روايه حافة المنتصف الفصل الثالث والثلاثون 33 بقلم آيه

 

روايه حافة المنتصف 

الفصل الثالث والثلاثون 33

بقلم آيه

خش نبراس ، و خلود مشت بخطوات سريعه قدام معتز بدون ما تحكي ولا حرف ولا تبحت فيه اصلا وطلعت … خذا نفس و طلع وراها لحد ما وصلو للحوش و ركبو شقتهم


حولت الايشرب و لحد اللحظة هذي ماسكه دموعها ، في صدمات يخلن الشخص قوي ، يواعنه على الدنيا و صعوبتها يخلنك تفطن انك طيب بزياده وطيابتك خلتهم يستغفلوك ويديروك مضحكه وهضا اللي صار مع خلود اللي من كثر ما سامحة معتز ومن كثر ما تغاضت وسكتت تحساب انه هكي يديرلها قيمه ف جا وقرر يزوج عليها ! قلبها قوى و جتها القسوه والقوه في نفس اللحظه 


بحتت فيه وبحده قالت >> بتزوج ؟


رد بإحراج >> خلود بالله عليك افهميني مش خير نزوج خير ما نخونك بالحرام ، مدام اني ح نعدل بينكم و مش ح نقصر معاك ابدا مانبيش نديرها بمشاكل فضلت نحكيلك احسن من اني نديرها بالسر و نستغفلك بس للاسف انك سمعتي بطريقة هذي والله كنت بنفهمك مانبيش ندير حاجه حرام ، نعرف اني كنت نبحت و عارفك تعرفي بس بطلت والله 


خلود ببرود مصطنع تحاول ادس بيه حرقة قلبها>> ما قتلكش ما تزوجش انا ، الشرع محلل وانت حر .. بس برضو الشرع ما يجبرنيش اني نقعد على ذمتك … حللك تزوج اثنين وثلاثه واربعه بشروط وحللي نرضى و لا ما نرضش ونطلق! 

علي سيرة العدل ربي في القرآن قال "ولن تعدلو" يعني ما تقعدش تسمع فيا في دسكة ح نعدل لا قلبك ح يقدر ولا انت ح تقدر انا نعرف ف معتز بلا تبريرات عشان ما نكرهكش خلي عندي لكي ذكره طيبه وولدنا يعيش متريح لاني انا لو استمريت مش ح نكون خلود اللي زمان حنقعدو كل يوم مشاكل … شيلني الحوش هلي وانا طالبه منك الطلاق 


معتز بصدمة>> طلاق شنو ؟ خلود ما نبيش نطلق انا! مش معنى اني بنزوج معناها معش نبيك انتي ام ولدي ونبيك وبعدين انتي عارفه هلك مش ح يرضو 


قاطعاته>> افهم الشرع والدين كويس يا معتز قبل ما اديرهن غطا لمشاعرك ونزواتك ، بعدين مدامك بتزوج معناها انت مش مستكفي بيا معناها انا مش كافيتك وماحبيتنيش الحب الي ملالك قلبك ! انت غرضك من الزواج مش ديني انت غرضك بترضي روحك ما تقعدوش تاخذو من الدين فالكلمه اللي تعجبكم بس وتعزقو الباقي … كلام زياده معش عندي وقراري مصره عليه بالنسبة الهلي خلي بيني وبينهم عندي نموت ولا نكمل معاك وانت على ذمتك وليه غيري بتلمسك وتحكي معاك وحتقوللها الوهم لي تقولي فيه و "مسكت دموعها وخذت نفس ومعش قدرت تكمل كلامها"


خشت للدار و طبقتها وطلعت شنطتها تلم في دبشها ، ومعتز كان واقف فالصاله لاول مره خلود تحكي معاه هكي لاول مره صوتها يعلى لاول مره يحس انه تايه رغم انه مصر على قراره جدا ! ومش ح يتراجع فيه بس ماكانش قادر يرد عليها بحرف ، لانه عارف الموقف صعب عليها وماكانش حاس بحجم غلطته ومش ح يحس الا بعد يشوف نجوم الظهر  ف خلاها تحكي براحتها واحترم انها ما تبيش تسمع تبريرات


