روايه حافة المنتصف
الفصل الثامن والثلاثون 38
بقلم ايه
نبراس >> ياساتر ياربيييي ياساتر كنكم ؟؟
خالد >> شنصار؟ هضا عمك صح
صالحين>> هوا بات المدام؟؟ شن قالك ؟ اكيده قالك مانبيلكش وجه
نبراس بحت فيهم >> فجعتوني ياراجل انت وياه شن قايللكم على عتلت الباب
خالد >> مش وقته مش وقته تواضع شويه وحول كبريائك وشخصيتك على جنب وقوللنا وليد ولا بنت "خبط على راسه" قصدي هضا عمك ولا لا
ضحك الصالحين ونبراس معاه
نبراس >> هوا اه هوا
صالحين>> باهي وشنقال
نبراس اتكى عالكرسي وحط يديه ورا راسه >> قالي احكي الباتك و على بركة الله
صالحين >> متاكد ما قالكش ما نبيلكش خلطه
خالد >> غير لحظة بس ، يعني هالساعه لي قعدها جوا عشان يقولك احكي الباتك ؟
نبراس >> كني نحس فروحي تحت التحقيق ، امور بين العم ونسيبه ما لكمش دخل
صالحين >> قعدنا ماننفعوش توا ؟
خالد بحت فيه >> خليه يدور من يصبيله في عرسه
صبا نبراس و حط يد على ظهر صالحين ويد على ظهت خالد >> برااا انتو الاثنين
ودفهم وصكر الباب وهما يتمتمو وهوا يضحك
//
//
في نفس اليوم عالمغرب
كان لقمان طالع من حوش جدته و هديل خاشه
هديل >> وين ماشي ؟
لقمان >> فاضي اشغال اليوم ماعنديش ما ندير
ابتسمت >> كيف ما فيش معرض
لقمان >> لا خلي كلاب النار على قول عمي الهادي فيه ، طول نهاري ماسك شغلهم
هديل >> كلا بدر مافيش منه رجا
لقمان>> لا والله اخر فتره راه رايح قانط
هديل >> غريبه
ضحك >> عندك حاجه بديريها ؟
هديل >> لالا نضت من النوم دروحها قايله لقيت روحي خاشه عالمغرب صليت وجيت
لقمان >> شن قايلين لكم عالطلعه بروحكن كيف انتي كيف سيسي
هديل >> والله ونس ومازال ما ضلمتش بكل دوبه كيف اذن
لقمان >> حتى ولو ، المهم بديري قهوة
هديل >> اها نديرلك
لقمان >> اه وبنحكي معاك
هديل باستغراب >> شن فيه
لقمان >> قدامي تو نحكو جوا
خشت هديل للمطبخ و لقمان وراها ، بدت تدير فالقهوه وهيه تراجي فيه يحكي … حطت الفناجين وبحتت فيه
لقمان بهداوه >> هديل ، لو خطبتك توافقي
بحتت فيه وقرنت حواجبها وسكتت
سكت لقمان شويه وعم الصمت في ارجاء المطبخ دقيقتين
تنحنح لقمان وكمل كلامه >> هديل انطرشتي ؟
هزت براسها >> شن قلت ؟
لقمان >> خطبه نلبسو دبله فاليمين ولا اليسار ولا حتى فرقبتك
هديل >> وكيف خطرتلك عاد الفكره هذي ؟
لقمان>> خاطرتلي من زمان بس كنت نستنى انك تاخذي فتره و تفكري مع روحك بعد ما فسختي خطبتك
هديل >> لقمان مش قصدي هكي ، بس قصدي عليش يعني انا وانت تدوي من جدك ولا تبصر معش فهمت
لقمان >> عليش انتي عشان فيه مشاعر لكي واضحه، ومانبصرش معاك
هديل برمت اطفي عالنار >> مش عارفه شن نقولك
لقمان >> قولي اللي في بالك
هديل >> شوف مش ح نستعبط عليك ونقولك لا وكيف وندير روحي مصدومه ، لاني فاهمه او بالاصح حاسه بشعورك وانت اكيد فاهم
