ملحميا..

عشقي أنا..

عشق كعشقهم..عشقا غجريا..


ـــــــــــــــــــــــــــــــــــــــ

 ١٦

غجريه اسرت قلبي 

اسما السيد

ـــــــــــــــــــــــــــــ❤️👈👈👈يالا بقي ورونا التفاااعل 👍

(هيعدي)


(طارق)

الوحش بيعدي والحلو بيعدي..دا اللي عودتنا عليه الايام..

او دا اللي اتعلمته من عشتنا وسط الصحرا وعشتنا احنا كغجر..

الحلو وقته قليل وبيروح بسرعه والوحش بيروح بردو بس..

بس مبيرحش بالساهل.. بياخد من عمرنا ومن صحتنا ومن روحنا..بيقتلنا بالبطئ وياينتصر علينا..يانقتله احنا ونعدي..

بيبدلنا من حال لحال..وبيعلينا وينزلنا زي المرجيحه..

فتلاقي نفسك واقف محتار،محتار بين طريقين

الاتنين اصعب من بعض..

وفجأه..من وسط حزنك تلاقي نور ممدولك بيقلك قرب انا الصح..

ساعات، تبقي في اسعد حالاتك..وتلاقي قنبله موقوته من الهم انفجرت في وشك..

اهو دا بقي الغم.. بس  ترجع تصبر نفسك بردو انه  هيعدي..

هيعدي وهيروح لحاله..زي ماكل حاجه حلوه بتعدي..هيعدي ومن بعد عتمه الليل هيجي نور الفجر..دا ربك اللي قال كدا..مش احنا اللي بنقول

يعني..تشتد وتشتد وبعدها يجي الفرج..

وتلاقي نفسك بتدعي بحرقه..

وتقول..يارب

فرجكك قريب يارب..

استوعدتك همي..بدله من غم وهم لسعاده وفرح..

ياهم عندي رب أكبر منك ومن كل كرب..


اهو دا حالي من ساعه ماخدوها مني وخدوها اوضه العزل بيقولو مرض معدي، ورجعو يقولو لسه مش عارفين ايه بيها..؟

بس مش مهم..دلوقتي يخرجو ويطمنوني عليها..

اكيد هتفوق..ثريا مش هتسبني..

قلبها مش هيطوعها تحرق قلبي..

مديت ايدي أضغط بيها عيني..عاوزه تخوني وتبكي..وهي مش جاري تضغطها هي..

لسان حالي بيقول..

ياعيني متبكيش..اكيد مش هتفارق

ياثريا  يا وجع العمر متفرقنيش..

بكا سوزان بيوترني..ويخلي روحي تروح..

بس فجأة لقيت قاسم جاري..

متقلقش هتبقي كويسه..معرفش جه امتي؟

معرفش غير انه وقت فرحي وازماتي بلقيه جاري..

الصحبه حلوه والاجمل لو كان صديق مخلص غالي..اهو دا قاسم..

بصيتله بصه يأس..هو عارفها ومين في الكون دا يعرفها غيره..ماهو ياما محهالي بصوته 

صوت توشيحه للنقشبندي اللي بعشقها..

دوا صوته في ودني بتوشيحه تشبه حالي 

وسرحت فيها..

وانا ساند راسي لورا...اتذكر جمال معانيها..

✍️✍️

النفس تشكو ومن يدرى بما فيها، سواك ياخالق الدنيا وباريها

روحى على الدور طول الليل ساهرة، تأسو الجراح ولا تغفو لياليها

تئن فى طرقات الريح ضارعة يارب، فاكشف لها نوراً يواسيها

ياواهب النفس ايماناً بها، وضحت كل الدروب التى تخفى دياجيها

ياغافر الذنب يارحمن انت معى تصغى، لنبضة قلبى قبل شاديها

يامن منحت حياة الناس حكمتها من خانه الفهم، فليقرأ معانيها

الكون ياراحمي بالحب متسق، لم تخلف الشمس ميعاداً لحاديها

تسرى الغمائم فوق الارض ترضعها فيسطع النفس تسبيحاً لمحييها


طبطب علي كتفي..فابتسمت بوجع

وانا بقوله..


تفتكر..؟

ابتسملي زي عادته وقالي..

هتشوف.. بس انت خلي عندك ثقه..وحسن ظن بيه.. 

ماهو بيقولك انا عند حسن ظن عبدي بي..

خليك حسن الظن ياطارق..

وقعد..

انا بثق في كلام قاسم..الشيخ قاسم..