 "فرقة احترامك وطياح سعدك 😒" 


//

//


في نفس الوقت بس فحوش الصديق كانن البنات يهدرزن فوق عند اسيل اللي كانت باديه في وحم الحمل ومعش تقدر ادير ولا حاجه 


اسيل >> استغفر الله العلي العظيم بس نكره الشهور الاولى فالحمل بكلللللل نقعد نبي الشهر الرابع يجي بيش يخف عليا التعب


ليلى >> ربي يكون في عونك انتي ماتاكليش حرام عليك رايحه ناقصه بكل 


اسيل >> ما تجينيش نيه والله نتعب لما ناكل 


مرام >> كل يومين محمد شايلك تركبي في تغديه مش كويس هكي 


اسيل >> قلت المحمد يشيلني عند ماما ما بش


ليلى >> خزي عليك وكنك ما تنزلي تقعدي لوطا 


ابتسمت>> يا سامطه ساد غير الغدا لي كل يوم تركبولي فيه و العيال لي شايلين حوستهم … بس الفتره هذي هرموناتي منقلبات ونحس نبي ماما بكل


ضحكت مرام>> يعني ماتبيش محمد 


اسيل >> للاسف اني الحمل هضا اول مره نقعد مش طايقته😂 في قيس عشان كان اول حمل ما كنتش فاهمه روحي بكل وشعور جديد عليا … بس في لين كان الحمل جايني بالحب على محمد 😂😂 بس توا العكسسسس مش طايقه 


ليلى>> احسن خليه 😒😂


بحتت اسيل في مرام>> ما صارش معاكي جديد


هزت مرام براسها>> لالا من قبل عرس مجد معش حكينا اصلا قتله انت فكر وانا نفكر


ليلى>> مش فاهمه عليش تفكر اصلا شن تبي خير من نبراس ؟


مرام>> الموضوع مش قصة شن نبي خير من نبراس الموضوع بعد قعد جدي وبيوصل للهل قعدت نعرف شن معنى كلمة مطلقه ! وشن معنى اني ناخذ راجل هله كلهم شايفينه انه الشخصيه والراجل واللي رضي والديه وكل شي و فوقها كان خاطب بنت عمه . ويسيبها عشان يجوز من ؟ مرام !


سكتت ليلى شويه وماعرفتش شن ترد


بحتت اسيل في ليلى و بحتت في مرام >> مرام ماحدش ياخذ فوق من نصيبه فالدنيا… نبراس لو عندك فيه نصيب ح ياخذك بالطيب بالغصب ح ياخذك … بس انتي ما تفرطيش فيه مش ح نكذبو عليك ونقولولك الموضوع ساهل لا ماهوش ساهل خصوصا في المحيط لي نحن عايشين فيه والناس وكلامهم ماهوش ساهل بس لانك اول ولا اخر وحده اطلقت وتبي ترد تجوز وكل شي بالحلال مادرتيش شي غلط 


هزت مرام براسها ومعش تبي تفكر فالموضوع 


ليلى >> نخش نديرلكم نسكافيه ؟


اسيل>> ياريت وفيه شوكلاطات جايبهن محمد للعيال اسرقي منهن 


ضحكت >> بدون ما تقولي 


//

//


طلعت بعد ساعه من الدار ، لقت معتز قاعد عالكنبه و ضايقه بيه " بحتت فيه بنظرة مش ح نشفق عليك ولا ح نتنازل وانت لي جبته النفسك " 


