رواية لن انساك الفصل الخامس عشر 15 ج1 بقلم ريهام ابو المجد


رواية لن انساك

الفصل الخامس عشر 15 ج1

بقلم ريهام ابو المجد


نغم بصدمة وغل كبير: إية اللي أنتم بتعملوه دا؟؟!

ميرنا بصت لعمران بإرتباك، فهو مسك إيدها عشان يطمنها فهي أتوترت أكتر لإنها عارفة نغم مش هتعمل طيب، بس هو ميل عليها وقال بهمس: طول ما أنا معاكي متخافيش يا حبيبتي.

ميرنا حست بالأمان لمجرد كلامه، فنغم قربت بغل وقالت: هو إية اللي أنا شفته دا؟! مش تتكسفي من نفسك بتغويه طب أعملي حساب إنك أرملة.

ميرنا دموعها نزلت وعمران قلبه بقى بيغلي عشانها فقال بإنفعال وصوت عالي: أخرسي، أنتي إزاي تتكلمي معاها بالأسلوب دا؟

نغم بإنفعال: أمال عايزني أكلمها إزاي أقدملها الإحترام وهي متعرفهوش.

عمران رفع صباعه في وشها وقال: لولا إنك بنت كنت زماني عارف أتصرف معاكي. 

أخد نفسه وكمل بغضب: ثم إنك إزاي تقوليلها كدا ميرنا دي أشرف من ألف واحدة زيك، دا هي اللي تعلمك الأخلاق، وبعدين أنتي جيتي تطلعي غلك فيها طب مفكرتيش إني ممكن أنا اللي عملت كدا وحضنتها، دي حتى بنت زيك، طب أسألي الأول قبل ما تثوري وتقلي أدبك عليها كدا، دا أنتي حتى مزعقتليش ليه؟ إية هو الحرج والغلط مرفوع من عليا أنا، وهي بقى اللي مذنبة من وجهة نظرك.

نغم: أنا بس.......

عمران بغضب: مش عايز أسمع حاجة منك تاني ومتنسيش إن ميرنا ست البنات وتاج فوق راسك أنتي فاهمة.

نغم كانت نفسها تخلي شكلها وحش قدام الكل ويكرهوها لكن خافت لعمران يزعقلها وبكدا هتخسره للأبد لإنها عارفة إن ميرنا خط أحمر بالنسباله، وكمان بعد ما شافتهم بالوضع دا وكمان ماسكة إيده ليها ودفاعه عنها.

نغم: طب أنا عايزة أفهم إية اللي بيحصل هنا دا.

عمران بص لميرنا وابتسم وقال بحب: أقولك أنا رغم إني محبش أجاوب عليكي بس عشان أفهمك الصورة ودا عشان خاطر ميرنا.

سكت ثواني وبعدين رفع إيده اللي ماسكة في إيد ميرنا قدام وشها وقال: أحب أقولك إني أنا وميرنا هنتجوز قريب اووي إن شاء الله وأكيد هتكوني من ضمن المعازيم.

الكلام نزل على نغم زي الصاعقة، وكدا اتأكدت إنها خسرت عمران للأبد فقالت بصدمة: أنت بتقول إية لا مستحيل تعمل كدا.

عمران رفع حاجبه وقال: هو إية اللي مستحيل مش فاهم؟!

نغم بصوت عالي: مستحيل تتجوزها، أنت ليا أنا مش بعد الإنتظار دا كله تقولي إنك هتتجوزها.

عمران بإستغراب: إنتظار إية؟ ومين قالك أصلًا تنتظري أنا عمري ما وعدتك بحاجة ولا لمحتلك بحاجة، وبعدين أنا عمري ما كنت ولا هكون لحد غير لميرنا وبس.

نغم بإنفعال وهي بتحاول تبعد إيده عن إيد ميرنا وبتقول: أبعد عنها أنا مش هسمح بالجوازة دي تحصل.

عمران بعدها عنهم وقال بغضب: هو إية اللي مش هتسمحي هو أنتي مين أصلًا؟ نغم أنا بحذرك كله إلا ميرنا ولو عرفت إنك أتعديتي عليها أو بس قربتلها أنا اللي هقفلك، ومتنسيش ميرنا خط أحمر وخلي عقلك يدرك دا بسرعة لأنه هيكون في صالحك

نغم عرفت إن كدا خلاص خسرت عمران فمش هتخلي ميرنا تكسبه.