لقمان >> كويس "وهز راسه انه كملي"
هديل>> انا حكيت معاك على موضوع انه خو ياسمينه يبي يخطبني وقتلك رآيي ، الفكرة مش في الخطبه بنفسها بس انا نحس فروحي توا مش مستعده
لقمان >> هديل ما قتلكش بنجوزو بعد بكرا، بس كلمه قدام العيله نقول الباتي وعمي وهكي و امك يقعد عندها العلم
هديل بحتت فيه >> ماما بذات ح يكون صعب انها توافق من بعد لي صار مع نبراس
لقمان >> وشن دخلك هذي في هذي ؟؟
هديل >> حتقعد خايفه تسير مشكله فالعيله
لقمان >> هديل انتي ما تبينيش انا قولي عادي مش ح نزعل
هديل >> مش هكي قصدي انا بس يعني مش عارفه
لقمان >> تاخذي وقتك تفكري
هزت براسها >> بس بشرط
لقمان >> اشرطي
هديل >> انه نقعدو زي قبل ما يتغيرش شي علينا
هز براسه >> حاضر
هديل >> وما تعزقليش كلام فنص الهدرزه عشان نتحشم
ضحك لقمان >> برضو حاضر ، وشنو اخرى
مدتله الفنجان >> اشرب قهوتك 🤭
"قيمتك عند الشخص بتعرفها من محاولاته التي يبذلها من أجلك ، وليس من الكلام."✨
//
//
في نفس الليله فالليل ، حكى نبراس الباته لي صار وقاله انه بات مرام جاه وحكى معاه وانه ان شاء الله كل شي تمام …. ف قاله انه خلاص بكرا ح يمشي ويحكي معاه هوا وفرج و يتفقو عالشروط و على يوم الفاتحه
//
//
والليله نفسها برضو
بس في حوش جديد علينا شويه ، حوش الرائد خالد
خش الحوشه بعد يوم طويل فالمركز و مُتعب ، فتح الباب بالمفتاح و كعادتها لما تسمع صوت مفتاحه تقرب من الباب على طول … شافها اول ما خش وابتسم وصكر الباب
خالد >> السلام عليكم
غاده>> وعليكم السلام سيادة الرائد ، وين تأخير اليوم
خالد >> والله حوسه وشغل وصداع نبراس وصالحين
ضحكت >> انتو الثلاثه من يوم عرفتك وانتو اتناقرو
ابتسم و نزل عيونه على بطنها >> ولدنا شن جوه اليوم
غاده >> ولدنا شكله مش ناوي يجي
خالد >> دوبك كيف خشيتي للتاسع خليه براحته
ضحكت >> نديرلك تاكل
خالد >> لالا تالففففف بكل
غاده >> اووووف ، يعني طول اليوم بروحي و تروح تقولي بنرقد
خالد >> تو انتي تنوضي معايا ، ما نعستيش ؟
هزت راسها >> لا ما نعستش
قعمز عالكنبه وكرها جنبه >> باه اهو ياستي قاعدلك هي شن بتهدرزي
قعمزت جنبه >> شن درت اليوم فالمركز وشن صار في خطبة نبراس خطرها وافقو هله عالبنت
ضحك >> قوليلي تبي تقصقصي
هزت راسها >> ايوووه بزبط😂🤭
//
//
عشية يوم جديد
خذا معتز صالحه ، بعد ما سكنتله عشان يشيلها الهله علي اساس انها بتسلم عليهم وتبي تقرب العلاقات
قدام الحوش فالسيارة
معتز >> صالحه انا فهمتك انه ردت فعلهم مش حتكون احسن حاجه ف لو بتزعلي خلينا ننزلو
صالحه >> خلاص وصلنا بعدين انا طلبت منك و انا عارفه لي صاير كله
معتز >> ان شاء الله امي تقعد فالحوش بس مش فحوش امي سالمين
صالحه>> باهي ونعدولهم غادي
معتز >> وحده وحده صالحه خلي امي قبل بعدها حوش العيله