نزل عيونه في الشنطه لي ماسكتها وكانت كبيره ! واضح انها قررت خلاص … كان مستغرب في خلود متوقع انها ح تزعل وتعيط وتبكي و ادير موضوع وتسكت وترضى بعدها ..ماكانش متوقع رد الفعل السريعه هذي ولا كان متوقع انه النقاش ح ينتهي بالسرعه هذي بدون ما تنزل ولا دمعه و بكل قسوه وقوه … بس كان برضو مازال في باله انها ح تمشي الهلها كم يوم وترد 


بحتت وين ما هوا يبحت ورفعت عيونها في يدها ، حولت الدبله منها و حطتها عالطاوله 


خلود بدون ما تبحت فيه>> سعد خويا فالطريق جاي بياخذني ، ياريت تجيبلي فرج من غادي مانبيش نشوف حد من غادي ونقعد نحكي في الحوار هضا 


معتز بحت فالدبله>> ح نخليك تمشي حوش هلك لعند ما تهدي بس مش ح نطلق 


خلود >> ما منعتكش من حقك انك تزوج ، ياريت ما تمنعنيش من حقي اللي بالحلال اني نطلب الطلاق ابسط حقوقي 


كان كلامها صعب عليه ، ما قدرش حتى يرد ولا يبرر موقفه حاس روحه ح يخسر شي مش ح يتعوض … بس مازالن مشاعره مذبذبات وشيرته مذهوبه مع زواجه الثاني واللي لو يعرف شن بيصير فيه كان ما فكرش لحظة يعيش ثانيه بدون خلود ! 


بحت فيها وهي كانت ما تشوفلش ، طلع من الحوش بسرعه و صكر الباب …. تنفست بهدوء وهيه تحاول تدعي وتطمن انه ربي معاها و هيه ما غلطتش في شي 


رن عليها سعد خوها وقاللها انه لوطا وكان مازال مش فاهم شن فيه ، نزلت وهيه تكر فالشنطه على ركبته هوا في نص الدروج فك منها الشنطه فلتت يدها بسرعة


>> فرج وين 

معتز >> خوك برا  سلمت عليه و خذاه فسيارة 


نزلت وطلعت بدون ما تسلم على حد كانو كلهم فالحوش الثاني و هيه هربت من المواجهة هذي والوداع مع الناس لي عاشت وسطهم كأنها بنتهم


‏"يؤلمني الشك في صِدق الذكريات. تخيل أن تعيش أمورًا تؤمن بكل ما فيك أنها الأصدق والأبقى، لكنك وبعد مرور الأيام الموحشة والغريبة عليك، يُصيبك الشك في صدق كل الذي كان عمرًا كاملًا بالنسبة لك."

~✨

.


نزل سعد  مالسياره حط الشنطه لاوره وهوا مستغرب ومش فاهم شي ، ومعتز واقف فم الباب 


صكرت باب السياره وسعد ساكت ما حكش حرف ، حضنت فرج وطلعو من الشارع وهيه هنا قدرت تطلق دموعها وهنا سعد فهم انه صايره مشكلة بينهم 

وسعد كان خوها الوسطي و احن واحد فيهم عشان هكي كلماته … سكت وخلاها تبكي و تفرغ زعلها و فرج كان في حضنها يسمع في صوت بكاها ومش فاهم شي 


طلع نبراس من الحوش ولقى معتز واقف يبحت فالسياره لي طلعت من الشارع


خبطه على كتفه >> عدت؟


معتز >> ماتوقعتش هكي يسير ! مافهمتش شن اللي صار اصلا ما عرفتش عليش بسرعه خذت قرار … الموضوع ماخذش ساعه لا بكت ولا عيطت ولا هزبت ولا حتى انصدمت تخيل ؟ وانا لساني انربط ماعرفتش كيف خليتها تعدي بس


نبراس >> انت شيرتك مذهوبه وعقلك مش معاك ماتبيش حاجه تريحلك زواجك الثاني بس عشان هكي ماعرفتش ادير اي ردة فعل 