عنده بصيره وعلم..باخد كلامه ثقه..

وقتها ابتسمت وانا بقوله بثقه..

هتفوق انا عارف..هتفوق ياقاسم..يارب رجعهالي..

وقتها خرج الطبيب..

يتنهد، جرينا عليه..

طارق بخوف..طمني يادكتور..

الطبيب بمهنيه..ولا اي حاجه مفيش اي حاجه لغيبوبتها دي..

كان في بس اشتباه في تسمم وعملنالها غسيل معده بس المريضه دخلت في كوما..

وللاسف مفيش سبب عضوي..مسأله وقت..

احنا حاليا حطينها عالاجهزه..

وهنحلل العينه اللي اتعطتها ونشوف اذا كان سم فعلا ولا حاجه تانيه..وربنا معانا..

طارق بلهفه..عاوز اشوفها يادكتور...

الطبيب.. ممنوع..الزياره لحد ماتطلع نتيجه العينه.

طارق بحده..انا ميهمنيش تطلع ولا لا..قولتلك عاوز اشوفها وبس..

سوزان بدموع...وانا بالله عليك يادكتور انا بنتها..

الطبيب بتنهيده..واحد بس اللي هيخش..

وقتها اتراجعت سوزان وانا ببص ليه بتوسلها بعنيا تسيبني  أخش

ابتسمت وقالت خلاص ادخلها بس قولها اني برا جنبها مش هسيبها..

قولها ترجعلي ياطارق..واترمت في حضن سامر 

للي رحب بيها..

بصتلها بامتنان..وجريت  أدخلها..


غجريه اسرت قلبي ❤أسما السيد


اول مدخلت حسيت اني عايز اترمي في حضنها مش دي ثريا ولا دي انا...

دي ارواح ميته روح تايه بعدها..

مفيش ظاهر منها غير نبض قلبها..اللي صوته بيدوي في الاوضه..

ارتميت جارها عالارض ومسكت ايدها 

ايديها زي التلج بوستها ونزلت دموعي..

وبدأت احكيلها..

عن يوم لقانا اول مره حسيت بإيه..؟

وعن ضحكتها  اللي اشتقتلها، بتعمل فيا ايه؟

وعن فراقنا وسنيني العجاف بغيابها..

وهنا مقدرش اتحكم في صوتي وبكيت بحرقه..وانا بتوسلها..

متسبنيش ياثريا..يارب اجعل يومي قبلها..

ـــــــــــــــــــــــــــ

بالخيمه..

الوادي..

(مؤيد)

حضنتها بقوه وطفيت جزء صغير من شوقي ليها اللي كل مايزيد الوقت ويعدي بيزيد مابيقلش..

وانا بقولها سامحيني يانيسان..

بعدك الدنيا كانت عاتمه من غير الوان..

كان رد فعلها غريب..رد فعل زاهد من الدنيا والناس..

بعدتني عنها..وانا زي العيل الصغير عاوز اخليني في حضنها..

وانا بسألها بعيوني..

معهدتكيش قاسيه كده ياقلب مؤيد..

كانت جميله زي ماهي..مهزش جمالها السنين بالعكس زي ماهي..

فاتتني وخرجت وقالت..

عاوزه اشم شويه هوا..

وعلي صخرا قدام الخيمه قعدت..

وانا زي التايه ببصلها..

فاجأتني ببرود سؤالها

ـ ازيك يامؤيد..؟

بصيتلها بصدمه..وفي قلبي نار بتغلي..

بتقولي ازيك..بعد السنين دي كلها..ازيك..؟

لقيتني بجاوب بحرقه..

مش كويس يانيسان..مش كويس ابدا..

بس مسكتتش وبقت تجلدني بقوه..

ـ سمعت ان عندك ابن؟

وابتسمت بسخريه وقالت..

ابنك منها...من اللي...وسكتت

بلعت ريقي..مكنش اوانه ولا وقته..وفي بالي 

ليه يانيسان..عاوزه تضيعي تاني عمرنا..

في اسئله غبيه..

بس رديت..

تمام ملوش دخل يانيسان..انا...

مخلتنيش اكمل..

وقالت..

عارفه متبررليش..عالعموم كل شي انتهي..

كتر خيرك انك دورت عليا السنين دي كلها..

وبعت ابنك للخطر برجليه 

لحد هنا وكتر خيرك يامؤيد..انا..

كل الكلام اللي بتقوله هلفطه..تخاريف..

مش بعد لقانا مره تانيه..يكون دا رد فعلها..