نغم بغل: ما دام مش هتبقى ليا يبقى مش هتبقى ليها هي كمان.

عمران: يعني إية؟

نغم: يعني اللي هتشوفه دلوقتي.

نغم بدأت تصرخ عشان اللي جوا يسمعها، وميرنا كانت خايفة لكن عمران كان هادي جدًا ودا اللي وتر نغم وأثار إستغرابها بس كملت وهي بتقول: عمتو الحقي.

زينب خرجت على الصوت هي ومصطفى ودينا والكل.

زينب بإستغراب: في إية يا نغم بتعلي صوتك كدا لية؟

ميرنا حاولت تسحب إيدها من عمران بس معرفتشي لإن عمران ماسكها بقوة وكأنه بيثبتلها إنه مش هيسيبها أبدًا حتى لو هي عايزة كدا.

نغم بغضب: بصي يا عمتو مرات ابنك العفيفة المحترمة ماسكة إيد عمران إزاي.

كله بص عليهم وزينب بصت بس سكتت وميرنا حطت وشها في الأرض.

عمران بصلها وقال: أرفعي راسك يا ميرنا.

ميرنا دموعها نزلت بسبب اللي حصل والموقف اللي حطت نفسها فيه بسبب إستسلامها لمشاعرها.

عثمان: ممكن تفهمنا إية اللي بيحصل هنا دا.

سوزان بغضب: سيب إيدها حالًا.

زينب بهدوء: سوزان أتكلمي بهدوء احنا مش بنتخانق.

سوزان: زينب أنتي مش شايفة ماسكها إزاي؟!

زينب: كلنا شايفين زي ما أنتي شايفة بس الصوت العالي مش هيحل ولا هيقدم ولا هيأخر.

زينب بصت لعمران وقالت: أتكلم يا حبيبي احنا سامعينك.

نغم بغضب: إية يا عمتو الهدوء دا أنتي مش شايفة ماسكين إيد بعض إزاي؟ دا أنا دخلت لقيتهم في أحضان بعض.

زينب: نغم متتكلميش لو سمحتي.

دينا: ما طبعًا لازم تقولي كدا ما هي بتتكلم على حبيبة القلب،  أنتي مش سامعاها بتقولك إية دي بتقولك كانوا حاضنين بعض.

زينب: أعتقد إنك متدخليش أفضل للكل وبعدين أنا سامعة والمفروض تعقلي بينتك وتقوليلها إنها مينفعشي تتكلم والكبار بيتكلموا.

دينا بغضب: أنا مش عارفة أنتي مش بتطيقيني لا أنا ولا بنتي لية؟ طب أنا عشان مرات أخوكي وطول عمرك مش متقبلاني إنما نغم ذنبها إية دي بنت أخوكي المتوفي.

عثمان: إية اللي بتقوليه دا يا دينا احنا عمرنا ما اتعاملنا معاكي بإسلوب مش كويس، ونغم دي بنت الغالي وفي عيونا وعمرنا ما فرقنا بينها وبين ولاد العيلة في حاجة.

دينا: لا بتفرقوا وواضح اووي.

عامر: أنتي دخلتينا في سكة تانية ودا مش موضوعنا الأساسي، وبلاش يا مرات أخويا تحطي في دماغ نغم الكلام دا عشان متكرهناش وتشوفنا وحشيين واحنا مش كدا.

زينب: دينا لو سمحتي بطلي حركاتك دي وبلاش تبعديها عننا أكتر من كدا مش كفاية سفرتيها وغربتيها عن أهلها، وبقيتي تقوليلها كلام مش صحيح واللي قدامنا دي النتيجة، فكفاية لحد كدا لإنك أنتي كدا بتضريها، خليها تعيش وسط أهلها بحب.

دينا بغضب: يعني أنا الأم الشريرة وأنتم اللي حلوين، أنا مبقولشي حاجة مش حقيقية، ولو بنتي دخلت في مقارنة بينها وبين ميرنا هتكون هي الخسرانة لإن مفيش أعز ولا أغلى من ميرنا عندكم.