سكت معتز وتفكيره تلخبط >> توا كيف بنحكي الباتي وانت عارف باتي و اعصابه 


نبراس >> اسمعني سألتك بالله ماتحكيش شي … عطيني لعند بكرا في موضوع بنحكيه مع باتي وامي وبعدها انت احكي موضوعك بيش ما ينجلطوش العيله مره وحده 


معتز >> ياساتر شن فيه انت الاخر 


نبراس >> تو بكرا نحكيلهم وتعرفو .. المهم معتز ! فكر كويس اه واعرف اني انا مش معاك في اللي تبي اديره خلود ما اتعوضش يا معتز وكان خسرتها صعب تردها صعب 


هز معتز براسه وسكت 


//

//


عند العرسان الحلوين 


صالحين >> تو انتي لكي كم يوم فيه الحوش حله توسخ وحلك تضمي فيه 


قعمزت عالصالون جنبه >> اهو كنت متعوده هكي فحوش هلي ديما مع البنات وديما نبرمو ونهدرزو كسدت لما قعدت بروحي هكي 


صالحين ابتسم >> تو اتعودي على هنا تبيلك شوي وقت بس "ومسك يدها قربها منه"


مجد بحتت فيه>> صالحين عادي نمشو باهي الهلي بكرا جمعة والله رايفة عليهم بكل ورايفة على سيسي وهديل


صالحين >> هذي بس … حاضر بس بشرط 


قرنت حواجبها وبحتت فيه >> شنو


صالحين >> افردي حواجبك بنسأل بس


رخت حواجبها وهزت براسها


صالحين>> لنا تقريبا اسبوع مع بعضنا في حوش واحد شن حاسه وانتي معايا ؟ 


مجد >> صالحييين عارفني مانعرفش نحكي 


صالحين بحت فيها >> مطوله يعني وانتي ساكته؟


مجد >> يعني انت مش فاهم 


ابتسم>> لا فاهم وعارف بس نبيك تحكي 


مجد>> خايفه 

صالحين>> عشان هكي نبيك تحكي نبيك تقولي شن تحسي عشان معش تخافي 


مجد >> ماهو اللي مخوفني اللي نحس بيه . كنت متوقعه اني ح نبعدك مني ودايره سيناريوهات في راسي من اول ما قرب العرس وانا نقول. اني ح نرقد بروحي ومش ح نحكي معاك ومش ح نقرب منك بس لقيت العكس كله صار … ومن اول يوم لقيتني راقده جنبك ومن اول يوم لقيتني نقرب منك عادي وهضا لي مخوفني "وسكتت"


صالحين >> انك تقربي مني وبعدها كل شي يتغير ؟


هزت براسها 


صالحين ابتسم >> ما تخافيش انا مش ح نحكي بس كل شي وكل يوم معايا ح يثبتلك اني مش ح نخليك ولا ح ندير شي يأذيك … تمام ؟


بحتت فيه وابتسمت >> تمام


//

//


ثاني يوم الجمعة في حوش الجدة ملتمين كلهم بعد ما كلمتهم مجد فالصبح وقالت انها ح تجي اليوم