صوتي خرج غصب عني..مقهور

مقهور ومفيش اصعب من قهره الرجال..

ـ نيسان..

كملت وهي بداري وشها بعيد عني..

انا بس عاوزه ورثي من بابا وهاخد بنتي وابعد من هنا..

لحد هنا وكفايه..تبعد..هضربها كف افوقها من وهمها..مين هيسمحلها..انا..ولا  سي ساجي عاشق بنتها..

جزيت علي سناني وبكل قوه..

شديتها من دراعها..

وصرخت فيها..

ـ نيسااان..

لما لمحت دموعها اللي بتحاول تخبيها بقوه وهميه..

صوتي ارتعش وضعفت..

انا كلي ملكك يانيسان..ورثي وفلوسي..بس متبعديش

وبدموع خانتني لاول مره من يوم فراقها..

كملتلها..

عاوزه تسمعي ايه؟

اني غلطان..طب انا غلطان يانيسان..

غلطت وندمت سنين عمري كلها..

غلطت في حق نفسي قبل منك..

صرخت فيا، وحطت ايدها علي ودنها..

كفايه..مش عاوزه اسمع حاجه..اسكت..

صرخت فيها..وانا بشيل ايدها من علي ودنها..

لا مش كفايه..

أنا اسف يانيسان..اسف علي اني سمحت لشيطان زمان يخرب حياتنا..

اسف علي كل كلمه اذيتك بيها..وكل دمعه وكل حرقه قلب..

طب اسف علي اني لمست غيرك يانيسان والله كنت مغيب، ولولا اني اكتشفت حملها بمؤيد مكنتش اتجوزتها..

معرفش ايه حصلي ليلتها وازاي سكرت وازاي قربت منها..

ولا فاكر ايه اللي حصل..غير اني صحيت علي صوتك وعياطك وعقبه جار منك..

كانت خطه..منهم..حتي لما اكتشفت حملها مصدقتش انه ابني..الا لما عملت تحليل واتاكدت

وحياتك من بعدها ماقربتلها..ويدوب اتولد مؤيد وطلقتها..

اسف يانيسان سامحيني انا كنت جبان..

سامحيني..

دموعها نزلت..

كفايه متفكرنيش..كفايه بقي..

ارجوك ابعد عني..ابعد عني وسيبني المم نفسي..

شدتها بقوه لحضني..

لململي نفسك وانتي جاري يانيسان..

جار مؤيد..فاكره عمي كان دايما يقول ايه..؟

اهلك لا تهلك..وايدكو في ايد بعض كل حاجه وحشه هتعدي..

سمعت شهقتها وهي بتمد ايدها تحاوط وسطي..

مش هيعدي يامؤيد..

انا قتلت عقبه..انا اللي قتلته بايديا..

انا قتلته..ومات علي ايديا..اناااا.

قطعتها..

شششش.اسكتي يانيسان..انتهي..

كله انتهي..

متفكريش..في اللي راح..مش هسمحلك يانيسان..

تضيعي اللي باقي في الندم..عقبه استحق اللي جراله..

ميستحقش تندمي عليه..

صوت بكاها كان بيعلي وهي حضاني بقوه..

رفعت عيني للسما..وانا بحمد ربنا..

الحمدلله يارب..

احمدك يارب واشكر فضلك..

ومن بعيد لمحت المجنون وجاره سبأ بيشاورلي

بايده..ال يعني 

هو دا...

ضحكت علي جنونه، فرفعت راسها تشوفني بضحك ليه..؟

شاورتلها بأيدي..

ـ دي سبأ

ابتسمت..وانا بشاور علي ابني

ودا مؤيد..

بصتلها ومديت ايدي حبست ايدها..

ـ يالا يانيسان؟

حسيت بخوفها وهي بتسالني.

علي فين؟

ـ علي بيتك يانيسان..

همست..وساره..؟

ابتسمت..

متقلقيش..كله هيبقي تمام..هنعدي عليها ناخدها..

انا كلمت ساجي وفهمته..

ــــــــــــــــــــــــــــــ

قدام المستشفي..

(مهره)

مش هسيبك ياساجي؟

متحاولش..انا هفضل جارك..لحد منعدي المحنه دي سوا..

بابتسامه مرتاحه اول مره اشوفها علي وشه

مد ايده وقربني لحضنه..

ـ هتعدي ياقلب ساجي..

بس انا عاوزك تروحي مع مامتك..تشبعي منها قبل مااجي واخطفك منها..


اول ما اطمن ان كل حاجه بقت تمام..هاجي اطلبك منها..