عثمان بصوت عالي: بس بقى كفاية، إية الكلام الفارغ واللي ملوش لازمة دا، وبعدين أنتي بتدخلي في مواضيع تانية لية؟

اتنهد وقال: مش عايز اسمع نفس حد فيكم تاني أنا الكبير هنا ولازم يكون في احترام.

وبعدين بص لعمران وقال وهو بيشاور بإيده: وأنت أتأدب شوية وسيب إيدها حالًا وأقول اللي عندك احنا سامعينك.

عمران ساب إيد ميرنا عشان عمو وبعدين قال بثقة: عمي  عثمان من غير لف ودوران أنا كنت عايز أطلب من حضرتك إيد ميرنا.

الكل أتصدم إلا سوزان لإنها كانت واثقة إن بعد موت سليم عمران هيرجع ودا هيكون أول طلب هيطلبه.

ميرنا بصت لزينب بحزن لكن زينب كانت هادية اووي.

دينا بإستهزاء: الله الله أنتي لحقتي توقعي دا كمان.

عمران بغضب: مرات عمي أنا مسمحلكيش إنك تهيني ميرنا بالطريقة دي، ومتخلنيش أنسى إنك مرات عمي الله يرحمه.

دينا بغضب: أنت ولد قليل الأدب ومش متربي.

عامر بغضب: دينا متغلطيش في ابني لو سمحتي.

دينا بغضب: لا أغلط لإنه مش محترم.

زينب بغضب: لا محترم أنتي اللي مش محترمة والظاهر إن وجودك هنا وسطنا هيعمل مشاكل فمن الأفضل تشوفيلك مكان تاني أو ترجعي من المكان اللي جيتي منه احنا منقبلشي بالتطاول على حد من عيلتنا.

دينا: أنا قاعدة في ملكي.

زينب: ملكيش ملك هنا يا دينا، لو ناسية إنك أول ما أخويا مات جيتي طلبتي بورثك وأخدتيه أنا أفكرك، أنتي واحدة مكنتيش تحلمي تعيشي في مستوانا ومع ذلك قبلنا بيكي واتعاملنا معاكي بحب لكن أنتي كان هدفك من البداية إنك تدمري العيلة وبعدتي أخونا عننا وخلتيه يقطع صلته بينا وفي الأخر غدرتي بيه لما فلوسه خلصت.

زينب قربت منها وكملت بغضب وتحذير: أنتي هنا ضيفة وبس وضيفة تقيلة كمان، عارفة إن محدش بيحبك ولا حابب وجودك ومع ذلك قاعدة، لا ومش تقعدي بإحترامك لا بتغلطي في بنتنا وفي شرفها وبتكرهي بنتك فينا وكأننا أعدائها.

بصتلها من فوق لتحت وقالت بإستهزاء: وبعدين أنتي أخر واحدة يا دينا تتكلمي أصلًا عن الأخلاق والشرف، أوعي تكوني فاكرة إني مش واخدة بالي إنك قاعدة في فيلا أخويا عامر وبتحاولي تقربي منه بشتى الطرق وبتعرضي نفسك عليه وهو بيصدك عشان عامل إحترام لأخوه الله يرحمه.

دينا أتوترت ووشها جاب ألوان وعامر زعل لأنهم عرفوا؛ ود لإنه كان بيصدها وبيستحمل عشان بنت أخوه نغم.

دينا: أنتي واحدة كدابة ومش محترمة.

زينب ابتسمت وقالت: يا دينا قولتلك زمان بلاش تلعبي معايا عشان هتخسري أصل على قد ما أنا بتعامل مع كله بإحترام وطيبة على قد ما اللي يجي عليا أو على حد من عيلتي هيشوف مني وش مش هيحبه.

بعدت عنها خطوتين وبعدين قالت بهدوء: بصي يا دينا أنا مكنتش في يوم هقول على تصرفاتك وقلة أدبك دي وبالذات قدام بنتك لكن أنتي اللي أضطراتيني أتصرف كدا، أصل اللي يدوس على طرف بنتي أدوس عليه كله، وقولتلك قبل كدا كله إلا بنتي ميرنا بس أنتي مصدقتنيش.