هزت براسها وسكتت، نزلو مع بعضهم من السياره وخش للحوش لقى سهم في وجه دوبه طالع
بحت فيه>> باهي لي شفناك
معتز>> امي جوا ؟
سهم >> اه
وطلق السلام وطلع بدون حتى ما يبحت في صالحه
خش معتز للصاله ، لقى امه مقعمزه
معتز >> السلام عليكم
بحتت فيه وبحتت في صالحه لي كانت وراه >> وعليكم السلام باهي لي عرفت طريق الحوش
معتز مسح علي وجه >> باتي وين
نجوى تبحت في صالحه>> عنده مشوار مع عمك
صالحه قدمت لعندها >> كيف حالك ياعميمه
مدت نجوى يدها مجامله>> الحمدلله "وبحتت في معتز" مشيت شفت ولدك ؟ ولا مازال ما ردلكش عقلك
معتز >> تو نمشي نشوفه يا امي حاضر
نجوى >> امتى فالساعه السعيده ؟ ولا لعند العيل يكبر و ينساك بكل ساد ما مراتك طالبه الطلاق و العيل مش ح يعيش بينا
سكتت صالحه وتبحت في معتز
معتز>> حاضر يا امي حاضر
صالحه >> عميمه انا مش ماسكته على ولده ولا على خلود راه امتى ما يبي يمشيلهم يمشي
نجوى >> ندوي معاه هوا ، بعدين خلود خلاص سيبتها له واسعه
معتز>> مانيش مطلقها خلود
صالحه بحتت فيه
نجوى >> خوها حكى مع باتك وقاله انها تبي تطلق
معتز >> سراج ؟ قصدك قال عادي تطلق وانيس
نجوى >> ماحكو الا وهما متفقين في بعضهم الكلام هضا قاله خوها الباتك مش حتى خلود يعني متفقين كلهم خلاص
انصدم معتز اللي كان متوقه انه خوتها ح يردوها غصب
ونجوى سكتت وصالحه تبحت في ردت فعله
معتز>> وكيف هكي ؟ باتكي ما قاليش
نجوى >> انت بعد اجوزت شاورت حد ؟ ما شاورتش فمش لازم نحن نشاوروك اللي درته على قولك بالحلال وحتى هيه حلال
صبت نجوى من حذاهم مشت للمطبخ
صالحه بحتت في معتز >> خلينا نركبو نشوف شقتك
معتز >> صالحه خلينا نطلعو توا مش وقته
صالحه >> معتز كنك ؟ غلت عليك خلود توا
معتز >> تو انا حاكيلك من اول يوم عرفتك فيه اني متجوز ومش حنطلق لو اجوزتك كنك تقول اول مره تعرفي
صالحه >> مش على اول مره نعرف بس خلاص هيه مصره عالطلاق عليش متمسك بيها ؟
سبقاته عالسياره و صكرت الباب
ركب معتز وبحت فيها>> صالحه زعلتي
صالحه>> خلينا نروحو الحوشنا ، ياريته حتى حوشنا اجار
معتز>> باذن الله تو كله ينحل بس اصبري شويه انا قتلك انه مافيش داعي نمشو الامي انتي اصريتي
برمت وجها للقزاز وسكتت
//
//
واليوم هضا نفسه برضو ، مشى الهادي البات مرام هوا وفرج عشان يتفقو على كل شي … وفعلا كان الكلام بينهم كله عالشروط والمهر و الفاتحه والامور هذينا وعلي اي شي و بالعكس بات نبراس كان قمة فالاحترام مع الصديق وماحسسش انه مش متقبل بنته كنه لهم لانه جاي يحكي في كلام رجاله مدامه وصل لعند الحوش فخلاص مش حيقلل من قدر الراجل …. كملو الرجاله الكلام كله بحضور الصديق ومحمد وطلعو بعد ما اتفقو في كل كبيره وصغيره وانه الفاتحه ح تنقرا الجمعة و العرس حيتفقو عليه الصبايا بينهم وحيكون قريب والطرفين راضيين نوعا ما
.
.
.