هديل >> خلود نرن عليها من مبدري مش قاعده 

سديم >> عميمه نجوى جت بروحها غريبه قبل يجن مع بعضهن ولا تجيب معاها فرج 

هديل >> بلكي عندها حوسه ادير فيها 

سديم >> مش عارفه دزيتيلها مسج باهي ؟

هديل >> اه قتلها بعد تفطني التلفوتك تعالي را مجد جايه 

سديم >> معناها تكمل حوستها وتجي 


طلع بدر من داره وبحت فيهن وهنا مقعمزات 


سديم >> معقوله راقد لعند العصر 

بدر >> امس فالمينا طولت انا وسهم قعدنا للفجر بعدها روحت والله رقدت بدبشي 

هديل>> لقمان مش معاكم ؟ 

بدر >> لالا روح بدري ولد امه ما يحبش يسهر


خبطه على راسه من لاوره>> من لي ولد امه انا ولا انت


بدر >> تي غير من وين خشيت انت بس 


لقمان >> من الباب بيش نسمع قرمتك


بدر>> قول والله من الباب 😒 عيله دمها خفيف 


ضحكت هديل و سديم بحتت فيه >> غصبا عنك دمنا خفيف 


بدر >> باه صبي ديريلي قهوه هي كيف خفة دمك 


سديم >> بدر شغالتك انا ؟


بدر >> سديم قهوة يعني


هديل >> هوا مش عشان القهوة بس سيسي ماتعرفش اديرها


بحت فيها ورفع حاجبه >> كيف البياره هذي 


سديم >> والله الي بياخذني بيحب النسكافيه


بدر قرن حواجبه>> صبي صبي ديري قهوة من قالك في حد بياخذك اصلا 


ومشى من قدامهم 


بحتت هديل فيها >> تو نصبي ندير خليه يحكي


لقمان ضحك>> اديرولي ؟


هديل >> انت نديرلك مخصوص 


ابستم وسديم تبحت فيهم 


.

.

.

في نفس المكان بس فالمربوعه البرانيه … كان نبراس واقف و يجمع في قوته عشان يحكي مع باته وامه


الهادي>> لكي ساعة جايبنا وتقول في مقدمات معش حكيت


نبراس لم الكلام في راسه ومش عارف كيف يرتبه >> تقريبا ليا شهر فاسخ خطبتي و الموضوع زي ما كلكم شفتو ماكانش كره في هديل بس كان مافيش نصيب بيني وبينها

 "بحت في امه" عارفك تبي تفرحي بيا و جا الوقت لي بنخطب فيه بنت ناس والمره هذي انا مختارها 


على قد ما استغربو كلامه وبذات امه لي تعرف انه نبراس عمره ما دلهم على وحده ولا حكالها على بنت


بس كسر الكلام الهادي لما قال>> ومن هذي وبنت من وحلك عرفتها وانت مالك شي فاسخ ؟ 


نبراس ما حبش يحكي تفاصيل>> مش انا بس نعرفها حتى امي تعرفها و هلها تعرفوهم


استغربت جميله اللي كانت تراجي فيه يكمل كلامه


وخذا نفس وكمل كلامه >> نسابات عمي فرج .. يعني تقعد اخت خطيبة سهم 


الهادي ماكانش فاهم بس هز براسه بموافقه انه الوضع طبيعي ،.. لعند ما جميله اللي قعدت تذكر شويه و بعدها توسعن عيونها وهيه تبحت في نبراس 


جميله >> المطلقه ؟ ماتقولش اختها لي شفناها فالخطبه البنت لي مطلقه لي ماطقت شي في زيزتها واطلقت ؟؟؟ ما تقولش هيه 


هز نبراس براسه و يحاول يهدي من ردة فعل امه


الهادي >> كيف ؟ مطلقه كيف يعني 


بحتت جميله في نبراس >> وشن جيبها لكي وشن جيبك لهاااا


علن الاصوات وقرب بدر من عند المربوعه بيعرف شن صاير 


ونبراس اللي ماعمرش طلع صوته قدام حد ! صبا قدامهم


و بنبرة تهديد>> طول عمري ماشي على رايكم كنت جبان و خايف على زعلكم عزقت قلبي وحياتي ومستقبلي في الساس وقلت الا رضاكم ! كملت مع بنت عمي لعند اخر لحظة لعند جت هيه و بروحها فسخت الخطبه بروحها يعني انا كنت مكمل معاها وقلبي يتقطع عشان رضاكم عشانكم ! باهي خلوني توا نختار حياتي … مطلقه ولا بنت شباب شن فرقة عندكم مش تبو راحتي ؟ مش تبوني نتريح وتفرحو بيا ح تشوفوني فرحان معاها انا راجل ونعرف تفكيركم انا اللي بيصكر عليا وعليها باب مش انتو 


جميله اللي كانت اول مره تشوف ولدها يدافع على حاجه بالطريقه هذي كانت تعرفه وحافظته وعارفه انها مهما دارت مستحيل تغير رايه


بحتت فيه بقلة حيله >> نبراس انا نعرف اني مهما درت وقلت مستحيل تغير رايك ، ولا ح نقدر نقنعك ولد بطني وحافظتك … ح يمشي باتك ويخطبها لكي و نديرلك عرس ونفرح بيك … لكن ما تفرضش عليا اني نتقبلها ولا تفرض عليا اني نعاملها كويس هيه في حوشها وانا في حوشي تسلم عليا ونسلم عليها اكثر من هكي مش ح تلقى مني .