ميرنا فرحت اووي بكلام زينب عنها وقد إية هي أم عظيمة ومثالية مش زي أمها الحقيقية اللي واقفة مش بتدافع عنها لا وبتزعق وبتغلط نفس غلطها القديم وبتطلب من عمران يبعد تاني وكإنها مش مهتمية بقلب بنتها ولا بكسرته.

نغم بغضب وصوت عالي: عمتو مسمحلكيش تتكلمي عن مامي كدا.

عثمان: نغم صوتك ميترفعشي على عمتك.

نغم: أنت مش شايف بتتكلم عن مامي إزاي؟!

زينب: بصي يا نغم يا بنتي اللي بينا أنتي مش هتفهميه أو هتعملي نفسك مش فاهمه، ودا الطبيعي لإن دي مامتك وأكيد هتكوني في صفها سواء غلطانة أو لا ومش هنعاتبك في دا، لكن احنا مش هنعرف نعمل نفسنا مش فاهمين، ويا ريت لما تقعدي مع مامتك تعقليها شوية وتقوليلها بلاش لعب بالنار أصلها هتحرقها هي أول واحدة.

نغم ودينا مقدروش يتكلموا وأخدوا بعضهم ومشيوا من غير ولا كلمة زيادة لكن النار اللي جواهم أتضاعفت ومش هيرتاحوا إلا لما يحرقوا بيها الكل.

زينب بصت لعمران وقالت: وأنت يا حضرة المقدم يا عاقل اللي يطلب إيد واحدة يطلبها كدا دا حتى عيب في حقك.

ميرنا بصتلها بصدمة فزينب ابتسمت وقالت: مالك مصدومة ليه هو أنتي فاكراني هقف قدام سعادتك، دا أنا أمك يا ميرنا يعني محدش هيتمنالك الخير والسعادة قدي.

ميرنا جريت عليها وحضنتها وزينب بادلتها الحضن بحب وهي بتملس على شعرها.

ميرنا: ماما.

زينب ابتسمت وقالت: عارفة أنتي عايزة تقولي إية بس بلاش دلوقتي يا ميرنا.

ميرنا سكتت فعمران وجه كلامه لعمه عثمان وقال: ها يا عمي هنكتب كتب الكتاب أمتى؟

عثمان بصدمة: إية يا ابني هو أنا كنت وافقت أصلًا.

عمران: هو حضرتك عندك إعتراض عليا؟!

عثمان بص لسالم وبعدين بصله وقال: مش وقته يا عمران محتاج وقت أفكر.

سوزان بإندفاع: مفيش وقت عمران مرفوض.

ميرنا بصتلها بحزن كبير ومش عارفة سبب رفضها المستمر لعمران، الأول كان عشان سليم والعيلة طب دلوقتي إية هو سببها للرفض؟! وكإنها سعيدة لما بتشوفها وحيدة وبعيدة عن حبيبها كدا.

زينب بصتلها بغيظ وقالت: أعتقد يا سوزان إن الرأي رأي ميرنا وبس هي مش صغيرة عشان تتكلمي بالنيابة عنها دي حياتها هي وبس، وهي الوحيدة اللي ليها الحق تقبل أو ترفض، محدش فينا ليه سلطة عليها ولا ليه إنه يتدخل في قرار مصيري زي دا.

سوزان: بس.......

عثمان: سوزان زينب عندها حق في كل كلمة قالتها.

عمران تجاهل كلامها ووجه كلامه لعثمان وقال: طيب يا عمي أقدر أجي الفيلا أتقدم أمتى؟

عثمان بضيق: قولتلك محتاج وقت يا عمران وأقفل على الموضوع دا دلوقتي لو سمحت.

عامر زعل عشان أخوه عثمان بيتكلم بالطريقة دي مع ابنه عمران فقال بهدوء: عمران يلا عشان نرجع الفيلا ونادي على أخوك مصطفى يرجع معانا.

زينب: ليه يا عامر ما تسيب مصطفى.

عامر: لا كفاية كدا لازم يرجع الفيلا بقى، وبعدين أنا واخد أجازة يومين عايز أقضيهم معاه.

زينب: خلاص يا حبيبي هناديهولك.

ميرنا كانت زعلانة إن مصطفى هيسيبها اليومين دول لأنها متعودة من ٣ سنين متنامشي إلا لما تطمن عليه هو وملك.

مصطفى نزل وعامر قاله: يلا يا مصطفى عشان نرجع الفيلا.