وبهكي قعد الحلم حقيقة لسيادة الرائد ومرام ✨❤️
//
//
يوم الفاتحه
فالصبح عند مجد …. ناضت بدري ووتت حاجتها عشان تمشي الحوش هلها، و كانت ك عادتها من اول يوم اجوزت فيه كل اسبوع تخش ادير اختبار حمل كان الموضوع هوس بالنسبة لها … عارفين شعور الحاجه لي تقعدو عشان مش قادرين توصلولها ف تزيد في خاطركم بزياده
وزاد الموضوع من بعد ما عدت للمستشفى اخر مره وقالتلها الدكتوره انه المفروض يسير حمل خلال الشهرين هذينا
كانت مصبيه على المرايه بعد دارت الاختبار تنشف في يديها وتشوف للاختبار يطلعن خطين او تعزقه زي ديما … نزلت راسها شافت خط داكن وخط خفيف بكللل… قربت الاختبار كويس منها وقعدت تبحت فيه زين وهيه مش فاهمه هكي يعني حمل ولا لا
بيدين يرجفن طلعت ومسكت تلفونها طاح منها الاختبار ومش عارفه تلقط نفسها ، ردت مسكاته و صوراته للدكتوره عالواتساب ودزاته لها
مجد>> دكتوره هكي يعني شنو؟؟ حامل ولا شنو
كتبت المسج وصبت فتحت الدرج خذت اختبار ثاني وردت خشت عاوداته وطلع نفس النتيجه ، عيونها توسعن وقلبها بدا يدق ومش قادره حتى تنادي على الصالحين يلي كان فالصاله
كسر توترها صوت مسج من الدكتوره>> مبروك مجد الاختبار باين انه حمل والخط ضعيف عشان الحمل دوبه متكون فالأسبوع الاول او الثاني … لازم بكرا الصبح تكوني عندي عشان نديرو تحليل دم وشوية كشوفات نطمنو ونتأكدو .. المهم الراحه زي ما قتلك
ما ردتش مجد حتى عالمسج ، طلعت وهيه ماسكه الاختبار فيدها وتجري لمكان ما مقعمز الصالحين
الصالحين مستغرب >> كنك مازلتي ما لبستي الساعه قريب تخش عال ١٢
مجد بحتت فيه و دموعها نزلن
صالحين بخوف>> مجد كنك ؟؟؟ وقرب منها مسك وجها
مجد>> صالحين انا حامل شوف والله توا ردت عليا الدكتوره وقالتلي هكي يعني حامل
مسحلها دموعها وضحك >> معش تبكي يا مرعوشه في بيبي في بطنك معقوله تخوفي فيه
ضحكت وهيه مازال تبكي>> لازم بكرا نمشو لدكتوره عشان نتأكدو وقالت لي تريحي
صالحين ابتسم >> حاضر كله حاضر ، مادام قالت لك تريحي معناها تريحي
مجد>> حنمشي اليوم بس مش ح ندير شي والله مانقدرش نسيب فرحة نبراس
صالحين >> حنخلي مراقبات عليك راه اتحركي نروح بيك
مجد>> مازال مانبيش نقول الحد لعند ما نطمن بكرا مانبيش نفرح عالفاضي
مسك يدها >> افرحي ربي مستحيل يرد دعواتك و يكسفك
ابتسمت >> فرحان؟
صالحين >> فرحان عشان انا معاكي بس ما يفرقش اي شي ثاني
رن تلفون مجد بحتت فيه >> حي عليااااا هذي سديم هيا طولنا
صبت بسرعه ، كر يدها
صالحين>> مش قلنا بشويه نحن
خبطت على راسها >> اوبس نسيت😬
﷽{وَمَا كَانَ رَبُّكَ نَسِيًّا}
كَرَمُ اللهِ لاَ يتّأخَّر وإنّما يأتي في الوقْتِ المُنَاسِب..اصبر
//
//
نفس يوم الفاتحه
في حوش الجد وتحديدا قبل العصر بشويه
كان يوم عالمي في حوش عيت نبراس …. العيله كلها ملتمه رغم عدم رضى جميله على اي شي … بس يومها نست انه العروس مرام ونست الظرف االي عندها وكانت فرحتها بولدها فقط ❤️
كل شي كان على اكمل وجه …. من تجهيزات من ناس جايه تحضر من حوسه وفرحه
.
.
.