طلعت جميله من حذاه ، بحت نبراس في باته بضيق بعد ما سمع كلام امه و الهادي اللي كان باين من ملامح وجه انه مش راضي بحت في نبراس


الهادي >> تبيها خليها عندك في حوشك و حياتك وانت حر فيها ربيتك راجل وتعرف مصلحتك ، وعارفك ح تحمل مسؤلية اختيارك … انا كلام الصبايا مش ح ندخل فيه بس انا قبل ما ندير اي حاجه نبي نسأل بمعرفتي عالبنت " وبحت في نبراس بتهديد" لو لقيت كلمة وحده غلط عليها ح يبقى بينك وبين زفتك عليها رضايا وانت اختار 


طلع الهادي من حذاه 


خش بدر لي كان واقف عند حاشية الباب وهما يحكو و ساكت 

بحت في نبراس وخبطه على كتفه>> بشويه بشويه كلنا متوقعين ردة الفعل هذي … وعارفين اللي كان ح يسير … انت واثق فيها وعارف انه باتي مهما فتش وسأل وراها مستحيل يلقى غلطه سيادة الرائد ونعرفك مستحيل اصلا ح تقعد معاها لو شايف ربع غلطه عليها بغض النظر عن حياتها قبلك شنو 


نبراس >> انا نغلط وهيه ما تغلطش متخيل كيف واثق فيها ؟ وعارف انه باتي قال هكي عشانها مطلقه بس … تي الموضوع هضا قبل ما يضايقهم مضايقني تمنيت نعرفها من قبل تمنيت نقعد انا اول حد … تمنيت والله بسس هضا اللي صار وراضي بيه وبيها كيف ما كانت خلاص عاد مش موال هوا كل ما نحكي مع حد يقولي انت عزابي وهيه مطلقه 


بدر >> انت عارف من الاول انه هكي ح يسير صح ! عارف انه مازال ياما ح تسمع اهم شي خليك معاها وما تخذلهش انت راضي و هضا المهم 


نبراس هز براسه >> ان شاء الله خير ان شاء الله خير 


//

//


في الدار الثانيه جوا بعد خشت جميله 


سالمين >> يا بي يا بي يابي … كيف هالخبر البنت مطلقه وهو راجل اللهم صلي عالنبي الدنيا كلها تصبي قدامها وفوقها عزابي كيف هكي …. وكنها بنت عمه لي سيبها  … سيبها عشان هذي 


هزت جميله براسها>> والله ياعمتي ما نعرف شي انا ولا فاهمه شي … بس كيف ما نا نعرف نبراس انتي تعرفيه ومتربي قدامك لما يسكر راسه ما حد ح يوخره


سالمين >> لما سيب هديل انا قلت علي كيفه هو حر وما نغصبوش حد علي حد لكن يسيب بنات العالم والناس كلهن وياخذ وحده متجوزه من قبل عليش شن ناقصه 


سكتت جميله وهيه ماعندهش ماتقول 


نجوى >> علي كيفهم يا عمتي العرب ماهمش غريبين… البنت اخت خطيبة سهم وعرب سألنا عليهم تقوليش والبنت انا شفتها بنت كيف النسمه تهبل وهاديه و شكلها سمح ومش كل من اطلقت معناها الغلط منها 