مصطفى: بس أنا عايز أقعد هنا مع ماما يا بابا.

عامر: يلا يا مصطفى واسمع الكلام.

مصطفى: طب ينفع ماما تيجي معانا؟

عامر بص لميرنا اللي بصت لعمران وبعدين قالت بهدوء: مصطفى يا حبيبي اسمع كلام بابا وبعدين احنا مش بعيد يعني ابقى تعالى شوفني في أي وقت أنت عايزه بس بابا دلوقتي واخد أجازة عشان يقضيها معاك عشان بيحبك وأنت مش صغير وأكيد فاهم صح يا حبيبي.

مصطفى اقتنع بكلامها وقال: فاهم يا ماما بس قبل ما تنامي اتصلي عليا وكلميني وخلي ملك تشوفني عشان مش بتنام إلا لما أكون جنبها وشيفاني.

ميرنا باسته وهو حضنها وعمران ميل عليها وقال: بطلي أحضان واظبطي شوية.

ميرنا بصتله بصدمة من كلامه فهو كمل كلامه كأنه قرأ اللي بيدور في دماغها وقال: ايوا بغير عليكي من أي حد حتى لو طفل صغير، دا أنا أول مرة تحضنيني فيها بعد سنين طويلة فأتظبطي كدا لحد ما ربنا يجمعني بيكي في حلاله عشان وقتها أستخلص منك كل حقوقي.

ميرنا ابتسمت غصب عنها وهو قال: ابتسامتك جميلة اووي تشبهلك.

ميرنا وشها قلب فراولة وهو لمس صوابع إيدها فحست بإحساس لطيف، لذيذ بيداعب كل حواسها.

مصطفى قال: عمران بتقول إية لماما؟

عمران مسكه بسرعة وقال: مش بقول يلا نمشي.

مصطفى رفع صباعه في وشه وقال: بقولك إية يا عمران أنت أخويا تمام إنما تقرب من ماما أو ملك هزعلك.

عمران وميرنا انصدموا من الكلام وعمران رفع حواجبه بطريقة حلوة وقال: أنت بتهددني ولا إية؟!

مصطفى بتحدي: ايوا بهددك.

عمران: أنت قد الكلام دا يعني؟!

مصطفى: مبقولشي كلام أنا مش قده.

عمران رفعه من هدومه وقال: يا ابني متخلنيش أزعلك.

ميرنا حطت إيدها على عمران اللي ماسك بيها مصطفى وقالت: بس يا عمران سيب مصطفى.

زينب ضحكت وقالت: أنت عملت في الولد كدا ليه يا عمران؟!

عمران بغيظ: أصله مفكر نفسه راجل وكبر.

مصطفى بغضب: أنا راجل غصبًا عن أي حد صح يا ماما.

ميرنا: طبعًا يا حبيبي راجل.

وبعدين بصت لعمران وقالت: عمران أنا ليا أسلوب في التعامل مع مصطفى لو سمحت حافظ عليه، وبلاش تتكلم معاه كدا عشان خاطري.

عمران ابتسم ونزله وقال بحب: أنا علشانك أعمل أي حاجة حتى لو هستحمل الولد الغلس دا.

زينب ضحكت وقالت: أنت بتعاكسها قدامي طب أحترم وجودي يا ابني.

عمران باس راس زينب وقال: أنتي حبيبتي يا عمتو.

زينب بحب: وأنت حبيب قلب عمتك يا عمران.

عمران أخد مصطفى وعامر واتجهوا للفيلا بتاعتهم وعمران دخل أوضته وفضل يفتكر اللي حصل بينه وبين ميرنا وحضنه ليها، وأفتكر ريحتها اللي بتداعب أنفه وقلبه سوا، ونفسه ياخدها تاني في حضنه ويضمها لصدره بكل حب وحنان.

وكذلك الوضع عند ميرنا بتفكر فيه وفي اللحظات الجميلة اللي سرقوها من الزمن بس خايفة من اللي حواليها، مش خايفة إنهم يرفضوا لا هي خايفة من رد فعلها هي، لإنها المرة دي مش هتتخلى عنه مهما حصل حتى لو الدنيا كلها وقفت في وشهم بس هي بتتمنى إنهم يوافقوا ويباركوا زواجهم بكل حب.