سهم >> شن الوضع عندك
ليلى >> عارف احلام العصر ؟ هضا لي قاعدين فيه توا 😂 انا مش مستوعبه انه اليوم فاتحة نبراس ومرام
سهم ضحك>> حتى نحن ماحد مستوعب تحسي نحوسو هكي وخلاص 😂
ليلى >> طلعتو للجامع؟
سهم >> توا بنطلعو
ليلى >> حي عليكم بابا ومحمد وعمامي طلعو را يجو وما يلقوكمش يفضوها سيره
سهم >> لا حي علمنا فعلا الا هذي 😂
ضحكت >> قولي شن يسير
سهم >> شنرايك نقرو فاتحتنا معاهم
ليلى >> سهم اربح اربح
سهم >> حاضر 😂😂
صكرت ليلى وبحتت في مرام لي كانت لابسه ومقعمزه وجنبها اسيل الي ماسكه لين ، و حواليها شويه من الاقارب والاحباب اختارت انها تكلم الي تحبهم بس
مرام >> شن صار
ليلى >> توا ح يطلعو
خذت نفس بتوتر>> يارب
اسيل >> اسكتي لعند تنقرا الفاتحه مفروض تسكتي
ليلى >> العادات والتقاليد هذينا را اديريهن ليا في فاتحتي
اسيل>> انتي بذات فمك حنخيطه لكي
ضحكت مرام >> ويالله تسكت
ليلى >> التميتو عليا
صفقت لين ، مسكتها ليلى >> تعالي تعالي نكلمو عمو سهم
لين >> سحم
ليلى >> سهم يا بنتي سهم
//
//
بدر مصبي في نهاية الجنان >> تي هيا ازف وانتو تقول اول مره تقرو فاتحه ويسير عندكم مناسبه نفس التوصاي والهم كل مره
مجد بحتت فيه >> وانت كنك زعلان ولا عشان مش فاتحتك
بدر >> لا اهم شي مراد علم دار احبيب امه تنقرا فاتحته 😒
ضحك نبراس >> فكني من الهبال اه خلي الفاتحه تنقرا على خير
بدر >> كان ما قوبعتها لكي ما يقعد اسمي بدر الدين
نبراس بحت في الصالحين >> الله الله افطنله
بحت بدر في نبراس لي يوصي في صالحين وضحك>> اتوصي في من علي من
صالحين >> حنونه طاحت فيد احنن
ضحكو هما الاثنين وطلعو في جرت بعضهم
بحتت فيه مجد وضحكت >> يستر الله
نبراس >> ح يروح باتي منفصل افطنيله
مجد >> ومعاه فرج😂😂
خشت مجد جوا ، لقت سديم حاطه التلفون على وذنها
سديم >> اهي مجد خشت ، شن صار مشو للجامع ؟
مجد >> توا كيف طلعو كلهم
سديم >> حتى سي السيد؟
مجد >> قصدك معتز؟
سديم هزت براسها >> اه "وشيرت علتلفون" خلود تسلم عليكن
مجد >> سلمي عليها
هديل>> حتى انا
سديم حطت سبيكر >> اهن يسلمن عليك
خلود>> الله يسلمهن رايفة عليكن على قد ما كارهه معتز بس خاطري نكون معاكن في هاليوم
سديم >> ياريتك معاناااا
خلود >> ماجتش مرات السيد؟؟
سديم>> بيش نعجنها كان جت
ضحكت هديل>> هضك اليوم عميمه نجوى قالت جت خشت سلمت وما طولتش ، قالت ماقدرتش نجاملها وطلعو هم الاثنين بسرعه
خلود>> يلا ربي يهني سعيد بسعيده المهم يطلعني من راسه
بحتن البنات في بعضهن وسكتن
سديم >> المهم ماتزعليش روحك انتي و سلمي علي فروجه
خلود >> يوصل خلاص مانعطلكمش بعد تكملو قولولي ودزنلي صور
سديم >> حاضر
صكرت سديم الخط
مجد>> مش عارفه ندعي عليه ولا ندعيله ولد خويا هضا
سديم >> غريب بكللللل بكل لي داره
مجد >> خلاص خلونا في فرحتنا اليوم
هديل >> بنوتي القهوه اكيده ح يجو بسرعه
سديم >> كلهم يداعكو فالمطبخ وحتى شغاله فيه مش مخليين لنا فرصه معاهم
مجد>> الا انا سامحوني ح نتريح مش حنداعك حد
بحتن فيها سديم وهديل باستغراب
حطت يدها على بطنها وابتسمت عيطن سديم وهديل
سديم>> كذاببببه
هديل >> قولي والله