واخدك قدام الدنيا كلها..

همست مس مصدقه..بجد ياساجي؟

بضحكه سعيده خلتني سعيده زيه..

بجد ياروح ساجي..

يالا..روحي..

رفعت راسي اودع ملامحه..واحفظها.

هتوحشني اوي ياساجي..

ابتسم وباس راسي وقالي..

ـ كل مااوحشك اوي..كلميني..ولو قدرت اجيلك هاجي..

لقيت لساني بيقوله..

ـ بحبك..

رد بهيام..

ـ وانا بعشقك ياقلب ساجي..

استودعته عند الله ومشيت..ركبت جار أمي اللي اول ما دخلت العربيه اترميت في حضنها..

طبطبت عليا...وشاورتله بايدي وهو بيبتسم..


صحيح مش ابتسامه سعيده.بس شوفت بسمته  اللي عندي بالدنيا..

افتكرت صبا...

فهمست صبا...مع السلامه..هنتلاقي ياقلب اختك..

انا عارفه انها هتحس بيا..دي اختي، صحيح مش بالدم..

بس في حاجات كتير بينا..في عشره وحياه تانيه..عشناها مع بعض

ضحكنا وبكانا ولعبنا وسهرنا حتي مصايبنا سوا..

سمعت همس في وداني..

بصوتها..

مع السلامه ياقلب اختك من جوا..هنتلاقي ياساره..

ـــــــــــــــــــــــ

بقصر النوارس


(صبا)


كان نايم ومكلبش فيا زي الطفل الصغير..

رغم قوته دي كلها..معايا انا الياس وبس..

ودا اللي خلاني عشقته من اول نظره..

لقانا دايما مش عادي..لقا عاصف لقا بلون رمل الصحرا بيلمع في الشمس

مديت ايدي احسس علي بطني وانا بقول..

امتي بس..؟

سمعته بيقولي في وداني..

بنبره خباثه عرفاها..بيتلاعب بيا..


ـ والله انا عملت اللي عليا..لو حابه نعيد تاني..

شهقت..بكسوف..

الياس..

ضحك وهو بيرجعني تاني لحضنه..

عيون الياس..

اللي يشوف كسوف..ميشوفش وانتي بتقوليلي

الليله ياالياس..

ضربته علي دراعه اللي محاوطني بيها..

ـ انت بقيت وقح اوي ياالياس..

ـ دا انا ياصبا..؟

ـ اه انت..؟عيب يابني عيب..انا بس عاوزه نونو..

وهنا صوت ضحكته متأكده جابت لاخر الدنيا..

وهو بيقولي..

خلاص يبقي نعيد تاني..

اهو التكرار يعلم الشطار..

قبل مااعترض كنا رايحين لعالم تاني

مفوقناش منه الا علي خبط الباب بقوه..

اتنفضنا، وانا بعوج بوقي..

ابتدينا..اهو..

غمزلي وقالي..

ايه ياوحش مش قدها ولا ايه؟

رفعتله حاجبي..

هتشوف يابن النوارس..

قام بسرعه لبس هدومه..بعد ما سمعنا صوتها 

افتح ياالياس..

دي الغبيه ثناء..

بصلي عشان اقوم البس هدومي..

بصيتله بلامبالاه، وانا بلبس قميصه اللي خلعتهوله بايدي..

وغمزتله..

ضحك وفتح وهو بيقول الليله دي مش هتعدي انا عارف..

اول مافتح الباب..عينك ماتشوف الا النور..

كانت زي القطر القشاش ماسكه ورقه في ايدها..

بتسأله بحرقه واضح انها لسه مشفتنيش

خرجت ازاي دي.؟

بعد ماسمعت ان مهران حبسها هي ودريه؟

وازاي جايلها نفس اساسا تعمل كده واخوها ميت ولسه مبردش في تربته..

قولت يمكن لسه ميعرفوش خصوصآ انهم لسه هيروحو يتعرفو عالجثه..

او يمكن يعرفو وطبعا كالعاده مش في همهم..

ابوها في المستشفي من الصدمه وأمها جاره..

وهي جايه في نص الليل تتأكد عن ورقه طلاقها..

ههههه..بني ادمه غبيه..

سمعتها بتساله...

انت طلجتني بجد ياالياس.؟

لقيته قرب منها..وقالها بشماته فرحت قلبي..

ااه غيابي..عندك مانع..

ثناء بحده..متجدرش وهترجعني ياألياس وهتشوف عمي هيعمل فيك أيه؟

ابتسم وقلها..انا طلقت غيابي..انما  دلوقتي..