ميرنا قررت تروح تشوف زينب، فخبطت على الباب ودخلت وزينب وقتها كانت ماسكة المصحف وبترتل أيات قرآنية تريح القلب، أول ما زينب شافتها صدقت وقفلت المصحف وحطته جنبها وفتحت دراعتها لميرنا وقالت بحنية: تعالي يا حبيبتي كنت مستنياكي.

ميرنا ابتسمت بحب وجريت عليها ونامت على صدرها وهي فضلت تملس على شعرها وتردد بعض الأيات القرآنية.

ميرنا: ماما هو أنتي بجد مش زعلانة مني؟!

زينب ابتسمت وقالت: وهو في أم تزعل من بنتها عشان هتتجوز وتعيش حياتها مع شخص يراعي ربنا فيها، هو ايوا هنزعل عشان الفراق بس لما بنشوفهم مرتاحين في حياتهم بنفرح.

ميرنا رفعت راسها وبقى وشها مقابل وش زينب وقالت: ماما أنتي الوحيدة اللي لو مش موافقة أنا مش هوافق؛ عارفة إنه صعب تتقبلي وجود راجل في حياتي وحياة ملك غير سليم.

زينب ابتسمت وقالت: يعني أنتي مش هتوافقي لو أنا موافقتش طب عيني في عينك كدا يا بكاشة.

ميرنا: ماما صدقيني أنتي الوحيدة اللي رأيها هيفرق معايا، أنا مستعدة أعمل أي حاجة عشانك أنتي أغلى حاجة عندي أنتي وملك ومصطفى، أنتي أمي الروحية ودي أقوى علاقة في الدنيا مستحيل تتكسر لإنها لو أتكسرت أنا هتكسر معاها.

زينب مسكت إيدها بحب وقالت: ميرنا يا حبيبتي أنا عمري ما أتعاملت معاكي على إنك بنت أخويا، أنا أول ما ضميتك لصدري من وأنتي لسه بنت كام يوم وأنا حسيت بمشاعر الأمومة تجاهك حتى أنا نفسي كنت بستغرب الشعور دا وكنت فاكرة إنه ممكن يكون شعور مؤقت ومع الوقت والزمن هينتهي كأنه لم يكن لكن حصل العكس كل لحظة بضمك ليا أكتر وكل يوم بشوفك فيه بتكبري قدام عيوني بشوفك بنتي وحبيبتي، ومع الوقت بقيتي أقرب حد ليا وبحس بيكي أكتر من ماما سوزان كمان.

اتنهدت وقالت وهي بتضغط على إيد ميرنا وكإنها بتستمد منها القوة عشان تقدر تكمل وفي نفس الوقت بتبث فيها الحنان: ميرنا أنا قبل ما أكون والدة زوجك سليم فأنا أمك، وقبل ما أكون جدة لحفيدتي ملك فأنا بردو أم، فمينفعشي دلوقتي ألغي الأمومة دي وأفكر بأنانية.

زينب سكتت فميرنا عايزة تحسها على الإكمال فقالت: ماما أنا محتاجة أسمعك.

زينب ابتسمت وكملت وهي بتقول: ميرنا أنا مش معترضة على جوازك أنتي بنتي وأتمنالك الخير وأنتي لسه في عز شبابك وبقيتي أرملة بدري، أنتي فضلتي ٣ سنين بتعاني لوحدك في صمت وأنا كنت شاهدة بس مقدرتش أساعدك.

ميرنا دموعها نزلت على الوجع اللي حاسة بيه واللي مرت بيه فزينب مسحتلها دموعها بحنية وقالت: ميرنا أنتي تستاهلي تكوني من أهل الحب، تستاهلي تحبي وتتحبي وتتزوجي وتعيشي حياتك وسنك وتفرحي وتعوضي سنين الفقد والحرمان والوجع والوحدة، كفاية إنك كنتي سبب في سعادة ابني سليم طوال حياته وكنتي واقفة في ضهره وبتدعميه.

دموعها هي اللي نزلت المرة دي وهي بتقول: كان دايمًا يجي يحكيلي قد إية هو سعيد معاكي، وإنك أنتي الزوجة والحبيبة اللي كان بيحلم بيها، السعادة كانت في عيونه وأنا كنت دايمًا شاهدة عليها.