مجد>> اشششش وطن صوتكن😂 مازال ما تأكدتش درت اختبار بس اليوم وبكرا حنمشي للمستشفى نتأكد و بعدها نقولها
اضبطتها سديم >> حي علينا واخيرا حيجينا حفيد جديد
هديل ضحكت>> فضحتي بيها زيدي علي صوتك
ضحكت مجد ، وطلعت هناء من المطبخ >> تعالن يافرخه انتي وياها تسهوكن من مبدري ما رفعتن كاشيك
سديم >> ما معاهمش ستره 😒
//
//
عند الرجاله ، وفي نفس الجامع لي قرو فيه فاتحة صالحين هو نفسه قرو فيها فاتحة نبراس ونفس الناس لي كانو يومها برضو اليوم كلهم قاعدين وبزايدددددد اخرى الجامع مليان برا وجوا ، و الافنديه الي فالقسم والي فالاقسام الاخرى كلهم قاعدين ، بات مرام و محمد و خوت اسيل وباتها وعمها و خالها وكم حد من العيله قاعدين
و ببارك الله لهما وبارك عليهما وجمع بينهما بالخير ✨
انقرت فاتحة نبراس و مرام ❤️
وعلى طول الطلق من الافنديه بدا و اولهم الصالحين الي لحد ما طلع الهادي وباته بيش حلفوله ووقفوه
بدر الي كان واخذ دور خو العريس بحق وحقيقي كان مش معقب جهد يجري هكي وهكي
خبطه سهم على كتفه>> عقبالك يا الاخ
بدر >> مثقل يدك
لقمان>> عليى شن اتناقشو
كان سهم في نصهم مسك واحد يمينه وواحد يساره >> عقبالكم انتو الاثنين مع عرايس الغفله لي ح ندير روحي مش عارفهن من
بحت بدر في لقمان >> قسم بالله كنت عارف انك داس عليا حاجه
لقمان>> طالع منها انت لاخر
سهم >> تستعبطو انتو ، تهيالي حتى فرج الصغير عارف ومسيبين الدنيا كلها تستعبط 🙂
جاهم صوت الهادي >> كلاب النار ، انت يا فرخ منك له .. تحركو مش وقت هدرزه
بدر >> اهربو بسرعه كل حد في سيارته
ركبو في سيارتهم وروحو للحوش ، بيش يكملو باقي الاحتفالات لي متوعدين بيهن النبراس
//
//
عالمغرب عند الرائد العريس ، سقد الافنديه كلهم عنده شور الحوش عشان كان دايرلهم عزومة عشا للعيله و الافنديه اصحابه … و استاذن منهم نص ساعه و طلع ….
ووين كان ماشي؟ طبعا لعند حوش العروس
خشت للمربوعه و ابتسمت وهيه تشوف فيه مصبي ،
على قولت ليلى احلام العصر مش مستوعبه نهائيا لي صار و كم مره تغمض في عيونها وترد تفتح فيهن عشان تستوعب انها في حقيقه وواقع مش حلم
مرام >> سيادة الرائد
نبراس ابتسم>> قلب الرائد
مرام >> انحبك
نبراس قرب لعندها ومسك يدها>> لا هكي الرائد يريح فيها بكل
مرام >> نحن في حقيقه صاح
نبراس>> نعطيك كف عشان تصدقي
مرام >> ياربي امتى تبطل اسلوب التحقيقات والتحريات هضا
ضحك >> ماه انتي احكي كويس
مرام>> ايوه اضحك ديما مكشر
نبراس شد يدها >> كنك اليوم بزبط
مرام >>لا والله جد لانك ما تضحكش واجد
نبراس >> نكدي يعني ؟
مرام >> لالا جدّي بكل
نبراس >> ونحبك بكل
مرام ابتسمت ووخرت >> مروح للحوش ؟
نبراس >> اه
مرام>> من عندكم
نبراس>> من اللي ماعندنش ؟؟ الدنيا كلها غادي … لدرجة خذينا مربوعتنا ومربوعة المرحوم جلال بيش تسد
مرام >> مانحسابكش داير عزومة عشا كبيره على اساس القريبين بس
نبراس >> عزمو روحهم بروحهم كله من الصالحين و خالد ، دارو العار اليوم ومعاهم بدر الدين
ضحكت >> خلاص عديلهم عيب اطول
نبراس>> لا هو مش عيب بس خايف محمد يفصل بس محوتك خلاني نخش
مرام >> تلقاه مصبي فم الباب 😂😂