انتي طالق..

طالق..

طالق مني بالثلاثه..

شهقت بقوه..وهنا عينها وقعت عليا وانا ببصلها بشماته..

وبصدمه شاورت عليا وانا واقفه قدامها بقميصه..

ـ انتي

 ايه اللي جاب الغجريه دي اهنه..؟

انت؟

قبل ماتكمل..

كنت قربت منه..

ومن ايدها اللي مسكاه بيها نطرتها عنه..

 بقوه.. 

وبحده خوفتها..

متمديش ايدك علي جوزي لو سمحتي.. 

ابتسم.. بسمه موجوعه.. حساه حزين اكتر منها علي اخوها.. ولف ايده علي وسطي..

ولسه هتكمل.. 

كنت شداه لجوه.. وزقتها.. وخرجتها وقفلت الباب في وشها.. 

سمعت صراخها وهو صوت ضحكته جلجت 

صبا.. 

جزيت علي سناني.. 

ألياس.. احنا عندنا مهمه ولا انت ناسي.. 

قربني ليه بايده وبصلي بصه بتضيعني.. عارفاها.. وسألني بغمزه..

ـ ايه هي المهمه..؟ 

ـ عضيت علي شفايفي.. وانا بقوله.. 

النونو ياالياس

وهنا بقي كان  في فعل ابلغ من الكلام.. 

ومن وسط جنانه.. 

سمعت همسها في وداني.. 

وودعتها.. 

مع السلامه ياساره.. 

بتكلمي نفسك تاني ياصبا..؟ 

غرقت في حضنه.. 

وقلتله، بودع مهره ياقلب صبا.. 

ركز انت بس.. الله

ـــــــــــــــــــــــــ

جنب الينبوع..

سبأ..

هتجوزني امتا بقي؟ 

بغيظ الدنيا كله.. سألته..  وهو قاعد يطوح في رجله علي سور الينبوع وبيمص قصب.. 

ولا هو هنا.. 

ـ الله ياسبأ مش لما اخلص من ام المهمه دي..

تصدقي طعمه حلو اوي.. 

شديت منه عود القصب بغيظ.. 

انت خلاص مفيش منك فايده.. وتصدق خساره فيك عود القصب، سلام اولي بيه.. 

لسه هقوم كان شددني بقوه تاني لدرجه كنت هقع في المايه.. 

انت اتجننت ياتمام.. 

ـ ضربني علي راسي وقالي جن لما يركبك ياسبأ.. 

منتش ملاحظه انك بقيتي بتخبي عني وبتعملي عمايل من ورايا..

هتقري وتعترفي ولا...

سبأ برعب..انت بتخوفني ياتمامي..

جز علي سنانه..سبأ..؟

اتنهدت..خلاص هعترف..اف منك..

تمام بضحك..شاطره ياسبأ..احكي ياشهرزاد..

ــــــــــــــــــــــــــــــ

(ألياس)

نمت لاول مره في حضنها..مرتاح..

مرتاح وانا متأكد ان الدنيا كلها عارفه انها مراتي..

سامعهم طول الليل في خناق..

مهران ودريه وصوتهم العالي..شويه نواح وشويه صياح..

بس مهتمش بكره يوم طويل..

انا عاوز اشبع من حضنها..دفست راسي علي  صدرها ونمت زي العيل الصغير..

وعيني راحت في النوم..وهي بتحكيلي حكاويها اللي للاسف الشديد بقيت بحبها..

نمت ومدرتش بحالي..

لحد ماصحيت علي اسوأ حاجه ممكن تجرالي.

وانا بصرخ بعلوو صوتي باسمها..

صباااااا

ـــــــــــــــــــــــــــــــــ


هيعدي..وجعك هيعدي وحزنك هيعدي

ظلمك وحرقه قلبك هتعدي..

وحدتك ويأسك بردو هيعدي

الليل الحزين هيعدي..

الوحش هيعدي زي مالحلو كله بيعدي..

عيونك التعبانه وروحك المطفيه مسيرها تضحك وترجع وتعدي

قلبك المكسور..هينجبر وهيعدي..

مرضك وعزلك هيعدي

واللي ضحك عليك انهارده بكره يبقي في مكانك..وانت تقوله ابتسم هتعدي

بس خليك واثق بس ان كله هيعدي...

بس ادعي وقول...

ياارب يعدي....


   الفصل السابع عشر والثامن عشر من هنا 


   لقراءة جميع فصول الرواية من هنا

تعليقات