ميرنا مسحتلها دموعها فهي ابتسمت وقالت: سليم مات يا ميرنا خلاص وأنتي عيشتي السنين دي على ذكراه بس جي الوقت اللي تعيش لنفسك ولبنتك، وتخلي قلبك يعيش من تاني.

ميرنا كانت بتتأملها بحب وبيدور في عقلها ألف سؤال وأولهم هي إزاي كدا؟! إزاي حنينة عليها كدا رغم إن مامتها الحقيقية مش كدا؟!

زينب ابتسمت وقالت: عارفة إية اللي بيدور في عقلك يا ميرنا؛ عشان كدا عايزة أقولك أنا كدا عشان أنا أم وبتعامل معاكي دلوقتي كأم وعاطفة الأم دايمًا بتغلب، وعايزة أقولك أهم حاجة إن الأم مبتكرهشي ولادها ولا بتتمن لهم الأذى بس كل أم وليها طريقتها في التعبير عن الحب دا ومش بتبقى شايفة إنها طريقة غلط وأنتي أم وعارفة يا حبيبتي، فسوزان بتحبك لإنها أم لكن مش عارفة تعبر عن حبها دا.

ميرنا حضنتها جامد وقالت: أنا بحبك اووي يا ماما، وبجد محظوظة بيكي وإن ربنا رزقني بيكي ولو فضلت عمري كله أحمد ربنا على نعمة وجودك في حياتي مش هيكفيكي.

زينب بادلتها الحضن وفضلت تملس على شعرها لحد ما قالت: يلا يا حبيبتي روحي لبنتك زمانها بتعيط.

ميرنا: حاضر يا حبيبتي.

ميرنا وصلت للباب ولسه هتفتحه زينب قالت: ميرنا.

ميرنا لفت وقالت: نعم.

زينب ابتسمت وقالت: عمران شخص يؤتمن.

ميرنا أستغربت كلامها بس زينب كملت وقالت: أنا كان ممكن أرفض أو أكون زعلانة إنك هتتجوزي راجل تاني بس في حالة واحدة بس لو كان راجل غير عمران؛ لإني مش هأمن على حفيدتي غير معاه لإني متأكدة إنه هيحبها أكتر من اللي من صلبه، وهيكون ليها ونعم الأب والصديق.

ميرنا ابتسمت وقالت: شكرًا يا ماما.

سكتت شوية وبعدين قالت: ميرنا عمران بيحبك بجد، أنا بشوف في عيونه لامعة ليكي أشد من اللي كنت بشوفها في عيون ابني سليم ويصعب عليا أقول كدا لكن دي الحقيقة، هقولهالك تاني عمران يؤتمن يا ميرنا.

ميرنا خرجت من عندها وهي حاسة براحة كبيرة وكإن هم إنزاح من عليها، وكإن قلبها كان محتاج للجرعة دي.

رجعت أوضتها وهي سعيدة ودخلت وفضلت شايلة ملك عشان تنيمها، تليفونها رن وكان عمران ففتحته بتردد وقالت: الو.

عمران: ممكن تخرجي في البلكونة؟

ميرنا بإستغراب: ليه؟!

عمران: أخرجي بس وهتعرفي بس خليكي معايا على الخط.

ميرنا: حاضر.

قامت وفتحت البلكونة وبتبص لقته واقف تحت ورافع راسه ليها، داهمتها ذكرى مؤلمة، ذكرى لسه محفورة في قلبها وتاركة وراها أثر لم يلتئم بعد.

دموعها نزلت وهي بتفتكر الذكرى المؤلمة دي يوم ما تركها وراه بكل بساطة وغادر والإنتكاسة اللي حصلتلها.

عمران: دموعك غالية يا ميرنا.

ميرنا بخوف: أنت جاي تعيد نفس السيناريو يا عمران؟! أنت هتبعد من تاني؟!

عمران ابتسم بكسرة وقال: لا جيت عشان أحذف المشهد بالسيناريو، أنا جيت عشان نخلق مشهد جديد بسيناريو أجدد، جيت أمحي الأثر اللي لسه موجود وأبدله بذكرى حلوة تعيش جوانا مدى الحياة.