سالمين >> حتى ولو عليش من دون البنات يعني 


نجوى>> نصيب والله … تو تطلع بنت حلال و خير من مية وحده شباب 


كملت سالمين كلامها و نجوى تهدي فيها اما جميله ف كانت ساكته وخلاص 


على كلامهم هضا … برا دق الباب وطلعت سديم تجري تفتح فالباب 


سديم >> مجووووووووودي رايفنا عليكي 


و طلعت وراها هديل


مجد >> بنات را نبكي خلاص


ضحكت هديل>> حولي عطيني فرصة نسلم عليها 


طلع نبراس من جوا >> خشن قاعدات فشارع الباب مشرع 


اضبطت مجد نبراس >> رايفة عليك يا واعر انت


نبراس ابتسم و كانت مجد تعرف ابتسامته لي بضيق 


بحتت فيه و قرنت حواجبها 


نبراس >> راجلك برا ؟؟


مجد >> برا قالي كلميه ليا عندنا شغل ما شغل


نبراس >> اها … خشي كلهم يراجو فيك


وجا بيطلع سمع سديم وهيه تقول >> تي خلود كنها معش جت 


بحت نبراس فيهم قبل ما يصكر الباب >> خلوها تكمل مره وحده اليوم … خلود حرجانه و امس مشت الحوش هلها


شهقت سديم والتفتن عليها مجد و هديل لي كانن سابقاتها 


نبراس بحت فيها >> ما تقوليش للي جوا معتز بعدين ح يقول العمي 


سديم >> باهي عليششش حرجانه شن دارلها ولد عمك


نبراس >> خلوني نطلع تو نحكو بعدين


صكر الباب و قربت سديم من هديل اما مجد ف كانت مرايفه على امها خشت تجري جوا


هديل >> تي كنك تشهقي


سديم >> خلود حرجانه قالي نبراس 


هديل حطت يدها على فمها >> تكذبي


سديم >> والله قالي ما تقوليش الحد معتز بعدين بيحكي الهله


هديل >> كنهم عيال سيدك انكلبو 


سديم بحتت في هديل >> شن رايك في اللي صار مع نبراس مبدري 


هديل >> كنت حاسه اصلا انه فيه وحده 


سديم >> وعادي؟؟


هديل >> سيبته و سوا كانت فيه وحده ولا لا كنت ح نسيبه في جميع الاحوال . هوا حر بياخذ وحده مطلقه وحده عندها عيال ما نحسش فيه حاجه مضايقتني


سديم >> خلينا نخشو شغلتني خلود بكل 


//

//


في المركز عند سيادة المقدم وسيادة الرائد… حكى نبراس للصالحين الي صار وصالحين اللي كان عارف ردة الفعل هذي ح تسير 


صالحين >> خلاص انت حكيتلهم و هضا كان ردهم المتوقع خلي باتك يسأل وبعدها خليهم يخطبو رسمي 

وتم الموضوع 


مسح نبراس على وجه>> عارف انه هضا لي ح يسير بس انا كنت نبي نجيبها ووعدتها انه محد حا يجي شورها مانبيهش تحس بنقص وامي تقعد تقارن بينها وبين هديل 


صالحين >> من الناحيه هذي اطمن … خالتي عاقله وعارفتك ما تحبش هديل ومش ح يسير هكي … بس الموضوع صعب عليها وكلنا عارفين عليش


هز نبراس براسه>> مش عارف نكلمها من قبل عرس مجد وانا امكملها مسجات مانبيش نحكي معاها عارفها ح تسألني و انا مش ح نكذب عليها


صالحين>> نبراس كلمها وقوللها لي صار انتو الاثنين كبار وعارفين عاد اللي صار انه ح يسير ف خلاص فالنهاية هلك ما رفضوهش بس قالولك انه هيه في حالها ونحن فحالنا