رن تلفون نبراس رفعه وبحت فيها >> بدا الصالحين خليني نطلع نلحق عليهم را يوكلو الناس حيط ما معاهمش ستره
ضحكت>> تمام
ابتسم ولف بيطلع ورد بحت فيها >> مبروك علينا
ابتسمت >> الله يبارك فيك
ضربلها التحيه بسماطه و طلع عشان يلحق عالدنيا الملتمه غادي
//
//
في الليل بعد ما كملت كل حاجه وتعشو الاحباب والاصحاب و طلعوا الناس كلهم سوا صبايا ولا رجاله معش فضل الا اقرب المقربين
خالد >> المدام تراجي فيا وبحت الساعه ١٢ هذي فاتحه ولا زفة
نبراس>> تي كنك ما جبتها
خالد >> خايفها تتعب مع انه كان خاطرها تجي وخايف علي ولدي يجي عندكم معلش
نبراس>> ما خلا ربي ما عطاه كان جا فرخك عندنا
صالحين >> لا فاطنله قال خايفها تتعب ، عليك رهافة قلب عندك
بحت فيه خالد >> من اللي مبدري نسمع فيه يقول مافيش بيات روحي
نبراس ضحك >> صار كيف الكتكوت
صالحين >> قالها لي سيب الامة كلها ومشا يرعش عندها
ضحك خالد >> مضروبين بعصا وحده يا جماعه محد يعاير حد
صالحين >> بكرا الضربه الكبرى عندنا شغل من صبح ربي
خبط خالد راسه >> هي تصبحو على خير
صالحين ونبراس>> قدامك الخير
ركب خالد سيارته وطلع ، وخش نبراس ينادي على مجد عشان تطلع للصالحين … خطم عالجنان لقى معتز يكلم بالتلفون … بحت فيه وهز براسه وخش
.
.
.
معتز >> توا مروح
صالحه >> طولت بكل
معتز >> ما قدرتش نسيبهم هنا، نبراس داير عشا وزحمه بكل ما فضت الا توا
صالحه >> قتلك شيلني معاك
معتز >> صالحه شفتي اخر مره لما جيتي روحتي زعلانه من امي ف مافيش داعي يقعد الجو متوتر
صالحه >> معتز ما فهمتش انا شن دايره يعني ما قتلكش لا طلقها ولا قتلك طلعها من شقتها ولا شي ، الموضوع كله تعرفنا على بعضنا واجوزنا بالحلال
مسح معتز على وجه>> الفكره مش هكي هما ما همش كارهينك كارهيني انا
صالحه >> خلاص خلاص بعد تروح تو نحكو
معتز >> اهو توا طالع
صالحه >> تمام
.
.
.
خش نبراس جوا لقى العيله كلهم ملتمين بجنب جدتهم سالمين ويهدرزو
بدر >> اهو جا عريس الزمان النادر من نوعه
سديم >> انت تنابش وبعدها يخش عمي الهادي قول ما درت شي
هديل >> يييييييييه بدو هضوما
لقمان >> المشكله كل واحد يدير فروحه عاقل وتختم بهزيبه لهم هما الاثنين
ضحك نبراس >> مجوده صالحين برا
مجد >> مابش يخليني نبات 😒
بدر >> روحي روحي مع راجلك لاصقه فينا هنا كل ثانيتين جايه
جاه صوت الهادي وهوا خاش عليهم >> صكر فمك بالك حوشك وانا ماحد قالي ؟ ورثته وانا مانندريش ؟
ضحكو كلهم و سديم كانت اعلى ضحكه فيهم
بدر بحت فيها >> متشمته عاد انتي
ضحكت مجد لي تبحت فيهم >> ان شاء الله عقبال نفرح بيكم كلكم " قالتها على مسمع الجميع"
بحتت فيها سديم ورفعت حاجبها
سهم >> يبدو انه فيه حد كيفي مل من الاستعباط
ضحك لقمان
بحتت فيه مجد >> ونفرح بيكم حتى انتو "ورفعت حاجبها الهديل "
سالمين >> في شن تحكو انتو
بدر >> يا امي ، عدّي عدّي معايا نجوم الليل
سالمين >> اطلع اطلع برا اطلع
طلع برا >> وانتظريني و عدّي نجوم الليل
طلعت مجد وراه وهيه تضحك بعد ما فضحتهم كلهم 🤭
//
//
وعلى نفس اللمه هذي بس ب اختلاف المكان والزمان
مرن ست شهور و كم ساعة..
لقراءة جميع فصول الرواية من هنا