ميرنا: هتقدر تمحي الأثر؟

عمران ابتسم وقال: لو سيدتي تسمح لي فقط، حينها سأمحو كل تلك الأثر المؤلمة وأترك مكانها حب واحتواء.

ميرنا ابتسمت وقالت: اسمح لكَ سيدي فهلا أتيت.

عمران بصلها بنظرة كلها حب واشتياق، ولو أن للعيون ألسنة لتحدثت عن شوقها، عن حبها، لتحدثت بكل لغة العالم أجمع لتصل بمرادها إلي لب قلبها.

عمران: ميرنا عايز أقولك إني النهاردة بس أقدر أقولك إني أسعد راجل في الدنيا، حب عمري غفرت لي هجري، وردتني إلي موطني ألا وهو قلبها.

ميرنا: رغم أنني أردت أخذ طاري منكَ إلا أنني ضعفت أمام عينيك.

عمران: ميرنا أنا المرة دي جاي عشان أطمنك وأقولك إني مش هسيبك مهما حصل، وهعافر وأحارب عشانك حتى نفسي، المرة دي إيدي هتفضل حاضنة إيدك لأخر العمر ومش هنسحب تاني من حياتك لا دا أنا هقتحمها وهكون أنا الأهم فيها.

ميرنا ابتسمت وقالت: وأنا واثقة فيك يا حبيبي ومش عايزة حاجة من الدنيا غير سلامتك.

عمران بحب: وأنا عايزك بكل ما فيا، ولو أخر حاجة هحققها في حياتي وبعدها روحي تخرج بسلام.

ميرنا بخوف: بعيد الشر عنك يا حبيبي إن شاء الله هنعيش كل حاجة حلمنا بيها، وهنحقق حاجات كتيرة واحنا إيدنا في إيد بعض.

عمران سكت شوية وبعدين قال: ميرنا أنا نفسي أحضنك اووي.

ميرنا ابتسمت وقالت: وأنا نفسي أنام على صدرك وأسمع دقات قلبك.

عمران: وأنا نفسي أحط راسي على رجلك وتلعبي في شعري زي زمان.

ميرنا: وتحكيلي عن كل حاجة وكإنك طفل صغير بتحكي لمامتك عن يومك.

عمران: أنا محتاجاك اووي يا ميرنا.

ميرنا: وأنا محتاجاك أكتر، محتاجة أحس بالأمان اللي فقدته من ٣ سنين، محتاجة أحس بالراحة اللي فارقتني من يوم فراقك ليا، للحب اللي فضل متعلق من يوم بعدك يا عمران.

عمران: وأنا محتاج لأهلي وناسي والوطن اللي أتسلب مني.

ميرنا أفتكرت إنه يقصد على العيلة فقالت: أهلك حواليك أهو يا عمران وإن شاء الله تفضل بينا لأخر العمر.

عمران ابتسم وقال: أنا أقصدك أنتي يا ميرنا.

ميرنا: أنا إزاي؟!

عمران: ما أنتي ناسي وأهلي والوطن اللي سلبوه مني زمان بس أن الأوان إني أرجع لوطني وأحارب عشانه، مينفعشي أعيش عمري كله متغرب في أوطان مش أوطاني.

ميرنا قلبها دق بسرعة وقالت: عمران أنا بعشقك.

عمران ابتسم بحب وقال: وأنا عمر قلبي ما حب غيرك، دا عرف الحب على إيديكي.

فضلوا ساكتين وبيبصوا لبعض وبس وكل العالم من حواليهم مندمج معاهم في عالمهم الخاص.

عمران: يلا أدخلي نامي عشان بكرا إن شاء الله هخطفك لقلبي.

ميرنا: يا ريت كل الخطف يكون لقلبك يا عمران.

عمران ابتسم وقال: ما بلاش الكلام اللي يدوب دا عشان أنا أصلًا لوحدي مش قادر أستحمل بعدك دا.

ميرنا ضحكت وقالت: شكلك هتتحول فألحق نفسي أنا بقى وأدخل.

عمران ضحك عليها وفضل واقف لحد ما هي دخلت وهو رجع الفيلا تاني ولأول مرة في حياته ينام وهو مرتاح، ينام وهو مش خايف من بكرا...


       الفصل الخامس عشر ج2 من هنا 

   لقراءة جميع فصول الرواية من هنا

تعليقات