سكت نبراس على خشت خالد عليهم 


بحت فيهم>> كنكم انتو الاثنين


صالحين >> سيادة الرائد بيلحقنا ويخش للقفص الذهبي


بحت خالد في نبراس >> هضا وجه واحد بيخش للقفص الاسود مش الذهبي


رفع نبراس راسه >> ابلطو انتو الاثنين را نحطكم في القفض اللي لوطا


ضحك خالد >> الحقني سيادة المقدم عندنا شغل .. سادك عريس خلاص انتهت الاجازه


صبا صالحين >> اللي يعرف وجوهكم يعرف الاجازة


طلع خالد ولحقة الصالحين ونبراس كان مازال يفكر


//

//


حكن البنات المجد اللي صار و استغربت مجد وانصدمت من نبراس … بس في نفس الوقت كانت هيه اكثر حد تعرفه وعارفه انه بعد ما نبراس يصكر راسه معناها خلاص وبرضو تعرف انه هوا عمره في حياته ما دلهم على بنت فالمره هذي مدام حكالهم معناها شايف فيها شي خلا قلبه يتحرك… وبرضو قالن لها  على انه خلود حرجانه وكانت مجد حاسه انه الموضوع فيه بنت شور معتز 


انتشر خبر انه نبراس بيخطب مرام وبرضو انها مطلقه و من حد الحد لعند العيله كلها سمعت الموضوع والبركه في بدر الدين شهدرها… حتى هنيه لي مش معاهم فنفس المكان كلمتها جميله اختها وقالت لها وهيه تشكيلها 


يومها روحو الشباب كلهم بدري و كمل اليوم هدرزه وضحك مع مجد اللي كانو كلهم مرايفين عليها …

وطول القعده وبدر وسديم يتعاركو و يتناقرو ومجد تبحت فيهم وتضحك … ولقمان يلي كان طول القعده يحاول يبحت في هديل يبي يعرف ردة فعلها على الموضوع هضا


روح الصالحين هوا ونبراس … وخش للمربوعه شويه سلم علي الشباب وهدرز مع خالته شويه و خذا مراته وطلع 


.

.

.


مسك نبراس تلفونه … ورن على مرام اللي كانت ماسكه تلفونها وبحتت في الرنه و في نصها ردت 


مرام >> الو 

نبراس >> الو واثنين وثلاثه 


ابتسمت وهي حاسه بضيقته>> عادي نقولك رايفة عليك


نبراس >> قولي اللي بتقوليه 


مرام >> كيف حالك


نبراس >> توا قعدت بخير


ابتسمت وهيه مشاعرها متلخبطه 


نبراس >> تخليني نحكي وتسمعيني للاخر !


مرام خذت نفس >> احكي 


نبراس >> حكيت مع هلي اليوم 


مرام >> كمل 


نبراس>> مرام مش ح نكذب عليكي ونقولك انهم تقبلو الموضوع وفهموني ، انا كنت متوقع وانتي نفس الشي وخصوصا اني ماليش شهر بس ناهي موضوع خطبتي ف ردة الفعل ماكانتش احسن حاجه


سكت وطلع دخانه وولع بالولاعه 


مرام >> كمل 


نبراس ماكانش يبي يحكي بوضوح عشان مايبيش يضايقها >> الي متوقع صار وما تقبلوش الموضوع بس انا حكيت اللي عندي وهما عارفين لما نبي شي ح نديره ف عشان هكي وافقو و الفتره الجايه ح يجو رجاله دغري وبعدها الامور لخرا نحكو فيهن في وقتهن فاتحه وعرس وكله بعدين … انا ح نكلم محمد خوك دغري و نقوله اني بنجيب رجاله وامتى ما يحددو موعد ح نتمو


"وسكت شويه وهيه تسمع فيه ، ورد يحكي  "


نبراس >> بس مرام تصبري شويه معايا لاني عارف انه امي بذات مش ح تقبل الموضوع بساهل ،يعني من توا سامحيني لو ح تسمعي اي كلمه مش ح تعجبك 


كمل كلامه و كان يراجي في ردها...



        الفصل الرابع والثلاثون من هنا 


تعليقات